يـاغريـب الكـاظميـة الكـاظميـة
ليلة وداعك مصيبة أعله البريه
أحنا المعزين يابو الجوادين


1
عادت علينه الليالي الموسوية
وللمصاب أتحضرت أهل الحمية
المواكب ناحت ونصب عزيه
الليلة أصعب ليلة بأرض الكاظمية

يامدرك الحيارى
دم الدمع تجاره
والقبة والمنارة
ناحن سوية

ياقلب يصبر يغالي بهل المصيبة
والحضرلك منه تسمع بس نحيبه
ندري الدمع دين يابو الجوادين



2

الليلة وي زوارك تنوح الحزينة
وعتنت ياسيدي من المدينة
أنت جسمك عالجسر باقي بانينه
ويلي ثلث أيام ماواحد يعينه

ويلي علّى مصابك
ضاع بسجن شبابك
وتحملت عذابك
والله هضمية

كل حياتك خلصتها بلايه راحة
تالي عمرك يكضي صبرك وي جراحة
وموتك أجه الحين يابو الجوادين



3

كل سنة من القبة يتبدل لوانه
وبالصحن يابو الرضا نبدي عزانه
والله ماننسى ابد هاي الأمانة
أن شاء الله تجمعنا والمهدي معانة

من يحضر بونينه
وبدمعته الحنينة
أينادي جدي وينه
بالكاظمية

جنازتك يحضنها ويشيعها بيده
وخلفه من ذاك الجسر تنحب عبيده
وصوت الملايين يابو الجوادين



4

أنت عمرك بالسجن كله كضيته
والسلاسل بيدك ودمعك جريته
من حديد الجامعة ظهرك حنيته
والفرج تنتظره وبموتك لكيته

والله يموسى حيره
أنت بلا عشيرة
وادم بلايه غِيرة
يارحمة الله

ضنهم بموتك طفت ثورة ظماير
مادروا قبتين إلك وأربع مناير
خل نتظر العين يابو الجوادين



5

كل عذاب الدنيا بجروحك حملته
وضيم أشد من ضيم شفته وهم جرعته
غربتك هم تشبه حسين وغربته
لجن ماتشبه مصابة ولاذبحته

حسينك بلا مناصر
حسينك بصدره حافر
حسينك يموسى حاير
حزو وتينه

أنت شالوك بنعش ذيج الظهيرة
بس أبو اليمه أنجمع جسمه بحصيرة
دلاله نصين يابو الجوادين


6

بعد ياهم ياحزن عنك نكوله
وأنت موتك ابكه للزهرة ورسوله
إلي سَمّك ماملك ذرة رجولة
من بعد موته عقاب الله ينوله

يابو الرضا عجيبة
بينه ترك مصيبة
يالجثتك غريبة
بجسر الرصافة

يا أمام الرافضة مصابك فجعنا
يابو طلبة وروحتك ذبحت قلبنا
لتظنه ناسين يابو الجوادين

بغداد
امجد صاحب الشطري

https://www.tgoop.com/oydgh

هونك بالله يالجناز هذا الشايلنه منين
جنازة موسى ابن جعفر عليها الناس ملتمين


1
آنه الزهرة يالجناز آنه أم الحزن والنوح
جيت من المدينـة اليوم جيت بلا جسد بس روح
كالولي أبو الطيبات جسمه أعله الجسر مطروح

أمشي وأعثر بممشاي أدوّر أبني بدموع العين


2
على جسر الرصافة هناك شفت جنازة المسموم
ناديته بقلب مكسور كوم اكعدلي يامظلوم
آنه ادري اليجيله الموت كل أهله عليه تحوم

بس موسى غريب يموت وأحبابه وهله بعيدين


3
ياحيف وألف ياحيف بطاموره الولي يسمووه
وبذاك السجن ويلاه وحَدّه بحيرته يخلوه
لمن غمضاها العين تالي من السجن شالوه

مسموم الجبد ياناس منه مرضرضه الرجلين


4
ثلت أيام ظل مطروح والسلسلة بجفينه
كلّها تصيح هذا منين مانعرف عناوينه
لن ناعي المصيبة يصيح الكاظم هذا والينه

صاح أعله الجنازة وناح ماحضروا هله الطيبين


5
يوم الشالوا التابوت جن أنشال دلالي
كمت اصرخ يهل جناز ريض وارحم بحالي
هذا أوليدي أخذني وياه وخلي جثته كبالي

