اقصد انزلها باسبوع بمعنى خلال اسبوع تنزل كلها... كل يوم 3 بارتات طويلة جداً وبالتالي تخلص خلال اسبوع 🙄

بارت 86......

رواية #طريق_إلى_النار
//بقلم.. نرجــس صــادق //
خالد... صبرت عله الجرح حد ماخذاني الشيب
وتحملت السنين وضكت ما ضكته
الحنظل و العسل و الزين و الموزين
كلهن جربتهن وانت ذاك انت

ريم... دنيا عفناها اعله موده
تالي  وحّدنه  صفينه
ها يگلبي
الچنّه بي نتباهى وينه
ـــــــــــــــــــــــــــــــــــــــــــــــــــــــــــــــ
ريم...
بعد مرور اسبوع والحجية تقنع بخالو حتى حسن يطلع بيت وحده حسيت بنفسي ثقل عليهم واني راح اصير سبب بتفريق العائلة وكل مرة احاول اكول للحجية حتى ارجع لاهلي واخاف واتراجع...
لحد ما بيوم كاعدين كلنا بالصالة وجان حسن وليليان بغرفتهم.... مرت ثواني وسمعنا صياح ليليان بالغرفة وصوت حسن وهو يصرخ عليها وجان صوت عالي جداً...
ركض خالو ودك الباب عليهم واحنه كلنا نحاول نفهم شكو... ما حسينا غير ليليان فتحت الباب وهي لابسة ملابسها وتبجي..
طلعت تركض ونزلت جوة وهي تصيح...
ليليان... ما أبقى هنا لحظة وحدة
طلع حسن وراها وكللها...
حسن... إذا خطيتي خطوة وحدة برة البيت بعد ما الج رجعة وتحرمين عليه إلى يوم الدين
ليليان... هو انت تريدني اروح حتى تختلي بحبيبتك
حسن... ولج ادبسزز احترمي نفسج ولزمي لسانج شنو حبيبتك ولج حرام تتهمين البنية.
ما حسيت غير ليليان اجتني تركض وهي تبجي وتتوسل بيه...
ليليان... الله يخليج عوفي رجلي واطلعي من حياتنا مروتج لا تخربين بيتي.
ريم... ليليان شنو اخرب بيتج شدتحجين
ليليان... اني اعرف انتي تردين حسن يتزوجج حتى تبقين يم جهالج
ريم... انتي شدتحجين ليليان عيب عليج تتهميني هيج اني مو بحال أي شخص.
حسن... ليليان كافي ولج ادبسزز احترمي وجودي شويه
ليليان... حقك أنت متحس بالي اني احس بي.
ابو حسن...كافي عمي شني ما النه احترام يعني كبالنا وهيج تحجين.
الحجية...شبيج ولج تخبلتي انتي منو خله براسج هالحجي الماصخ.
ليليان.... محد خله ابالي هالشي بس اني اشوف ريم تلف داير مداير حسن علمود تاخذه.
ام حسن....لا والله هذا الحجي خلته براسج امج وانتي الغبية ركضتي صدكتيها.
ابو حسن...كافي وممنوع احد يحجي حرف واحد وانت حسن تعال وراي.
راح خالو وحسن ودخلو للاستقبال وليليان ضلت تبجي والحجية تحجي عليها... وبعد نص ساعة طلع خالو وحسن واجه خالو وكعد كبالنا...
ابو حسن... اسمعوني اني ما احب ولدي يعوفوني وجنت احاول اخليهم يبقون يمي بس حكمت الظروف ولهذا راح يطلع حسن بيت وحده وانتي عمي ليليان اني زعلان عليج ونزلتي من عيني حيل.
كام خالو وليليان حاولت تحاجي وما قبل يحاجيها وراح لغرفته وحسن صعد لغرفته...
رجعت لغرفة الحجية واني احس بالذلة والاهانة... قررت احجي ويه الحجية وارجع لاهلي بكرامتي.

فاضل...
جنت خايف من هذا الارتباط وجنت طول الوقت افكر راح انجح بحياتي وياها لو لا...
وبيوم اني كاعد واجاني اتصال من رقم غريب... جاوبت...
فاضل... الووو منو
دلال... اني دلال ابو علي
فاضل... هلا وغلا
دلال... هلا بيك عيوني
فاضل... شلونج اخبارج
دلال... من سمعت صوتك صرت بخير
فاضل... الله يديمج
دلال... انت شلونك
فاضل... الحمدلله بخير
دلال... متجي علينه مشتاقيلك
فاضل... سؤال دلال
دلال... جواب
فاضل... شنو الي خلاج تحبيني
دلال... ما اعرف بس شفتك مناسب اخلاق وشخصية
فاضل... بس هيج
دلال... اي وحبيتك حب جبير وراح ابقى احبك
فاضل... ما فكرتي اني أكبر منج ب18 سنة الفرق مو قليل
دلال... ميهمني اكو بنات اصغر مني وتزوجن أكبر منهن بسنوات هواي وصار عدهن جهال واستقرن.
فاضل... تمام بس راح اكولج جم كلمة واريدج تتبعيهن
دلال.... تآمر أمر أبو علي
فاضل... انتي بنت أصول وإن شآء الله متقصرين اني عندي جهالي خط أحمر إذا مستعدة تصيريلهم أم فراح اخليج على راسي..
دلال... اخليهم بعيوني واالله وإن شآء الله الايام تثبتلك
فاضل... واني احب المرأة المطيعة
دلال... خدامتك إن شاءلله
فاضل... لا العفو شنو خدامة اقصد ما تكسر كلمتي وإن شآء الله انتي مرتي والج حق عليه.
دلال... الله يحفظك ويديمك إلي
فاضل... ماشي إن شاءلله خير
دلال... يله اني اروح خاف ابوي يجي
فاضل... لا تخافين اني رجلج محد اله حق عليج واني موجود
دلال... ميخالف ما اريد مشاكل خلي نتزوج والله كريم
فاضل... براحتج
دلال... مع السلامه
سديته منها والصراحة ارتاحيت لأنه جنت عبالي طفلة وراح تعذبني بس، عجبتني بكلامها وحسيتها فعلاً تحبني.
بعد ساعة رجع خالد واني جنت ماخذ أجازة علمود الجهال... دخل خالد وجان ضايج ومبين علي مهموم..
فاضل... خيرك خالد حبيبي شبيك
خالد... ابو علي تعبت والله تعبت كلبي مو راضي ينساها
فاضل... شتسوي لعد يا عيني مو شوفة عينك البنية متزوجة
خالد... انت مو تدري هي هسه ارملة
فاضل... اي وإذا ارملة تتوقع تعوف جهالها وتقبل تتزوجك
خالد... لعد ليش
فاضل.... اذا توافق بالزواج راح ياخذون جهالها منها
خالد... وشنو الحل
فاضل... الحل تنتظر رحمة ربك
خالد... ونعم بالله

