#في_بيتي5
#يمني2 "البارت التاسع"

قمت على طول وخرجت انا وبلال والدكتوره فرح ، وسرنا طريق الفله الثانيه عند جدتي والمره ، وانا بنسوق السيارة وجالس افكر في كل اللي حصلي ومن هي اقدار هذه وماهي القوه والامكانيه اللي معاها لما فعلت بي كذيه هل اللي حصل لي حقيقه او ضربت لي علاج مخدر خلاني اهلوس بكل اللي كنت احلم به ، طيب هل كل اللي شفته وانا فاقد الوعي او كنت بوعيي ماعاد افتهم لي شي ، بس كيف مش حقيقه وانا شفت اشخاص قابلتهم في حياتي، المخترع اللي اختطفتي وشلني عند الي اللي تبناني ، والشخص الثاني اللي شفته جنب عمنا في الفله وعمنا افتجع ، هاه لحظه لحظه يا يمني الان عرفت من هو الشخص الثاني هو نفسه اللي شفته عند عمنا وحسيت اننا اعرفه معقوله هذاك ابي الحقيقي ، طيب ايش علاقة ابي مع اشرف وقدار والمخترع هذا ، يالله خارجني ماهي الدوامه هذه اللي غرقت فيها ، بس مش وقت هذا كله اشتي اللقي بنتي وبس ، وانا بنجابر نفسي وبنسوق ما دريت الا واخي بلال جنبي نبع مسك السكان ولف قد كنت شصدم عرض الرصيف والدكتوره صاحت ، وانا شارد وبنفكر ، وقال مالك يا يمني اذا انت تاعب انزل وشا اسوق انا ، قلت له ماشي يا اخي انا بخير سعليك ، ذلحين قلي اين الجهاز الاسود يا بلال ، خرجه من جيبه وقلي هاه موجود شليت الجهاز ودخلته جيبي ، وحسيت بشعور غريب ارتباط قوي بتلفوني ساع اللذي حسيت ان تلفوني عيرن وفجاه تلفوني رن ، اجي ابسر تلفوني والرقم غريب دولي مشو رقم يمني ...
_الوو .. من معي ؟
_ يمني كيفنت يا ابني وبيضحك .. من الصوت عرفت انه صوت المخترع اللي كذب عليا وادعى انهو ابي عرفت انهو النذل اللي دخلني في الدوامه تيه بكلها ...
_ قلت له هو انت يا نسل الكلب لا تقلقش شديك واجحبلك في كل شارع ..
_ قبل ما تكمل كلامك يا يمني ، ابوك عندي ويا راس ابوك يا اما تدي لي الجهاز الاسود للمكان اللي شا احدده لك بعد ساعة ، وقفل التلفون ...
رجمت التلفون لطبلون حق السيارة، وبلال قال خير مالك يا يمني ، قلت له خير ما به شي عنرجع نتجابر ، وصلت للبيت ، اول ما وصلت نبعت احب راس جدتي ودخلت للغرفه لا عند المره، والدكتوره معي اول ما ابسرت زوجتي مرتزحه فوق السرير وبتشرب ماء حسيت روحي رجعت لي ونبعت احضنها ، وبنقلها كيفنتي كيف صحتش طمنيني وانا بنتبسرها ومتوتر ، طرحت يدها في خدي ومسحت الدموع وقالت انا بخيره لا تقلقش يا روحي ، قلي كيفنت ، واين ابي وامي واهلي واين سلى ، انا ابسرت لا عند الدكتوره اذا كملت عملها تخرج من الغرفه ، خرجت الدكتوره وجلست جنب زوجتي وبنجابرها بالي حصل وقلت لها قد به شوية مشاكل بيني وبين ابوش ، اصبري عليا لما نحلها وشا افهمش بكل شي ، واتصلت لمعتز ..
_ معتز شا ارسلك رقم ذلحين ابسر اين موقعه وما خبره واتصلي
_ حاضر من عيني ..
طرحت يدي في راس المره وبنقلها ذلحين لا تهمي شي يا روحي ما في نفسش انتي جاوعه ايش اديلش قالت اسلم عادنا تاعبه شويه وبنحس بدوخه شرقد شويه وبعدا شا اكل ، بس ما قلتليش اين هي "سلى" قلت لها سلى عند ابوش ، قالت كيف عند ابي انت ما بتخليهاش وحدها ، قلت ذلحين ارقدي وارتاحي وشا افهمش بكل شي ، تمددت وغمضت عيونها وقالت انا داريه ان كل هذه المشاكل بسبب الصوره اللي قلت لك تشلها يوم الحادثه ، حبيتها في جبهتها وقمت خرجت ، وقلت لدكتورة اجلسي عندها لا تفلتيها ، وانتي يا جده سبري لها شوية اكل بلدي يرجع روحها ، قالت ولا تقلق يا ابني ، شليت بلال وخرجت وقدنا فوق السيارة بنسوق مسكت التلفون ومنتظر لتصال معتز مدري مالي قد بنحس بعض الاحيان ان تلفوني عيرن ، اول ما رن فتحت على طول ..
_ هاه يا معتز بشرني ، وصلت للكلب صاحب الرقم ..
_ قال ماشي اتصلت على شان موضوع ثاني ..
_ ماهو الموضوع تكلم ..
_ الان طلعت اشارة عمنا موجود في الفلة حقه ..
_ سابر يا معتز ، ذلحين طلع لي مكان صاحب الرقم، يلا خاطرك ..خاطرك ..

واقتلب لا عند اخي بلا وقلت له انا قلت لك تجلس تراقب المجمع حق حده ، قال جلست فيه بس بعد ما اختفيت انت طرحت واحد من رجالنا يراقب ، ذيك صاحبك حق مذبح صاحب المتر اللي كان متورط في قضية الحشيش ،، واضطريت اخرج على سب ادورك ، قلت له تمام ،وقفت السيارة وقلت له تواصل مع الرجال وابسر لا قد به جديد ، واشتيك تسير لا عند الشيبه صاحب البقاله ، اللي بيسيرو لاعنده الناس المهمين يشلو اغراضهم وراقب اي شخص يجي له ويسير واحفظ سكن كل شخص يجي لشيبه ذيه ، ضروري نكمل عملنا اللي مع افراد عصابة القبضه ، وانا شا اكمل موضوع بنتي ، قال تمام ونزل ، وانا واصلت طريقي للفلة حق عمنا ، وصلت وطلعت من فوق السور اللي عند الزنج المكسر ، طلعت لطيرمانه وعمنا مش موجود نزلت للبدروم للغرفه السريه اللي فيها السلاح والخزنه حق عمنا ، وصلت والباب مفتوح دخلت وعاد عمنا خرج من الخزنه اللي في الغرفه وبيقفل الباب ، عمرت المسدس وقلت له وصلنا يا عم لا نهاية الطريق هنيه يا راسي يا راسك ، قُلي اين المخترع واين المره اللي اسمها اقدار ، واين بنتي ؟

عمنا كان لابس بدلة وشكله عيسير مهمه اقتلب لا عندي بكل برود ، وقال اللي يعجبني فيك ، اننت حتى اذا ابسرت اقرب الناس لك عدو بتعتبره عدو ، شخص واثق من نفسه ومن كل تصرفاته وبيجابرني وهو بيجهز سلاحه ، قلت له مش وقت الهدار هذا كله بنقلك اين بنتي ؟ قال انا كنت منتظر لك وعنسير ذلحين انا وانت نديها ، استغربت من كلامه وبنبسره وانا مطنن ، وخطي من جنبي وهو بيقل هيا ،تشتي بنتك اللبس البدله واتسلح وجي بعدي انا منتظر لك فوق السيارة ، قلت له خير شا اجي يا عمنا وابسر نهايتها معك ، لبست البدله وجهزت سلاحي وطلعت فوق السيارة وعمنا بيسوق وقبل ما نتحرك ، وصلت رساله لا تلفوني وتلفون عمنا بنفس طريقة التهكير مكتوب فيها ،، ( الان مش وقت تجو لا عندي ، سلى عندي في الحفظ والصون ، بالاول سيرو لا سعوان شارع الاربعين ، به افراد كبيرة من اتباع عصابة القبضة تجار ورجال دين واجانب متجنسين بهوية يمنيه ومش بعيد يكونو مشايخ ..ايوه مشايخ واصولهم مش يمنيه المهم الان بيبرمو اتفاقيه لتفجير في اكثر من محافظة والترهيب ، واختلاق ازمة ورفع اسعار ومن البلاوي اللي معتادة عليها بلادنا ،وعيتفقو على عملية اغتيال شخصيات مهمه ، نشتي نعرف اسمائهم كلهم ، ونوصل لشخصيات المستهدفة قبلهم ونعرف سبب امر اغتيالهم ،والان شا ارسلكم موقع البيت، ولا تنسوش الحرب اللي تستمر في بلادك عتكون الخسائر في بلادك وبس ).. ونهاية الرسالة مكتوب "اقدار"....

يتبع...

#في_بيتي
#يمني

#منيرالنقيب

#في_بيتي5
#يمني2 "البارت العاشر"

كملت اقراء الرساله واقتلبت لا عند عمنا وهو بيقراء نفس الرساله في تلفونه وقلت له ماهو هذا يا عمنا وكيف بتقل بنتي سلى عندها انت تعرفها شلني طريقها يا عمنا ، قال اسمع يا يمني انا ما كنتش اعرف من انت واول ما عرفت ما صدقتش ماهي المصادفه تيه بس اعتقد ان كل شي كان مدروس ومخطط من قبل اقدار ، ذلحين خلينا نسير المهمه تيه ولما نكمل عنتحرك طريق اقدار وعتفهم كل شي بالتفصيل ، قلت له خير يا عمنا هيا نسير المهمه تيه وبنتي اعرفها من راسك ، ابسرني وهو مبتسم وشغل السيارة وتوكلنا ، وفي الطريق بنسال عمنا ، من هي اقدار هذه وليش اول ما ابسرتها يا عمنا افتجعت وحنا في البدروم المخبئ اللي في الجامعه حق المخترع واين سار المخترع قتلته او ما فعلتو به ؟ قال مش وقت يا يمني خلينا نركز على المهمه بالاول وبعدا عنتفاهم بنقلك ، وصلنا لا سعوان شارع الاربعين وطلعنا من طلعة بطنج وصلنا قبل نهايتها ولقينا سيارات فخمه مجنبات وقفنا السيارة ونزلنا على طول ، وصلنا للباب حق البيت وهو مردود وبه اثنين رجال مخزنين جنب الباب بيحرسو الباب ، عادنا بنقل لعمنا ما عنفعل بالحراس هولا ، ما دريت الا وعمنا خرج مسدسه وفيه الكاتم وقتلهم كان يطرحها في الراس ، وابسرني وقال مسرع فقدت شغفك في قتل الخبيثين هولا عبدة الشياطين ، ودخلنا البيت بس الغريب ان البيت فاضي مابش فيه احد الا عجوز بتصيح فوقنا وتقول من انتو ما تشتو ولمه تدخلو بيتي ، واحنا مدعممين لها ، وجالسين بندور من غرفه لا غرفة ، ودخلنا غرفه صغيره في الدور الأول وبه في الجدر ستاره مغطيه للجدر جيت ابسر ما قفاها وان به باب ، قلت يا عمنا جي ابسر الباب ذيه ، بس لين عيشلنا والبيت معمور عرض الجبل ، قال اكيد به مخبئ سري وهذا منفذ سري لا وسط الجبل ، وقبل ما ندخل الباب اقتلبت وابسرت العجوز ماسكه تلفونها ورسلت رساله نبعت على طول اشتي اشل التلفون،العجوز شلت التلفون ورجمته للجدر لما كسرته ، وعمنا نبع على طول وضرب في كتفها ابره مخدره ، شليت التلفون المكسر حقها ودخلته جيبي ، ودخلنا من الباب وقبالنا نفق عرض الجبل ، يعلم الله كم جلسو يحفروه ، وصلنا نهاية النفق ذيه وقبالنا ساع غرفة الاستقبال وغرفه على يمننا وقبالنا طريق مكمله لنفق ذيه ، انا ركزت ان به ناس بتهرب من النفق ذيه ، وما درينا الا وبه واحد خرج من الغرفه وفي يده سلاحه وبيضرب علينا ، على طول كونته في رجله لما اطرح ، والغريب ان الرجال هذا رجال معروف في شعبنا بدينه واخلاقه رجل دين عمري ما كنت اتوقع ان الشخص هذا يمسك سلاح ، دهفت باب الغرفه وابسرها غرفه كبيره في وسطها ماسه وحول الماسه كراسي وبه شاشه برجكتر في الجدر كأنها غرفة اجتماعات ، قلت لعمنا ، كتف الرجال وابسر اذا به فلاش او اي اوراق مهمه وشلها ، وانا شلحق اللي هربو ، جريت طريق النفق ذيك والغريب ان النفق كله متجه نحو اليسار وكأننا بندور وصلت لا نهايته وبه فتحه عرض الجبل ساع الكهف ، ابسر لا تحت الجبل وقد به سيارات بتهرب ، عرفت انهم هربو ، رجعت على طول لا عند عمنا ، وقد في يده شوية اوراق وفلاشه خرجها من جيب الرجال هذا اللي عمره في الخمسينات ، وخرجنا من البيت اللي دخلنا منه ، وانا بنقله ضروري يا عمنا نشل معانا العجوز تيه ، شكلها نقطة الاتصال بينهم كلهم وتعرفهم كلهم ، هي اللي عتوصلنا للحل ، قال تعجبني عقليتك يا يمني ، اول ما دخلنا البيت حق العجوز لقينا العجوز ميته وفيها ثلاث رصاص وسط صدرها ، قلت يا عمنا هي اللي بلغتهم ، واول ما درو هربو وذلحين قتلوها عيال الكلب ، بيعتبرو الناس عندهم بلا قيمه وينهو حياة من يشتو في لمح البصر ، قال قد قلت لك يا يمني ذيه عالم خبيث وتوقع فيه كل شي ، واخبث ما فيه انهم بيخفو خباثتهم خلف ملامح طيبه ما تتوقعش يخرج منها شي واكبر مثال عندك العجوز تيه ، شلينا الرجال المكون معانا وطلعناه فوق السيارة واتوكلنا ، والرجال المكون بيتوجع في الكرسي الخلفي للسيارة وبيقل من انتو؟؟ انتو داريين من انا ،حرام لا اخليكم تتمنو الموت ، اقتلبت لا عنده وخفعته بجحر المسدس في ركبته وقلت له اصه ما تتكلمش الا لما أاذن لك يا حيوان ، معقوله انت بكل هيبتك وشخصك المرموق في المجتمع معقوله بكل احترامك تكون انت من اكبر عروق الفساد والخباثه في بلادي ، معقوله احنا اغبياء لتيه الدرجه وما عاد بنقدرش نفهم من هو بيعبد الشيطان ويتنكر بقناع الدين وعبادة الله ، الله بريئ منكم ومن عبادتكم النجسه تيه ، ذلحين لسمع لك نخس ، ما دريت الا وعمنا مكني ابره وقال خدر الجني هذا عنسير مكان ما نشتيش احد يعرفه ، شليت الابره وضربتها في فخذ الرجال لما فقد الوعي ، وقلت له ذلحين عنسير يا عمنا لا عند اقدار صح ، قال ايوه وهنيك اقدار عتجابرك بكل شي ما ينفعش اجابرك انا لان المخترع قد سمم عقلك باكاذيبه ، مابش اخبث من الرجال ذيه ، واتقي شر من احسنت اليه ، وصلنا وعمنا بيقل هيا ننزل يا يمني ، قلت اين البيت مابش قبالنا الا محل صرافه مقفل ،

