لي عمل كده، لكن ربنا حَمى الفصيلة كلها بسبب إيجابيته وهمته العالية في الغَيرة على دين الله👌
☆مش بيفكركم بقصة "وكان أبوهما صالحا" إللي قلناها في قصة الخِضر 😁
وعلى فكرة لما الهدهد عمل كده مكانش مستني الجزاء ده ولا كان طمعان في أي حاجة في المقابل،
هو بس كان مُمْتن لله وغيور على جنابه بسبب حبتين القمح إللي بياكلهم في يومه 😊
سليمان عليه السلام لما سمع كلام الهدهد رد قال إيه؟
قال:
هنشوف انت صادق فعلا ولاّ بتكذب وبتقول القصة دي عشان تهرب من العقاب👌
"قالَ سَنَنظُرُ أَصَدَقْتَ أَمْ كُنتَ مِنَ الْكَاذِبِينَ"

☆وهنا فيه فايدتين لنا نستفيدهم 😁✌️
♡أول فائدة :
إن لما حد يقول لك معلومة إنت متعرفهاش، مهما كنت شايف نفسك متعلم ودارس وعارف، والشخص إللي بيقولك المعلومة في وجهة نظرك مالوش أي وزن علمي،
ماتقولش أنا عمري ما سمعت الكلام ده والكلام ده غلط، وتبدأ تجادل من غير حتى ما تكلف نفسك تدوّر هل كلامه صح ولّا لأ🤷‍♂️
ويُذكر إن واحد من التابعين العلماء سمع عن مسألة شرعية معينة، فقال باستنكار: أنا أول مرة أسمع الكلام ده🤨
فصاحبه قال له: إنت جمعت العلم كله🤔
فالتابعي قال : لأ😕
فصاحبه قال له: فهل جمعت نصفه؟ قال : لأ..
فقال له: خلاص! اعتبر المعلومة دي في النصف اللي انت متعرفوش💁‍♂️

♡الفائدة الثانية:
إننا لما تجيلنا معلومة عن أي حد نتثبت منها الأول ونتبين صحتها من عدمها.
حتى لو كنت بتثق في الشخص إللي قال لك المعلومة دي زي ما بتثق في نفسك بالضبط،
لإن احنا بشر، وممكن الكلام يتفهم غلط ويتنقل غلط، وممكن إللي بينقل الكلام ينقله من وجهة نظره هو وفهمه الشخصي، وانت لو كنت شفت أو سمعت الكلام مكانش هيوصلك بنفس المعنى إللي وصّلهولك بيه،
فناخد بالنا قبل ما ناخد أي قرار نتأكد الأول من المعلومة زي ما سليمان عليه السلام عمل 😊

قال سليمان عليه السلام للهدهد خد رسالتي ووصلها لهم وهنشوف رد فعلهم إيه👌
لأن الهدهد هو إللي جاب الخبر فطبيعي إن هو إللي يوصل رسالة سليمان عليه السلام لملكة سبأ،
اذْهَب بِّكِتَابِي هَذَا فَأَلْقِهْ إِلَيْهِمْ ثُمَّ تَوَلَّ عَنْهُمْ فَانظُرْ مَاذَا يَرْجِعُونَ"
فأخد الهدهد رسالة سليمان وسافر من فلسطين لمملكة سبأ في اليمن وألقى رسالة سليمان لملكة سبأ وطار بعيد وقعد يراقب،
الملكة فتحت وقرأت.. وأمرت باجتماع الوزراء والأعيان عشان تقول لهم عن رسالة سليمان عليه السلام،
اجتمع الملأ، وقالت لهم:
يا جماعة أنا وقع قدامي رسالة، ولما فتحتها لاقيتها من سليمان الملك المعروف، كاتب فيها: بسم الله الرحمن الرحيم ...أدعوكم للإسلام لله رب العالمين، فأسلموا لله وتعالوا منقادين مستسلمين له عز وجل تاركين عبادة الشمس وكل ما أنتم عليه من شرك ومعاصي.
"قالَتْ يَا أَيُّهَا الْمَلَأُ إِنِّي أُلْقِيَ إِلَيَّ كِتَابٌ كَرِيمٌ إِنَّهُ مِن سُلَيْمَانَ وَإِنَّهُ بِسْمِ اللَّهِ الرَّحْمَنِ الرَّحِيمِ ألاَّ تَعْلُوا عَلَيَّ وَأْتُونِي مُسْلِمِينَ"

فقالت لهم إيه رأيكم في الموضوع🤔
أنا مش هاخد أي قرار غير لما تقولوا رأيكم،
"قَالَتْ يَا أَيُّهَا الْمَلَأُ أَفْتُونِي فِي أَمْرِي مَا كُنتُ قَاطِعَةً أَمْرًا حَتَّىٰ تَشْهَدُونِ"
فقالوا لها:
احنا أقوياء وعندنا قوة تحمل وهنقدر نقاتل لو عايزة تعلني الحرب.. ولو عايزة السلام معاه وعدم الدخول في حرب فبراحتك برده...
شوفي إللي انتِ عايزاه وإحنا تحت أمرك💁‍♂️
"قَالُوا نَحْنُ أُوْلُوا قُوَّةٍ وَأُوْلُوا بَأْسٍ شَدِيدٍ وَالأَمْرُ إِلَيْكِ فَانظُرِي مَاذَا تَأْمُرِينَ"
فقالت لهم:
بصراحة كده الملوك لما بيدخلوا بلد بيخربوها بالحرب وبيذلّوا حكامها وأشرافها وسادتها،
فخلينا نبعتله هدية كده ونشوف هل هو من طُلّاب الدنيا وبيرضيه عطاياها فخلاص تبقى اتحلت ونعمل معاه معاهدة سلام دائم مقابل المال والعطايا،
ولّا هو مش هتلزمه هديتنا في شيء ومصمم عل طلبه إنه مش عايز مننا غير الإسلام زي ما بيقول فعلا👌
"قَالَتْ إِنَّ الْمُلُوكَ إِذَا دَخَلُوا قَرْيَةً أَفْسَدُوهَا وَجَعَلُوا أَعِزَّةَ أَهْلِهَا أَذِلَّةً ۖ وَكَذَٰلِكَ يَفْعَلُونَ ۩ وَإِنِّي مُرْسِلَةٌ إِلَيْهِم بِهَدِيَّةٍ فَنَاظِرَةٌ بِمَ يَرْجِعُ الْمُرْسَلُونَ"

طار الهدهد وسبق الرّسل ورجع لسليمان وحكى له إللي شافه هناك وسمعه وهحيصل،
فلما جاء الناس من طرف الملكة ومعاهم الرسول إللي هيوصل الهدية لسليمان عليه السلام ودخلوا عليه، اتصدموا من المنظر!!
جنود من الجن والإنس والطير... مَلأ مالوش مثيل ومُلك مفيش في عظمته على وجه الأرض😮
فقدموا الهدايا لسليمان عليه السلام وهمّ مفي قدامهم إلا إنهم ينفّذوا أوامر الملكة بكده،
فغضب سليمان جدا لإنهم أساسا تخيلوا إنه من طُلّاب الدنيا، وإن أموالهم ممكن تُغريه وتفتنه عن نشر دين الله، وإنهم استهانوا بكلامه فقال لهم:
أنا مش عايز أموالكم .. ربنا أعطاني أحسن وأعظم من إللي أعطاكم بكثير ..إنتوا إللي تفرحوا لما حد يعطيكم أموال وهدايا، لكن أنا لأ😤
"فَلَمَّا جَاءَ سُلَيْم

َانَ قَالَ أَتُمِدُّونَنِ بِمَالٍ فَمَا آتَانِيَ اللَّهُ خَيْرٌ مِّمَّا آتَاكُم بَلْ أَنتُم بِهَدِيَّتِكُمْ تَفْرَحُونَ "

وقال للرسول بلهجة تهديد قوية:
ارجع لقومك تاني بالهدايا دي، احنا هنجيلهم بجنود مش هيقدروا عليها وهنخرجهم من سبأ أذلة متهانين لو همّ مجوش مُنقادين مستسلمين لدين رب العالمين 👌
"ارْجِعْ إِلَيْهِمْ فَلَنَأْتِيَنَّهُمْ بِجُنُودٍ لّا قِبَلَ لَهُم بِهَا وَلَنُخْرِجَنَّهُم مِّنْهَا أَذِلَّةً وَهُمْ صَاغِرُونَ"

يا ترى بقى ملكة سبأ هتقاتل سليمان عليه السلام ، ولّا هتستسلم له؟

ده إللي هنعرفه الجزء الجاي إن شاء الله😁

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_الثانية_والأربعون
#قصة_سليمان_الجزء_الرابع
#إسلام_ملكة_سبأ

كنا واقفين المرة إللي فاتت عند سليمان عليه السلام لما قال لرُسل ملكة سبأ إنه هيأتيهم بجنود مش هيقدروا عليها وهيخرجوهم من أرضهم مذلولين،
لما الرسل مشيوا بقى من عند سليمان عليه السلام ووصلوا لملكة سبأ -ويُقال إن اسمها بَلقِيس- حكوا لها إللي شافوه عند سليمان عليه السلام،
فقالت أنا كنت متأكدة إنه مش هيكون زي ملوك الدنيا، واحنا مش هنقدر على قتاله فعلا ..
فقررت إنها تروح مع وفد من كبراء قومها عشان تسمع من سليمان عليه السلام عن الدين إللي هو بيدعو إليه ده،

سليمان عِرف إن الملكة هتيجي مع وفد لسليمان، سواء بقى عرف عن طريق الوحي أو عن طريق الهدهد أو هو نفسه استنتج كده، المهم إنه عرف وخلاص،
فعرض مهمة على أفراد الملأ بتاعه قال لهم:
مين فيكم يقدر يجيبلي العرش بتاعها قبل ما ييجوا عندنا هنا برغبتهم طائعين مستسلمين؟
"قَالَ يَا أَيُّهَا الْمَلَأُ أَيُّكُمْ يَأْتِينِي بِعَرْشِهَا قَبْلَ أَن يَأْتُونِي مُسْلِمِينَ"

غرض سليمان من طلبه ده إنه يورّيها جزء من قدرة ربنا وفضله عليه ونعمه العظيمة إللي وهبها له عز وجل 👌
فعفريت من الجن من جنود سليمان من جيش الجن قال بافتخار واقتدار وهمة عالية:
أنا هجيبهولك قبل ما تقوم من مقامك، يعني قبل ما تقوم من مجلسك ده وتتركه، أو قبل ما مجلسك يكون انفض باللي فيه وكل واحد يروح لحاله،
المعنى بالظبط على خلاف بين المفسرين لكن المقصود يقول هجيبهولك بسرعة جدا،
وأنا قوي هقدر أشيله، وأمين مش هضيع منه حاجة👌
"قَالَ عِفْريتٌ مِّنَ الْجِنِّ أَنَا آتِيكَ بِهِ قَبْلَ أَن تَقُومَ مِن مَّقَامِكَ وَإِنِّي عَلَيْهِ لَقَوِيٌّ أَمِينٌ"

☆ملحوظة:
العفريت هو المارد من الجن شديد القوة والدهاء والمكر والخُبث،
والعفريت من الجن ده أعلى في الخبث والدهاء والمكر من مَردة الجن، والمَردة أشد من الشياطين،
فباختصار:
الجن عموما كلهم كفار ما عدا فصيلة الجن المؤمن:
"وَأَنَّا مِنَّا الْمُسْلِمُونَ وَمِنَّا الْقَاسِطُونَ فَمَنْ أَسْلَمَ فَأُولَئِكَ تَحَرَّوْا رَشَدًا ۩ وَأَمَّا الْقَاسِطُونَ فَكَانُوا لِجَهَنَّمَ حَطَبًا "

لكن واحد تاني رد وقال :
أنا أجيبهولك في غمضة عين 👌
ربنا قال عنه:
"قَالَ الَّذِي عِندَهُ عِلْمٌ مِّنَ الْكِتَابِ أَنَا آتِيكَ بِهِ قَبْلَ أَن يَرْتَدَّ إِلَيْكَ طَرْفُكَ"
إللي عنده علم من الكتاب هو:
إما جبريل عليه السلام، أو هو صاحب صالح لسليمان عليه السلام عنده اسم الله الأعظم الذي إذا دُعِيَ به أجاب.

☆طب بما إنه مش جن وعنده قوة خارقة، هيجيب العرش في لمح البصر إزاي🤔
بالدعاء.. هيدعو الله باسمه الأعظم وهو موقن بالإجابة ويعلم إن الاسم ده إذا دُعِي الله به أجاب،
عشان كده ربنا وصفه بإنه عنده علم؛ لإن علم أسماء الله وصفاته من أعظم علوم التوحيد👌
فمجرد ما هيدعو هيلاقيه قصاده، وفعلا ده إللي حصل👌

في لمح البصر أو أسرع كمان بمجرد ما دعا باسم الله الأعظم سليمان عليه السلام لقى العرش قدامه!
فلما سليمان شاف عرش بلقيس قصاده أول حاجة عملها
كانت شكر النعمة👌
وكأنه بيقول:
مش هسمح للنعمة تلهيني عن ذكر الله وشكره،
مش هسمح للنعمة تفتني عن ديني،
أنا عارف إن النعم دي اختبار يا إما أشكر يا إما أجحد النعمة وأكفر، ولازم كل مرة أنجح في الاختبار ده،
وإللي بيشكر بيشكر لنفسه لإن ربنا كده كده غني عن العاملين،
وعبودية الشكر دي لمصلحتنا احنا لإن ربنا هيزيد الشاكر من فضله، واللي مش بيشكر النعمة مش هيضر ربنا بشيء..مش بيضر إلا نفسه👌
"فَلَمَّا رَآهُ مُسْتَقِرًّا عِندَهُ قَالَ هَذَا مِن فَضْلِ رَبِّي لِيَبْلُوَنِي أَأَشْكُرُ أَمْ أَكْفُرُ وَمَن شَكَرَ فَإِنَّمَا يَشْكُرُ لِنَفْسِهِ وَمَن كَفَرَ فَإِنَّ رَبِّي غَنِيٌّ كَرِيمٌ"

بعد كده وجّه سليمان أوامر للخدم بتوعه وقال لهم:
غيّروا في شكل العرش بتاعها شوية بحيث لما تيجي نخليها تشوفه ونشوف رد فعلها 👌
"قَالَ نَكِّرُوا لَهَا عَرْشَهَا نَنظُرْ أَتَهْتَدِي أَمْ تَكُونُ مِنَ الَّذِينَ لَا يَهْتَدُونَ"
والتغيير إللي حصل هنا يا جماعة كان تغيير في الشكل يعني يضيف جواهر مثلا بطريقة معينة، لكن مش تغيير في أصل العرش؛ لأنه مش بتاعه عشان يتصرف فيه👌