أريد أشبع بواجي عليّه وعفر بالدمة الخدين


6
حماميل أربعة حملوا وحضروا خيره أصحابة
ومن ذاك الجسر شيعوا ونار الحزن لهابه
غريب الكاظم المسموم واويلي على مصابة

هذا صوت المحبين ظل يعله بدمع وونين


7
وليدي باللحد دفنوا مو مثل البكه حيران
ذاك الظل على التربان عاري بخطه الميدان
لا ناصر اله ولمعين وزينب حايره برضعان

مصاب حسين ابو السجاد مثله ماتشوف العين

بغداد
امجد صاحب الشطري

https://www.tgoop.com/oydgh

يابو الرضا وويلاه يابو الرضا وويلاه


1
ياموسى لحضات الهجر للساعة تجرح بينه
نار المصيبـة بكل وكـت يبو الرضا تجوينه
خلينه ننعه مصيبتك طول الدهر خلينه

حد مايهل راعي الفرج وبسيفه يطلب ثارة
يابو الرضا وويلاه يابو الرضا وويلاه


2
أنت أمام الرافضة الماعشت يوم براحة
خلصت عمرك بالسجن وحملت كل جراحه
قلبك حمل وشكد صبر تالي انكطع سباحه

ومن هالرزية الراتبه لليوم تسعر ناره
يابو الرضا وويلاه يابو الرضا وويلاه


3
عشرين عام أتعذبت كل عام يحمل حسرة
كل لحظة من عمرك سنة تنحسب يبن الزهرة
ضيم وجفه وهم وحزن حيره ومصاب وعبره

من ذني يابن فاطمة روحك صفت محتارة
يابو الرضا وويلاه يابو الرضا وويلاه


4
الله يصبـرك سيـدي هليلة والله يعينك
الجامعة بنص ركبتك والسلسلة بجفينك
مره تواسي روحيتك مره تواسي حسينك

تذكر مصيبة عمتك ودم الدمع يتجاره
يابو الرضا وويلاه يابو الرضا وويلاه


5
ياراهب آل المصطفى مصابك تصدر دوره
انت حجبت أهل الفتن ماحجبتك طاموره
ونطقت باسم المرتضى وطبقت كل دستوره

وحكمت بالحق سيدي بس غدرك فجاره
يابو الرضا وويلاه يابو الرضا وويلاه


6
ياموسى من حان الفرج تدري الفرج بي موتك
سمو جبدتك ياوسـف وصـار الجسر تابوتك
هارون من بعدك هلك وظل عالي يصدح صوتك

وقبرك تعله ويالنجم ومزاحمه زواره
يابو الرضا وويلاه يابو الرضا وويلاه


7
كل عام أحنا وكل سنة نذكر مصابك دايم
والجمرة ماتطفى ابـد تبقـه لظهور القائم
عاهدنا واليوم العهد أنجدده يالكاظم

للموت عنك مانزل دينك تره أحنا أنصاره

شطره
امجد صاحب الشطري

https://www.tgoop.com/oydgh

فرحة هاشمية بهجة حيدريه
ميلاد الأطايب نور من الزجيه

1
بالحسين نبتدي أعياد الشهر ويرف لوانه
بالحسين تفرح الدنيا وكمر يضوي بسمانه
بالحسين الله من سابع سمه يقبل دعانه
بالحسين الشدايد تنكضي ويفلح رجانه

مكتـوبـة بقلبنا شبل الزهرة أملنا
غيرة ماكو عدنا للعاشك هوية

2
بوفاضل ثاني نور نشوفه من ظهر الصميده
بوفاضل بالمهد يكفل خدر والراية بيده
بوفاضل نكله هاي الليلة أيامك سعيدة
بوفاضل ونهدي اله باقة قصائد مو قصيدة

عباس بوفائه معروف بولائه
تشهد كربلائه بوالنفس الابيه

3
يسجاد نهتف بفرحة ونزف أحلى البشاير
يسجاد خمسه من شعبان أنت ويانه حاضر
يسجاد يالحروفك سكنت بكل المشاعر
يسجاد بينه شوك وشوكنا من طيب خاطر