علاء...
بعد 3 اسابيع على عملية بهاء سمحلنا الدكتور نرجع والحمدلله قررنا رحوعنا بعد 4 ايام وجان بهاء فرحان صح هو صار مقعد بسبب رجله الي نبترت بس الحمدلله لأن بقه بسلامته وما نشل جسمه..
بيومها جنا كاعدين كلنا وبهاء كاعد على كرسيه مقابيلنه... فجأة صدمنا بهاء بكلامه...
بهاء... اريد اكللكم شغلة
علاء... كول حبيبي
عباس... كول خير شبيك بهاء حبيبي
بهاء... اني مستحيل عمري وحياتي انسى وكفتكم هذي بس اريد منكم تكملون فضلكم عليه وتجيبولي ابني.
علاء... شنوو ابنك شنووو؟
عباس... انت متزوج شنووو
مهدي... والله جنت شاك بيك متزوج واكيد الي شفتها باب شقتك ذيج المرة هي مرتك.
بهاء... اي مرتي الي غدرتني وباكت ابني واختفت هي السبب بحالتي هذي.
علاء... انت شتحجي ولك عقلي وكف، شوكت تزوجت وشوكت صار عندك طفل وشلون هي السبب بحالتك.
بهاء... تزوجت قبل وفاة الوالد بشهرين لأن الوالد الله يرحمه عارض زواجي مثل ما عارض زواجك بس انت جنت شجاع وخذيتها بشرف وبكرامة اما اني ما جانت عندي الشجاعة اواجه والدي وتزوجتها بالسر.
عباس.... منو هي ومنو اهلها.
بهاء.... بنت ابو عمر
عباس... صدك تحجي ما لكيت غيرهم عائلة زايعتها الدنيا بناتهم وولدهم بالملاهي.
بهاء... جانت عامية عيوني بحبها وتزوجتها بالسر واكتشفت هي مو عذراء وردت اطلكها وصدمتني بخبر حملها واضطريت اخليها لحد ما تجيب اخذ ابني واطلكها.
علاء... وشصار بعدين
بهاء... بيوم ولادتها اني كوتلها تجيبين الطفل وتنطينيا وانتي تروحين بحال سبيلج وامها جانت موجوده هددتني امها اذا حاولت اتقرب للطفل واخذه راح تدز عليه ناس يكتلوني وبوقتها ما اهتميت لتهديدها ورجعت لبيتي.. وثاني يوم ولدت والحمدلله جابت ولد وسميته وجنت فرحان بي حيل... وبعد أسبوعين صدمتني بخبر هزيمتها هي وابني جنت مثل المجنون دورت بغداد شارع شارع وبيت بيت وما لكيتها واكتشفت نهزمت هي وابني لخارج العراق بمساعدة امها وخواتها... دزيتلها تهديد إذا مترجع الطفل اضل وراها وراها لحد ما اللكاها واخذ ابني غصبا عليها... وصلها التهديد ورجعتلي برسالة... احسب نفسك بعداد الموتى اذا تقربت لابني... وثاني يوم صار هذا الحادث الي بسببه خسرت رجلي.
علاء... حقيرة والله ثم والله إلا اطلعها من جوة الكاع وابنك يرجعلك.
عباس... اني دواهن هيج نسوان اني اعلمها عوفها وراي حبيبي الا اخليها تتوسلك والله.
بهاء... متهمني والله ولا نفسي تهمني اريد ابني لأن ما اريده يتربى عند هيج انسانه.
مهدي... ان شاء الله يرجعلك لا تهتم ولا تضوج.
مرت الايام وصار وقت رجوعنا للعراق... بعد ما كملنا كل الاجراءات وصار وقت. اقلاع الطائرة... وبعدها توجهنا نحو العراق جانت كلوبنا مشتاقة وبكل لهفة نحسب دقيقة دقيقة حتى نوصل لبلدنا...
بعد مرور ساعات والفرحة نرسمت على وجوهنا واحنه نشوف نفسنا نزلنا بمطار بغداد... الحمدلله وصلنا وبس بالعراق يله حسينه بالراحة...
من بعيد شفنا خالد وهو منتظرنا بالمطار.... جنت حيل مشتاقله ركض عليه وحضني بوقتها بجيت من كل كلبي وجانت دموع الفرح..
سلم على عباس ومهدي وبهاء واخذنا بسيارته للبيت.. وصلنا البيت واني كلبي خلصان على شوفة ودق وامي وابني.. نزلت ودكيت الباب بكل لهفة... جانت رجعتنا مفاجئة وما قبلت خالد يكوللهم...
اجاني صوتها الناعم واني كلبي طار وفرفح...
ودق... منو
علاء... فدوة اروح لصوتج اني علاء يبت كلبي
ودق... علاء صدك اجيت
فتحت الباب وشمرت نفسها بحظني واني مثل للعطشان ولكه المي... حظنتها لحد ما ارتويت....
ودق... حبيبي مشتاقلك ليش مكلت راجعيين
علاء... سويتها مفاجئة الج يبعد عيوني
ودق... اوف الحمدلله على السلامة يروحي
علاء... الله يسلمج حياتي
مهدي... احم احم نحن هنا تره صار ساعة نباوعلكم شنو متستحون ههههههههه
ودق.... الحمدلله على السلامة خويه اسفين الحب وما يفعل
مهدي... الله يسلمج خيتي
ودق... الحمدلله على السلامة خويه بهاء الف الحمدلله على رجعتك بالسلامة
بهاء... الله يسلمج ام موسى اصيلة.
دخلنا جوة وجانت امي كاعده بالصالة ومن شافتنا بجت وصارت ما تعرف تهلهل لو تهوس.. ركضت عليها ودنكت بست ايدها وراسها وهي تحظني وتبوس بيه... اجه مهدي سلم عليها وهي حاظنته وتبجي... بعدها باوعت لبهاء وكامت ركضتله...
ام علاء... يبعد امك شوفتك رجعتلي حياتي
بهاء... حبيبتي الغالية والله شوفتج الي رجعتلي حياتي
ام علاء... يمه الف الحمدلله من شفتك سالم ما قصرتي ياام البنين.
بهاء... الحمدلله
كعدنا كلنا بعد ما اجت عمتي وسلمت عليها وكلبي رف على وليدي موسى... سمعت صوته وهو يبجي ركضت للغرفة واني متلهف لشوفته... اوف اخذته وخليته على كلبي واشم بريحته واحس نفسي بعدني مشتاقله...