قال ايوه انزل وساعدني نشل الرجال ، نزلنا وشلينا الرجال اول ما وصلنا باب الصرافه الباب افتتح من نفسه باب اتوماتيك ، ودخلنا للغرفه حق الصرافه اللي بيطرحو فيها الزلط ، وبه في الوسط مفرشة بعدها عمنا وفتح باب ساع الباب حق الخزانات الارضيه ، وشلينا الرجال ونزلنا ، دخلنا وانا بنجابر نفسي يعلم الله ما شلقي نازل وما قد به من عالم مخبى تحت الارض ، وصلنا ومابش قبالنا الا غرفه واحده بس فتحناها ، ومابش فيها شي الا اقدار وهي واقفه وضهرها موجه لا عندنا ورافعه راسها لسقف وبتهزه بطريقة غريبه وبسرعه عجيبه ، طرحت ارجال للارض ، وبناشر لعمنا ، مالها تيه بتفعل كذيه رفع يده وبيقلي اسكت واصبر ، وانا بنبسرها ضبحت وقلت هياااا اين بنتي ، قالت وهي بتهز راسها جاوب تلفونك وعتعرف اين هي ، ما دريت الا وجدتي بتتصل ...
_ الوه هاه يا جده ، جاوبتني وهي بتبكي
_ يوووه يالله لك الحمد يا ابني قذا سلى عندي رجعت روحي لك الحمد يا الله اين انت يا يمني ...
_ ما قلتي يا جده ؟ بنتي سلى قدهي عندش ؟؟ انتي متاكده يا جده ..
_ ايوه يا ابني ايوه ، اداها واحد وجلس يطرق جنب الباب حق الفله ومكن الحارس قال اننت قلت له يوصلها ..
_ من هو الرجال ذيه يا جده والحارس ليش ما يمسكه ..
_ مدري يا ابني ذلحين اين انت هيا جي
_ حاضر يا جده انا جايي خاطرش ..
واتصلت لبلال يشل رجال ويسير الفله ينتبه وما يخليش احد يقرب من الفله ، ما دريت الا والمره اللي اسمها اقدار وقفت راسها واقتلبت لا عندنا ، وهي مبتسمه وقالت ، كيف حالك يا يمني ، قلت لها ماعليش من حالي وليش تختطفي بنتي ، ابسرت لا عند عمنا وقالت لايش وصلتو يا اشرف ، وعمنا خرج الفلاشه والورق ومكنها ، وقال مسكنا ذيه والباقيين هربو قبل ما نوصلهم ، وانا مطنن بقعتي ماهو البرود اللي فوق المره هذه ومالي كل ما اجي قبالها اعتجم واتوتر وما عاد اقدرش اتصرف ، قلت لها انا بنكلمش بنقلش ما مصلحتش تخطفي بنتي ، ابسرتني وقالت مشو انا اللي خطفتها ، اللي خطفها هو المخترع وكان هدفه يفعل بها مثل ما فعل بك ، بس ما قدرش يوصل لهدفه ، قلت لها طيب اين هو المخترع ذيه ، قالت عند ابوك محمد ، اقتلبت لا عند عمنا وقلت له من هو محمد ذيه هل هو نفس الشخص اللي ابسرته عندك في الفله ، هز راسه وبيقلي ايوه ، قلت لها بس المخترع هرر.... ما دريت الا ومعتز بيتصلي ..
_ هاه يا معتز وصلت لشي ؟
_ ايوه صح الرقم متعب ومشفر باكثر من طريقه بس قدرت اوصل له ، مكان المتصل شويه يضهر لي في لندن وشويه يضهر في اليمن محافظة عمران
_ لندن مه يا معتز مسرع عيوصل الرجال لا لندن ؟
_ قلت لك الرقم محمي بطريقة قويه وقد تبعت لما قدرت اوصل للموقعين هولا ..
_ خير ..خير يا معتز تسلم ..

قفلت وابسرت لا عند اقدار وقلت لها المخترع هرب واتصلي قبل ساعه ونص تقريبا وقال انه يشتي الجهاز الاسود مقابل اللي اسمه محمد اللي قلتو انهو ابي ، بس الغريب انهو قال عيرسلي اين اطرح الجهاز بعد ساعه وذلحين مرت ساعة ونص ما اتصليش ..
اقدار ابسرتني وهي بنفس الابتسامه وكأنها واثقه وتعرف ومخططه لكل شي بيحصل قالت خطف ابي وهرب كيف حصل وليش ما بش عندي علم بكل هذا ، الوغد داري انه اذا استخدم اي جهاز الكتروني شعرف مكانه ، بس طلع ذكي لكن ذكائة محدود واستخدم التلفون ، الان هيا نخرج ...

يتبع...

#في_بيتي
#يمني

#منيرالنقيب
_

#في_بيتي5
#يمني2 "البارت 11"

اقدار قالت هيا نخرج ، قلت لها اين عنسير والرجال مصاب يمكن يموت وهو بينزف من رجله ، قالت خليه هنيه قد اتصلت لسليمان يجي يشله ، وخرجنا انا وعمنا واقدار فوق السيارة ، وبنقل لاشرف من هو سليمان هذا ، قال اخوك يا يمني ، قلت له اخي ؟!!! قال ايوه ، باقي معك اخ ، وماشيين طريق عمران بس اول ما وصلنا التحرير اقدار قالت وقف السيارة وانزلو للفندق ذيه ، انا استغربت قلت لها هذا الفندق هو شقق بيسكنو فيه الهنود ، قالت اطلعو لدور الثاني وشلو ابوك والمخترع كيف ما كان وضعه وجو ، طلعنا وصلنا وباب الشقه مفتوح ، وفعلا لقينا المخترع ، لقيناه وهو ميت فيه اكثر من ست رصاص من راسه لا بطنه ، ودورنا الغرف في باقي الشقه بس ما لقيناش ابي ، رجعت افتش جثة المخترع ولقيت تلفون في جيبه ، مقفل بكلمة سر ، شلينها ونزلنا لا عند اقدار ، قلت لها لقينا المخترع ولقيت في جيبه التلفون هذا مقفل بكلمة سر ، نشله لا عند معتز صاحبي وعيفتحه لنا ونبسر ما داخله ، ابسرتني وهي مبتسمه وقالت هات التلفون ، شلت التلفون لا يدها وافتتح من نفسه وتغير نظام التلفون فجأه في يدها وقرأت الرساله اللي داخله ، وقلت لها بس مالقيناش محمد اللي بتقولو انهو ابي ، قالت اطلعو نزلو جثة المخترع وانزلو سريع ، وطلعنا انا وعمنا شليناه ونزلنا وشلغنا السيارة واتوكلنا ، وسرنا لا موقع ثاني غير حق الصرافه ، بيت عادي مقدرش اقول مكانه ، ندخل منه ومع البيت هذا باب خلفي اول ما دخلت منه كأننا دخلت عالم ثاني استغربت قوي كيف هذا واحنا في حي شعبي والبيت ملتصق لا عرض بيوت ثانيه وساكنين فيه ناس كيف فعلو المكان السري هذا ، وفيه الاجهزه وناس بتشتغل بس كلهم ملثمين وقالت لاثنين يخرجو يشلو الجثه من فوق السيارة ويدخلوها ، واحنا واصلنا الطريق من غرفه لا غرفه ومن صاله لا صاله لما وصلنا لا غرفه ، كلها شاشات بس شاشات غريبه ، كلها في الهوى ساع البرجكتر لكن مابش اي برجكتر موجود كانها شاشات من عالم ثاني لاول مره ابسر مثلها وبنبسر اقدار بتحرك الايقونات وبرامج الشاشات والمشاهدات باصبيع يدها من الهوى ، وكأننا في غرفة عالم افتراضي مثل تقنية الفي ار ، بس احنا مش لابسين نظارات ولا شي، كل شي طبيعي ، وانا جالس بنتلفت يمين وشمال ، ما دريت الا واقدار بتقلي لا تركزش قوي عتتعب عقلك ، لان عقلك ما يتقبل هذا الشي الا اذا شفته في افلام خياليه ومسلسلات كرتونيه وبعدين يضهروها للعالم ، اما اننت تشوفها كذيه فجأه وينتقل عقلك انتقاله نوعيه بتيه الطريقه عتتعب ، قلت لها طيب ليش اديتيني لا هنيه ودخلتيني الغرفه تيه بالذات ، ابسرتني وهي بنفس الابتسامه حقها اللي كلها ثقه ، وقالت اجلس وانتظرني ، وخرجت من الغرفه هي واشرف ، اول ما خرجو شليت تلفوني قلت ارسل الموقع ذيه لا عند معتز، بس الغريب اننا اول ما خرجت التلفون كانت شاشته سوداء ولا رضي يلصي او يطفي تجمد فجأه ، ما دريت الا واقدار دخلت وابسرتني وانا ماسك التلفون بنحاول اشغله ، قالت لا تحاولش ، اشتي منك تنسى كل تقنيه تعرفت عليها في حياتك وكل جهاز الكتروني او اي معلومه تم تلقينها لك بوعي وبدون وعي ، لاننا نظام ثاني مختلف بيحارب النظام اللي كلكم معتمدين عليه في مجال حياتكم واللي بتتلقو منه كل شي حتى معلومات عن دينكم بتتلقوه من اليهود والكفره ، مثلا ان كنت باحث عن طريق قوقل وغيرها وتسعين بالميه من المعلومات واحوال البلاد اللي بتتلقوها هي من برامج اعدأكم ، فكيف بتوثقو فيهم وهم اعداكم مشنا داريه ، المهم انا اقدار ، تربيت عند ابوك وعمري تسع سنين ، واشرف هذا اللي جابني لا عند ابوك بالصدفه ، بعد ما عرف نية من كان يشتغل معاهم ، واختصارا للاحداث ، اشتغلنا انا وابوك واشرف ضد العدو هذا من تيك الايام ، بس اشرف ما كانش يعرف اين انا او مكاني ، وكان يتلاقى المعلومات كلها مني وحتى ملابس المهمات والاسلحه وغيرها عن طريق ابي اللي هو ابوك محمد ، ومحمد الوحيد اللي كان يعرف مكاني وما قال لاحد وهذا سبب ان اشرف استغرب لما شافني ، وفعلا ما كانش يعرف من انت ، بس انا وابوك كنا نعرف ، وما عرفنا الا من يوم ما دخلت الفله حق اشرف ، اجهزت الامان والمراقبه لقطت جزيئات الاختراع اللي بيجري في دمك وقرر ابوك يجي يشوفك ، وهو نفس اليوم اللي شفته في الطيرمانه مع اشرف ... وهي بتتكلم دخل عمنا اللي اسمه اشرف ، اقدار سكتت ورفعت راسها لسقف وبدأت تهزه ، وقالت يا يمني ، اطرح الفلاشه اللي شليتوها من الرجال فوق الماسه تيه ، شليت الفلاشه من يدها وطرحتها فوق الماسه ، وطلعت كل الملفات والفيديوهات والتعليمات اللي في الفلاشه في واحده من الشاشات ، وبنقراء ماهي المخططات والكوارث اللي بيخططو يفعلوها لمدة اشهر وسط الشعب المسكين ذيه ، الشعب اللي مستعد يصدق كل شي ينقال امامه وينجر مع السيل اين ما سار ، حاجات ما قدرتش اصدقها من كثر خباثتها منها اللي ( في زعزعت الاخلاق الاسريه وانتشال الثقه في افراد الاسره مثل نشر الرذيله وانتشار انتهاك

