tgoop.com/mokshamastor/146
Last Update:
Аф лядан шире, тага азан кафта-колма валхт тячиень шить колга. Кда видеста азомс, мон аф содан фкявок ломань, конац афкукс васьфнелезе тя сюдоф илать — аф кунарда, аф тянивок. Сяка аф содан эсь ширден фкявок ломань, кона марясы лия ломаньтналхнень мархта марстоньшиньконь. Кирдемасторсь, коза нинге кунарда вихца ульсь сувафтф Мокшамасторсь, коса минь тяни эрятама, канды оцюдонга оцю кяж омбамасторс, минцень кунардонь шабраньконьди. Тя пинкнень ёткова явожямась ломаттнень ёткова маряви сембода кемоста. Явожямась тналонь потмоса, ломаньтналонь потмоса, кирдемасторонь потмоса. Мрдасть ся кизотне, мзярда валонкса апак маряк пякстатедезь лама кизос — афкукс кода азондозе тейне щавазе од кизонзон колга. Мрдасть ся кизотне, мзярда аш кода азомс виде мяльхнень ломатнень ёткса. Мзярда ломаттненди лацкас оргелязь уйснон, колазь мяльснон, потмоснон. Мокшетнень валда ваймоснон пяк лама сядакиза каразь инекуйхне, конатнень кядезост пуроптовсь равжа, кяжи азорксшись. Васе састь шинь стяма ширдень инекуйхне, меле састь ши валгома ширень инекуйхне, тоса эсь ётксонк тиевсть якстерь инекуйхне. Сяльде састь нюрьхкяня кемоньшкашка валда кизотне, мзярда мокшетнень ваймосна валхтовсть якстерьхнень шемоню кячказста — тя кизотнень ёткова сатовсь самс эсь ёжезон тейневок. Стама валда пинкт ашельхть мокшень эрямопинкстонк тёжяшка киза, кода кадомазь Тюштянсь. Ся ульсть афкукс валда кизот, катк эрямань сталмотне сяка ашемазь кадонда фкявок шис. Меле, мзярда тя шитне аделавсь, минь меки сёлговоме од ломаньтналонь пякстамгудс, конац мрдафни эсонк оцю аськолксса якстерьхнень пакарю коморозост — уски пяляскодомати, торпингти, куломати. Тя илась аф максонды юкснемс тейне, кодама питнец эрь кирдемасторонь увамать. Тя илать вельде эхярь лятфнеса эрь кирдемасторонь кунардонь койть — кда азорондайхне ушедкшнихть кайгиста увама марстоньшить колга, эста синь аноклайхть ваяфтомс сембонь верса.
BY MOKSHAMASTOR
Share with your friend now:
tgoop.com/mokshamastor/146