علاء... يا حبيبي يبعد ابوك وليدي مشتاقلك
ودق... واحنه هم مشتاقيلك والله
علاء... خو ما تعبج
ودق... لا زين بس، الي تعبني بعدك
علاء... رجعتلج يروحي
ـــــــــــــــــــــــــــــــــــــــــــــــــــــــــــــــ
توقعاتكم للقادم...؟؟
نرجــس صــادق ✍️

بارت 87.....

رواية #طريق_إلى_النار
//بقلم.. نرجــس صــادق //
خالد... بيش احلفك
واني ادري بروحي مو ذاك العزيز
حتى اگول بداعتي

ريم... خميت الوجوه اشكال
وبست كل العيون الناويه تشوفك ،
ـــــــــــــــــــــــــــــــــــــــــــــــــــــــــــــــ
ريم...
حسن وليليان نقلوا غراضهم لبيتهم الجديد وبكل مرة احاول احجي ويه الحجية بس مجاي يصيرلي مجال وليليان اجت حتى تعتذر مني... صح سامحتها بس بقت بعقلي كلماتها...
وبيوم من الأيام...
اني بغرفتي ارتب بيها وجان علاوي كاعد يمي... اجه يمي وحضني...
علاوي... ماما اريد بابا
ريم... حبيبي بابا بالجنة
علاوي... خلي ياخذني وياا
ريم... اسم الله حبيبي
حضنته واني متحسفة على هذا الولد الي ضاعت طفولته وصار الحزن مخيم على حياته.. وكل مرة افكر اخذهم وارجع واتذكر علاوي مراح يرتاح لأن هنا دائما يكول اني اشوف بابا بالبيت.

مرت الأيام ورجع الدوام وعلاوي وزنوبة داوموا بس علي جان يكول اني ما احب المدرسة بس بابا كلي داوم...
ومن هاليوم علاوي صار كلشي يسوي يكول بابا كلي.. صرت أخاف وكل فكري الولد متلبسة جن بس بعدين عرفت علاوي كل يوم يحلم بوسام.
بعد شهر وليليان حاولت أكثر من مره تصالح خالو بس رافضها رفض كلي... وبكل مرة تجي من بيتها تكعد تبجي وتشكي... وبيوم اجتي هي وحسن وجانت تبجي وحسن ضايج كولش...

ريم... شبيج ليليان
ليليان... من يوم إلي طلعنا لليوم وحسن مطايقني وبس يصيح عليه ويكلي ما اريدج.
سارة... ليش هيج يكلج
ليليان... ما اعرف بس هو يمكن كرهني لأن بسببي افترق عن اهله.
سارة... تره حقه انتي غلطانه
ريم... لا اني السبب لو ما اني جان ما سويتي هيج
ليليان... لا والله اني غلطانه خيه اني سمعت كلام امي.
سارة... رجعي واعتذري منه وكوليله غلطت واريدك تسامحني
ليليان... إن شاء الله
ريم... واعتذري من خالو همين وان شاءلله يسامحوج.
ليليان... إن شاءلله هسة اصالحه.
راحت ليليان حتى تصالح خالو واني رجعت لغرفتي وجانت الأيام تمر طبيعية بس كل هالايام ثكيلة واني وحدي اتحملها.


ودق...
بعد رجعة علاء من السفر رجعت لمتنا وضحكتنا بس كلنا لاحظنا تغير بهاء وصار واحد. منا واغلب وقته منعزل وبكل مرة ادخل علي لغرفته اللكا يبجي وهذا الشي قلقني..
وبيوم جنت بغرفتي اقره واني تعبانة فجاة سمعت صوت صرخة بهاء وهو يصيح بالتلفون... نزلت اركض وشفت بهاء يحجي بالتلفون ويصيح والي سمعته هو...
بهاء... شوفي ولج واالله لاندمج على كل لحظة بعدتي بيها ابني عني.

