رواية #طريق_الى_النار
بقلم الكاتبة:نرجس صادق

خالد.....اشيلك من خيالي وترد
مثل الشيب
كلما تنشلع تكثر


ريم ... غربتي وصوت النواعي يلوحني
ويلتم بدية الصوت
بي ريحة عيوني وبي هلي ووحشة مسية
____________________________
ريم ..
الساعة ب٨:٤٥ دقيقة
صحيت واني مفزوعة من الكوابيس ، كل حياتي مرت بشريط كبالي ،قبل ٧ سنوات جنت طفلة تصحى الصبح وكل همها تلعب ، طفلة تغار من صديقاتها وتتحسر على كلشي ،طفلة نحرمت من ابسط حقوقها.

كمت واني رايحة للمطبخ ،مريت بغرفة سعاد واني اسمع صوتها وهي تحجي ويه اخوها ...
سعاد .. اكيد راح توافق لان هي تحب جهالها ومراح تضحي بيهم
سامر... ان شاء الله توافق
سعاد... لا تخاف اخليها توافق وغصبا عليها وتصير الك
سامر ...اوف يا سعاد اذا صارت الي الج مني بشارة تخبل
سعاد ... فدوة اروحلك
عبرت الغرفة واني اجر خيبتي وحزني وراي ، خلاص اني ما مكتوبلي الفرح ،أقبل بحزني وهو يقبل بيه .

رحت للمطبخ وجانت ماما تحضر بالريوك ، باوعت لاطفالي وشفت نظرات الانكسار بعيونهم ،رجعت بيه ذاكرتي لحياتي السابقة...

عودة للماضي...
وسام .. ريم اذا متت توعديني تصيرين قوية وتحمين جهالنا
ريم.. بروحي افديهم
وسام... ريم تذكري اختج الي تركت عندج وردتين ووصتج عليهم وتذكري حوراء الي وصتج على ابنها
ريم .. وسام انت جاي توصي ام على جهالها
وسام.. ادري بيج تحبيهم بس اريدج تعرفين الحياة صعبة ومراح ترحمج واريدج تبقين قوية
ريم... هو اني مكتوبلي الحزن
وسام ... سلامتج


صحيت من ذكرياتي وبدت دموعي تجوي خدي ، اوف يا وسام ما ادري اذا اني ضلمتك لو القدر ضلمنا ، جنت سارحة بتفكيري واني اتخذت القرار الاخير واجاني صوت ماما وهي دكولي ...
ام ستار ... شنو قرارج
ريم... ميهمني شنو قراري المهم هذولة الامانة يبقون بخير
ام ستار ... يعني راح توافقين
ريم ... اذا جان موافقتي تحميهم اكيد اوافق
ام ستار ... راح تضيعين مرة ثانية
ريم... الحزن عنوان قصتي والدموع كلماتها
ام ستار...خالد طلبج مني وجنت مقررة اخلصج من هالوضع وتنجمعون سوية ،الولد يحبج وصادق بحبه
ريم... ههههه من كل عقلج ماما
ام ستار... ليش شبي خالد ،الي اعرفه انتي تحبين خالد
ريم... احبه بس هذا الحب ما مكتوبله ينجح هذا الحب مبني على حزن وفراق
ام ستار... اوف يا بنتي ، كل دمعة نزلت منج جانت تاكل بيه اكل واللوم نفسي لان اني ضيعتج
حتى اخلصج من ستار وابوج زوجتج لشخص متحبي ، وجنت اشوف دموعج ونار تاكل بيه ،سامحيني .
ريم ... ابد مو انتي الي ضلمتيني ، القدر الي ضلمني
ام ستار... شاسوي حتى اخلصج من ضلم هاي الي متخاف الله
ريم ... ماكو خلاص ،اتخذت قراري وانتهى

طلعت من الطبخ واني احس نار بدت تحرك بكلبي ، ألم ما اعرف مصدره ، اوف يا خالد انت سبب معاناتي ، ياريت ما عرفتك .


خالد...
من يوم شفت بنيتي واني ما مرتاح ،اريدها واتمناها لأخر يوم بحياتي ، رحت وطلبتها من امها وشفت الامل من كلام امها ، عشت احلام ما جنت متوقع اعيشها بيوم ،قررت اللغي السفر وارجع اعيد حياتي  ،

خلصت الوقت واني افكر واخطط لرجعة محبوبتي ، وبيوم اني كاعد بالاستديو واجاني عباس وعلاء ..
جنت مقرر اقطع علاقتي بيهم بس بعد ما لغيت سفري قررت اصالحهم ، كمت واني متلهف لحضنتهم ،حضنتهم وهمة متفاجئين..
خالد ... هلا بالضلوع
عباس ... انت خالد لو احنه غلطانين ، اوكف خلي أتأكد من العنوان
خالد ... ههههههه لا اني خالد نفسه ، مشتاقلكم
علاء... لا ما اصدك معقولة انت خالد بلحمك ودمك
خالد... ولكم شبيكم شهالحجي هذا
عباس.. يخوي صارلنا ٥ أشهر نتوسل بيك حتى تسامحنا ،اليوم شصار حتى هيج سامحتنا ومن كل وكلبك
خالد... رجعلي الامل
علاء.. امل شنو خالد
خالد... علاء رجعت محبوبتي ، وشفتها وكلبي ارتاح ،بس هالمرة ما اريد اخسرها ، واريد اتقدملها بسرعة
عباس... انت تحجي صدك
خالد... اي والله
علاء... خالد اني اساندك بس خاف ابوها
خالد... ميهمني الي اريده هي وبس
عباس.. فوت واحنه بظهرك مدام هالشي يسعدك للموت وياك
خالد... اريدكم تساعدوني
علاء.. أمر واحنه انفذ
خالد.. علاء خلي ودق تحاجيها وتستعجل فدوة
علاء... تدلل هسة ارجع للبيت واخلي ودق تحاجيها
خالد... عفية اخوي


فاضل ...
عجزت واني ادور على علاج لدلال ، ما جان اكو شي يعالجها ويخلصني من هالعذاب ، وبيوم اني نايم بغرفة خالد ، حلم جان هو الدليل لعلاجها…

جنت بغابة جبيرة كولش واني مرعوب ومفزوع والخوف متملكني فجأة برزت كبالي افعى ضخمة كولش وبعد ما شفتها ،نشلت اطرافي وما كدرت اتحرك وصرت احسب اللحظات لموتي ، فجأة بدت تقترب مني واني مقيد ، اريد اصرخ بس فقدت صوتي وفجأة صرخت بصوت يهز الكاع … يا أبو فاضل
وبعدها ما حسيت بشي وكعدت مفزوع وخايف ، رجعت بذاكرتي للحلم وأني أحمد الله جان حلم مو حقيقة ، اجيت ارجع انام بس عقلي وكف على الي نقذني بالحلم ،اتذكر اني صرخت ياابو فاضل..

معقولة هذي إشارة الي ،ضليت افكر واعيد بالحلم بعقلي واني احس هذا تنبيه الي ..جبرت نفسي انام ،

كعدت على صوت ايمان وهي تكعدني، كمت واني متفاجى.. إيمان شعدها من الصبح ..
إيمان… صباح الخير يا حلووو
فاضل..صباح النور ،شلونج حبيبتي
ايمان… الحمدلله بخير بشوفتك ، مشتاقتلك كوم
فاضل… خير ولج شعندج من الصبح
ايمان… هيج اشتاقيتلكم واجيت وعمتي هم اجت على دلال
فاضل.. ها تمام

كمت غسلت ورجعت للمطبخ واني افكر بالحلم ، لاكتني عمتي وهي تتوسل بيه اشوف حل لدلال ..
ام فارس.. يمه بنتي جاي تموت كبالي فدوة شوفلي حل
فاضل.. عمة ما بقه شي ما سويته
ام فارس… يمه خلي تاخذها لهذا السيد بالنجف يكولون شغله بالمكان
فاضل… لا عمة لا بعد ما اعتمد على احد ، حضروا نفسكم نروح لكربلاء ،راح اخذها لأبا الفضل العباس
ام فارس… سلام الله عليه ، اي يمه ساعة واحنه حاضرين

ما اعرف شنو الي خلاني اقرر نروح لكربلاء ، نطقتها واني ما جنت مقرر اخذها لكربلاء ، حسيت اكو شي بداخلي يكولي اخذها لهذا المكان ، وكأنه بعدني تحت تأثير الحلم.
بعد ساعة اخذتهم وطلعت لكربلاء واني فاقد الآمل بعلاجها ، طول الطريق واني افكر بالحلم وادور على تفسير اله بس ما عرفت تفسيره .


ودق…
طول هالفترة والأيام تمر واني بدت اعراض الحمل تزيد تعبي ، بعد ما ماما رجعت زادت معاناتي وصارت مسؤوليتي اكبر ، بديت اتعب وعلاء يحاول يقلل تعبي بس تبقى واجباتي لازم اسويها ، بيوم جان الكل كاعدين سوية وقررت أفتح موضوع زواج مهدي وبهاء..
ودق.. عمة شراح تسوين على زواج مهدي
ام علاء… مدام نفتح الموضوع خلي اشوف مهدي شنو رأيه
مهدي… شنو يمه
ام علاء… يمه راح اخطب من بنات ام محمد لأخوك بهاء وهنة بنات حبابات وحلوات ، شنو رأيك اخطبلك اختها
مهدي… سوي الي تشوفي مناسب
ام علاء… يمه يعني مقتنع ، اذا بنفسك غير شكل كول يمه
مهدي… لا ما عندي شي ومقتنع
علاء… ليش مستعجلة يمه
ام علاء.. يمه مرتك وحدها وحامل وتدرس ،هم خطية تريد واحد يساعدها وبعدين اخوتك مو صغار ولازم يتزوجون
علاء… ماشي

حسيت بتعب ودوخة ،كمت صعدت لغرفتي واني احس نفسي اريد اتقيأ ، ركضت للحمام وبديت اتقيأ واحس روحي تطلع ، اجاني علاء يركض وهو يكولي …
علاء.. شبيج بنيتي
ودق… اعراض الحمل موتتني
علاء… خلي اخذج للمستشفى
ودق.. ميفيد حبيبي
علاء… اخذي علاج
ودق… اي هسة راح اخذ
رجعت للغرفة واني بس اريد انام ، تقرب مني علاء وهو يكولي ..
علاء… ودق اريد منج شغلة
ودق… شنوو
علاء.. بعد ما رجعت ريم ، خالد قرر يتقدملها واني اريدج تحجين وياها
ودق… صدك تحجي
علاء… اي والله
ودق.. الله يسمع منك
علاء… باجر اخذج لاهلج واريدج تقنعيها
ودق… اكيد توافق بدون تقنيع
علاء… ان شاء الله


اليوم الثاني .. الساعة ب٤ العصر
اخذني علاء لبيت اهلي واني متحمسة اشوف ريم وافرحها ، خطية تعبت بحياتها …
اول ما دكيت الباب ، طلعتلي وحدة ما اعرفها …
تذكرت هذي سعاد الي حجتلي ماما عليها .. هي شافتني وبدت تحجي بتكبر..
سعاد… انتي ودق
ودق… اي نعم
سعاد.. شعندج جاية
ودق… بيت ابوية وبكيفي
سعاد… هههههه قصدج بيتي اني
ودق.. من شوكت صار بيتج
سعاد… من يوم تزوجت ابوج
ودق… ماشي ، خليني افوت
سعاد… فوتي بس شوفينه طولج ، البيت وصخ صارله يومين بدون تنظيف
ودق… نظفي انتي