المحارم ، مخططين لأسر تطلع للمحاكم ان اب اغتصب بنته ، وابن بيجامع امه ، واخ تزوج باخته ، وعيتم نشرها وبثها في البرامج المعروفه وفي عدة محاكم وشويه يصدق الشعب وجود مثل هذه الحاجات ، ويبدا يقتنع فيها ، ويتناقلها في مقايلهم واماكن تجمعهم والمستهدفين هنيه مش احنا لا بالعكس المستهدفين هم جهالنا يطلع ابني وابنك وهم معتادين على مثل هذه الاحداث وتصبح شي طبيعي) هذه بس واحده من المخططات في المجال الاخلاقي وبه غيرها الكثير في الجانب الديني والثقافي والاجتماعي والتجاري ايوه تجاري مش اقتصادي ، وبه واحده من المخططات ، اختلاق مشاكل فرديه لافراد في جماعات بالقتل والنهب والتفجير ، وجماعات غيرها تنشر الخبر حسب هواها ، اهداف المخطط هذا انتزاع ما تبقى من مشاعر غضب في الانسانيه حقنا ، على شان يتاكدو فقط من ردة فعل الشعب ، هل عتكون كا المعتاد انتقادات وبس او غضب يجر بعده فعل ويفعل تغيير جذري ، لكن للاسف طلعت كلها انتقادات ، المهم انا بنبسر انا وعمنا واقدار جالسه بتهز راسها لسماء ، قلت لها طيب هذا تلفون العجوز اشرت لي اطرحه فوق الماسه ، وفجاه كل الشاشات طفيت واقتلبت اقدار لا عندنا وقالت ابوك تم خطفه من واحد من اصابيع القبضه ، واخير وقع في يدي ، والان عنتحرك لا عنده ، قلت لها طيب ، ليش ما تقولي ليش المخترع فعل كذيه وخطفني وخطف بنتي وفعل كل هذه الحاجات ما مصلحته ، قالت نفس مصلحة ابليس لما خرج ادم من الجنه ، قلت لها طيب انتي بتقولي مع اصبع من افراد اصابع القبضه ، يعني شخص ما نعرفش قوته وسلطته ، كيف عيفعل الخطاء هذا كله ، قالت وانا خليته يخطفك وتكبر بعيد عن ابوك واهلك وجازفت بكل شي ليش على شان تيه اللحظه ، هو خطفه يشتي يعرف من خلفه ، وانا اللي خططت لكل هذا ، قلت لها طيب قبل ما نسير ضروري اول شي اسير اقتل الرجال اللي قلتي ان سليمان اخي عيسير له ، قالت ماشي ، نكمل نقلع اول اصبع من القبضه الخبيثه هذه وبعدا شا اجابرك بكل شي حصل من يوم ما اختفيت وكل شي فعلنها لا يومنا ذيه ، لان من تيه اللحظه ما عدبش داعي اننا اخفي وجودك او علاقتك بنا ، ولا توثقش باي جهاز اكتسبته من العدو لانه بيكون لمصلحت العدو وبس ، انا كنت احميك بفضل من الله في كل خطوه ولا عمرك ما كنت تقدر توصل للي وصلته كانو عيدوك من اول حركه خطر يحسوها اتجاههم ، وتقدر تقول يا يمني ان التلفون هذا ينطبق عليه قول الله تعالى اعوذ بالله من الشيطان الرجيم (انهُ يرىٰكم هُو وقبيلُهُ من حيث لا ترونهم إنا جعلنا الشيٰطين أوليا للذين لا يؤمنون) ،،، يعني بيشوفوك ويسمعوك اين ما كنت والتلفو ن في يدك او اي جهاز مكتسب منهم ، قلت لها يا اقدار قول الله هذا بينطبق على الشيطان وقومه ، قالت واحنا بنتعامل مع الشياطين وقومهم ، مكر الشيطان خبيث انتبه توثق فيه ولا تستبعدش انه بيجاري كل قوم بقدر عقولهم وجالنا احنا في مجال الهاتف والتكنلوجيا الغبيه اللي مسيطره على حياتنا كلنا خلانا الشيطان نعتمد عليها في كل مجال حياتنا ، واخر حركه قامو بها الاعتماد التجاري الالكتروني بعد كذبة كورونا .....

يتبع...

#في_بيتي
#يمني

#منيرالنقيب

#في_بيتي5
#يمني2 "البارت 12"

خرجنا على طول انا واقدار وعمنا وخلفنا ثلاث سيارات مسلحين ومتوكلين لاعند واحد من اصابع القبضه ، متحركين لاعند شخص قدلي ايام واشهر بنتمنى اننا اوصل لواحد منهم هولا اللي بيتغذو على وجع الناس وظلمهم ، وجالس بنفكر في طريقة تفكير اقدار لما قالت الايه القرأنيه ، وكيف ربطتها بان الشيطان بيشوفنا هو وقومه من حيث لا نشوفه ، خلتني اشوف لا أيات الله بطريقه ثانيه ، يعني كتاب الله موجود في كل زمان ومكان واذا واحد قراه على شان يفهم رسايل الله لنا اكيد الله عيوصلنا لاشياء احنا قد نسيناها ، وعنلاحظ حجمنا الحقيقي في الارض هذه احنا ابنا ملوك الارض وجبابره ، بس بسبب الانذال والخونه خلونا شعب مسكين خايف من ظله يلاحق بعد رزقه وخلاص ، خلونا ننسي ان احنا لنا قيمه ونقدر نفعل اشياء مثل اجدادنا واصولنا ، اقتلبت لا عند اقدار وبنقلها ذلحين كيف عرفتي ان كل هذا عيحصل ومخططه لهذا كله ، قالت القدر بيد الله ومحد يقدر يعرف ايش لا بايحصل بس الله خلق لنا " قلوب نعقل بها " وهدانا النجدين ، يعني خلانا بحريتنا في التفكير ونقدر نبحر بخيالنا لين ما نشتي بس للاسف القيود اللي اختلقها الشيطان وقومه ربطت عقول الناس وخلت كل شي محصور في زاوية الخوف ، انا فكرت وخططت وتوقعت ردود افعال الناس ووصلت لشي اللي اشتيه ، واكبر سلاح بيستخدمه الظالم ، هو تليين عقول الناس بالجوع والحرب والخوف ، وبعدها يفعل كل اعماله القذرة على حساب الناس وهو قده متوقع ما عيكون ردة فعلهم ، لانه قد ساقهم خطوه خطوه ، وصلنا لا امام السفارة الامريكه في شرتون وقفنا ونزل عمنا وفي يده بازوكه وضرب الباب ، ودخلنا بالسيارت لا داخل والغريب ان اللي داخل كلهم لابسين ميري حق دولة ثانيه مش دولتنا والمدرعات والاسلحه ملان السفاره ، اشتبكنا معاهم ، واقدار جالسه فوق السيارة ، ما درينا الا وبه رجال خرج من داخل السفاره وهو بيجري ، وعمنا قال هذا محمد هذا ابوك ، نبعت على طول والرصاص بتدي من كل بقعه ، مسكته وسحبته لا فوق السيارة اللي فوقها اقدار ، وقد ابي مصاب في خلف كتفه برصاصه وباين على وجهه علامات تعذيب قويه ، ما دريت الا واقدار بتقول اطلع فوق السياره انت واشرف الرجال هرب .. صيحت لعمنا وتحركنا ، فوق السيارة ، واقدار قالت لعمنا اتصل لباقي الافراد قلهم ينسحبو ويخفو اي شي يدل على وجودنا هنيه ، ولاحقنا ثنتين سيارات مدرعات سود خرجين من خلف السفاره وانا كل شويه اقتلب لا عند ابي ابسره ، بس ابي ما كانش بحسه وساع اللذي مشو داري مابه او ماحصل ، واقدار طارحه ثنتين اصابيع عند صدره وبتبسرني وهي مبتسمه وبتقلي اطمن مافيه شي لا تقلقش ، وصلنا لا جبل عطان ، ودخلين السيارات من هنيك وكانت الحراسه مشدده ومنتظرين وصول الرجال على سب يحموه ، اول ما دخلين السيارات واحنا بعدهن بداو يضربو علينا بسلاح متوسط واسلحه عاديه بشكل مكثف ، بس السياره اللي احنا فوقها ضد الرصاص وفيها ميزات وتقنيات جديده لاول مره ابسرها ، وفجأه ضوت السيارة اللي احنا فوقها ضوء قووي يعمي اي شخص يبسرها من خارج والضوء كان من كل جانب لسيارة ودخلنا ، ابسرناهم لما وقفو السيارات ونزلو سته بيحمو الرجال هذا بس سته كانو مسلحين صح وكل واحد جثته اكبر من الثاني ومدربين تدريب قوي ، نزلت انا وعمنا وبنشتبك معاهم ، بس ما قدرنا نتحرك من جنب السيارة كانو متمركزين صح ، وشويه وقد بنبسر هيلوكبتر بتحلق فوق الجبل ، ما دريت الا لما نزلت اقدار وقالت عيهرب ..عيهرب ، وهي ماسكه السلاح وبتضرب عليهم وهي بتمشي طريقهم بدون خوف وانا وعمي مطننين وبنبسرها وقمنا بعدها طرحت اربعه منهم كانت تضرب في ريوسهم لانهم محصنين ببدلات ضد الرصاص ، واثنين شلو الرجال ودخلو للجبل واحنا بعدهم ، كان به نفق حق سيارات محفور منزل ، وبعدها دخلو من نص النفق من باب على يمينهم ، واحنا وصلنا للباب ذيه ونبسر وبه غرفه وأصنصير ، ويشتو يطلعو للمكان اللي وقفت فيه الهيلوكبتر ، اول ما وصلنا مدري كيف وقف الاصنصير ورجع منزل لا عندنا افتتح الباب واشتبكنا مع الاثنين لما تم تصفيتهم ،والرجال كان جالس في زوة الاصنصير ومغطي على راسه بخوف ، مسكته من راسه وبنسحبه ، قالت كيف نزل الاصنصير يا اقدار ما دريت الا وهي بتقول مش وقت ذلحين ضروري نخرج سريع من هنيه قد تم التبليغ للقوات تبعهم طبعا القوات الخارجيه ، وعيتم القصف في اي وقت ، وسحبناه لا خارج بسرعه وصلنا وقد به طقومات وعسكر خيرات محاصرين للمكان ما قدرناش نخرج ما درينا الا والطايرات تضرب ثلاث غارات على الجبل وقتلت ناس خيرات من العسكر وانا بنقول عيال الكلب بيقتلو حتى اتباعهم ، والمهم عندهم ان احنا ما نوصلش لرجال ذيه ، واستغلينا الفرصه بعد الغارات وطلعنا فوق السياره وطرحنا الرجال وهو مكتف في الكرسي الامامي جنب عمنا وخرجنا بالسياره ، وصلنا لا نهاية الستين ونزلنا من فوق السيارة ، وطلعنا فوق تكس وطرحنا الرجال في الخانه ، واللي كان بيسوق التكس شل السياره المصفحه ورحله ، واحنا

واصلنا طريقنا للمقر الرأيسي حق اقدار ، وبنقول لاقدار واللي سار بالسياره المصفحه عيمسكوه قد به بلاغ على السيارة ، قالت لا تقلقش هو عيطلع فوق قاطره بالسياره تحت جسر الستين ويختفي ، قلت لها تمام ، ارتزحت على الكرسي فوق التكس تيك وانا مرتاح راحه غريبه لاول مره اشعر بها لان احنا مسكنا اول اصبع من اصابع القبضه ، فرحه اشبعت داخلي الشجن حقي في اننا اشتي ابسر بنتي سلى واطمن على زوجتي ، اقدار طرحت يدها فوق كتفي وقالت ، ابسرت محلى الراحه اللي تكون من الله ومحلى الراحه لما يحس قلبك انه بيفعل شي صح وجذري لبلاده وقومه ، لذه محد يقدر يوصفها ، قلت لها اي والله ، حتى ان الراحه تيه سحبت الغضب اللي داخلي اتجاهش انتي وعمنا وابي ، طبعا ابي فوق التكس قد كان فاقد الوعي بسبب الرصاصه اللي في خلف كتفه ، قمت مسكت ابي وقلبته اتاكد كم قد نزف واستغربت ان به ساع الكيس الحراري المقوى بشكل بيضاوي مغطي على مكان الرصاصه وما عدبش دم بينزف ، ابسرت على طول لا عند اقدار وقلت ما هو هذا في ابي ما فعلتي له ، قالت سعليك ، هذا اسعاف اولي بشكل مؤقت وعيحفظ نزيف الدم ويجعل كل الجسم يشتغل بشكل طبيعي ،. يعني لا يمكن ترتفع حرارته او يزداد خوفه وتوتره وينام بشكل طبيعي وما عيصحى الا وقده بخير ان شاءالله ، وانا مطنن فوق البنت تيه ماهي قدراتها وليش واثقه في نفسها لا تيه الدرجه وماهي الاجهزه والاختراعات اللي معاها وتخصها وحدها ، ايوه هي تيه اللي شقدر احارب معاها كل نذل وخاين وتافه وفاسد في الارض هذه بكلها ، لان معاها سلاح يخصها ، مش سلاح مكتسب من اليهود ، ابسرت لا عندي وقالت انا واثقه في قوة الله ، وقلي من هو اقوى من الله ، انا حسيت كياني كله تجمد ايش دراها بايش بنفكر ، وصلنا للمقر ، وشلو ابي لا غرفه العمليات ودخلنا الرجال اللي هو اصبع من اصابع القبضه لا غرفه ، سوداء ما بش فيها لا كرسي ولا طاقه والا حتى تدرى اين بابها ، وطرحناه في الغرفه وخرجنا ، وقلت لها ندخل نحقق معه نبسر ما تحت راسه الكلب هذا ، قالت ماشي ، هو ذلحين داخله جهاز مغروس في جسمه بدون علمه ، وعند ما يحسو اللي فوقه باي خطر اتجاهه يفجرو الجهاز ويقتلوه ، لكن داخل الغرفه تيه بنقطع كل تواصلهم وتحكمهم بهذه الاجهزه ، خلينا ذلحين ندخل نحقق مع الرجال اللي مسكتوه في بيت العجوز ، قلت لها ايوه اين هو هذا سلطان اللي بتقولي انهو اخي ، قالت مش وقت تقابله الان ، وتحركنا لا عند الرجال وهو ممدد فوق السرير ومركبين له مغذيه وقد عالجو رجله ، بس دخلنا وهو فاقد الوعي ، خرجنا وانا بنقل لاقدار طيب والقصف اللي حصل والعسكر اللي ماتو ، ما عيقولو لناس ، قالت شيطان الاعلام شغال وتبريراته كثيره ، والشعب معتاد على هذا الشي وبيغطوها باي مسمى الشعب اعتاد عليه من سنين ، وانت واي شخص يحتاج يوقف ضد الشيطان ما يحتاج اقدار ولا الف مثلي ، يحتاج بس يتوكل على الله ويوقف بكل شجاعه وذكاء ضد كيد الشيطان لان الشيطان ضعيف وكيده اضعف لكن بيحاول بكل الطرق يبين لناس انه قوي وخطير ومحد يقدر لها ، اللي نحتاجه يا يمني نكسر بس الحاجز اللي بناه الشيطان ووقتها عنعرف حقيقه ضعفه ومكره ....

يتبع ....

