نعرف مكانهم ونشوفهم وسط التقدم إللي إحنا فيه ده، ووسط بلوغ الإنسان لمشارق الأرض ومغاربها بالشكل ده🤔

عادي جدا.. ماهو رسول الله ﷺ لما اختبأ من المشركين في غار حراء، وكان المشركين واقفين على باب الغار،
لو الواحد فيهم بص تحت رجله بس كده كانوا هيشوفوه هو وأبو بكر! يعني همّ وصلوا لحد الغار بالفعل ومفيش واحد منهم كلّف نفسه إنه يبص جوة الغار.. ليه؟
دي بتاعة ربنا بقى😁
وكذلك الحال بالنسبة لمكان يأجوج ومأجوج.. الله أعلم همّ فين، ووقت ما هيأذن هينشكف أمرهم ومكانهم..
فممكن واحد يقعد كده على جوجل إيرث google earth ومش وراه غير إنه يبحث عن يأجوج ومأجوج في كل شبر من الكرة الأرضية،
وبعد كم سنة يطلع ويقول والله دول مش موجودين...هل نصدقه إنهم مش موجودين🤷‍♂️
طبعا لأ... لإن مين قال لك إن ربنا لم يُعمِ بصرك عن إنك تشوفهم، زي ما ربنا أعمى المشركين إنهم يشوفوا رسول الله ﷺ وهو مُختبئ في غار حراء؟
وعارفين كمان زي إيه🤭
زي ما بني إسرائيل تاهوا في الأرض أربعين سنة في أرض سيناء لما رفضوا دخول الأرض المقدسة👌
مكانوش بيقابلوا حد.. وإلا لو كانوا قابلوا حد كان دلّهم على طريق الخروج أو على الأقل الطريق إللي هو جه منه عندهم، فاحنا بنتعامل مع ربنا يا جماعة 😅
وبعيد عن كل ده: مين قال إنهم فوق الأرض 😊
مش يمكن تحت الأرض💁‍♂️
رسول الله ﷺ بيقول إيه؟
بيقول إن كل يوم يأجوج ومأجوج بيحفُروا في السد عشان يخرجوا، وأول ما بس يدخل لهم شعاع الشمس، القائد بتاعهم هيقول لهم بكرة نكمل ..
ويرجعوا تاني يوم يلاقوا الفتحة اتسدت والسد بقى أقوى من الأول، ويفضلوا يحفروا كل يوم وتتسد الحفرة وهكذا...
لحد ما ييجي اليوم إللي ربنا مقدر فيه إن يأجوج ومأجوج يخرجوا فيه، فالقائد بتاعهم هيقول زي ما بييقول كل يوم : "نكمل بكرة" لكن في اليوم ده هيزود كلمة 《إن شاء الله》 فلما هيرجعوا تاني يوم هيلاقوا الحفرة إللي حفروها زي ما كانت، فهيكملوا حفر فيها وبعدين يخرجوا منها بقى على الناس😶
الشاهد من الكلام هو جملة:
"أول ما يشوفوا شعاع الشمس" معنى كده إن شعاع الشمس مش واصل لهم أساسا👌
فيا إما ذو القرنين حبسهم تحت الأرض، يا إما حبسهم في تجويف فوق الأرض محدش شايفه بحول الله وقوته.

طبعا يا جماعة بعد ما ذو القرنين قفل السد على يأجوج ومأجوج مشي من عندهم وكمل رحلته،
راح فين بعد كده.؟ .الله أعلم..طب عاش كم سنة؟.. الله أعلم😅
زي ما قلنا قبل كده: ربنا بيقولنا إللي يهمنا من القصص عشان ناخد منها العبرة ونطبقها في حياتنا👌

☆طب ثواني كده😬
مش ذو القرنين حاكم عادل؟ إزاي يحبس ناس ويعرضهم للهلاك وخصوصا إنهم بيخلفوا كتير وأكيد هيتخنقوا كده😳
وأصلا ناس بالعدد ده الأكل بيكفيهم إزاي وإزاي عايشين السنين دي كلها محبوسين ؟!
وهيخرجوا إمتى...وهيخرجوا على مين..هل على المسلمين بس ولّا على كل البشر😱

ناخدهم واحدة واحدة😁
◇ لما ذو القرنين حبس يأجوج ومأجوج كان بقدر الله،
يعني ربنا لما بيقدر على الإنسان حاجة بيخليه يتكيف مع إللي حصل له ده👌
مثلا ..في البلاد الحارة عند خط الإستواء هتلاقي البشر بشرتهم سمراء وشعرهم مجعد لهم أكل معين،
غير البشر إللي في أوروبا ..بشرتهم بيضاء ..شعرهم ناعم وأكلهم مختلف،
فربنا لما قدّر على يأجوج ومأجوج إنهم يتحبسوا وراء السد أعطاهم القدرة إنهم يتكيفوا مع بيئتهم،
ده غير إننا مانعرفش أصلا إيه هي طبيعة أكل يأجوج ومأجوج...هل بياكلوا اللحوم ولا بياكلوا إيه بالضبط🤷‍♂️
لأننا معندناش أي دليل يقول لنا طبيعة الأكل إللي يأجوج ومأجوج عايشين عليه السنين دي كووولها ،
ويمكن يكون عندهم موارد للغذاء من الناحية الثانية من السد،؟
الاحتمالات لتدبير الله لأمرهم كتيرة👌
فهو منعهم وفي نفس الوقت قدر لهم الرزق..إزاااي ..دي بتاعة ربنا مش بتاعتنا 😊

◇طيب هيخرجوا إمتى...؟
خروج يأجوج من علامات الساعة الكبرى ، العلامات المتأخرة إللي مش هتبدأ أصلا إلا بعد ما العلامات الصغرى تكون خلصت وكمان بعض العلامات الكبرى تكون حصلت،
يعني ماينفعش حد كده يطلع دلوقتي يقول ده يأجوج ومأجوج طلعوا يا جماعة خلاص وهمّ شعب الدولة الفلانية مثلا،
ولا ينفع يقول دول هيطلعوا كمان سنة ولّا سنتين🤓
إللي يقول كده قولوا له:
يأجوج ومأجوج مش هيخرجوا غير بعد ما تحصل الملحمة الكبرى والدابة إللي هتخرج تُكلم الناس ويخرج المسيح الدجال في الناس وتحصل الفتنة، وينزل عيسى بن مريم عليه السلام ويقتل المسيح الدجال،
هنا بقى ربنا هيُوحي لعيسى بن مريم إن فيه بشر خرجوا من حبسهم محدش يقدر عليهم 👌..
فعيسى بن مريم هياخد المؤمنين إللي معاه ويروحوا جبل الطور عشان يحموا نفسهم جواه من يأجوج ومأجوج ،
لحد ما ربنا يرسل على يأجوج ومأجوج دود معين اسمه "النّغف"، هيسلطه على رقابهم، هو إللي هيقتلهم ،
والجثث بتاعتهم هتملى الأرض بشكل رهيب لإن عددهم كبير جدا،
فعيسى عليه السلام هيدعي ربنا إنه يخلص الأرض منهم ومن نتن ريحتهم، فربنا هيرسل طيور تشيل جثث يأجوج ومأجوج وترميهم في المكان إ

للي ربنا يريده..
وبعد كده يُنزل ربنا المطر فيغسل الأرض،
ويَنزل عيسى عليه السلام والمؤمنين من جبل الطور ويعيشوا حتى يقبض الله أرواحهم جميعا👌..
فالشاهد في كلامنا إن خروج يأجوج ومأجوج محصلش ولا حد يعرف هيحصل إمتى..

☆وبالنسبة لعلامات الساعة هتلاقوها مشروحة في سلسلة السيرة النبوية بالتفصيل من الجزء ال١١٤ لحد الجزء ال١٣٠
الرابط في التعليقات👇

◇طب هيخرجوا على مين..؟ على المسلمين بس ولّا على كل البشر؟

الموضوع ده فيه قولين:
◇القول الأول: إن فساد يأجوج ومأجوج عام لكل البشر. ◇القول الثاني:
إنه خاص بالعرب والمسلمين، وباقي الأرض بطبيعة الحال هتتأثر ساعتها بخروجهم..
فهمّ رأيين، واحنا مانقدرش نُجزم ونقول والله ده فتنة يأجوج ومأجوج للبشر كلهم، أو فتنهم للمسلمين فقط،
لكن أنا شخصيا بميل للرأي التاني أكثر،
ليه😁
رسول الله ﷺ دخل مرة وهو مفزوع على زوجته زينب بنت جحش رضي الله عنها وهو بيقول :
"لا إله إلا الله، ويل للعرب من شر قد اقترب،
"فُتِح من رَدم يأجوج ومأجوج مثل هذه👌" وأشار بأصابعه علامة كإنه بيوريها حجم الفتحة إللي اتفحت في جدار يأجوج ومأجوج..
فرسول الله ﷺ ذكر العرب باللفظ في الحديث؛
لأن الفتنة هتكون فيهم أكثر لإنهم أول من أسلم ومعظم المسلمين هيكونوا فيهم،
وكمان لما هيخرجوا هيشربوا بحيرة طبرية زي ما قلنا من شوية 👆والكلام ده مذكور في حديث رسول الله ﷺ نفسه، وبحيرة طبرية مكانها بلاد الشام..
ده غير إن لما يموت عيسى عليه السلام ومعاه المؤمنين، هيتبقى في الأرض شرار الناس...
فده يدل على إن يأجوج ومأجوج مع كثرتهم لم ينتشروا في الأرض كلها وما أهلكوش كل سكانها، بل كان تأثيرهم الرئيسي في بلاد المسلمين، والله أعلم..
لكن زي ما قلنا منقدرش نجزم بالموضوع لأن كل فريق له أدلته👌

☆إيه الحكمة بقى إن ربنا يقول لنا على قصة يأجوج ومأجوج واحنا إحتمال كبير مانلقحش نحضر خروجهم أصلا😕
◇أولا : إحنا عارفين إن المؤمن هو إللي هيدخل الجنة... صح؟
طيب من أركان الإيمان إيه😁
الإيمان بالغيب...
ويأجوج ومأجوج من الغيبيات،
فربنا بيقول لنا عن حاجات لو قِسناها بالعقل ماتركبش🙃 فهنا يبان صدق الإيمان بالغيب 👌

◇ثانيا:
ربنا بيقول لنا إن يأجوج ومأجوج دول فتنة..
وذو القرنين عشان يمنع فتنتهم وشرهم عن الناس خلى فيه بينهم سد..
فكإن ربنا عز وجل بيقول لنا :
خلوا بينكم وبين الفتن سد وسدوا الثغرات👌
يعني عارف مثلا إنك لو قعدت لوحدك هتعصي ربنا...؟ يبقى هنا تحط سد ومتقعدش لوحدك💁‍♂️
عارفة إنك لو خرجتي مع أصحابك الغير ملتزمات هتعصي ربنا...؟ يبقى تحطي سد ومتخرجيش معاهم... محدش هينفعك في الآخرة👌
عارفة إنك ضعيفة أمام الرجال ولو بصيتي لرجل قلبك بينشغل به...؟ حطي سد وغضي بصرك وامنعي الفرجة على صور وأفلام ومقاطع فيها رجال👌
عارف إنك لما بتاكل كتير وبتملى بطنك بتكسل عن العبادة..؟ حط سد واعمل حاجز وقاية وقلل أكلك بنية عدم التكاسل عن الطاعة، زي ما رسول الله ﷺ قال: بحسب ابن آدم لقيمات يُقِمن صُلبه👌
حطوا سد بينكم وبين الفتن... ابعدوا عنها بكل طريقة.. حتى لو الأمر حلال، قلل منه شوية واغرف منه بحرص وحساب وتدقيق،
واحد من التابعين كان بيقول: إني لأترك المباح مخافةَ أن أقع في الحرام👌
عارفين زي إيه؟
زي مثلا لما أروح أقعد في كافيه أو مطعم، أهي حاجة مباحة أهه والمكان مافيهوش حاجة غلط على حسب ما هو ظاهر في البداية،
وبعدين واحنا قاعدين حصل إن في أغاني اشتغلت في المكان وفتحوا شاشة شغلوا عليها أفلام،
يا ترى هعمل إيه دلوقتي؟ أنا حاليا في وضع حرام مبقاش مباح، وواجب عليَّ إنكار المنكر بإللي أقدر عليه..
وإللي أقدر عليه هنا هو إني أسيب المباح وأمشي لإنه مبقاش مباح، ووقعني في الحرام من غير ما أقصد...
طيب بس أنا طلبت خلاص أكل وشرب مش هينفع أمشي! كده يبقى أنا وقعت في حرج وفتنة كان بدايتها عدم الاغتراف من المباح بحساب وبوعي واحتراز👌
أي حاجة مباحة وحلال هتلاقيها ممكن توقعك في الحرام مهما كان درجته، وتبقى مش قادر ساعتها ترفعه، سيبه لله وحط بينك وبين الحاجة دي سد👌.. ومن ترك شيـئا لله عوضه خيرا منه.
والجنة تستاهل، ومحدش عارف هيموت إمتى وفين وعلى أنهي حال أو نية..
وخصوصا إننا كل شوية نسمع عن شباب كثير انتهى عمرهم بموت الفجأة👌
ربنا يرحم أموات المسلمين أجمعين، ويرحمنا ويعصمنا جميعا من الفتن ما ظهر منها وما بَطن ..آمين يارب🤲
إن شاء الله من أول المرة الجاية هنتكلم عن بعض القصص إللي حصلت في أزمنة الأنبياء،
لكن عشان هي مش معروف وقتها إيه بالضبط فهنحكيهم قبل ما ندخل في قصة زكريا عليه السلام😊