بعدها سد المكالمة وباوع على عمتي وعمتي جانت متفاجئة ومنتظرته يحجي... وبالاخير حجه واحنه نصدمنه...
بعد ما حجالنا عمتي كامت تبجي وتحجي علي ودكوله...
ام علاء... ليش يمه ليش ضيعت نفسك هيج
بهاء... يمه هذا المكتوبلي
ام علاء... يمه سودة عليه وهذي الادبسزز وين مولية بالولد.
بهاء... ما اعرف بس وين تروح مني اللكاها اللكاها.
ام علاء... يمه ديروبالكم منها مبينة ادبسزز

حسيت بألم بهاء وهو يحجي عن ابنه وجانت الغصة واضحة على وجها.

بعد مرور اسبوع وبيوم احنه كاعدين كلنا ودخل مهدي وهو ضايج... جان علاء منتظره يهدأ حتى يسأله... شويه وكله علاء..
علاء... شبيك مهدي
مهدي... اريد اتزوج
علاء... اي تدلل لعد شبيك ضايج
مهدي...البنية الي حجيتلكم عنها تتذكروها
علاء... اي شبيها
مهدي... ابوها يريد يجبرها على أبن عمها واني اريدها
ام علاء... يمه فدوه مو حمل مشاكل لا تذب نفسك بسالفة بيها عمام إذا يريدها أبن عمها عوفها وازوجك اغاتها.
مهدي... يمه صدك تحجين
ام علاء... اي يمه سالفة بيها عمام ختولي
علاء... مهدي البنية تريدك لو لا
مهدي... أي تريدني
علاء... نروح نخطبها ونشوف الرد شنو إذا رفض ابوها انساها
مهدي... شنو انساها صدك تحجي
علاء... ما عندك غير حل
مهدي... خلي نروح نخطبها وبلكت يقبل ابوها.
علاء... إن شاءلله خير


فاضل...
مرت الأيام واجه يوم زواجنا وجنت بشعور متناقض فرحان وخايف... جنت خايف من حياتي ويه هذي البنية خايف اضلمها وياي..
وبيوم كاعد بالبيت واجاني اتصال... جاوبت وجانت الصوت مو غريب عليه..
فاضل... الووو منو
علا... شلونك فاضل
فاضل... علا شتردين
علا... اشتاقيتلك
فاضل... هيج بكل بساطة دكوليها مو انتي مرة متزوجة
علا... تطلكت اني
فاضل... لا تنسين اني رجال متزوج ومرتي متقبل احجي ويه بنات
علا... بس اني مو اي وحدة اني ام جهالك
فاضل... قصدج طليقتي
علا... تندمت على طلاكي منك
فاضل... تستاهلين
علا... شعجب اخذت وحدة بكد بنتك
فاضل... احبها وتحبني
علا... مستحيل تحبها واني اعرف كلبك متعلق بيه
فاضل... هههههه غلطانه بعد يومين زواجي شتحجين انتي.
علا... اي تاخذها لفراشك بس، كلبك إلي.
فاضل... لو جانت هي مثلج جان اخذتها للفراش بس هذي بنت اصول واصيلة لهذا اخذتها حتى تشاركني حياتي.
علا... ماشي الله يوفقك
فاضل... شكراً

سديته منها واني ضايج منها وبكل صلافة ترجع تتصل عليه...
ثاني يوم الصبح صحيت على اتصال... كمت وغلقت جهازي... غسلت وبدلت وجنت مخطط اروح ارتب امور العرس اليوم حنة وباجر العرس...
فتحت جهازي وجان اكو 4 مكالمات من نفس الرقم... اتصلت علي... اجاني صوتها..
دلال... صباح الخير
فاضل... صباح الورد شلونج
دلال... الحمدلله بخير
فاضل... هذا الرقم مالت منو
دلال... مالت امي
فاضل... انتي ما عندج موبايل
دلال.... لا
فاضل... ماشي باجر اجيبلج
دلال... لا اريد سلامتك بس
فاضل... هذا واجبي
دلال... مشكور ابو علي
فاضل... كوليلي فاضل عوفي ابو علي
دلال... تمام
فاضل... انتي وين
دلال... بعد ساعة اروح للصالون
فاضل.. تمام من تروحين خابريني هناك
ضليت اسولف وياها لحد ما ترخصت وراحت واني رحت حتى أكمل كل شغلي.
مر اليوم طبيعي واني رجعت للبيت هلكان تعب وجانت الساعه ب8 بالليل... دخلت وشفت خالد كاعد وهو ضايج... استغربت واني اشوفه متنفرز...
فاضل... شبيك خالد
خالد... راح ارجع اسافر
فاضل... ليش
خالد... على شنو باقي هنا لعد إذا الي معتبرهم اخوتي طعنوني
فاضل... شكو خير
خالد... بيوم الي اجوني وسمعوني تسجيل بصوت ريم وهي دكول ما اريده وخلي يشوف حياته جان هذا تخطيط منهم.
فاضل... شنووو وانت شمدريك
خالد... عرفت بطريقتي
فاضل... غير يردون مصلحتك
خالد... وهمة ما كانو يعرفون بتصرفهم طعنوني وأذوني
فاضل... بس هذا مو مبرر يخليك تعوفنا وتروح
خالد... ما عندي احد هنا بعد عليمن باقي
فاضل... واحنه مو بعينك.
خالد... ابو علي انت راح تتزوج وتعيش حياتك وخواتي كل وحدة وعائلتها والي معتبرهم اخوتي طلعوا مو كفوو لهذا ما الي احد بعد.. ارجع اسافر احسن.
فاضل.. قرارك الأخير
خالد... أي الأخير
فاضل... ماشي
ساندته على سفره لأن اريده ينسى وبلكت من يبتعد ينسى وما جان ابالي خالد مستحيل ينسى.
ثاني يوم الصبح صحيت على صوت رواء وهي تكعدني..
رواء.. صباح الخير عريسنا كوم يله
فاضل... صباح النور هلا حبيبتي
رواء... يله صار وقت دكوم هم يله نلحك
فاضل... ماشي، شوكت اجيتي
رواء... قبل ربع ساعة
فاضل... تمام
كمت غسلت ورجعت لكيت رواء محظرة الريوك.. تريكت وطلعت لمكان عملي اخذت اجازة ومريت على خالد وكوتله يرجع للبيت من وقت..
رجعت للبيت وجانت رواء محظرة كولشي ومرتبة البيت...
مرت الساعات والكل اجه والبيت نترس والي فاجئني علا وهي تدخل للبيت بكل صلافة وراحت لجهالها وهي تحضنهم وكل ضنها بعدهم يحبوها بعد ما شمرتهم وراحت...
جهزت نفسي وبكل أناقة طلعت كبالها حتى احرك كلبها... مجانت تهمني بس فاجئتني صلافتها.
صار وقت الزفة واني اخذت جهالي وتوجهت للسيارة.. صعدت وتوجهنا لكربلاء..
بعد ساعتين ونص وصلنا لبيتهم.. نزلنا ورحبوا بينه وجنت منتظر يكلولي ادخل... وبعد ساعة اخذني عمي بأيده ودخلني.. دخلت وكعدت يمها وهي جانت مدنكة ومغطين وجها.. شوية وكالوا يله... اخذتها وطلعت واني احس بالفرحة الي ما تنوصف..
بعد نص ساعة طلعت سيارتنا وطول الطريق وهي ترجف.
وصلنا بعد ساعات ونزلتها ونزلت وجان الكل متحظر لجيتنا... دخلنا جوة ورفعت الغطه عن وجها وصدمتني بجمالها... كعدت واني كعدت يمها واجيت اللزم ايدها دفعتني وهي ترجف... حسيتها متوترة واضطريت اسكت.
ـــــــــــــــــــــــــــــــــــــــــــــــــــــــــــــــ
توقعاتكم للقادم...
البارت قصير لأنه داحظر للبارتات القادمة....
نرجــس صــادق ✍️