يلسان العقيدة يانهج الصميدة
يافرحة جديدة ياسور وحمية

4
يالاكبر ياعشكنا الأولـي ويابهجـه الدين
يالاكبر ليلة الحـادي عشـر تتكحل العين
يالاكبر نورك بنور النبي وماشفنه وجهين
يالاكبر ياعلي ومنك نعِم ياشبل الحسين

من طه محمـد نورك جنه فرقد
بسمانه توقد رحمة للبرية

5
بوصالح نور من رب السمة نازل علينه
بوصالح ليلة الخامس عشر يحضر ولينه
بوصالح حاشه لا ميرد طلب يأخذ بدينه
بوصالح هو علم المصطفى وللحق مدينة

وفاي بوعوده مايخلف عهوده
والليلة بوجوده فرحة مهدوية

بغداد
امجد صاحب الشطري

https://www.tgoop.com/oydgh

صلوات صلوات على محمد وعلي

1
هذا شهر الفرح هل هلاله
والمحب مقبولة بي أعماله
هالشهر ماتنوصف أفضاله
والخِدَم بي عن صدق هنياله

والخادم واضح برهانه

صلوات صلوات علي محمد وعلي

2
هالشهر شهر العشك ياساده
بي أبو اليمه يحل ميلاده
ومن بعد عيده فرح أولاده
وألف هنيالة اليحصل أمراده

افرح ياشيعي بهل ليلة

صلوات صلوات على محمد وعلي

3
مولد الأقمار جنة علينه
حسين وي عباس وي مهدينه
للنبي وحيدر علي هنينه
وللزجية فاطمة وفينه

وبالمحشر باجر توفينه

صلوات صلوات على محمد وعلي

4
بالسمه مرسومة أجمل صورة
كل إمام الليلة يصنع دوره
حسين أول من يضَع دستوره
وشعيته أبخته تظل منصورة

وحسين اليرفع خدامه
صلوات صلوات على محمد وعلي


5
هالشهر معروف من عنوانه
مانسينه وهو ماينسانه
ندعي ربنا يقبل بدعوانه
هالسنة المهدي نشوفه ويانه

والراية بجفه معليها

صلوات صلوات على محمد وعلي

6
عالوعد طول الدهر ظلينه
ومن عشكنا والله ماملينه
بكل شرف من القلب نادينه
غير حبه حسين مايروينه

وحسين بدربه اتربينه

صلوات صلوات على محمد وعلي

شطره
امجد صاحب الشطري

https://www.tgoop.com/oydgh

كربله ساكنة بروحي كربله بلسم جروحي
كربله حبها يكفيني


1
أرض الوفه بروحي مايوم أملها
كل البشر حتماً تعرف فضلها
هي مثل مكة واضح أصلها
أشرف ارض ألنه ربنا جعلها

كربله شهكة أنفاسي كربله بيها عباسي
كربله دنيتي وديني


2
عن البقع كلها ربنا اصطفاها
أجمل أرض عدنا أحنا فداها
هو أبو اليمه الشّرف ثراها
لو ما دمه المنحر ماشع ضواها

كربله جنة الخادم كربله ثورة عالظالم
كربله كحلت عيني


3
جنة وألف جنة ماتوصل ألها
والباري ماخالق وحده مثلها
كل الخدم بيها يلتم شملها
وبليلة الجمعة نتعنه ألها

كربله مأوى كل حاير كربله كعبة الزاير
كربله هي تحويني

4
من تختنك روحي ازحف واجيها
وأنسى التعب كله امن ادخل عليها
أرض المجد دايم تفكري بيها
أفرح من تضمني وتمدلي أديها

كربله تسري بعروكي كربله بسملة شوكي
كربله حبها يرويني

5
يعجز أنا لساني شما أحجي عنها
ولا مرة عالزاير يغمض جفنها
شكد وادم بغربة محرومة منها
مشتاقة هليلة أترد الوطنها

كربله موطن الضايع كربله للمحب جامع
كربله سيرة سنيني

6
ادعي من الباري وسيد البرية
وحيدر أبو الحملة وزهرة الزجية
ارض الفخر هايه يحفظوها إليه
لنها لكُل عاشك أقدس هوية