♡معلش طولت عليكم أوي المرة دي🙈❤

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

⭐المصادر⭐
https://islamqa.info/ar/answers/213797/ياجوج-وماجوج-هل-بلغتهم-دعوة-النبي-صلى-الله-عليه-وسلم


https://www.youtube.com/watch?v=svLN4EcrUrU&feature=share


https://islamqa.info/ar/answers/161083/هل-يصيب-افساد-ياجوج-وماجوج-العالم-كله

https://islamqa.info/ar/answers/131831/حكم-من-انكر-الدجال-وياجوج-وماجوج-والمهدي-ونزول-المسيح


https://islamqa.info/ar/answers/3437/هل-ياجوج-وماجوج-موجودون-الان-وهل-السد-حقيقي


https://www.youtube.com/watch?v=dGLVMgSK9pk&feature=share

#قصص_الأنبياء
#الحلقة_السابعة_والأربعون
#أصحاب_السبت

بما إننا اتكلمنا عن يأجوج ومأجوج والسد..وقلنا إننا نحط بيننا وبين الفتن سد،
فأنسب قصة نتكلم عنها النهاردة هي قصة أصحاب السبت😊
ليه يعني🤨
خلونا نشوف السبب👌

اليهود كانوا بيقولوا إنهم أحباب الله،
فربنا قال لهم لو كلامكم صحيح ، طيب ليه بيعذبكم بذنوبكم وعصيانكم وجحودكم 😒
ربنا مش بيعذب إللي بيحبه، ممكن يعاقب المؤمن عشان يفوق من غفلته ، لكن نزول العذاب من ربنا على ناس معينة مش بيكون وهو بيحبهم عز وجل..
"وَقَالَتِ الْيَهُودُ وَالنَّصَارَىٰ نَحْنُ أَبْنَاءُ اللَّهِ وَأَحِبَّاؤُهُ ۚ قُلْ فَلِمَ يُعَذِّبُكُم بِذُنُوبِكُم ۖ بَلْ أَنتُم بَشَرٌ مِّمَّنْ خَلَقَ"

أيوة ربنا فضّل بني إسرائيل بالنبوة والمُلك على باقي البشر في زمانهم، لكن إللي بيعصي وبيُعرِض عن البينات ويؤذي الرسل ويُبارز ربنا بعصيان أمره؛ ربنا بيعذبه في الدنيا قبل الآخرة..
عايزين مثال إن إللي بيفسق عن أمر ربه ويبارزه بالعصيان ده ربنا بيعذبه في الدنيا؟
عندنا قصة أصحاب السَّبْت👌

أصحاب السبت دول هم قوم من بني إسرائيل، منعرفش زمانهم كان إمتى بالتحديد، لكن يُقال إنهم كانوا في زمن داوود عليه السلام،
وكانت قرية اليهود دي جنب البحر، فطبعا ده معناه إنهم كانوا بيعتمدوا على صيد السمك في غذائهم.
ربنا كان محرّم عليهم صيد السمك في يوم السبت... باقي الأسبوع مباح الصيد عادي، لكن يوم السبت لأ👌

☆طيب اشمعنى يوم السبت😕
كل نبي من الأنبياء بيقول لقومه على يوم الجمعة وفضله،
فلما موسى عليه السلام قال لبني إسرائيل عن يوم الجمعة زي باقي الأنبياء؛
بني إسرائيل اعترضوا وقالوا لأ السبت أحسن، وقعدوا يبرروا ويجادلوا، فربنا قال لهم خليكم في السبت..
فلما جاء زمن قرية أصحاب السبت ربنا ابتلاهم إنهم لا يصطادوا السمك يوم السبت، كاختبار وامتحان لهم على الطاعة👌
في البداية كانوا ملتزمين بعدم صيد السمك، وكانوا بيصطادوا في باقي أيام الأسبوع،
لكن مكنش بيطلع لهم سمك في البحر غير يوم السبت😶
طول الأسبوع مفيش ولا سمكة.. ويوم السبت السمك كثير جدا لدرجة إنه بينط على بعض وبيشوفوه بعنيهم😅

☆زي مثلا لما الواحد بيبدأ يتبع أوامر ربنا ونواهيه، ويقول خلاص بس أنا تبت 😤
مثلا تبت من سماع الأغاني والمعازف والمسلسلات.. فبقى كل ما يمشي في مكان يسمع الأغاني إللي كان بيحبها وكان على طول بيسمعها، وكإن الشارع كله قرر فجأة يشغلها😳
أو مثلا واحدة تابت من التبرج ولبست الحجاب الشرعي، تقوم طول ما هي ماشية عمالة تشوف البنات المتبرجة بعدد كبير وكإنهم مكنوش موجودين قبل كده🤨
همّ كانوا موجودين، لكن لإنها بقت مختلفة عنهم فبقوا باينين جدا قصادها، وربنا بيختبرها بيهم،
يعني دي تقول لها إنتِ كبّرتي نفسك ليه باللبس الغريب ده؟! والتانية تقولها شكلك وحش كده، والتالتة تقول ...والعاشرة والعشرين....كل ده اختبار👌
ماهو ياجماعة سهل جدا إن الواحد يقول أنا مؤمن أو أنا ملتزم بأوامر ربنا.. الكلام سهل😅
إزاي الإنسان يعرف إذا كان صادق فعلا في كلامه ولّا لأ؟
بالإبتلاء والامتحانات ومُفترق الطرق وعند المشاكل والصعاب والفتن والشهوات....و...و .. و
ربنا يعلم الغيب أيوة، ويعلم إذا كان الشخص ده صادق ولّا لأ، بس مش بيحاسبنا عز وجل بسابق علمه فينا😊
إنما بيحاسبنا باللي احنا بنعمله👌
فبيبتلي الإنسان عشان يقوله شوف نفسك.. شوف أفعالك.. هل انت فعلا صادق في كلامك وايمانك والتزامك ولّا لأ👌
فلو صبر الإنسان قصاد الفتن والمُغرِيات واستمر على طريق الإلتزام يبقى هو فعلا كان صادق،
لكن لو رجع خالص زي الأول وأكثر يبقى مكنش صادق🤷‍♂️
"أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ"

فربنا خلى السمك يطلع على وش المية يوم السبت بكميات كبيرة ويغوص في أعماق البحر باقي الأسبوع،
وسبحان الله لو مكنوش جادلوا في يوم الجمعة، كان زمانهم بياكلوا السمك عادي يوم السبت😏
☆وهنا ملحوظة مهمة:
وهي إننا لما بنطمع في حاجة غير اللي ربنا إداهالنا، أحيانا بنكون بنتمنى الشر لأنفسنا واحنا مش عارفين..
ربنا بيقول:
"وَيَدْعُ الْإِنسَانُ بِالشَّرِّ دُعَاءَهُ بِالْخَيْرِ ۖ وَكَانَ الْإِنسَانُ عَجُولًا"،
فدايما في أمور الدنيا نرضى بالمقسوم ونحمد ربنا عليه ونطمئن لاختيار ربنا لينا دايما،
ولو هنطلب شي دنيوي محدد نقول في الآخر: يارب لو فيه خير،
لكن في أمور الآخرة والنجاة، ندعي براحتنا طبعا بدون قلق👌

المهم،
بني إسرائيل كانوا صابرين على ابتلاء يوم السبت وثابتين على طاعة ربنا في عدم الصيد فيه، لحد ما واحد منهم عمل إيه🙊
عمل حيلة ...
حفر يوم الجمعة زي حفرة كبيرة جنب البحر، عشان لما الموج يجيب السمك يوم السبت، يدخل السمك في الحفرة، وميعرفش يطلع تاني، وييجي هو يوم الأحد ياخد السمك من الحفرة.. وبكده ما يبقاش اصطاد يوم السبت، وكإن ربنا مش مطلع على مكره وتحايله على الحرام🙂
"وَاسْأَلْهُمْ عَنِ الْقَرْيَةِ الَّتِي كَانَتْ حَاض

ِرَةَ الْبَحْرِ إِذْ يَعْدُونَ فِي السَّبْتِ إِذْ تَأْتِيهِمْ حِيتَانُهُمْ يَوْمَ سَبْتِهِمْ شُرَّعًا وَيَوْمَ لَا يَسْبِتُونَ ۙ لَا تَأْتِيهِمْ ۚ كَذَٰلِكَ نَبْلُوهُم بِمَا كَانُوا يَفْسُقُونَ "

☆عارفين زي إيه 😅
رسول الله ﷺ قال:
"لعن الله الواشمات والمُتَفَلّجات للحُسْن والمُتَنمّصات المُغَيّرات لخلق الله"
فعلة التحريم هي التغيير لخلق الله👌
فتيجي واحدة تعمل إيه😕
تقوم مشقرة حواجبها《 وترفّعها خااالص كأنها متنمصة بالضبط》...وتقول أنا مشلتش ولا شعراية أهه أنا شقرت بس🤷‍♂️
طيب ماهي النتيجة في الحالة بتاعتنا دي واحدة...وهو التغيير لخلق الله..وده سبب التحريم أساسا🙃
طبعا أنا بتكلم في نقطة إللي بتشقر حواجبها وبتخليها زي إللي عاملة حواجبها بالضبط،
وإلا فالتشقير عليه خلاف بين العلماء، فريق قال جائز وفريق قال محرم، عشان بس ميختلطش الأمر على الناس وحد يفهم كلامي خطأ😁

المهم،
الراجل اليهودي ده استعمل وسيلة حلال، حيلة مشروعة مش حرام يعني، عشان يوصل لشيء محرم ربنا نهى عنه..
فبعد ما أخد السمكة، راح بيته وشواها، وانتم عارفين السمك المشوي ريحته بتبقى عاملة إزاي😅
فجاره شم الريحة وجه يسأله انت جبت السمك منين وعملت إيه،
حكى له إللي عمله، راح التاني عامل زيه،
والثالث والرابع لحد ما الموضوع انتشر في بني إسرائيل😶

☆حاولوا تربطوا كده بواقع بني إسرائيل والواقع بتاعنا😞
زمااان مكنش في واحدة تقدر تمشي كاشفة وشها حتى،
لحد ما كشفت واحدة من النساء وشها والنساء بقت تقلدها وبقى اسمه تحرر،
وبعد كده بدأت النساء تكشف حجابها نفسه ثم اللبس بدأ يبقى كاشف أكتر ما هو ساتر و شوية شوية لحد ما وصل بيهم الحال يلبسوا زي ما كلنا بنشوف في الشوارع للأسف ولا حول ولا قوة إلا بالله..
كذلك السجاير والحشيش وترك الصلاة و...و...
كل ده بدأ بمجموعة صغيرة، وبعدين المجموعة كبرت، لحد مابقت ظاهرة في المجتمع،
وعشان كده الإسلام حاطط الحدود والعقوبات الرادعة، عشان نقلل ونحجّم من انتشار وشيُوع الفتن بين الناس،
لكن فين بقى تطبيق الإسلام في مجتماعتنا😓

انقسم الناس في بني إسرائيل على ثلاثة أقسام:
◇القسم الأول: قسم بدأ يصطاد السمك وياكل ويجاهر بالمعصية عادي خااالص وده كان أكبر قسم... وكإن لسان حالهم بيقول:
إيه يا جماعة هو احنا بنعمل حاجة غلط...؟! هو انتم لا سمح الله شوفتونا اصطادنا يوم السبت؟ إيه التشدد بتاعكم ده🙄

◇والقسم الثاني: ناس بتؤمر بالمعروف وبطاعة الله، وتنهى عن المنكر وعصيان الله و التحايل على الحرام،
يعني ناس بتقول للعصاة حرام كده، إنتم بتعصوا ربنا... إنتم بتحتالوا على شرع ربنا... إنتم كده بتستهزءوا بالله وآياته وبتستهينوا بوعيده... يا جماعة مينفعش .. ربنا بيمهل ولا يهمل... وهكذا..
والتانيين؟؟ ولاااا همّ هنا😑