بارت 88.....

رواية #طريق_إلى_النار
//بقلم.. نرجــس صــادق //

خالد... احبابك نسوك وسدوا البوب
وناموا گلوب مشابگة گلوب

ريم... هلي خلو الحجي مدثر
انه شبيدي العمر ركضه
هلي لو بيدي ما اكبر
ـــــــــــــــــــــــــــــــــــــــــــــــــــــــــــــــ
فاضل...
بعد ساعتين صبوا العشه وبعد ما الكل تعشه بدت النااس تروح وبقوا بيت عمي وبيت خالي واخواتي... دخلني عمي لغرفتي وجانت الفرحة مسايعتني...
دخلت للغرفة وجانت دلال كاعدة على الجرباية... تقربت يمها وكعدت وتفاجئت منها وهي تبتعد عني... حسيت بيها خايفة وجان ابالي متوترة وخايفة.. بعد ما طلعوا كلهم وبقت بس امها واختها، ثواني وطلعن واني رحت قفلت الباب ورجعت يمها...

كعدت يمها وكشفت وجها وجانت ضايجة ومتوترة... تقربت يمها واني اريد اهدأها،  دفعتني وكامت وهي تتنفس سريع، خفت عليها ورحت يمها واني اريد اعرف شبيها...
فاضل... شبيج دلال
دلال... ما اعرف اختنكت
فاضل... من شنو
دلال... ما اعرف بس احس روحي تريد تطلع الله يخليك اطلع وعوفني وحدي
فاضل... دلال شبيج خوفتيني خلي اخذج للمستشفى
دلال... ميحتاج بس عوفني الله يخليك
فاضل... ماشي

طلعت واني بالي يمها، شبيها معقولة متريدني، لا بس هي تحبني وهي جانت فرحانة شصار بيها هسة.. رحت لشيماء وحجيتلها إلي صار وصعدت تركض للغرفة وصعدت وراها، جانت دلال كاعدة بالكاع وشكلها مرعب وعيونها دم وهي تبجي وبس شافتني صاحت...
دلال.... اطلع بره الله يخليك خنكتني ما اريدك
شيماء... شبيج دلال ولج شكو
دلال.... طلعي منا طلعي
فاضل... دلال حبيبتي شبيج فدوة بس حاجيني
دلال... اكرهك ما اريدك اطلع

طلعت بره واني مصدوم، شبيها شنو صار هاي مو دلال الي جانت تحبني.. نزلت جوة واني احس عقلي راح ينفجر، تلكتني امها وهي دكولي..
ام فارس... ها عمة شصار شبيك شو نازل وعايف مرتك
فاضل... عمة اسألج سؤال
ام فارس... أي كول عمة
فاضل... دلال بيها شي مريضة بشي
ام فارس... لا يمه أبد البنية صاحية وكلشي ما بيها أقسم بالله
فاضل... زين مجبورة عليه لو لا...
ام فارس... يمه الحجي بيناتنا البنية كتلت روحها عليك وهي رايدتك حتى قبل لا اهلها ينطونها.
فاضل... ماشي
ام فارس... ليش يمه شبيها بس لا منعتك عن نفسها
فاضل... ما اعرف بس تقربتلها صاحت اختنكت منك اطلع وعوفني.
ام فارس... سودة بوجهي صخمت وجهي هالبنية هسة اخابر ابوها واخوتها والله
فاضل... اصبري عمه شتخابرين البنية مريضة واني ما عندي شي اريدها ترتاح.
ام فارس... لا عمة خليني اخابر اهلها
فاضل... الله يخليج عمة مو وكتها البنية مريضة صعدي شوفيها اني ما تقبل ادخل عليها.
ام فارس... ماشي

صعدت عمتي واني صعدت وبقيت واكف يم الباب واسمع صياحها وهي تصرخ على شيماء...
شيماء... دلال احجيلي شبيج
دلال... ما بيه شي بس عوفوني وحدي اختنكت
شيماء... ولج منين اختنكتي
دلال... منكم كلكم
ام فارس... ولج شبيج صخمتي وجهي شبيج ولج
دلال... يمه اخذيني وياج فدوه
ام فارس... سودة بوجهي ولج تردين نصير علج بحلك العالم شاخذج وياي غير انتي عروس اليوم.
دلال... يمه ما اريده
ام فارس... ياااا ولكم البنية تخبلت

