رواية #طريق_الى_النار
بقلم الكاتبة:نرجس صادق
خالد ....
هذا آنه
اليفز لو طيف غيرك جايس جفونه
هذا أنه
اليضمك مستحه من الناس بعيونه

ريم ...
هلي وحوبة رباكم ذاك عودي من الحزن أصفر
💔💔
____________________________
ريم...
الأيام تمر وخوفي يزيد بكل يوم واني اكول على ساعة انحرم من اطفالي وجان سجاد الاقرب الي وجنت اخاف ياخذو مني لان هو مو ابني
وبيوم كاعدة بغرفة الحجية وجانت الدنيا تمطر والجو بارد واني افكر شراح يصير وشنو مستقبلي راح تفكيري لخالد وضليت اكول بكلبي .. هسة هو وين، وشنو وضعه،بعده يحبني لو لا، واني سارحة بتفكيري دخلت الحجية وهي ضايجة وتحجي بينها وبين نفسها..
الحجية.. يمه ريم انتي ارملة وصغيرة وحلوة وعليج العين اذا بنفسج تردين تتزوجين وتعيشين حياتج وهذا حقج بس يمه وليداتنا النا ابو الاكبر وسجاد ووليدات اختج انتي حرة بيهم تاخذيهم تبقيهم.
ريم … حجية فدوة اروحلج شنو هالحجي لا بنفسي زواج ولا اريد اتزوج وابوس ايدج لا تحرموني من جهالي.
الحجية.. يمه الله شاهد انتي بغلاة بنياتي بس يمه هذولة من ريحة الغالي ما اكدر اخليهم يتربون بعيد عني.
ريم… واني باقية يمج ما اروح وحتى غرفة ما اريد ابقى اني وجهالي يمج .
الحجية… يمه ابوج خابر ابو حسن وكاله اني باجر جاي اخذها منكم.
ريم…فدوة اروحلج حجية ما اريد اروح فدوة ابوس ايدج لا تحرموني من جهالي والله اموت بدونهم.
الحجية… يمه والله اتمنى تبقين واخليج بعيوني بس ابوج ما نكدر نوكف بوجها وما النه حق.
ريم… حجية خلي الجهال عندي فدوة والله كل فترة اجيبهم واجي بس لا تحرموني منهم.
الحجية… الله كريم يمه كومي غسلي ومسحي دموعج ومنا لباجر تنحل ان شاء الله.
كمت واني دموعي تجري واجه اليوم الي خفت منه .. رحت ركض لغرفتي واني اتذكر وسام وتمنيته لو يمي.


فاضل…
مر على زواجي اسبوعين ودلال متغيرة كولش ومطايقتني وبكل مرة ادخل للغرفة الكاها نايمة بالكاع وتبجي ،حاولت اعرف شبيها بس ماكو تفسير لحالتها ، وبيوم اني كاعد بالصالة وفجأة سمعت صوت صياح جاي من غرفتي ، ركضت فوك واني مرعوب من الصوت ، فتحت الباب واشوف غرفتي مشتعلة نار ودلال بالزاوية تصرخ وتصيح احتركت ، للحظة وكفت واني مصدوم وما اعرف شاسوي وما حسيت على نفسي شلون دخلت بنص النار ورحت لدلال ، حضنتها واجيت اطلع بس النار جانت واصلة لكل مكان بالغرفة ، فتشت ملابسي وجنت اريد اتصل بخالد ، بس الموبايل مو عندي ، ضربت الكنتور ووكع الباب ، طلعت بطانية ولفيتها على دلال وطلعتها وطلعت اني بعد ما احتركن اديه اثنينهن ، نزلت ركض واتصلت بالطوارئ وبعد ربع ساعة اجوو وكدرنا نطفي الغرفة بعد ما صارت رماد.

بهاي الاثناء جان بالي يم دلال الي دخلت للمطبخ وقفلت الباب ، حاولت حتى تفتح الباب مجاوبتني ، اتصلت بخالد ،
فاضل.. وينك خالد
خالد … بالاستيديو خير شبيك صاير شي
فاضل … تعال بسرعة وجيب رواء وياك
خالد … خير شكو
فاضل…. تعال وبعدين تعرف شكو
خالد… تمام مسافة الطريق

عشر دقايق واجه خالد ودخلت ويا رواء وهي مفزوعة ، شافت اديه واجتني تركض..
رواء.. شبيك فاضل شبيهن اديك
فاضل… ماكو شي احتركت غرفتي ومن دخلت اطلع دلال من الغرفه احتركن اديني
رواء… يمه سودة عليه شحركها الغرفة ودلال خوما بيها شي
فاضل … لا ما بيها شي
خالد… شوكت صار هالشي وشلون احتركت الغرفة
فاضل… ما اعرف والله بس سمعت صوت صريخ دلال ركضت فوك واشوف الغرفة مشتعلة نار.
خالد..الحمدلله على سلامتك ابو علي
رواء.. سودة عليه لو صاير بيك شي اسم الله
فاضل .. الحمدلله
رواء.. وهسة دلال وينها
فاضل… بالمطبخ قافلة عليها الباب
رواء… ليش شبيها
فاضل… ما اعرف واني تعبت منها ولازم اعرف شبيها
رواء… اتصل بامها وخلي تجي ناخذها لدكتور او لسيد نعرف شبيها
فاضل… انتي اتصلي بشيماء وخلي تجي هي وعمتي
رواء… تمام هسة اتصل بيها



ودق …
تمر الأيام واني الدراسة اخذت كل وقتي وصرت ما اهتم لنفسي ولا لعلاء وحتى ابني عايفته يم امي وعمتي .. وبكل يوم علاء يطلع للشغل ويرجع وهو ضايج وصار ميحاجيني وطول الوقت مخنوك ، وبيوم اني كاعدة اقره ودخل علاء وهو عصبي، فتح الكنتور اخذ سلاح وطلع يركض واني ركضت ورا واريد افهم منه شكو ، نزل وعمتي تلكته وهي تتوسل بي ،
ام علاء .. يمه فدوة اروحلك تهدى بالرحمان يمه لا تفجع كلبي بيك
علاء… يمه وخري عني مو اني الي يضربون اخوي واسكت
ام علاء… يمه الله يخليك اكعد واخذني لأخيك بالمستشفى يمه فدوة اروحلك ما بقالي غيرك
علاء… كتلج وخري

دفع عمتي وطلع يركض واني تخبلت ركضت ورا واصيح بس ما سمعني ، رجعت لعمتي واني اشوفها تدك واتلطم ،
ام علاء… يمه ضاع ابني فدوتك ربي لا تفجعني بي
ودق.. عمه شكو شنو صاير
ام علاء… ولج يمه مهدي رايح لبيت هاي المصخمة الي يحبها وامها موجودة وابوها بس من سامعين عمامها وهمة ناهين عليها هادين على بيتهم وضاربينهم بالطلق ومهدي مصوب بالمستشفى
ودق… دخيلك ربي ولج عمة شلون بيه راح علاء من ايدي
ام علاء..