كربله افتخر بيها كربله مااجازيها
كربله غِيرة تنطيني

شطره
امجد صاحب الشطري


https://www.tgoop.com/oydgh

مدد مدد يامهدينه
مدد مدد ياولينه

1
يوم الولادة سيدي بخلاص نادينه
دربك درب حيدر علي كل أحنا ماشينه
مادام كل لحضه مدد يالمهدي تنطينه
وياك نبقى للأبد مايوم زلينه

مدد مدد حبك بينه
مدد مدد ياولينه


2
ياغِيره الله بكل عزم تنتظرك الراية
جيت وفرحنا بجيتك يالجيتك غاية
عندك زلم يوم الشدد يالمهدي وفاية
ماتخلف وياك الوعد من أول حجايه

مدد مدد ماوفينه
مدد مدد ياولينه


3
ياشوك حبنا المايجف يارحمة الباري
هاشمي وأصلك من علي بالشده كراري
آنه العشكتك عن صدق من ساعة صياري
والليلة آنه بمولدك تتكحل أنضاري

مدد مدد العيدك جينه
مدد مدد ياولينه

4
عيدك يمر بكل سنة ونضّوي إلك شمعة
يالمهدي وبهذا العشك صوت الوفه نرفعه
دعوانه يابن فاطمة في ليلة الجمعة
يايوم يتلاكن سوه عيدك ويالطلعه

مدد مدد وترد لينه
مدد مدد ياولينه


5
يالمهدي عن طه النبي أقوال نرويها
دولة علي بعون العلي أنت إلي تبنيها
من تنملي جور وظلم بيدك تصفيها
ياسيدي قصد وعدل هالدنيا تمليها

مدد مدد ياحامينه
مدد مدد ياولينه

6
باجر ترد من غيبتك ياضنوه الهادي
هذا الإمام المنتظر العالم أينادي
تزور الحسين بكربله وتروح للوداي
وصوت المنادي يعتلي وينه الذي يعادي

مدد مدد نسطر عينه
مدد مدد ياولينه

بغداد
امجد صاحب الشطري

https://www.tgoop.com/oydgh

السلام عليك يامهدي ياحجة الله

1
سلمت وعليك روحي هايمه
من بعد ماسلمـت أهل السمه
اليوم ضيف علينا يابن فاطمة

وكل محب ياسيدي صاح بفخر
السلام عليك يامهدي ياحجة الله


2
هذا نورك سيدي علينا نزل
بيه غيرة فاطمة وخير العمل
يابو صالح أنت مفتاح الأمل

شما تدور أيام ويمر الدهر
السلام عليك يامهدي ياحجة الله

3
كل قلب بشواكه وأفراحه هتف
ياهلا وكل الهلا بتاج الشرف
أنت هسه بكربله لو بالنجف

يابوصالح وين صار المستقر
السلام عليك يامهدي ياحجة الله

4
نعم بالمولد زهت جنة عدن
وضوه كل الكون إلك يبن الحسن
لكن أنت مادرينه بيا وطن

ماكو منك لا رسالة ولا خبر
السلام عليك يامهدي ياحجة الله

5
هاي صار سنين نترقب تجي
بكثر دمعات النظر عدنا حجي
ليلة الجمعة الك نبجي بجي

نريد نحضه بشوفتك يالمنتظر
السلام عليك يامهدي ياحجة الله

6
كافي من الغيبة كافي من الصبر
هاي دنيا موحشه وجنها قبر
بس هظم وفراك خلصنه العمر

سيدي وجروح وهموم وقهر
السلام عليك يامهدي ياحجة الله

7
علينه تصعب يابو صالح غيبتك
خاف نمشي ومانشاهد هبيتك
والله يالمهدي تره احنه بحاجتك