ما انتظرتها تجاوب ،عفتها ودخلت جوة واني ادور على ماما وريم بعيوني ، واول ما دخلت للمطبخ شفت ماما دتوكل بعلي الأكبر
وريم دتمشط لزنوبة… ركضت على ريم حضنتها واني مشتاقتلها.
ودق.. حبيبتي ريم حيل مشتاقتلج
ريم … حتى اني ، بشريني شخبارج ، الحمل شلونه وياج
ودق… الحمدلله بخير
ام ستار… هم معذبج الحمل يمه
ودق… اي حيل بس الحمدلله
ريم… ديربالج على نفسج
ودق.. ان شاء الله ، جايبتلج خبر يخبل
ريم… شنوو ، خير ان شاء الله
ودق… تعاي بالغرفة نسولف
ريم … اي جاية

رحت للغرفة واجت ريم وماما وراية ، كعدت ريم وهي صافنة عليه وتنتظر مني احجي ،
ودق … ريم احنه كلنا ندري تحبين خالد ويحبج
ريم… جان هذا ماضي
ودق.. لا مو ماضي هذا الحب لازم يرجع ولازم تنجمعون
ريم.. ما مكتوبلنا ودق افهمي ما مكتوبلنا
ودق… واذا اكولج خالد يريد يتقدملج
ريم … وشنو يعني باجر زواجي يا ودق
ودق… زواج شنووو
ريم… مو اكولج ما مكتوبلنا
ودق… احجي زواج شنووو

حجتلي ماما كل القصة واني مصدومة لا اكدر ابد ولا رجل وكل تفكيري بريم واني اباوعلها ودمعتها بدت تنزل على خدها ..

ودق … انتي مخبلة شلون توافقين
ريم … ودق انتي ام وتعرفين الام شتسوي حتى تحمي جهالها
ودق… مو على حساب نفسج مو كافي تذبين نفسج بالنار كل مرة
ريم … خلي تحركني النار بس لا تحرك جهالي ، ودق ذوله امانة لو نسيتي اختنا هبة .
ودق… ما نسيت بس الى متى تبقين بهالعذاب
ريم.. هذا المكتوب ودق واني رضيت بالقدر
ودق… وخالد
ريم … شبي
ودق… فرحان لان انتي رجعتيله
ريم… كوتله لا تعيش بحلم وتعذب نفسك
ودق… شراح دكوليله

ريم… اني ما انطيته امل حتى ابررله ولا هو مجبور ينتظر وحدة مثلي ما انكتب عليها غير القهر والعذاب .
_______________________
بارت مؤلم 💔
أحلام تُقتل في احضان العاشقين يا لها من حياة قاسية لا ترحم احداً 💔

لن أطلب ارائكم فلم تعد تنفع مع تلك الامنيات المسروقة من قلوب الأحباب.
كونوا بخير 🤍
الكاتبة:نرجس صادق

بارت ٩٤

رواية#طريق_الى_النار
بقلم الكاتبة:نرجس صادق

خالد ... راح اعزف لحن
بي ريحة فراك
والفاكد محب خلي يكعد بصفي

ريم ... اشيلك من خيالي ،،
وترد مثل الشيب
كلما ينشلع يكثر _________________________
فاضل...
بعد ساعات وصلنا لكربلاء واني كلي يأس وخوف ، عمتي اخذت دلال ودخلتها للامام واني مشيت بخطوات حزينة للامام ، باوعت للقبة واني حسيت الحلم جان تنبيه حتى يترتب الي لقاء كبال سيدي ومولاي ابا الفضل العباس ،بجيت بدون وعي وتوسلت بالعباس يفرج همي بمكانته عند الله طلبت ان يكون شفيعي عند الله .. دخلت للامام واني ادعوا الله حتى يشافي دلال ويرجعها الي ، بعد دقايق سمعت صوت بره ، صوت صلوات وصوت صياح ،طلعت واني كلي فضول اعرف شكو ... تفاجئت واني اشوف عمتي حاضنة دلال وهي تبجي ، نرعبت وحسيت نفسي ما اكدر اتحرك ، ثكلن رجليه ، ركضت عليها وكوة وصلت إلها.. شافتني دلال وكامت حضنتني بكل لهفة ، نصدمت من تصرفها واني اكول .. معقولة هذي دلال

ام فارس.. يمه فاضل الف الحمدلله ما قصر ابو فاضل
فاضل... الحمدلله بس احجيلي عمة شصار
ام فارس ... يمه اول ما دخلت للامام شمرت دلال على شباج العباس وذبيت همي كله يم الشباج ، يمه ما حسيت غير دلال خوت ووكعت من طولها ، تسودنت وكمت اللطم عبالي بنيتي ماتت ، يمه الحمدلله ما قصروا ، كعدت دلال وهي كلشي ما بيها ودكلي يمه جوعانه.
فاضل... الحمدلله الف الحمدلله ياربي

جانت فرحتي متنوصف واني اشوف دلال رجعت طبيعية وغير هذا كله حاضنتني ومتقبل تعوفني ، اخذتهم وطلعت من الامام وكل همي راح الحمدلله ، طلعنا من كربلاء ورجعنا للبيت واني عيني على دلال واشوف ضحكتها ما فاركتها ، جبتها هنا جنازة ورجعت بيها وردة ، الف الحمدلله.


ريم...
اليوم الثاني بده واني انتظر لحظات تفصلني عن طريقي الى النار، ما جنت افكر بالي صار بس كل تفكيري بالي راح يصير ،حزني وعذابي راح يزيد ، راح تجيني أيام افرح بيها لو لا ، اكو فرج لو خلاص انتهى كولشي.
اخذتني رجليه للغرفة واني اريد اودع جهالي ،دخلت وجان علاوي نايم ودمعته بعينه وزينب تقره وأبو الاكبر يلعب وسجاد متمدد يم اخوو ، تقربت عليهم واخذت سجاد بحضني واني اشم بي وابوسه ورجعت بذاكرتي لنفس اللحظة الي ودع بيها وسام اطفاله رجعت لاخر ليلة لوسام وهو بيناتنا ، بنفس الطريقة ودعهم واليوم اني اودعهم ، القدر ضلمني بس شنو ذنب هالاطفال حتى يضلمهم القدر ، نكتب عليهم يفقدون ابوهم وامهم ، حضنتهم وطلعت وما ردت ابقى اكثر حتى ما اضعف.

صارت الساعة ب٥ العصر ، ندكت الباب وطلعت سعاد حتى تشوف منو ،
ثواني ودخلت سعاد ووياها وحدة ثانية ما اعرف منو ، تقربت يمي وهي دكولي ..
سعاد... يله كومي اوكفي وره الباب حتى يعقدلكم الشيخ
ريم... هسة
سعاد.. لعد شوكت تردين حضرتج كومي يله فضينه

كمت واني ارجف وكأنه لحضاتي الأخيرة ، وكفت وره الباب ورجعت بيه ذاكرتي للحظة عقدي ويه وسام واني اشوف نفس المعاناة جاي تنعاد وهالمرة اكثر...
بده الشيخ يتلوا العقد واني جنت جثة تنتظر يدفنوها بالحياة ، كمل الشيخ وانطيت الموافقة ونقتلت كل أحلامي.

اجاني صوتها وهي دكولي ...
... امشي حضري غراضج ترحين ويه رجلج هسة
عافتني وطلعت واني عيوني راحت على امي الي واكفة بالزاوية ودموعها ما وكفت ، مشيت بخطوات ثكيلة ، حضرت غراضي وطلعت ، بعد نص ساعة رجعت وهي تبتسم ،
... يله كومي سامر منتظرج بالباب

كمت وطلعت واني اسحب بنفسي الي رافضة الي جاي يصير ، صعدت بالسيارة وودعت ماما ووصيتها على جهالي.

طول الطريق وهو جان ساكت ما نطق حرف واحد ، بعد ساعة وكفت السيارة كبال بيت ما اعرفه وين ،سمعت صوته وهوً يكولي...
سامر .. نزلي بسرعة يله

نزلت ودخلت للبيت الي على اساس بيتي الجديد ، باوعت للبيت واني انتظر اسوء ايامي بهذا المكان ،اجه ورايه وهو يكولي ...
سامر ... اسمعيني يا حلوة انتي هسة مرتي كلشي تشوفينه هنا تنسينه ممنوع اسمعج مطلعة حرف واحد
ريم... ماشي
سامر ... يله امشي نظفي البيت كبالي
ريم... تمام

دخلت للغرفة واني اشوفها مكلوبة وكأنه مهجورة ،خليت غراضي على صفحة وبديت انظف بالبيت.


خالد...
جنت فرحان واني متلهف لشوفتها اجاني إتصال من اوس .. جاوبته..
خالد.. حبيبي اوس شلونك
اوس... خلودي حبي انت شلونك إني الحمدلله
خالد.. بخير الحمدلله
اوس... ما تجي لهنا
خالد... لا حبيبي ادعيلي يصير الي ابالي
اوس... شنو ولك شمخطط
خالد... راح اخذها اوس واخيراً
اوس... صدك الله عليك
خالد... والله واخيراً
اوس... يارب يتمم على خير
خالد... ان شاء الله
اوس... جيبها وتعال بس تتزوجون تونسوا هنا
خالد... ان شاء الله

غلقته من اوس واجه على بالي علاء ، لازم اخابره اشوف شنو الاخبار ، اتصلت على علاء ..
علاء... ها حب
خالد.. شلونك علوش
علاء.. الحمدلله
خالد.. بشرني شصار
علاء… حبيبي وديتها لاهلها وكولت لمهدي يرجعها لان عندي شغلة وهسة راح ارجع للبيت وارجعلك خبر
خالد… بسرعة ولك لا تتأخر
علاء.. تدلل من عيوني

غلقته من علاء واني انتظر ومتلهف لأيام حبيبتي ، اوف معقولة تصير الي بعد هالتعب ،معقولة الله راح يفرجها عليه ، طلعت من الاستيديو وغلقته ورحت للبيت واني الفرحة مسايعتني ، وصلت للبيت وجانت عيني على باب بيتهم ، اوف يا بنت كلبي شوكت تصيرين بيتي …
فجأة نفتحت بابهم وكلبي بده يرفرف لان جان عندي احساس هي طلعت وفعلاً شفتها وهي طالعة بس طلعت مو ريم نفسها ام ضحكةً الحلوة ،طلعت ودموعها على خدها وما جانت دموع جانت نار حركتني ، وطلع وراها رجال جبير ودفعها وهو يكوللها ، صعدي.

هنا نقتلت أخر ذرة آمل عايش بيها ،هنا نقتلت أحلامي ،هنا ماتت فرحتي ،هنا تمنيت اموت بمكاني ،تجمدت وما عرفت شاسوي
فقدت كل احساسي وبهاي الاثناء تحركت السيارة واخذت كلبي وراها.