◇والقسم الثالث بقى جماعتنا الساكتين🤐
حزب الكنبة زي ما بيقولوا في زماننا.. لكن في نوعين من الساكتين دول:
1-إللي بيقولوا مالناش دعوة، كل واحد حر، خليني في نفسي... وياريتهم يسكتوا على كده🙆‍♂️
لأ، ده كمان بيعترضوا على الناس إللي بتأمر بالمعروف وتنهى عن المنكر ويعاكسوا شغلهم،
بيقولوا لهم باندهاش وسلبية: انتم بتنصحوهم ليه؟
ماهمّ كده كده إللي في دماغهم في دماغهم، بتوجعوا دماغكم انتم ليه بقى! ما ربنا هو اللي هيحاسبهم! هو انتم إللي هتحاسبوهم؟! اهدوا كده وكبروا دماغكم!😕
"وَإِذْ قَالَتْ أُمَّةٌ مِّنْهُمْ لِمَ تَعِظُونَ قَوْمًا ۙ اللَّهُ مُهْلِكُهُمْ أَوْ مُعَذِّبُهُمْ عَذَابًا شَدِيدًا ۖ "
لكن النوع ده مع ذلك، من جواهم في قلبهم مش راضيين عن المنكر ده وعارفين إنه غلط👌
2-والنوع التاني من الساكتين: ناس بيقولوا نفس كلام النوع الأول لكنهم في قلبهم راضيين بالمنكر ده ومش مقتنعين إنه غلط، ودول يدخلوا مع العصاة على طول👌

طب كان رد الناس الناصحين إللي من القسم التاني إيه على إللي بيقولوا لهم كبروا دماغكم وسيبوهم براحتهم ماهو ربنا اللي هيحاسبهم؟
"قَالُوا مَعْذِرَةً إِلَىٰ رَبِّكُمْ وَلَعَلَّهُمْ يَتَّقُونَ"
يعني إحنا بننصح عشان نرفع العذر من علينا عند السؤال عن إنكار المنكر بين يدي الله عز وجل،
وكمان يمكن النصيحة دي تؤثر فيهم في يوم من الأيام وربنا يجعلها سبب في هداتيهم كلهم أو بعضهم🤷‍♂️

☆طيب قفزة كبيرة كده من عصر بني إسرائيل لعصرنا الحالي كده ونقارن بين حالهم وحالنا😶
طبعا كلنا شايفين انتشار المعاصي في كل مكان ليل نهار في البيوت والشوارع وكل مكان😞
يا ترى بقى كل واحد مننا في أنهي قسم من الأقسام الثلاثة؟

◇هل يا ترى أنا من الناس إللي بتعصي أوامر ربنا وتتحايل على الحرام بل وبتجاهر بالمعصية بلا حياء ولا خجل من الناس..؟
هل تركت الأغاني وبقيت أسمع أناشيد بالإيقاع والمؤثرات الصوتية زي الأكابيلا والبيت بوكس وأقول ماهي إسلامية؟

☆الأكابيلا والبيت بوكس دي عبارة عن أصوات تشبه الموسيقى بالضبط بتكون مصاحبة للأناشيد.

هل أنا من الأخوات إللي بتطلع في فيديوهات بث مباشر يشوفها ال

عالم كله رجال ونساء وكفار ومؤمنين وبَرّ وفاجر، وبتطلع تضحك وتهزر وتخضع بالقول وتتبرج بالزينة بحجة الدعوة إلى الله؟

◇ولا أنا من القسم الثاني إللي بيصلح في نفسه أيوة، بس سايب الناس تعصي ربنا عادي وحتى وشه مش بيتغير لما يشوف حرمات الله إللي بيتم انتهاكها ليل نهار،
بل معنديش مشكلة كمان أصاحب الشخص العاصي ده عادي وأخرج معاه وآكل وأشرب ومبنصحوش يبطل الحرام ولا بعتزله وهو بيعمله؟
تلاقي الزوجة تقعد جنب زوجها وهو بيتفرج على الأفلام والمسلسلات عادي،
تلاقي البنت لابسة الحجاب الشرعي وماشية في وسط الشارع ، مع بنت لابسة بنطلون مقطع ولبس متبرج،
وماشين سوا بمبدأ مليش دعوة خليني في حالي.. أصل أنا لو اتكلمت الناس مش هتقبل مني... الناس هتصدني.. الناس هتكرهني وتبعد عني.. الناس... الناس... ولا حول ولا قوة إلا بالله😞

◇ولّا أنا من القسم التالت إللي بيؤمر بالمعروف، وبنصح الناس وأفهمهم بالحكمة والموعظة الحسنة، وبنهى عن المنكر بدون منكر أشد منه، وبعمل ده كله ثبات بحول الله وقوته، مهما حصل ومهما تعرضت للأذى👌

لما بني إسرائيل استمروا في عصيانهم لله، الناس إللي كانوا بينصحوهم خافوا على نفسهم أحسن ينزل عليهم العذاب همّ كمان لما ينزل على العصاة دول،
فراحوا بنوا 《سور》 بينهم وبين العصاة، وانعزلوا عنهم وبقى لكل مجموعة فيهم باب يخرجوا منه..
وفي يوم من الأيام، لما الناصحين خرجوا من الباب بتاعهم، لقوا باب العصاة مقفول ومحدش خرج😕
فقالوا لبعض أكيد حصل حاجة..!
فراح واحد تسلق الجدار وبص عليهم لقاهم كلهم اتمسخوا قردة🐒🐒🐒 وخنازير🐖🐖🐖😳
"فَلَمَّا عَتَوْا عَن مَّا نُهُوا عَنْهُ قُلْنَا لَهُمْ كُونُوا قِرَدَةً خَاسِئِينَ"
"وَلَقَدْ عَلِمْتُمُ الَّذِينَ اعْتَدَوْا مِنكُمْ فِي السَّبْتِ فَقُلْنَا لَهُمْ كُونُوا قِرَدَةً خَاسِئِينَ"
وبعد كام يوم -يُقال ثلاثة أيام- مات العصاة إللي ربنا مسخهم دول، فهمّ ملهمش نسل خالص زي ما الناس فاكرة 👌

فربنا نجّى الناصحين بسلام، ودول الفريقين إللي القرآن حكى عنه في الآية:
"فَلَمَّا نَسُوا مَا ذُكِّرُوا بِهِ أَنجَيْنَا الَّذِينَ يَنْهَوْنَ عَنِ السُّوءِ وَأَخَذْنَا الَّذِينَ ظَلَمُوا بِعَذَابٍ بَئِيسٍ بِمَا كَانُوا يَفْسُقُونَ "

طب والناس إللي سكتت😕؟
ربنا مجبش سيرتهم بالتحديد هل همّ مع إللي العذاب أخذهم بظلمهم؟ ولّا همّ نجوا مع الناصحين إللي ربنا نجاهم؟
عشان كده العلماء اختلفوا، قسم منهم قال هلكوا مع العصاة لأنهم متكلموش،
وقسم تاني من العلماء قالوا نَجَوا من الهلاك عشان كانوا كارهين للمنكر بقلوبهم رغم سلبيتهم في إنكارهم،
فمفيش حسم للمسألة دي والعلم عند الله،
حتى بعض المشايخ كان بيقول عن الساكتين دول جملة فيها عبرة جميلة قال: ملهمش أي دور فملهمش أي ذِكر، كإنهم هوا ملوش وزن ولا أثر..

☆طيب ليه ربنا بيقولنا على موضوع المسخ ده🤔
لأن هيكون في مسخ للناس قبل قيام الساعة 🙊
قال رسول الله ﷺ:
"بين يدي الساعة مسخٌ وخَسف وقذف"
المسخ يعني بشر يتقلبوا لصورة تانية غير بشرية، زي بني إسرائيل كده👆
والخسف يعني الأرض تنشق وتبلع ناس أو بيوت، زي خسف قارون كده لما حكينا قصته،
والقذف يعني ربنا يقذف حجارة من السماء على العصاة أو المُكذبين، زي ما حكينا في اللي حصل لقوم لوط👌

◇طيب مين الناس إللي هيحصل فيهم كده😳
هيحصل المسخ والخسف والقذف في نوعين من الناس:
النوع الأول:
◇الناس إللي بيتكلموا في القَدَر، ويقولوا ربنا ماقدّرش أي حاجة، ومبيعرفش الأمور إلا بعد ما بتحصل وتقع! وإن الناس همّ إللي بيخلقوا الأفعال مش ربنا إللي خقلها😑
ودول طائفة من ضُلّال العقيدة، اسمها طائفة "القدرية"

◇والنوع الثاني: همّ أصحاب الخمور والأغاني😶
وده ظاهر ومنتشر جدا حوالينا🙊
لما رسول الله ﷺ قال"في هذه الأمة مسخ وخسف وقذف" واحد من الصحابة سأله إمتى الكلام ده🤔؟
فرسول الله ﷺ قال له: "إذا ظهرت القِينات، والمعازف"
القينات يعني المغنيات والمعازف يعني أي حاجة بتطلع موسيقى،
وده من أكبر الأدلة إللي بيستند إليها العلماء في تحريم الموسيقى👌
لأن ربنا مش هيمسخ البشر عشان بيعملوا حاجة حلال أكيد يعني، ولّا عشان حاجة من الصغائر حتى🤓
وانتم أكيد شافين كمية انتشار الموسيقى والأغاني عامل إزاي ولا كإنه بقى ورد يومي زي أوراد الأذكار كده في الفيسبوك واليوتيوب والشوارع والأخبار والألعاب الاكترونية وحتى اللعب إللي مش إلكترونية حتى لو مجرد عربية بالريموت لازم تلاقي حاشرين معاها موسيقى،
وفي المواصلات والمطاعم والنوادي والبيوت وحفلات الزفاف والولادة وغيره.. في كل مكان حرفيا😓
والمشكلة الأكبر إن بعض الملتزمين لجؤوا لما يُسَمَّى بالبديل الإسلامي،
أناشيد إسلامية لكن بإيقاع وموسيقى! الموسيقى حرام والإيقاع حرام، سواء كان مع نشيد إسلامي أو أغنية فسق وفجور..
بس مين بيبحث عن الحلال والحرام زي ما بيبحث كده عن الأكل والشرب؟
دة معرفة الحلال والحرام أهم والله من الأكل والشرب، لإن بيهم بتكون حياتنا الأبدية..

¤طيب والحل😑
في الأمر بالمعروف والنهي عن المنكر👌
تخيل كده لما تعدي على محل مشغل أغاني وحطيت إيدك على ودنك والناس شايفاك🙉
انت كده أمرت بالمعروف ونهيت عن المنكر بأقل وسيلة من غير ما تتكلم،
وكمان قلدت النبي ﷺ في الحركة دي لما سد ودانه عن المعازف لما عدت جنب منه😊
وشوف كم إنسان ممكن يلفت نظره تصرفك ده فيسألك فتحكيله فعل النبي ﷺ فيتأثر ويقلدك؟
ميهمكش استهزاء إللي هيستهزأ.. إنت بترضي ربنا عز وجل مش بترضي الناس..
تخيل لو ركبت مواصلة ولقيت السواق مشغل أغاني فقلت له: لو سمحت... أنا ممكن أموت في أي لحظة دلوقتي، فأنا مش عايز أموت وأنا آخر حاجة كنت بسمعها هي الأغاني😔، فياريت تقفلها .
إنت هنا ذكّرت نفسك وذكّرت السواق بالموت ووعظته موعظة بليغة،
ولعله يتوب بسبب كلمتك لإن مفيش حد يتمنى يموت وهو بيسمع أغاني👌
بعكس لو جيت قولت له: يا أستاذ الأغاني حرام اطفيها😒 هيقولك مش عاجبك انزل.. ومش بعيد يشتمك 😅
فنجتهد في نصح الناس بالحكمة والموعظة الحسنة والمدخل المناسب لكل شخص وكل موقف، وسددوا وقاربوا وأبشروا👌

◇طيب نصحنا الناس بالحُسنى وبرده الناس مصممين وإللي في دماغهم في دماغهم نعمل إيه😶
شوفتوا لما الناس إللي كانوا بينصحوا بني إسرائيل عملو إيه لما بني إسرائيل مستجابوش😊
بنوا السور واعتزلوا العصاة عشان خافوا على نفسهم من عذاب ربنا👌
فزي ما قلنا المرة إللي فاتت في قصة يأجوج ومأجوج:
حط سد بينك وبين الفتن، أهه النهاردة بنقول حط حائط وسور بينك وبين الناس اللي مصممة إنها تجهر بمعصية الله👌
انت نصحت وكررت كتير، وهمّ رافضين، يبقى وجودك معاهم ممكن يبقى فتنة ليك بالفعل مع الوقت،
وممكن الناس تفهم كمان بوجودك ده إنه تأييد للعصاة المجاهرين المعاندين، في أفعالهم..