طلعت شيماء واجتي يمي وهي تسألني...
شيماء... فاضل شسويتلها
فاضل... والله كولشي ما سويتلها
شيماء... حاجيتها شي
فاضل... لا والله ما حجيت أي شي
شيماء.. وآلله ما اعرف شبيها
فاضل... عوفنها خليها ترتاح واني راح انزل انام بغرفة خالد
شيماء... والعالم هاي شنكللها
فاضل... شنو شدكليلها شيماء اني مو صغير اعتبري هذا أمر مني
شيماء... خوش خويه اعتبره صار

نزلت نمت جوة بغرفة خالد وجانت إيمان كاعدة يمي وهي تسألني على دلال وحالتها... فجاة دخلت رواء وهي دكلي...
رواء... فاضل اللحك دلال وكعت

طفرت وركضت لغرفتي ولكيتها متمددة بالغرفة وامها يمها وشيماء تغيرلها ملابسها...
فاضل... بسرعة شيماء ستريها خلي اخذها
شيماء... اي ثواني
كملت شيماء ونزلت عليها شلتها وطلعت بوجهي للمستشفى... وصلنا لهناك وخليتها على السدية واني اباوع لوجها تعبان..
دخلوها للغرفة واني احس رجليه بعد ميشيلني وحاس دلال بيها شي.
بعد ساعة كال الدكتور تكدرون تطلعوها بعد ما انطوها أبر ومغذيات.. رجعنا للبيت واني طول الوقت اباوعلها ومتمني نظرة منها بس جانت كل ملامحها قاسية حتى نظرة مباوعتلي للحظة شكيت هذي مو دلال نفسها الي تحبني..
نزلت وراحت بوجها لغرفتها واني صعدت وراها وجنت متأمل تتقبلني... دخلت عليها ونصدمت واني اشوفها كاعدة بالزاوية وعيونها دم.. باوعتلي وصرخت...
دلال... اطلع بره ما اريدك
فاضل... دلال بس احجيلي شتحسين
دلال... اطلع بره ما اريد اشوفك

طلعت واني خايف عليها خاف تاذي نفسها... رجعت لغرفة خالد وبعد ساعتين... نمت بدون ما احس بشي.

ريم...
تمر الأيام والحياة تمر واني كل بالي يم علاوي الي صار معتزل ومتوحد وكل وقته لازم كتابه ويقره وميقبل يطلع ولا يقبل يرتاح... كل وقتي احاول اطلعه من حزنه، احس كبر اكثر من عمره بعشر سنوات جان فراق وسام عذاب على علاوي.

جنت كاعدة بغرفة الحجية وزينب يمي اقريها.. اجاني علاوي وهو ضايج..
علي... اريد اروح ازور قبر بابا
ريم... حبيبي شبيك
علي... كتلج اريد اروح ازور قبر بابا
ريم... ماشي اخلي جدو ياخذنا ونروح لقبره
علي... اليوم
ريم... حبيبي ما نكدر اليوم تأخر الوقت
علي... اريد اليوم
ريم... شبيك حبيبي ماما شصاير ليش إلا اليوم
علي... مشتاق لبابا وهو مشتاقلي
ريم... سودة عليه حبيبي
حضنته وبجيت من كل وكلبي وجانت أول مره اشوف علاوي يحجي بألم بدون ميبجي...
اجتي الحجية وشافتني ابجي، سألتني وهي تباوع لعلاوي ومستغربة..
الحجية... شبيج يمه
ريم... فدوة حجية ابني خايفة علي شوفي شلون صاير بس يبجي وحتى أكل كوة ياكل.
الحجية... سودة بوجهي أي والله ولج يمه ليش تقهريني تره والله الي بيه مكفيني.
ريم... اريد حل فدوه احسه راح يضيع مني.
الحجية... ماكو حل يمه هو طفل ونحبست بكلبه الجمرة بس ادعي الله يبرد كليبه وينسي ابوو.
ريم... حبيبي علاوي روح لجدو خلي ياخذك وياا يشتريلك
علي... ما اريد جان بابا يشتريلي
ريم...  ولك يمه منين اجيب ابوك لا تموتني بقهري
علي... إذا اموت اروح يم بابا
ريم... اسم الله عليك يبعد روحي لا دكول هيج

عافني وطلع وكمت ركضت ورا واني اشوفه يدخل للصالة وياخذ كتابه ويكعد يقره... تكطع كلبي واني اشوف ابني ابو ضحكة الحلوة متدمر هيج...
وينك وسام ضاع علاوي من بعدك.
ثاني يوم الصبح.. صحيت على صوت بجي، كمت واني مفزوعة منو يبجي، باوعت للجهة الثانيه وشفت علاوي كاعد بالزاوية ويبجي... طفرت اله واخذته بحظني وحسيت روحي طلعت..
ريم... ليش ماما حبيبي شبيك ليش الدموع من الصبح
علي... شفت بابا بالحلم
ريم... اوف حبيبي كطعت كلبي كافي كوم وامسح دموعك يله حبيبي.
اخذته وغسلتله وسويتله ريوك وجانت الساعة ب7 والكل نايم... تريك ورجع نام بفراشه...
كعدت مقابيله واني افكر شاسوي حتى اطلع هالولد من حالته.