#في_بيتي
#يمني

#منيرالنقيب

#في_بيتي5
#يمني2 "البارت13"

سرت فعلتلي ركعتين لرب العالمين وجددت توكيلي به ، كملت اصلي واقتلبت وابسر اقدار مسنبه جنب الباب ومرتزحه بيدها على رف الباب وكالعاده ركزت على ملامحها البارد ، لكن ابسرت في ملامحها شوية مشاعر وكأن به خوف داخلها او شي غريب لاول مره ابسر ملامحها تيه ، قلت لها خير يا اقدار مالش وقمت لا عندها وبنقلها به شي تشتي تجابريني به ، وكانت ساع الشاردة وفجأه ابسرتني وقالت هااه .. ماقلت .. لا مابه شي بس جيت اقلك ان الرجال اللي مسكتوه في بيت العجوز قد فاق ونقدر ندخل نحقق معه ، ورجعت ملامحها الباردة واللي كلها جديه ، قلت لها حالي قوي هيا نسير نبسر ما عاد باقي تحته من قذارة وظلم ، قالت واشتي اقلك ان تلفون العجوز المكسر خرج من تحته شوية اسماء ومواقع مهمه ، عيخرج من تحتهم شي ، قلت ما دام والباري معانا فعليه الركون ومن صفاته المعين لا تقلقيش ان شاءالله احنا قدهم ، وخرجنا طريق الرجال ، فتحت الباب وهو ممدد فوق السرير ومفتجع ساع اللذي مراعي لنا ايحين عندخله والخوف قد اكل عقله اكل ، اكيد با يخاف لان كل من يخطي ورى ابليس ما يحصل الافقر وخوف ومذله ، قربت لا نهاية السرير ومسكت طرف السرير وانا واقف واقدار دخلت بعدي وقفلت الباب ، وبنبسر الظلم في عيونه بنبسر هل عيقدر يفعل لعيونه قناع طيب مثل ملامح وجهه ، وهو بيبسرني وارتفع ورزح ضهره وهو ماسك الطراحه اللي فوقه وبيتخبي قفاهاه رفعها لا عند صدرة وقال ، من انتو ؟؟
تبع من انتو ، لما تتجرأو وتفعلو برجل دين مهم كذيه ، كل شي كبير وصغير شا احاسبكم عليه .... وعمنا اشرف فتح باب الغرفة ودخل بكل برود وهو بيبسر لاعنده وقرب لا جنبه وهزر المغذيه من المعلق وقله لو تفتح لقفك مره ثانيه بدون ما توقف ويأذن لك شا اكسر اسنانك كلهن ورجم المغذيه لا وجهه وهو بيصيح فوقه قوم اوقف يا كلب ،، الرجال حضن المغذيه وهو مبهرر وحاول يوقف وهو بيتركي عرض السرير لان رجله مصابه ، وقال وهو مفتجع وبيبسر لا وجيهنا ، اي شي تشتو تعرفوه انا مستعد شا اجابركم بكل شي بس لا تقتلونيش بحجر الله ، اشرف لف من حول السرير لا عنده وهو بيبسرني وقال شفت كيف الحمار ما يفهم الا بالضرب ، واقتلب لا عنده وندع له ملطام بقفى يده لما طرحه للارض ورجع مسكه من صدره بيد ورفعه شويه وقله قلت لك ما تفتحش لقفك الا بأذن ، وقده يشتي يفعله الملطام الثاني ، انا قلت يا عمنا وقف ، شكله حمار فيهم وبيفهم من اول ملطام ، عمنا فك له ورجع يسنب جنبي ، والرجال حاول يقوم من الارض بسرعه برغم انه مصاب وكان قده يشتي يتكلم ، وابسر لا عيون اشرف وسكت وهو مفتجع ، قلت له تكلم هيا محناش فاضيين لك ، قال انا ماليش دخل هددوني بعيالي وعائلتي وضغطو عليا اننا افعل كذيه ، اغووني وصورني في مقاطع مخله ، وخلوني اتولع للمخدرات وبرضو صورني وابتزوني اننا افعل اللي يشتوه ، ومع الوقت ما دريت الا وقدنا عبد تبعهم ، وبيبسر لا عندي وبيقل قلي مفعل لو انت مكاني اننت فعلت مثلي على شان احافظ على سمعتي وعائلتي ، وانا شخصيه معروفه في اليمن ما ينفعش يفضحوني الفضيحه تيه ، قلت له واحنا بنصور كل كلمة قلتها وكل ما بيحصل في الغرفه تيه وخبطت بيدي على طرف السرير ، وهو ركز مكان يدي واكتشف ان به كيمرة بتصوره ، الرجال يبسين مشافره ولبب وما عاد كنش يقدر يمغط ، وحس انه كل ما تمر ثانيه وهو عندنا بيتورط اكثر ، ورجعت خبطت طرف السرير بيدي مره ثانيه ، وهو رفع عيونه لا عندي وركز معي ، وقلت له ، وبكل حقارة متخبي خلف دين الله ، الله ودينه بعيدين منك ومن افعالك و امثالك ،مثل بعد عين الشمس يا حقير ، بتحرف دين الله بحسب هوى الشيطان ومستغل ثقة الناس بك وبعدتهم عن الله بمكرك انت ومن فوقك ، انت لا يمكن تكون يمني ومن تيه الارض ولا معتفعلش كذيه محد يفعل بالارض اللي بتأكله كذيه الا اذا هو مشو من جذورها ، ما تستحيش بعد كل كلمه تقول الله من بتخدع هذا الله يا غبي ما بتخدع الا نفسك ، والله يمهل ولا يهمل ، وابسر مسرع طرحك في يدي ، وانا شفعصك بيدي ساع الصرصور ، قال شا اقلكم بكل شي اعرفه ، قلت له لا تطولش مجبرك وقلي اهم شي تعرفه ، قلي ماهي اكبر مصيبه تعرفها وشاركت فيها لخراب تيه الارض وقهر ناسها ، قال اللي اعرفه ، بالاول ايوه مشنا يمني الاصل ، انا مُندس من سنين من ايام جدي وخرجو لنا بطاقة وتاريخ مزورين تثبت ان احنا من اصول اليمن وعائلات عريقه ولها تاريخ ، وكبار المسئولين وكل من بيدير في البلاد تيه لا ينتمو لليمن ولا لهم اصول فيها ، بس حكايتهم نفس حكايتي ، فمنهم اللي كملت مهمته وخرج خارج البلاد يكمل مهامه ، واللي بدأ عهده ويكمل افعال اللي سبقوه بس بأسماء وانتماىات مختلفه ، ومنهم من استغل الدين ومهنم من استغل جوع الناس ومنهم من استغل خوفهم ، وكذيه سيطرو على الناس ، قلت له ايوه وما عادبش قبال الناس الا انهم يتبعو اعمالكم القذرة مغصوبين على شان يقدرو يعيشو بمهانه صح ، واستغليتو طيبه الشعب وكل يوم تهينوه اكثر وتذلوه اكثر ، ارتفعتو

من جلود ضهورهم ووصلتو للقمه وبدوسو على كل احتياجاتهم بكل غشامه وغباء ، ركنتو على الشيطان وقصدكم ان قوتكم الهشه عتستمر ، نسيتو ان الله اكبر وفوق الكل ، ولا بد ما يوصل نوره وينتفض الشعب هذا ويمسح بكرامتكم تحت ارجله ، انتو وشيطانكم اللي بتتبعوه ، تكلم وقلي ما عاد تعرف سريع ، قال به جهات خارجيه مكنت واحد من جماعتهم المندسين وخلوهم يسيطرو على كل شي ، بحجه انهم مع الشعب ، بس في الحقيقه هم تبعهم وضد الشعب ، قلت من هم هولا اللي بيهددوك وماهي اهدافهم ، اقدار قالت من عيكون يا يمني ، اكيد الشياطين اللي من خارج البلاد تيه وللي لهم مصالح في كل لحظه يجوع فيها يمني ، ولا تنسيش ان حرب الصومال كلها للان هي مختلقه من شوية تجار تبع الالماس ،اكتشفو نهر فيه الماس في الصومال واذا خرج كل هذا الالماس لسوق اكيد سعر الالماس عينقص ، انت متخيل يا يمني بيعذبو ويقتلو وينتهكو ويشردو شعب كامل على شان ما ينقصش سعر الالماس ، وطلع الالماس اغلى من ارواح الناس ، فلا تستغربش على السبب اللي مخلي لبلادنا كذيه ، لو نعرف الاسباب عتطلع حقيرة وما تستاهل الذكر ، بس خلاص الشيطان اعمى صوابهم واتبعوه بجهل ، فما عاد همهم طفل يخاف او ام تموت بسبب مرضها لان ابنها ما قدرش يعالجه واب يموت قهر من العجز اللي البسوه قبال عائلته ، هولا كل هدفهم انهم يخلو الناس يعبدو الرزق وفعلاً قد شبعنا بيعبد الرزق ، من حين ما يقوم لما يرقد وهو بيهم كيف يدخل رزقه ولقمه عيشه حتى لو خدع وظلم وغش المهم يدخل الرزق ، خلو الناس ينسو ان به حرام وظلم ، ومن يفعل كذيه يعتبر ذكي وناجح ، رجعت اقتلب لا عند الرجال وقلت له هيا جي بعدي اخرجك من هنيه ، الرجال افتجع وقال ماقلت عتخرجني من هنيه ، مااشي ..ماشي لا تقتلنيش انت تشتي تقتلني ، قلت له انا كلمتي كلمه وانت قلت لي اللي تعرفه فهذا ثمن حريتك ، ومسكته من ذراعه وبنخرجه خارج الغرفه وهو بيبسرني ومستغرب وخايف ، واشرف واقدار بيبسروني وهم مستغربين ، خرجت انا والرجال من الغرفه ، وعمنا اشرف واقدار خرجو بعدي ، وعمنا مسك يدي وغمز لي ،بياشر لي هل انا شا اخرجه من صدق ، انا اشرت لو احد من رجال اقدار وقلت له يغطي عيون الرجال ويخرجه لا فوق سيارة ، مسك الرجال وخرجه ، وقلت لعمنا واقدار ، ايوه شا اخرجه لان موته ذلحين ما عيفيدنيش بشي ، قد قال كل شي نحتاجه ، وذلحين شا افلت له على شان يرجع يجابر اللي فوقه بكل شي فعلته معه ويقلهم من هو يمني واننا اقدر اوصل لمن اشتي ، وذلحين بما ان احنا مسكنا اصبع من اصابع القبضه ، فاللي بيديرو اصابع القبضه عيدورو على طول على بديل يعتمدو عليه ، ومن عيكون البديل في الساحه واللي هيبته وصلت لكل لسان في عالمهم ، اكيد عيكون انا ، ومن هنيه عنبدأ لعبتنا ، ولا تنسوش ان احنا مسيطرين عليه وماسكين حباله ، وعلى ما اعتقد ان اقدار قد زرعت داخله شي من اختراعاتها تقدر تعرف مكانه في اي وقت ، عمنا ابتسم وكان يخبط بيده على كتفي وقال ايوه هذا يمني اللي اعرفه واللي يفكر للبعيد ، واقدار ابسرتني وهي مبتسمه ومشيت من جنبنا ، وانا خرجت على طول لا فوق السيارة اللي فيها الرجال ....

يتبع...

#في_بيتي
#يمني

#منيرالنقيب

#في_بيتي5
#يمني2 "البارت 14 "

خرجت طلعت فوق السيارة والرجال مقيد في الكرسي الامامي ومغطيين لعيونه ، اول ما رزعت باب السيارة الرجال افتجع وبدأ يقول ، محجور لا تقتلنيش قد جابرتك بكل شي اعرفه ، محجور لا قتلتني اين عتشلني ، التفت لا عنده وقلت له اصصصه لسمع نخس ، وشغلت السيارة واتوكلت ، وكل شويه الرجال يعيد نفس الهدار حقه بس حسي مشو عنده جالس افكر ، في النضرة حق اقدار ، حسيت فيها شي غريب وكأن به شي هي فعلته وما تشتيش تكلمني به ، وصلت للجسر حق خمسه وربعين فكيت قيد الرجال وبعدت الشاش من عيونه ، وهو مفجوع بيبسر ومراعي ايحين شقتله ، فتحت الباب وقلت له انزل ، رحلك انت حر ، الرجال بيتلفت يمين وشمال وبيبسر نفسه في شارع خمسه واربعين ومشو مصدق اننا شا افلت له ، ونزل وهو بيقل شكرا لك يا اخي ووعد ما اكلم احد شي ، قلت له اذا ما كلمتش احد بشي شرجع لك لا داخل بيتك ، وقفلت باب السيارة ورحت لي ، وبنبسره من المرايه وهو واقف ومتركي عرض الصبيات وبيبسر لا عندي مشو مصدق ، وخطيت طريق الفله حقي ،اسير ابسر مرتي وبنتي ، وصلت وجدتي بتصلي ، كملت وسلمت عليها وقامت تحضني وهي فارحه وبتبكي لان بنتي رجعت وهي بخير ، قلت لها اين بنتي يا جده اشتي اشمها واضمها لا حضني ، قالت بنتك راقده عند مرتك من اول ما وصلت ، دخلت للغرفه حق المره ، وابسر بنتي وهي راقده جنبها ومرتي متركيه على يدها وبتمسح راس بنتي وهي بتبسرها ، اول ما ابسرتي قالت حيا بصوت منخفض قربت وحبيتها في راسها وجلست جنب بنتي من طرف السرير وبنمسح راسها وبنبسرها وانا بنبكي وبنبوسها ، وقلت للمره هيا مه كيف البنت وكيف قد صحتش ، قالت الحمد لله احنا بخير ، والبنت راقده من حين ما وصلت ، ذلحين قلي ما عاد فعلت انت وابي وهل عرفت سر الصورة ، قلت لها قد سدينا وايوه عرفت سرها ، بس مال بنتي ما صحيتش من نومها ،ونومها خفيف قوي اطرف حركه او صوت تصحى على طول ، قالت عادهي جت من صدمه وناس ما تعرفهمش لا تقلقش هذا طبيعي ، قلت لها خير يا مره ، ما في نفسش ما تشتي ، قالت اسلم الدكتورة وجدتي ما قصرنش معي ، قلت لها سابر ، وما دريت الا واخي بلال بيتصلي ، شليت نفسي وخرجت من الغرفه ،،،،
_هاه يا بلال لين وصلت ؟
_ بالاول يا بلال جى واحد شباب وخرج من عند الشيبه وسار لمكان صرافه مقفل ، وبعدا خرج ومعه رجال جريح ، وشله فوق السيارة وسار لا بيت في منطقة كذا ، وما عاد خرجش ..
_ هذا سليمان ، ايوه من باقي ؟
_ من سليمان يا اخي ؟؟
_ مش وقت شرجع افهمك يا بلال ،ذلحين قلي ما عاد فعلت ..
_ورجعت للبقاله حق الشيبه ، وجو لا عنده فوق ثلاث سيارات سود مصفحات ناس كلهم لابسين بدلات وما فيهم الا واحد لابس ثوب وشكله رعوي ، نزلو عند صاحب البقاله وقفلو البقاله ، وجلسو ما يقارب نص ساعه ، وبعدا خرجو جلست اراقبهم ، وصلو لا قرية حدة ونزلو الرعوي وابسرت الرعوي دخل بيت ولحقت السيارات طلعو للعشاش عند العماير السكنيه ودخلو هنيك ،،
_ قلت له خلاص الان جي لا عندي ، انا في الفله حق العمل ،،،