¤يعني ننعزل عن الناس😳.. بس الإسلام ماقلش ننعزل..! طب ومصالحا وحياتنا و...و...😶!
واحنا مقلناش ننعزل لإن غصب عننا هنتعامل وهنختلط بالناس، لكن نختلط بالناس واحنا بننكر المنكر ونؤمر بالمعروف،
و لو مكنش في استجابة من الناس نصبر ممكن ربنا يهديهم في يوم من الأيام،
ممكن مثلا لما أنا أقول كلمة وتؤثر تأثير بسيط في إنسان حد تاني ييجي ينصح نفس الشخص فيكتمل التأثير وربنا يهديه،
لكن لو خوفنا على نفسنا من الفتنة، نبعد عنهم ونكمل دعوة عامة للناس ونوصل لهم صوتنا من بعيد،
لكن لو هنختلط بيهم واحنا موقفين إنكار منكر، هنا الخطر الحقيقي
◇طيب لو مش عارفين نعمل كده😶
يبقى أنكر المنكر بقلبي👌
لأن إنكار المنكر بالقلب محدش له حجة إنه ميعملوش وهو واجب على كل مسلم وإنكار المنكر بالقلب بإننا نزول عنه😊
يعني مثلا متبقاش واحدة رايحة فرح كله موسيقى ورقص ورجالة مع ستات وتقعد في وسط الناس وتتصور مع العروسة وتقول أنا منكرة المنكر بقلبي🤓
لا يا حبيبتي إنتِ كده شاركتي في الذنوب دي كلها...لأنك قعدتي بمزاجك ورغبتك وانتِ تقدري متروحيش من الأساس😅
فلازم يكون في توازن ...لو في منكر أُنكره بإيدي أو لساني لو المنكر متغيرش يبقى أسيبه وأمشي وهو ده إنكار القلب👌

¤طيب هو الأمر بالمعروف والنهي عن المنكر حاجة مهمة يعني😕

ترك الأمر بالمعروف والنهي عن المنكر سبب في نزول البلاء وكمان عدم إستجابة الدعاء👌

فكروا في الواقع بتاعنا كده وشوفوا الحديثين دول👇

قال رسول الله ﷺ :
" وَالَّذِي نَفْسِي بِيَدِهِ لَتَأْمُرُنَّ بِالْمَعْرُوفِ، وَلَتَنْهَوُنَّ عَنِ الْمُنْكَرِ،

أَوْ لَيُوشِكَنَّ اللَّهُ أَنْ يَبْعَثَ عَلَيْكُمْ عِقَابًا مِنْهُ، ثُمَّ تَدْعُونَهُ فَلَا
يُسْتَجَابُ لَكُمْ"

وفي حديث تاني يقول:

يَا أَيُّهَا النَّاسُ إِنَّ اللَّهَ عَزَّ وَجَلَّ يَقُولُ:

"مُرُوا بِالْمَعْرَوفِ وْانْهَوْا عَنِ الْمُنْكَرِ مِنْ قَبْلَ أَنْ تَدْعُونِي فَلَا أُجِيبُكُمْ،
وَتَسْأَلُونِي فَلَا أُعْطِيكُم وَتَسْتَنْصِرُونِي فَلَا أَنْصُرُكُمْ"

طيب ماهو ممكن الأمر بالمعروف والنهي عن المنكر يعرضنا للأذى ..نعمل إيه😶

ده إللي هنعرفه الجزء الجاي إن شاء الله مع أصحاب الكهف😊

☆ملحوظة:
حد عايز يأخذ القصص وينشرها يتفضل أنا معنديش مانع نهائي 😊

#Eman_Shalapy

*أهلاً بكم في خدمة لعلها المنجية للنساء فقط💞🌸*
*معنا ستعرفي كل أمور دينك،بمنشور ديني،او محاضرة صوتية او فيديو،او كتاب(محتويات دينية كثيييرة ومتنوعة)*
تنبية.tt :الخدمة.للنساء.فقط.tt
*_للإشتراک:أرسلي تسجيل صوتي+إسمك ثنائي علي هذا الرابط ثم سجلي الرقم عندك بإسم خدمة لعلها المنجية_*
*# تنبية.tt : عليكِ تسجيل الرقم حتي تصلك الرسائل👇_*
https://api.whatsapp.com/send?phone=+201201825989&text=السلام_عليكم_ورحمة_الله_وبركاته_أريد_الإشتراك_في_خدمة_لعلها_المنجية

للنساء فقط👌

https://www.facebook.com/saraelsayed.elsebahey

https://www.facebook.com/profile.php?id=100076334799862

https://www.facebook.com/BentAleslams

تابعوا حساباتنا على الفيس بوك ولا تنسوا اللايك والمتابعة

#قصص_الأنبياء
#الحلقة_الثامنة_والأربعون
#فتية_الكهف

اتكلمنا المرة إللي فاتت عن أصحاب السبت وأنواع الناس في الأمر بالمعروف والنهي عن المنكر،
واتكلمنا عن أهمية الأمر بالمعروف والنهي عن المنكر وإن إللي ربنا بينجيه من المَهَالك العامة هو إللي بيأمر بالمعروف وينهى عن المنكر😊
طيب لو الإنسان هيتعرض لأذى شديد جدا لو أمر بالمعروف ونهى عن المنكر يعمل إيه🤔
هنعرف الإجابة إن شاء الله من قصة فتية الكهف 👌

كان في مدينة قومها بيعبدوا الأصنام من دون الله، وبيقدموا القرابين للأصنام دي زي ما كان قوم إبراهيم عليه السلام بيعملوا لو تفتكروا،
وكان الملك والأمراء من أوائل الناس إللي بتقدم القرابين للأصنام دي،
في وسط الكفر ده كان في شاب من أبناء الأمراء بيفكر مع نفسه كده:
إزاي نسجد ونبكي ونتضرع ونُوهب قربان لصنم لا بيتكلم ولا بيسمع ولا حتى بيشاور أو بيتحرك..!
أكيد في إله تاني للكون ده هو إللي خلقه وهو إللي يستحق العبادة👌
طبعا الكلام ده كان جواه مش قادر يقول الكلام ده للناس حواليه لإنه عارف إنه لو اتكلم هيتعرّض لأذى شديد😑
في يوم عيد لهم والكل خارج عشان يقدم القرابين للأصنام ، الشاب ده اعتذر وقال إنه مش هيقدر يخرج معاهم،
وبعدين راح ناحية شجرة لوحده عشان يفكر في حاله وحال قومه وهيعمل إيه بعد كده..
وهو ماشي رايح يقعد في المكان ده لوحده لقى ستة من الشباب جايين معاه في نفس الوقت عند المكان ده 🙊
فالشباب بصوا لبعض واستغربوا😳
وكأن لسان حال كل واحد منهم بيقول:
المفروض إن النهاردة يوم عيد! والكل خرج عشان يقدموا القرابين...! الشباب دول بيعملوا إيه هنا..! يا ترى إيه إللي جابهم هنا🤨
فبدأوا يكلموا بعض ويسألوا إنت جيت هنا ليه.. وإنت .. وإنت...
فكل واحد بدأ يتكلم عن إللي جواه واتضح إن كلهم بيفكروا نفس تفكير صاحبنا الشاب إللي اتكلمنا عنه من شوية😮
فالشباب اتشجعوا واستقوُوا ببعض وقالوا :
احنا ربنا هدانا للإيمان بيه وبوجوده.. فمش هينفع نسكت.. لازم نعرَّف الناس إن إللي بيعملوه ده غلط، وإن الإله الحق هو الله خالق السموات والأرض، مش الأصنام إللي لا بتنفع ولا بتضر👌
شباب مؤمن بربه وعنده همة عالية كمان في تبليغ الدين رغم خطورة الموقف.. عشان كده ربنا قال عنهم:
"إِنَّهُمْ فِتْيَةٌ آمَنُوا بِرَبِّهِمْ وَزِدْنَاهُمْ هُدًى"
هنا الشباب زي ما شفنا آمنوا بالله... واحنا عندنا القاعدة بتقول إييييه😁
إن مادام فيه إيمان يبقى في إبتلاء وفتنة واختبار وتمحيص👌
"أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ"
فإيه اللي حصل....؟
الملك عرف إن في مجموعة من الشباب مبتعبدش الأصنام مع باقي الناس، وبيقولوا إنهم بيعبدوا إله تاني،
ودول مش أي شباب على فكرة، دول كانوا أبناء الملوك والأمراء و الملك ده نفسه عارفهم شخصيا ..
طبعا الشباب بقوا خايفين أكتر، لإنهم دلوقتي بقوا في مواجهة دولة كاملة..
يعني مش بس هيواجهوا أهلهم وأصحابهم، لأ دول هيواجهوا الشعب كله وهيواجهوا كمان الحاكم ذات نفسه.. الرئيس بجنوده وسلطانه.... وهمّ مجرد سبعة أشخاص بس😶

☆خليني أقرب الصورة أكثر😊
شوفوا لما تكون واحدة عايزة تلبس نقاب مثلا أو عايزة تلتزم إلتزام صح بدينها ،
وتيجي تكلم أهلها وهي عارفة إنهم ضد فكرة الإلتزام جُملة وتفصيلا..بتبقي عاملة إزاي..بتبقي بتفكري في إيه..قلبها بيكون خايف أد إيه🙊
ودول أهلها من لحمها ودمها..بيخافوا عليها وبيتمنوا لها الخير أكثر من أي حد👌

تخيلوا معايا الموقف، الملك خلاص استدعاهم...داخلين عليه القصر.. جنود في كل حتة.. والناس بتبص عليهم وتبدأ الوشوشة بينهم وبين بعض:
يا ترى إيه إللي جمّع الشباب دول مع بعض...! وإيه إللي جابهم هنا في القصر...! ويا ترى الملك هيعمل فيهم إيه..؟!
تساؤلات وهمسات وجلبة ودوشة، والشباب سامعين وشايفين كل ده،
ومع ذلك متقدمين بثبات عشان يقابلوا الملك.
الملك شافهم داخلين... أنظار الوزراء والحاشية كلها عليهم.. مستنيينهم يتكلموا .. أول مرة يحصل موقف زي كده وحد يواجه الملك👌
موقف يحبس الأنفاس فعلا...فتخيلوا موقف الشباب دول كان عامل إيه، وقلوبهم في الوقت ده كانت عاملة إزاي🙊
لإن هنا الإختبار والفتنة ، هل هيصبروا ويثبتوا على الإيمان، ولّا هينكروا كل شيء ويسجدوا لصنم عشان الملك يصدقهم؟

لكن الشباب كانوا واخدين القرار إنهم هيجهروا بالحق ويبينوا للناس إنهم يسيبوا عبادة الأصنام ويعبدوا الله الواحد الأحد، قرروا يعملوا كده رغم الصعاب إللي ممكن يواجهوها..
برغم الأذى إللي ممكن يتعرضوا له....
ومع ذلك مقالوش احنا نخلينا في نفسنا احنا معذورين، وهنعبد ربنا في السر بقى وأهه نعيش مع أهلنا في القصور مضطرين عشان محدش يشك فينا،
ما حنا بردو مش هننعزل يعني عن الناس ونسيب حياتنا 😑

وبالمناسبة🙂
الشباب دول قرروا يعملوا كده من نفسهم لله، يعني همّ مجلهمش وحي، ولا جالهم رسالة من ربنا بالأمر بالمعروف والنهي عن المنكر،
لكن إحساسهم الفطري إنهم لازم يدعوا الناس ل

عبادة الله وإن ربنا هو المستحق للعبادة هو إللي خلاهم يقفوا الموقف ده ويعلنوا الحق للناس👌