خابريلي عباس لو خالد خلي يجون ياخذوني كلبي جمر
ركضت جبت تلفوني من غرفتي واتصلت على عباس ، اول ما رن جاوبني..
ودق.. الوو خوية شلونك
عباس … هلا خوية هلا ام موسى
ودق .. خوية فدوة اروحلك تعال بسرعة للبيت
عباس.. خير خوية امريني شكو
ودق… خوية فدوة استعجل سالفة ما تتسولف على التلفون
عباس… ماشي جايج دقايق

غلقته من عباس واني كلبي نار رحت لماما للغرفة ولكيتها ترضع بموسى بالمميه ،
ام ستار … يمه كولي يالله ولا تبجين ادعي ماكو شي ان شاء الله
ودق … ولج يمه اذا صار بعلاء شي اكتل روحي
ام ستار… تفائلي يمه ان شاء الله ما يصير شي

عشر دقايق وندكت الباب ، ركضت فتحتها وجان كل فكري عباس اجه ، تفاجئت واني اشوف بابًا كبالي ، ضاع الحجي وهو واكف كبالي بنظراته الحقيرة ،
جمال… يا هلا بالخاتون
ودق… شتريد اجيت
جمال… احترمي واحجي عدل ادبسزز
ودق… غير لما تحترمنا انت
جمال… نجبي وبلا لغوة زايدة صيحي امج الساقطة خلي تجي
ودق… امي ما تروح وياك
سحبني من ايدي وهو يعصرها حيل وحسيت ايدي نكسرت
جمال… حرف ثاني اسمعه راح اشوفج وجهي الثاني

سحبت ايدي منه ودخلت جوة ورحت لغرفة ماما ،
ودق.. ماما هذا ابوي بالباب
ام ستار … شنووو شيريد هذا الثاني
ودق.. يريدج يكول خلي تجي امج
ام ستار … جنت خلصانه منه شذكره بيه

كامت ماما ولبست عبايتها وطلعت واني طلعت وراها ، جان واكف بالباب وهو مركز على البيت بنظرة حقودة ،
جمال.. يا هلا بالساقطة
ام ستار … احترم نفسك احسن ما تندم
جمال… والله وصاير عندج لسان وتهددين
ام ستار… شتريد جاي ما يكفيك الي سويته
جمال… اسمعيني انتي بعدج على ذمتي الج مهلة لباجر اذا ما رجعتي لبيتج اعلمج الحجي شلون يصير
ام ستار … تريدني ارجع لواحد مثلك لا ضمير ولا احساس
جمال… لسانج لزمي وخليني محترمج
المهم مهلتج لباجر بس.
ام ستار … ماشي يصير خير

راح وماما ضلت تدعي علي وتتحسب ،
ودق… راح ترجعين اله
ام ستار… شاسوي يا يمه مو اني بعدني مرته
ودق.. ماما لا ترجعين نسيتي شجان يسوي بيج
ام ستار… شاسوي يمه مجبورة



ريم …
صار اليوم الثاني واني الخوف ملكني واحسب دقيقة دقيقة لنهايتي وكل عقلي ادعي ما يجي وياخذني.. رحت لغرفتي واشوف سجودي وهو يمشي خطواته الاولى رحت يمه واني دموعي تجري ..
حضنته واني اشمه واتخيل يحرموني منه ، فزيت على صوت الحجية وهي دكولي ،
الحجية.. يمه لا تشلعين كلبي بدموعج
ريم… فدوة اروحلج حجية لا تحرموني من ريحتهم والله كلبي نار من البارحة لليوم
الحجية… كومي يمه كومي غسلي وعيونج ما اخليهم ياخذوهم منج بس كل فترة تجيبينهم الي

رحت يم رجليها وبست ايدها واني الفرحة مسايعتني..
ريم … فدوة اروحلج حجية رحم الله والديج والله ما انسى فضلج هذا عمري كله.
الحجية… يمه انتي امانة وسام وما يهون عليه اشوف دموعج
بست ايدها وراسها وطلعت من الغرفة واني مرتاحة.

صار العصر واني احس نفسي ضاق وبديت اختنك مثل الي اقتربت لحظات موته، دخلت للغرفة واشوف الحجية حاضنه ابو الأكبر وتبجي ،
الحجية.. يبعد روحي انت من ريحة الغالي وجان يحبك حيل ويكول هذا يشبهني بكلشي يمه شلون راح افاركك واودع اخر ذكرى من وسام.

جانت كلماتها مثل الخنجر الي نغرس بكلبي وتمنيت لو ما سمعت هالكلام،وهي تبوس بأبو الأكبر اجتي سارة وهي دكول ،
سارة … ريم اجه ابوج بالباب ويريدج
الحجية.. تعالي يمه اخذي وليدج وامانة بركبتج وليدات الغالي
ريم… حجيه بعيوني ان شاء الله
اخذت أبو الاكبر وسارة اخذت سجاد وطلعت واني اشوف خالو واكف يم بابًا الي جان واكف بالباب… حسين طلع غراضي واني اخذت سجاد من سارة..
وصلت للسيارة وبابا ما نطق ولا حرف ،صعدت ونزلت دموعي واني اودع كل لحظة عشتها بهذا البيت اودع حزني وفرحي وخوفي واودع وسام وكولشي عشته ويااا.
بعد دقائق تحركت السيارة واشوف الكل نزلت دموعهم وهمة يودعوني وضل خالو يباوعلي لحد ما اختفت السيارة عن الانظار ، ما جنت منتبها منو بالسيارة وكل فكري شنو مصيري ووين رايحة اني ، بعد فترة انتبهت على السايق الي مشال عينه عني وهو يباوعلي بنظرات حقيرة.
جذبني كلامه ويه بابا وهو يكوله…

سامر … ولك جمال والله عندك طيره تفلش
جمال … ههههههه لا تخاف الك الك
سامر … نشوف شوكت تصير سبع وتسويها
جمال… مو قبل لا تجيبلي الي ابالي
سامر… الي ابالك الك والله الك
جمال… متفقين



فاضل …
كاعد واسمع امها تصيح عليها وهي تصرخ مثل المجنونة ، كمت ورحت للصاله واني قاصد اخليها تشوفني ، دخلت وبس شافتني تخبلت وصارت تصرخ اطلع بره هذا يخنكني ما اريد اشوفه …
بوقتها كرهت نفسي وقررت اطلكها خلاص صار واضح كولشي دلال متريدني …
اجيت اطلع وسمعت صوتها وهي تصرخ ..
دلال … اني جاي اتعذب بس محد بيكم حس بيه