قفلت المكالمه وسرت للفله الثانيه ، خرجت الجهاز الاسود من جيبي وبنبسره واللمبات حقه بتومض ، وبنقلبه يمين وشمال ، بس لاول مره ابسر جهاز غريب كذيه ، وقلت طيب ليش اقدار ما سألتنيش على الجهاز ولا قالت لي خرجه ، قالت ان المخترع هرب بي وشل الجهاز لاجل اهدافه المبهمه ، وقالت خطف بنتي على شان يفعل عليها تجارب ، بس الحمد لله ان اقدار لحقتها ، طيب مالي ما سالتهاش من هم اللي قتلتهم في المجمع حق حده ، والف والف سؤال بيدور في راسي ، وصلت للفله وطلعت لا عند معتز ، دخلت الغرفه حقه وهو مخزن في الزوة وثلاثه لابتوبات قباله ، وراقد ، ابسرته وهو مخزن وراقد لما قرحت ضحكه، قربت لاعنده وصيحت ، معتز ،الرجال نكز وقام وهو ماسك الجنبيه في طرفه و بيصيح من هو مابه ..مابه ، اول ما ابسرني وقال هو انت يا جني ، جننتوني لا عاد خليتو ليلي ليل ولا نهاري نهاري قد كنت مفتهن فوق الباص حقي اتصايح انا والركاب قلت ماشي ، انا ضحكت وقلت له مالك ما تبعد القات وتخطي ترقد ، قال يا يمني فوقهن طعم يا جناه ، وبعدا معي حلم مهم ضروري احضره وانا مركز ، قلت له وزيد شل معك ماء وشقارة وببس ما ينفعش توصل للحلم وبه شي ناقص عليك ، وضحكنا الاثنين ، وبعدا قلي جابرني يا يمني ما فعلت وماهو العصيد اللي حصل كله واين زيد سار المخترع ذيه ، جابرته بكل شي حصل ، وهو كان يبسرني وهو مقعي وفاتح فمه ، كملت اجابره واقتلبت لا عنده وبنقله هيا ما رأيك يا معتز ، ومعتز فاتح للقفه ومطنن لا عندي ، ياااي وااا معتز .. من بنحاكي ، قال بتحاكيني انا لكن على سب استوعب كل الفلم اللي قلت لي عليه ، اشتي اخزن سبع مرات ، قلت له ما نفعل يا معتز ما يكلف الله نفساً إلا وسعها ، طرح يده في كتفي وقال ولا يهمك يا اخي انا معك لما يطير الراس هذا وقوى لك ان عادنت بحسك وما قد جننتش ، قلت له بما ان احنا بنحارب كل مفسد وطاغي فحنا قدهم بعون الله احنا مع القوي الكبير ، قال والنعم

بالله ، وبعدا اعتقد ان قوتنا وخبرتنا زادت بمعرفتنا باقدار ، وانت ضروري تجلس مع اقدار يا معتز عتفيدك قوي ، قال ايوه انا يعجبني البعساس وضروري اقابلها ، وما درينا الا وبلال دخل للغرفه وجلس ، وابسر معتز وهو مبحشم ، وقال مخزن لا ذلحين يا مدبر ، انا قلت تصدق يا بلال انهو كان راقد وهو مخزن ، وجلسنا نضحك شوية ، وقلت لبلال هيا نتحرك للقرية حق حدة لا عند الرعوي وادينا الموقع لمعتز يراقبه ويدي لنا اي معلومات عن المكان ذيك ، وطلعنا فوق السيارة انا وبلال وتحركنا ، ما دريت الا وتلفوني بيرن ،،،
_ هااه يا عمنا اامر ..
_ اين انت يا يمني وما عاد فعلت بالرجال ؟ واذا كملت عملك جيت لا عندي للفله حقي ،
_ الرجال فلت له على ما قلت لكم ، وذلحين شا اسير للقريه حق حدة معي واحد اشتي اقابله ، واشتي منك يا عمنا تسير لشقق السكنيه الجديده اللي في العشاش عتلاقي ثلاث سيارات مصفحات ، اشتيك تبسر ماهو خبرهم ،
_ قال ابشر الان متحرك وشا اقلك بكل جديد ،،
قفلت المكالمه ، وما دريت الا ومعتز بيتصلي ،،،
_هاه يا معتز ..
_ يا يمني نسيت الجهاز الاسود عندي
_ يا عيبااه .. هيا خليه عندك وانتبه تبعسس فيه
_ مابش اين ابعسس فيه الجهاز الغريب هذا ،،
_ يلاه سابر كان خاطرك ،،،

وصلنا للبيت حق الرعوي ، ونزلت انا وبلال بندقدق والبيت دورين ما درينا الا ورجال بدي من الطاقه في الدور الثاني بيصيح من ..من انتو ، قلت له انزل نشتي نجابرك ، ما درينا الا لما خرج البندق من الطاقه وبيرمي علينا ، اخي بلال نبع يحتمي خلف السيارة وانا ارتزحت لا عرض الجدر جنب الباب ، وبدأ اخي بلال يرمي عليه ، انا على طول زبطت الباب ودخلت للبيت ، ودخلت والدور الاول كله فاضي مابش فيه اثاث طلعت لدور الثاني وبنخطي دلا ..دلا من الدرج وانا ماسك المسدس في يدي ، طلعت لدور الثاني واول غرفه كانت امامي كان كلها سلاح ، ومتفجرات ، قربت لديوان اللي كان بيضرب علينا رصاص منه ، دخلت وهو بيتشاقر لطاقه وهو ممدد وبيضرب على اخي بلال لشارع ، دخلت لا عنده ودسعته في راسه وقلت له فلت سلاحك قبل ما اطاير راسك ملان المكان ذيه ، على طول فلت سلاحه كتفت يداته لا خلف ضهره وهو ممدد ، وبنسمع اهل الحاره خرجو وبيسالو بلال مابه ماهو ضرب الرصاص ذيه ، قال مابلا شويه سرق ابسرتهم وهم يشتو يشلو السيارة وضربت عليهم ، قالو لبلال وانت من انت ، قال ان ابن عم جاركم واشر للبيت حق الرعوي ، انا رفعت الرعوي لطاقه وقلت له قول ان اللي نازل ابن عمك وقل لهل الحاره مابه شي ، الرجال قال خلاص يا ابن عمي قد سارو وانت جيت من البلاد حامي ما بلا رصاص ، وبلال قال هولا سرق كان فما رأيك ، والرعوي قال لهل الحاره المعذرة منكم يا رجال فجعناكم تيه الساع ، هيا اطلع يا ابن عمي اطلع ، بلال ابسر لهل الحاره وقلهم المعذرة منكم ودخل البيت ورد الباب ، رجعت جلست الرجال وقلت له من انت ، وقبل ما تجاوب ، ادري اننا مشنا فاضي لاي هدار واذا به اي كلمه ما عتعجبنيش ما عتكملهاش الا وقد قرحت راسك وانت اخبر ، الرجال كانت ملامحه تاعبه وباين عليه مضغوط قوي وقده ضابح ، ضحك وقلي لا تدقهاش عليا رجاله وانت شكلك كلب من كلابهم , كل شويه يرسلو لي واحد ، وكل يوم يشلوني بقعه ، انا تعبت واذا انت ادمي اقتلني وخلصني من الجحيم اللي انا فيه ، طبعا الثقه في كلامه خلتني مطنن ومستغرب ايش قصده لما قال انا كلب من كلابهم ، ومن كلامه افتهم لي انهم بيضغطو عليه يفعل شي او يخبي شي وقده ضابح ، واخي بلال طلع وهو موجه السلاح لا عند الرجال اشرت لبلال ينزل سلاحه وانا جلست وطرحت سلاحي في الارض ، وقلت له انا مشنا كلب انا ادمي ، وانا مشنا تبع احد ، انا مع الله ، قلي ماهي قصتك ،وفي ايش انت متورط وماهي كل الاسلحه تيه والمتفجرات اللي في بيتك ؟ الرجال استغرب وقلي يعني مشنت تبع عصابة الفرنسيين ؟!!
قلت له ايش من فرنسيين ، ايش قصدك ، قال اسمع يا اخي مشنا داري ماهي نيتك او تبع من انت ، بس بنبسر في عيونك نخوه وعزه وشرف ، وانا شا اجابرك بكل شي ، لاننا تعبت ، قلت له تكلم ، بس قبل ما تتكلم راعي ، وقمت فكيت قيده ، وقال اسمع يا اخي ، انا من همدان قريه جنب قرية الذفيف ، و قبل ست سنين واحد من اهل القريه نكع عليه الحمار في حيد هاويه في طرف الجبل جنب قريتنا مكان بنرجم فيه القمامه ، قلت له ايوه ، قال وصاحب الحمار تمدد وقرب راسه يبسر لين نكع الحمار حقه واتفاجأ ان به مكان في نص حافة الجبل والحمار نكع لا هنيك وعاده بيصيح ما قد مات ، وانا عاقل القريه وجى بيجابرني ، وسدينا انهم يربطوني بخيط وانزل للحمار ذيه واربط الحمار واهل البلاد يرفعوه ، ولما نزلت لا عند الحمار اكتشف انه به فتحه على شكل عقد في وسط الجبل ، استغربت كيف محد قد ابسرها او تكلم عنها طول الوقت ذيه ، واستغربت ليش الحمار ما دخلش من الفتحه تيه وجالس ينهق في بقعته وهو متوجع ومفجوع ، المهم طلعنا الحمار ،وطلعت ، وسرت جابرت الفقيه حقنا ، وسدينا يوم ثاني ننزل انا والفقيه وخمسه من اهل

القريه نبسر ما قصة الفتحه اللي في نص الجبل تيه ، واليوم الثاني نزلت انا والفقيه وواحد والباقيين مراعيين لنا طالع بالحبال ، ودخلنا الكهف ذيه وكان به ريح قويه ومستغربين من وين بتجي الريح واحنا وسط كهف في الجبل وكل ما ندخل اكثر من الكهف ذيه كان يشتد الظلام اكثر وتقشعر ابداننا والفقيه بيقراء المعوذات ومستمرين ، وصلنا لا نهاية الكهف وبه صاله كبيرة بشكل دائري ،وفي الوسط ساع النافورة بس مابش فيها ماء وبه تمثال حجر معمور وسطها والراس راس اسد بس الراس كان ذهب مش حجر وفي الصاله تيك ١٣ باب من طرفها لا طرفها وفي كل باب به راس اسد معمور بحجر والاسد فاتح للقفه ، وكل ما تجي اي ريح من باب تسمع ازير الاسد من التمثال المعمور فوق الباب ، حسينا ان به جن وشياطين خباث بتحرس المكان الاثري ذيه وافتجعنا ان احنا ندخل ،والرجال اللي معانا كان في يده كشاف ومصحف صغير وقال انا شدخل من الباب ذيه واختار واحد من الابواب ال١٣ وانا بنقله ماشي المكان شكله محروس ابرد لك يا صالح حسين ، قال قلنا ما عيقع شي وهذا شكله رزقنا تشتي نفلته ، ودخل من الباب وانا والفقيه مراعيين له ، وبنبسره لما اختفى من قبالنا ، وبنصيح له كل شويه وهو يرد علينا وفجاه سكت كنا نصيح نصيح بس ما كانش يجاوب ، انا افتجعت عليه وقلت شلحقه وجريت طريق الباب ذيك بس اول ما دخلت حسيت ان به ريح حاميه دخلت فيني وفقدت الوعي ، وما صحيت الا وقدنا طالع انا والفقيه وباقي الخبره حقنا ، وبنقل للفقيه ما وقع مابه ، كيف لما طلعنا لا هنيه ، قال انت اول ما دخلت ما دريت الا لما ارتجمت لا خارج الباب وانت مدوخ ، انا افتجعت وسحبتك لا خارج وصيحت لهم يطلعونا ، قلت له طيب وصالح حسين اين هو ، قال مدري ما عاد خرجش ، وقررنا ننزل ، بس كل ما كنا ننزل، ندوخ ويغمى علينا وعاد احنا في نص الكهف ، ما درينا ما نفعل بلغنا الدولة ، وجابرناهم بالي حصل ، وان به شخص مفقود نازل ، الدولة جت على طول وحوطت على المكان ونشرت الطقوم في كل بقعه وممنوع احد يقترب ، بس صاحبنا ما ضهرش ، وكلنا قلنا خلاص شلوه الجن او مات ، وصلينا عليه صلاة الغائب ، قلت له انا ايش علاقتي بهذا كله و بالقصه تيه، شكلي غلطت حين فكيت وثاقك ، قال اصبر ، والغريب ان بعد شهر ونص والدولة محوطه ، ما درينا الا وهم بيعمرو معهد في راس الجبل ذيك مكان ما نكع الحمار ، وسورو على المعهد وقالو انه معهد فرنسي لتعليم اللغه الفرنسيه ، وبعد سنه من عمارة المعهد ، مابش ولا طالب من قريتنا او القرى المجاوره مسجل في المعهد او قبلوه ، فانا قلت هذا كله تمويه على شان يشلو اثارنا وتاريخنا ، قلت له ايوه كمل ، قال ويوم قررت انا واخي وابن عمي واخو صالح حسين اللي شلوه الجن ندخل المعهد بالسر ونبسر ما بيفعلو ، وراعينا لساعه ١٢ بعد منتصف الليل وسرنا وكل واحد بسلاحه ولفينا من الخلف بعيد عن الدوريات والحراسه وخطينا من طريق وعره واحنا مباسلين باروحنا اذا احد نكع او شي وعاننا الله وطلعنا من السور ودخلنا للمعهد الفرنسي ذيه ...