☆طيب ليه سليمان أمر جنوده اصلا إنهم يغيروا التغيير ده🤔
إحنا عارفين إن سليمان عليه السلام ذكي وسريع البديهة،
من يوم ما كان بيحكم مع سيدنا داود في الخصومات،
فهو حب يعرف هل عندها وعي وبصيرة وهتقدر تتعرف علي عرشها رغم التغييرات إللي عملوها فيه دي،
ولّا هتكون من النوع إللي بيدخل عليه الخدع والتزييف وبيتلخبط ومش بيعرف يميز الحق من الباطل👌

فلما جاءت ملكة سبأ لسليمان استقبلها وورّاها العرش وسألها:
ده العرش بتاعك👈
فقالت: كأنه هو😳
هي مقدرتش تقول 《لأ》 لأنه يشبه العرش بتاعها جدا، وفي نفس الوقت مش قادرة تقول《أيوة》 لأن العرش بتاعها في سبأ، والمسافة بين فلسطين وبين سبأ كبيرة...فإزاي العرش بتاعه

ا يبقى موجود هنا😕
" فَلَمَّا جَاءَتْ قِيلَ أَهَكَذَا عَرْشُكِ قَالَتْ كَأَنَّهُ هُوَ "

☆فهي كانت امرأة صادقة في بحثها عن الحق؛ لأنها لو قالت لأ مش عرشي وعرشي أحسن 😤
كان هيظهر إنها مخادعة وعايزة تخدع سليمان عليه السلام وتتظاهر إنها تابعة له عشان تحافظ على ملكها،
ولو كانت قالت لأ ده مش عرشي، يبقى هي أنكرت بدون بيّنة، وكل ده هيبين شخصيتها قصاد سليمان عشان يعرف يتعامل معاها إزاي😈
فكلامها كان دقيق قالت : كأنه هو 🤔
فالعلماء قالوا لعل ربنا وفّقها للهداية بسبب صدقها ده👌
سليمان عليه السلام كان أمر الجن إنهم يبنوا قصر عظيم من الزجاج ، وأمَر إن تحت القصر الزجاجي يكون في مية بتجري بغزارة،
وكان سليمان عليه السلام قاعد في القصر ده ومعاه خدمه من الجن والإنس والطير مستني الملكة تدخل عليهم، وبالفعل الخدم وصلوها عند القصر..
"قِيلَ لَهَا ادْخُلِي الصَّرْحَ فَلَمَّا رَأَتْهُ حَسِبَتْهُ لُجَّةً وَكَشَفَتْ عَن سَاقَيْهَا"
يعني لما وصلت ، بصت كده، وتخيلت إنها لازم هتمشي في المية عشان تدخل، فرفعت ملابسها الساترة الطويلة الملامسة للأرض وكشفت عن الساقين بتوعها عشان تعدي لجوة من غير ما تبل هدومها،
☆واخدين بالكم🙂
امرأة كافرة وهدومها كانت واصلة للأرض👌

المهم،
سليمان نبهها إن دي مش مية، ده قصر معمول من الزجاج النقي جدا، والمية تحت منه👌
"قَالَ إِنَّهُ صَرْحٌ مُّمَرَّدٌ مِّن قَوَارِيرَ"
وكان غرض سليمان عليه السلام من بناء القصر ده إنه يخليها تشوف مُلك هو أعظم من ملكها وبالتالي مفيش حاجة ممكن تُصرفه عن نشر دين الله،
وكمان عشان ميكونش عندها شك في قدرة ربنا بعد كده وعطاؤه وفضله لعباده الموحدين،
مش بقى عشان إنه يشوف رجلها فيها شعر ولّا لأ زي ما الإسرائيليات افترت عليه والعياذ بالله من سوء أدبهم وفحش لسانهم مع أنبياء الله 😑
بعد ما بلقيس شافت كل ده قالت:
"رَبِّ إِنِّي ظَلَمْتُ نَفْسِي وَأَسْلَمْتُ مَعَ سُلَيْمَانَ لِلَّهِ رَبِّ الْعَالَمِينَ"
أسلمت بلقيس مع سليمان لله وحَسُن إسلامها،

مفيش بقى أي دليل على إن سليمان عليه السلام تزوجها أو لأ، ومفيش دليل برده إن أم بلقيس كانت من الجن،
وإن الجن مكنوش عايزين سليمان يتزوجها😅
كل الكلام ده مفيش عليه أي دليل صحيح ولا يضرنا الجهل به👌
☆سؤال بقى،
ليه سليمان عليه السلام هدد ملكة سبأ بالحرب ؟ وليه يفرض عليها الدين بالقوة؟
وليه ما قبلش الهدية و بادل الإحسان ده بإنه يدعوها بالحسنى واللين بدل القوة والتهديد🤔

¤سليمان عليه السلام مَلِك ومش أي مَلك ، ده ربنا جمع له مُلك الأرض كلها بالجن والطير كمان،
والمَلِك لابد أن تكون له الطاعة والانقياد، وخصوصا لو كان بيؤمر بالخير وتوحيد الله، فمينفعش حد يخالفه في كده🤷‍♂️ وإللي يخالف يجب قتاله، لإنه بُيفسد المملكة الواسعة دي وبينشر الكفر ويفتن باقي الموحدين في مُلكه👌
عشان كده كان كل فترة يطلع مع جيشه للجهاد في سبيل الله عشان ينشر التوحيد👌

فبلقيس ملكة سبأ استقلت عن مُلك سليمان بعبادتها للشمس فكان واجب على سليمان عليه السلام إنه يرجعها تحت حكمه مرة ثانية👌
وهو لم يُرغِم بلقيس على الدخول في الإسلام نفسه بالعافية، فالجهاد أصلا ربنا لم يشرعه عشان يُرغم الناس إنهم يدخلوا في الإسلام،
ولكن عشان تكون كلمة الله هي العليا في الأرض، وتكون السيطرة لشريعة الإسلام على العباد والمعاش والقوانين؛
لإن الإسلام دين عادل، وأي حكم تاني غيره فيه ظلم للناس، وإللي عاوز يستمر على عقيدته براحته، لكن في ظل حُكم الإسلام👌
فعرض عليهم في الأول الإسلام وإنهم ينقادوا تحت حُكمه هو تحت شريعة رب العالمين ويتركوا عبادة الشمس،
فلما حاولوا يغرُوه بالمال جت رسالته التانية عليه السلام شديدة اللهجة بإعلان القتال عشان يضم حكم بلادهم تحت حكم الشريعة؛ لإن عادة الملوك إنهم بيفضّلوا الدنيا ومش بيتنازلوا عن مُلكُهم أبدا وبيقاتلوا عليه لحد آخر نَفَس ومش ييبقوا عايزين حد يقول لهم ده حلال وده حرام ولا يتحكم فيهم،
إلا لو حد اضطرهم لكده بالقوة، والأقوى هو إللي يكسب.. ودايما من حق الأقوى فعلا إن هو اللي يفوز طالما أثبت إنه أقوى👌
فلو أخدنا بالنا هنلاقي إن الملأ قالوا لبلقيس: إحنا أصحاب قوة فعادي إننا نحارب سليمان لو خيار الحرب هو اللي انتي شايفاه..
فهمّ كانوا مستعدين للحرب كعادة الملوك..
لكن بلقيس كانت عاقلة وعايزة تحافظ على ملكها فاختارت الحيلة،
وطبعا لو كان سليمان عليه السلام دعاها للإسلام من غير ما يخوّفها بالحرب مكنتش استجابت ولا بدأت تبحث عن حلول أصلا💁‍♂️
في ناس كده، ماينفعش معاها غير منطق القوة🤷‍♂️
ومش بس في الحرب، ده حتى في المعاملات اليومية، في نوعيات كده لازم تكلمهم بمنطق القوة عشان يسمعولك، وياخدوا كلامك على محمل الجد👌
ده غير كده إن الأمور بتتقاس بالنتائج هل كانت إيجابية ولّا سلبية، يعني نتيجة تصرف سليمان عليه السلام ده كانت إيه؟ مش كانت إنهم أسلموا بإرادتهم في الآخر بعد ما جاءوا بالخوف من القوة وشافو

ا وسمعوا بنفسهم عن التوحيد وآمنوا بدون تهديد أو سلاح؟
وهو ده المطلوب، فهو كان أدرى الناس بأفضل طريقة للتعامل..
أقرب لكم المعنى😁
مثلا لما نشوف طبيب بيفتح بطن مريض ويقطع من لحمه ويخيط ويكوي والدم سايل والمنظر مرعب😳
لو شوفنا ظاهر الموضوع هنقول:
إيه الطبيب إللي معندهوش قلب ده 😰
لكن لما تكون النتيجة إن المريض ده عاش بسبب أفعال الطبيب هنشكر الطبيب😊
حتى في الدعوة إلى الله والدفاع عن دينه بالحجج والبراهين، ممكن تشوف واحد بيناظر واحد تاني بأسلوب -من وجهة نظرك انت- أسلوب شديد أو عنيف أو هجومي..
ونسيت إنه بيوجه له هو أسلوب الكلام ده مش ليك إنت،
فتفكر إن إللي بيدعي ده بينفر الناس و...و... فتدخل في الحوار وتبدأ تهاجم لأنك أخدت الكلام على نفسك والكلام غير موجه ليك أصلا،
يعني ممكن جدا يكون بيعامله بالأسلوب المناسب له دلوقتي في اللحظة دي لأنه بيعمل بقول قول رسول الله ﷺ : خاطبوا الناس بما يعقِلون👌..
فأكيد لكل نوع معين من البشر أسلوب خاص للتعامل معاهم بشكل يحقق المصلحة بأفضل نتايج💁‍♂️
فسليمان عليه السلام لو كان بيتكلم مع عامة شعب سبأ خطابه كان هيكون مختلف عن خطابه مع بلقيس والملأ بتاعها، لأن دعوة الملوك غير دعوة عوام الناس👌

☆عندنا بقى ملحوظة مهمة نختم بيها قصة سليمان مع ملكة سبأ😊
احنا طبعا شوفنا حكمة بلقيس ملكة سبأ، وشوفنا إزاي الوزراء كانوا متسرعين وهي كانت أحكم منهم،
وربنا أقر حكمتها لما قالت:
"إن الملوك إذا دخلوا قرية أفسدوها وجعلوا أعزة أهلها أذلة" فقال: "وكذلك يفعلون"
يعني ربنا بيقول إن كلام ملكة سبأ فعلا صحيح وده حال ملوك الدنيا،، فكون القرآن يُقر معلومة على لسان ملكة فده تشريف للملكة دي إنها مش واحدة عادية👌
وده بيدل على حكمتها وعلى فقه الواقع عندها ومعرفتها بعواقب الأمور،
وإلا اشمعنى يعني هي عارفة الملوك بيعملوا إيه والوزراء اللي معاها مايعرفوش🤨
فواضح إن هي نفسها كامرأة لها عقلية مختلفة عن باقي النساء مكّنتها من سياسة الشعب وحكمه في الفترة دي بحكمة و رُشد،
وحتى العلماء كمان أثنوا على إنها اتصرفت بحكمة ووازنت بين المصالح والمفاسد وطلعت بحل يخليها تتبين هل سليمان فعلا من ملوك الأرض إللي بيفسدوا؟ ولّا هو نبي وعايز الدين ومصلحة العباد؟
لكن يا جماعة برغم كل ده ومهما كانت بلقيس حكيمة وأفضل من رجال كتير فهي حالة شاذة وماينفعش نقيس على الشاذ👌
لإن القواعد مش بتتبني على الاستثناءات...
فمش معنى إن الملأ الرجال هنا كانوا متسرعين وأخدتهم الحمية والتسرع للحرب والصدام، إن ده عادة الرجال كلهم على طول الخط، لأ، لكل قاعدة شواذها،
ولو راجعنا التاريخ هنلاقي أمثلة كتييير جدا على حكمة الحكام والوزراء الرجال،
بعكس أمثلة قليلة جدا للنساء،
فهي حكمتها ورُشدها في القصة كلها واضحين وواضح إنها مختلفة عن باقي إللي حواليها،
لكن اختلافها المميز ده ما يخليناش نعتبرها قاعدة بقى والناس تقيس عليها ويقعدوا يطالبوا بتولية النساء لأمور الحكم والخلافة😅
كل واحد له دوره زي ما قلنا في مثال الجندي والضابط المرة إللي فاتت👌

ياترى بقى إيه إللي حصل مع سليمان بعد كده،

ده إللي هنعرفه الجزء الجاي إن شاء الله😊

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_الثالثة_والأربعون
#معجزة_موت_سليمان
#خبر_النبي_دانيال

اتكلمنا المرة إللي فاتت عن قصة سليمان مع ملكة سبأ، وشوفنا إن سليمان عليه السلام كان بينشر دين ربنا في الأرض،
واستمر الحال ده مع سليمان عليه السلام فترة من الزمن، وكان عنده جيش من الجن زي ما قلنا قبل كده،
فاكرين لما قلنا إن ثاني مسجد بُني في الأرض كان المسجد الأقصى وإللي بناه كان يعقوب عليه السلام🤔
خلال السنين دي كان المسجد اتخرّب، فداود عليه السلام كان بدأ يجدده، لكنه مات قبل ما يكمّل تجديده،
فأوصى سليمان عليه السلام إنه يكمل من بعده تجديده وترميمه،
فأمر سليمان عليه السلام الجن بإنهم يتولوا مهمة البناء والترميم دي،
وكان عليه السلام بيُشرف عليهم بنفسه، فربنا كان مسخّر الجن لخدمة سليمان عليه السلام ، سواء المؤمن منهم أو الكافر،
"وَمِنَ الْجِنِّ مَن يَعْمَلُ بَيْنَ يَدَيْهِ بِإِذْنِ رَبِّهِ ۖ وَمَن يَزِغْ مِنْهُمْ عَنْ أَمْرِنَا نُذِقْهُ مِنْ عَذَابِ السَّعِيرِ"
كان مجموعة منهم بيبنوا له القصور والتماثيل وأحواض كبيرة يُجمع فيها الماء،
ومجموعة تانية كانوا بيغوصوا في البحار يستخرجوا له منها الجواهر واللآلئ،
"يَعْمَلُونَ لَهُ مَا يَشَاءُ مِن مَّحَارِيبَ وَتَمَاثِيلَ وَجِفَانٍ كَالْجَوَابِ وَقُدُورٍ رَّاسِيَاتٍ"
وبيعملوا كمان أعمال مختلفة، و مكنش حد يقدر يخرج عن أمر سليمان عليه السلام،
"وَمِنَ الشَّيَاطِينِ مَن يَغُوصُونَ لَهُ وَيَعْمَلُونَ عَمَلًا دُونَ ذَٰلِكَ وَكُنَّا لَهُمْ حَافِظِينَ"
و أي واحد من الجن يعصي أمر سليمان عليه السلام، كان بيتم ربطه بالأغلال والسلاسل أو ربنا بيعذبه بالنار.
الشياطين كانوا بيقولوا للناس في زمن سليمان عليه السلام إنهم كانوا بيعلموا الغيب،
وكانت الناس مصدقاهم لأنهم كانوا بيشوفوا قوة الجن وقدرتهم الخارقة،
وكان سليمان بيقول لهم إن ده مش صح، فلا يعلم الغيب إلا الله، لكن الناس مكنوش مقتنعين،
فسليمان عليه السلام دعا ربنا إنه يُخفِي عن الجن موته عشان يثبت للناس إن الجن كدابين في زعمهم العلم بالغيب..
كان سليمان عليه السلام كل فترة بيختلي بنفسه عشان يتعبّد لله ومبيسمحش لحد إنه يقطع عليه خلوته الإيمانية دي،
وكان بياخد معاه إللي بيحتاجه من الأكل والشرب،
زي ما رسول الله ﷺ كان بيخرج يتعبد في غار حراء قبل البعثة😁
فسليمان عليه السلام عرف إنه هيموت قريب؛ لأن الأنبياء زي ماقلنا قبل كده بيتم تخييرهم قبل ما يموتوا بين الموت وبين المُكْث في الدنيا 😊
ففي يوم كان سليمان عليه السلام بيتابع شغل الجن في ترميم المسجد الأقصى وبيشرف عليهم بنفسه عشان مايكسلوش عن الشغل👌