طلعت واني شايل هموم الدنيا كلها بكلبي ، لحظات واجت وراية شيماء ،
شيماء… فاضل اني شاكه بشغلة
فاضل… شنو
شيماء… البنية مو على طبيعتها واني شاكه البنية مسحورة

فاضل… انتي صدك تحجين ومنو ممكن يسويلها سحر
شيماء.. صدكني البنية مسحورة لان مستحيل هاي دلال نفسها الي جانت تعشق اسمك بس
فاضل… لا سحر ولا شي البنية متريدني
شيماء… خلي نجرب وناخذها لسيد يشوفها
فاضل… وهذا وين السيد وشراح يسويلها
شيماء… يقره عليها
فاضل … ماشي روحي لبسيها خلي ناخذها
راحت شيماء وبعد دقائق رجعت وهي دكولي ..
شيماء… منو تتوقع مسويلكم سحر
فاضل… ما اعرف بس منو اله مصلحة بهالشي
شيماء… ماكو غيرها الحقيرة علا
فاضل… شنو مصلحتها
شيماء.. ليش ما شفتها شلون كتلت نفسها بس حتى متخليك تتزوج
فاضل.. ما اعرف والله

شوية واجتي عمتي وهي لازمة دلال الي جانت تباوعلي بنظرات كره ، صعدتها عمتي بالسيارة وهي متقبل وكامت تصيح وتدفع بأمها ، لزمتها ودفعتها بالسيارة وصعدت عمتي ولزمتها حتى ما تنزل.
طلعنا لكربلاء واني طول الطريق ادعي ترجعلي دلال والكه حل لعلتها.

___________________________
توقعاتكم للقادم
دلال شنو سبب حالتها ؟
ريم شنو مصيرها؟
خالد وين وجهته القادمة ؟

اعتذر على التأخير
ان شاء الله سيكون التنزيل أفضل بقادم الأيام
وسيتم تنزيل ٢ بارت في كل يوم
تحياتي
#نرجس_صادق

بارت ٩٠

رواية#طريق_الى_النار
بقلم الكاتبة: نرجس صادق

خالد … حلفوني بعيني ما كلت الصحيح
وحلفوني بعينك وما جذبت

ريم …نشف ريج الحزن والوادم تغني
وانه من بعيد احبه الما رضى يحبني ، شبدر مني ؟
________________________________
ريم ….
بعد ٣ ساعات دخلت بغداد واني اتذكر اخر مرة اجيت لبغداد ،حسيت بالم بداخلي وكلبي عصرني كأنه انذار للأيام المنتظرتني.
بعد مدة وصلنا لبيتنا ونزلت ونزل بابا وكل هالوقت السايق ما شال عينه عني وحسيت بنظراته حجي والخوف تملكني وتوقعت اني صفقة جديدة من صفقات ستار وبابا
نزلت غراضي وعلاوي وزينب جانوا مفراحنين برجعتنا وبالاخص علاوي تعود على الحجية وخالو ابو حسن
لفت انتباهي كلام بابا وهذا الي اسمه سامر …
جمال… باجر تجيبها الي
سامر … ان شاء الله باجر يمك
جمال… ماشي
سامر … واني شوكت احصلها
جمال… انتظرني اربيها الك وتدلل
سامر … ههههههههه تره اريدها صاحية
جمال… لعيونك

ما اعرف على شنو جانوا يحجون بس الي فهمته اكو ضحية ، رحت الباب ودكيته واني اتذكر كولشي شفته بهذا البيت كل دمعة نرسمت على حيطانه كل شهكة الم تشهدها زوايا البيت وكل جرح تركوا الي الوحوش الي اكلتني بانانيتها ، اتذكر لحظة وداعي من هذا البيت ،اتذكر لمًا طلعت واني دموعي نار على خدي وجان وسام على كرسي يمشي كبالي ، درت وجهي لبيت خالد واني اتذكر لحظة وداعي جان يراقبني من شباك غرفته ، واني اتذكر كسرة كلبه وكلبي ، اوف يا خالد رجعت اليوم بس رجعت مكسورة ومهضومة وعمرنا ما راح تصير سوه ،اني وانت طرقنا مختلفة ، قطعت افكاري امي وهي تفتح الباب ، شفتها واحس رجعتلي روحي وهي دمعتها نزلت وحضنتني حضنة ام فاقدة ، شوية ودخلتني وهي تاخذ مني ابو الاكبر ، دخلت غراضي واول ما دخلت البيت تفاجئت بوجود بنية صغيرة ومبينة اصغر مني وهي واكفة بالزاوية ومبين على وجهها الحزن والخوف ، باوعت لماما واني انتظر منها جواب ،شفت بعيونها حجي ما تكدر تحجي .
دخلت جوة واني مصدومة من الي اشوفه ،مو ذاك البيت الي طلعت منه هالمرة مرتب وكله اثاث راقي وبناء جديد ، رحت لغرفتي شفتها متغيرة وبيها اثاث حلو ، استغربت شنو سبب هالتغيير ومنين جاب هالفلوس .


ودق …
بعد ما رجع علاء وعباس من المستشفى وعمتي تلح على علاء حتى ياخذها لمهدي تريد تشوفه ، علاء جان كولش ضايج ومحتار شيسوي ومهدي حالته خطرة وهو حالف ياخذ بثار مهدي ، واني جان كل همي علاء ميتهور ويتصرف تصرف خطأً ، حسيت بدوخة والم بظهري وفجأة اختنكت وزاد الالم بظهري نزلت اركض لعمتي واني أريد اتقيأ ، شافتني عمتي وهي مستغربة من حالتي ، باوعتلي وهي تبتسم ..
ام علاء.. ها ولج يمه نكول مبروك
ودق … على شنو مبروك عمة
ام علاء…يمه وجهج وجه حامل
ودق… لا عمه فدوة والله مو مال حمل تعبانه حيل
ام علاء… كولي الحمدلله واسكتي غيرج يتمنى ريحة الطفل
ودق … الحمدلله بس والله الوضع مو مال حمل
ام علاء.. كولي الحمدلله وخلي رجلج ياخذج للدكتورة

صعدت فوك واني افكر بكلام عمتي ، معقولة صدك حامل بس والله مو مال حمل ، اخذت موبايلي واتصلت على علاء واني خايفة اكوله لان الوضع متأزم ، ثواني وجاوبني …
علاء… ها بنيتي
ودق… علاء تكدر تجي
علاء… خير بابًا خوماكو شي
ودق… لا ماكو شي بس تعبانه اريدك تاخذني للطبيب
علاء… ماشي بنيتي بس اشوف الدكتور شيكول على مهدي واجيج

بعد نص ساعة اجه علاء واخذني للدكتورة مالتي وبعد الفحوصات والتحاليل توضح اني حامل وبالشهر الثاني وطول هالوقت ما حاسة على نفسي ، ضجت وتمنيت يطلع التحليل خطأً بس من شفت الفرحة بعيون علاء نسيت كل تعبي وفرحت بفرحته ،
تمر الايام واحنه منتظرين مهدي يتحسن ، وبيوم اتفقوا على كعدة عشائرية يفصلوهم بيها بدون ثارات وقتل .