دي الأحداث إللي كانت بتحصل في الأرض،
أما في السماء، فكان لربنا شأن تاني مع الشباب دول😊
ربنا عالم بكل شيء بيحصل وعالم بقلوب الشباب والخوف والفزع إللي فيها...
وعالم بثباتهم وصدق لجوئِهم له وحده سبحانه.. تعتقدوا إن ربنا ممكن يسيب إنسان بيعمل حاجة لله ولله فقط وبصدق كده، ويكون المحرك لكل أعماله هو الرغبة في رضا الله ونشر دينه؟
طبعا لأ... وحاشاه عز وجل..
لما الشباب ثبتوا وصَدَقُوا، ربنا كافئهم وأيّدهم..
أول حاجة ربنا عملها مع الشباب دول كانت إنه ربط على قلوبهم..
ثبتهم.. طمّن قلوبهم.. مفيش خوف خلاص.. في قوة وصمود👌
مبقاش هاممهم حد..بيتكلموا بكل جرأة وشجاعة:
إحنا آمنا بالله ربنا إللي خلق السماوات والأرض، مش هنعبد ولا ندعوا غيره.. ولو عبدنا غيره يبقى احنا بنفتري الكذب على الله😤
قومنا بيعبدوا أصنام لا تضر ولا تنفع، ومش معاهم أي بينة ولا دليل من ربنا على إن عبادة الأصنام دي صحيحة🤷‍♂️
وأظلم الناس همّ إللي بيدّعوا ويزعموا على ربنا حاجة بالكذب وهو مقلش عليها ..👌
"وَرَبَطْنَا عَلَى قُلُوبِهِمْ إِذْ قَامُوا فَقَالُوا رَبُّنَا رَبُّ السَّمَاوَاتِ وَالْأَرْضِ لَنْ نَدْعُوَ مِنْ دُونِهِ إِلَهًا لَقَدْ قُلْنَا إِذًا شَطَطًا "

إيه اللي حصل😬
طبعا أهل الباطل لغتهم الوحيدة إللي يعرفوها هي التهديد والتعذيب والقتل والبطش، ودي سُنّة كونية معروفة خلاص😑
فالملك أمر جنوده إنهم يمسكوا الفتية دول وينزعوا ملابسهم لأنهم كانوا لابسين ملابس الأمراء،
ويلبسوهم ملابس عادية ويحبسوهم يمكن يرجعوا في كلامهم🤷‍♂️
عارفين الملك عمل كده ليه😊
الشباب زي ما قلنا دول أبناء أمراء، يعني بيسكنوا في أحسن القصور وبياكلوا أحسن الأطعمة، وبيلبسوا أحسن الثياب، ده غير الخدم والنعيم والمتع والنفوذ والمال..و..و..و... يعني عندهم مُلك الدنيا بين إيديهم👌
فالملك تخيّل إنه لما يهددهم بإنه ياخد منهم مُلك الدنيا ده، إنهم ممكن يفكروا ويراجعوا أنفسهم تاني ويعيدوا حساباتهم😶
لكن الملك ده، وفرعون كمان من قبله، وكل ظالم جبار قبلهم وبعدهم، مش فاهمين نقطة مهمة أوي،
وهي إن الإيمان لما يستقر في القلب فعلا مش هيفرق مع الإنسان أي شيء من متاع الدنيا الزائل،
لا هيفرق معاه ألم ترك المتع دي كلها، ولا حتى يفرق معاه أي ألم.. ولا في مُلك ولا مال ولا تعذيب ولا..ولا.. هيخلوه ساعتها يغير من عقيدته..
لإن إللي بيوضح عنده البصيرة بالحق خلاص، مش بيبقى شايف قدامه ساعتها إلا رضا الله وبس👌
الشباب عرفوا يهربوا من الملك.. محاولوش يتسعيدوا أي شيء من حقوقهم ومكانتهم دي.. تركوا القصور وتركوا الأموال والحياة إللي يتمناها أي إنسان عايز يعيش مرتاح ومتنعم في الدنيا..
طيب راحوا فين بعد كده؟
هل ربنا عوضهم بقصر أحسن من القصر إللي كانوا فيه؟
هل ربنا عوضهم بأموال أكثر من الأموال إللي كانت عندهم؟ هل همّ نفسهم اشترطوا وقالوا يارب احنا هنسيب عبادة الأصنام وهنعبدك إنت، فلازم تعوضنا بقى،
مش انت يارب قلت من ترك شيئا لله عوضه الله خيرا منه ؟
ولا حاجة من دي حصلت...
عارفين الشباب دول بعد ما كانوا عايشين في القصور مُنعمين على أحسن الفُرُش وبياكلوا أحسن أكل راحوا فين؟
راحوا كهف 😶
كهف في الجبال وسط الصخور، كهف يعني ممكن يكون جواه حشرات وأفاعي وعقارب ومكان ضلمة..ممكن يكون جواه حيوانات مفترسة، مش بس كده ده مفيش حاجة يناموا عليها في الأرض غير التراب والحصى،
وكل ده ليه😳
إيه إللي يخليهم يستحملوا ده كله ويتخلوا عن حياتهم المريحة... إيه الدافع للهم ده😑
الدافع هو البحث عن رضا الله 👌 .
"إِذْ أَوَى الْفِتْيَةُ إِلَى الْكَهْفِ فَقَالُوا رَبَّنَا آتِنَا مِنْ لَدُنْكَ رَحْمَةً وَهَيِّئْ لَنَا مِنْ أَمْرِنَا رَشَدًا"
وتخيلوا أول حاجة عملوها لما دخلوا الكهف الموحش ده كانت إيه؟
أثبتوا عبوديتهم واعتصامهم بالله وحده أكتر وأكتر، وأظهروا افتقارهم له، ودعوه لإرشادهم وإنقاذهم من الكفار،
"إِذْ أَوَى الْفِتْيَةُ إِلَى الْكَهْفِ فَقَالُوا رَبَّنَا آتِنَا مِنْ لَدُنْكَ رَحْمَةً وَهَيِّئْ لَنَا مِنْ أَمْرِنَا رَشَدًا"

عملوا إللي عليهم ودَعوا... وربنا يُصَرَّف أمورهم بإللي يراه مناسب لهم.. يعني هما مُسلّمين أمرهم تمااااما لله👌
"وَإِذِ اعْتَزَلْتُمُوهُمْ وَمَا يَعْبُدُونَ إِلَّا اللَّهَ فَأْوُوا إِلَى الْكَهْفِ يَنْشُرْ لَكُمْ رَبُّكُمْ مِنْ رَحْمَتِهِ وَيُهَيِّئْ لَكُمْ مِنْ أَمْرِكُمْ مِرْفَقًا"

تعتقدوا ربنا يترك إنسان ضحّى من أجله سبحانه وعرَّض نفسه للأذى عشان بيدافع عن دين رب العالمين 😊
طيب ربنا عمل إيه مع فتية الكهف😁
هل أنزل من السماء صاعقة على القوم الكافرين؟
هل ربنا خسف بالكفار الأرض؟
لأ... ولا أي حاجة من دي..
ربنا خلاهم يناموا😁
"فَضَرَبْنَا عَلَى آذَانِهِمْ فِي الْكَهْفِ سِنِينَ عَدَدًا "

☆نعم😳
يعني الشباب طلبوا من ربنا النصر والرحمة فكانت ال

استجابة إنهم يناموا 😳
آه والله.. ومش أي نوم ده هيناموا أكثر من ثلاثمائة سنة، ودي حكمة ربنا عزو وجل إللي عمرنا ما هنحيط بها علما👌
لكن خلونا نشوف كده جانب بسيط من الحكمة دي..
عارفين يعني إيه النوم في موقف زي ده؟
كإن ربنا بيوصل لنا رسالة إن مش دايما الانتصار بيكون في استخدام القوة والبطش والإهلاك والقضاء على الخصم.. ممكن يكون انتصارك على خصمك عن طريق إنه يخليك متحسش بيه خالص ، ويكون هو إللي حارق نفسه من الغيظ والغضب والتعب بسببك 💁‍♂️
ربنا جعل فتية الكهف يناموا مطمئنين بالهم مرتاح بعد قلق وخوف،
وفي نفس الوقت ده كان الملك وجنوده بيبحثوا عنهم بين الجبال .. في الأودية.. في الكهوف..
في كل مكان وبكل وسيلة ممكنة.. ضيعوا فلوسهم ووقتهم وطاقتهم وراحة بالهم وأعصابهم أيام وأيام.. ده غير الإحباط والفشل ..
مين إللي تعب هنا وكان في كرب؟
مين إللي انشغل وبذل أغلى ما يملك وبرده ما أخدش إللي هو عاوزه وعايش مكروب مهموم البال، ومين إللي نايم مرتاح مطمئن في حفظ الله ورعايته😊
كإن ربنا بيقول لهم:
ناموا مطمئنين.. ومش بس هتناموا يوم ولا اتنين ولا شهر ولا شهرين..إنتم هتناموا ٣٠٩ سنة،
ومش بس كده .. لأ ده انتوا هتكونوا في حفظي ورعايتي بشكل كامل حتى إن الشمس إللي برة الكهف دي هسخرهالكم بشكل معين بحيث تديكم الفايدة بتاعتها تامة،
وفي نفس الوقت ما تضروكوش ولا تؤذيكم بأشعتها وسخونتها،
"وَتَرَى الشَّمْسَ إِذَا طَلَعَتْ تَزَاوَرُ عَنْ كَهْفِهِمْ ذَاتَ الْيَمِينِ وَإِذَا غَرَبَتْ تَقْرِضُهُمْ ذَاتَ الشِّمَالِ وَهُمْ فِي فَجْوَةٍ مِنْهُ"
ومش بس كده ده أنا هقلبكم على الجوانب اليمين والشمال كل شوية عشان الأرض ماتاكلش أجسادكم،
وعشان جسمكم ميجيش فيه قُرح -إللي هي معروفة في زماننا باسم "قُرَح الفِراش"و إللي بتيجي للناس المرضى لمدة طويلة مش بيتقلبوا في السرير،
"وَنُقَلِّبُهُمْ ذَاتَ الْيَمِينِ وَذَاتَ الشِّمَالِ وَكَلْبُهُمْ بَاسِطٌ ذِرَاعَيْهِ بِالْوَصِيدِ"
يعني الكلب بتاعهم مادد دراعاته عند مدخل الكهف..

فيا أهل الكهف، انتم وظيفتكم دلوقتي إنكم تناموا؛ لأن نصركم في النوم، مش هتقدروا تواجهوهم، لإن مش كل نصر ييجي بالمواجهة المباشرة في ساعتها😊
زي ما ربنا نصر نوح عليه السلام بإنه أغرق الكفار، ونصر لوط بإنه قلب قريته زي ما قلنا قبل كده، نصر فتية الكهف بالنوم💁‍♂️
وما يعلم جنود ربك إلا هو👌
نام الفتية ٣٠٩ سنة ، وكان معاهم كلب بيحرسهم،
احنا منعرفش الكلب جه منين، لكن ربنا ذكر لنا الكلب عشان يقول لنا حاجة مهمة،
وهي إننا نصاحب الصالحلين ؛مصاحبة الصالحين بتجلب الشرف والتكريم من الله عز وجل..
فذِكر الكلب بالذات بيعلمنا إن مهما كان شأنك وضيع وملكش قيمة، فذِكرك هيكون مُشرِّف وهتتكرم لو إنت كنت مصاحب الأخيار المؤمنين،
فالكلب على الرغم من نجاسته، لكن ربنا ذكره لمجرد إنه كان مصاحب الصالحين، فما بالنا بالصالحين نفسهم😊
زي ما الإمام الشافعي كان بيقول:
أحب الصالحين ولست منهم، عسى أن أنال بهم شفاعة.. فصحبتهم بتكون من أسباب تكريم الله للإنسان..
فاللهم ارزقنا صحبة الصالحين واجعلنا منهم🤲

الفتية بقى لما ناموا كانوا نايمين وعينهم مفتوحة وبتنظر ناحية باب الكهف، حتى الكلب كمان كان بنفس المنظر!
"وَتَحْسَبُهُمْ أَيْقَاظًا وَهُمْ رُقُودٌ"
فلو حد شافهم بالشكل ده كان هيتفزع جدا من منظرهم وهيطلع يجري ده لو مامتش بالسكتة القلبية يعني😅
"لَوِ اطَّلَعْتَ عَلَيْهِمْ لَوَلَّيْتَ مِنْهُمْ فِرَارًا وَلَمُلِئْتَ مِنْهُمْ رُعْبًا"..
وعدت السنين.. وصحيوا..
لما صحيوا من النوم شكلهم كان زي ماهو ما اتغيرش، لا شعرهم طِوِل ولا ضوافرهم طولت ولا أي حاجة خالص👌

☆إيه ده ..إزاي يعني يقعدوا السنين دي كلها وشعرهم مايطولش وشكلهم مايتغيرش🤔
يعني إللي كان قادر يخليهم يناموا أكثر من ثلاثمائة سنة بدون أي أذى عضوي أو غيره، مش قادر يجعل أشكالهم ماتتغيرش😅
أول ما صحيوا، سألوا بعض هو احنا نمنا أد إيه🤨
فواحد منهم قال ممكن يوم.. أو ممكن كام ساعة، لما شافوا الشمس قربت على الغروب،
وهمّ كانوا داخلين الكهف في أول النهار، فلما لقوا نفسهم مش متأكدين قالوا الله أعلم إحنا نمنا أد إيه🤷‍♂️
"وَكَذَلِكَ بَعَثْنَاهُمْ لِيَتَسَاءَلُوا بَيْنَهُمْ قَالَ قَائِلٌ مِنْهُمْ كَمْ لَبِثْتُمْ قَالُوا لَبِثْنَا يَوْمًا أَوْ بَعْضَ يَوْمٍ قَالُوا رَبُّكُمْ أَعْلَمُ بِمَا لَبِثْتُمْ "