☆إيه ده، يعني المسجد الأقصى هو هيكل سليمان إللي اليهود بيقولوا عليه🤨
لأ طبعا،
موضوع هيكل سليمان ده أصلا حاجة من اختراع اليهود مش موجودة 🙄
يعني المسجد حاجة والهيكل ده حاجة تانية،
والدليل على كده إن رسول الله ﷺ قال عن سليمان عليه السلام إنه بنى بيت المقدس، إللي هو المسجد الأقصى زي ما قلنا من شوية👌
ومعنى البناء هنا يعني هو إللي أعاد بناء المسجد الأقصى، يعني هو كان موجود ولكنه أعاد بناؤه،
ده غير إن في كتب اليهود في اختلاف بين علماء اليهود على مكان الهيكل وعلى شكل الهيكل نفسه عامل إزاي😶
يعني متخيلين ناس بتدور على حاجة مش عارفين هي إيه أصلا🤦‍♂️

◇طب ثواني كده، يعني إيه أصلا هيكل سليمان🤨
الهيكل يعني المعبد، وفي اللغة العِبرية الهيكل معناه بيت الإله، واليهود بيقولوا إن الهيكل ده هو أهم مكان للعبادة، وإن سليمان بناه لهم ولديانتهم،
وبيقولوا إنه موجود تحت المسجد الأقصى، عشان كده بيحفروا تحته دلوقتي عشان عايزين يوقعوه😑

المهم،
سليمان عليه السلام كان واقف وساند دقنه على العصاية بتاعته بيراقب سير العمل وهمّ شايفينه باصص عليهم طول الوقت،
و هو في الوضع ده ربنا قبض روحه 🙊
الجن شايفينه مفتح 👀 وباصص عليهم...لكن هو في الحقيقة ميت😅
واستمر الوضع كده فترة زمنية.. أد إيه بالضبط؟ محدش يعرف، في علماء قالوا أسبوع .. علماء تانيين قالوا شهر.. علماء غيرهم قالوا سنة😶
العلم عند الله والموضوع مش هيفيدنا كثير، أهم حاجة نعرف إنه قعد فترة ميّت على الأقل أسبوع،
والجن مكنتش تعرف وعمالين يشتغلوا بدون راحة، ومحدش كان يقدر يقرب من سليمان عليه السلام،
وطبعا همّ لم يشكّوا إن سليمان عليه السلام كان ميت، مع إنه مكنش بياكل ولا بيشرب؛ لأنهم عارفين الأنبياء وضعهم مختلف،
يعني ممكن ربنا بيعطيهم القدرة في أوقات معينة إنهم يستغنوا عن الأكل والشرب،
زي موسى عليه السلام لما صام ثلاثين يوم وأفطر وبعدها صام عشر أيام تانية بأمر من ربنا ومكنش بياكل ولا يشرب،
وخدوا بالكم إن أجساد الأنبياء لا تتحلل ولا تأكلها دواب الارض، يعني أجساد كوووول الأنبياء والرسل زي ماهي في القبور لم تتعفن ولم تتحلل👌
فربنا أرسل دودة الأرض تأكل عصا سليمان عليه السلام إللي هو كان ساند عليها،
فربنا أرسل دودة الأرض واسمها 《الأَرَضَة》 وقعدت تأكل عصا سل

يمان عليه السلام إللي هو كان ساند عليها بدقنه،
فقعدت تاكل فيها من تحت لحد ما العصا ضعفت وبقت هشة فوقعت، وسقط سليمان عليه السلام على الأرض..
"فَلَمَّا قَضَيْنَا عَلَيْهِ الْمَوْتَ مَا دَلَّهُمْ عَلَىٰ مَوْتِهِ إِلَّا دَابَّةُ الْأَرْضِ تَأْكُلُ مِنسَأَتَهُ"
وهنا عرفت الجن إن سليمان عليه السلام كان ميت بقاله فترة وهمّ ميعرفوش حتى هي أد إيه ولا من إمتى،
واعترفوا بحسرة إنهم فعلا لو كانوا يعرفوا الغيب مكنوش استمروا في التعب والذل والمشقة المستمرين كل ده 😅
"فَلَمَّا خَرَّ تَبَيَّنَتِ الْجِنُّ أَن لَّوْ كَانُوا يَعْلَمُونَ الْغَيْبَ مَا لَبِثُوا فِي الْعَذَابِ الْمُهِينِ"
وطبعا الناس عرفت إن الجن كانوا بيكذبوا عليهم وإنهم مايعرفوش الغيب ولا حاجة😏

مدة حكم سليمان عليه السلام كانت أربعين سنة، ومدة حكم داود عليه السلام كانت أربعين سنة..فيكون مجموع المُلك النبوي المستقر الوحيد لبني إسرائيل هو ثمانون عام فقط👌

☆صحيح ...هو فين بني إسرائيل مسمعنالهمش صوت خلال السنين دي كلها😮
في عهد داود عليه السلام كان بنو إسرائيل بيحبوه وكان ملك عادل،
سليمان عليه السلام كان عادل وكمان كان ملك قوي ربنا سخّر له كل حاجة فمين مستغني عن عمره عشان يقف في وجه ملك زي سليمان عليه السلام😅

◇إيه بقى إللي حصل بعد موت سليمان عليه السلام 🤔

ابن عباس رضي الله عنه بيقول إن بعد موت سليمان عليه السلام، الجن بدأت تبحث تحت عرش سليمان عن الكتب التي كان بيكتبها كاتب سليمان،
ويُقال إن الكاتب ده كان اسمه "آصف"، وكان بيكتب فيها كل شيء عن سليمان عليه السلام، عن الملك وعن الشريعة والوقائع والأحداث.. كل شيء.. زي دواوين الحكم كده مثلا..
فلما الشياطين أخرجت الكتب دي، بدأوا يكتبوا ما بين السطور كلمات السحر والكفر ودعاء غير الله،
وخرجوا على الناس إللي همّ بني إسرائيل، وقالوا لهم إن دي كتب سليمان،
وإنه كان مسخّر الجن والطير والريح بالسحر ده،
والناس قرأت الكتب لقت فيها فعلا كلمات السحر والكفر بالله ودعاء غير الله ، فصدقوا للأسف،
"وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ"
وانتشر بين الناس إن سليمان عليه السلام كان بيتعامل بالسحر وكان كافر بالله🙊
فربنا دافع عن سليمان عليه السلام وقال إنه لم يكفر ولم يكن ساحر وإن الشياطين هم إللي كفروا بيعلموا الناس السحر، وبيعلموهم السحر إللي أُنزل على المَلَكِين هاروت وماروت👌
"وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ"

☆مين هاروت وماروت دول🤨
المَلَكِين دول ربنا أنزلهم وجعلهم في صورة رجلين صالحين في مدينة بابل في العراق،
مهمتهم إنهم يدافعوا عن سليمان عليه السلام من الكلام إللي بيتقال عنه إنه ساحر،
فكان الملكين بيعلموا الناس السحر ويوضحوا لهم إن في فرق بين السحر وبين النبوة،
وإن السحر ده ممكن أي حد يتعلمه، أما النبوة فهي اختيار من الله عز وجل ومش حاجة مُكتسبة،
يعني مفيش واحد يعبد ربنا لزمن معين أو يتعلم علم معين فربنا يرزقه النبوة ويبقى نبي، لأ...النبوة والرسالة اصطفاء خااالص من عند ربنا👌
لكن السحر ممكن تتعلموه من أي حد وألاعيبه بتبقى كده و بنوريها لكم من باب إنكم تتعلموا الشر مخافة أن تقعوا فيه، وعشان تعرفوا الفرق بين النبوة وبين السحر،
عشان لما يجيلكم نبي من أنبياء الله لا يتهمه أحد بإنه ساحر وتعرفوا تميزوا هل هو نبي والا ساحر،
لكن لازم تكونوا فاهمين إن السحر ده كُفر بالله، و احنا فتنة واختبار وابتلاء من الله ليكم باللي بنعلمهولكم ده،
فخدوا بالكم هتضيعوا نفسكم لو مسمعتوش تحذيرنا ليكم واستخدمتم السحر إللي احنا علمناهولكم ده👌
"وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ"
طيب بني إسرائيل عملوا إيه😬
للأسف مسمعوش الكلام وبقوا بيتلقوا العلم ده ويطبقوه، وبقوا يتعلموا من السحر الأمور إللي يفرقوا بيها بين الزوج وزوجته ويخلوهم في كرب وشقاق،
"فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ"
لكن ربنا علمنا أمر مهم جدا، وهو إن مفيش ضرر بيتم عن طريق السحر ومس الجن إلا بإذن الله،
يعني مش هيحصل أي أذى غير لما ربنا يأذن بكده.. وعلمنا إننا نلتزم بالأذكار وبكثرة قراءة الرقية الشرعية وقراءة القرآن بالذات سورة البقرة،
"وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ ۚ وَيَتَعَلَّمُونَ مَا يَضُرُّهُمْ وَلَا يَنفَعُهُمْ"

استمر الإعتقاد بإن سليمان عليه السلام ساحر حتى عهد رسول الله ﷺ، فلما تكلم رسول الله ﷺ عن قصة سليمان وإنه من أنبياء الله، اليهود قالوا:
ده كان ساحر وكافر بالله😏
فنزل القرآن يُبرئ سليمان عليه السلام ويحكي عن إللي شرحناه من شوية ونزلت الآية:
"وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ وَمَا

كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ "

بعد ما الشياطين فتنت الناس بالافتراء الكاذب على سليمان عليه السلام انتشر الفساد والكفر في بني إسرائيل تااااااني😑
وانقسم الناس على أنفسهم، وبدأ الظلم بينهم والتعدي على بعض والبُعد عن كل الفضائل👌
احنا عارفين إن بني إسرائيل كانوا ١٢ سِبْط .. 12 قبيلة يعني لو تفتكروا..
فانقسم الـ١٢ سِبْط لقسمين:
عشر أسباط في قسم اتفقوا على قيادة معينة، وسكنوا شمال فلسطين وكَوّنوا مملكة إسرائيل،
والقسم التاني: الاتنين الأسباط إللي فاضلين،
دول اتفقوا على قيادة تانية خالص، وسكنوا جنوب فلسطين وكَوِّنوا مملكة يَهُوذَا..
وكان السِبْطين دول هما:
◇سِبْط يَهُوذا إللي كان فيه المُلك قبل كده زي داود وسليمان عليهما السلام،
◇والسبط التاني سِبْط بنيامين.

مملكة بقى الشمال استمرت حوالي 200 سنة، كلها كُفر وظلم وفساد😶
لحد ما ربنا سلّط عليهم الآشوريين إللي جاءوا من العراق، وأفنوا مملكة إسرائيل، وأخدوا معظم شعب إسرائيل وبعتروه وشتتوه في العالم .. باعوهم هنا وهناك وشردوهم لحد ما فنوا عن آخرهم،
وبكده انتهى تمااااااما من الدنيا بكاملها كل نسل العشرة أسباط دول👌
يعني مابقاش في التاريخ حاجة اسمها يهودي من نسل الأسباط العشرة..
يبقى اتبقى عندنا فقط "ممكلة يهوذا" إللى موجودة في الجنوب، وإللي فيها بيت المقدس.
ومن هنا جت تسمية اليهود، نسبةً إلى نسل يهوذا إللي فيه المُلك..
واسم اليهود مكنش معروف أيام موسى عليه السلام ولا حتى في باقي الأنبياء من بعده،
والفَرعين بتوعهم دول من الأسباط -إللي همّ يهوذا وبنيامين- همّ إللي هيكملوا معانا الأحداث لحد ما ربنا يرسل عيسى عليه السلام👌
استمرت ممكلة يهوذا بعد سقوط مملكة إسرائيل حوالي مائة وخمسين سنة، خلال الـ١٥٠ سنة دي حصلت أحداث في مملكة يهوذا،
الأحداث دي من الإسرائيليات،
لكنها من قسم الإسرائيليات اللي لا تُصَدَّق ولا تُكَذَّب زي ما شرحنا قبل كده، يعني ممكن أن تُروَى عادي،
وهي موجودة في البداية والنهاية لابن كثير، فأنا هقولها من باب فقط إننا نربط الأحداث ببعض عشان نبقى متخيلين الأحداث ماشية إزاي😁
《《انتشر الفساد في بني إسرائيل، فربنا بعث فيهم نبي من تاني اسمه شَعِيَا أو أشْعِيا، الاتنين صح.. وكان مَلِك بني إسرائيل في الزمن ده اسمه "حِزْقِيا" وكان مطيع للنبي أشعِيا، لكن بنو إسرائيل كانوا فاسدين كعادتهم..
في يوم مرض الملك وكان في رِجله قُرحة،
في نفس الوقت ده كان ملك بابل مُتجه لبيت المقدس ومعاه ستمائة ألف جندي عشان يغزو بيت المقدس والملك ده كان اسمه "سَنْحَاريب"،
والناس خافت، ووصل الخبر لملك بني إسرائيل الطيب، فسأل الملك النبي أشعِيا: ربنا أوحى لك بإيه عن الجنود دي😥 فالنبي قال: لم يوحي إليّ بشيء عنهم.. ثم نزل وحي على النبي بعدها إنه يقول للملك إنه يكتب وصيته عشان خلاص هيموت قريب..
فقعد الملك يدعي ربنا إنه يُمدّ له في أجله، وكان ملك صالح زي ما قلنا، فربنا استجاب دعاؤه، وأمد له في عمره خمسة عشرة سنة👌