فاضل…
بعد ما رحنا لسيد معروف بكربلاء واول ما دخلنا علي صرخت دلال بكل صوتها وهي تريد تنهزم من ايدي للحظة حسيت قوتي انتهت امام قوتها ، جانت مثل صلابة الحايط واني احاول اثبتها بمكانها وهي تضرب بيه وتريد تنهزم ، لمًا شاف حالتها السيد باوعلي بنظرة شفقة وكال …
السيد … البنية راكبها شيطان
فاضل… شنو شيطان سيد الله يوفقك بس فهمني
السيد … البنية مسحورة
بجت عمتي وهي تسمع كلام السيد واجت تركض ونزلت يم رجلينه وهي تتوسل..
ام فارس … فدوة اروحلك سيد اني دخيلتك اريد بنيتي منك
السيد … كولي يالله يمه اطلبيها من ابو فاضل واني بعون الله راح احاول اساعدكم
ام فارس … دخيل ابو فاضل اروحله شراية والله بس بنيتي ترجع طبيعية
السيد… ان شاء الله
بعد ما شرحلنا حالتها ودلال ما هدأت وبس تصرخ وفجأة تغير صوتها وصارت تصيح بلغة تهديد …
تقرب يمها السيد وصار يقره عليها وكلما يقره ويرفع صوته هي تصيح اعلى واعلى لحد ما هدأت وسكتت ومثل الي فقدت الوعي ، بده يسألها السيد .. وهي ساكتة متحجي.
انطانه حجابات وكال لازم تلبسهم البنية ولازم يبقى القرآن مفتوح بكل مكان بالبيت .

طلعنا من السيد ودلال تمشي بهدوء بدون اي صوت وتوجهنا للزيارة ، بس دخلنا الحرمين وجان ضريح ابا الفضل العباس كبالنا صرخت دلال بكل صوتها وعمتي وشيماء يحاولن يهدأنها وهي تصرخ ، ركضت عليها وحضنتها واني اريدها تسكت بس زاد صريخها وكلما نتقدم للضريح تصرخ اعلى وصارت روحها تفرفح باديه.
جان اكو شيخ واكف كبال الضريح ولما شاف دلال وحالتها تقدم يمنه وخله ايده على راسها وصار يقرأ ايات قرآنية وفجأة هدأت دلال وسكتت ، اخذتها عمتي وشيماء ودخلوها للضريح وهي جسد بلا روح .
اجيت ادخل بس شفت القبة وعضمتها وكفت واني اباوعلها ونزلت دمعتي ،خاطبت ابا الفضل العباس واني اباوع لضريحه ، فجأة طلعت شيماء تركض ، اجتني وهي تبجي ..
شيماء.. اللحك فاضل دلال وكعت
فاضل… شكو شبيها
شيماء… ما اعرف بس دخلنا صرخت ووكعت بسرعة
رحت ركض واني اريد ادخل بس ما مسموحلي لحد ما طلعتها عمتي وهي تجر بيها ركضت عليها شلتها وركضت للسيارة وما حسيت شلون وصلت السيارة وخليتها وطلعت للمستشفى.


ريم …
مر اليوم طبيعي والوضع هدوء وكلما أسأل ماما عن البنية دكولي ما ادري واني كل همي اعرف شنو قصتها وليش هي هنا ، بالليل وبعد ما نام الكل ، ما كدرت انام واني اتذكر الحجية وسوالفها قبل النوم ، كمت وطلعت بره وجان الجو بارد وكفت واني اباوع للنجوم واكول النجوم والقمر يعرفون بقصتي وكل مرة اشكيلهم وبس همة يسمعوني ، واني أتأمل بالسماء سمعت صوت شهكات وكانه واحد يبجي ، باوعت بالجهة الثانية وشفت البنية كاعدة بالزاوية وتبجي ، رحت يمها وهي لما شافتني خافت وجان ابالها راح أذيها ، كعدت يمها واني اريد اعرف قصتها ، وقبل لا احجي سبقتني هي وكالت …
وسن… الله يخليج لا دكولين لجمال عليه
ريم … لا تخافين مراح أذيج بس انتي شتسوين هنا
وسن… اني اهلي باعوني لجمال مقابل الفلوس
ريم… وانتي وين اهلج
وسن… بالبصرة
ريم… يعني انتي هسة زوجة بابا
وسن … اي بس اني ما اريده هو بكد ابوية ويضربني ويعذبني
ريم … وشلون اهلج باعوج لشخص بكد ابوج
وسن… اخوية يلعب أقمار ويه ابوج وبيوم اجه وكلي انه انطاني لشخص وراح يجي الشخص ياخذني ويعقد عليه ، رفضت وحاولت انتحر بس ما حصلت غير الضرب والتعذيب
ريم … الظاهر احنه راح نعيش نفس المعاناة
وسن… اني ما اعرف عنج شي
ريم … اسئلي الحزن عني وراح يكولج عليه اني منو
وسن … بس الله يخليج ساعديني اريد انهزم ما اتحمل والله ما اتحمل
ريم … وين تنهزمين
وسن … خالتي هنا بغداد وتريد تسافر لتركيا واريدها تاخذني وياها واخلص من عذاب جمال
ريم … وشلون تاخذج وياها خاف يدورون عليج ويقتلوج
وسن … انتي بس ساعديني وان شاء الله ميصير شي
ريم … الله كريم كومي نامي هسة وان شاء الله خير

كامت وهي تمسح بدموعها ودخلت جوة … رجعت اباوع للنجوم ومثل كل مرة لازم احجي وياهن.
_____________________

اعتذر على قصر البارت لكن انا مشغولة بدعم القناة
وكذالك اليوم كنت خارج البيت لهذا اعتذر على التأخير
كونوا بخير 🌸
#نرجس_صادق

بارت ٩١

رواية#طريق_الى_النار
بقلم الكاتبة :نرجس صادق
خالد …
عطاشه
وغير عينك ذيج
ما مش عين تروينه