من مغيبك منكسر منه الظهر
السلام عليك يامهدي ياحجة الله

8
يمتى ترجع ألنه وتبرد المهج
عالوعد نتنطرك يبن الحجج
كل مسه ومصباح ندعو بالفرج

يمته نورك سيدي يكحل النظر
السلام عليك يامهدي ياحجة الله

بغداد
امجد صاحب الشطري

https://www.tgoop.com/oydgh

يالمنتظر يالمنتظر يالمنتظر مدد مدد يالمنتظر

1
بعيد ميلادك اجينه عالوعد كلنه التقينه
شوك إلك يمهدي بينه يا أبو الروح الحنينه

للمحب أنت السفينة ياوكت تظهر علينه
بأنتظارك ياولينه كربله وأرض المدينة

يالمنتظر يالمنتظر يالمنتظر مدد مدد يالمنتظر

2
الدنيا هليلة زهيه بطلتك يابو الحمية
أي وحك ربنا ونبيه أنت للعاشك هوية

يمته نتلاكه سوية وتأخذ بثار الزجية
ونفرح كبال الدعية باليالي المهدويه

يالمنتظر يالمنتظر يالمنتظر مدد مدد يالمنتظر

3
كل محب هذا نشيده سيدي أيامك سعيدة
بلايه شك يبن الصميده أسمك أجمل من قصيدة

العاش حبك مدلك أيده يدري هو أنت العقيدة
وأنت عندك مو بعيدة الشيعي تنطي اليريده

يالمنتظر يالمنتظر يالمنتظر مدد مدد يالمنتظر

4
سيدي محلى جمالك ومحله فحواك وخصالك
حايره الناس بكمالك من علي شايل وصالك

الشوك بأفراحه آجالك وعن فرح قلبه حجالك
هو ماشايف خيالك وليلة الجمعة دعالك

يالمنتظر يالمنتظر يالمنتظر مدد مدد يالمنتظر


5
يمته يتحقق حلمنا سيدي وبيدك تلمنا
تدري مو خلص عمرنا وشيّب الرأس وقلبنا

يوم عيد إلي تمرنا وتحمل بجفك علمنا
كافي نصبر مو تعبنا أظهر وفرّح قلبنا

يالمنتظر يالمنتظر يالمنتظر مدد مدد يالمنتظر

6
أنت تدري البعُد جارح والفكر بالغيبة سارح
وياك خلينه نصارح عيونه بدربك تشابح

الدمع كل يوم سايح والأمر يالمهدي واضح
أنريد بعيونك نصابح يمته ترجع يابو صالح

يالمنتظر يالمنتظر يالمنتظر مدد مدد يالمنتظر

شطره
امجد صاحب الشطري

https://www.tgoop.com/oydgh

الآن على قناة اليوتيوب
‏‌ ‌‎| #فرحة_حيدرية l
| 1446هـ - 2025م |

أداء |
#دانيال_بوجبارة
#محمد_الباذر
#عماد_المجحد

كلمات | #أمجد_صاحب_الشطري

التوزيع | #محمد_عليق
الهندسة الصوتية | #حسن_مرهون

مونتاج | #ياسر_المهناء
اشراف عام | #مصطفى_الطرفي

‏
[https://youtu.be/fu5B9R3xB8Y ]

هذا الكريم وهذا نوره اعتله
بطيـب أورود الليلة نستقبله
عمت عالبرية فرحه حيدرية


1
ألف الصلاة أعله النبي والينه بانت طلته
حور وملائك نازله عن يمنته وعن يسرته
فرحه علي ماتنوصف لمن عيونه شافته
بأول ظَنّه كلبه ابتهج وأهل المدينة هنته

بهاي الولادة الكون كله ابتشر
ضوه النجم بين الشمس والكمر
عدنا بهل المسيه فرحه حيدرية


2
ليلة الفرحة متممه قبل الخلايق والزمن
مخلوق مو من طين ابد من نور مخلوق الحسن
أسمه أنكتب تحت العرش من جان في جنة عدن
لو ماوجودة بلايه شك أرض وسمه ماينبنن

سبحانه من سـواه ومـن صَوّرّه
من نوره صاغه وبالعرش أثمره
للعالم هدية فرحه حيدرية

3
يم دار فاطم جم نبي بيوم الولادة مزاحمة
كلمن يقدم تهنئه وتسجل أملاك السمه
حتى الفُقاره حاضره وتشارك أهل المكرمة
عالخير ياام الحسن عالخير ياحامي الحمه

نازل عمـود النـور من السمه
يعني العلي هَنّه النبي وفاطمة
وأجتمعوا سويه فرحه حيدرية

4
بارينه زامن هل الفرح بأجمل شهر وأعظم شهر
هاي الهدية من العلي لحيدر علي بأول ثمر
خلينه نتمعن بعد ونوضح لكل البشر
ليش الأيام تشابهن بين الحسن والمنتظر

ضوه بنصف رمضان وجه الحسن
وضوه بنصف شعبان ابن الحسن
سر هاي القضية فرحه حيدرية

5
لو ردت أحجي أعله الكرم يحتار كلبي من أوصفه
حاتم الطائي ماوصل طبع الكريم وموقفه
وعن الفضائل لو ردت بس فضل واحد اكشفه
ألكه بمعاجز هل الولي محتارة أهل المعرفة