وبعدين انتبهوا إنهم جاعوا وعايزين ياكلوا، لكن هيجيبوا أكل إزاي دلوقتي وهم مطلوبين🙊
فاتفقوا إن واحد منهم يروح يشتري أكل بالنقود إللي معاهم، لكن يتخفّى كده ومايخليش حد ياخد باله منه،
"فَابْعَثُوا أَحَدَكُمْ بِوَرِقِكُمْ هَذِهِ إِلَى الْمَدِينَةِ فَلْيَنْظُرْ أَيُّهَا أَزْكَى طَعَامًا فَلْيَأْتِكُمْ بِرِزْقٍ مِنْهُ وَلْيَتَلَطَّفْ وَلَا يُشْعِرَنَّ بِكُمْ أَحَدًا "

لأنهم لو عرفوا مكاننا هيقتلونا بأبشع طريقة وهي الرجم، أو يجبرونا إننا نعبد الأصنام وساعتها

يبقى احنا ضعنا😑
"إِنَّهُمْ إِنْ يَظْهَرُوا عَلَيْكُمْ يَرْجُمُوكُمْ أَوْ يُعِيدُوكُمْ فِي مِلَّتِهِمْ وَلَنْ تُفْلِحُوا إِذًا أَبَدًا "

☆القتل في وجهة نظرهم مش مشكلة لإن كده كده الكل هيموت،
لكن المشكلة لو أجبروهم بالتعذيب على المعصية والرجوع للكفر مرة ثانية فهيخسروا الدنيا والآخرة👌
فشاب منهم خرج من الكهف، ومشي في الطريق .. عمال يبص يمين وشمال! الطريق مختلف والناس شكلهم مختلف 😳
وصل لخباز في السوق، طلع له النقود إللي كانت معاه،
الخباز شك في الشاب لإن النقود دي كانت عملات قديمة بقالها أكتر من ثلاثمائة سنة😮
فشك إنه ممكن يكون لقى كنز بتاع حد، أو ممكن يكون جاسوس بسبب شكله المختلف عن أهل القرية كمان😕
فنادى الخباز على جنود الشرطة إللي كانوا موجودين في المكان،
فأخدوا الشاب للملك والشاب خايف طبعا، لإنه متوقع إن دلوقتي هيحصل إللي كان هو وأصحابه خايفين منه 😥
فلما دخّلوا الشاب للملك، الشاب استغرب!
ده ملك مختلف تماما عن الملك الكافر بتاعهم!
سألهم الشاب عن الملك الكافر ، فقالوا إنه مات من سنين طويلة، وإن خلاص مابقاش فيه كفر لإنهم بقوا بيعبدوا ربنا دلوقتي!
فالشاب اطمن وفرح جدا وبدأ يحكى قصته هو وأصحابه للملك المسلم،
والناس عرفتهم على طول لما حكى قصتهم ؛لإنهم كانوا مشهورين في البلد من ساعتها بسبب موقفهم المختلف تماما عن موقف باقي البلد من عبادة الأصنام،
وعشان كمان اختفوا فجأة كإن الأرض انشقت وبلعتهم، فمش ممكن ينسوا حكايتهم بسهولة..
وأخد الشاب الملك والجنود عند الكهف إللي فيه أصحابه عشان يقابلوا باقي الفتية،
فلما قربوا من الكهف الشاب قال لهم إنه هيروح هو الأول يحكي لأصحابه إللي حصل ويخرج معاهم من الكهف ويتقابلوا مع الملك عشان لو أصحابه شافوا المنظر ده أكيد هيتخضوا جامد فهو خاف عليهم،
وده يعلمنا مدى حرص الطيبين على قلوب بعض وإن الأخذ بأسباب عدم ترويع الآمنين، ده من صميم المروءة والشهامة وحسن الخلق والصلاح👌
راح الشاب لأصحابه وحكالهم إللي حصل وإنهم قعدوا أكتر من ثلاثمائة سنة نايمين،
وتيقن الجميع من قدرة الله وعظمته وحفظه المتين،
وإن إللي خلّى مجموعة من الفتية يفضلوا نايمين السنين دي كلها، قادر على إحياء الموتى للجزاء والحساب ، يعني يوم القيامة قادم بدون أي شك👌
"وَكَذَلِكَ أَعْثَرْنَا عَلَيْهِمْ لِيَعْلَمُوا أَنَّ وَعْدَ اللَّهِ حَقٌّ وَأَنَّ السَّاعَةَ لَا رَيْبَ فِيهَا
ثم مات الفتية... ماتوا بعد ما أدوا رسالتهم ..
مكنوش عارفين يدعوا قومهم والملك كان عايز يقتلهم.. فربنا خلاهم سبب في إن ناس تانية خالص توقن في موعود الله
بعد سنين طويلة وبعد ظهور أجيال تانية جديدة مالهاش علاقة بيهم👌
فدورهم مكنش في زمانهم على أد ما كان في زمن تاني خالص بقدر الله وتدبيره وحكمته😊
"وَكَذَلِكَ أَعْثَرْنَا عَلَيْهِمْ لِيَعْلَمُوا أَنَّ وَعْدَ اللَّهِ حَقٌّ وَأَنَّ السَّاعَةَ لَا رَيْبَ فِيهَا"

☆و احنا كمان....
ممكن نشتغل ونشتغل ونشتغل، لكن ميكونش لينا دور بالسعي ده في وقتنا الحاضر..
لكن يكون لينا دور السنة الجاية أو إللي بعدها أو حتى بعد سنين،
أو حتى بعد ما نموت ممكن ربنا يبارك في أثرنا أكتر ما كان واحنا عايشين ويجعل دورنا يبدأ بجد في حياة الناس بعد مماتنا👌
فتية الكهف تنازلوا عن حياتهم المرفّهة في القصور وجهروا بكلمة الحق،
والدافع إللي كان بيحركهم هو رضا الله فقط، محدش فيهم كان بيبص لمكانته الإجتماعية..محدش فيهم كان بيقول طب الناس هتقول عليّ إيه، طيب أصحابي ..طيب أهلي..طيب...طيب...محدش فيهم بص للكلام ده،
مجرد ما عرفوا إن رضا ربنا في حاجة على طول عملوها لأنهم عارفين إن مهما عاشوا فنهايتهم الموت،
يبقى يموتوا وهم محققين رضا الله ولهم الجنة، ولا إنهم يعيشوا في الدنيا في نعيم وربنا ساخط عليهم👌
وعشان احنا كمان يكون لينا دور ،يبقى لازم نبذل لله أغلى ما نملك زي ما فتية الكهف بذلوا،
ومنخليش المكانة الاجتماعية أو أصحاب أو حتى أهل يصدوني عن البذل ده،
لأ، أجاهد كل الصعوبات وأكمل طريقي، وبعدين استنى وقت حصاد الثمار لما ربنا يأذن😊

بعد ما مات الفتية الناس اختلفوا وتنازعوا..
"إِذْ يَتَنَازَعُونَ بَيْنَهُمْ أَمْرَهُمْ فَقَالُوا ابْنُوا عَلَيْهِمْ بُنْيَانًا رَبُّهُمْ أَعْلَمُ بِهِمْ قَالَ الَّذِينَ غَلَبُوا عَلَى أَمْرِهِمْ لَنَتَّخِذَنَّ عَلَيْهِمْ مَسْجِدًا "
يعني فريق قال نسد عليهم باب الكهف،
والفريق التاني قال لأ، احنا هنبني جنبهم معبد عشان يفكر الناس بقصتهم، وهيكون معبد مبارك بسبب صلاح الشباب دي..
وطبعا ده كان جائز في الشرائع إللي قبل كده، لكن شريعة الإسلام محرم فيها بناء المساجد على القبور وعمل المقامات والكلام ده 👌

☆يبقى نلخص أهم فايدة اتعلمناها من قصة النهاردة ونقول:
إن فتية الكهف لما اتعرضوا للأذى الشديد إللي ممكن يكون سبب في إنهم يسيبوا دينهم هاجروا بدينهم..
اعتزلوا الكفر وأهله وهربوا بدينهم.. فلما حفظوا دينهم ربنا حفظهم بحفظه المتين..
وده يعل

منا إن أغلى حاجة في حياة الإنسان هي《دينه》،
وإنه ممكن يتنازل عن أي شيء مهما كان في مقابل إنه يحافظ عليه،
وإن إللي يبقى صادق فعلا زي فتية الكهف كده ربنا هينصره ويسّخر له الكون بمخلوقاته وقوانينه، لإن من كان مع الله كان الله معه😊
قصتنا الجاية إن شاء الله هتكون عن صاحب الجنتين👌

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

https://www.tgoop.com/BentAleslams
إنشروا رابط القناة ولكم الأجر
بنزل في القناة ٤ سلاسل للإستعداد لرمضان
1-سلسلة 100 يوم على رمضان
2-سلسلة وصايا إيمانية
3-سلسلة سباق القلوب بالطاعات
4-سلسلة إنها الجنة
وهناك المزيد بإذن الله
إنشروا رابط القناة ولكم الأجر💛

#قصص_الأنبياء
#الحلقة_التاسعة_والأربعون
#صاحب_الجنتين

قصتنا النهاردة ربنا ذكرها في القرآن لرسول الله ﷺ وهي رسالة لكل إللي هيقرأ القرآن على مر السنين،
عشان كفار قريش يعرفوا واحنا كمان نعرف إن العبرة مش بكثرة الأموال ولا بالغنى،
ولكن العبرة بالإيمان لأن الرجل ممكن يكون غني كافر ولا ينفعه ماله مثلكم يا كفار قريش👌
وممكن يكون الإنسان فقير ولكنه مؤمن وهو ده إللي هينفعه يوم القيامة زي فقراء الصحابة إللي انتم طلبتم من رسول الله ﷺ إنه يطردهم عشان تقعدوا معاه وتسمعوا كلامه👌

خلونا نشوف القصة مع بعض😊

القصة عن رجلين يُقال إنهم من بني إسرائيل، منعرفش في زمن أنهي نبي،
لكن إللي يهمنا إن قصتهم بتتكرر في كل زمان، فلازم ناخد بالنا ونعتبر..
الرجلين دول، واحد منهم غني ربنا أعطاله بستانين مليانين شجر من كل الثمرات، وخصوصا شجر العنب، لإنه أفضل الثمار ..
والمسافة إللي بين البستانين كمان مكنتش فاضية،
لأ، ده ربنا جعل فيها كمان زرع ، ده غير إن من الأطراف الخارجية للبستانين النخل محاوط المكان من كل جانب.. فكان شكل البستانين جميل جدا وجذاب وكله نضارة وتناسق..
كمان موقع البساتين كان ممتاز،
يعني بيدخل له الهوا والشمس بشكل منتظم وصحي.. زي ما بنقول على شقة من الشقق مثلا: الشقة دي شِرحة وبِرحة ، جَوَّها بحري وهواها يرد الروح ويشرح القلب😅
أهه البستانين بتوع صاحبنا ده كانوا من أحسن ما يمكن في كل شيء بالذات الموقع، فعشان كده الثمار طلعت على أحسن ما يكون..
ومش بس كده، ده الثمر إللي كان بيطلع مكنش فيه أي حاجة منه بتبوظ خالص أو تفسد 👌
"وَاضْرِبْ لَهُمْ مَثَلًا رَجُلَيْنِ جَعَلْنَا لِأَحَدِهِمَا جَنَّتَيْنِ مِنْ أَعْنَابٍ وَحَفَفْنَاهُمَا بِنَخْلٍ وَجَعَلْنَا بَيْنَهُمَا زَرْعًا"

وكان لما يسقي الزرع في البستانين مكنش بيحتاج يحفر في الأرض عشان يطلع المياه الجوفية،
ولا كان بيحتاج إنه يجيب عُمال ينقلوا المياه للأرض عنده، ولا أي حاجة من دي،
لأ، ده ربنا كان منعّمه ومريّحه أكتر، فكان مفجّر له نهر منها فيها والنهر ده كان بيمشي في البساتين ويرويها،
وربنا جعل له زي عيون المية كده بتجري وسط البساتين من النهر ،فعلا سبحان الله حاجة تسحر العيون😮
"كِلْتَا الْجَنَّتَيْنِ آتَتْ أُكُلَهَا وَلَمْ تَظْلِمْ مِنْهُ شَيْئًا وَفَجَّرْنَا خِلَالَهُمَا نَهَرًا"
شوفوا النعم إللي ربنا أنعم بيها على الرجل دي كلها،
عمل إيه هو عشان يشكر النعم دي😕

☆شوفوا،
الناس في شكر النعم أنواع:
◇نوع بيتكبر ويطغى بالنعمة وبيعصي ربنا بيها،
ودول ربنا بيصبر عليهم لعلهم يتوبوا، ولما بيستمروا في معاصيهم وتكبّرهم، بيسلب منهم النعم دي أو بيموتهم عليها والعياذ بالله👌
يعني مثلا تلاقي واحد ربنا مديله نِعم زي نعمة البصر ونعمة السمع،
وبعدين تلاقيه بيستعملها في المعاصي ويتفرج على الأفلام والمسلسلات وبيسمع الأغاني..
أو تلاقي واحدة ربنا معطيها نعمة زي نعمة الجمال، تقعد تستعرض جمالها قدام الناس وتخرج متبرجة في الشارع وتفتن الشباب..
دول ممكن يفضلوا مستمرين في استعمال النعم في معصية الله لحد ما ربنا يسلبها منهم إن أراد عقابهم ولم يعفو عنهم..