ريم …
اي هو اليحب من ينلجم يرتاح
جا هي الجروح الفاهية شتسوى
________________________
عباس …
بعد ما خالد عرف بموضوع ريم وبالكذبة الي سويناها قاطعنا وزعل وقرر يرجع يسافر ، وطول الفترة اني وعلاء حاولنا نكعد نفهمه بس ما قبل وجان اكثر شي مأذيني زعله علينه لان احنه عمرنا ما افترقنا .
وبيوم كاعد بالكوفي واني كل تفكيري بخالد ، رن موبايلي وجان علاء المتصل .. جاوبته
علاء… عباس انت وين
عباس… بالكوفي خير خوماكو شي
علاء… لا ماكو شي بس مهدي راح نطلعه من المستشفى وردتك وياي
عباس… جاييك
علاء… اذا مشغول لا تجي
عباس.. ما عندي شي

رحت لعلاء وطلعنا مهدي ورجعنا للبيت وقررنا على وقت الفصل وعلاء جان يريد ياخذ بثاره ومو هامه الفصل ، كدرت اقنعه يعوف الموضوع احسن ما يصير دم وقتل اكثر ، بعدها رجعت للبيت واني افكر بخالد ،قررت اروح لبيتهم وازوره ، اخذت السيارة وبوجهي لبيت خالد .
وكفت كبال بيتهم وشفته يطلع من البيت ، نزلت ورحت يمه وهو كأنه ما شافني كمل طريقه ، وكفت كباله …
عباس … تهون عليك الخوة
خالد… مثل ما هانت عليكم وجرحتوني بذاك الجرح بسببكم تمرضت
عباس… جنه نفكر بمصلحتك وبس وما ردناك تبقى تتعذب
خالد… الي سويتوا خلاني احترك بنار بدل ما تخلصوني دمرتوني
عباس… نعترف غلطنا بس لا تسافر خالد فدوة اروحلك بداعت الخوة
خالد… اني مالي مكان هنا واذا اريد اسافر مو بسببكم لا بس لان هذا المكان ترك بيه جرح ما يطيب
عباس… يعني خلاص ماكو رجعة عن قرارك
خالد.. ابداً

عافني وصعد سيارته وراح وحاولت الكه طريقه تخلي يعوف موضوع السفر بس هو جان قافل ، اجيت اصعد بالسيارة وبهالاثناء وكفت سيارة باب اهل ريم ونزل منها واحد مبين من شكله مشكلجي وصاحب سوابق ونزلت وياا بنية شابة حلوة وهي تتمضحك راحت ودكت الباب ، بقيت اراقب الي يصير شوية ونفتح الباب وطلع جمال ، سلمت علي البنية ودخلت للبيت وهو طلع ووكف يحجي ويه الرجال .
ضليت افكر بالبنية منو وشنو علاقتها بجمال وليش دخلت البيت بهاي الطريقة ، لحد ما قنعت نفسي اني مالي دخل وصعدت سيارتي ورجعت .


إيمان…
بعد زواج دلال وفاضل والوضع مو طبيعي ، مصطفى جان هادئ كولش وكأنه الهدوء قبل العاصفة ، عمتي جانت طول الوقت تفكر بدلال الي منعرف شبيها وشنو سبب تصرفاتها ، وبيوم عمتي راحت هي وشيماء لدلال بعد ما رواء اتصلت على شيماء ، اني رحت لبيت عيالي لان زوجة كرار وحدها ، تفاجئت بنت خالته لمصطفى موجودة يمهم ، شوكت اجتي ما ادري بس اني ما احب تصرفاتها والي فاجئني اكثر ميانة مصطفى وياها وطول الوقت يتشاقه ويضحك وياها .. ضجت كولش واجيت ارجع للبيت بس زوجة كرار مخلتني …
نور … إيمان اكعدي وين رايحة ولا تحسسيهم بشي
ايمان… تره ضجت يعني ما يحترمني
نور … غلسي وتجاهليها هي هاي خفيفة وطول الوقت تفتر على مصطفى
إيمان… والله متت قهر اسكتي ولج نار واشتعلت بداخلي

كملنا الغده والكل اجتمع على الغده والي صدمني فاطمة تكعد يم مصطفى بعد ما شافتني اجيت اكعد يمه ، نقهرت واجيت احجي بس تفاجئت بمصطفى وهو يكولي كعدي هناك وهو يأشرلي بصف نور ، اشتعلت نار بصدري عفت الاكل وكمت ، رجعت لبيتنا واني دمعتي بعيني ، صعدت لغرفتي واني روحي تفرفح ياريت اكدر جان ذبحتها لهالحقيرة.
ضليت افكر ليش هيج مصطفى سوه بيه وشنو غايته ، انتظرته يرجع حتى اعرف سبب تصرفه وبعد ساعة رجع مصطفى للبيت وجان بكل هدوئه وكانه مصاير شي ، دخل للغرفة وراح مدد ونام ، وكفت كباله وكوتله..
إيمان.. شنو سبب تصرفك
مصطفى… يا تصرف
ايمان… قبل شوية
مصطفى… شبي تصرفي
إيمان… يعني اني تهيني هيج إهانة كبال هذي الحقيرة
مصطفى… ايمااااااااان اللزمي لسانج على منو حقيرة ولج
ايمان… على فاطمة الي جانت تتلزك بيك
مصطفى… احترمي نفسج ادبسزز شنو حقيرة
ايمان… فوكاها تدافعلها
مصطفى.. طبعا مو ضيفة عدنه هي شلون تردين اقبل ينهان الضيف
ايمان… الضيف الما يحترم نفسه ينهان
مصطفى… ولج اعقلي صح تصرفاتها مو حلوة بس عيب هيج تتصرفين وياها انتي
ايمان… واسكتلها وهي ما بقالها بس تنام بحضنك
مصطفى… كم يوم وتروح ما اريد مشاكل رحمة لاهلج
ايمان… ماشي

نزلت جوة وجنت اريد اروح لبيت عيالي واني طالعة دخلت فاطمة ، ما كدرت اللزم نفسي وصحت عليها ..
ايمان… شتسوين هنا
فاطمة… على كيفج عيني بيت ابن خالتي وبكيفي ادخل
ايمان… غلطانه حبيبتي هذا بيتي اني
فاطمة… وخري عني خلي افوت عندي شغلة ويه مصطفى
دفعتني واجتي تدخل واني هنا النار اكلتني اكل .. لزمتها من ايدها ودفعتها بره وهي تصرخ وتدفع بيه بس ردت اريح كلبي بيها والي يصير خلي يصير ، ما حسيت غير على مصطفى وهو يسحبني منها وهو يصيح عليه …
مصطفى… انتي شبيج تخبلتي
ايمان… انت متدري شسوت هالحيوانة
مصطفى… نجبي واللزمي حدودج بوجهي دكولين هالكلمة
ايمان… بس هي تجاوزت عليه ودفعتني
مصطفى… لسانج وما اريد ولا حرف

وانتي خوية فاطمة شنو ردتي اجيتي
فاطمة… اجيت ردت منك تاخذني للدكتور لان مريضة بس زوجتك تلكتني تسب وتغلط
مصطفى… خويه جان تكدرين تتصلين عليه ليش زحمتي نفسج واجيتي
فاطمة… لا عادي اجي مو مشكلة
مصطفى… خويه بعد لا تجين اني اجيت حتى ارتاح اني ومرتي اتمنى تروحين وان شاء الله شوية واخذج للدكتور
فاطمة… ماشي واني اسفة

طلعت وهي ميتة قهر بس ارتاحيت من رزلها مصطفى ، بعد ما طلعت جان مصطفى يباوعلي بنظرة غضب ..
مصطفى… جان عبالي عاقلة وتفتهمين


فاضل….
رجعنا من كربلاء وطول الطريق دلال نايمة وما نطقت بحرف وكل الوقت واني افكر بيها واريد اعرف منو الي تجرأ وسوالها سحر ، بعد ساعتين دخلنا بغداد واني كلي امل راح تتعالج وترجع طبيعية .