☆بس مش الآجال مكتوبة ؟ ومش احنا ماينفعش ندعي بطول العمر🤨
أيوة مكتوبة في اللوح المحفوظ، وفعلا زي ما ربنا قال:
"وَلِكُلِّ أُمَّةٍ أَجَلٌ فَإِذَا جَاءَ أَجَلُهُمْ لا يَسْتَأْخِرُونَ سَاعَةً وَلا يَسْتَقْدِمُونَ"
لكن ده عن الأجل النهائي، فمكتوب عند ربنا إن أجله النهائي هيكون بعد 15 سنة،
وطولة العمر الزيادة دي مكتوب إنها هتحصل، وإن عمره كده كده كان هيبقى تام بال15 دول،
لكن من أسباب تمام العدد بشكل كامل هيكون في دعوة من العبد الصالح ده ربنا هيستجيب لها،
فكل ده مكتوب في اللوح المحفوظ وإللي هو في علم الله وحده واحنا بنعرفه فقط بعد ما بيقع مش قبلها..
فبالتالي الملك الطيب ده ماتأخرش عن أجله لحظة👌

وبالنسبة للدعاء بطولة العمر:
فاحنا يجوز عادي في ديننا الدعاء بطول العمر لنفسنا أو لغيرنا،
لكن نقيد الدعاء ده بأمور صالحة تقرّبنا من ربنا؛ لإن فيه ناس كل ما زاد عمرها زادت بُعدا عن الله، والنبي ﷺ لما كان بيدعي لحد من الصحابة بطولة العمر كان بطبيعة الحال معروف إن عمرهم كله في طاعة..
فاحنا نقول مثلا في الدعاء :
ربنا يطوّل عمرك في طاعة الله، أو في الخير ، أو فيما يرضي الله وهكذا.
فالملك الصالح شكر ربنا على استجابة دعاؤه وضاعف من تضرعه وذله لله،
فربنا شفى له قدمه من القُرحة وأهلك جيش مَلك بابل ، ماعدا سنحاريب الملك، ومعاه خمسة من أصحابه،
وكان في أصحابه دول واحد اسمه 《بُخْتُنَصَّر》 🙊
فأخد مَلك بني إسرائيل الطيب الناس الستة المهزومين دول، وربطهم في القيود، وجعل الجنود بتوعه يطوفوا بيهم وسط الناس في البلد إذلالًا لهم..
وبعدين ربنا أوحى للنبي أشعِيا إنه يقول للملك إنه يرسل الست أشخاص دول لبلادهم عشان يحكوا إللي حصل لهم وينذروا قومهم ويخوفوهم منه..
فلما رجع سنحاريب لبابل وحكى إللي حصل معاهم، السحرة والكهنة قالوا له:
ماحنا قلنا لك عن رب الناس دي وإن محدش بيقدر عل

يه من زمان😑
وعاش سنحاريب بعدها سبع سنين ومات..
لما خلصت الـ15 سنة جاء أجل ملك بني إسرائيل النهائي فمات،
بعد موته بني إسرائيل فجَرُوا وفسقوا لأبعد الحدود، وانتشر شرَّهم في كل اتجاه.. فأوحى الله لنبيه أشعِيا، إنه يوعظهم وينذرهم ويذكرهم بالله، وإنه هيعاقبهم لو خالفوا أمره واستمروا في طغيانهم..
فلما خلص كلامه معاهم ومواعظه، راحوا قايمين عليه واعتدوا عليه.. كانوا عايزين يقتلوه..
فهرب منهم وطلع يجري لحد ما عدى على شجرة ، فاتفلقت قدامه عشان يدخل فيها فدخل واختبأ منهم،
فالشيطان مسك طرف ثوبه وخلاه بره الشجرة ، فشافوه، فنشروا الشجرة والنبي أشعِيا جواها، وقتلوه قاتلهم الله😞
ومع ذلك ربنا أرسل لهم نبي تاني اسمه أَرْمِيا،
وكان برده بيوعظهم وينهاهم عن فسقهم و شرهم وإنهم لو مستجبوش ربنا هيرسل عليهم ملك جبار قاسي يخرب بلدهم ويقتلهم، وفعلا أرميا نفّذ كلام ربنا كله وحذرهم ، لكنهم كذبوه وقالوا عليه مجنون😑》》

¤طب هو ليه ربنا يحذر بني إسرائيل أصلا 🤔
عشان يعلمهم ويعلم كل الأمم إللي هتيجي بعد كده، إن مهما كانت جرائم الإنسان وذنوبه عظيمة وكتيرة، فلو تاب وأصلح ومشي في الطريق الصح، ربنا هيتوب عليه ويقبله ويعفو عنه،
لكن لو أصر على طغيانه وعصيانه، ربنا هيعاقبه ويعذبه بألوان العذاب،
يسلط عليه حد يُؤذيه مثلا، أو يبتليه بمرض يُذله ويقعده، أو يبتليه بفقر يفضح ستره ويحوِجه للسؤال مثلا...
ولو حد فلت من عقاب الدنيا لحكمة إلهية، فعقاب الآخرة موجود👌

في الوقت ده كان مَلك بابل في بلاد العراق معروف بقوته وبطشه،
فكان يقود جيوشه عشان يحتل البلاد، الملك ده كان اسمه 《بُخْتُنصّر》🙊

☆فاكرين لما قلنا إن الأرض حكمها أربعة ملوك: اثنين كفار واثنين مؤمنين؟
الاتنين الكفار كانوا: النمرود و بُخْتُنصّر.
والاتنين المؤمنين كانوا : ذو القرنين وسليمان بن داود عليهما السلام.
وإذا أراد الله شيئا هيأ أسبابه👌
فاكرين بني إسرائيل عملوا إيه في سنحاريب وبختنصر من كم سنة فاتت وذلوهم إزاي🤭
لما بنو إسرائيل عصوا أمر الله وطغوا في الأرض وبدأوا يقتلوا الأنبياء، ربنا ألقى في قلب بُخْتُنصّر إنه يروح يغزو بني إسرائيل مرة ثانية👌
فاتحرك بالجيش بتاعه في اتجاه بيت المقدس.. ففي الطريق لما وصل لدمشق، أهل دمشق خافوا منه، فقدموا له الهدايا والأموال واتصالحوا معاه،
فتركهم بُخْتُنصّر واتجه لبيت المقدس، فمَلِك بني إسرائيل في الزمن ده اتعاهد مع بُخْتُنصّر برده بنفس الطريقة زي ما أهل دمشق عملوا معاه،
وأخد بختنصر بعض أثرياء بني إسرائيل معاه، وقرر إنه يرجع للعراق..
فساعتها بنو إسرائيل اعترضوا على ملكهم وإللي عمله ده وغضبوا إنه إزاي يعمل كده.. فراحوا قاتلينه ونقضوا الصلح مع بُخْتُنصّر😐
فبختنصر رجعلهم تاني وحاصر مدينة القدس فترة، فلما طال الحصار استسلموا لبختنصر، وفتحوا أبواب المدينة..
دخل بختنصر المدينة وحرَقها وقتل المقاتلين وسبى النساء والأطفال، وحرَّق التوراة، وخرَّب الحصون وهدم محاريب العبادة..
يعني أنزل بيهم العذاب والعقاب إللي فعلا يستحقوه👌
"وَقَضَيْنَا إِلَىٰ بَنِي إِسْرَائِيلَ فِي الْكِتَابِ لَتُفْسِدُنَّ فِي الْأَرْضِ مَرَّتَيْنِ وَلَتَعْلُنَّ عُلُوًّا كَبِيرًا"
مش بس كده، ده كمان بختنصر أخد معاه إلى أرض العراق ٤٠ ألف من اليهود كعبيد، عشان يخدموا أهل بابل زي ماخدموا الفراعنة في مصر😏
وفي بعض اليهود هربوا منه لمصر في الوقت ده.. وبكده انتهى تماااما الحكم اليهودي في فلسطين👌
همّ اليهود هيرجعوا تاني بعدين زي ماهنشوف، لكن مش هيرجعوا كحكام للبلد،
"فَإِذَا جَاءَ وَعْدُ أُولَاهُمَا بَعَثْنَا عَلَيْكُمْ عِبَادًا لَّنَا أُولِي بَأْسٍ شَدِيدٍ فَجَاسُوا خِلَالَ الدِّيَارِ ۚ وَكَانَ وَعْدًا مَّفْعُولًا "
☆فكان العلو الأول لبني إسرائيل👆 في زمن داود وسليمان عليهما السلام..
فلما كفروا وطغوا وأفسدوا، ربنا أرسل عليهم إللي يهلكهم ويذلهم، إللي هو بختنصر وجنوده،
إللي هي: "بَعَثْنَا عَلَيْكُمْ عِبَادًا لَّنَا أُولِي بَأْسٍ شَدِيدٍ فَجَاسُوا خِلَالَ الدِّيَارِ "
وأي حد سواء مسلم أو كافر فهو عبد لله غصب عنه👌

وبالنسبة للعُلو الثاني، فلعله يكون هو إللي احنا شايفينه دلوقتي بيحصل لليهود ، في أرض فلسطين وأجزاء من لبنان ومن سوريا،
بقى ليهم اتصالات إقتصادية على أعلى مستوى في العالم، وبقى في دول كبيرة واقفة معاهم، وبقى ليهم هيبة سياسية ووزن في صناعة القرار على مستوى العالم،
ولسه بيخططوا في التوسع أكتر وأكتر عشان يقيموا دولة إسرائيل الكبرى المزعومة بتاعتهم... وكل ده داخل ضمن العُلو في الأرض ،
"ثُمَّ رَدَدْنَا لَكُمُ الْكَرَّةَ عَلَيْهِمْ وَأَمْدَدْنَاكُم بِأَمْوَالٍ وَبَنِينَ وَجَعَلْنَاكُمْ أَكْثَرَ نَفِيرًا"
فاحنا حاليا مستنيين البشارة الثانية إللي جت في الآية بعد كده، إن ربنا يرسل عليهم إللي يعلمهم الأدب تاني ويعيدوا الكرة تاني عليهم، زي ما ربنا قال:
"فَإِذَا جَاءَ وَعْدُ الْآخِرَةِ لِيَسُوءُوا وُجُوهَكُمْ وَل

ِيَدْخُلُوا الْمَسْجِدَ كَمَا دَخَلُوهُ أَوَّلَ مَرَّةٍ وَلِيُتَبِّرُوا مَا عَلَوْا تَتْبِيرًا"
فإذا جاء وعد الآخرة يعني: المرة الثانية 👌

المهم،
كان من ضمن إللي بُخْتُنصّر أسرهم: نبي من أنبياء الله اسمه دانيال..
فلما مشي بختنصر من مدينة القدس ووصل للعراق بالأسرى، مسك النبي دانيال وحطه في بئر كبير وحط معاه أسدين عشان ياكلوه صاحي ويقتلوه😶

حصل إيه مع النبي دانيال؟

ده إللي هنعرفه الجزء الجاي إن شاء الله😁

☆☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_الرابعة_والأربعون
#قصة_عُزَير
#مقدمة_عن_ذي_القرنين

وقفنا المرة إللي فاتت عند بُخْتُنصّر لما أدخل أسدين مع النبي دانيال في بئر كبير عشان ياكلوا ويقتلوه وهو صاحي،
لكن سبحان الله الأسدين لم يؤذياه بالعكس ده قعدوا يلحسوا فيه😮
ربنا أيّد نبيه بمعجزة من عنده تُثبت إنه نبي 👌

☆وطبعا بُخْتُنصّر مش مستوعب ده اسمه إيه إللي حصل ده😳
ماهو أصله مش فاهم إن كل المخلوقات ماتقدرش تعمل حاجة إلا بأمر ربنا وإن ربنا هو مُسبب الأسباب ومالك الملك يقدر ينزع الأسباب ويعطلها في الوقت إللي يريده،
ميعرفش إنما أمره إذا أراد شيئا أن يقول له كن.. فيكون.. ميعرفش:
" إن الأمة لو اجتمعت على أن يضروك بشيء لن يضروك إلا بشيء قد كتبه الله عليك"👌
خرج دانيال من البئر سليم مُعافى😊
فعمل خاتم ونقش على الفص بتاعه صورة رجل بين أسدين والأسدين بيلحسوه، عشان مينساش نعمة ربنا عليه بإنه أنقذه في الوقت العصيب ده👌
من ضمن إللي بيُحكَي في قصة النبي دانيال، إن بُخْتُنصّر شاف رؤيا ونسيها، فسأل عنها دانيال،
فحكاها له دانيال زي ما شافها وفسرها له كمان، وكان تفسيرها بشارة ببعثة رسول الله ﷺ، وإن مُلك أمة التوحيد والإسلام هيبلغ مشارق الأرض ومغاربها👌

◇قصة دانيال عليه السلام👆 من الإسرائيليات التي لا تُصدق ولا تُكذب،
لكن الصحابة لما فتحوا مدينة تُسْتَر في فتوح فارس،
ودخلوا بيت مال الهُرمُزان إللي هو قائد الجيش الفارسي في معركة القادسية،
لقوا فيه تابوت، كان جواه جثة لرجل أنفه طولها ذراع، كان أهل الفرس لما ينقطع عنهم المطر كانوا بيستسقوا بجثة الراجل ده،
فأرسل الصحابة لعمر بن الخطاب رضي الله عنه يحكوا له عن قصة الجثة دي،
فقال لهم عمر: إن ده جسد نبي لإن الأرض والنار مش بياكلوا أجساد الأنبياء..
ولما لقوا الخاتم في يده، الصحابة سألوا الناس عنه، فالناس قالوا لهم إن دانيال ده كان ملك من الملوك السابقين أسَره وحصل كذا كذا.. وحكوا لهم حكايته مع الأسدين إللي على الخاتم،
فعرف الصحابة إنه النبي دانيال..
وحفر المسلمون ثلاثة عشر قبرا في النهار،
ودفنوا جثة النبي دانيال في واحد منهم بالليل عشان محدش يعرف مكانه ويطلعه تاني، ويحافظوا على التوحيد،
ويُبطلوا عبادة التوسل بالأموات إللي تعتبر شرك بالله تعالى👌
☆بالمناسبة :
مدينة تُسْتَر بالفتح، مع إن معظمنا كان بيمسعها بالضم "تُستُر" لكن لما بحثنا عنها بالتشكيل، لقينل الموجود كان بالفتح في تفسير ابن كثير، ومكنش موجود بالضم خالص.. فهل هي ليها تشكيلين ، واحد بالضم وواحد بالفتح؟ الله أعلم🤷‍♂️
لكن المؤكد إن التشكيل بالفتح ثابت👌

