tgoop.com/mohammed_attia/984
Last Update:
س: نظرت إليه .. ف أحبته 😊❤️
ج: فعملت أكونت فيك وقالت له: معجبة بيك !
وفضل وراها، يسألها ويستجوبها .. لغاية ما عرفها ..
قالها طب مش كنت تقولي .. وأنت من زمان عجباني ..
ومش عارف أفاتحك ازاي !
ومكنتش مصدقة نفسها ..
أخيرا دعواتها استجيبت .. وحلمها بيتحقق ..
بس هو ظروفه صعبة ومش هيعرف يدخل البيت الوقت !
وعدته تفضل جنبه .. تساعده وتسانده .. ومش هتكون لغيره ..
وتمر الأيام .. ما بين صلح وخصام ..
يشد عليها حياتها تضلم .. يتقل وهي تعيط .. يهجر وهي تتحايل !
يرمي كلمتين ناعمين تضحك الدنيا في وشها .. وتتحيا مشاعرها اللي بتموت بالبطيء !
ومحدش فاهم حواليها .. إيه اللي بيحصل فيها ..
شوية مزاجها في السما .. وشوية كئيبة ومبلمة ..
لأن الحب المزعوم صار الترمومتر والمقياس .. وهو الأمان اللي اختارته من بين الناس !
لكنه الوهم يعمي الأبصار .. يشوفه جنة وهو في حضن النار.
واتكوت أعمار وسنين .. يا بنتي فلان متقدم مفيش فيه عيب ..
تجري الخايبة عالحبيب !
- هتعمل إيه ؟!
= اصبري .. مفيش في إيدي حاجة ..
بقولك إيه قومي روقي كده وابعتيلي صورة حلوة أطمن عليك منها !
والصورة تجر صورة .. والكلمة تجر عك .. والعك يسبب قرف .. وتبدأ تفوق ..
- طب وآخرتها ؟!
= أووو .. وأنا أعمل إيه .. أهلي مش موافقين آخد الخطوة عشان أختي لسه هتتخطب، وعشان ورايا جيش وشغل .. طب هقول لأبوك إيه !
شوفي .. أنت تستاهلي حد يسعدك ..
سلام.
وتيجي تعيط ..
وتقول: نظرت إليه ..
فأقولها: يا ريتك من الأول غضيت بصرك .. وحفظت قلبك .. وغلّيت نفسك.
بتختلف التفاصيل شوية .. لكن السيناريو غالبا واحد ..
وتوتة توتة .. الله يقطعها حدوتة.
BY قناة الأستاذ/ محمد عطية
Share with your friend now:
tgoop.com/mohammed_attia/984