تقربت لبيتهم بخطوات حزينة واني فاقد الامل بالحياة ، شفت امها واكفة بالباب وهي تبجي ، هنا عرفت ريم نباعت مثل المرة الاولى ،هنا عرفت ريم فضلت تنباع حتى تحافظ على شي ثاني ، شافتني امها وبجت بحركة…

خالد… راحت مووو
ام ستار … يمه خالد الله يخليك لا تسوي بنفسك هيج ، هذا قدر ربك وصدكني مجبورة اوافق
خالد… مجبورة على شنو ، مجبورة تبيعني للمرة الثانية
ام ستار … يمه خالد ريم ام والام مستعدة تذبح نفسها بس ما يصير لجهالها شي
خالد… يعني فضلت تبيعني علمود اطفال مو اطفالها اصلاً
ام ستار … صح همة مو جهالها بس هي ربتهم وتعتبرهم جهالها ،صدكني تحبك ولما سمعت بأسمك صدكني موتت نفسها وما جانت تريد تشوفك حزين
خالد… ما اريد حبها الي يذبحني كل مرة ، ما اريدها ولا راح اسامحها
ام ستار … يمه فدوة اروحلك لا تأذي نفسك
خالد … اول من حرمني منها وحرك كلبي هي انتي وامي الله يرحمها مراح اسامحكم ولا راح اسامحها ومن اليوم اني حاقد عليكم كلكم

عفتها ورحت وضلت تصيح وراي وما اهتميت ، مشيت مكسور مذلول وما اكدر اوصف ذيج اللحظات الي جانت تطلع بيها روحي وترجع ، يضيع مني الهوى واختنك وفجأة يرجع ، ذيج اللحظات جانت كفيلة تخليني اوكع مغمي عليه باب البيت …

ما حسيت بشي غير عباس يكعد بيه ، فتحت عيوني واني بغرفتي وعلاء وعباس واكفيين يمي ،شفت الخوف بعيونهم بس ما اهتميت واجيت اكوم ، وحسيت جسمي مشلول وما اكدر اتحرك ،انتجيت على الحايط وخذلني جسمي ورجعت كعدت لانه ما عندي قوة كل حيلي راح ، سندني عباس حتى اكوم ،دفعت ايده وطلبت منهم يطلعون بره …
خالد … عوفوني وحدي
علاء… خالد انت لازم تعرف ليش سوت هيج
خالد.. بدون اي حرف واحد ما اريد اعرف شي وما اريد اي مبرر
عباس… خالد لا تأذي نفسك فدوة
خالد… اني طول هالسنين والأيام ما جنت عايش وبهاليومين بس عشت وهسة مات كولشي بداخلي ، لما شفتها حسيت خلاص نسدت ابواب حزني وبدت حياتي من جديد ،واليوم اشوفها تطلع ويه شخص ثاني وهي زوجته ،هنا حسيت بالذلة وبالحقد وكرهت الكل ، اطلعوا وعوفوني وحدي.
عباس… خالد ما اكدر اعوفك
خالد… كلت عوفوني ما طايق احجي ويه احد
علاء… على الاقل خلينه لحد ما يرجع فاضل
خالد… روحوا لا تخافون مراح اموت

طلعوا بره واني اخذت قراري الي مراح اتراجع عنه هالمرة ابداً …

بعد خمسة ايام…..
خالد…
الساعة ب٣ الفجر، داخل الطيارة المتوجهة لتركيا
رجعت بذاكرتي لسفري للمرة الاولى ونفس السبب الي غربني المرة الاولى غربني للمرة الثانية ، نفس الألم ونفس العذاب بس هالمرة رايح واني حاقد عليهم كلهم ، رايح واني شايل بكلبي كره للكل ،كره للعراق الي ما شفت منه غير العذاب ،كره لاهلي ،كره لاصدقائي الي بيوم منعوني عنها ، كره لمحبوبتي الي باعتني مرتين ، رايح واني متاكد مراح ارجع مرة ثانية ، رايح بدون ميعرف احد عن مكاني.
أقلعت طيارتي وودعت العراق بدموع الفراق ، خلاص انتهى كولشي يا ريم ، وقعتي على نهاية حبنا وصار لازم انساج وأبدي حياة جديدة، راح انساج واحرك كلبج مثل ما حركتي كلبي.



فاضل…
يُصادف يوم ثلاثاء… بعد اسبوع من رجوع دلال بالسلامة لحالتها الطبيعية وخلال هالاسبوع عشت أحلى أيام حياتي ويه حبيبتي وبنيتي ..

بيوم الثلاثاء جنت مقرر افاجئ دلال بسفرة للشمال حتى نغير جوو ، صحيت الصبح على لمسات اديها لدلال وهي تهمسلي..
دلال… صباح الخير حبيبي
فاضل.. صباح السعادة بنيتي
دلال … صح النوم يله كوم اشتاقيتلك
فاضل… ههههههه تحسسيني اني بعيد عنج تره اني يمج بابا
دلال… ميخالف يله كوم ، رايحة اسوي ريوك
فاضل… تمام

كمت ورحت غسلت ورجعت لغرفة الاطفال .. صحيتهم واخذتهم للمطبخ حتى نتريك سوية ، تذكرت خالد ورحت لغرفته حتى يكعد يتريك ويانه ، دكيت الباب مرتين وما جاوبني ، دخلت مباشرةً واني ادور على خالد بعيوني ، تفاجئت من شفت الغرفة فارغة ، وين راح ؟ معقولة طلع من الصبح للاستيديو.
طلعت من الغرفة ورجعت للمطبخ واني ما مقتنع بغياب خالد من الصبح.



ريم…

جنت اركض مفزوعة بخوف واحس احد يركض وراية واني اصرخ واريد احد ينقذني وفجأة وكعت من مكان عالي كولش وكعدت مرعوبة وكلبي يدك قوي ، اللتفتت للجهة الثانية وشفته نايم بصفي ،اجيت اكوم وزاد عليه الألم وتذكرت الي صار البارحة …

عودة للماضي …
كاعدة بالغرفة وانتبهت للساعة ب٥ العصر ،كمت وقفلت الباب عليه واني خايفة لا يصير الي كل مرة يسوي بيه ،طول هالاسبوع واني بوسط الجحيم ،كل يوم يجي بالليل ويجيب اصدقائه ويكعد يسكر واسمع صوت ضحكهم وصياحهم ،
صارت الساعة ب١ بالليل ، ندكت الباب بقوة ،نرعبت وطفرت واني ما اعرف شاسوي واني خايفة لا يطلع هذا واحد من اصدقائه ، جاوبته …

ريم.. منو
سامر … لج فتحي الباب بنت الكلب
ريم … شتريد مني فهمني
سامر … افتحي الباب لا اكسر راسج
ريم … الله يخليك عوفني
سامر … افتحي بسرعة

كمت واجيت افتح الباب وانتبهت لوجهي ،جانت عيوني مورمات ووجهي ازرك و شفتي مشكوكة ،ترددت افتح الباب وسمعت صوت صياحه وهو يهددني.
__________________________
أنهيت البارت بقفلة حتى تتحمسون للبارت القادم…

توقعاتكم للقادم
البارت الاخير مراح انشره اليوم حتى اترك مجال الكم تتوقعون وتتنبئون بالاحداث.. رغم البارت الاخير مؤلم 💔

كونوا بخير 🌸
#نرجس_صادق

البارت الاخير ( الجزء الاول)

رواية #طريق_الى_النار
الكاتبة:نرجس صادق

خالد ....
يا ابنادم كلشي يلجمني من أريدك
الرسايل
الشوارع
والغنه
وعيون غيرك
حتى بيبان المدينة
الضاله بحسرة بريدك

ريم ...
يالمشيت بكل عبيرك يا دفو ايعطر كذلتي
يا كلب يقره صفنتي
شلون بيه
غير كون أرهم لغيرك
_______________________
ريم…
مشيت بخطوات ثقيلة وفتحت الباب ، ما حسيت غير على ايده وهو يسحبني من شعري ويصيح ..
سامر … ك…. اليوم اذبحج ولج تخونيني يا ساقطة
ريم… الله يخليك عوفني فدوة اروحلك كافي موتتني
سامر … منو جان يمج البارحة
ريم… والله محد اجه والله محد جان يمي كافي خاف الله بيه

سحبني من شعري وشمرني بنص الصالة ، شفته وهو يسحب حزامه ، حضنت نفسي وصرت ارجع ليوره اريد انهزم منه بس ماكو مهرب ، نزع الحزام وتقرب مني ، خليت اديه على وجهي وصرت اسمع صوت الحزام وهو يلامس جسمي ، ما جنت احس بالم الضرب لان جسمي خدران بسبب الضرب الي يضربنيا كل يوم ، ما اعرف شكد مر من الوقت وبعدها ما حسيت بشي .


صحيت فجأة واني بنفس المكان مشمورة بنص الصالة وجسمي متكسر وما اكدر اتحرك ، باوعت لاديه الي تحول لونهن للازرك وانتبهت لملابسي المشكوكة وعرفت بوقتها هو اعتدى عليه واخذ الي يريده مني بابشع الطرق ، سحبت نفسي واني ازحف للغرفة ، دخلت الغرفة واني انتجي على الحايط ، تقربت للمراية واني اشوف جوة عيني ازرك وعيني وارمة وصاير بيها نزيف وشفتي مشكوكة وشعري متكطع وملابسي متمزقة ، لملمت نفسي الباقية ودخلت الحمام وجانت دموعي مثل النار على خدي ، ما جنت احس بشي غير حرارة دموعي ، وكفت جوة المي واحس المي يأذيني وهو ينزل على جسمي ، طلعت وغيرت ملابسي وقفلت الباب وكعدت اواسي نفسي واصبرها.


فاضل…
الساعة ب١ الظهر…
كعدنا كلنا على العده وتذكرت خالد ما موجود … قررت اتصل علي يجي يتغده ويانه ..
اتصلت علي والصدمة ، جان جهازه مغلق
رجعت اتصل ونفس الشي
قلقت وزاد خوفي على خالد لان بالايام الاخيرة وضعه جان تعبان كولش بس يرفض يكول السبب، كررت الاتصال ونفس الشي.
كملت غده وقررت اتصل على علاء .. اتصلت واني ابالي الف موضوع..
فاضل… الو ها علوش شلونك
علاء… هلا ابو علاوي الحمدلله انت شخبارك
فاضل… تمام الحمدلله بس ردت اسئلك
علاء.. اي تفضل ابو علي
فاضل… خالد يمك
علاء… لا مو يمي ولا بالاستيديو لان اني هسة كاعد بالاستيديو
فاضل… خاف يم عباس
علاء… ما اتوقع لان قبل شوية جنت ويه عباس وهو يسأل على خالد
فاضل… معقولة وين راح لعد ، من الصبح لحد الان ما موجود
علاء… انت صدك تحجي وشلون ساكت من الصبح
فاضل.. عبالي طالع لشغله
علاء… خرب شلون هسة وين نلكا اني خايف علي
فاضل… خلي ندور عند الي نعرفهم
علاء…مراح تلكا لان خالد سافر
فاضل.. انت صدك تحجي سافر شنو
علاء .. جان يريد يسافر من زمان وهسة اكيد سافر
فاضل.. وليش اني ما ادري بهذا الموضوع
علاء… انت هم الله يساعدك جنت مشغول بهمك
فاضل… وعايف اخوي ولا ادري عنه
علاء.. لا تأنب نفسك مو ذنبك احنه كلنا عفنا وذنبنا كلنا
فاضل.. هسة شلون فهمني وين راح وين سافر
علاء.. اكيد لتركيا بس انت اهدا وخلي الوضع يهدأ لا تضوج ان شاء الله خير
فاضل… ماشي

غلقته من علاء وضليت اللوم بنفسي ، شلون هملته ،شلون عفته يعاني وحده ، شكد تألم وشكد نقهر واني ما ادري بي ، سامحني خالد سامحني.