كم مرة سمعتم عن بنت عملت حادثة وهي لابسة لبس مش كويس،
وخرجت من الحادثة وهي مشوّهة أو محروقة أو عندها عاهة مستديمة والعياذ بالله قضت على جماله إللي كانت بتُبَارز ربنا بيه بالمعصية ليل نهار بدل ما تشكر النعمة كما يحب ويرضى؟
كم مرة سمعتم عن شاب عمل حادثة وهو بيسمع الأغاني وبدأ يطلّع في الروح، فحاولوا يلقنوه الشهادة لكن للأسف ما عرفش يقولها وفِضِل يردد الأغاني المحرمة لحد ما روحه طلعت؟
شوفنا وسمعنا كتير عن حكايات زي دي، وكلهم هيُبعَثوا يوم القيامة وهمّ على المعصية دي، إن لم يعف عنهم الله، لإن من مات على شيء بُعث عليه👌

◇النوع التاني من الناس هو نوع كل ما ربنا يزوّد له في النِّعم يتواضع لربنا ويشكر نعمته ويستعملها في طاعته عز وجل، وده ربنا بيمتّعه بالنعم دي حتى الممات..
كام مرة سمعنا عن واحد مات وهو ساجد أو صائم؟
دي ناس أفنت نعمة الصحة في تسخيرها في طاعة الله، وهو ده شكر النعمة..
كام مرة سمعتم عن بنت ماتت وهي بتقرأ القرآن؟
أو بنت ماتت بحجابها مستورة مش باين منها شعراية حتى، رغم إنها ممكن تكون وقعت من مكان مرتفع مثلا ،
الجزاء من جنس العمل يا جماعة، إللي يشكر نعمة ربنا ..ربنا هيبارك له في النعمة ويزودها له،
واحنا شوفنا مثال على شكر النعم في سليمان عليه السلام وفي ذي القرنين،
وإللي يكفر نعمة ربنا ويستعملها في معصيته ويتكبر بيها ويستغنى، ربنا هيسلبها منه في يوم من الأيام👌
وربنا مهما أمهل الناس، فهو يمهل ولا يهمل..
فالرجل صاحبنا بقى عمل إيه في النِّعم إللي ربنا أعطاها له💁‍♂️
للأسف كان من النوع الأول، تكبّر وطغى 😞

والراجل ده كان له صاحب فقير فلوسه قليلة مش زي صاحبه،
في يوم من الأيام الراجل الغني قال لصاحبه الفقير: تعال نتمشى في البستان عندي شوية كده..
دخلوا البستان

على حالته إللي احنا وصفناها دي من الجمال والحُسن، وكان كمان ده وقت الحصاد فتخيلوا جمال المنظر👌
لما دخل مع صاحبه البستان وورّاله الجمال، بدأ يتكلم ويجادله عشان يأثر عليه فقال له بكل غرور:
شايف أنا عندي أموال كتيرة إزاي؟!
ده غير مركزي الإجتماعي بين الناس ومكانتي بين الناس وقوتي ونفوذي بعشيرتي 😎
" فَقَالَ لِصَاحِبِهِ وَهُوَ يُحَاوِرُهُ أَنَا أَكْثَرُ مِنْكَ مَالًا وَأَعَزُّ نَفَرًا"

☆عارفين زي إيه 🤔
زي مثلا لما تلاقي واحدة مثلا من البنات إللي مش عايشة غير عشان تمتع نفسها بالدنيا،
فعايشة حياتها بالطول والعرض ومش فارق معاها لا حلال ولا حرام، فتلاقي البنت دي لما تشوف واحدة من البنات الملتزمات بطاعة ربنا بما يرضي الله وثابتة على الحجاب الشرعي الساتر المظبوط، فتقول لها:
شايفة أنا عايشة حياتي ومستمتعة بيها وبعمل كل إللي نفسي فيه إزاي💁‍♀️؟!
بخرج مع أصحابي في أي مكان براحتنا ومع أي حد براحتنا وفي أي وقت براحتنا ...
وبسمع الأغاني وبتفرج على السينما والأفلام براحتي وبسافر هنا وهناك ، هي دي السعادة يا بنتي😌
أنا عايشة حياتي أحسن منك.. أنا بستمتع بحياتي صح وانتِ دافنة نفسك بالحيا وهتضيعي عمرك في الخيمة إللي انتِ لابساها دي والحبسة إللي انتِ حطة نفسك فيها دي😎
فهي نفس الحالة بالضبط👌

المهم، صاحبنا قال الكلمتين دول بكل فخر وغرور وتكبر،
وكان داخل البستان من البداية بنفس الغرور ده، فبقى كل ما يبص على المكان وجماله يركبه الغرور أكتر..
وبدأ كلامه ياخد اتجاه واضح للكفر🙊
قال ياسلام عالجمال🤩
الجنة العظيمة دي إللي جذورها في الأرض والنخل إللي عمره سنين طويلة والمية الكثيرة دي مستحيل كده الجنة دي تفنى..إيه إللي يفنيها ..ده لو جراد الدنيا كله اتجمع مش هيقدر ياكلها😏
"وَدَخَلَ جَنَّتَهُ وَهُوَ ظَالِمٌ لِنَفْسِهِ قَالَ مَا أَظُنُّ أَنْ تَبِيدَ هَذِهِ أَبَدًا"

شايفين😐
من كتر غروره واستغناؤه بالنعمة عن المُنعم، بدأ يعتقد إن الجمال الشاسع ده الممتد شرقا وغربا وجذوره في أعماق الأرض وفروعه في عنان السماء، مستحيل إنه يفنى أو ينتهي ويزول👌
طبعا هو بيكلم صاحبه الفقير ..مش يسكت بقى لأ ده كمل
وقال لصاحبه الفقير :
انت بتقول إن في يوم قيامة ويوم القيامة كل شيء بيهلك وينتهي😏
طيب أنا بقولك إن مفيش يوم قيامة ..وحتى لو فرضنا جدلا يعني إن في يوم قيامة إللي أعطاني البساتين دي في الدنيا أكيد بيحبني وهيعطيني أحسن من البساتين يوم القيامة😎
"وَمَا أَظُنُّ السَّاعَةَ قَائِمَةً وَلَئِنْ رُدِدْتُ إِلَى رَبِّي لَأَجِدَنَّ خَيْرًا مِنْهَا مُنْقَلَبًا "

☆للأسف في ناس مفكرة إن لما ربنا بيعطيهم من نعيم الدنيا يبقى هو كده راضي عنهم..ومش فاهمين إن ربنا بيعطي الدنيا لمَن يحب ومَن يكره، أما الآخرة فلا يعطيها إلا لمَن يحب👌
"وَلَا يَحْسَبَنَّ الَّذِينَ كَفَرُوا أَنَّمَا نُمْلِي لَهُمْ خَيْرٌ لِّأَنفُسِهِمْ ۚ إِنَّمَا نُمْلِي لَهُمْ لِيَزْدَادُوا إِثْمًا ۚ"
ربنا لما يعطي الإنسان بيكون على حسب الشغل إللي بيشتغله ومدى إتقانه ليه، زي الغرب مثلا همّ دُوَل كافرة لكن بيشتغلوا صح في أمور الدنيا على أعلى مستوى،
فربنا مديهم على أد شغلهم، هو أه متاع قليل.. لكنه متاع وأجر مكافيء لجهدهم وسعيهم🤷‍♂️
اليابان مثلا عندهم تقدم رهيب ليه مع إنهم كفار؟
لإن في سنن كونية ..اشتغل واتعب هتلاقي نتيجة حتما ولابد على أد شغلك، بغض النظر انت مؤمن ولّا لأ..
فكثرة الأموال والأولاد أو قلتهم مش دليل أبدا على حب ربنا للإنسان أو كرهه له👌
"وَمَا أَمْوَالُكُمْ وَلَا أَوْلَادُكُم بِالَّتِي تُقَرِّبُكُمْ عِندَنَا زُلْفَىٰ "
وفي سورة الفجر، ربنا قال:
"فَأَمَّا الْإِنسَانُ إِذَا مَا ابْتَلَاهُ رَبُّهُ فَأَكْرَمَهُ وَنَعَّمَهُ فَيَقُولُ رَبِّي أَكْرَمَنِ ۩ وَأَمَّآ إِذَا مَا ابْتَلاهُ فَقَدَرَ عَلَيْهِ رِزْقَهُ فَيَقُولُ رَبِّي أَهَانَنِي ۩كلا"
يعني ربنا بيعلمنا إن الأمر مش كده خالص،
الأمر فتنة واختبار في النّعم والنّقم:
"وَنَبْلُوكُمْ بِالشَّرِّ وَالْخَيْرِ فِتْنَةً"

◇عارفين تبقى علامة حب وتكريم امتى 😁
لما الإنسان يكون مؤمن وبيستعمل الأموال دي كلها في طاعة الله 😊

كان رد فعل الرجل الفقير إيه بقى👌
الرجل الفقير كان مؤمن وكان شجاع..
لما سمع كلام صاحبه الكافر ده مقلش أنا فقير وهو غني ولو اتكلمت ونصحته ممكن يضرني أو يحرجني أكثر ويضايقني بكلامه، ومش بعيد يقهرني بعشيرته😔
بالعكس ده كان معتز بدينه ودافع عن الحق بأسلوب راقي وبعلم وبحكمة وبحجج مُقنعة ومنطقية ومؤثرة👌
والمفروض كل صاحب حق يكون كده.. يتكلم بقوة وعزة بشكل يقع في نفوس الناس موقع مؤثر،
مش يتكلم بخوف وتردد وارتعاش فالناس تستغل ده وترتاب في الحق وترده😑
شوفوا كده الرجل الفقير المؤمن بيقول إيه:
"قَالَ لَهُ صَاحِبُهُ وَهُوَ يُحَاوِرُهُ أَكَفَرْتَ بِالَّذِي خَلَقَكَ مِنْ تُرَابٍ ثُمَّ مِنْ نُطْفَةٍ ثُمَّ سَوَّاكَ رَجُلًا ۩ لَكِنَّا هُوَ اللَّهُ رَبِّي

وَلَا أُشْرِكُ بِرَبِّي أَحَدًا"

يعني بيقوله انت كفرت باللي خلقك من تراب وقادر زي ما خلقك من نطفة وخلاك رجل واقف بقوة وغرور كده إنه يهلكك😲
وكمان بتقول مفيش يوم قيامة😱
أما أنا فأنا أؤمن بأن الله ربي ولا أشرك به أحدا سبحانه🤚
ثم ده بدل ما تحس بحياء من ربنا من كتر النعم إللي عندك، وتقول لا حول ولا قوة إلا بالله وما شاء الله كان بحوله وقوته وما لم يشأ لم يكن،
وتقول الأذكار إللي تصون النعمة دي وتحفظها من العين والعُجب والزوال😠
"وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ لَا قُوَّةَ إِلَّا بِاللَّهِ "

فكان أول حاجة الرجل المؤمن يعلمها للرجل الغني هي التوحيد لما قاله
"لَكِنَّا هُوَ اللَّهُ رَبِّي وَلَا أُشْرِكُ بِرَبِّي أَحَدًا"
والرجل الغني ده عمل كمية خطايا وكوارث تودي في داهية😬
هناخدهم واحدة واحدة 😅

