tgoop.com/nargessadeq/400
Last Update:
دخل وسام من الشغل وراح بوجها للغرفةوهو ضايج وما اعرف السبب شنو...صاح عليه ورحت وراه.. دخلت للغرفة ولكيته متمدد واني مستغربة صارله جم يوم يرجع تعبان...
ريم...شبيك وسام ليش مهموم
وسام...تعبان وحاس ضيق بصدري
ريم... روح للطبيب شوف شكو
وسام...ميحتاج هسة اقرأ قران ارتاح
ريم...ماشي
وسام...تعالي دلكيلي ظهري تعبان
رحت يمه وبديت اسويله مساج لظهره...جان وسام كولش ملتزم ماكو يوم فاتته صلاة الليل ومرات يكعدني لصلاة الفجر إذا اني ما اكعد.
باوعلي وهو يبتسم ويكولي...
وسام... ريم اوصيج الله عليج لا تضربين علاوي
ريم... لا والله ما اضربه بس من يوكح يستاهل
وسام... لا ريم بداعت امج لا تضربينه بعد
ريم... ماشي تدلل
شويه واجه علاوي وكالعادة لازم ينام بحضن وسام وبعدها دخلت زينب وهي راجعة من المدرسة بنيتي شطورة وهادئة كولش.
بدت تمر الأيام ووسام جان طول الوقت مهموم وضايج واني كل يوم اسأله وميجاوبني...ليليان دخلت بشهر الثامن وجنه منخليها تشتغل نخاف عليها...وسارة مصارلها شهر وكامت تلح تريد تطفل ويومية تدعي تريد تحمل.
بعد مرور شهر كامل... ليليان دخلت بشهر التاسع واحنه كل يوم ننفزع بسبب صياحها لأن كامت تجيها ألالام الولادة...وبيوم بليل كملنا شغلنا اني والبنات وكعدنا كلنا العائلة ووسام كاعد يمنه شويه وصاح وسام وكلنا طفرنا اله...
الحجية...شبيك يمه
وسام...ما اعرف اجاني الم قوي بصدري
ابو حسن...بوية خلي اخذك للمستشفى كوم
وسام...لا خالي ميحتاج ما بيه شي
الحجية... يمه باجر تروح للدكتور ان شاءالله
وسام...ان شاءالله
كام وسام وراح للغرفة، رحت اني ورا واول ما دخلت الغرفه...سحبني وسام وحضني حيل..
ريم...وسام شبيك
وسام...مشتاقلج
ريم... لعد شبيك احس وجهك اصفر
وسام...لا ما بيه شي
اخذني بحضنه وجانت اول ليلة وسام يتقربلي وما اشمئز منه وكانه كلبي حاس بشي...
كام وراح سبح ورجع فرش سجادته وكعد يصلي... استغربت وكوتله...
ريم...ليش تصلي هسة انت دائماً تصلي قبل صلاة الفجر
وسام...احسن خاف تاخذني النومة
ريم...ماشي كعدني لصلاة الفجر فدوة
وسام...كومي اسبحي لا تنامين وانتي مو طاهرة
ريم...اسبح قبل الصلاة مو هسة
وسام...كومي لا تخلين الشيطان يوسسلج مو زين النوم وانتي مو طاهرة.
ريم...شبيك وسام تره والله تعبانه
وسام... يالله تعوذي من الشيطان وكومي
ريم...ماشي
كمت بتململ واني متعاجزة لأن صدك تعبانة اريد انام...سبحت ورجعت لكيت وسام حاضن علاوي ودموعه تجري...بعدين رجع علاوي لفراشه واخذ سجاد وبجه بجي خله كلبي يتكسر وجان يحجي ويه سجاد هو نايم ويكوله...
وسام... حبيبي أنت جانت امك تتمناك ومن جابتك ماتت ونحرمت منك نولدت يتيم مثلي اني عشت من صغري يتيم... الله يقدرني واعوضك.
وبعدها دنك على زينب وباسها وهو يمسد بشعرها...
وسام...اوف انتي احس وره هدوئج عذاب يمكن تتذكرين والدتج الماتت كبال عينج وجاي تحنين الها.
بعدين استغربت لما شال ابو الاكبر،ونومه بحضنه...تقربت يمه وكوتله...
ريم... وسام شبيك اليوم
وسام... ما بيه شي بس من زمان ما حضنت جهالي
ريم... انت خوفتني والله
وسام....هههههههه نامي على شنو الخوف
نمت واني بالجهة الثانية فجأة سحبني وخلاني بحضنه وهمس باذني...
وسام... أحبج
نمنا وما حسيت غير على اذان الفجر ارتفع...استغربت اليوم وسام ما كعدني... كمت توضيت ورجعت فرشت سجادتي...صليت وكمت كعدت وسام....
تقربت يمه واني اصيحله... وسام وسام كوم صارت صلاة الصبح اول تالي تفوتها.
ـ هاي شبيك وسام معقولة ما تصلي اليوم
استغربت من وسام كل مرة مرتين اكعده يطفر بس هالمرة اصيح وميسمعني...
ـ وسام راح اجيب مي واذب عليك
هنا بده الخوف يتملكني وجانت رجليه ترجف وكلبي بده ينبض بقوة وكانه اني بسباق...وسام فدوة حاجيني الله يخليك كوم
... تجرأت ودنكت علي وتمنيت لو ما مدنكة
حاولت اسمع تنفسه وصوت كلبه بس ماكو... كلبه واكف وسام راح.
صحت بكل صوتي...وسااااااااااام
صيحة جانت كفيلة يكعد الكل على أثرها...اجوا كلهم اللتموا على وسام واني جانت حالتي مثل الي جاي يحترك بنار...
بديت ارجع ليورة واني اصيح...لا وسام ما مات متاكدة ما مات
فقدت توازني ووكعت وصرت ازحف ليورة واني اتمنى واحد منهم يباوعلي ويكولي وسام ما بي شي...جنت مركزة نظري علي وتمنيت اشوفه يكعد ويبتسملي نفس ابتسامته الحلوة.
بعدها ارتفع صياح خالتي والبنات وما اشوف شي غير صياح وجثة وسام كبالي واني حاصرة نفسي بالزاوية...مرت ثواني وفقدت وبعدها ما حسيت بشي.
ما اعرف شكد مر من الوقت وصحيت واني مرعوبة...صحت بصوت... وسام وينه وين راح
لكيت نفسي بالمستشفى ويمي حسن وليليان وهي تبجي وحسن يفرفح...
BY قصص تُـــنجب العِــبر
Share with your friend now:
tgoop.com/nargessadeq/400