خالد…
وصلت لتركيا ونزلت بالمطار واني ضايع بين شوقي للي عفتهم وراي وبين حياتي الجديدة الي راح ابديها…
جان اوس منتظرني بالمطار ،طلعنا سوية وبوجهنا للسكن ، دخلت الشقة واني اشوفها متغيرة هواي عن اخر مرة تركتها بيها.. خليت غراضي ورحت لغرفة النوم ، شمرت نفسي على الجرباية وكل همي ارتاح من هذا الهم والقهر …

بعد ساعات …
صحيت واني ما ادري بالوقت شكد مر ، كمت بدون وعي وركضت لجهازي ، نسيته مغلق واكيد هسة ايمان قلقانة عليه ، فتحته وانتبهت اني نايم يوم كامل وما حسيت على نفسي ..
فتحت الجهاز واني مصدوم شلون نمت كل هالوقت بدون ما احس وكأنه جنت بغيبوبة ، خليت الخط واتصلت على ايمان .. رن بس مدتجاوب ، رجعت اتصل مرة ثانية بس ماكو جواب ، سديته ورجعت لغرفتي ..

ثواني وندكت الباب ، كمت فتحتها وجان اوس جايبلي اكل ..
اوس .. ولك وين جنت تدري خفت عليك
خالد.. والله جنت نايم
اوس… نوم العافية بس كل هالوقت وانت نايم
خالد… اي والله ما حسيت على نفسي
اوس … الحمدلله على سلامتك والبارحة اربع مرات اجي عليك ادك الباب وارجع
خالد… الله يسلمك حبيبي ليش تعبت نفسك
اوس… والله المرة سوتلك الاكل مو اني
خالد … مشكور وصللها سلامي
اوس .. ان شاء الله يله براحتك

سديت الباب ورجعت لغرفتي وفجأة رن موبايلي وركضت متلهف وجاوبت بدون ما اعرف منو …
ايمان… وين جنت روحي فرفحت عليك
خالد… اسف يروحي بس نمت وما حسيت على نفسي كل هالوقت
ايمان… سودة عليه من كد ما تعبان نمت هالكد ، شلونك اخبارك الحمدلله على سلامتك حبيبي
خالد… الحمدلله ، الله يسلمج يالغالية وانتي شلونج شخبارج

ايمان… الحمدلله بس تعبانه شوية
خالد… خير شكو
ايمان.. عمتي موتتني وهي تلح عليه على طفل
خالد… راح ادزلج فلوس وروحي لدكتور راح اكولج علي وسوو طفل انابيب
ايمان… مصطفى ميقبل
خالد… تمام اني احجي وييا وانتي دزيلي تحاليلج حتى اشوفهن لدكتورة هنا
ايمان.. ماشي راح ادزهن الك

كعدت اسولف ويه ايمان من كد ما مشتاقلها وبعدها ترخصت وراحت ، فكرت اتصل بفاضل بس لغيت الفكرة من راسي.


ودق…
عرفت شكد الحياة ظالمة بعد ما شفت ريم نحرمت من حياتها للمرة الثانية وراح تتكرر كل المعاناة ، خالد سافر وترك كلشي ورا وقرر ينسى كولشي ،جنت اشوف اسوء قدر نكتب عليهم ، بس جان عندي امل يجي يوم ينجمعون بس لما اتذكر خلاص قدرهم الفراق افقد الامل …

علاء جان كل الوقت مكتئب ويلوم نفسه على سفر خالد وهمة لحد الان ميعرفون وين راح ، جنت احاول اصبره واطلعه من جو الكئابة بس هو كان فاقد الامل برجعة خالد ،
وبيوم جنت كاعدة بالصالة ودخلت عمتي وهي ضايجة كولش ،
ودق.. خير عمتي شكو
ام علاء… بهاء ميقبل يتزوج ويكول ما اريد اضلم البنية وياية
ودق… عمة خلي يجي علاء ويحجي وياا وانتي روحي شوفي البنية تقبل بي لو لا
ام علاء… البنية موافقة بس بهاء خاف يرفض ويفشلني
ودق… لا ان شاء الله يوافق

بعد ساعة رجع علاء وعمتي طلبت منه يحجي ويه بهاء ، والي فاجئنه ،بهاء يرفض الزواج الا يرجع ابنه ، والا تنحل قضية ابنه الي ما معروف مكانه وين …
علاء وعده يرجعله ابنه بس بهاء رفض يتزوج الا يرجع ابنه ، وبوقتها علاء قرر يدور على ابنه ويستخدم معارفه حتى يلكه ابن بهاء…

بعد شهر …
بيوم جنت كاعدة بغرفتي وجان عندي امتحان ، فجأة دخل علاء يركض ومستعجل ، فتح الكنتور اخذ فلوس وطلع ، ضل بالي يمه وقلقت علي ، كمت نزلت ورا وهو طلع بسرعة ، ركضت دخلت لغرفة عمتي وجانت دتصلي ،كملت صلاة وباوعتلي ..
ام علاء.. خير عمة شبيج
ودق.. ما اعرف علاء اجه مستعجل واخذ فلوس وطلع وضل بالي يمه عبالي اكو شي صاير
ام علاء.. اي يمه علاء راح يجيب ابن بهاء الحمدلله من لكوو
ودق… صدك عمه وين لكوو
ام علاء… والله ما ادري يا عمة خلي يجون ونسألهم
ودق.. اي الحمدلله

مر الوقت واني متلهفة اشوف ابن بهاء .. بعد دقايق ونفتحت الباب ودخل بهاء وبحضنه طفل مدبدب وحلوو بحدود سنتين عمره ، ركضت علي واني متلهفة احضنه ،اخذته من ابووو وهو يباوعلي ، ابتسمت على ضحكته وهو يناغي ويضحك ،دخل لكلبي وحبيته حيل وما اعرف ليش حسيته مثل موسى

هذا الطفل محبوب كولش ، اخذته عمتي مني وصارت تبوس بي وتحضنه وتهوسله ، جان موسى كاعد يباوع شلون نلعب ويااا وهو كام يغار ، عبس وجها وكام يبجي ، شافه علاء وهو يبجي راح يمه وشاله …
علاء… حبيب بابا ليش تبجي تغار من سيوفي ، خلي يولي سيوفي يروحلك فدوة
بهاء… نجب شنو يروحله فدوة
علاء… كوم لك وليدي هو الاول والأخير
بهاء… ههههههههه شكلنا راح نبقى نتعارك هيج على جهالنا
ام علاء… يمه اثنينهم عزاز بس اسكتوا
بهاء… هسة اكدر اتزوج بس بشرط اسمع موافقتها بنفسي
ام علاء… اي صلوات على محمد ، يمه باجر نروح نخطب ان شاء الله
بهاء… اي ان شاء الله


خالد…
خلال هالشهر حاولت انسى الماضي وابدي حياة جديدة، حاولت اطلع واغير مكاني واختلط وحاولت انسى ،حاولت أبني صداقات جديدة ويه بنات وشباب ، وبيوم جنت كاعد بمطعم ويه اصدقائي … عمر واوس وزهراء وسارة …
فجأة اجتي وكعدت يمي بنية مبينة عراقية ، رحبوا بيها وكأنه يعرفوها ، مدت ايدها الي حتى تسلم عليه ..
ديار .. شلونك خالد
خالد.. العفو منين تعرفيني
ديار… معقولة نسيتني
خالد… اني احس شايفج سابقاً بس مجاي اتذكر
ديار.. اي قبل ٤ سنوات اللتقينا اني وياك بالكوفي تذكرتني لو لا
خالد… اها اي تذكرت بسفري الاول
ديار .. اي ومدام تذكرتني بشرني شلونك وشنو اخبارك وشعجب رجعت
خالد… بخير وهالمرة جيتي بعد ما بيها رجعة
ديار … الحمدلله فرحتني
خالد… تمام
ديار… تعال خلي نكعد اني وياك بس على الطاولة الفارغة
خالد.. ليش خلينا كاعدين هنا وياهم
ديار … لا حابة اتعرف عليك لوحدنا
خالد.. تمام خلينا نكعد على ذيج الطاولة

كمنا وكعدنا على طاولة وحدنا وهي صارت تحجيلي عن حياتها وتحاول تعرف شي عن حياتي بس اني ما جنت حاب احجي عن ماضي شي.

ترخصت منها ورجعت للطاولة الي كاعدين عليها الشباب ، باوعلي عمر واشرلي اكوم ورا …
اول ما كعدنا باوعلي وكلي ..
عمر … خالد ديار تحبك
خالد… وشنو يعني
عمر… من رجعت المرة الاولى ضلت تسأل عنك وتبحث عن ماضيك ومن عرفت بيك عندك علاقة حب رجعت للعراق علمودك والظاهر ضلت تراقبك.
خالد… والمطلوب
عمر … اذا تشوف نفسك تكدر تنسى الماضي وتبدي حياة جديدة ، انصحك تتقدملها
خالد… عمر جاي احاول بس مجاي اكدر ، ريم ساكنة بروحي
عمر … انت تعرف بنفسك
خالد.. احاول ان شاء الله بس حتى اذا اريد اخطب مراح اخطب ديار
عمر … ليش شبيها البنية
خالد… ميعجبني هيج نوع من البنات ، سافرة وما محتشمة ابداً
عمر … اكيد راح تتغير علمودك

خالد… حتى واذا متعجبني
عمر … تحبك يا خالد
خالد… الحب مو كافي حتى نعيش بسعادة مدام اكو اختلاف بالتفكير
عمر … صح ، انت اعرف بحياتك
خالد… ان شاء الله خير

تركني وراح وكلامه ضل يتردد براسي ، حاولت أستوعب فكرة الزواج وأبدي حياة جديدة وتوصلت لقرار نهائي ، قررت أبدي حياتي وأنسى الماضي.
______________________
البارت الاخير (الجزء الاول)
كان تغيير للاحداث وانطلاقة لاحداث جديدة وانقلاب بالنهاية…
توقعاتكم تهمني..؟
خالد راح يتزوج !!؟
ريم راح تبقى بقوقعة الظلم!!؟
ام للقدر رأيٌ آخر..!؟

الجزء الثاني سيكون مؤلم 💔
كونوا بخير 🤍
#نرجس_صادق

لسان حال خالد …💔💔💔

"مؤلم جداً ان تُجبر على الفراق رغماً عنك"

البارت الاخير (الجزء الثاني)

رواية #طريق_الى_النار
بقلم:الكاتبة نرجس صادق

خالد....
لازم يصير العكس ويضيع تعبي
علمتني الدنيا
من ارتاح احط أيدي اعلى كلبي

ريم ...
شجم حنين ينام وعيونه حزينة
ودمعه واصل مدري وين وأنا منهم
____________

بعد مرور سنة ....
الساعة الثامنة صباحاً...
في تركيا...
خالد...
صحيت على صوت ديار وهي تحاول تكعدني ، فتحت عيوني وشفتها مبتسمة بوجهي ، جان الجو ممطر وبارد كولش ، كمت من فراشي واني جسمي متكسر ، غسلت ورجعت للغرفة بدلت وفتحت جهازي ، قررت افتح حساب الفيسبوك القديم واول ما فتحته طلعت بوجهي صورة ناشرها عباس وهو يبارك لعلاء بمولودته الجديدة ومنها عرفت انه علاء صارت عنده بنية ، تمعنت بصورة الطفلة وجانت بنوتة تخبل ، عيونها مألوفة اي جانت عيونها تشبه عيون محبوبتي ،فرحت كولش واجيت اراسله واباركله بس ما اعرف شنو الي منعني ، يمكن ما جنت اريد شي يذكرني بالماضي وبحياتي السابقة ، اجيت اسجل خروج وفجأة اجتني رسالة على الماسنجر من علاء ...
علاء.. اشتاقيتلك وما جنت متوقع تنسانه وتبتعد هيج ،ليش خالد معقولة ما اجينه على بالك

