tgoop.com/piimauz/21485
Last Update:
#Farmon_ijrosi_amalda
#muhandislik_dasturlari
#integratsiyalashgan_taʼlim
Oʻzbekiston Respublikasi Prezidentining 2024-yil 1-apreldagi "Ixtisoslashtirilgan maktablar tarmogʻini kengaytirish va ularning faoliyatini yanada takomillashtirish chora-tadbirlari toʻgʻrisida"gi farmonida Mirzo Ulugʻbek nomidagi ixtisoslashtirilgan maktabida "Yangi Oʻzbekiston" universiteti bilan integratsiyalashgan tarzda muhandislik yoʻnalishida oʻqitish yo‘lga qo‘yilishi belgilangan.
Bunda, Mirzo Ulug‘bek nomidagi ixtisoslashtirilgan maktabining o‘quv jarayoni 5 yillik dasturlar asosida STEM modeli bo‘yicha tashkil etiladi. Dastlabki 3 yilda ustuvorlik o‘quvchilarda fizika, matematika, informatika va ingliz tili bo‘yicha fundamental bilimlarni shakllantirishga, keyingi 2 yilda esa — muhandislikka boshlang‘ich tayyorgarlikni ta’minlashga qaratiladi.
Shuningdek, muhandislik ta’lim dasturlarini lozim darajada o‘zlashtirgan bitiruvchilarga o‘z o‘qishini "Yangi O‘zbekiston" universiteti tegishli bakalavriat ta’lim yo‘nalishining 2-bosqichidan davom ettirish huquqi beriladi.
Ixtisoslashtirilgan taʼlim muassasalari agentligi tomonidan ayni yoʻnalishda olib borilayotgan amaliy ishlar doirasida tizimdagi Mirzo Ulug‘bek nomidagi ixtisoslashtirilgan maktabi hamda "Yangi Oʻzbekiston" universiteti oʻrtasida taʼlim hamkorligi yoʻlga qoʻyilgan.
Mirzo Ulugʻbek nomidagi ixtisoslashtirilgan maktab oʻquvchilari "Yangi O‘zbekiston" universiteti o‘quv laboratoriyalari hamda mahalliy va xorijiy o‘qituvchilarning dars jarayonlarini kuzatish, oʻquv-amaliy mashgʻulotlarda qatnashish imkoniyatiga ega boʻlmoqda.
Kuni kecha "Yangi O‘zbekiston" universitetida tashkil etilgan integratsiyalashgan dars jarayonlarida ham maktab yoshlari bu imkoniyatdan samarali foydalandi.
Shu bilan birga o‘quvchilar uchun universitet professor-o‘qituvchilari ishtirokida mahorat darslari ham o‘tkazildi.
Telegram | Facebook | Instagram | YouTube