نرجع بقى شوية لبيت المقدس بعد خروج بُخْتُنصّر منه..
أصبح بيت المقدس خراب والناس مقتولين فيه، فمرّ على بيت المقدس رجل صالح من بني إسرائيل،
وكان راكب على حمار بتاعه، وكان معاه سلة فيها أكل يخصه.. كان فين ورايح فين؟ محدش يعرف😅
لكن المهم إنه لما دخل المدينة وشاف الناس مقتولة والمدينة خراب، قال في نفسه وهو بيتعجب:
إزاي الناس دي ربنا هيحييها مرة تانية😮
هو مكنش بيشك في قدرة ربنا.. لكنه كان مستغرب🤔
هقول لكم زي إيه عشان أقرب لكم المعنى👌
عارفين لما تشوفوا إعلان عن شقة هتكون عاملة إزاي بعد التشطيب 🤔
أو عمارة مثلا هتكون عاملة إزاي لما تتبنى وتخلص خالص وشكلها في الإعلان خرافي وشديد الإبهار،
وانتم على أرض الواقع مجرد شايفين يادوب الأساس هو إللي بيتحفر.. فيبقى فيه تعجب جواكم كده:
إزاي الناس دول هيعملوا العمارة لحد ما توصل في الآخر بالمنظر ده 😳
هو انتم هنا معندكوش شك إنها فعلا هتتبنى، لكن انتم بس مستغربين مندهشين متعجبين👌
ولله المثل الأعلى ...
أهه ده كان إحساس الرجل الصالح، ويقال إن اسمه أَرميا النبي إللي اتكلمنا عنه المرة إللي فاتت أو إنه اسمه عُزيْر إللي احنا عارفينه من القرآن،
بس العلماء اختلفوا هل عُزَير ده رجل صالح ولا نبي🤔
لكن المشهور عند أهل التفسير إنه رجل صالح واسمه عُزَير،
فلما شاف عُزيْر خراب المدينة وشاف كمية جثث القتلى وشدة المقتلة فيهم، استغرب إزاي ربنا هيرجع الأرض دي عمار مرة تانية😮
"أَوْ كَالَّذِي مَرَّ عَلَىٰ قَرْيَةٍ وَهِيَ خَاوِيَةٌ عَلَىٰ عُرُوشِهَا قَالَ أَنَّىٰ يُحْيِي هَٰذِهِ اللَّهُ بَعْدَ مَوْتِهَا"
فربنا توفاه لمدة 100 سنة، ثم أحياه من تاني.. وخلال المائة سنة دي أحداث كتيير حصلت...
بختنصر كان مات خلاص،
وحصلت معركة بين أهل بابل في العراق وبين الفُرس في إيران، وانتصر الفُرس على البابليين بمساعدة اليهود إللي كانوا في بابل عبيد زي ما قلنا،
وضم الفُرس حُكم فلسطين للدولة الفارسية، وانتهى الحكم البابلي العراقي لفلسطين، ودخل فيها الحُكم الفارسي..
وكان بعض اليهود رجعوا لأرض فلسطين في الوقت إللي هي فيه تحت الحكم الفارسي، وبدأوا يعمَّروا المدينة مرة تانية....
كل ده وعُزير ميت🙊
فبعد ما المائة سنة خلصوا ربنا بعثه وأحياه من تاني.. فلما قام، كان متخيل إنه نام كام ساعة بس كده،
فربنا سأله على ل

سان ملك من الملائكة في هيئة بشر يعني غالبا: انت بقالك أد إيه نايم؟
رد عُزير : يوم أو جزء من يوم🤔..
"قَالَ كَمْ لَبِثْتَ قَالَ لَبِثْتُ يَوْمًا أَوْ بَعْضَ يَوْمٍ"
فقال له: انت فاهم غلط، انت بقالك 100 سنة نايم،
"قَالَ بَل لَّبِثْتَ مِائَةَ عَامٍ"
وعشان تتأكد من كلامي بُص للأكل إللي معاك كده وبص على حمارك،
ويُقال إن كان معاه عنب وتين وعصير،
فلما بص عليهم لقى كل حاجة زي ماكانت كإن فعلا عدى عليهم كام ساعة فقط زي ما هو نفسه قال، فاستغرب إزاي بتقول 100 سنة ومفيش حاجة اتغيرت🤨
"فَانظُرْ إِلَىٰ طَعَامِكَ وَشَرَابِكَ لَمْ يَتَسَنَّهْ"
لكن لما بص على حماره لقاه بقى عضم كإنه فعلا ميت بقاله سنيين طويلة،
فنادى المَلَك على عظام الحمار فاستجابت وبقت تركب على بعضها لوحدها، وعُزير واقف مذهول إزاي في لحظات المَلَك ألبس العظام بالعروق والأعصاب واللحم وبعدين الجلد لحد ما أحيا الحمار من تاني بإذن الله..
"وَانظُرْ إِلَىٰ حِمَارِكَ وَلِنَجْعَلَكَ آيَةً لِّلنَّاسِ ۖ وَانظُرْ إِلَى الْعِظَامِ كَيْفَ نُنشِزُهَا ثُمَّ نَكْسُوهَا لَحْمًا"
"فَلَمَّا تَبَيَّنَ لَهُ قَالَ أَعْلَمُ أَنَّ اللَّهَ عَلَىٰ كُلِّ شَيْءٍ قَدِيرٌ" 👌
وهو ده "عينُ القين" إللي اتكلمنا عنه قبل كده في قصة طلب إبراهيم عليه السلام من ربنا إنه يُريه كيف يُحي الموتى😊
ركب عُزَير على حماره ومِشي وسط الناس ، فاستغربهم واستغربوه! مين ده! ومين دول!😳
كل حاجة متغيرة !... فحاول إنه يخمن مكان بيته، لحد ما وصل عند بيت وكان على باب البيت امرأة عجوز ،
فسألها ده بيت عُزير؟ فبكت المرأة العجوز وقالت:
بقالي زمن ماسمِعتش حد بيقول اسم عُزير، الناس هنا كلهم نسيوه خلاص..
فقال لها : أنا عُزير ..ربنا أماتني 100 سنة وبعدين بعثني تاني النهاردة، فالمرأة العجوز أخدته وراحت بيه لمجلس بني إسرائيل عشان تقول لهم عنه، والمرأة دي كانت أَمَة من الإماء بتخدم في بيت عُزير من زمان،
حكت لهم القصة بتاعته، فطبعا بنو إسرائيل مصدقوش كلامها..
وكان من ضمن اللي سمعوا الحكاية منها هناك ابن عزير ، فقال:
إن أبي بين كتفيه شامة سوداء... يعني زي علامة لونها إسود كده ومميزة وأنا عارفها من زمان🤔
فكشف عُزَير عن كتفه، فشافوا العلامة وعرفوا إنه عزير!
وكان عُزير أعلم واحد فيهم بالتوراة بعد ما كان حرَّقها وأفناها بُختنصر،
ففرحوا بيه جدا وكان بالنسبة لهم آية عظيمة جدا بالفعل زي ما ربنا كان قال في قصته من شوية " َلِنَجْعَلَكَ آيَةً لِّلنَّاسِ".. يعني كل إللي عاش وسطيهم من نفس جيله كلهم عجائز، حتى الأَمَة إللي خدمت في بيته، وحتى ابنه إللي كان أصغر منه،
كلهم عواجيز إلا هو فقط إللي شاب، على هيئته من يوم ما اختفى👌
بني إسرائيل يعملوا إيه بقى😬
مش مثلا يزدادوا إيمانا بالله بسبب المعجزة دي..! لأ، ده قالوا : عُزَير ابن الله😐
☆يعني إللي في دمهم في دمهم😑
لكن الحق يتقال برده، دي كانت طائفة معينة فقط من اليهود إللي قدسوا عُزير وقالوا إنه ابن الله، وكان منهم يهود المدينة إللي كانوا على عهد رسول الله ﷺ، سبحانه وتعالى عما يقولون علوًّا كبيرا..
و في الأزمان إللي جت بعد عزير اليهود تبرأت من القول ده،
لكن في الأصل القول ده كان موجود فيهم ومنشأه كان من عندهم👌
إيه إللي حصل لعُزير بعد كده ..وعاش كم سنة...؟
الله أعلم 🤷‍♂️
مفيش أخبار عن الموضوع ده؛ لأن زي ماحنا عارفين إن ربنا بيحكي لنا أخبار الأمم السابقة عشان ناخد منها العبرة💁‍♂️
يعني لما نقرأ أي قصة من قصص الأنبياء في القرآن، لازم تسيب أثر في حياتنا بالعبرة إللي أخدناها منها فعلا ،
ونبدأ على أساسها نتغير للأحسن للي يرضي ربنا عنا،
وإلا العبر دي كلها هتكون حُجة علينا يوم القيامة بدل ما تكون حجة لنا👌

عاش بنو إسرائيل في بيت المقدس تحت الحُكم الفارسي حوالي 207 سنة 🤔،
لحد ما غزا القائد الروماني الكبير الإسكندر المقدوني فلسطين، وأزال الحكم الفارسي، وبدأ الحكم الإغريقي في فلسطين...
وبنو إسرائيل كل الفترات دي محكومين وتابعين لكل الحكام إللي بيحكموا فلسطين👌

☆إيه ده😳...معنى كده إن الإسكندر المقدوني ده هو ذو القرنين😲

هو في ناس بتخلط بين الاتنين وبتقول إن الإسكندر الأكبر ده هو ذو القرنين😅
والكلام ده غير صحيح .. لإن الإسكندر المقدوني الإغريقي كان كافر بيعبد الأصنام، زيه زي الدولة الفارسية بالضبط👌
ولكن على الرغم من كفره إلا إنه كان ملك عادل ولعل ده إللي بيخلي الناس تلخط بينهم..
وفترة حكمه لفلسطين إللي كانت مدتها ٢٦٩ سنة، كان فيها علوم كتير وازدهار في جوانب المعيشة وغيره، بشكل أبهر اليهود إللي كانوا في فلسطين، فبدأوا يتعلموا لغة الإغريق وثقافتهم..
وانقسم اليهود لفرقتين:
الفرقة الأولى: فرقة متأَغرقة، يعني بتتبع الإغريق في كل حاجة حتى الوثنية 🤦‍♂️
☆يعني مش مثلا ياخدوا الحلو ويسيبوا الوحش، لأ، ده أخدوا كل شيء عن الإغريق😑
مش بس يتعلموا ثقافة الإغريق وعلومهم، لأ أخدوا عنهم كمان عبادة الأوثان، وهمّ

أصلا أهل كتاب وعندهم الأنبياء،
ومش بس كده بقى، دول حرَّفوا التوراة إللي هي مُحرّفة أصلا من قبل كده عشان توافق ثقافة الإغريق 😅
آه أومال إيه😀
مش لازم يشجعوا تجديد الخطاب الديني زي عندنا كده😬 وكإن تجديد الخطاب الديني معناها نسف أعمدة وأركان الدين الأولاني وإقامة بيت جديد على أنقاضه😑
يمكن حِجتهم في ده زي حِجة بعض المسلمين في زماننا إللي بيتبعوا الغرب في كل حاجة برده و بيقلدوهم حتى لو كان في أمر فيه مخالفة للعقل والمنطق والفطرة السليمة ، زي مثلا تقليعة لبس الهدوم المقطعة🙄
أو أمْر فيه مخالفة للدين، زي تقليد أهل الفسق بتوعهم في اللبس والزينة والمُوبقات، وزي إن البنت يكون لها صاحب أو الولد يكون له صاحبة😐
ومتخيلين إن هو ده التقدم والحضارة لإن دي أفعال نقلوها من بلاد متحضرة ومتقدمة في النواحي المعيشية والعلمية،
فبقوا متخيلين إن تقليد أي شيء غربي حتى استعمال الكلمات باللغات الأجنبية في الحوار اليومي العادي ده كده بقى عنوان الرقي والتحضر💁‍♂️
ليه أنا كمسلم ربنا أكرمني بالإسلام، آخد كل حياة الكافر بكل إللي فيها و أخلّي حياتي نسخة منها😑

☆عارفين..معلومة كده عالسريع..
في القرون الوسطى، أوروبا كانت في أشد عصور جهلها،
في حين إن المسلمين في الأندلس كانوا في قمة حضارتهم في كافة مناحي الحياة.. لدرجة إن أبناء ملوك أوروبا كانوا بييجوا يتعلموا في جامعة قرطبة،
وكان الأمراء بيدخّلوا كلمات باللغة العربية وسط كلامهم عشان يتفاخروا بإنهم يعرفوا اللغة بتاعة أكثر ناس على وش الأرض عندهم حضارة في الزمن ده، إللي همّ المسلمين👌
أهه ده إللي بيحصل لكل أمة مهمزومة مبهورة بأي أمة أقوى منها😞
فاحنا المفروض نفصل بين الحلو والوحش، والحرام والحلال،
نترك الأمور الخبيثة المخالفة للدين والفطرة والعقل،
وعادي مفيش مشكلة نستفيد بالأمور الطيبة من عندهم مادام مش بتخالف ديننا،
حتى في حديث بيُروَى عن رسول الله ﷺ بيقول فيه:
"الْكَلِمَةُ الْحِكْمَةُ ضَالَّةُ الْمُؤْمِنِ فَحَيْثُ وَجَدَهَا فَهُوَ أَحَقُّ بِهَا"
هو أه الحديث ضعيف لكن معناه صحيح 👌

المهم ده كان حال الفرقة الأولى المتأغرقة...
الفرقة الثانية بقى: هي إللي فضلت على التوراة المُحرفة التحريف العادي😅

◇التوارة اتحرفت لأنها اتكتبت بعد موت موسى عليه السلام بسبعمائة سنة 😮
فقعدوا يجيبوا كلمة من هنا على كلمة من هنا...واحنا شفنا أصلا أخلاق بني إسرائيل كانت عاملة إزاي😑
فكانوا يزوّدوا وينقصوا باللي يوافق هواهم،
وكانوا بدأوا بكتابة التوراة لما راحوا العراق أسرى وكان بختنصر حرق لهم التوراة زي ما قلنا المرة إللي فاتت،
وكان قائد الفرقة التانية دي واحد اسمه "يًهُوذا المُكابِي"، واليهود بيعتبروه بطل لإنه ثبت واتمسّك بالتوارة –المحرفة قديما أصلا- في ظل اتِّباع معظم باقي اليهود في أرض فلسطين للإغريق والتوراة المحرفة حديثا😅