يتبع...

#في_بيتي
#يمني

#منيرالنقيب

#في_بيتي5
#يمني2 "البارت15 "

اول ما دخلنا المعهد ذيه ، استغربنا قوي ورجعنا كل واحد بيبسر الثاني ، مابش سراجات ولا به ضوء في الحوش حق المعهد ما بلا نار في اطراف الحوش من حطب وفي نص الحوش نار كبيرة ، وحول الحوش بشكل دائري أعمده غريبه وفي راسها نار ، نلتفت يمين وشمال وحنا مخبايين ، بس ما لقيناش احد مابش ولا آدمي في الحوش والمعهد كله طافي ، وبه شوية معدات وحراثات وألات حفر واجهزه غريبه ، في الحوش ذيه ، التفت لا عندي اخي قاسم والشمه في فمه ، وقال ماهو الخبر ذيه يا مختار ولا به يهودي في الحوي ذيه ، وابن عمي قال اهدأ يا قاسم خلينا نبسر ما به وبعدا عنتجابر ، واخو صالح حسين جالس يقراء المعوذبات وقدهو مفجوع قوي ، قلت له مالك ، قال مدري اول ما دخلنا حسيت بخوف قوي هيا نرحلنا من هنيه يا مختار ، قلت له انت مفتجع ومتاثر بسبب اللي وقع لا اخوك الله يرحمه ، سعليك احنا اربعه رجال بسلاحنا ، عنخرب جبل على ماهو ، ذلحين صلو على النبي وجو نبسر ليش مابش سراج في المعهد ذيه وليش ملصيين نار في كل بقعه ، ما عاده من معهد ذيه ، وقمنا دخلنا من باب المعهد وكان الباب مفتوح ، المعهد ثلاثه ادوار ، بس اول ما دخلنا حسيت بقشعريره في جسمي بكله ، وما دريت الا واللي جنبي بيتعوذبو من الشيطان ، قلت لهم مابه او ابسرتو شي ، اخي قاسم قال سنبين شعر جسمي بكله والبردقان رجعت حلبه في لقفي ، وابن عمي واخو صالح حسين نفس الخبر ، حسو بالقشعريره ، وكأن به كيان خبيث في ذيه المكان ، سدينا نقتسم كل واحد يدور في بقعه ، انا طلعت لدور الثاني وبندور والغريب ان المبنى كله مابش فيه اثاث ، اول ما وصلت لا بداية الدور الثاني ابسر قبالي صاله طويله به على يساري غرفة والباب حقها مردود وبنبسر ضوء خافت كان احد مولع شمعه داخل الغرفه وباقي الصاله مابش فيها ولا شي الا باب غرفه في نهايتها على يساري ، دخلت الغرفة اللي جنبي بداية الصاله ، وبنتشاقر من الباب ومابش احد داخل الغرفه دهفت الباب بيدي وابسر الغرفه صغيره قوي فيها سرير ودولاب صغير ، ومرسوم في الجدر صليب كبير وماسه جنب الجدر فوقها ثلاث شمع لاصيات ، تحت الصليب تماما ، انا اول ما ابسرت الصليب لما يبست بقعتي ومشنا مصدق اللي بنبسره ، خرجت من الغرفه لصاله ولا بنسمع نخس ومدري مالي قدنا مفتجع قوي ومراعي لأي حاجه تجي تخفعني من قفى ضهري ، كنت احس ان به شي خلفي بس كل ما التفت ملقيش احد ، وبنصيح من الدرج لاخي وابن عمي ، بس محد كان يرد عليا ، ولابه صوت في المعهد هذا بكله ، وانا بنصيح وبنبسر لدرج ما دريت الا وبه واحد مسك الثوب حقي من ورايا وبيهزره ، ساع الجاهل حقي لما يهزر الثوب حقي على سب اجاوبه ، جيت التفت ابسر من بيهزر الثوب ومابش احد والكشاف معلق له في راسي ، ضويت لا نهاية الصاله ومابش احد ، والصاله تيك قد الارض حقها ملان غبار وكأن المعهد مسكون ومحد ساكن فيه ، افتجعت قوي ورجعت اتعوذب من الشيطان وقلت شنزل وارحلي من هنيه ، قد الجن شكلهم مضايقين قوي ، وقبل ما انزل رجعت اضوي لا نهاية الصالة واتفاجأ اننا بنبسر اثار ارجل جاهل في القاع حق الصاله لا نهاية الصاله ، وابسر جاهل عمره ما يقارب اربع سنين مسنب وهو متوجه طريق الغرفه اللي في نهاية الصالة وبيبسر لا عندي ، انا على طول وجهت بندقي لا عنده وبنقول أعوذ بالله من الشيطان الرجيم ، الله اكبر..الله اكبر ، يالله ..يالله ، ما دريت الا وانا بنخطي لا عنده وبنقول من انت أعوذ بالله منك ، وبنركز على ملامحه وما دريت الا وهو بيضحك وبيتكلم بصوت رجال كبير في السن ، وقال انا ابن صالح حسين وابي بيقلك لا تفلتش هنيه عيقتلوه ، كمل وجرى لا داخل الغرفه ، وانا بنقرب دلا .. دلا ومشنا داري ليش ، انا اشتي ارحلي قد ارجلي بيرتعشين من الخوف ، والغريب اننا اول ما قربت من الغرفه كنت اسمع اصوات جهال خيرات داخل الغرفه تيه بيلعبو ويضحكو ، اول ما وصلت لا باب الغرفه ابسر والغرفه ما فيها ولا شي ما بلا سرور دورين صغار طولهن ما يتعداش النص المتر على يمين الغرفه وشمالها ونهاية الغرفه في نص الجدار به طاقة ، ، ومفرشين على السرور ملايات بيض وزرق وحمر وخضر والوان غريبه ، وقدنا ملبب بقعتي اين سار الجاهل اللي دخل قبالي والغبار ملان الغرفه مابش ما يثبت ان به احد دخل هنيه من سنين ، وارجلي قدهن يابسات بقعتي ما قدرت احركهن واهرب، عمرت البندق وقلت اضرب رصاص ويسمع من سمع المهم يغيرو عليا من هنيه ، بس كنت اضرب بالبندق وما رضيش يرمي ، واعشقه مره ثانيه وابسر الرصاصه اللي بتنزل ، واجي اضرب ومابش وبعد رابع محاوله نزلت راسي ابسر الرصاص اللي بيخرجين من البندق حقي لما اعشقه ، بس الغريب اننا ابسرت معابر الرصاص بس وكأننا قد ضربت بالبندق والمعبر خرج ، بس انا ما ضربتش ولا طلقه ، وما دريت الا وبه يدات جاهل صغير اطرحت من خلفي في نهاية خصري ، واسمع ضحكه وبدأ يدهفني لا داخل الغرفه طريق الطاقة ، وانا بنصيح بكل صوتي اشتي التفت ابسر ماهو هذا اللي بيدهفني بس ما قدرتش

التفت ، وبيدهفني بقوه لا عند الطاقه ويرجمني من الطاقه تيك من الدور الثاني للارض ، اقوم ابسر واننا ارتجمت لا تبه تراب ناعم ساع النيسه وقدنا خلف المعهد وعلى نهاية الحافه حق الجبل ، قمت بننفض نفسي وبندور البندق يمين وشمال وبين التراب بس ما لقيتش قمت وقربت شوية من حافة الجبل مكان ما نكع الحمار ، وابسر به خمس درج نزلت منهن ولقيت قبالي قفص مربع كبير ساع الاصنصير دخلت فيه ، وقلت انزل ابسر ما قد سرقو عيال الكلب ، ونزلت به، اول ما ضغطت مفتاح الاصنصير ونزل وانا مستغرب كيف اشتغل ومابش كهرباء في المكان ذيه ، وصلت للفتحه حق الكهف ، ودخلت وبنبسر به شموع كبار من يمين الكهف وشماله مسرجات على طول الكهف ، ودخلت وانا بنذكر الله ، وكان قد الضوء ضعيف حق الكشاف اللي معلق في راسي من بعدا ما نكعت ، خرجت تلفوني وقلت اتصل لا اخي وابسر ما قد فعلو ، خرجت التلفون ومابش تغطيه ، قلت امري لله ودخلت ، لما وصلت لا عند الصاله الدائريه اللي فيها تمثال الاسد الذهبي وسط النافورة وعند ال١٣ باب ، بس اول ما وصلت لقيت التمثال ما عدبش له وجود ، وناس لابسين حاجات ساع البوالط السود ومغطيين لريوسهم وجالسين قبال نار ، وساع اللذي بيعبدوها ، وبه فوق كل باب بومة ، انا اول ما ابسرتهم ، نكعت بطوني للارض وما عاد قدرتش حتى اتكلم ، وما دريت الا وبومه بتبسر لاعندي ، اجي اركز على الباقيات وهن بيبسرين لا عندي ، والناس اللي كان جالسين قبال النار قدهم مسنبين وبيبسرو لاعندي ، وكلهم بنفس الملامح ، ملامح صالح حسين اللي شلوه الجن في الكهف ذيه ، وفجأه كلهم هجمو لا عندي بسرعة قويه ، انا غطيت على راسي وبنصيح مادريت الا وبه ريح حاميه قوي دخلت جسمي ، وشلتني للهوى وتضربني للارض ، وما دريت بنفسي الا وانا واقف من جديد في الغرفه اللي دخل فيها الجاهل ، وانا ماسك البندق بيدي وابسر جثث اخي قاسم وابن عمي واخو صالح حسين ممدده قبالي وكل واحد غارق بدمه ، وجو ناس من خلفي لابسين بدلات وبسلاحهم ، كتفوني وقالو ليش قتلتهم ،،،،،
لحظه ..لحظه يا عزي ، معي اتصال ..
_ هاه يا عمنا بشر ايش حصل ، لقيت اصحاب السيارات اللي قلت لك عليهم ،
_ ايوه يا يمني وصلت للممجمع حق الشقق السكنيه ولقيتهم ، وذلحين قد شليتهم معي ومتحرك طريق الفله ،
_ خلاص يا عم وانا شتحرك الان نتلاقي هنيك ، خاطرك ..

ابسرت لا عند الرعوي وقلت له دخلتنا في عالم ثاني ، ذلحين قوم معانا وعنكمل المجبر ، قال اين عتشلني ، اخي بلال قام مسك بيده وقله قوم ، وشلينا الرعوي وخرجنا من بيته ...

يتبع....

#في_بيتي
#يمني

#منيرالنقيب

#في_بيتي5
#يمني2 "البارت 16" والاخير من الفصل الخامس ....

خرجنا لا فوق السيارة ، قلت لا اخي بلال اتصل للخبره واديلهم الموقع حق بيت الرعوي ، يجو يشلو السلاح والمتفجرات من داخله ، قال حاضر ياخي ، بلال كمل اتصل ورجع يقل لرعوي ايوه يا عزي كمل قلنا ما عاد وقع الشجن قتلني ، والرعوي قال ، انا اول ما ابسرت اخي وابن عمي وصاحبنا ممددين وغارقين بدمهم اشتي انبع ابسرهم ، بس الرجال اللي جو كتفوني بالقوة وبنقلهم خلوني ابسر اخوتي ، وواحد منهم بيقل كيف تبسرهم وانت قتلتهم بسلاحك ، كنت اصيح بكل صوتي داخل المعهد ، وبنحاول اقاومهم وانا مكتف ، ما دريت الا بضربه قفى راسي لما فقدت الوعي ، صحيت وانا في غرفه ظلام مابش لها طاقة ، كنت ابسر ضوء خفيف من تحت الباب حق الغرفه ، وبنصيح ، ياااي ياخبره اين انا ، من انتو جابروني ردو عليا بحجر الله اشتي ابسر ما وقع باخي والخبره وبنزبط الباب الخشب حق الغرفه تيه صيحت لما شبعت بس محد سمعني جلست على رُكبي ويداتي وراسي عرض الباب وبنبكي ، وانا بنفكر هل معقوله انا قتلت اهلي صدق ، ولا هذا من افعال الجن طيب منهم الناس اللي حبسوني وبيقولو اننا قتلتهم انا ، ماشي .. ماشي ، مشو انا اللي قتلتهم ، وانا بنجابر نفسي وبنبكي مقهور وميت تعب بقعتي ما دريت الا وبه واحد في زوة الغرفة بيقلي ، يا مختار لا تحاولش ولا تتعب نفسك ، هولا بيتعاملو مع الجن وهم اخبث منهم ، انا على طول افتجعت ولتفت ورايا ابسر من هو هذا اللي بيجابرني وما دراه ايش اسمي ، بس الغرفة ظلام مقدرش حتى ابسر يدي ، سنبت وبنقل من انت ..من انت ؟ ما دريت الا وهو بيكح وبيتكلم بصعوبه ، اذا معك شوية ماء اديت لي ابل ريقي ، قربت دلا..دلا لا عنده وانا بنتعسعس في الهوى بيداتي وارجلي ، وصلت للجدر اللي في زوة المكان وبننزل يدي على الجدر ومسكت مسمار كبير ابو حلقة مثبت في الجدر وعليه سلسله مسكت السلسله ونزلت يدي وجلست واكتشف انهم مقيدين الرجال في تيه الغرفه بين الظلام مسكته من ضهره وهو بيسعل بقوه وبنقله من انت يا اخي وليش محبوس هنيه مافعلت ؟ قال انا صالح حسين .... قمت على طول من جنبه وقد سنبين شعر راسي وقلت له ممماههو ممن انت ؟!!! صالح حسين ... كيف لما ، وقدلك مختفي عمر وشلوك الجن لما نزلنا الكهف ، وقد صلينا صلاة الغائب عليك قصدنا اننت ميت طيب ليش انت محبوس هنيه لمه حبسوك عيال الكلب ؟؟ قال قلت لي من انا وقلت لك من انا اما ليش انا محبوس هنيه انت عتعرف من نفسك ، وهنيه عتحدد مصيرك توافق او ترفض واذا رفضت عيوضعو لك بقعه في الزوة الثانيه ويصلو عليك اهل القريه صلاة الغائب... ورجع يقول كلام غريب مفتهمليش وشويه يضحك ويداهفني من جنبه ، افتهم لي ان قد الرجال التذع له الفيوز وعقليته مشي متزنه ، قد جننوه عيال الكلب ،
رجعت اجابره بس ما كان يرد عليا ويتكلم مع نفسه بشكل سريع ولهجه مش مفهومه ، وكأنه بيتخيل اشخاص جنبه وبيجابرهم ، وكل شوية يكح ،، رجعت لا عند الباب بنرزوعه وبنصيح افتحو الباب ادو لنا حتى شوية ماء الرجال عيموت يا كمن هين ، بس محد رد عليا ، جلست عند الباب ورزحت ضهري عليه ، وكل شويه اجابر صالح حسين بس ولا كان يتجاوب معي ، شويه كأنه بيكلم ناس مهمين بلغه عربيه فصحى ، وشويه كأنه بيلعب مع جهال صغار ، كنت اتمنى اننا في كابوس ومنتظر ايحين عيكمل ، كان الثانيه مثل ساعه واليوم مثل شهر ، وانا جالس في غرفة ظلام مع مجنون ، ومشنا داري ليش محبوس هنيه وبنبسر لصالح حسين مراعي ايحين عيموت من كثر العطش وبعد يومين او ثلاثه ايام مشنا متاكد لان في تيك الغرفه ما تدراش ايحين الليل وايحين طلعت الشمس ، و الريحه في الغرفه قدهي شوعه قوي، صالح حسين كان يتبرز ويبول في مكانه ، وفوق هذا بنهم اخي وابن عمي واخو صالح حسين ، من قتلهم ، وكيف عتكون نهايتي ، كان باقي لي شويه واجنن ، ما دريت الا لما افتتح الباب حق الغرفه ،،،،،
لحظة ..ولو شا اقاطعك من هنيه مضطرين نغطي عيونك ، يا بلال غطي عيون الرجال ، وبعدا عنكمل المجبر معه ، الرجال قال لا تغطوش عيوني يا منعاه ، قله بلال ضروري وغطى عيونه ، وقع اتصال لا تلفون بلال ...
_ الوه ..هيا ما فعلتو ؟
_ خلاص قد نظفنا البيت وشلينا منه كل شي . وحتى المعابر اللي في الشارع شليناهن واخفينا اي اثر يدل على وجودنا في الموقع ذيه ..
_ حلو ، شلوهن للمخزن ، وكل واحد يرجع لمكان عمله ..
_ حاضر ..

