tgoop.com/muaz_abdulrhman/643
Last Update:
كلنا منعرف أنّه أكتر الأشخاص مواكباً لوسائل التواصل هنن من فئة الشباب صح؟
أكيد صح..كونهم أغلبهم طلاب جامعيين وبحاجة هي الوسائل لحتى تكتمل مسيرتهم التعليمية
وهاد الشي مُشاهد بالغروبات الجامعية والمدرسية المنتشرة بكثرة وغالباً ما تكون مختلطة..
فهي الاحصائية مو عن عبث..
وكمان نحن منعرف أنّه عزّ الشهوة يلي الله جبل الإنسان عليها بتكون ايمتا؟
أي نعم بتكون بعمر الشباب
حلو كتير بلشنا نفهم عبعض
اربط القسم كلمة شباب يلي فوق مع كلمة شباب يلي تحت على شو بتحصل؟
شهوة الشباب + وسائل التواصل المُختلطة
كتير ممتاز عملنا ربط كتير منطقي وكتير عقلاني بين خطورة هاد الاختلاط الالكتروني بالمجموعات مدموجة مع شهوة عمر الشباب
أوووف خطورة؟
شو هتعقيد هاد شو بدك يانا نلغي هل الغروبات هي يعني؟؟
لاء ما بدي ياك تلغيه لأنه صار جزء من حياتنا بس بدي منك تعرف كم قصة وهاد محور البوست تبعي🩶
شو بدي منك؟
●بدي منك تكون قدام أهلك نفس قدام الشاشة نفس قدام شيخ الجامع
الكلمة يلي بتحكيها على الموبايل بهي الغروبات يكون عندك الجرأة تحكيها لشيخك وأستاذك..ويكون عندك جرأة تنعرض على رب العباد
●بدي منك تبتعد عن شخصية الشب/ البنت المرح الكيوت يلي بيمزح وبيضحك وعادي هو كتير فري ولو أنت هيك على الحقيقة مع رفقاتك وأهلك لأنه:
انت قاعد بغروب مختلط+انت بعمر شهوة= رح تساوي فتنة كتير كبيرة
يعني كلمات متل : متتت/ احا / كتير كيوت انت / يالطيف يا...شو أنك نيردة / وغيرها من الكلمات يلي بتساوي ألفة بين الطرف والطرف آخر
● بدي منك تقتصر تفاعلاتك على التفاعلات الضرورية يلي ما بتزرع بطرف قلب الجنس الآخر أي شيء
مثل : 👍 🙆♂️ 🤷♀️ 😅 /جزاكم الله خيرا / شكراً
وابتعد عن: 😂 😁 ❤️ 🫂 🔥..الخ
●بدي منك تكون وازن على الأخير وبأبعد جدية ممكنة بالاخير أنت بغروب علمي مطلوب منك تاخد أو توصل معلومة..
مو أنك تاخد جائزة أهضم شب/ بنت
●بدي منك تبتعد عن شي اسمه خاص لأبعد حد ممكن
ليش طيب؟
لأنه ما خلا رجلٌ بامرأة إلا كان الشيطان ثالثهما..
طيب هاد عل الواقع مو عل الخاص
بقلك لاء بالعكس على الخاص أصعب وأشد لأنه الواقع في حاجز اجتماعي بيمنعك
جارك..حارتك..المجتمع
بينما الخاص مافي غير انت وهي والشاشة
فعندك شي بتحكي قدام الكل وبكل جرأة
وفي كتييير أمور لازم الواحد ينتبهلها ولكن حكيت رؤوس أقلام ولو البوست طويل شوي
قد تظن أنه تشدد أو شو هل الفكر هاد
ولكن أقسم لك أنه في أمور بدأت بمرحبا وانتهت بالزنا
فلهيك حافظ على قلبك وكتابتك وكلامك وشخصيتك وكل شيء خصوصاً الملتزم/ة
ليش؟
لأنه الالتزام بكون بالجامع وكمان يكون بالغروبات مو هيك؟🩶😉
وتذكر/ي أنه الإنسان عبارة عن مشاعر كتير كبيرة خاصة بهاد العمر وممكن أي تصرف يخلي هل المشاعر تطلع من الخزّان تبعها وتنزف بدون ما حدا يعرف هشي
وبالأخييييير هي شو؟
هي خطوات
لا تبخل بهي المعلومات لأنه مو الكل واعي الها
✍️وَمَا وَجَدْنَا لِأَكْثَرِهِم مِّنْ عَهْدٍ
BY وَمَا وَجَدْنَا لِأَكْثَرِهِم مِّنْ عَهْدٍ
Share with your friend now:
tgoop.com/muaz_abdulrhman/643