استمر حكم الإغريق ٢٦٩ سنة زي ما قلنا لحد ما في دولة كبيرة جدا في الوقت ده وهي الدولة الرومانية غزت فلسطين ودخلت فيها وحكمتها وحكمت اليهود إللي فيها،
وكان اليهود من أيام ما ساعدوا الفُرس وهم عندهم زي حُكم ذاتي كده🤔
لكن لما الدولة الرومانية غزت فلسطين قضت على الحكم الذاتي بتاع اليهود ده، وأصبح اليهود تابعين لحكم الدولة الرومانية👌
بعد حوالي ثلاثين سنة، دخل في اليهودية زعيم من الزعماء الرومان اسمه "هيرُودِس"،
والزعيم ده كان ظالم وفاسد وشديد البطش بسكان فلسطين بما فيهم اليهود، وكان الجميع بيكرهوه😑
لكن من أعماله إنه جدد بناء المسجد الأقصى ووسّعه..
وكان هيرودس حاكم لفلسطين في زمن زكريا ويحيى عليهما السلام إللي هنعرف قصتهم إن شاء الله بعد ما نتكلم عن بعض قصص حصلت في بني إسرائيل قبل زكريا عليه السلام😊

طيب إيه حكاية ذي القرنين بقى🤔

ده إللي هنعرفه الجزء الجاي إن شاء الله 😁

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_الخامسة_والأربعون
#ذو_القرنين

وقفنا المرة إللي فاتت عند سؤال : مين هو ذو القرنين😁

قلنا قبل كده إن في أربعة حكموا الأرض، أولهم كان النمرود.. والثاني هو ذو القرنين.
ذو القرنين كان عبد صالح مسلم موحد لله، يُقال إنه أسلم مع إبراهيم عليه السلام وطاف بالكعبة مع إبراهيم وإسماعيل، لكن مفيش دليل على كده، ده اجتهاد لبعض المفسرين، وبالتالي احنا مانعرفش زمنه إيه بالتحديد، إللي يهمنا من قصته العبرة 👌
كان سبب ذكر قصة ذو القرنين في القرآن إن مُشركي مكة كانوا عايزين يتأكدوا إن محمد ﷺ رسول من عند ربنا فعلا ولّا لأ، فقالوا: خلونا نسأل اليهود ..
فراحوا لليهود في المدينة وسألوهم: نعرف إزاي إذا كان محمد صادق ولا كاذب🤔
فاليهود قالوا لهم: اسألوه عن تلات حاجات:
وكان من ضمن الأسئلة التلاتة: إنهم يسألوه عن مين هو الملك إللي طاف الأرض..
فراح المشركين يسألوا رسول الله ﷺ ، فقال لهم رسول الله ﷺ إنه هيقول لهم الإجابة بكرة، ونسي يقول إن شاء الله زي ما قبل سليمان عليه السلام نسي يقولها، قبل كده،
فاكرين😁
وكل يوم يقول لهم هقول لكم بكرة وينسى، ورسول الله ﷺ لا ينطق عن الهوى، يعني ماينفعش يقول لهم عن قصة ذي القرنين أي كلام من عنده كده وخلاص😅
لحد ما عدى ١٥ يوم -وفي رواية تانية شهر- ونزل القرآن يوضح مين هو الملك ده في سورة الكهف..
ونزلت الآية تعاتب النبي ﷺ على نسيانه قول إن شاء الله: "وَلَا تَقُولَنَّ لِشَيْءٍ إِنِّي فَاعِلٌ ذَٰلِكَ غَدًا *إِلَّا أَن يَشَاءَ اللَّهُ"

وطبعا واحد طاف الأرض كلها يعني قابل ناس كتير وحصل معاه أحداث كتير، فعشان ربنا يحكي لنا عنه كل حاجة هنحتاج لأجزاء كتيرة ومجلدات 😅
فربنا قالنا بس جزء من رحلته باللي يفيدنا وناخد منه العبرة 👌
"وَيَسْأَلُونَكَ عَنْ ذِي الْقَرْنَيْنِ قُلْ سَأَتْلُو عَلَيْكُمْ مِنْهُ ذِكْرًا"
طيب هو ذو القرنين اسمه الحقيقي إيه؟
واشمعنى يعني لقبه كان ذو القرنين بالذات؟
طيب وبلده الأصلي كان إيه؟...واتولد سنة كام...و...و...و؟
كل الحاجات دي اختلف فيها العلماء وزي ما قلنا مش هتفيدنا في حاجة... هي من باب : علمٌ لا ينفع وجهلٌ لا يَضر🤷‍♂️
☆ودي من ضمن العبر إللي في قصته:
إننا نتعلم مانسألش ولا ندوّر إلا عن الحاجة إللي هتفيدنا في ديننا وحياتنا..
عود نفسك في حياتك قبل ما تسأل عن حاجة في أمور الدنيا أو أمور الدين المسكوت عنها، تسأل نفسك سؤال:
هستفيد إيه لو عرفت🤔
وده هيمنع عنك شر كتير جدا وهيمنع عنك تضييع أوقات وطاقات انت محتاج لها أكتر👌
ولعل أهم فايدة هنستفيدها، إننا نجنب نفسنا إننا نتكلم فيما لا يعنينا، وهنكون وصلنا لمحاسن الإسلام وكمال الإيمان؛ لأن من حسن إسلام المرء تركه ما لايعنيه💁‍♂️

فاللي يهمنا نعرفه إن ذا القرنين كان ملك مسلم طائع لله،
ربنا مَكِّن لذي القرنين في الأرض وأعطى له مُلك عظيم ووهبه من كل شيء من كل شيء علم،
يعني وهبَه من كل علم وسيلة وطريقة يقدر يحقق بيها إللي هو عايزه،
"إِنَّا مَكَّنَّا لَهُ فِي الْأَرْضِ وَآتَيْنَاهُ مِنْ كُلِّ شَيْءٍ سَبَبًا "
يعني مثلا كان عنده ناس مترجمين بيتكلموا بلغات متعددة لأهل الأرض، لما يروح أي بلد يدعوا أهله للإسلام كان بيدعو الناس عن طريق المترجمين دول،
فذو القرنين كان هدفه المحدد هو نشر دين الله في الأرض وإقامة العدل بين الناس،
وبالرغم بقى من إن ربنا أعطى له علم عن كل حاجة فهو موقفش...منمش في الخط يعني😅
ربنا إداله بداية العلم وهو يطور ويتعمق أكثر لحد ما يُتقن العلم ده، وهو ده معنى:
"فَأَتْبَعَ سَبَبًا"
عارفين زي إيه في حياتنا دلوقتي؟
زي الإلتزام بالدين😊
ربنا ميسر لنا أسباب إننا نتعلم ديننا الصحيح واحنا على سريرنا في أوضة نومنا في التكييف وأكل وشرب رايح جاي، سواء عن طريق مقالات أو كتب إسلامية موجودة عالنت أو محاضرات عاليوتيوب أو...أو...أو ..
وهو ده السبب إللي ربنا أعطاه لنا زي ما أعطى ذا القرنين،
احنا بقى بنعمل إيه إلا من رحم الله😶
تلاقي مثلا إللي يقولك أصل الكلام كتير وانا مبحبش أقرأ الكلام الكتير، مع إنه تلاقيه عند الروايات الطويلة منشار قراية عادي جدا😀
تلاقي حد تاني يقولك أصل مفيش وقت، وهو بيضيع معظم يومه على فيسبوك وغيره😑
تلاقي حد تالت يقول لك أصل انا مبحبش أقعد كده وأقعد أسمع وبس...بحب الحوار والتفاعل كده،
لازم حد يتكلم معايا وجها لوجه عشان المعلومة تدخل... وحد رابع... وخامس....
وندّي بقى ضهرنا للوسائل إللي ربنا يسرهالنا للخير، ونقعد نشتكي ونسأل احنا ليه متأخرين كده وليه فاشلين وليه حاسين بالإحباط والهزيمة وكده
أهه هو ده الفرق بينا وبين ذو القرنين ..هو انتهز الفرص والنعم إللي ربنا أعطاها له وإحنا لأ👌
فلما ربنا يعطيك فرصة وسبب ووسيلة ميُسرة إوعى تفرط فيها...إوعى تتلكع..
لقيت ربنا فتح عليك سبب وباب إنك تتعلم دينك، أتبِع سَبَبًا... ادخل كمان واتعمق فيه لحد ما توصل لفوايده وكنوزه إللي تنفعك في حياتك وآخرتك..
لقيت سبب وباب إنك توجع أ

عداء الله.. كمل وأتبِع سببا..
وإوعي تكسل أو تأجل، لإنك ماتعرفش إمتى ربنا ممكن يسحب منك الوسيلة دي أو السبب والفرصة دي👌
حتى في العبادة.. لقيت نفسك ونشاطك وهمتك زايدة في قراءة القرآن، اقرأ ...ثم اقرأ...ثم اقرأ...
لقيت نفسك وهمتك في الصلاة، صلي .. وصلي.. وصلي... لقيت نفسك في مساعدة الناس ساعد على أد ما تقدر. ..
من الآخر: لما ربنا يديك فرصة لزيادة الحسنات، سواء علم أو تطبيق للعلم ده، امسك فيها بإيدك وسنانك👌
ودي بتكون من علامات حب وقبول ربنا للعبد وسعيه.. إنه يفتح له أبواب الخير وييسرها له ويزيده منها ويعينه عليها 👌
فكل ما هتستغل الفرصة ربنا هيبعت لك فرصة تانية وتالتة وعاشرة، وهيفتحلك أبواب الخير ورا بعضها😊

☆وده يدخّلنا في نقطة تانية مهمة🙊
وهي إن في ناس تسيب أبواب الخير إللي ربنا فاتحهالها بالفعل، وتروح تدوّر على أبواب الخير المقفولة في وشها، وتفضل واقفة قصادها تحاول تفتح فيها ومستنية تتفتح😕 طيب متسيبوا المقفول ومتنشغلوش بيه، واشتغلوا على المفتوح قصادكم دلوقتي😳
مثلا يعني:
◇شباب يقعدوا يقولوا عايزين نروح نحرر المسجد الأقصى والجهاد ذروة سنام الإسلام و...و...
طيب دي مقفولة دلوقتي لسببب أو لآخر، نعمل إيه بقى😐 نفضل من غير سعي خالص يعني؟
لأ، احنا نشتغل على نشر الوعي بالقضية وتصحيح مفاهيم الناس عن العقيدة والطاعات وأسباب النصر والهزيمة والإعداد، لحد ما الباب يتفتح😀

◇واحدة مثلا عايزة تنزل تروح دار لتحفيظ القرآن وتتعلم العلم الشرعي وأبوها ولّا زوجها مش موافقين...
السكة دي مقفولة طب تعمل إيه😕
توقف السعي خالص؟
لأ، تحاول تشوف سكة تانية، مثلا معلمة من على النت تحفظ معاها وتسمع الدروس العلمية💁‍♂️

◇واحد عايز يشتغل في مجال دعوة الأجانب غير المسلمين للإسلام، ومعندوش الإمكانيات دلوقتي لا لتعلم اللغات ولا للتواصل معاهم أصلا! يسيب الدعوة خالص؟
ما هو عنده باب دعوة المسلمين في جامعته أو مدرسته أو الحي بتاعه أو قرايبه مفتوح، ليه يسيب الباب المفتوح ويفضل منتظر المقفول يفتح😬
المشكلة إن الناس بقت بتيجي عند المقفول وتركب دماغها، وهي دي يعني هي دي 😤
لكن ذو القرنين مكنش زي الناس دي،
"آتيناه من كل شيء سببا...فأتبع سببا..." بس كده.. خِلصت🤷‍♂️

ذو القرنين بقى ماشي يطوف في الأرض...
أول مكان وصل له ذو القرنين كان عند مغرب الشمس... مكان كده لقى عنده بحر فشاف هناك الشمس بتغرب ورا البحر وكإنها بتغرق جوة البحر نفسه يعني،
زي لما وقت الغروب بنبقى قاعدين على البحر وبنحس كإن الشمس بتغطس جوة البحر زي كده تقريبا👈🌅
وفي المكان ده كان لقى ناس وكانوا كفار وظلمة..
"حَتَّى إِذَا بَلَغَ مَغْرِبَ الشَّمْسِ وَجَدَهَا تَغْرُبُ فِي عَيْنٍ حَمِئَةٍ وَوَجَدَ عِنْدَهَا قَوْمًا "

فربنا قال لذي القرنين=عن طريق ملك من الملائكة مثلا=
إن الأمر متروك لك تختار بنفسك تحكم فيهم بإيه ، سواء هتعفو عنهم بدون عقاب، أو هتعذبهم عقابا على كفرهم وظلمهم، فالقرار يرجعلك انت.
"قُلْنَا يَا ذَا الْقَرْنَيْنِ إِمَّا أَنْ تُعَذِّبَ وَإِمَّا أَنْ تَتَّخِذَ فِيهِمْ حُسْنًا"

☆في مقولة بتقول إيه: إذا دَعَتْك قدرتكُ لظلم الناس، فتذكر قدرة الله عليك👌
ربنا أعطى القوة والقدرة لذي القرنين وتركه يحكم فيهم بنفسه..
زي بالضبط لما ربنا بيعطي الأم القدرة والقوة وترك لها مسؤولية الأبناء، وهمّ ضعاف بطبيعة الحال،
فلما الأم تتعصب عليهم مثلا في مرة بدون 《وجه حق》 فتضربهم أو تؤذيهم وتتحكم فيهم بدون داعي وتقول هو كده😤
هتلاقي زوجها برده إللي ربنا إداله القوة والقدرة هو كمان وترك له مسؤولية زوجته في رقبته، يقوم يتعصب عليها ويقول لها مفيش خروج.. مفيش أكل... مفيش كلام .. 😤
وكله سلف ودين، لإن الديان عز وجل لا يموت،
فكما تدين تُدان👌
فدلوقتي ذو القرنين ربنا أعطاله القوة والقدرة إنه يعمل في الناس دي إللي هو عايزه،
فهو وقف وبدأ يفكر، لو أنا في وسطهم كنت أحب يتعمل فيّ أنا إيه؟.. فقرر إنه هيحكم بالعدل..
يعني الظالم يتجازى على ظلمه في الدنيا بقدر المستطاع، ولو مات ربنا هيحاسبه يوم القيامة على الأفعال إللي لسه ما اتعاقبش عليها،
قَالَ أَمَّا مَنْ ظَلَمَ فَسَوْفَ نُعَذِّبُهُ ثُمَّ يُرَدُّ إِلَى رَبِّهِ فَيُعَذِّبُهُ عَذَابًا نُكْرًا"
وإللي يتوب ويرجع ويُؤمن بالله هنكرمه ونوسع عليه وهنتكلم قصاد الناس عنه بشكل طيب وهنعامله بكل رفق ولين، ولو مات فله الجنة عند ربنا👌
"وَأَمَّا مَنْ آمَنَ وَعَمِلَ صَالِحًا فَلَهُ جَزَاءً الْحُسْنَى وَسَنَقُولُ لَهُ مِنْ أَمْرِنَا يُسْرًا"