بعد مرور اسبوع ودلال ماكو اي تحسن بحالتها وانما صارت تشوف كوابيس وتكعد تصرخ وطول الوقت حابسة نفسها بالغرفة وتبجي ، بدت تذبل وتتعب واني اشوفها تموت كبال عيوني وتعاني حلفت انتقم من الي جان السبب بحالتها بس أتأكد منه ، كبالي اشوفها تعاني وتصرخ الم وتذبل مثل الوردة وتتعذب ، ما تحملت اشوفها هيج
…
طلعت واني ادور على حل لعله اللكه احد يدليني على حل وبالصدفة مريت من عيادة لدكتور وصار عندي امل وكولت لعله اكو علاج لحالتها ، نزلت ودخلت للعيادة وكل همي جان ادخل للدكتور واحجي حالتها ، بس هواي مراجعين واضطريت اكعد انتظر وبهاي الفترة كعدت بصفي مرة مو جبيرة حيل وهي مبايلها ما سكت كل شوية اتصال ، لحد ما كملت إتصال وباوعتلي وهي دكولي …
…اسفة خوما ازعجتك
… لا أبدًا ماكو ازعاج
… شنو مشكلتك انت
… اني جاي علمود زوجتي
… وينها زوجتك
شرحتلها خالة دلال واني احس نفسي اشتعل نار ، صدمتني وهي ترد عليه..
… وشعندك جاي هنا
… كلت لعله اكو علاج لحالتها
… علاج زوجتك مو هنا
… لعد وين
… اكو عالم صابئي هنا علاج زوجتك يمه
… وين اللكا هذا

انطاني مكان الشخص وتشكرت منها وطلعت.


ريم….
كعدت الصبح على ادينات سجودي وهو يتلمس بوجهي ويريد اكعد ،كعدت واني اشوف زينب ما موجودة ، طفرت واني ادور عليها ، ركضت للمطبخ وشفتها كاعدة يم ماما تتريك وهي فرحانه ، رجعت للغرفة وكعدت ابو الاكبر وعلاوي واخذتهم حتى اخليلهم اكل ،
بهالاثناء اجتي وسن وكعدت كبالي وعيونه حمر ومورمات وكأنه باجية ،

ريم … شبيج وسن ليش عيونج حمر
وسن … ماكو شي
ريم … بابًا مأذيج بشي
وسن … كولي هو بشنو ما مأذيني
ام ستار … لو اعرف اهلج من يا صنف شلون شمروج بادين هالوحش ، اني جبت عمري عذاب ويا حياتي ويا جحيم.
وسن… الله يخليكم ساعدوني اريد انهزم لبيت خالتي
ريم … لا تستعجلين الموضوع صعب
وسن… باجر راح تسافر خالتي لازم انهزم اليوم
ام ستار… الله كريم يمه اكلي

جان كل همي شلون اساعدها وضليت افكر شلون اخلصها ، مر اليوم والساعات تمر والافكار تاخذني وتجيبني واني افكر شلون اساعد وسن .

الساعة٣ الظهر ندكت الباب وجان بابا بغرفته وبس سمع الباب ركض للباب وهو ملهوف ، باوعت لماما وفهمت من نظراتها انه اكو ضحية جديدة ، منتظرة يرجع بابًا وفجأة دخلت بنية شابة وهي تتمضحك وتتغزل بابا ولما شافتنا ضحكت بصوت عالي وهي دكوله…
سعاد … حبيبي هذولة الخدم مالتي
جمال…. هههههه يرحولج فدوة
سعاد … اي اكيد

عبرتني وهي تخزرني بنظرة حقيرة ودخلت لغرفة بابا ، تحسبت على حضي الي رجعني للقهر مرة ثانية ، من كلامها مبين القهر منتظرني.
_______________________________
اعتذر على التأخير
توقعاتكم ؟؟؟
سعاد شراح تسوي ؟؟؟
وسن راح تكدر تنهزم ؟؟؟
خالد راح يسافر لو لا ؟؟

كونوا بخير 🌸
#نرجس_صادق

السلام عليكم متابعيني الحلوين 🌸🌸

هواي من الاعضاء يسألون ما فهمنا شي من الرواية ؟؟
او وين بدايتها ليش بس النهاية ؟؟
وهواي يسألون عن القناة ومحتواها ؟؟

الرواية الي يحب يفهمها يبدأ من اول بارت وراح تلكونه مثبت بالقناة…

بداية الرواية مثبته اكرر مرة ثانية بداية الرواية مثبتة بالرسائل المثبته والي تظهرلكم اول ما تدخلون القناة .

اما الي يسأل عن محتوى القناة ..
متابعيني القدامى يعرفوني ويعرفون محتواي اما الجدد احب اوضحلكم يا اعزائي محتوى القناة ادبي بمعنى قناة أدبية للروايات الحقيقية والقصص الواقعية وكذلك لنشر نصوصي ومقالاتي بمختلف تنوعاتها… عشاق الأدب والروايات اكيد راح يحبوها وراح يلاقون الفائدة بمحتواها… اما الي ميحب المحتوى الأدبي فأهلًا وسهلا بهم بيننا 🌸🌸

الكاتبة:نرجس صادق

‏"لا تصالحني حين تتمادى بتكرار الأخطاء ذاتها وتصر على أن تأتيني منكسرًا ترجو المغفرة لا تصالحني حين يكون منك التقصير جليًا رغم تلميحاتي وتجاهلك إياها لا تصالحني حين تغافلني بالغياب ثم تعود لاعنًا ظروف الحياة , لا تصالحني أبدًا ما دمت على حالك يهون عليك سخطي وضيقي وطول صبري وطيبي."

-بــوح_قلمي
#نرجس_صادق

بارت ٩٢

رواية#طريق_الى_النار
بقلم الكاتبة:نرجس صادق

خالد..