اقتلب بلال لا عندي وقال تم الموضوع يا يمني ، ذلحين ما عنفعل ، قلت له اصبر لما نوصل لا عند عمنا وشرجع اجابرك ، انا قد في راسي موضوع واشتي اتحقق منه ، وصلنا للفله حق عمنا وطرقت اربع مرات وافتتح الباب ودخلنا ، قلت لبلال ينزل الرجال للبدروم ويدخله في غرفه ، ويدي له عشاء وكل ما يحتاج ويقفل عليه ، وانا طلعت لطيرمانه عند عمنا ، دخلت وهو مخزن في بقعته ،اول ما ابسرني قال ارحب يا يمني ، قلت له وريحهم ، قال وهو بين الريح هيا اجلس ، وقالي من وين تعرف الناس هولا وكيف لما وصلت لهم ؟ قلت مشو انت وحدك يا عمنا اللي

بتشتغل ، وضروري كل واحد يتحرك من جهته على سب نشتتهم ويدرو ان احنا اقوى منهم ، بس ضروري ان احنا نتحرك بشكل منظم ، قال حالي قوي وقد طريقة تفكيرك بتكبر بطريقة بتفاجأني ، فلذالك شعتبرك الكل في الكل والأمر الناهي ، بما ان معك خطه مدروسه ، قلت له الله المستعان يا عمنا انت الاستاذ حقي ، بس ذلحين قلي ايش اللي عرفته من الجماعة اللي مسكتهم ، قال شكلهم تنظيم كبير ، ومنهم اثنين اجانب وواحد يمني ، كان معاهم اجهزه استخباراتية ولابتوبات شليتهن وفي الطريق اقدار فعلت لي رساله ( عيلاقيك سليمان في الطريق ادي له الاجهزة وتلفونات الجماعه اللي مسكتهم ، وانت ويمني حققو معاهم وابسرو لين عتوصلو ) ... قلت له وليش تسلمهن يا عمنا ليش ما تكلمني ، قال لا تنسيش ان سليمان واقدار هم اخوتك واحنا بنشتغل في نفس الطرف ، قلت له سابر يا عمنا، بس المفروض كنت تبلغني قبل ما تسلمهن ، عمنا ضحك وقال مسرع دخلت الجو وقدك الزعيم ، قلت له خير ، طيب وابي محمد كيف قد صحته ؟ قال مدري ما قد سألتش عنه ، قلي انت كيف بنتي وكيف بنتك ، قلت له قد بنتك تواصلت معك قال ايوه الحمد لله مشنا مصدق انها فاقت من الغيبوبه ، قلت له بنتي الحمد لله بس ابسرتها وهي راقده ، لكن سهل اكمل عملي مع الجماعه واسير ابسرها ، بس الرعوي اللي انا مسكته لقينا في بيته اسلحه ومتفجرات ، وشكله متورط معاهم غصب عنه ، وقد جابرنا شويه من قصته ، ومن رأيي نسمع منه باقي قصته على شان نفهم طريقة عمل الجماعة تيه وماهو هدفهم ، عمنا قال حلو والجماعة اللي انا اديتهم ما قد حققتش معاهم ،محبوسين نازل في غرفة عازلة ولا يمكن احد يدري اين مكانهم ، حتى لو كان مغروس في اجسادهم جهاز تعقب ، طيب يا عمنا ، والرجال اللي هو اصبع من عصابة اصابع القبضة ، ما عتفعل معه اقدار وهل قد حققت معه ، ولا ايش الوضع المناسب لتعامل مع امثاله ، قال مشنا داري ، بس لو انا مكانه شتمنى ان احد يدخل يحقق معي ، لاننا وقتها شعرف من اللي حاجز لي وماهو هدفه ، قلت له يعني اقدار قدهي اخبر بهم بس ضروري اتواصل معاها ، عمنا قال اقدار محد يقدر يتواصل معاها من صغرها ، هي اللي بتتواصل معانا وتقدر توصل لنا في اي وقت ومكان ، قلت يعني مابش طريقة اتواصل معاها ، قال مابش ، قلت ايوه والخبر وكيف نفعل ... ما دريت الا واقدار فعلت لي رساله ( انزل وحدك انا منتظره لك امام الفلة ، وخرج بسيارتك ) ... قمت على طول وعمنا قال الين ؟؟ قلت لا عند اقدار فعلت لي رساله ، قال تمام ، وما نفعل مع هولا؟؟ قلت له خليهم لما ارجع اكيد اقدار قد وصلت لشي ، خاطرك ...
نزلت سريع من الطيرمانه وطلعت فوق سيارتي اول ما الحارس فتح الباب وقدنا شخرج ما دريت الا واقدار واقفه امامي في الشارع ، جنب الباب من خارج ، فتحت باب السياره قدنا شنزل لا عندها ، بس أشرت لي بيدها اجلس مكاني وجت طريق السياره وركبت قدام جنبي ، وقالت امشي ، وتحركنا بالسيارة ، وقلت لها لين عنسير ، قالت اشتي الوي شويه واتكلم معك ، اجلس سوق وبس ، وانا جالس اسوق وهي ساكته وانا ساكت وبنبسرها وهي بتتبسر من الفريم حق السيارة لشوارع والسيارات وكأنها طفل اول مره يخرج لشارع ، وبعد ١٥ دقيقه وهي ساكته وانا قدنا في شارع الستين بنمشي ، ما دريت الا لما قالت وهي ملتفته لشارع بتبسر السيارات،،، ( احلى شي في الشعب ذيه والمنفرد فيه ومتميز ، ان الشعب هذا يعتبر جيش كامل ، كل فرد منهم بيعشق بلادة بخلود ، يعني حبه لليمن حب مخلد ما ينتهيش ، ابسر يا يمني كم للبلاد تيه في حروب وكم حاقدين وانذال ومندسين حولها يشتو يخربوها بس ابسر الشعب ما بيفعل رغم معاناته ، منظمين في الشوارع شوف كيف بيسوقو سياراتهم الخط السريع والمتوسط وخط النقل الثقيل وكل واحد ماشي في خطه بدون رجال مرور او رجال تنظيم ، ابسر كيف الشوارع كلها مسرجه من حساب من ؟ من حساب الشعب نفسه ، كل واحد سرج مكانه ، لما نورت صنعاء مابش شغب او عصيان او افراد بسبب جوعهم وفقرهم ينقلبو ويفعلو عصيان ويخربو هنيه وهنيه ، مش خوف منهم ،،ماشي تقدر تقول حرص وخوف على بلادهم بس لكن بلاد الخارج اللي بيدعو النظام والامان ، اذا حصلت مظاهرات او عصيان ، على طول يبدأو في النهب والتخريب ، وبشق الانفس تقدر حكومتهم تتلافى الموضوع ، فعلا شعب حكيم بس وأفعالهم تدل على هذا ، اما اذا لقيت مخربين او من ينشر الكراهيه ، هولا هم اذناب من بيسيطر على البلاد تيه ، يوصلهم الكبر والغرور لمرحلة الخوف والشك من كل شي ، فينشرو مثل هولا وسط الشعب يسمعو ما بيقولو الناس ، وهولا هم اللي بيخربو سمعت الشعب وهولا هم اللي لهم يد وصول في نقاط كل التواصل الاجتماعي ، ومن هنيه يا يمني ضروري تعرف ان الكرسي قده جالس فوق صاحبه وابليس جالس فوق الكرسي ، شدي لك يا يمني قصة مصغره ، كان به مزارع ومعه جنه ، رزقه الباري بثلاثه جهال ، ولما قدهم رجال المزارع ادى لكل واحد من عياله ثلث في المزرعه ، وقال كل واحد يرضي بالرزق اللي قسمه الله له ، وانتو اخوه كل واحد يوقف مع الثاني ،

انتبهو تغترو او الشيطان يعظم حبكم للمال ، لا تنسوش ان هذا حق الله ، ومن عيحيد منكم ويتبع الشيطان شحرمه من حقه ، وكل موسم اشتي منكم المعلوم حقي ، وكان رجال قوي وشديد وصارم في امره ، وجهاله بيخافو منه ويسمعو كلامه ، فبدأو يشتغلو كل واحد في حقه ، فكان الاثنين الاخوه الصغار شياطين ، كان يبيعو من محصولهم ، ويسرقو من محصول اخوهم الكبير ويدوه لا ابوهم ، فكان الاخ الكبير ، بيلاقي صعوبه في انه يدي المعلوم حق ابوه ، مع ان محصوله كان الاكثر بسبب كرمه وصدقاته ، ومرت الايام ومات الاب ، وعياله كان كل المحصول لهم ، الاخوه الاثنين الصغار كان يبسرو محصول اخوهم اكبر ، وثروته بتزيد ، مع ان كلهم متساوين في القسمه ، فقررو الاخوه الاثنين يمكرو ويفعلو على ما قلهم الشيطان ، قال الاخ الاوسط للاخ الصغير ، انا وانت عنفعل خطه ضد اخونا الكبير ، ونشل محصوله بدون ما يدري ، قال الصغير كيف عنفعل ، قال انت عتسير لا عند اخي الكبير وانت بتبكي ومتظلم اننا ضحكت عليك واغويتك واشتريت منك نصيبك ، وبعد ما اشتريت نصيبك طردك من عندي ، اخونا الكبير عيجي يراجعني وينصحني بس ما شسمعش منه ، ولانه رحيم عيرحمك ويقلك اشتغل عنده ومش بعيد يدي لك نص المحصول حقه ، وانت اثناء شغلك عتكون تسرق من محصوله لا عندي ، وكذيه بعد سنين اخونا عيفقر ونطرده من المزرعه وتكون المزرعه لي ولك ، الاخ الصغير قال فكره شيطانيه ،خلاص متفقين ، وفعلو ما خططو له ، ووافق الاخ الكبير يحتوي اخوه الصغير ويعيش من خيرات المزرعه ، بس الاخ الصغير كان يسرق من محصول اخوه الكبير ويشله للاخ الاوسط ، وكان كل شويه يدخل اخوه الكبير في مشاكل وديون ، لما فقر الاخ الكبير وكان يضطر كل سنه يزرع في مكان اصغر من اللي قبله ، لما وصل الاخ الكبير لأطراف المزرعه وبالكاد كان يوفر قوت يومه ، اعلن الاخ الصغير عن قرونه الشيطانيه واتضح للاخ الكبير ان اخوته كادو به وفعلو به كذيه بعد ما انهكو كل ماله وصبرة وقوته ،، وللان الاخ الكبير ما زال متمسك بيداته على تراب المزرعه تيه وقدهي صحراء قاحله ومش راضي يبيع قسمه لاخوته رغم جوعه وفقره ،،، ذلحين يا يمني ، انت داري ان الشعب هذا هو الاخ الكبير ،،،، اسمعني انتبه يسحبك الشيطان في طريقه وتضن انك في طريق الحق ، كل شويه الجئ لله وهو عيدلك على الطريق الصح وانتبه تزعل مني مهما حصل فكر في كل شي اكثر من مره قبل ما تصدر قرارك ، انا شنزل هنيه ) ، وطرحت في يدي مفتاح غريب وعجيب وقالت وقف السيارة ، قلت لها خليني اوصلش ، قالت خلاص وقف انا وصلت ، ونزلت ، وانا كملت طريقي ، ومستغرب من كلامها وليش بتكلمني كأنها بتودعني ، وليش قالت مزعلش منها ، وليش ما خلتنيش حتى ادي لها كلمة واحده ،وانا بنجابر نفسي ما دريت الا وتلفوني بيرن ...
_ حيا بحقي القمري كيف انتي يا مره والله ان قدنا فاقد لش قوي ..
_ حيا يا يمني فديت روحك ، ذلحين اسمعني ..
_ خير يا روحي مالش بتبكي وصوتش كذية ...
_ جي يا يمني للبيت البنت سلى قامت من النوم ، وواقفه قبال الجدر وبتهز راسها بطريقه غريبه قوي ، بنحاول اجابرها واسحبها بس ما رضتش انا مفتجعه قوي قوى جي يا يمني ...
_ ما قلتي ... كيف ... صيحي لجدتي تجي تبسرها انا الان متحرك لاعندكم ،،،

قفلت التلفون وطرحت رجلي على السيارة وكنت امشي وانا مغلق الطبلون ، وبنفكر في كلام زوجتي ، كيف قالت بنتي بتهز راسها وواقفه ، يعني بتفعل نفس الحركات حق اقدار طيب ليش واقدار قالت انها لحقتها قبل ما يفعل بها المخترع شي ، يو يالله لا عاد يكون اقدار فعلت ببنتي شي ، وما كرهن وصلت للفله . نزلت وطلعت جري ، وابسر زوجتي جالسه بتبكي في الارض وجدتي طارحه يدها فوق ضهر بنتي وبتحاول تجابرها وابسرت بنتي وهي واقفه امام الجدار وراسها مرفوع لسقف وبتهز راسها بنفس الطريقه حق اقدار ، على طول جلست على رُكبي للارض وقد دقنتي مبلوله من دموعي ،، ووصلتني رساله من اقدار ( كن كريم تُكرم ... وكل شي مقدر ومكتوب من الله ) ....