نزلت دمعتي واني اقره رسالته وجان نشط الان ، حنيت لايامنا ولخوتنا ولحبنا .. اجيت اطلع من المحادثة وبسرعة اجتني رسالة ثانية..
علاء... اعرف مراح تجاوبني بس مشتاقلك والله

هنا أعلنت استسلامي ورديت علي بسرعة..
خالد... شلونك
علاء... من بعدك مو زين
خالد.. اول شي مبروك على الطفلة الجديدة
علاء... الله يبارك بيك
خالد... عباس شلونه
علاء... زعلان عليك
خالد... لازم تفهموني اني نهزمت من عذابي
علاء... صدكني متأذين من بعدك
خالد... واني متأذي اكثر والله
علاء... شلونك هناك استقريت
خالد... الحمدلله ، اهلي شلونهم
علاء... فاضل صار عنده طفل وحيل متأذي بغيابك والله
خالد... اشتاقيتله
علاء.. ارجعلنا خالد
خالد... ابد مراح ارجع
علاء... لا تكطع بيه فدوة كلبي مجمر عليك
خالد... ان شاء الله اني اترخص علوش
علاء.. براحتك حبيبي

ترخصت منه وطلعت من الحساب واني استرجع كل ذكرياتي وكل معاناتي ، واني اكلب بصوري وياهم اجاني صوت ديار من ورايه ...

ديار ... يله خالد الريوك صار جاهز
خالد.. تمام اجيت

غلقت جهازي وكمت للمطبخ ، كعدت على الطاولة وجانت ديار مقابيلي ، اخذت كوب الجاي وداشرب ولاحضت دمعتها تنزل ، رفعت راسي وباوعتلها واني مستغرب وقبل لا احجي هي حجت ..

ديار... طول هالسنة عشت وياك واني اخر اهتماماتك وحتى بالفراش عشنا اخوة مو زوجين ولهذي لحضتك ما فكرت تحبني وطول الوقت تعاملني كأخت واني حلالك كبالك ما فكرت تطالبني بحقوقك واني احسدها للبنت الي ساكنة قلبك وروحك ، صعب تلكه هيج انسان مثلك وفي إلها ، اني ما اعرف الضروف الي فرقتك عنها  بس طول هالفترة واني وياك ما شفت بعيونك غيرها وصلت بيه احسدها واني زوجتك ، يعني اني عمري ما شفت حب مثل حبك ، لهذا السبب ومدام علاقتنا هي حبر على ورق بس اني قررت ننفصل وننهي هذا الرابط الغير ناجح .

خالد... الأفضل هيج وجنت رايد اكولج هالشي من زمان بس لما اتذكر انتي راح تبقين وحيدة خصوصًا بعد ما فقدتي والدج ووالدتج

ديار.. بس اني مو ضعيفة حتى اقبل ابقى بحياة شخص ميحبني بس لانه اني وحيدة، اني انسانة ولما ادخل حياة احد يا اما اكون كل حياته او اخرج منها للأبد.
خالد.. الله يوفقج ان شاء الله
ديار... قاتل علمودها خالد ، تدري انه اني شفتها بعيونك.
خالد... ما اعتقد القدر كاتبلنا ننجمع
ديار.. الله كريم

بعدها عم الهدوء بيناتنا ولا اني نطقت ولا هي ، دقايق مرت وهي بادرت..
ديار... شوكت راح نباشر باجراءات الطلاق
خالد... بكيفج
ديار... بس خلي ارتب وضعي خلال هالاسبوع
خالد... واني هم خلال هذا الاسبوع راح تجي اختي علمود تسوي عملية زرع أطفال.
ديار... تمام شوكت توصل اختك
خالد... باجر ان شاء الله
ديار... ان شاء الله



ريم...
كعدت مرعوبة واني اتخيل الكابوس الي كل يوم اشوفه ، اشوف نار تاكل جسمي وكل ضني بهذي النار هو الضرب والتعذيب الي اشوفه من سامر كل يوم ....

اللتفت للجهة الثانية واشوفه نايم بصفي وريحة العرك تارسة الغرفة ، اجيت اتقيأ من ريحته ، انتجيت على طرف الجرباية حتى اسند نفسي واكوم ، انتبهت لرجلي وارمة وصايرة زركة توقعت رجلي مكسورة ... اجيت اضغط عليها وتأذيت حيل ، كعدت بمكاني وبجيت من كل وكلبي على حالي ، بعمر ٢٤ سنة وجهي متشوه بسبب الضرب وجسمي ازرك من التعذيب واديه مجروحات بسبب الجروح الي يسويها بيه كل يوم بالسجينة وروحي متعذبة وقلبي جمرة بوسط صدري ، على شنو ابجي على حضي الي شمرني عند واحد ضالم ما عنده رحمة ، الي شمرني عند واحد خسيس ونذل مثله يطلب مني اخلي اصدقائه يعتدون عليه واذا رفضت راح يربطني ويمارس جنونه عليه ويعذبني اسوء تعذيب ، فضلت السجن الف مرة وتندمت الف مرة على موافقتي بي ، وفوك هذا كله حرام اشوف جهالي ، طول هالسنة واني محرومة منهم ، طول السنة واني شفت اسوء واقسى انواع العذاب وتمنيت لو باقية

بعذاب ابوي ولا هذا المجرم ، زحفت لحد باب الغرفة وبالخطأ دفعت الباب وصار صوت قوي ، طفر من مكانه وهو يباوعلي بنظرة حقد ، خفت ولزمت رجلي المكسورة ورجعت ليوره واني اشوف النار بعيونه...

كام واجه باتجاهي وهو ما مسيطر على نفسه ، نزل لمستواي وسحبني من شعري وضرب راسي بالباب ، هنا اني حسيت الدنيا افترت بيه وكلبي تفطر من الالم وهو يصرخ عليه ويفشر ، اغمى عليه وبعدها ما حسيت بشي...

مرت ساعة وبعدها حسيت بلمسات على جسمي وصوت يهمس بأذني...
سامر... يله كومي اشتاقيت لهذا الجسم الحلوو

فتحت عيوني وشفت عيونه مركزة عليه وهو محاوطني باديه ، نفسي لعبت من قربه وريحته ، دفعته باديه وما جنت متقصدة ادفعه...
فجأة كام وهو يغلط عليه ...

سامر ... ولج تدفعيني يا ك*****
ريم... الله يخليك كافي ارحمني
سحبت نفسي للجرار.. فتحته وطلعت سجينة ومديتها اله...
ريم.. هاك اذبحني وخلصني تعبت والله تعبت كافي
سامر.. مستحيل اذبحج واريحج واني اريد اسمع صياحج وتوسلج
ريم... ابوس ايدك اذبحني وخلصني

بعدها سحب الحزام وصار يضربني بكل وحشية وقساوة... ما جنت احس بشي لانه جسمي خدران من التعذيب .. بعد دقايق ابتعد عني بعد ما ارضى غروره وضلمه ، طلع بره واني بقيت بمكاني انتظر يهدأ جسمي حتى اروح اسبح.


خالد...
جنت انتظر ايمان ومصطفى بالمطار واني متلهف لشوفتها وحيل مشتاقلها، بعد ساعة من الانتظار نورت حبيبة اخوها المكان واني اشوفها من بعيد واكفة وتتلفت عبالها تشوفني ، اشرتلها وهي بعدها تدور عليه بس مصطفى شافني ونبهها ، باوعتلي واجتني تركض ، اوف حضنتها لحد ما مليت اشتياقي إلها ، رحبت بيهم وطلعنا من المطار بوجهنا للشقة..
واول ما وصلنا للشقة نزلت ايمان وهي متلهفة ومتحمسة لعمليتها وجان عدها آمل بنجاحها ، دكيت الباب وايمان متفاجئة من تصرفي وكأنه تريد تسألني اكو احد موجود بالشقة ، اللتفت إلها واشرتلها بمعنى اي ...

ايمان.. خالد منو موجود
خالد... هسة تعرفين منو موجود

فتحت الباب ديار وهي مبتسمة ورحبت بيهم وبعد ما دخلنا جوة وايمان ومصطفى متفاجئين من وجود ديار وهمة يتسائلون شنو علاقتها بيه ...

ايمان... العفو بس منو انتي
ديار.. ههههه اني زوجته لخالد
ايمان... شنوووو ؟ خالد متزوج !! شلون صار هالشي وشوكت !!؟ وليش اني ما ادري يا خالد!!؟
مصطفى... اخر شي جنت اتوقعه انه تتزوج يا خالد !! معقولة نسيت ريم وقررت تبدي حياتك!!؟
ديار.. على كيفكم يا جماعة ، صح اني زوجته لخالد بس مو مثل ما مفكرين
ايمان... شلون يعني زوجته ومو مثل ما متوقعين!! ما فهمت ؟ شبيك خالد متحجي!!
خالد... ايمان على كيفج حبيبتي بس افهمي شنو تقصد
ديار...قبل ٥ سنوات تقريبا تعرفت على خالد بالمرة الأولى الي اجه بيها لتركيا وجان خالد مهموم وحاولت اتقرب اله لان اني حبيته بس ما جان ينطيني مجال وبعدها رجع للعراق ورجعت ورا بس حتى اعرف اخباره وبعد مرور فترة اضطريت ارجع لتركيا ورجعت ونقطعت اخباره وبعد سنتين تفاجئت بخالد بتركيا بوقتها رجعلي الأمل وقررت اتعرف علي اكثر وجان الكل يعرف بحبي اله بس ما جنت اعرف ليش خالد مجاي يلاحظ حبي وبعدها بفترة ماتوا والدي ووالدتي بحادث وبقيت وحدي وما اعرف شلون صارت واعترفت لخالد بحبي وبلحظة ضعف قرر خالد يتزوجني وتزوجنا بس طول هالسنة الي احنه متزوجين بيها احنه اخوة وما كدرت اخلي خالد يحبني وطول هالوقت واني اشوف حبه للبنت الي اسمها ريم ، ولحد هذي اللحظة واني اشوفها بعيونه ولهذا قررنا الانفصال وننهي هذي العلاقة.
ايمان... اسفة حبيبتي خاف تأذيتي بكلامي
مصطفى... تشرفنا بمعرفتج خويه
ديار.. اني تشرفت بمعرفتكم وجنت متشوقة اشوفكم
خالد... يله صار وقت ترتاحون وغرفتكم جاهزة
ايمان... تمام بس اريدك بشغلة

دخلت ايمان لغرفتها ودخلت اني وراها ، اللتفت عليه وهي دكولي..
ايمان.. خالد البنية مبينة تحبك مو أفضل الك تنسى الماضي وتكمل حياتك وياها
خالد... حاولت ياايمان بس ما اكدر صدكيني
ايمان... وشنو الحل
خالد.. ماكو حل هذا قدري اقتنع بي واسكت
ايمان.. اوف يا حبيبي على قدرك


ريم...
رن جرس الساعة على ال 12:00 بالليل ومن هاللحظة بده منبه الخوف عندي لا يتكرر الي كل مرة يصير.. ركضت قفلت باب الغرفة وكعدت احسب بالوقت وهو يمشي ، بعد ساعة سمعت هوسة واصواتهم جوة وهمة يضحكون ويصيحون ، بس هالمرة الصوت مختلف حسيت اكو اصوات بنات وياهم ، بهاي اللحظة عرفت بانه جايبين بنات للبيت ، كرهت نفسي بذيج اللحظات وحاولت انام حتى ما اسمع شي بس جسمي جان يون من الألم ، كعدت اصبر بنفسي واحاول اشغل نفسي عن اصواتهم ..