تعبته بدعائي يشيل الثكال
بس اثكال حبك كتله خلها

ريم…
بارينه الحزن سولة حمام الدوح
وشيسكت حمام الدوح من ينوح
__________________________
فاضل ….
طلعت من الدكتور ورجعت للبيت واني افكر بكلام المرة وقررت اخذها لهذا الرجل والي يصير خلي يصير المهم ترجع دلال لطبيعتها.. وصلت للبيت
نزلت واني متلهف حتى اشوفها ،تفاجئت بشيماء وهي واكفة تصيح وتدك باب الغرفة ،ركضت الها واني اريد اوصل احس رجليه ماتن ،
فاضل … شكو ولج شبيها دلال
شيماء…تريد تنتحر وقفلت الباب عليها اكسره فدوة
فاضل… شنو تنتحر تحجي صدك انتي

حاولت اكسر الباب بس ما كدرت ، صحت على شيماء تصيح ابن جيرانه يجي يساعدني ، شوية واجه ثامر وهو يركض ،
دفعنا الباب بكل قوة لحد ما نكسر ، دخلت واني اشوف دلال متمددة بالكاع ومغمي عليها ، اخذتها وأشرت لشيماء تجي وراية ، طلعت كبل للمستشفى واني ادعي ميصير عليها شي .
وصلت للمستشفى واول ما نزلتها اخذوها مني ، ثواني وصاحوا الدكتور واجه وبعد فترة طلع الدكتور وهو يوصي الممرضة تخليلها مغذي ، رحت يمه وسألته ..
فاضل.. دكتور ممكن اعرف شبيها
الدكتور … إنهيار عصبي
فاضل… ماشي شكراً دكتور

بعد ساعة طلعنا من المستشفى ودلال هادئة وما نطقت حرف واحد وزاد قلقي عليها ،حاولت احجي وياها ما جانت متقبلتني ابدا.

ثاني يوم كولت لشيماء تحضر نفسها نروح لهذا العالم الصابئي … وفعلا رحنا لنفس المكان الي وصفته الي المرة … سألنا على بيته ودلوني علي ،رحنا واول ما وصلنا لبيته شفت كومة ناس بالبيت وجان البيت مفتوح مثل العيادة اي شخص يجي يدخل ، دخلنا وشفت كومة ناس وكل واحد مشكلته شكل ، لحد ما وصلنا السرة ودخلنا علي ، جان شخص شكله هادئ واول ما شافنا كال ليش هيج عايفيها..
فاضل… ما نعرف شبيها
الرجل … مسحورة سحر فراق وموت
فاضل.. ما فهمت
الرجل … مو الا تفهم المهم اني شنو مطلوب مني
فاضل… نريد علاج الها
الرجل … علاجها صعب ومراح تقبلون بي
فاضل… ليش شنو علاجها
الرجل… ما اكدر اكولك بس يكلفك
فاضل… مستعد لكولشي
الرجل … عوفوني وياها واطلعوا
فاضل … ليش
الرجل … حتى أعالجها
فاضل… ماشي

طلعنا اني وشيماء وبقت دلال وبعد دقايق سمعت صريخ دلال ،دخلت اركض واني اشوف الرجل مقيدها وهي تصرخ ، ما تحملت المنظر دفعته واخذتها وطلعت واني روحي مشتعلة نار وكلبي يوجعني عليها .


خالد …
قررت اسافر وحضرت كولشي واتصلت على اوس واتفقت ويا على كولشي وجان موعد سفري بعد اسبوعين واني منتظر تتحسن حالة دلال حتى اطمئن على فاضل وعائلته وبعدها اسافر ، عباس وعلاء حاولوا ارجع طبيعي وياهم بس كلما اتذكر الالم الي شفته ومعاناتي بعد ما مثلوا عليها هاي الجذبة اقسي عليهم اكثر ، ريم ما فاركتني لحظة عايشة بعقلي وبكلبي واني احاول انساها بس ما كدرت لحد ما بيوم من الايام جنت راجع من الشغل واني وصلت للبيت ونزلت من السيارة وشفتها طلعت من بيتهم ، وكفت واني اباوعلها وابالي الف سؤال وبكلبي اشتياق ، من زمان واني مشايفها ولا اسمع صوتها ،تعذبت واني اشوفها طلعت وبايدها ابنها ،كلبي اخذني الها ورجليه خذتني وراها ، شفتها وصلت للمحل ودخلت تشتري لابنها ، وكفت واني اكول لنفسي تصرفي صحيح واني لاحكها كبال العالم كلها ، خفت يحجون عليها وابوها يأذيها ، اجيت ارجع وسمعت صوتها وهي تصيح بإسمي…
اللتفتت إلها وياريت ما شفتها وهي ذبلانه والدموع تنزل على خدها ، شهكاتها ونظراتها وحسراتها ما انساهن…
ريم … خالد شلونك
خالد … هسة يله ارتاحيت
ريم… معقولة ما شفتني
خالد … جنت امشي وراج
ريم .. ليش ما كوتلي
خالد … اخاف عليج
ريم … من شنو
خالد … من حجي الناس ومن ابوج
ريم … ميهمني حجي الناس وابوية تعودت على ضربه واهاناته بس جنت اريد اشبع عيوني بشوفتك
خالد … تتوقعين اكو امل ننجمع مرة ثانية
ريم … لا خالد ما مكتوبلنا الفرح
خالد … ليش ريم من شفتج رجعتلي حياتي
ريم … انساني وعيش حياتك

اخر كلمات كالتهن واخذت ابنها وراحت ، جبرتني عيوني اضل ارافقها لحد باب بيتهم ، باوعتلي نظرة اخيرة ودخلت ،
جانت شوفتها الي حياة بس كلامها سهم قتلني بلحظات ، آه من فراكج دمرني.


ريم …
كعدت الصبح على صوت سعاد وهي تصيح على امي وتتأمر ، ركضت الها واني شايلة كل الحقد عليها ، سمعتها وهي تصرخ وتصيح نظفي غرفتي ولا تصيرين وصخة…
سعاد … يله كل وحدة دكوم تسوي شغلة اريد البيت يلمع خلال دقايق
وسن … منشتغل عندج احنه
سعاد … انجبي واشتغلي بدون صوت
وسن … احترمي نفسج واحترمي كبرتج
سعاد … لج هاي عليمن
ام ستار … عليج عليمن لان والله لو اخليج براسي اندمج لا تتسبعين بهذا السكرجي العار تره حتى هو يتيخ بالسجون لو انطق بحرف اني
سعاد … ادبسزيات تهددني والله اليوم اشوفجن سعاد منو

راحت ودخلت لغرفتها وبعد دقايق طلع بابًا وبايده الحزام وهو يصيح …
جمال … منو تجرأت وغلطت على سعاد
سعاد … ميحتاج تسأل لان كلهن تجاوزن عليه بس عوزهن يكتلني