كل المفاخر بيه متجمعة
لو ماعلومه هالبشر ضايعه
علمه أصبح هوية فرحة حيدرية

شطره
امجد صاحب الشطري


https://www.tgoop.com/oydgh

أذن آذان الله في جنة عدن
هاليلة ياشيعة ميلاد الحسن
يامحلى ميلاده


1
نوره من حيدر علي علمه من طه النبي
مجده بالحق يعتلي هذا الولي يعرفونه

أسمه من رب السمه أمه الزهرة فاطمة
عمره ألنه قدمه بيه البشر مامونه

مثل الشمس وجهه وأجمل طلته
غِيرة علي برأسه والكل شافته
يامحلى ميلاده


2
فضله محد ينكره أصله الزهرة وحيدره
روحه طيبه وطاهرة ولفظ العدل بلسانه

نفسه بالحب رائده صرحه دار الافئده
جينه كلنه انعايده هذا الوالي الريحانه

قبل الخلق اسمـه عنـد الله أنكتب
والذهب مايحلى بس لابن الذهب
يامحلى ميلاده


3
حبه ينطي بلا ثمن نبضه باقي بكل زمن
هذا مولانه الحسن نجمه بسمانه نشوفه

هو مفتاح الأمل ألنه هو أروع مثل
غَيره ماصار وحصل يشهد نعم معروفه

ابن النبي وحيدر ألنه مفخرة
والايذ بحبه نال الآخرة
يامحلى ميلاده


4
سنينه بالحق واضحة بيته للكل فاتحه
الضَده طبعه يسامحه من الولي تربيته

نفخر نمشي بسيرته نربح باجر جنته
هاذي هي شيعته علاها هو بصيته

ماحجبت أفعاله أهل الشرذمة
شايل حرز حيدر وأمه فاطمة
يامحلى ميلاده

5
بداره سر ومعضلة جفوفه تنطي اليوصله
مضيفة بي ريحه هلا دايم تفور دلاله

ماخذ شمرت فاطمة وحيدر هو العلمه
وصارت هاي المكرمة من شيمته وأفضاله

مضيف الحسن موطن للماله وطن
هذا الأمر واضح يرويه الزمن
يامحلى ميلاده

6
باقي بجفوفه العلم سيد أصبح للقيم
كالو عن حبه وهم خليهم يشفونه

منه صاغ اسمه المجد وشتم من عطره الورد
صحنه لله الحمد خليهم يحسدونه

هذا الكضه سنينه واضح كالشمس
مادنك الهامة ماذل النفس
يامحلى ميلاده

شطره
امجـــد صاحـــب الشطــــري

https://www.tgoop.com/oydgh

اذان العبره

أداء الرادود #جمعة_حامد
كلمات الشاعر #أمجد_الشطري

ليلة استشهاد السيدة خديجة الكبرى وابو طالب ع ١٤٤٦ هـ

حسينية #أبي_الفضل_العباس ع #الصفار دولة الكويت

https://youtu.be/fPRf8zQ1wRY?si=2fXBH80ajFchqAbl

مصيبتـك هليلـة ياواليها
بالمدامع والحزن نرثيها

1
ياعلي الليلة بوسط راسك جرح
شلون بالله يطيب ياشمس الصبح
تدري هجرانك ذبح زينب ذبح

ياعلي بعدك منو يباريها

2
أنها والله ليلة طبرتك
بيها تعلم والملائك نادتك
ياعلي أتحضر اقتربت ساعتك

وي صلاتك دنيتك تنهيها



3
كَبرّت بسم الله يانعم الولي
واسجدت لن صوت بإذنك يعتلي
ابن مجلم ناده بسمك ياعلي

ضربته باسمك نوه يخليها

4
هنانه محرابك نعه والدم نزل
وجهك اصفر لونه ياخير العمل
يعني ماظلت وسيلة ولا أمل

روحتك كل رجعه ابد مابيها





5
ياعلي للدار رد بيك الحسن
تمشي كوه وحيلك الليلة انسحن
زينب تلكتك بالهم والمحن

شافتك حيل الطمت بيديها

6
كون هليلة تشوفك فاطمة
راسك مطبر علي وينزف دمه
كل أهل بيتك عفتها ميتمه

رايح أنت والحزن حاديها




7
ياعلي بريتك مخنوك الهوى
طبريتك مايرهم ألها كل دوه
قلبك امن أصياح الأيتام انجوه

أنت أبوها ورايح تجافيها

8
من بعد عينك على الدنيا العفه
من بعد عينك ضمه وهم وجفه
ماكو مثلك بالخلق يابو الوفه