بعد لحظات بده الصوت يقل وبده الهدوء يملي البيت وكأنه اختفوا ، زاد خوفي وقررت افتح الباب واشوف وين راحوا ، تقربت للباب وقبل لا افتحه لاحظت ايد الباب جاي تتحرك وكأنه واحد جاي يحاول يفتح الباب..

خفت ونرعبت ورجعت ليورة مباشرةً وبعد محاولات فتح الباب اجاني صوت غريب مسامعته سابقاً ، صوت مقزز بس ما كان صوت سامر ، زاد خوفي وصار جسمي يرجف ، صرت ادعي يكون هذا سامر مو غيره على الاقل سامر زوجي ، ثواني وتكرر الصوت وهو يكولي ...
-افتحي الباب يا حلوة
هنا بده الرعب الحقيقي وما اعرف شنو اسوي ، زاد الضرب على الباب ورفع صوته اعلى ، زاد خوفي وحسيت هاي لحظاتي الاخيرة ، ركضت لجهازي فتحته وصرت ادور على رقم ماما مثل المجنونة.. اتصلت على رقمها واول ما جاوبتني خلص الرصيد ولعنت نفسي الف مرة ...

ضليت ادعي ترجع تتصل عليه ، فعلًا بعد دقيقة اتصلت ماما وما انتظرت ثانية بسرعة جاوبتها...
ريم... ماما اللحكيلي
ام ستار ... شبيج يمه
ريم .. مو وكت حجي ماما جيبي علاء وتعالي خلصيني بسرعة
ام ستار ... ماشي يمه دقايق واحنه يمج

وبعد نص ساعة واني اسمع صوت ضرب الباب وهو يحاول يكسره وفجأة نرفعت الاصوات وسمعت صوت عركة وضرب بره ، عرفت ماما اجت وهنا ارتاحيت ، ندكت عليه الباب واجاني صوت ماما ..
ام ستار.. يمه ريم افتحي الباب اني امج

ركضت الها فتحت الباب وحضنتها وهي تبجي وتبوسني...
ام ستار ... سودة عليه يا يمه شصاير بيج ولج يمه منو مشوه وجهج هيج
ريم... اني جنت بين ادين وحش يمه
ام ستار.. سودة عليه حبيبتي امشي وياي بسرعة

اخذت عباتي وطلعت بسرعة بدون ما افكر بشي ، جنت بس اريد اخلص من هذا السجن ومن عذاب سامر ، طلعت اركض وصعدت بالسيارة وبعد دقايق توقفت السيارة كبال بيت علاء... باوعتلي امي وكلتلي ..
ام ستار.. ابقى هنا اليوم لان اكيد ابوج مراح يسكت وجهالج راح اخلي عباس يوديهم لاهلهم بكربلاء
علاء... وباجر اني اوديج لكربلاء وراهم حتى نطمئن عليج ولا تخافين هناك محد راح يكدر يأذيج
ريم... مشكور خوية رحم الله والديج

نزلت كبال بيت علاء وعلاء راح يرجع امي للبيت حتى محد يشك بيها ، دكيت الباب وطلعلي مهدي اخو علاء ، سلمت علي ودخلت جوة ، واول ما دخلت وشافتني ودق لطمت على وجها وهي تصرخ...
ودق.. ولج منو مسوي بيج هيج ، الله لا يوفقهم ان شاء الله
ركضت حضنتها وجان وضعي يبجي الحجر ، شافتني عمتها واجتي حضنتني وهي تصبر بيه وبعدها اجن جناينهم سلمن عليه وجان كل تفكيري يم جهالي ، خايفة يأذوني بيهم.


علاء...
بعد ما رجعت عمتي لبيتها ،توجهت بعدها لبيت عباس واول ما وصلت ونزلت دكيت الباب ، طلعلي اخو طلبت منه يصيحلي عباس ، ثواني واجاني يركض وهو مرعوب ..
عباس ... خير ولك شكو بنص الليل
علاء... محتاجك بشغلة ضرورية كولش
عباس... كول أمرني
علاء... اريدك تروح بوجهك لبيت فاضل راح تلكه ام ستار منتظرتك يمهم ووياها اطفال ريم ، تاخذهم وتطلع بوجهك لكربلاء وديربالك عليهم
عباس... شصاير ولك
علاء... استعجل هسة واني راح اخابرك بالطريق واشرحلك شصار
عباس... وين اخذهم لكربلاء لأي مكان بالضبط
علاء... لبيت جدهم تندله لو لا
عباس... لا ما اندل
علاء... راح ادزلك موقعهم بس استعجل
عباس... تدلل بس ثواني ابدل واطلع
علاء.. عفية حبيبي

عفت عباس وطلعت بوجهي لبيتي وجنت مقرر اخذ ريم من الفجر لكربلاء حتى اطمئن عليها ، باوعت للساعة جانت ب ٣:٠٠ الفجر
وصلت للبيت ونزلت بسرعة واول ما دخلت لكيت الكل مجتمعين ، باوعتلهم وشفت القلق بعيونهم ..
علاء.. خير شبيكم
ام علاء... يمه قلقنا عليك
علاء... اطمئنوا ماكو شي ان شاء الله
ريم... وجهالي خوية
علاء... اطمئني ان شاء الله هسة راح ياخذهم عباس لبيت جدهم وانتي حضري نفسج بعد ساعتين اخذج
ريم.. خوية اخذني هسة فدوة
علاء... لا شوية خلي يمر وقت
ريم... ماشي

وبعد ساعة تقريباً اخذت ريم وطلعت بوجهي لكربلاء ، وطول الطريق واني قلق على عباس والجهال ، اخذت موبايلي واتصلت على عباس .. ثواني وجاوبني..
علاء... ها عباس بشرني
عباس... شوية واوصلهم
علاء... خابرتهم لو لا
عباس... اي خابرت جدهم ابو حسن وشرحتله كولشي وكال هلا بيهم
علاء... عفية عليك
عباس.. وريم وينها
علاء... هاي اني جايبها وراك هسة المهم الاطفال يوصلون بسلامة
عباس.. ماشي توصلون بسلامة ان شاء الله

غلقت الاتصال من عباس ورجعت اطمئن بريم حتى تهدأ بعد ما شفتها تبجي وترجف ، الحمدلله بعد ساعتين وصلنا لبيت ابو حسن واول ما وصلنا ، نزلت واستقبلنا ابو حسن بكل ود وبالكلام الطيب ورحب بريم وطمنها ، تركتها يمهم بعد ما اطمئنيت عليها يمهم ورجعت واني مرتاح.


ريم...
اول ما وصلت لبيت خالو ابو حسن حسيت بالأمان وارتاحيت واني اشم هواهم حسيت بالحنان والحب الي جانوا منطينيا ، وصلت واستقبلوني احسن استقبال ، شافتني الحجية ولطمت صدرها وهي دكولي ...
الحجية... ولج منو مسوي بيج هيج يمه
ام حسن ... سودة عليه بنيتي كسر باديهم ان شاء الله

اخذوني بالأحضان وهنا اني انهاريت وصرت اشهك الم باحضان الحجية واشكيلها على كولشي صار وياي .. تقرب يمي خالو ابو حسن وطمني وهو يكولي ..

ابو حسن... اطمئني خالو حبيبتي لو يموتون مياخذوج منا
ريم.. مشكور خالو بس اهم شي جهالي ميتأذون
ابو حسن... يحلمون يلمسون شعره منهم
ريم... رحم الله والديك خالو

بذاك اليوم كدرت انام مرتاحة بدون خوف وبدون الم ،نمت واني حاضنه اطفالي ومطمئنة عليهم ، نمت واني احس بالحب والحنان بينهم.

بعد اسبوع ...
طول هالاسبوع واني لازمة كلبي خاف يعرفون مكاني وخايفة يجون ياخذوني وغلقت موبايلي حتى ما يكدرون يوصلولي ، وجان كل همي اعرف شنو صار ولما اتذكر انه اذا لكوني لازم ارجع لذاك الآلم والتعذيب اكره حياتي ، وكل هالوقت واني فرحانه بشوفة اطفالي وعلاوي يحجيلي شكد مشتاقلي ،
وبيوم اني كاعدة بغرفة الحجية وجاي امشط لزنوبة وابو الاكبر بحضن الحجية ، فجأة دخل علينه خالوا وهو وجها ميتفسر واول ما كعد باوعلي وكال ...
ابو حسن... خالي ريم ابوج عرف بمكانج هنا واني ما احقه بيج بس الاطفال مراح اسمحله يتقربلهم لهذا راح يجي ويقدم شكوى عليه
الحجية... يعني راح يجي ياخذها
ريم.. الله يخليك خالو ما اريد ارجع
ابو حسن... مراح انطيج بسهولة يا خالي راح يقدم شكوى وان شاء الله اكدر اربحها
الحجية... ان شاء الله بس يمه لا تنطيها بنية مثل الورد هيج مسوين بيها ليش
ريم.. خالو خدامتك اني بس لا ترجعني لذاك العذاب
ابو حسن... العفو خالي خادمة ربج صدكيني مراح انطيج بسهولة وراح احاول
ريم ... ان شاء الله

هنا اني تخليت عن كل احلامي وصار كل همي شلون اخلص من سامر وعذابه وقررت اتصل على ماما واطمأن عليها واعرف منها شلون عرف بابا بالي صار ... اخذت موبايل خالو واتصلت على ماما..

ام ستار.. الو منو
ريم... ماما اني ريم
ام ستار ... ريم بنيتي حبيبتي ولج شلونج يمه
ريم... الحمدلله ماما انتي شلونج
ام ستار... على الله يمه اني طردني ابوج وهسة يم ودق
ريم.. احسن حتى تخلصين منه
ام ستار... اي يمه احسن
ريم... شلون عرف بابا بمكاني وشنو الي صار
ام ستار ... الحية سعاد كلتله لو تجيبها من جوة الكاع وترجعها خدامة لأخوي لو تطلكني
ريم.. الله لا يوفقها الحقيرة
ام ستار ... وابوج محبس بايدها مدري شمسويتله
ريم.. الله ينتقم منهم ان شاء الله
ام ستار... يمه ديري بالج على نفسج
ريم ... ان شاء الله
غلقت الاتصال من ماما وتملكني الخوف واني اتخيل يجي بابا ياخذني وارجع تحت رحمة سامر وضلمه.