ودق...
مرت الايام واني جانت الدراسة ماخذة كل وقتي وبهاء، تحسنت حالته وعلاء، مشغول بشغله وبالفترة الاخيره صار يرجع ضايج ومكتئب وكلما احاول اسئله مينطيني جواب لحد ما بيوم اجه وهو يصيح... وضايج..
ودق... شبيك علاء صار كم يوم ما ادري شبيك
علاء... خالد زعلان عليه وميريد يحاجيني
ودق... ليش شكو أول تالي خالد يزعل عليك
علاء... بسبب الجذبة الي جذبناها علي حتى ينسى ريم ويتركها ما اعرف شلون اكتشف هالشي.
ودق... اي وهسة شصار
علاء... قرر يسافر ويتركنا وصار يومين نحاول اني وعباس نتفاهم وياا
ودق... معقولة زعله قوي لهالدرجة
علاء... طبعاً احنه غلطانين
ودق... وهسة شراح تسوي
علاء... ما اعرف حاولنا نحجي ويا ميقبل
ودق... اوف والله مشكلة
علاء... باجر نروح علي بلكت يقبل يحاجينه
ودق.. اي روحوله

نزلت جوة واني افكر بريم وحالها واخر مرة حجيت وياها حجتلي عن وضع علاوي وحجيت ويه ماما علمودها حتى تجيبها هنا..
واني رايحة للمطبخ حتى احظر العشه سمعت مهدي وهو يحجي ويه حبيبته...
مهدي... انتي صدك تحجين شلون تردين ننهزم لا هذا الشي شيلي من بالج.

تفاجئت بكلامه، معقولة اكو بنت تفكر تنهزم من اهلها علمود الزواج... عفته ورحت لغرفة عمتي ولكيت بهاء يمها وهي تحجي وياا.. قبل لا ادخل سمعت حديثهم...
ام علاء... يمه خلي ازوجك
بهاء... يمه منو تقبل بيه واني هذا حالي
ام علاء... يمه اني عندي بنية وردة من الله بلكت تقبل بيك وهي هم ارملة ومحتاجة أحد.
بهاء... منو يمه
ام علاء... ريم اخت ودق
بهاء... لا يمه ما اقبل
ام علاء... ليش يمه
بهاء... ما اريد اضلمها وياي
أم علاء... ليش يمه
بهاء... يمه ما اريدها وخلاص
ام علاء... ماشي عندي وحدة ثانيه
بهاء... منو
ام علاء... بنت ام محمد هذولة ناس طيبين حيل
بهاء... يمه انتي من كل عقلج تقبل بيه
ام علاء... يمه خلي نجرب
بهاء... ما اريد اتعرض لهيج موقف
ام علاء... يمه عوفها عليه
بهاء... ماشي الله كريم
دخلت للغرفة وكعدت يم عمتي وجانت هي تباوعلي بنظرة شك..
ام علاء... شبيج يمه
ودق... تعبانة كولش
بهاء... خيرج خوية
ودق... ما اعرف والله بس يجوز تعب الدراسة
ام علاء... يمه شدي حيلج ما بقه شي وتخلصين بس السادس بقالج
ودق... عمة هو السادس اصعب مرحلة
بهاء... صح خوية هسة طلعي من الخامس واالله كريم
ودق... إن شاءلله خير، عمة شوكت ترحون تخطبون لمهدي
ام علاء... باجر نروح إن شاءلله

ودق... تمام
ام علاء... واالله لو يقبل اخذله بنت ام محمد هنة اثنين نخطبهن اثنينهن
بهاء... خير إن شاءلله ام محمد هاي جم بنية عدها
ودق.... هههههههه 7 بنات وما عدها ولد اخذت ابن اختها ربته هي
بهاء... اها ورجلها وين
ودق... رجلها رجال جبير حيل وخطية عنده سكر وضغط وما عنده شغل هي معيشتهن تخبز للناس وتسترزق
بهاء... الله يوفقها


فاضل...
صحيت ثاني يوم الصبح والناس ملتمة والهوسة واني احس راسي يريد ينفجر من الهوسة... كمت غسلت ورجعت بدلت وطلعت، تلكتني شيماء وهي تسألني...
شيماء... ابو علي شلون شراح دكول لاهلها
فاضل... على شنو
شيماء... البنية تشيل بروحها وتركعها وتصيح ما اريده
فاضل... عوفيها براحتها لا تضغطون عليها
شيماء... محد محاجيها بس تصيح رجعوني لاهلي
فاضل... الله كريم

طلعت بره للزلم وجان الكل موجود، شفت خالد من بعيد وهو يوجه الطباخين شنو يطبخون اليوم.. رحت يمه وهو شافني واجاني يركض..
خالد... هلا بالعريس صباح السعادة
فاضل... هههههه يا سعادة هاي واني نايم بغرفتك البارحه
خالد... شفتك واابنات حجلي
فاضل... بعد يا سعادة تسولف عليها
خالد... تنحل لا تضوج يجوز اابنية ما متعودة وهي بعدها صغيرة
فاضل... الله كريم

رحت كعدت يم عمي واجو الشباب يسلمون عليه واني كلبي يمها، هذي البنية حبيتها رغم ما جانت اختياري بس كل وقتي واني افكر شنو الي خلاها هيج تتصرف.. من بعيد شفت ابني علاوي اجاني يركض..
طفرت اله وحضنته واني اشمه...
علي... بابا احبك
فاضل.. حبيبي وليدي وينك من البارحه مشتاقلك
علي... يم أبن عمة لواء فتوري (يم أبن عمة رواء فقوري)
فاضل... حبيبي تونست
علي... أي
فاضل... اختك وين
علي... يم عمة لواء
اخذت ابني وخليته بحضني.. بعد ساعتين اجوا اهلها لدلال.. والدها واخوتها.
نزلوا وكمت سلمت عليهم وكعدوا وبعد ساعة طلب ابوها واخوتها يشوفوها، توترت وخفت ياذوها إذا شافوها.. رجعت جوة وكولت لشيماء تاخذ دلال للصالة حتى ابوها يسلم عليها.
راحت شيماء ورجعت ووياها عمتي واني جنت منتظرها تنزل بس ما نزلت.