يتبع....
اتمنى ان الفصل الخامس من الروايه نال اعجابكم ، وكل متابع يقل رأية ، وان شاء الله نلتقي في الفصل السادس والاخير لرواية في بيتي ..

#في_بيتي5
#يمني2

#منيرالنقيب

#في_بيتي6 "والفصل الاخير من الرواية"
#يمني3 "البارت الأول"


ايوة ..ايوة يابلال تحرك انت وعمنا ، من الخلف ،وانا ومعتز من داخل، قد بلغتني اقدار بالمعلومات اللازمة ،وانتظرو اشارة مني لدخولكم للقصر ، وانتبه يا بلال انت وعمنا مشتيش احد يهرب منهم حتى السواقين ، ورجال الاعمال حقهم ، واشتي الكبار برواحهم ،تمام ...
_حاضر يا يمني ما تقلقش كل شي منظم وتحت السيطره مثل ما أمرت بالضبط ...

كملت اجابر بلال ، وانا بنشوفه امامي مباشر عبر لاصق صغير شفاف يطرحوه تحت الاذن اليمين تقنية اتصال تربط الجهاز العصبي كله تخليني على اتصال مع كل شخص لابس لمثل اللاصق ، ايحين ما اشتي ، غمضت بعيني مرتين وانهيت اتصالي مع بلال ، وفكرت بعقلي اتصل لمعتز ، وظهر اسمه امامي ،غمضت مره واتصلت ل..معتز ،،،
جاوبني وهو واقف في غرفة الاجتماع والكرسي حقي امامه ، وبه اربعة من الزعماء الكبار واعتقد ان بينهم واحد اصبع من اصابع القبضة الاساسيه ، جالسين وكل واحد واقف خلفه حارس شخصي بيحرسه ، ومعتز على اساس انه الحارس الشخصي حقي و بيجابرني بدون صوت مسموع او يحرك شفايفه بيكلمني بافكاره لانه مركب نفس الاصق تحت اذنه .. أيوه كلنا متصلين بتقنيه عادهي في عقول الاغلبيه شي اكبر من السحر ،،،( ومش كل شي ضروري نتعلمه من فلم او اعلان على شان نستوعبه ...)
_ايوة يا يمني ، معك .. بدأو يقلقو من خرجوك في وسط الاجتماع ، واليهودي بدأ يسأل الخليجي الذي جنبه وقله اين خرج يمني , والخليجي قله مدري ، فبدأ اليهودي يحذره يا خذو حذرهم..
_ لا تقلقش يا معتز قدنا جايي وقريب من غرفه الاجتماعات ، وبعدا محلاك قد بتفهم لغة اليهود ..
_ ايوة .. يا يمني كان ما رئيك ، اللاصق ذيه دخل في راسي كل لغات العالم ..عيبارك في أقدار عالم ثاني لحاله ..

وصلت وزبطت الباب حق غرفة الاجتماعات ، ودخلت على طول والمسدس في يدي ضربت على الرجال الواقفين اللي بيحرسو اصابع القبضه ، انا قتلت اثنين ومعتز قتل اثنين ، على طول الاربعه تبع عصابة القبضة وقفو من فوق الكراسي وهم مفتجعين ومش مصدقين اللي بيحصل امامهم ، وكيف قلبت عليهم فجأه ،وكل واحد بيحاول يتصل بالحرس تبعه ، ورجال امن الدولة ، وانا ومعتز موجهين السلاح لا عندهم وقدهم كلهم واقفين في الجدر ،
ما دريت الا واقدار ظهرت امام عيني اتصلت لي عن طريق الاصق ، وابتسمت لي ، وقالت لا تقلقش شوشت كل اجهزة اتصالهم ببعض وحتى شوشت موقعهم الحالي ، هم تحت تصرفك وانهت الاتصال ،،،
وانا بنبسرهم قلت ، ايوه من كبيركم لا صغيركم عندكم نفس العقليله ونفس الخوف ونفس الكبر ، تنسو حتى الاهتمام بمن بيحرسوكم ، وقبل ما يستوعبو ايش اللي بيحصل وكيف تم الموضوع كله ، غمضت عيني مرتين وتم الاتصال.. لبلال اخي وعمنا،،
_ اقتحمو ،،،

وافراد العصابة مستغربين كيف دخلت عليهم بالسلاح وكيف اخفينا السلاح واين حراسهم وعسكرهم ، ما درو الا وطلقات الرصاص بيسمعوها من كل بقعه ، ودرو انهم داخل كمين وقدهم متورطين لا عاد قدرو يتصلو ، ولا فاهمين ما بيحصل ، والخليجي ابتعد من حضن اليهودي وقال ، يا يماني ترى انت بتلعب لعبه ما انت قدها ، وانت تعرف الفلوس تشتري كل شي ، وسبق واشترينا كل شي حتى بلادكم ، قربت لا عنده وندعت له ملطام بقفى يدي لما اطرح للارض وطار عقاله لا تحت ارجل اليهودي ، وقلت له طيب ومالك ما تشتري رجاله وناموس لنفسك ، وابسرت لا عند معتز ، وقلت له اذا التافه هذا فتح فمه مره ثانيه ، اشتيك تطفيه قبل ما يكملها ، ومعتز وجه مسدسه لا عند الخليجي ، الخليجي ابسر معتز وافتجع ورجع قام لا حضن اليهودي من جديد ، وفجأه دخل عمنا وبلال ، وخمسه من رجالنا بعدهم ، وكل واحد مسك فرد من العصابه ، وقلت لهم طلعو كل واحد فوق سيارة ، وكل واحد يمشي من طريق مختلف ونلتقي في نقطه الالتقاء المتفق عليها ، كتفوهم وغطو عيونهم ، ومعتز بيحرك شاشه هليوم امامه باستخدام اثنين خواتم في كل اصبع من اصابع يداته ، اصبع السبابه ، وبيقوم بنسخ كل ما يوجد في الغرفة تيه بالتفصيل ، وكأنه بينقلها بأثاثها وجدرانها وكل ما حصل فيها ، ومعلوماتها ، لا ذاكره الخزن عنده ، وخرجنا من القصر اللي اجتمعنا فيه طبعاً القصر خلفة قاعة كبيرة وكان فيها عدة فنانين وفعاليات ترفيهيه ، والناس بيحتفلو ساع المبنجين ، ايوة بيقربو من الاماكن تيه على شان لفت النظر ، المهم بنبسر جماعتنا كل واحد مطلع لكل فرد من عصابه القبضه فوق سيارات مختلفه ، اللي منهم فوق هيلوكس غمارتين واللي منهم فوق دينه واللي منهم فوق تكس ، وطلعت انا ومعتز فوق سياره ، وعمنا وبلال سارو مع اللي بيوصلو افراد عصابه القبضة ، غمضت عيني مره وتم الاتصال بأبي ،،،
_ هاه يا اباه انت في الموقع ، احنا بعد ١٢ دقيقه عنكون عندك ،
_ ايوه يا يمني انا في الموقع ومجهز وسيلة النقل ، لا تقلقش ،،

قبل سنه...

يوه يالله سترك ماوقع ببنتي ، قمت من بقعتي جنب الباب وجريت لا عند بنتي وهي بتهز راسها امام الجدر بتفعل نفس الحركات حق اقدار ومرتي وجدتي بيبكين جنبها ،
وصلت حضنت بنتي بقوه اول ما ابسرتني طرحت يدها في خدي وقالت باباه وفقدت الوعي ، كنت اصيح بكل صوتي ياااسلى وبنحاول اهزها ، ابسرت لاعند المره وقلت لها ادي لي شوية ماء او عطر ، وشليت بنتي لا فوق السرير وبنحاول اصحيها بس ما صحيتش ، خرجت تلفوني اتصلت لدكتورة فرح تجي ، وقلت لجدتي والمره اجلسين عند البنت لما توصل الدكتورة واذا البنت صحيت اتصلو لي ، المره قالت وانت اين عتسير يا يمني ؟ كيف عتفلتنا والبنت في هذا الوضع ، طرحت يداتي في اكتافها وقلت لها ، ما بش حل الا اننا اسير لا عند المسبب في وضع بنتي لا تقلقيش انا داري ما بنفعل ، وشليت نفسي وخرجت لا وفوق السيارة شغلتها وخاطي طريق الموقع السري حق اقدار ، وانا بنفكر ليش اقدار فعلت كذيه ببنتي ، ما دام وهي قالت انها انقذتها من المخترع قبل ما يفعل بها شي ، يعني انقذتها وفي الاخير هي اللي تفعل ببنتي كذيه ، خرجت تلفوني اشتي اتصل لعمنا ، اقله نلتقي امام الموقع حق اقدار ، بس اول ما خرجت تلفوني اتفاجأ ان تلفوني رجع شاشة سوداء لا رضي يتصل او يفعل شي وكأنه حرق ، رجعت اقول الا هي اقدار اللي فعلت ببنتي كذية وذلحين بتحجب عليا الاتصال ومسيطرة على نظام التلفون حقي ، رجمت التلفون لا فوق الكرسي اللي جنبي ، وطرحت رجلي على دعسة السيارة ، وانا قد بنفكر اننا اوصل واقتل اقدار ، وصورة بنتي سلى وهي بتهز راسها، واقدار جنبها بيفعلين نفس الحركة في راسي طول الطريق ، ذكرت ان اقدار ادت لي مفتاح قبل ما تنزل من عندي ، بنفت نفسي بس مالقيتش المفتاح ، فجأة وانا في شارع مجاهد ، ابسر قبالي سيارة راف فور واقفة نص الخط وبابها مفتوح وفي الارض جنب الباب به مره ممدده ، وقفت السيارة حقي ونزلت على طول وخاطي طريق المرة المرجومه في الارض ، وبنخطي دلا اشتي استوعب ايش حصل للمره تيه وما خرجها من سيارتها وهي فاقده للوعي ، اول ما وصلت لا خلف سيارة الراف فور ، ما دريت الا وما يقارب عشرين شخص خرجو من الشوارع الفرعيه حق شارع مجاهد ومن خلف سيارات مجنبات جنب الرصيف ، ومن ابواب بعض المحلات ، وكلهم مقنعين ولابسين ميري اسود وموجهين سلاحهم لا عندي ، حوطو عليا بشكل دائري والمره اللي كانت ممده وقفت وفي يدها سلاح ، وابسرتني وانا طارح ليدي في خصري اشتي اخرج المسدس، وبنتلفت يمين ويسار بنبسر العسكر ، والمره قالت يا يمني مابش داعي للمقاومة سلم نفسك احسن لك ، وانا جالس افكر من هم هولا ومن المره تيه وماهو الكمين هذا اللي فعلوه لي ، وعادنا بنجابر نفسي يا يمني خرج المسدس وقاوم انتبه تسلم نفسك للانذال هولا ، اول ما خرجت مسدسي ووجهته لا عند المره ، ما دريت الا بضربه بقفى السلاح في راسي لما اطرحت للارض ، وما يقارب اربعه من العسكر نبعو يكتفوني وانا ممدد وباقي العسكر واقفين حولي بشكل دائري وموجهين اسلحتهم لا عندي ،اللي ماسك رجل واللي ماسك الثانيه واثنين طارحين رُكبهم فوق ضهري وماسكين ليداتي ، والمره قربت لا عندي وقالت عنيد وكنت متوقعه اننت ما عدسلمش نفسك ، وانا بنحاول احرر نفسي من العسكر وبنبسرها وانا ممدد في الارض وقلت لها من انتي ، تبع اي شيطان انتي وماهو هدفش ومنينه تعرفيني وتعرفي اسمي ، ما دريت الا لما خرجت ابره وجلست جنبي وضربتها في كتفي ، وابسرت لا عند العسكر وأشرت لهم يشلوني ويتحركو ، ما دريت الا وكل عضلات جسمي رخيت وما عاد بنقدرش اتحرك وجفون عيوني رجعت ثقيله وتشتي تغمض ، حسيتهم وهم بيرفعوني وبنحس وجع في خدي تحت دقني جرحتها في الازفلت وانا بنحاول اقاومهم ، بس ما بنقدرش اتحرك ، ورجموني لا فوق باص وطلعو ما يقارب خمسه عسكر ، واتحركو ، وانا قد بنفقد الوعي شويه .. شويه ، وبنقل اكيد هذا من فعل اقدار ، كيف درو اين انا او اين موقعي ، واقدار قالت لي انها مخفيه للموقع حقي وما خلت احد يتعقبني طول فترة حربي مع عصابة القبضه ، طيب كيف عرفو اين انا ؟ اكيد اقدار باعتني لهم ، ما تشتيش اوصل لها وانتقم منها بما فعلت ببنتي سلى ، وكان صورة سلى بنتي امام عيوني وميت قهر عليها ،وانا بنجابر نفسي ، فقدت الوعي ، ويداتي مكتفه لا خلف ضهري ومرجوم على وجهي فوق الباص ومغطيين لراسي بكيس اسود ...

يتبع...

#في_بيتي
#يمني

#منيرالنقيب