خالد...
بعد ما تمت اجراءات الطلاق وكدرت ديار تدبر امور معيشتها ، خلال يومين اكملنا طلاقنا وانفصلنا رسمياً وانتقلت ديار حتى تعيش بالشقة بالبناية المقابيل بنايتنا ، وخلال هالاسبوع ايمان ومصطفى تجهزوا لاجراء عملية الزرع ،
وبيوم العملية جانوا متخوفين وجنت احاول اشجعهم وأتأمل بنجاحها...
خالد.. حبيبتي ايمان تفائلي ليش هالخوف
ايمان .. ما اعرف خالد خايفة واكثر خوفي خاف متنجح وأفقد الآمل
مصطفى... كولي يالله حبيبتي شنو السالفة
ايمان... ان شاء الله خير ادعيلي مصطفى حبيبي
خالد... ان شاء الله حبيبتي بس اهدأي

صار وقت العملية ودخلت ايمان وجان مصطفى يحاول يهدأها ، وبعد ساعة طلعت الدكتورة وخبرتنا بانه تمت عملية ترجيع البويضات ولازم ننتظر ٣ أسابيع حتى نتأكد من نجاح العملية وبهاي اللحظات جان مصطفى يدعي وهو يسمع كلام الدكتورة ، صرت اشوف لهفتهم لاول طفل بحياتهم وراح خيالي بعيد وبعد ما فقدت الامل رجعت لواقعي الأليم.


ريم...
ثاني يوم بالليل تحديداً
جنت كاعدة يم خالتي ام حسن واني اشكيلها عن لحظات التعذيب الي شفتها بهاي السنة وهي تلومني على موافقتي بالزواج وبهاي الاثناء دخل خالوا وهو مبتسم ، مدلي ايده وهو ينطيني الموبايل ويكولي ...

ابو حسن.. هاج خالي هذي امج تريدج

اخذته منه وبسرعة جاوبتها...
ريم... الو ها ماما
ام ستار ... ولج يمه الف الحمدلله ربج نقذج
ريم... شكو ماما شصار
ام ستار ... سامر مات
ريم.. شنو صدك تحجين
ام ستار ... اي والله اليوم لكوا مقتول كبال باب بيته
ريم... الله ينتقم منه والله لا يرحمه الحمدلله ماما
ام ستار ... وسعاد الحية طلبت الطلاك وخلصنا منها
ريم... الحمدلله ريحتيني
ام ستار.. يمه باجر اذا اجاج ابوج ارجعي ويا وجيبي جهالج
ريم... تمام

غلقته من ماما وباوعت لخالتي ام حسن وحضنتها وهي مستغربة ومتفاجئة من فرحتي الي اول مرة احس بيها ...

ام حسن... عساها دوم يمه خير شنو سبب هالفرحة
ريم ... سامر مات وخلصت منه
ام حسن... الحمدلله ، الله خلصج منه
ريم... احس نفسي هسة اكدر ارتاح واطمئن
ام حسن.. ياربي دوم اشوفج فرحانة
ريم... مشكورة خالتي حبيبتي

وباليوم الثاني جنت مرتاحة وفرحانة رغم اني ما اعرف بالي راح يصير ولا بالأيام الجاية بس المهم خلصت من أيام العذاب والألم ، اتصل بابا على خالوا وكاله اني جاي اخذها وهدد خالوا ، وبوقتها طلبت من خالو يوافق لان بعد ما اخاف من شي بعد ما مات سامر ، وفعلاً اجه بابا ورجعت ويا واني ما مهتمة للي راح يصير.

بعد مرور اسبوع....
ريم...
رجعت للبيت وبعدها بيوم رجعت ماما وجان الوضع هادئ طول هالاسبوع وبعدها بديت احس بنظرات بابا الي ومضايقاته وطول الوقت يغلط عليه ويصيح ويوم بعد يوم تسوء معاملته الي...

وبيوم جان هو ما موجود واني جنت كاعدة بالغرفة وضايجة كولش وقررت اطلع شوية ، طلعت بالباب وصرت اباوع للرايح والراجع ،وفجأة شفت بابا وهو جاي من بعيد وجان مبين معصب حيل ، دخلت جوة واني اركض ودخلت للغرفة ، ثواني وسمعت صوته يرج البيت وهو يصيح بإسمي...

طلعت اله واني ارجف وما اعرف شنو يريد مني ، واول ما طلعت تقرب مني وسحلني من شعري وشمرني بالطارمة وهو يضرب بيه برجله على بطني ويصرخ عليه وكأنه وحش وانقض على فريسته ، بثواني وبدون ما احس بي سحب عمود حديد جان يمه وصار يضربني على رجليه وصرت اسمع تكسير عظامي وبكل ضربة احس روحي تصعد للسماء وترجع ، صرخت اصرخ واتوسله يعوفني بس ماكو فائدة ، صرت استجدي منه الشفقة بس ماكو رحمة ، لحد ما دخل فاضل وهو مرعوب بسبب صراخي ولما شافني بهاي الحالة ركض على بابًا وسحب منه العمود ودفعه ، سحبني من بين اديه وشالني وطلع بوجها للمستشفى ... ما اعرف بعد شكد وصلنا للمستشفى ، نزل شالني وخلاني بعربانة واني ما جنت حاسه بشي والدنيا تفتر بيه وبعدها ما حسيت بشي .

صحيت الصبح الساعة ب٨ وجان الجو بارد
وجنت احس الم برجليه وهنة مجبوسات وجان البرد يأذيني أكثر وجانت امي كاعدة فوك راسي ، تذكرت امي ما نامت الليل كله لان اني جنت اون من الم رجليه والا اخذت منوم يله نمت ،
٣اسابيع وماكو تحسن بكسر رجلي وطول الوقت الآلم يكطع بيه تكطيع ،وكل هاي الايام ابوي ما شفته ولا يدخل البيت وجنت كارهة اشوفه بعد الي سوا بيه.


خالد...
وبيوم جان لازم نتأكد من نجاح العملية ، جنت متحمس وإيمان خايفة رغم اللتزامها بتعاليم الدكتورة ومصطفى يحاول يهدئها ، اخذتهم ورحنه للمركز والطريق كله إيمان ما بطلت دعائها ، وصلنا للمركز واللتقينا بالدكتورة وصار وقت التحليل ، وبعد ساعة طلعت نتيجة التحليل وهنا الكل استعد وجنه بوضع لا نحسد عليه ، طلعت الدكتورة وباوعت لايمان بابتسامة وهي دكوللها..
الدكتورة... مبروك انتي حامل واخيراً
مباشرةً اللتفت لإيمان واني اشوفها من كد الفرحة ما انطت اي ردة فعل وبس دموعها تنزل وتبجي بهدوء ، تقرب عليها مصطفى وحضنها وهو يباركلها...
مصطفى.. مبروك حبيبتي
ايمان... ما مصدكة مصطفى اني راح اصير ام واخيراً
مصطفى... ان شاء الله حبيبتي بس اهدأي وانتبهي على نفسج من اليوم
خالد... مبروك عليكم ان شاء الله دكومين بالسلامة حبيبتي ايمان

طلعنا من المركز واحنه فرحانين وجانت تعليمات الدكتورة ممنوع السفر الا بعد ٣ أشهر ، وفعلاً قررنا يبقون يمي لحد ما تتم ال٣ أشهر.

وبيوم جنت احضر لرجعتهم للوطن بسلام بعد ما خلصت هذي الأشهر وتعودت على وجودهم وياية ، صار لازم يرجعون وبوقتها كولش ضجت وجان كل همي إيمان متتأذى وخصوصاً هي حامل ..
بالليل كلنا كاعدين ودنسولف اني ومصطفى وإيمان دتحجي ويه شيماء ، فجأة إيمان صرخت … ركضت عليها واريد افهم منها شنو الي صاير…
إيمان… شنووو ولج شيماء شدتحجين وليش محد كلي
شيماء… إيمان نخاف عليج غير منريدج تتأذين
ايمان… بس مو تضمون عليه هيج شي

سحبت الجهاز منها وهي تبجي وتصرخ…
خالد… شيماء شكو شصاير
شيماء… وينك يا خالد شصار بينه من بعدك
خالد… ولج احجي مو وكفتي كلبي
شيماء… رواء مريضة بالسرطان
خالد… شلون شدتحجين انتي شيماء
شيماء… اي والله يا خالد ووضعها صعب
خالد… يالله فدوتك اللهي ، شيماء بس فهميني شلون صار هالشي ومن شوكت هي مريضة ومعقولة ما حسيتوا غير هسة
شيماء.. مو انت تعرف عمك الي يتمرض مياخذه للطبيب وهي صارلها شهرين تشكي وتبجي ومحد ياخذها للطبيب واني وفاضل رحنالها قبل ٢٠ يوم وضلينه نركض بيها للاطباء واكتشفنا هالشي
خالد… كلي لعمج راح ارجع وازين شواربهم كلهم اذا صار باختي شي اقسم بالله محد يخلص مني ، اسبوع واني يمكم لا تعوفيها شيماء
شيماء… اي فدوة تعال محد النا غيركم انت وفاضل
خالد… اني جاي ان شاء الله

غلقت الاتصال ونزلت على ايمان الي كطعت نفسها بالبجي ، دنكت عليها وحضنتها واني كاتم دمعتي ، من جنت صغير واني ادعي الله ميختبرني بخواتي ، واحس نفسي صرت باختبار صعب صعب اتحمله، قررت ارجع وياهم ولازم ارتب وضعي.

طول هالاسبوع وايمان ما بطلت بجي واني متصنع القوة أمامها وما اريد اضعف واحاول اهدئها لانه حامل ، وسفرنا تقرر الساعة ب٩ بالليل من هذا اليوم، رحت لاوس وودعتهم وطلبت منه ينتبه للشقة مالتي…

صار وقت السفر وأقلعت الطائرة واني احسب دقيقة دقيقة حتى نوصل وكل تفكيري جان برواء وكلما اتذكرها تنزل دمعتي واكتمها ، بعد ٤ ساعات تقريباً هبطت الطائرة بمطار بغداد وجان علاء وعباس منتظريني بالمطار ، نزلت وجان فارس وشيماء منتظرين ايمان ومصطفى ،لمحتهم من بعيد واشرت لفارس واجاني يركض ..

فارس.. الحمدلله على سلامتكم
خالد… الله يسلمك حبيبي ابو ضرغام
شيماء… حبيبي الحمدلله على سلامتكم والله مشتاقيلكم
خالد… الغالية الله يسلمج هسة طمنيني رواء شلونها
شيماء.. كل يوم جاي تسوء حالتها
خالد… استغفر الله ماكو وقت امشوا

طلعنا من المطار وشفت علاء وهو واكف ينتظرني ، نزلت دمعتي واني اشوف شلون يباوع للي يطلعون ويدور عليه ، عرفت نفسي شكد مأذيهم بغيابي ،فجأة انتبهلي واجاني يركض ولما عباس انتبه اجه ورا بسرعة ، ركضت علي وحضنته وجنت حيل مشتاقله …
حضنتهم واني احس بدموعهم على أيدي ، فجأة ضربني عباس على راسي وهو يكولي …
عباس… ليش هيج سويت خالد
خالد… انت اكثر واحد ما مسموحلك تسألني وتعرف بوضعي
عباس… نجب ماكو مبرر لتصرفك
علاء… مو وقت هالحجي خلي نرجع
وصلوني للبيت واول ما وصلت شفت فاضل من بعيد وهو منتظرني ، نزلت وهو اجاني يركض وقبل لا انطق بحرف حضني ونزلت دموعه..
فاضل… اهون عليك ياابن امي حتى هيج تعوفني
خالد… تأذيت فاضل تأذيت صدكني
فاضل…حيل اشتاقيتلك
خالد… وهاي اني رجعت بس بشرني شلونها رواء
فاضل… هنا جوه وعمي هم موجود وباسم موجود
دخلت جوة واني كاره شوفتهم وهمة السبب بحالتها بسبب عاداتهم السخيفة ، اكيد تألمت ومحد اهتملها واكيد توسلتلهم ياخذوها للطبيب ومحد اخذها ، رحت لغرفتي وجانوا مخليها بيها وشفت زوجها واكف وعمي كاعد يمها …

ركضت لزمت باسم من ياخته واني شايل بكلبي علي كل حقد الدنيا ،اجه فاضل وهو يحاول يسحبني عنه …
خالد… والله اذبحك واشرب من دمك بس خلي اشوف يصير بيها شي
باسم… شنو ذنبي يا خالد
خالد… ذنبك ما صنت الأمانة ولك وردة انطيتها الك هيج تسوي بيها
ابو باسم… وابني شعلي يا خالد اختك هي مريضة
خالد… شوف انت عمي وخليني محترمك واختي ساءت حالتها بسبب سوالفك وقوانينك
ابو باسم… ولك هيج تحاجيني ادبسزز
خالد… والله وبالله اذا رواء صار بيها شي ما يخلص مني واحد اذبحكم وادخل السجن وميهمني شي
فاضل… اهدأ خالد مو هيج تنحل الأمور
خالد… لاي دكتور اخذتوها وشنو كللكم
انطاني فاضل كل تحاليلها وصورتهم كلهم وبعثتهم على الواتساب للدكتورة بتركيا ووعدتني راح تساعدني وتعرضهم على دكتور مختص بالمركز.. وبعد يومين رجعتلي خبر وطمني الدكتور بإنه اكو امل بشفائها بس يحتاج يجي هو للعراق مع الكادر المتخصص وباعتبار هو يملك فرع من مركزه بتركيا بالعراق ، جنت مجهز كولشي لجية الدكتور وكل يوم اطمئن رواء واشوف الآمل بعيونها.