شيماء...
بعد ما كلي فاضل انزل دلال حتى يشوفها عمي ويسلم عليها، رحت وكوتلها وجان تعيط بيه..
دلال... ما اريد اشوف احد
ام فارس... ولج يمه شبيج ولج فشلتيني بين العالم
شيماء... شبيج دلال عمي يريد يسلم عليج
دلال... ما اريد احد
نزلت واجت وياي عمتي... دخلت للصالة وجان عمي وزوجي وحمويني كاعدين..
صاحني فارس ورحت يمه.. سلمت علي وهو سلم عليه..
فارس... شكو شبيها دلال
شيماء... ما بيها شي ليش واصلك شي
فارس... البارحه خابرتني امي وكلتلي دلال مانعة رجلها من نفسها
شيماء... مو هيج ابو ضرغام، البنية مدري شبيها بس تصيح وتعيط اطلعوا بره ما اريد احد
فارس... اني دواها وين هي
شيماء... فارس شبيك اوكف البنيه مريضة مو بوعيها لا تتهور وتضلمها.
فارس... كلشي ما بيها عيارة هاي، هي بغرفتها هسة
شيماء... اي بغرفتها الله يخليك لا تسويلنه سالفة مو وكتها

عافني وراح كبل للدرج وصعد فوك واني ركضت ورا، أول ما دخل للغرفة جانت دلال كاعدة بالزاوية وتبجي..
فارس... ها ولج ادبسزز عليمن الدموع على حبيبج موو
دلال... اطلعوا بره
فارس... اني اربيج اليوم واعلمج شلون ترفعين صوتج
شيماء... الله عليك أهدأ خلي نفتهم منها
فارس... وخري شيماء هذي الحيوانة يرادلها تربية
شيماء... فدوة اهدأ خلي نسولف
فارس... وخري كتلج

ثواني ودخل فاضل للغرفة وفارس سكت.. تقرب فاضل يم دلال وهي تدفع بي وتصيح... اكرهك وخر عني
فاضل... اهدأي بابا اني مجاي اسويلج شي
دلال... اكرهك وخر عني واطلع بره

عافها واجه وكف مقابيل فارس...
فاضل... ابو ضرغام تفضل اكعد خلي نتفاهم
فارس... ماشي
كعد فارس وكعد يمه فاضل...
فاضل... ابو ضرغام البنية مرتي لهذا ما اقبل احد يمد ايده عليها وانت اخوها على عيني وعلى راسي بس هي مغلطانة حتى تنضرب.
فارس... ابو علي تتوقع الي تسوي مو غلط
فاضل... شسوت البنية
فارس... كلامها وتصرفاتها
فاضل... لا مو غلط لأن احنه ما نعرف البنية شبيها يجوز مريضة أو يجوز خايفة وهواي أسباب ميصير نحكم بسرعة.
فارس... حقك بهاي بس اني اريد اعرف شبيها هي لا مريضة ولا حتى مجبورة.
فاضل.. ان شاء الله بمرور الوقت نعرف شبيها لا تضغطون عليها.
فارس... ماشي إذا هذا قرارك ويرضيك
فاضل... اكيد يرضيني
فارس... الله يكثر، من امثالك ابو علي أصيل
فاضل... الله يسلمك حبيبي
ـــــــــــــــــــــــــــــــــــــــــــــــــــــــــــــــ
توقعاتكم للقادم..؟
برأيكم دلال شبيها وشنو سبب حالتها...؟ ومن يقف خلف هذا الأمر...؟
خالد راح يسافر ام لا...؟
تحياتي ❤❤

نرجــس صــادق ✍️

السلام عليكم ورحمة الله وبركاته...

اغلب الاعظاء يتسائلون... شوكت تنزلين بعد..؟
وين رابط القناة الجديده..؟
ليش منقطعة هالايام...؟

أولاً القناة الجديده موجودة ودارتبها وارجع أنشر قصصي بيها من البداية..
ثانيا بعد العشر أيام الأولى من محرم ابعث رابط القناة حتى تنظمون الها.
راح تلكوها جاهزة بالاظافة إلى بارتات جديدة منشورة بيها...
لا تستعجلون...

تحياتي...
نرجــس صــادق ✍️

السلام عليكم ورحمة الله وبركاته
جدًا اعتذر على التأخير لانه حاليا اني جدًا مشغولة

ان شاء الله الاسبوع القادم يبدأ التنزيل 🌺🌺
دمتم بخير

السلام عليكم حبيباتي ومتابعيني

اتمنى من الكل ميردون على اي وحدة تتجاوز عليه او تسيئ الي لان اني متجاهلتهم فانتو هم تجاهلوهم تمام

شكرًا للجميع ❤️🌺

السلام عليكم متابعيني الحلوين 💔💔


اعلن عودة الرواية منذ يوم الخميس غدًا وبإذن الله سوف نكملها باقرب وقت
اعتذر على التأخير وعلى توقف الرواية 🌸
شكرًا لكل متابع حقيقي كان في انتظار الرواية

الكاتبة:نرجس صادق

و عليكم السلام ورحمة الله وبركاته

اسعد الله مسائكِ كاتبتنا العزيزة .. عوده موفقة أن شاءالله
نحن كنا و ما زلنا متشوقين لتكملت هذهِ الرواية الجميلة التي أصبحت جزءً من حياتنا خلال الفترة السابقة
و اليوم نحمد الله و نشكر فضله على عودتها و عودتج لنا بالسلامة بعد غياب فترة طويلة بسبب مشاغل الحياة و الدراسة و كذلك نبارك لكِ النجاح و التفوق في دراستكِ
و نتمنى أن تعصفي علينا بأحدث مميزة و روايات أخرى واحدة أجمل من الأخرى


#محباتي💖
#أحمد_جوهر

بارت 89