يالجنت طول الدهر راعيها

شطره
18 رمضان 1446
امجد صاحب الشطري

https://www.tgoop.com/oydgh

مو وكتها تروح وإحنا أطفالك
يا أبونا الموت مايحلالك
نذبحت حروف الحنان دنيا مابيها أمان

1
مو وكتها تروح عنه يا أبونا
طفالك أحنا من تسافر يهضمونا

منهو بعدك يرحم بحال اليتامة
كلشي راح يضيع ياسيد الإمامة
وأحنا ندعي تكوم ألنه بالسلامة

كون بينه تصير طبره راسك
ولا يجي الموت ويخمد أنفاسك
نكتبت بوجه الزمان دنيا مابيها أمان


2
أباب بيتك جم يتيم وجم يتيمة
علي وينك كلها تصرخ ياحريمة

والله يابو حسين ياحيدر هضيمة
الموت يتخطاك ويعوف الظليمه
الحياة بلا علي ما ألها قيمه

طبروا الهامة وتغير لونك
بالسلامة تكوم مايردونك
بعدك اظلم كل مكان دنيا مابيها أمان


3
ليلة صعبة كلها حسرة شلون ليلة
الحسن ينعه حسين شابك بالعقيلة

واحد ويالثاني يحجي شلون باجر
راح يمشي حيدره عنه يغادر
وأنت تسمع للحجي والرأس حاسر

الناعي صاح ودمع عينه يسيله
علي باقي ويانه بس هليلة
هذا يومك بينه حان دنيا مابيها أمان

4
ياعمدنا بالله هونك لا تسافر
البيت اظلم لو عفتنا يصير باجر

تدري من ترحل يبو روح الحنينة
الدنيا والأيام تتكابل علينه
والشماته تصير وينه علي وينه

مودعة الله روح يابو الغِيرة
راح نبقى خلافك أحنا بحيرة
صوبك جف الجبان دنيا مابيها أمان


5
بعد جدنا وبعد أمنا أنت رايح
من بعدكم العمر نكضي بس نوايح

أمنا خلف باب من كسرو ضلعها
مارعوها ومارحم بيها الصفعها
وهسه أنت نعشك الطاهر تبعها

أحنا اورثناها هاي الحالة
حسين باجر تسحكه الخيالة
عليه هذا امتحان دنيا مابيها أمان


6
الحسن باجر جبده ينسم من يعينه
حسين يعله برمح رأسه مكطيعنه

هاي زينب تنسبي وي الثواكل
لايظل حسين عدها ولابو فاضل
عالهزلة مكيدة والدمع سايل

بويه بويه تصيح باجر وينك
كوم من النجف شوف حسينك
تكطع بجبده السنان دنيا مابيها أمان

شطره
امجـــد صاحـــب الشطــــري

https://www.tgoop.com/oydgh

بحنانك دللتني يبويه يبويه
تركتني ويتمتني يبويه يبويه


1
أنه زينب يبويه افتحلي عينك
قبل لتروح ضمني ابين أدينك
حنين أنت ولا يوصف حنينك
تفكر بيه والدم بجبينك

ضعت لمن عفتني يبويه يبويه
تركتني ويتمتني يبويه يبويه


2
تعال ارحمني بويه وشوف حالي
بعد جم يوم يتفرهد دلالي
لَوَن منك يصير البيت خالي
عليه تزدحم سود الليالي

وبعد منهو اليلمني يبويه يبويه
تركتني ويتمتني يبويه يبويه


3
جريمة تروح من عندي جريمة
عَلَي صعبة إذا كالو يتيمة
حياتي بلا أبو ما ألها قيمة
هضيمة تعوفني والله هضيمة

برحيلك عذبتني يبويه يبويه
تركتني ويتمتني يبويه يبويه



4
إذا عني أرحلت شيضل أليه
البشر والدنيا تتغير عليه
جبتها من الضلع هم واذية
واختمها بذبيح الغاضرية