ريم…
٣ أشهر مرت عشت بيهم اسوء أيامي واسوء عذاب شفته من الي يتسمه ابوية ، جمال الظالم الي حرمني لذة النوم وبكل يوم يجي سكران ويمارس كل غضبه وحقده عليه وبكل يوم يحاول يكرر نفس الشي الي سوا بهبة وجانت امي تنقذني ، تعودت أنام واني خايفة ، أنام واقفل الباب عليه واني خايفة أصحى على لمسات الظالم الي يحاول يسلبني اعز شي املكه…

بيوم من الايام كنت كاعدة بغرفتي وانتظر ماما ترجع وجان جمال الظالم ما موجود ، حسيت بضيق بصدري وحسيت نفسي اختنكت وقررت اطلع اتمشه بره قبل لا يجي احد ، اجيت اطلع ولزمني آبو الاكبر يريد اخذه وياية، اخذتهم كلهم وطلعت اشتريلهم وهمة فرحانين ويركضون بالشارع لان طول هالفترة ما اخليهم يطلعون ، واني ادخل للمحل لمحت خالد من بعيد يركض باتجاهي ، ابتسمت واني اشوفه وجان عبالي جاي علمودي بس نصدمت من تعداني عبالك موً كباله وسوه نفسه ميشوفني ،دخل للمحل قبلي واني دخلت ورا وطول هالوقت عيني علي وهو ولا باوعلي ، حسيت مو خالد هذا واحد غيره مو خالد الي اعرفه ، اخذ جم شغلة وطلع واني بقيت مصدومة من تعامله وياي لحد ما ابو المحل صحاني وهو يسألني ( شرايدة) انتبهت واخذت للجهال الاكلات الي يحبوها وطلعت امشي ضايعة واني افكر خلاص خالد بعد ميحبني ولا اباله اني …

رجعت للبيت انسانة عاجزة وفاقدة الأمل وجان كل همي جهالي وبعد ما اريد شي لنفسي وما جنت ادري بالي راح يصير ، بعد ساعة اجت امي وهي مهمومة وضايجة ، انتبهت عليها دمعتها بعينها ، قلقت وسألتها…
ريم… شبيج ماما صاير شي واني ما ادري
ام ستار … يمه نقهرت على رواء بنت ام خالد
ريم… شكو شبيها رواء ماما
ام ستار … مريضة بالخبيث اسم الله وهسة خالد سودة عليه حاير بيها وليله ما ينامه علمود اخته
ريم… زين هسة شلون صارت
ام ستار … يمه هسة احسن على اساس جايبيلها دكتور من تركيا وهسة يكولون جاي تتحسن واني جنت يمهم
ريم… شلونها
ام ستار … لا زينه ان شاء الله جاي تتحسن
ريم… الحمدلله ياربي ان شاء الله دكوم بالسلامة وترجع لاهلها وجهالها
ام ستار… ان شاء الله يارب
ريم… ماما
ام ستار… ها يمه
ريم… خالد شلونه
ام ستار.. اوف يا خالد حالته حاله الله يكون بعونه
ريم… الله يساعده

يوم بعد يوم يمر والعمر بده يمشي بس اني نفسها ريم ذيج البنية الي جانت اكبر احلامها امها تجيبلها لعابة وياها والي جانت تحلم تلبس مثل البنات وكل همها تاكل وتنام وما جانت تدري الدنيا راح تلعب وياها لعبة الظالم والمظلوم ولا جانت تدري دور المظلوم راح يصير من نصيبها ، ريم الي عاشت عند اب ظالم فاسق وفاجر وكل همه رغباته ، وحش بشري .. ريم الي عاشت عند اخ كل همه يرضي غروره ويطبق صفقاته على حساب اخته وسعادتها والي باعها بفلوس ، ريم الي شافت اختها تحترك كبالها ، ريم الطفلة الي ربت اطفال اختها وصارت ام وهي بعمر ١٥ سنة ، بعد ٨ سنوات من العذاب رجعت ريم لطفولتها ولاحلامها وهي واكفة بالباب وتشوف صديقاتها يرجعون من الكلية وتتمنى لو وحدة بيهم تتذكرها.

جنت واكفة بالباب انتظر ماما ترجع واني اباوع لنور صديقة طفولتي وهي تنزل من الخط مالتها راجعة من الكلية ، سمعت هي تدرس صيدلة مرحلة خامسة ، اشرتلها بس ما شافتني ولا انتبهتلي …
ريم… وين راحت امي وجهالي وياها والله خايفة عليهم
رن موبايلي وركضت للصالة ، اخذت موبايلي وجاوبت ..
ريم … الووو ماما وين صرتي
ام ستار.. يمه اني يم ودق لا تخافين سدي الباب عليج راح اتعشه يمها ووره العشه يجيبني علاء اني والجهال
ريم… ماشي بس ديريبالج عليهم ماما
ام ستار… ان شاء الله

سديت الاتصال ورحت لغرفتي واني مطمئنة بابا ما موجود ، كعدت افكر بحياتي وشلون صرت هنا وما جنت متوقعة أمر بكل هذا العذاب ، واني صافنة بحياتي فجأة صار بابا فوك راسي وهو سكران وينظرلي بنظرة حقيرة ، خفت وابتعدت عنه وهو يتقرب عليه لحد ما صار قريب عليه حيل …
جمال… امج ما موجودة والبيت فارغ انطيني الي اريده وراح اعتقج وتعيشين أميرة
ريم… الله يخليك ارحمني والله حرام عليك اني بنتك شلون الك نفس بيه
جمال… ما عندج غير حل فهمتي لو لا
ريم… ابوس ايدك لا تسوي بيه هيج ما كافيك هبة الي انتحرت بسببك
جمال… هبة انتحرت بسبب غباءها خيرتها بين تعيش اميرة وبين الموت وهي اختارت الموت
ريم … لان الموت افضل من العار
جمال… وانتي كبالج خيارين بس

صار يتقرب عليه اكثر وما جان كبالي فرصة غير اني اسحب المكص واخلي على ركبتي وقررت أنهي حياتي واختار الموت مثل ما سوت اختي قبلي …
ريم… ابتعد عني والا راح اذبح نفسي
جمال… موتج او حياتج ميهموني وافضل ما تذبحين نفسج خلي اذبحج اني واكول لكيتها بحضن رجال ، زانية وعار واني غسلت عاري
ريم… اذبح نفسي ولا اموت باديك يا وحش يا ضالم

جان يباوعلي بنظرة حقد وكراهية وهو يندار وينطيني ظهره ويطلع ويقفل الباب ورا ، هنا حسيت اخر لحظات حياتي وبده العداد الاخير لموتي ،الخوف تملكني وجنت ادور على موبايلي حتى اتصل على امي بس نسيت موبايلي بالصالة ، يالله شراح اسوي هسة ، رحت بخطوات خفيفة باتجاه الباب واني عندي امل اكدر افتحه واني وصلت للباب واجيت افتحه
فجأة نفتح بوجهي وصار هو كبالي ، رجعت ليوره واني مصدومة من الي راح يسوي وخلال ثواني شمر عليه نفط واني اصرخ ، نزلت على رجلية واتوسله ..

ريم… ابوس ايدك لا تحركني اذبحني بس لا تخليني اموت بالنار
جمال… انتي اختاريتي الموت وقررت اخليج تموتين مثل ما ماتت هبة
ريم… ابوس ايدك ارحمني اذبحني بالسجينة او علكني بالبنكة بس مو النار فدوة ابوس رجلك
جمال… النار احسن طريق لان راح يشوه جسمج الي رفضتي تنطينيا
ريم… اترجاك اخذ روحي بس مو بالنار
واني اتوسله شفت نظراته الي مجانت نظرات بشر ، جان وحش بوجه بشري ، ما شفت الرحمة بعيونه وعرفت لهنا وانتهت حياتي …
وبدون ما احس وبلحظات أسرع من البرق اشتعلت النار بجسمي وبدت تاكل باحشائي وبذيج اللحظات جنت ما مستوعبة الي صار لدرجة ما حسيت علي لما طلع وعافني احترك بنار حقده … فرفحت روحي والنار تاكل بيه ، ركضت اصرخ للباب واني اريد افتحه بس مجان ينفتح وما اعرف شلون نفتح فجاة واني فريت مثل الحمامة المذبوحة وطلعت بره واني اصرخ …

ريم … طفوني الله يخليكم ابوس اديكم خلصوني من حلك الموت
(مؤلم ذالك الشعور الذي راودني وانا اتوسل اليه كي لا يحرقني ، هل من الانصاف أن لا نختار طريقة موتنا)



خالد….
جنت كاعد بالحديقة ويه رواء وهي بدت تتحسن والكل فرحان بتحسنها وفجأة سمعت صريخ من بيت اهل ريم ، هنا كلبي وكف وروحي طارت قبلي ، باوعت لرواء وهي تباوعلي بنظرة استغراب…
رواء… جاي تسمع الي اسمعه
خالد… اي هذا صوتها هذا صوت بنيتي

ركضت بدون ما احس شلون فتحت الباب وشلون طلعت وياريت ما طلعت واني اشوفها كبالي بنص الشارع والنار مشتعلة بكل جسمها وهي تصرخ وتتوسل بالعالم يطفونها ، ما اعرف شلون اختصرت ذيج المسافة واني اركض إلها وكبل طبيت لبيتهم ، سحبت البطانية الي مخليها على التنور وطلعت مفرفح ، لفيتها بالبطانية لحضني واني احس روحي الي احتركت مو هي ، كعدت وهي وكعت بحضني وبدت تون من الألم واني صرت اصرخ وما ادري بنفسي شحجيت غير لما صحاني فاضل وهو يسحبها مني ويشيلها وركض بيها للمستشفى ، بقيت بمكاني وما اكدر احرك لا