tgoop.com/omeralfki/1995
Last Update:
.
جمعة ، و حرْب ، و غيم ، ياطيف عليَّ اجتمعو
وجور الرِّيم ، وشوق قلبي المتيَّم وطمعو
يا مولانا أشهد ، والذين استمعو
انا جنِّيت وكت شفت المدامع لمعو
صعد المنبر الشيخ بي خشوع متبتِّل
والناس سارحة في حبال الفكر بتفتِّل
انا يا طيفها قلبي الفي ضلوعي بنتِّل
آسرو الطرفو مكتول الجفون و بكتِّل
في عزَّ خطبتو الشيخ في حديثو اتأنَّى
وطَّى الصوت وكت لاحظ براهو بأنَّ
نظر الناس موجَّه فوقي كلَّو لأنَّ
مما لُحْت لَي ياطيفها سِمعو الأنَّة
الشيخ انفعل ، نَهَر الجماعة ارتعشو
واحدين خوف ، وناس بالطَرفة ساي انتعشو
عبَّادي الخريف اللبَّس الصيف نعشو
كان يا طيفها عندي احساس بجيبك دعشو
انا يا طيفها راجيك من زمان اشكيلك
انا ياطيفها صبرى اتلاشى الله وكيلك
انا يا طيفها من وجعي السحاب ببكيلك
اقعد جنبي ياطيف المها انحكيلك
انا ياطيفها اوجاعاً علي ما جداد
كتير السقتو من حِن قابلو استبداد
انا وصِّيتلها الطيف الحنين بي وداد
وستَّك وصَّت الوجع العلي يزداد
انا يا طيفها اوجاعي العليَّ بَكَتني
ابيت اتشكَّى جات الشكوى زاتا شَكَتني
انا سنِّيت سنن في الريدة ياما حَكَتني
ستَّك سانَّة سكِّين الفراق وتَكَتني
انا ياطيفها هِن ما ردتها ان فايدتي ؟!
ريدها شقايا في الدنيا وعقب عايدتي
انا رايدها ياما دعيت تكون رايدتي
ستَّك تدعو في الاوجاع على مايدتي
انا ياطيفها بس فاضلِّي منها سِتَّة
شوق ، وحنين ، ودمع ، وأنين ، و وجد ، وجِتَّة
انا ختِّيتا من دون البشر في حِتَّة
ستَّك ختَّتت للقسوة أجمل خِتَّة
أنا يا طيفها ... أنا يا طيفها ... أنا عافيلا
هي التعفالي والتصفالي وانا صافيلا
وان بقى صدَّت اسه وريدي ما مكفيلا
انا يا طيفها روحي المارقة الله كفيلا
..........
عزام عبد العاطي طبعا
BY سر البوح
Share with your friend now:
tgoop.com/omeralfki/1995