tgoop.com/mokshamastor/168
Last Update:
П. И. Левчаев. Кочкаф произведеният. Колмоце томсь. Повесть «Мес ашень кула» (2015).
«Ётась мзярошка пинге — пуромкс, да стама, кодама нинге вестенге ашель. Эрь сёрмадыти эрявсь корхтамс «народть врагонзон» колга, азондомс, мезень кальдяв синь тиендсть афток пеняцямс эсь лангозост, мес сокорхтольхть, ашезь няе душмантть. Макссть шарьхкодемс: кда аф азондат, мезе содат колгаст кальдяв афток кда аф пеняцят эсь лангозт, улема, кирдьсак ширеснон, улема, тонць душманат!
Колма шит мольсь пуромкссь. Минь Бебанонь мархта ащекшнеме сембода фталоня, ашеме кашторда: изь шарфтов кяленьке почаксамс ялгатнень лангс, конат нинге исяк тейнек лездсть, конатнень люпшнеме кядьснон. Кулхцондоме, мезе азондыхть лиятне. А синь сединь путозь каясть:
— Прохлопотали!
— Прозевали!..
— Политическая беспечность!
— Политическое благодушие!
— Политическая близорукость, беспечность, благодушие — врагу пособничество!
Степан Прозоров ювади — нльне сокоты:
— Разоблачим!..
Ушедсь «разоблочандакшнема»: тяшнесть доност — азондсть мезе ашель, — сяконьшовор паннесть кяж… Минь Бебанонь мархта ашеме тяшне, кода лисенди, НКВД-сь стяфтозень пилензон, кармась вещендема ди музе… Беловонди Ельникав кучф сёрмазень! Сёрмадонь: «Сак, кармат покодема «Колхозонь эряфса»: шамсь васта» (М. Бебан, мон, Клещунов, Леонтьев и Л. Макулов туме тонафнема, вастоньке шаватольхть). Эк, мезе: соткс! Серьгядине Саранскяй «душмантть»! Улема… Шарьхкодеви!
…Шоподсь тишековонь 17-це шиц. Эста ваймама шитне улендсть аф ёткшиста ди таргашиста, а 6, 12, 18 ди стак тов шитнень. Ваймама шить алу Бебанонь мархта ащекшнеме «Акша кудняса» — Московскяй куроса, пивнойса, корхнеме сяконь колга: пелендеме. Ладяськ: кда мезе, кда эздонк тя веня конаньге сявсазь (а сявонкшнесть веть, ваймама шить карша) — аф васькафнемс фкя-фкянь лангс.
Тяфтак явоме.
Ловкс панчсть вишнёфкалксне. Кати-коса кеняртькшнесь цёкнайсь. Аньцек монь седизе, улема, марязе кальдявть: тотнась… Кудса тналозе удось ни, изь уда аньцек тядязе, панжезе кенкшть, кизефтемань:
— Косолеть тяшкас? Пекце вачсь?..
— Топоцтан, тядяй. Маттама.
Сиренязе фалу тяфта: самозон мзярс кельк учи, аф мады. Сетьмоняста таргазе ваймонц, тусь эсь уженязонза, ушедсь мтордома ди тошксема… Содайне: озондсь тейне шумбрашинкса. Пичетькшнесь, мес мезьдонга аф ярхцан, мес пяк осалнян… А монь монцень пичефксозель, ди ашине кизефне — ярхцсесь сонць?.. Тянкса тянинге муворгофнеса ди сюцекшнеса эсь прязень!
Пяле веда меле ни азоркс калдорфтозь кенкшкязень:
— Откройте!
Панжезе тядязе ди шуфтомсь кенкшть лангс: сувасть кафта аф содаф таза цёрат. Мон стянь, васьфтине алгань щамса. Синь венептезь ордерть, шуфтоласта пшкядьсь:
— Разрешите обыск!..
Мон ваныне ордерть ди сембе листть алуда ужестонза вярдети оцю тяштеняса тяштьф «Вейзагер» валда башка мезевок изень няе. Валсь аф тяштьфоль, а нльне ёрдафоль сембе кагод лопать келес. Сон якстерель ди оржаль, эцесь пря уезон сязеви пулякс…
— Аньцек обыск? — седи куцюнязень ала шерьхкозевсь васькама.
— Аф ламос сергяттядязь тонценьге. Аф ламос! — пеедезевсь ордерть венептиец. Ди ушедсь кати-мезень вешендема. Кочкасть кафта мархт кагод — кядьса сёрматфт, сотнезень марс ди мярьгсь сявомс мархтон.
— Нят — кальдяв каготт, кядьса тяшнефт — синь мезенди тов?
— А тоза аньцек кальдяфт эрявихть! — низелгодсь сякось.
Мон щань ди кафицьке кядьган сявине кагоднень. Тяса ульсть од азксоне, «Мора мази стирнять колга» азксозе, ялгань сёрмат, М. Безбородовонь кядьса сёрматфонза. Ульсь тяфтама кошардома — нолдамс сёрматфонзон кочкафксонц. Анокламс кочкафксть мярькфоль тейне.
Тядязе стаки ащесь кенкшть лангса. Лисемстон кизефтемань стама вайгяльса, мярьгат, сон ульсь седяла:
— Курок-аф, саят, цёрай?
Мон лоткань. Ванан шаманц, кода кагод акша. Лацкас арьсень ди сань мяльс: «Тя — эльбятькс, следствияса шарьхкодьсазь эди нолдасамазь!» Тянди кемань ди тяфтак азыне тядязтивок: «Таргада [нед.] меле, тядяй, учемак!». Ди няине, кода шерьхкозевсь алудонь трвац эди аськолдань сяда курок — афи няемс кода аварьгоды.
— Нолдак муворозень, тядяй, мон эста тумстон ашихтень пала!».
BY MOKSHAMASTOR
Share with your friend now:
tgoop.com/mokshamastor/168