tgoop.com/ooo313h/5648
Last Update:
مولد السيده رقيه
.
.
.
يگلب وروح الحسين .. رقيه رقيه
يبعد اعيوني الاثنين .. رقيه رقيه
***
يحــوريه حسينيه .. مقاماتچ سماويه
وصفاتچ كربلائيه
يأطهر بذره
عظيمه ياعظم قدرچ .. زغيره ومحد بكبرچ
يالمحير البشر امرچ
يروح الزهره
ليس كمثلكِ شيءٌ رقيه
لحسين ابو اليمه اجت هديه
كأنك الراضيه المرضيه
يشمس الله وتضوين .. رقيه رقيه
يبعد عيوني الاثنين .. رقيه رقيه
***
ينور ابيت ابو اليمه .. ينعمه وبحظن نعمه
عطرچ لمن يشمه
يذكره ابامه
رقيه وشحلات اسمچ .. ابو فاضل هتف عمچ
وتدنالچ ايشمچ
ياعذب كلمه
ايگلچ فدائچ عيني وي چفيني
مو للنهر لا للسمه وديني
تحت امرچ وانتي امر امريني
همس بأذنچ كلمتين .. رقيه رقيه
يبعد اعيوني الاثنين .. رقيه رقيه
***
ضيائج بالسمه ازهر .. وشع ابيت ابو الاكبر
جبرائيل اجه وكبر
يريد ايطوفچ
اعله مهدچ طاف جبرائيل .. بالتسبيح والتهليل
جاب امن الجنان اكليل
اعله شكل حروفچ
روح القدس هوه حچاها اواثق
الوالدها ابو اليمه بجماله الخارق
الشاهد جمالچ صاح جل الخالق
ضيائج ماله تخمين .. رقبه رقيه
يبعد اعيوني الاثنين .. رقيه رقيه
***
رقيه انجازچ اشكبره .. يحره وبنت اخو حره
احير شما ردت اقره
بصفاتچ اتعب
يمن عمچ ابو فاضل .. نحذر الرايد ايجامل
ذليتي جمع كامل
كـ عمتچ زينب
اكبر عتيد وطاغيه ابلا ذمه
ايزيد الكثير اعقول عفنه اتقدمه
جدمچ رقيه ابقصره فركت خشمه
نطاچ الله تمكين .. رقيه رقيه
يبعد اعيوني الاثنين .. رقيه رقيه
***
الغاص ابهالبحر يتعب .. ينسخه ثانيه الزينب
عجيبه انتي والاعجب
صفاتچ جمه
صحيح العمر بس خمسه .. وفن تاريخهم ينسه
يعمه الي نسه شمسه
مؤكد يعمه
لو ماوجودچ چان ماچان الطف
شي كمل الشي انتو مثا المصحف
نور الله بيكم وابد مايتوصف
ونهايتها بكلمتين .. رقيه رقيه
يگلب وروح الحسين .. رقيه رقيه
***
#حيدر_تركي_الكربلائي
『نسأل من الله القبول و نسألكم الدعاء 』
تابعونا علىٰ قناة القصائِد الحُسينية
معرف القناة للأشتراك @ooo313h
اللحن⬇️⬇️⬇️
BY قصائِد حُسينية 🇮🇶
Share with your friend now:
tgoop.com/ooo313h/5648