المصايب لوعتني يبويه يبويه
تركتني ويتمتني يبويه يبويه


5
أنا بسابع سنة وأمي تركتني
وأنت بهجرك اليوم أفجعتني
وباجر كل هلي لو فاركتني
الشمر بالسوط يضربني أعله متني

يريتك لاشفتني يبويه يبويه
تركتني ويتمتني يبويه يبويه


6
بودعك ناظري لاوين أديره
حيرة وحيرتي بويه جبيرة
شلون أتيسّر وآنه الأميرة
غريبة بكربله ومالي عشيرة

النوايب شيبتي يبويه يبويه
تركتني ويتمتني يبويه يبويه


بغداد
امجد صاحب الشطري

https://www.tgoop.com/oydgh

تهدمــت والله أركــــان الهـــــدى

1
ياعلـــي الليلــة مصابــك حـل علينه
هامتــــك مطبــــوره ويلـــي ياولينه
كـــــل يتيــم الليلــــة ينعــــاك بانينه
وزينـــك يابــو الحسـن ظلت حزينه

تهدمــــــت والله أركــــــــان الهـــــــدى

2
ياعلـــي يـــوم الــذي رأســـك تتطبر
كلشـــي يابو اليمـــه بالعالـــــم تغير
الصخـر ون وعـلـه هجـرانـك تفطر
لوعانـــه بهـــل مسـه أفراكك يحيدر

تهدمــــــت والله أركــــــــان الهـــــــدى


3
ناحـــت السبـــع المثانـــي لهل الرزية
والأمـــلاك تنتحـــــــب يابـــــو الحمية
ابـــن ملجــم الصوبــــك هــاي المسيه
روع أيتامــــك علــــي وسبـــــب أذية

تهدمــــــت والله أركــــــــان الهـــــــدى

4
ياعلــي شلــون النـــذل يكــدر يصيبك
ينحـــب اكبـــالك وكــــف حاير طبيبك
عاليتامـــة ماطفـــت جمــــــرة لهيبك
بالمنيــــة وعينــــك أتصـــــد الحبيبك

تهدمــــــت والله أركــــــــان الهـــــــدى


5
ياعلـــي مافكـــرت مـــــن لليتامــــــة
لــو رحـــت تتجــاوز أعليهـا الظلامة
لــو غفــت عينــك فــلا تبقـى بسلامة
تنــزل بمتــن العقيلــــة أجــــم علامة

تهدمــــــت والله أركــــــــان الهـــــــدى

6
مــن تنــــام بحفرتــك تبــــدي المصيبة
مــن الظلــم جبـــد الحسن يأخذ نصيبة
والحسيـــن ابكربلــــــه جثتـــــه سليبة
والعقيلـــة أم الخــــدر تصبــــح غريبة

تهدمــــــت والله أركــــــــان الهـــــــدى

7
فــي زمانـــك ماكـــو ابــد وادم فقيرة
كلهــا جانـــت عايشـــه بزودك أميرة
جفـــك أيقســـم عليهـــا وينطي خيرة
حاكـــم وكاعـــد يحيــــدر عالحصيرة

تهدمــــــت والله أركــــــــان الهـــــــدى

8
أنتهـــت يابالحســــن قصــــة حيــــاتك
والقـــرار مــن الله ترحل فـي صـــلاتك
ودعــت عنــــد اليتــــامــــة ذكريـــاتك
يلــه حامــــي الحمــــة حانــــت وفاتك

تهدمــــــت والله أركــــــــان الهـــــــدى

بغداد
امجد صاحب الشطري

https://www.tgoop.com/oydgh

https://youtu.be/7XkzXeHsKNc?si=gt3rdKB4WQ-SWdET

يزينب علي راح

الشيخ الخطيب #حسن_خليفة
الشاعر #أمجد_الشطري

زينب العظيمة

اداء ملا #ياسر_كمال
كلمات #أمجد_الشطري

هيئة القواسم -البحرين /المنامة
ذكرى شهادة السيدة زينب ع 1446 هـ

https://youtu.be/S9gcZ1l-tHw?si=d_sDiyQgB-1ynENN.

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

https://www.tgoop.com/+PZwpTt2HLXcvUQZh

------------------------------------------------------