تقرب على ماما ولزمها من ايدها وهو يصيح …
جمال… لج ادبسزز احترمي كبرتج وانطمي ولا تسوين نفسج بطلة

بعدها ما نطقت ضربها بابًا وهي تدفع بي ،ركضت عليها واني اريد احميها منه بس ميفيد لان وحش ونزل عليها ضرب واني ادفع بي بعد دقايق ما حسينا غير ضربه قوية وبابا وكع بالكاع وراسه كله دم ، تفاجئنا واحنه نشوف وسن شايلة حديدة جبيرة وهي خايفة ، ما سمعنا غير صرخة سعاد وهي تصيح

سعاد … ولج كتلتي اليوم الا اموتج ولج شيخلصج مني اليوم
وسن … يستاهل هو مجرم حقير
سعاد … اليوم انومج بالسجن والله

ركضت سعاد واتصلت باخوها واجه اخذ بابا للمستشفى وهو يهدد ويصيح ،
سامر … اليوم اندمجن والله ادبسزيات

اخذوا وراحوا واني وماما حاولنا نلكه حل نخلص وسن من هذي الورطة ، اخر شي قررنا نخليها تنهزم ، ساعدناها تحضر كل غراضها واخذتها ماما ووصلتها لبيت خالتها .. جانت لحظات خوف وتوتر من القادم ومن الي راح يصير ، بعد دقايق رجعت ماما وهي خايفة ومتوترة ،..
ريم … شنو صار وصلتيها ماما
ام ستار… اي وصلتها وخالتها كلتلي مراح تكدر تسفرها وياها لحد ما يهدأ الوضع
ريم … وشلون هسة
ام ستار … راح تضمها بيت صديقتها لحد ما تخلص هذي السالفة
ريم… والله خايفة عليها اكيد سعاد مراح تسكت
ام ستار … مو بس سعاد وهذا اخوها العار
ريم … ما اعرف بس خايفة من الي راح يصير
ام ستار … ان شاء الله خير

بعد ساعة تقريبًا رجعت سعاد وهي تصيح وتهدد ، أشرتلي ماما حتى اسكت وما احجي شي ..
سعاد … وين العايقة وسن وين ضميتنها
ريم … مندري بيها روحي دوريها انتي احنه شكو
سعاد … اني اعلمجن وانتي بالذات يا ريم راح اشوفج المر
ام ستار.. اعلى ما بخيلج اركبي

طلعت وهي تتوعد النه ، رحت للغرفه وكعدت يم علاوي وهو كل هالفترة وهو معتزل ورافض يحجي ويه احد وبكل يوم يكولي مشتاق لبابا ،حاولت اخلي يرجع لطبيعته بس راحت ضحكته.

صار الليل وماكو اي خبر عن بابا وجان كل همي وسن ما تتأذى ، بعدها بساعة رجعوا وجانت سعاد تتهدد وتتوعد ودخل وراها اخوها ، كعدت وهي تباوعلي بنظرة حقد ،
سعاد .. اسمعيني زين يا ريم كبالج طريقين تختارين واحد منهم
ريم … شنو
سعاد … اعرف وسن وين وديتنها واعرف خالتها وين اخذتها لهذا انتي مجبورة تختارين واحد من الخيارين
ريم … شنو الخيارين
سعاد… يااما تقبلين تتزوجين اخوي او اسلم وسن للشرطة
ريم … شنو واني شكو حتى اتزوج اخوج
سامر … بصفتج ساعدتي المجرمة خصوصا ابوج حالته خطرة وممكن يموت بالتالي حتى انتي راح تتحاسبين
ريم .. ما مجبورة اوافق على واحد مثلك
سعاد … خوش معناها راح اقدم شكوى وانطي عنوانها وحضري نفسج تنامين بالسجن والاسوء من هيج امج وجهالج بالشارع

كامت وهي تتمضحك راحت لغرفتها وراح وراها اخوها ، اجتي يمي ماما وهي دكولي..
ام ستار .. لا توافقين
ريم … مجبورة اوافق ما سمعتيها تعرف مكان وسن
ام ستار .. لا توافقين وتضيعين نفسج
ريم … ماما مجبورة اذا مو علمود وسن علمود جهالي
ام ستار … مراح تكدر تسوي شي
ريم.. ما اعرف الظاهر الحزن ما ناوي يفاركني
ام ستار … يمه لا تضيعين نفسج
ريم … الله كريم
مر الليل واني افكر ومجبورة اختار بين نفسي وبين وسن ،بين حياتي وبين اطفالي ، لحد ما حسمت قراري وقررت انهي الموضوع وجنت اعرف هذا المكتوبلي.
________________
توقعاتكم للقادم
شنو راح يكون قرار ريم ؟
كونوا بخير 🌸

#نرجس_صادق

السلام عليكم ... الاحبة متابعين قناة #بوح_قلمي بتوصية من قبل الأخت الكاتبة العزيزة #نرجس_صادق .. احب أبلغكم عن عدم وجود #بارت لهذه الليلة بسبب ظرف طارئ لديها

و ان شاءالله تعوضكم
في الليالي القادمة

السلام عليكم متابعيني الاعزاء

غداً سأعود لتنزيل البارتات وسأكمل الرواية إن شاء الله ، الانقطاع كان بسبب حالة وفاة لأحد اقاربي 💔

جداً اعتذر منكم ❤️

#نرجس_صادق

السلام عليكم متابعيني الاعزاء

بما انه أوشكت رواية #طريق_الى_النار
على الانتهاء حيث سيتم تنزيل كل البارتات يوم الثلاثاء المقبل ان شاء الله.


أود أن أعلن لكم عن رواية جديدة بأحداث واقعية وبحقائق اخرى ما زال ابطالها يعيشونها وسيتم الإعلان عنها في الاسبوع القادم ان شاء الله.

كونوا بخير 🌸
#نرجس_صادق

السلام عليكم اولاً
حبايبي اني حريصة أكثر منكم على إكمال الرواية لانه اني متحمسة لنهايتها مثلكم بالضبط
لكن انتو ما جربتوا شعور تكعدون ٧ ساعات متتالية تكتبون بالبارتات وفجأة ينحذف كل تعبكم
اني البارحة وصلت بيه لحد البجي أقسم بالله لانه قليلة حض جداً واذا تعتبروني مقصرة فإني اعتذر

الخلل من الواتباد لأنه اكو صيانة حسب ما سمعت
والبارحة الليل كله اني كاعدة حتى ارجع البارتات ولكن لحد الان ما زال الخلل
لهذا اضطريت اكتب بالتليكرام بالحافظة اكعد اكتب وأعيد كل البارتات وحتى نفسيتي تعبت وان شاء الله بس اكمل بالتليكرام انشرهم بسرعة.

#نرجس_صادق

بارت ٩٣