☆العدل هو أساس استقرار ودوام أي ملك.. حتى مملكة الأسرة الصغيرة خالص دي،
لو في عدل في البيت بين الأبناء وبين الزوج والزوجة، هيكون في أمان، والأمان بيجيب استقرار 👌
مسمعتوش عن ناس كفار علاقتهم الزوجية بتستمر سنين طويلة مع إنهم كفار؟
ومسلمين بيوتهم بتتهد من أول كام شهر، مع إنهم مسلمين؟
لو بحثتم هتلاقوا إن السبب الرئيسي هو غياب العدل..
هتلاقي الزوج ب

يظلم زوجته وهتلاقي الزوجة يا إما بتستسلم للظلم لإنها مش قادرة تصده فبتيجي على نفسها وبتتحول مع الوقت لشبح إنسان عايش ميت دبلانة ومطفية وكلها حزن،
لا عارفة تربي ولادها، ولا ولادها حاسين بالأمان أو الدفء الأسري،
أو هتلاقي الزوجة بالعكس، ترد الظلم بظلم أكبر وتتسع دايرة الظلم أكتر وبرده الولاد يغيب عنهم الأمان أكتر وأكتر..
لكن لو في عدل، هتلاقي الأمان اتوجد... والحب اتولد.. فلو في عدل هيكون في استقرار وإنجازات...
عشان كده ربنا وضع لنا قاعدة أساسية في حياتنا عشان نؤسس للعدل سواء في الدولة أو حتى في البيوت قال لنا:
لو اختلفتم في شيء رجعوه لحكم الله ورسوله والحكم يمشي على الكل👌
"فَإِن تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُولِ إِن كُنتُمْ تُؤْمِنُونَ بِاللَّهِ وَالْيَوْمِ الْآخِرِ ۚ ذَٰلِكَ خَيْرٌ وَأَحْسَنُ تَأْوِيلًا "
لو طبقنا كلنا القاعدة دي في تعاملاتنا مع أصحابنا ومع أهلنا، حياتنا هتكون مستقرة جدا بإذن الله...
فاحنا عندنا الدواء بس مين يشربه😞

بعد ما ذو القرنين خلص مهمته في القرية إللي كانت عند مغرب الشمس ، اتحرك عشان يشوف باب تاني من أبواب الخير المفتوحة😊
"ثُمَّ أَتْبَعَ سَبَبًا"...
ذو القرنين موقفش عند رحلة المغرب ولا قال كفاية الإنجاز العظيم إللي أنا عملته ده مش هكمل بقى وخلاص على كده،
لأ، انطلق بالأسباب اللي ربنا وهبها له يكمل إنجازات و يدوّر على موضع تاني أو باب تاني من أبواب الخير..
"ثُمَّ أَتْبَعَ سَبَبًا"..
اتجه في رحلة ثانية جهة مَطلِع الشمس،
خلال رحلة ذو القرنين من المغرب للمشرق أكيد حصلت أحداث تانية، لكن زي ما قلنا هنركز على إللي ربنا أخبرنا بيه في القرآن عشان ده المهم إللي فيه العبرة👌
وصل ذو القرنين لمطلع الشمس، فلقى الشمس بتطلع على قوم عايشين في مكان لا فيه شجر ولا جبال ولا حتى بيوت يعيشوا فيها ، ومش كده وبس، ده حتى ماعندهمش ملابس يلبسوها تحميهم من الشمس،
"حَتَّى إِذَا بَلَغَ مَطْلِعَ الشَّمْسِ وَجَدَهَا تَطْلُعُ عَلَى قَوْمٍ لَمْ نَجْعَلْ لَهُمْ مِنْ دُونِهَا سِتْرًا "
فكانوا بيدخلوا في سراديب تحت الأرض أو يدخلوا في المية لحد ما الشمس تغرب وبعدين يمارسوا حياتهم،
فلما شافهم تعجب من حالهم جدا وإزاي عايشين كده😳

فعمل معاهم زي ما عمل مع القوم عند مغرب الشمس،
وطبعا هو معاه جيشه ومعاه المترجمين،
فبدأوا يعلموا الناس هناك ثقافة الأغراض الواقية من أشعة الشمس، زي البيوت وظلال الأشجار والمظلات مثلا والملابس وهكذا،
يعني علمهم إزاي يستتروا من حر الشمس بدل ما بيضطروا ينزلوا في السراديب وفي البحر لحد ما الشمس تغرب،
كل ده وربنا محيط بعمله وبما وهبه من قوة وسلطان في كل الرحلات دي.
"كَذَلِكَ وَقَدْ أَحَطْنَا بِمَا لَدَيْهِ خُبْرًا "

☆وهنا نستفيد إن رسالة ذو القرنين الإنسانية واحدة، ألا وهي العدل بين الخلائق👌
الكافر والظالم في قوم المغرب عنده زي الكافر والظالم في قوم المشرق، الاتنين بشر ليهم حقوق وعليهم واجبات، بالمثل..
يعني هو مش بيفضَّل حد على حد... مبدأه واحد في العدل بين الناس وإعطاء كل واحد إللي يستحقه ومحتاجله😊

خلّص مع قوم المشرق وبعدين كمّل..موقفش.. راح يدور على باب تاني من أبواب الخير يفَعّل فيه الأسباب اللي ربنا وهبها له👌
وصل في رحلته لمكان بين جبلين أو سدين معينين ...ثغرة...حتة فاضية بين جبلين...زي المثلث إللي
مالوش قاعدة كده《 \/ 》لقى في المكان ده ناس مش فاهمين أي لغة غير اللغة بتاعتهم همّ بس، بسب بُعدهم عن الناس في المكان البعيد ده،
"حَتَّى إِذَا بَلَغَ بَيْنَ السَّدَّيْنِ وَجَدَ مِنْ دُونِهِمَا قَوْمًا لَا يَكَادُونَ يَفْقَهُونَ قَوْلًا"
وذو القرنين معاه مترجمين، لكن مفيش ولا مترجم واحد فيهم فاهم من الناس دي أي حاجة🙊
فيُقال إنهم احتاجوا سبعين مترجم عشان ذو القرنين يفهم هم عايزين إيه😅

☆عارفين زي إيه🤔
لما مثلا أنا أكون بتكلم عربي وواحد تاني بيتكلم أُرْدو وأنا مش فاهمة الكلام..فنسأل في حد يقدر يترجم يا جماعة فييجي واحد ياباني يترجم الأْردو للياباني وأنا لسه مش فاهمة😅
فييجي واحد فرنسي يعرف ياباني فيترجم من اليابانية للفرنسية، وبعدين واحد يترجم من الفرنسية للإنجليزية وبعدين في الآخر يترجم من الإنجليزية للعربية وأنا أفهم،
فاحنا احتاجنا ثلاثة مترجمين عشان أفهم الكلام إللي بالأُردو ،
فالقوم إللي كانوا عند السد كانت لغتهم غريبة محدش يعرفها،
فكل واحد من المترجمين قعد يجمّع كلمة من هنا على كلمة من هنا على شوية إشارات لحد ما وصل المعنى لذي القرنين.

الناس دي كانوا عايزين إيه بقى من ذي القرنين وإللي خلاهم يصمموا إنهم يوصلوا له كلامهم🤔

ده إللي هنعرفه الجزء الجاي إن شاء الله 😊

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_السادسة_والأربعون
#يأجوج_ومأجوج

وقفنا المرة إللي فاتت عند الناس إللي مكنوش عارفين ولا لغة غير لغتهم ولكن صمموا إنهم يوصلوا رسالتهم لذي القرنين،
كانت إيه رسالتهم بقى 😁
قالوا:
يا ذا القرنين إن يأجوج ومأجوج قوم مفسدون في الأرض ...بيقتلوا ويظلموا ويخرّبوا كل حاجة يشوفوها😑
فاحنا عايزين منك خدمة، وهي إنك تجعل بينا وبينهم سد عشان ميخرجوش علينا ويفسدوا علينا معيشتنا...ومتخفش إحنا هنديك أجر كبير مقابل مساعدتك لنا😅
"قَالُوا يَا ذَا الْقَرْنَيْنِ إِنَّ يَأْجُوجَ وَمَأْجُوجَ مُفْسِدُونَ فِي الْأَرْضِ فَهَلْ نَجْعَلُ لَكَ خَرْجًا عَلَى أَنْ تَجْعَلَ بَيْنَنَا وَبَيْنَهُمْ سَدًّا "

☆السؤال هنا ..إيه إللي خلى الناس دي تطلب من ذي القرنين طلب زي ده أول ما قابلوه وهم ميعرفهوش...مش ممكن يكون ملك ظالم جاي يقتلهم وخصوصا إنه داخل عليهم بجيشه الجرار ومعاه معداته وآلاته🤔

السبب في كده هو نفس السبب إللي خلّى أصحاب يوسف عليه السلام في السجن يحكوا له عن رؤيتهم...
سّمْت الصلاح الظاهر عليه هو السبب👌
ماهو الناس الصالحين بيبان عليهم.. بيبان على شكلهم وعلى تصرفاتهم😊
مش ساعات تشوف واحد ولّا واحدة تحس إنه صالح وإنه شخص قريب من ربنا؟
مع إن دي حاجة قلبية غيبية منعرفهاش ولا يعلمها يقينا إلا الله، بس شكله بيقول كده سبحان الله... تصرفاته وكلامه بيقولوا كده👌
عارفين في حديث لرسول الله ﷺ بيقول:
"أَلا أُخْبِركم بِخيَارِكم ؟ الصحابة قالوا : بلى يا رسول الله.
قال: الذين إذا رُؤُوا ذُكرَ الله"

◇هل لما النساء بيشوفوا لبسك كمسلمة، بيذكروا الله ويتمنوا يلبسوا زيك؟... ولّا بيسألوكِ عن لبسك وشياكته وألوانه وجبتيه منين وبكام عشان يقلدوكِ؟
◇هل لما الناس بيشوفوا تصرفاتكم ويسمعوا كلامكم، بيذكروا ربنا وبيتمنوا إنهم يكونوا في أخلاقكم ودينكم؟
◇هل لما بيدخلوا على صفحاتكم الشخصية في الفيسبوك مثلا أو يقرأوا كتاب من تأليفكم، بيذكروا ربنا وبيبدأوا يسألوا في الدين وإزاي نقرب من ربنا،
ولّا بيذكروا المسلسل الفلاني ولا الفيلم العلاني ويسألوكم عن قصة شعركم دي بتاعة أنهي فنان أو أنهي لاعب كورة؟
أهو ده السّمت إللي بنتكلم عليه...
إن ظاهرك إللي يدل على تقوى وحياء وحسن خلق يخلي الناس يفتكروا ربنا👌

¤ملحوظة بقى قبل ما كلامي يتفهم غلط😶
كلامنا هنا عن الغالب الأعم، لكن طبعا دي مش قاعدة إن كل حد ظاهره الصلاح بيكون صالح بالفعل..
فيه ناس بتعرف تتلون وتستعمل وسائل للنصب على الناس باسم الدين..
وفيه نساء لابسة إسود في إسود ولا يفقهوا في الدين شيء مثلا...
في بنات مش محجبة ومتعمقين جدا في الدين ويمكن يكونوا حافظين للقرآن..
وممكن المنتقبة إسود في إسود دي ربنا يختم لها بخاتمة سيئة، وحصلت بالفعل وكانت داعية كمان للأسف ربنا يرحمها😞
وفي بنت أو شاب ممكن يكونوا ضايعين خالص وفي آخر لحظة في حياتهم ربنا يختم لهم بخاتمة حسنة..
أيوة برده بيحصل👌
لكن مش ده إللي بتكلم فيه نهائي😅
دي حالات شاذة ما اقدرش أحطها عشان أطلع منها قاعدة عامة أقيسها على البشر كلهم😊
لإننا بكل بساطة: مالناش غير الظاهر.. أحكم على الظاهر الواضح، لحد ما يتبين لي من سريرة الشخص ده إللي لسه مش واضحة، عكس الظاهر الواضح بتاعه ده👌
ومش أنا إللي بقول كده ده رسول الله ﷺ إللي بيقول😁
قال رسول الله ﷺ :
"لا تُصاحب إلا مؤمنا ولا يأكل طعامك إلا تقي"
إزاي هعرف إن اللي قصادي ده مؤمن ولّا تقي ودي حاجة قلبية لا يعلمها إلا الله🤔
بكلامه وتصرفاته، يعني من الظاهر 💁‍♂️
ثم ده الغالب زي ما بنقول لإن رسول الله ﷺ قال :
"ألا إن في الجسد مُضغة إذا صَلُحَت صَلُح الجسد كله وإذا فسدت فسد الجسد كله ألا وهي القلب"،
ويوم القيامة العبرة بالقلوب :
" يَوْمَ لَا يَنْفَعُ مَالٌ وَلَا بَنُونَ * إِلَّا مَنْ أَتَى اللَّهَ بِقَلْبٍ سَلِيمٍ "
فلو القلب في الدنيا سليم، الطبيعي إنه يظهر أثر سلامته دي من الأمراض والشرك على الجوارح، وهيبان في الشكل والتصرفات👌

☆ممكن واحدة تقول طيب ماهو ناس بيكون ظاهرها كويس ولما تعاشريها يتبين لك إنها مثلا نقاب على الفاضي ولا لحية على الفاضي أو مظهر متدين عالفاضي وبيعملوا الغلط🙄

طيب إيه رأيكم بقى إن ده مش ذنبهم😊
المشكلة مش في الملتحي ولا في المنتقبة ولا أي حد عليه مظهر من مظاهر الإلتزام... المشكلة فينا إحنا😑
احنا متصورين إن الناس دي ملايكة بقى ومبيغلطوش،
فلما يعمل حاجة نقول أاااه شوف الملتحي😡
شوف المنتقبة😠
احنا اللي ربطنا اللحية والنقاب بالإلتزام 《الملائكي》 ودي مجرد شريعة زي باقي شرائع الإسلام🤷‍♂️
واحد ولّا واحدة فيهم كل العِبر بس قدروا ينفذوا حاجة في الدين هياخدوا عليها حسنات فاحنا نقول:
لأ احلق لحيتك،
وانتِ اقلعي نقابك وخمارك.. يعني زوّدوا كمان معصية لمعاصيكم أو قللوا الحسنات بتاعتكم😶
الحسابات عند ربنا غير حسابتنا خاالص😅
لو الإنسان عمل حسنة وزنها زي وزن حبة الخردل ربنا هيجازيه عليها👌
"إِنَّهَا إِن تَكُ