◇الكارثة الأولى لما شكك في مجيء يوم القيامة،
والشك في يوم القيامة كُفر وتكذيب لله عز وجل😶
لإن ربنا أقسم إن يوم القيامة والجزاء جاي، ومن صفات المؤمنين إنهم مصدقين لكلام ربنا كله بما في ذلك اليقين في يوم القيامة👌
يعني مينفعش واحد مؤمن يقول :والله أنا هعبد ربنا وخلاص، طلع في يوم قيامة بجد يبقى أنا كنت صح وربنا هيجازيني💁‍♂️
طلع مفيش يوم قيامة يبقى مخسرناش حاجة كيبرة 🤷‍♂️
الكلام ده ممكن نقوله فقط في المناظرات مع الملحدين،
من باب النقاش العقلي بالحجة،
لكن عند المؤمنين المسائل دي قاطعة، لاااازم اليقين 100% إن فعلا في يوم قيامة وإن كل واحد هيتحاسب على أعماله السيئة وسيجازَى على أعماله الصالحة👌

¤في هنا ملحوظة مهمة بالنسبة للدعوة😊
هل كل الناس ينفع نحاورهم بالعلم زي ما صاحبنا المؤمن عمل مع الكافر🤔
لو حصل واتفتح قصادنا موضوع واحنا منعرفش عنه حاجة أو مش متأكدين من الكلام يبقى بلاش نتكلم لحد ما نجمع المعلومات الخاصة بالموضوع،
يعني مثلا واحد جاي يتناقش معاك إن الأغاني مش حرام وإن الشيخ فلان قال والتاني قال والثالث..
وانت معندكش العلم الكافي إنك ترد عليه أو معندكش القدرة على إقناعه يبقى متتكلمش،
قول هراجع المسألة وأرد عليك أو استعين بحد تاني يرد عليه..ليه بقى🤔
عشان منضعِفش الحق👌
وخصوصا لو مع ناس عايزة تجادل عشان الجدال ..هم مش عايزين الحق هم بيجادلوا وخلاص عشان التشويش، وبيبانوا على فكرة🙄
فهنا هيكونوا محتاجين لأسلوب أشد وإنك تخليهم يسكتوا خالص👌
مثلا لما واحدة تيجي تسألك هو النقاب فرض ولا سنة وتسكت..دي بتبقى عايزة تعرف وتتعلم..غير إللي تيجي تقولك النقاب أصلا مش فرض ولا هو من الدين أساسا و..و... فالشخصية الأولى محتاجة نقاش معين والثانية محتاجة نقاش تاني خالص😅

◇◇الكارثة الثانية إللي عملها الغني الكافر ده إنه تفاخر على صاحبه الفقير بما ليس عنده، والتفاخر كأصل منهي عنه، والنهي أشد لو هيكون تفاخر على فقير معندوش الأمور دي إللي بتفاخر بيها، فهو ظلم نفسه بسبب معصيته لله.
والإنسان بيظلم غيره لما ياخذ حقوقهم، ويظلم نفسه لما بيخليها تعصي الله👌
فالناس ثلاثة أنواع :
¤ظالم لنفسه بإنه ميعملش الفرائض،
¤والنوع الثاني مُقتصد يعني يادوب بيعمل الفرائض أو الواجبات..يصلي الفرائض يصوم رمضان يؤدي الزكاة وهكذا بيعمل الفرائض إللي ربنا فرضها وبس،
¤النوع الثالث بقى وهو السابق بالخيرات،
والنوع ده من اسمه أي حاجة يعرفها يعملها على طول ميفكرش بقى هي فرض ولا سنة،
وصَل له فضل الصدقة تلاقيه بيتصدق،
وصَل له فضل الذكر تلاقيه بيذكر ربنا على طول..وصل له فضل صلاة السنن تلاقيه ميسبش سنة وهكذا👌
🤲ربنا يجعلنا منهم يارب

◇الكارثة الثالثة إللي عملها: كانت إنه أصاب نفسه بالعين😳
واحنا عارفين إن العين حق.. والعين على فكرة غير الحسد😁
الحسد حاجة وحشة ، وهو إن الإنسان يتمنى زوال النعمة من عند الشخص التاني إللي عنده الحاجة الحلوة دي، عاوزها تزول من عنده وتبقى عندي أنا بس،
أما العين فهي إني أُعجب بحاجة إعجاب شديد جدا ، زي صاحب الجنتين كده لما دخل البستانين بتوعه وأُعجب بيهم جدا ،
دي عين مش حسد لإنه طبعا مش بيتمنى إن البساتين بتاعته دي تزول من عنده وتروح لنفسه تاني😶
وعلى فكرة في الغالب بيحصل معانا أو مع غيرنا موضوع العين ده وبنكون فاكرينه حسد😅
وعلى فكرة برده موضوع العين ده مش بيكون له علاقة بحب أو كره بين الناس زي الحسد كده والعياذ بالله،
لأ، هي بتيجي تلقائية من غير ما الإنسان ياخد باله، بتيجي كعقاب على نسيان ذكر المُنعم عز وجل، زي قرصة وِدن كده تفكرنا عشان لو مرة على التانية نسينا نذكر المُنعم هننساه وننسى شكره مع الوقت والعياذ بالله😅
فلما نشوف حاجة تعجبنا نفتكر إننا نقول :
《ما شاء الله اللهم بارك》👌
فلو هي حاجة بتاعتنا احنا شخصيا نقول:
《ما شاء الله لا قوة إلا بالله》ولو هي حاجة بتاعة حد غيرنا نقول :《اللهم بارك》
عشان كد الرجل الفقير المؤمن قال لصاحبه :
"وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ لَا قُوَّةَ إِلَّا بِاللَّهِ"
فهو

بيعلمه إزاي يتعامل مع النعم ودي تاني حاجة الرجل المؤمن علمها له👌

◇الكارثة الرابعة إللي الراجل ده عملها: إنه أُعجب بماله والبساتين بتاعته 《إعجاب غلط》
في إعجاب صح وفي إعجاب غلط.. الإعجاب الصح إنك تستشعر بالفعل جمال النعمة عادي جدا وتنبسط بيها وتفرح، زي ما الحديث علمنا "ثوبه جميل ونعله جميل"،
ده مفيهوش حاجة،
لكن العُجب الغلط هو إنك تبقى فرحان بالنعمة لإنك شايف إنك تستحقها بشطارتك وانك أهل للنعم لإنك إنسان جميل تستحق كل جميل..
هو ده بقى المرض القلبي المُهلك والمحبط للعمل والعياذ بالله، وإللي لو صاحبه معالجهوش بيؤدي بيه للكفر زي صاحبنا ده والعياذ بالله😞
ومثال على كده إن واحد مثلا ربنا يوفقه لقيام الليل وصيام النهار، فييجي يشوف واحد بيشتكي إنه مبيصليش الفجر مثلا،
فيدخل في قلبه عُجب ويقول بينه وبين نفسه: يا سلام عليّ أنا وعلى عزيمتي 😎
ده مبيصليش الفجر لسه، ده أنا مش بس بصلي الفجر، لأ، ده أنا بقيم الليل وبصوم كمان😌
فالعُجب ده أصلا محرم وفيه هلاك لصاحبه،
والإنسان بيتحرم من الطاعات بسبب إعجابه بنفسه ونسيانه إن إللي أنعم عليه بالطاعات دي هو الله وإن لولا توفيق ربنا مكنش الإنسان عمل أي طاعة👌
المصيبة بقى إن العُجب ده حاجة خفية أخفى من دبيب النمل 😶
فمن رحمة ربنا بينا إننا لما بنقع في العُجب واحنا مش حاسين إنه بيحرمنا من الطاعة دي مثلا ..عارفين ليه😁
تخيلوا كده معايا إنسان عمال يعمل الأعمال الصالحة وقلبه فيه عُجب وجه يوم القيامة لقى معندوش أعمال صالحة خالص وضعه هيكون إيه🙊
بعكس لما الإنسان يتحرم من الطاعات أو النعم يبدأ يدور عن السبب ..يا ترى إيه إللي حصل ..ياترى أنا مبقتش أصلي قيام الليل ليه..مبقتش أصلي الفجر ليه..مبقتش أقرأ قرآن وأحفظ زي الأول ليه...وكل ماكان الإنسان صادق هتلاقي ربنا هداه إنه يعرف السبب ويعالجه👌

الرجل المؤمن بقى لخّص لصاحبه الحوار كله في كلمتين وعلمه درس عظيم ..
قال له لو انت فرحان بأموالك وأولادك وبتعايرني بفقري وشايفني أقل منك في كل حاجة،
"إِنْ تَرَنِ أَنَا أَقَلَّ مِنْكَ مَالًا وَوَلَدًا"
وانت بتكفر بإللي أنعم عليك بالنعم دي وحرمني منها لحكمة عظيمة أنا مؤمن بيها بكل يقين؛
فأنا ظني إن ربنا هيعاقبك على تصرفك وكلامك إللي قلته ده، ومش بعيد على ربنا إنه بين يوم وليلة زي ما رزقك يرزقني بنين وبنات وأموال وجنات وزيادة عليهم كمان،
ومش بس كده، لأ، ويرسل صواعق من السماء تحرق بساتينك وتساويها بالأرض لدرجة إن الناس تتزحلق من عليها من شدة ما بقت ملساء جرداء بلا زرع ولا ماء..
"فَعَسَى رَبِّي أَنْ يُؤْتِيَنِ خَيْرًا مِنْ جَنَّتِكَ وَيُرْسِلَ عَلَيْهَا حُسْبَانًا مِنَ السَّمَاءِ فَتُصْبِحَ صَعِيدًا زَلَقًا"
أو حتى من غير صواعق ولا حاجة ممكن في يوم وليلة ربك يجعل الماء إللي بيروي البساتين بتاعتك دي يجف ويغوص في الأرض ويتبخر في السماء،
"أَوْ يُصْبِحَ مَاؤُهَا غَوْرًا فَلَنْ تَسْتَطِيعَ لَهُ طَلَبًا"
ومهما تحفر تاني متلاقيش المية ، فتموت جناتك دي كلها قصاد عينك وانت مش قادر تتصرف لإنك عبد ضعيف وربك هو الرزاق ذو القوة المتين،
فمتتكبرش بنعمة إنت لا تملك حفظها من أمر الله ولا تملك صك إنها ليك انت لوحدك.. واتعلم إزاي تشكر وتصون النعمة، قبل فوات الأوان..

وفعلا نزل العقاب الإلهي👌
"وَأُحِيطَ بِثَمَرِهِ فَأَصْبَحَ يُقَلِّبُ كَفَّيْهِ عَلَى مَا أَنْفَقَ فِيهَا وَهِيَ خَاوِيَةٌ عَلَى عُرُوشِهَا وَيَقُولُ يَا لَيْتَنِي لَمْ أُشْرِكْ بِرَبِّي أَحَدًا "
هلك الثمر كله وهلكت البستانين كلها زي ما المؤمن قال..
والغني الكافر جاحد النعمة بقى واقف مذهول بيضرب كف في كف من الصدمة ،
وبقى يكلم نفسه من شدة الندم ويقول ياريتني ما أشركت بالله ..
يا ريتني سمعت النصيحة الحق..
يا ريتني شكرت ربي على النعم وأيقنت إني لا حول لي ولا قوة من دون الله😔
فين عشيرته؟؟ فين أصحابه؟؟ فين الأغنيا الطاغين إللي زيه؟
"وَلَمْ تَكُنْ لَهُ فِئَةٌ يَنْصُرُونَهُ مِنْ دُونِ اللَّهِ وَمَا كَانَ مُنْتَصِرًا "
مفيش...
كل إللي كان بيفتخر بيهم على الفقير، سواء مال أو أولاد أو عشيرة كله اختفى.. وبقى لوحده تماما...
وحتى لو في حد حواليه فوجوده زي قِلِّته لإن مكنش يقدر يمنع عنه عقاب ربنا له أو ينصره من دونه عز وجل..
"هُنَالِكَ الْوَلَايَةُ لِلَّهِ الْحَقِّ ۚ هُوَ خَيْرٌ ثَوَابًا وَخَيْرٌ عُقْبًا "
يعني ياريته كان سمع كلام صاحبه الفقير المؤمن، لإن نصرة ربنا وثوابه المضاعف بيكونوا فقط لأولياؤه المؤمنين، لكن خلاص فات الأوان..

☆وللأسف ده واقع كتير من الناس.. نقعد ننصح الواحد منهم وننبهه ونذكّره بالله، وهو مستمر ومعاند وسادد ودانه عن الحق،
لحد ما في يوم تلاقي ربنا عاقبه في الحاجة إللي كان بيعصي ربنا بيها،
وساعتها يندم أشد الندم، بس أوقات كتير بيبقى ندم حيث لا ينفع الندم وبيكون الإنسان خسر حاجات غالية أوي يفضل طول عمره متحسر عليها ومتألم من أثرها..
فياريت نتعلم من دروس قصص ا