مِثْقَالَ حَبَّةٍ مِّنْ خَرْدَلٍ فَتَكُن فِي صَخْرَةٍ أَوْ فِي السَّمَاوَاتِ أَوْ فِي الْأَرْضِ يَأْتِ بِهَا اللَّهُ "
فاللحية ملهاش ذنب ولا النقاب ليه ذنب،
الملتحي أو المنتقبة أيوة لازم يكونوا قدوة لأن العين عليهم بالذات،
بس معلش لا النقاب ولا اللحية عبارة عن أجنحة ملايكة الناس بتلبسها فبتكون معصومة🤓
وعلى فكرة كان في عهد الصحابة من زنى ومن شرب الخمر وكانوا ملتحين...فاحنا إللي محتاجين نغير مفاهمينا 👌

☆عارفين لو بعد الشرح ده كله 👆 حد فهم كلامي غلط هعمل فيه إيه🙊😳

نرجع بقى لذو القرنين،
لما كان سَمْت ذو القرنين من الصالحين الناس طلبوا منه المساعدة، وعشان يضمنوا إنه ميرفضش عرضوا عليه الأموال كأجر،
وطبعا ذو القرنين مش محتاج أي أموال، ده مَلَك شرق الأرض ومغربها😅
فقال لهم: مش عايز أجر ولا فلوس، أنا ربنا أعطاني نِعم أعظم من أي أموال👌
"قَالَ مَا مَكَّنِّي فِيهِ رَبِّي خَيْرٌ "
وده نفس كلام سليمان عليه السلام لملكة سبأ فاكرين😁
لما قال للرسول بتاعها :
" "فَمَا آتَانِيَ اللَّهُ خَيْرٌ مِّمَّا آتَاكُم "
فذو القرنين قال أنا مش عايز فلوسكم، أنا عايزكم انتم نفسكم.. عايزكم تشتغلوا معايا في بناء السد المنيع ده👌
"فَأَعِينُونِي بِقُوَّةٍ أَجْعَلْ بَيْنَكُمْ وَبَيْنَهُمْ رَدْمًا "

وهو ده الإنسان الصادق المخلص إللي عنده مروءة👌
مش ييجي ياخد فلوس عشان يساعدك، لأ يستعفف عن أجر مساعدتك وكمان يعلمك ويخليك تدافع عن نفسك بنفسك،
زي ما المثل بيقول : لا تُعطني سمكة ولكن علمني كيف أصطادها👌
☆طبعا ده غير إللي ياخد فلوسك وميساعدكش زي ما طلبت أصلا 🤓! ما علينا🙄!

عارفين زي إيه مثلا من الواقع بتاعنا🤔
لما يكون حد فينا عايز يلتزم وعنده مشاكل كثيرة ومش عارف يبدأ منين،
فندوّر على حد يحل لنا مشاكلنا من غير ما نكون احنا نفسنا طرف في الحل،
مثلا حد يقول مش عارف أصحى أصلي الفجر 😔
فنقول طيب نام بدري واظبط المنبه وقول الأذكار وادعي ربنا،
فهو يسيب 《كل ده》 ويقول لأ أنا عايز حد يرن عليّ ويصحيني😤
طيب فين معالجتك انت للموضوع من طرفك... فين اجتهادك بجانب طلبك لمساعدة الآخرين؟..مفيش🤷‍♂️
أو مثلا انت عايز تتعلم علم شرعي وتقول لشيخك مثلا أنا عايزك تاخد بإيدي،
فيقولك طيب اسمع كذا واقرأ كذا وطبّق الخطوات كذا، تقوم تقول له لأ، أصل أنا مابحبش أسمع دروس،
أنا عاوز حد يمشي معايا خطوة خطوة كل يوم يفكرني،
أصل أنا بكسل لما ببقى لوحدي...أصل...أصل....
مهما الناس ساعدوك، في مرحلة هيبقى مطلوب منك انت الحسم فيها بنفسك بالاستعانة بالله وحده، محدش هيقدر يسقيهالك بالمعلقة،
الدكتور بيوصف الدواء، لكن إللي بيشرب الدواء هو المريض💁‍♂️
فلازم يكون عندنا ذاتية ونعتمد على نفسنا👌
كل النصايح إللي بنقولها هنا في قصص الأنبياء هتفضل مجرد كلام على ورق لحد ما انتم تبدأوا تنفذوها😊
عايز تبطل سماع الأغاني والموسيقى والأفلام؟
بطل فورا وامسحهم من عندك وانوي التوقف... واطلب من صحابك الصالحين يساعدوك على الثبات.
عايزة تلبسي حجاب شرعي مظبوط ؟
إلبسي حالا واتخلصي من هدومك إللي تغضب ربنا... واطلبي من أخواتك المحترمات يساعدوكِ على الثبات.
ابدأ بنفسك وهتلاقي ربنا بعت لك إللي يساعدك وإللي يوجهك
"إن الله لا يغير ما بقوم حتى يغيروا ما بأنفسهم"
ليها تفسيرين، وتفسيرها هنا ينطبق على المعنى إللي نقصده تماما😊

فذو القرنين قالهم أيوة أنا هبني السد لكن مش هبنيه أنا وجيشي لوحدنا، قوموا اشتغلوا معايا..اتعبوا عشان تلاقوا النتيجة👌
بدأ يوجههم...هاتوا قطع الحديد...وعشان هو عارف شغله وعارف إزاي هيبني السد بدأ هو إللي يحط الحديد ويرتبه،
فبعد ما رص الحديد في الفراغ إللي بين السدين \:/ قال لهم:
انفخوا النار في الحديد عشان يسخن فلما سخن قال لهم هاتوا النحاس المذاب عشان أسد الفجوات بين الحديد ويمسك كله في بعضه ويبقى حتة واحدة،
"آتُونِي زُبَرَ الْحَدِيدِ حَتَّى إِذَا سَاوَى بَيْنَ الصَّدَفَيْنِ قَالَ انْفُخُوا حَتَّى إِذَا جَعَلَهُ نَارًا قَالَ آتُونِي أُفْرِغْ عَلَيْهِ قِطْرًا"
ودي حاجة تم اكتشافها في العصر الحديث...إن لما يكونوا عايزين الحديد يكون قوي يضيفوا له النحاس👌

◇في هنا عِبرة طيبة:
ذو القرنين عشان هو إللي عارف شغله وعارف إزاي هيبني السد ولسه بيعلمهم من الأول خالص،
بدأ هو إللي يحط الحديد بنفسه بعد ما طلب منهم يجيبوه، ويعلمهم بنموذج عملي قدامهم يقلدوه في طريقة رصه وترتيبه وتسويته فوق بعض،
الناس مقالوش بقى اشمعنى احنا إللي نتعب في جمع وشيل الحديد ونجيبه لحد عندك وانت إللي ترصه 😑
طيب ما تنزل انت كمان تجيب الحديد معانا😒
همّ معملوش كده لأنهم عارفين إن كل واحد له دوره، ودورهم إنهم يجيبوا قطع الحديد، ودوره هو إنه يرص الحديد ويعلمهم ده بنفسه أول مرة👌

بعد ما السد اتعمل خلاص ومسك في بعضه بقوة، اتحبس يأجوج ومأجوج ورا منه، ومعرفوش يطلعوا من فوقه ويعدّوا، ومعرفوش حتى يخرموا حتة من السد ويطلعوا منها على أهل البلد..

"فَمَا اسْطَاعُوا أَنْ يَظْهَرُوهُ وَمَا اسْتَطَاعُوا لَهُ نَقْبًا "
طبعا ده إنجاز جديد كبير وعظيم...
لكن ذو القرنين ماوقفش وبص للسد كده وقال بتكبّر:
إيه الجمال والعظمة دي! ده شغل مش أي حد يعمله😎
لأ، ذو القرنين لم يتكبر، وبكل تواضع وعبودية لله عز وجل قال لما بص للسد والناس المؤذية محبوسين وراه والغلابة عايشين في أمان
"قَالَ هَذَا رَحْمَةٌ مِنْ رَبِّي فَإِذَا جَاءَ وَعْدُ رَبِّي جَعَلَهُ دَكَّاءَ وَكَانَ وَعْدُ رَبِّي حَقًّا"
يعني ده رحمة من ربنا، أنا كنت مجرد سبب من أسباب رحمته، سخرني ليكم عشان أمنع عنكم الأذى.. إوعوا تفكروا إن أنا إللي عملت كده.. دي من رحمته بيكم عز وجل👌
لكن السد ده مش هيستمر منيع وحصين وقوي وشديد بالشكل ده إلى ما لا نهاية.. لأ.. ده في وقت معين هييجي والسد ده هيتفتح ويأجوج ومأجوج هيخرجوا تاني😶

فذو القرنين عمل كذا حاجة هنا:
◇رجّع الفضل في عمله وفي النعم إللي عنده لله
◇ علّم الناس إن إللي عمله ليهم ده كان رحمة من ربنا أراد الله لها أن تشملهم فهيأ لها الأسباب.
◇علّم الناس إنهم يكونوا على حذر برده ميناموش في العسل إلى ما لا نهاية، لأ، يستعدوا لخروجهم في يوم من الأيام بالقوة الكافية للدفاع عن أنفسهم؛ لإن مش كل مرة هيلاقوا إللي يمنع عنهم خطر العدو.
لكن أكتر حاجة هنا عاوزين نركز عليها، إن ذو القرنين نسب الفضل في عمله والنعم إللي عنده لله عز وجل،
مش زي ما عمل صاحب الجنتين، إللي دخل جنته وهو مُعجب بيها ومتفاخر، فبقى يقول: مستحيل يحصل أي حاجة للجنتين بتوعي دول😎
☆مين صاحب الجنتين ده😳

طب مش لما نعرف الأول مين همّ يأجوج ومأجوج دول إللي ذو القرنين قفل عليهم السد وهيخرجوا على الناس تاني في يوم من الأيام😅

طيب مين يأجوج ومأجوج دول🤨

◇يأجوج ومأجوج اسمين لقبيلتين عايشين مع بعض، وهم من نسل آدم عليه السلام وفي نفس الوقت برده من نسل نوح عليه السلام.
فاكرين لما قلنا إن البشر من أبناء نوح عليه السلام التلاتة : سام وحام ويافث ؟
سام وحام من ذريتهم العرب واليهود.. بني إسرائيل يعني،
يافث بقى هو إللي خرج من نسله يأجوج ومأجوج👌
يعني همّ من البشر عادي، لا همّ جِن ولا كائنات فضائية من حرب الكواكب ولا الواحد فيهم بينام على ودن ويتغطى بالودن التانية ، ولا أي حاجة من الخرافات إللي بتتقال عنهم دي😅
لكنهم انعزلوا عن باقي البشر فترة الطويلة، فأدى انعزالهم ده إنهم يتخلّفوا عن باقي البشر،
والدليل على كده إنهم عاشوا بين السدين عادي قبل ما ذو القرنين يقفل عليهم...
وانعزالهم الطويل ده خلّى مبقاش في لغة تواصل خالص بينهم وبين باقي الناس إللي حواليهم،
وكمان عاشوا على السرقة والقتل والنهب قبل ما ذو القرنين يقفل عليهم، يعني كل مظاهر الوحشية والإنعزال👌
ويأجوج ومأجوج غلب عليهم التناسل، يعني بيخلفوا كتير، كل ده خلّاهم أمة مرعبة وكاسحة،
عندهم أبناء كتير جدا، لدرجة إن ربنا يوم القيامة هيقول لآدم عليه السلام:
"يا آدم أَخرج بعثَ النار من ذريتك -يعني أهل النار من البشر- ، فآدم هيسأل ربنا:
إزاي أخرج بعث النار؟.. فربنا هيقول له من كل ألف، ٩٩٩ في النار وواحد في الجنة👌
فالصحابة خافوا😳 وقالوا يارسول الله: ومين فينا الواحد ده😥!؟
فبشرهم رسول الله ﷺ إن الواحد ده منهم والألف من يأجوج ومأجوج..
فده يدل إن يأجوج ومأجوج من ذرية آدم عليه السلام وإن أعدادهم كبيرة جدا..
يعني لما يخرجوا هيشربوا بحيرة طبرية كلها، ودي بحيرة كبيرة جدا على فكرة، يعني حسب الإحصائيات البحيرة دي تكفي سكان بلاد الشام لمدة ثلاثين سنة، إللي همّ عددهم حوالي ثلاثين مليون إنسان،
فلكم أن تتخيلوا أعداد يأجوج ومأجوج.!🙊
وهمّ زي ما قلنا، ناس كفرة ظلمة فجرة أقوياء جدا.. محدش من الناس يقدر عليهم 👌

☆إيه ده😳 يعني يأجوج ومأجوج هيدخلوا النار .. ؟!
طب إزاي وهم مبلغهمش رسالة الإسلام ومقفول عليهم السد😶
احنا عارفين إن ربنا لا يُعذّب أحد إلا لما يُقيم عليه الحُجّة والبيان، وده بيكون سواء في الدنيا عن طريق رسول،
"وَمَا كُنَّا مُعَذِّبِينَ حَتَّىٰ نَبْعَثَ رَسُولًا"
أو في الآخرة عن طريق الإختبار المباشر من الله عز وجل لأهل الفترة زي ما قلنا قبل كده،
فأي حد بيموت ولم تبلغه دعوة الإسلام، ربنا هيعامله معاملة أهل الفترة، وهيمتحنه يوم القيامة👌

طيب يأجوج ومأجوج؟
يأجوج ومأجوج من أهل النار لإنهم كفار ، يعني عارفين إن فيه رب لكنهم كفروا بيه،
والدليل على كفرهم إنهم بعد ما يخرجوا من السد ويفسدوا في الأرض، هيرموا بالسهام بتاعتهم ناحية السماء فهترجع السهام دي وعليها دم فهيقولوا ساعتها:
قهَرْنا مَن في الأرض وعَلَوْنا من في السماء..!
يعني هم عارفين إن في ربنا، وإنه في السماء، وكفروا به، ومش كفر عادي كمان، لأ ده مقتنعين إنهم أقوى منه سبحانه وتعالى، وقال إيه قتلوه😶
وده يدل على إن رسالة التوحيد وصلت لهم من ربنا عن الطريق الرسل أو أي طريقة احنا منعرفهاش.. وكفروا.. فجزاؤهم النار..

◇ طيب إزاي احنا مش قادرين