tgoop.com/qassad19/8849
Last Update:
انه اهلي نذروني وبالخدمه وصوني
وللموت يابن فاطمه ماعوفن اجنوني
*******
دلالي بمحبتك يدك ونفاسي تتنفس عشك ودموعي قران
تسبيحي صارت دمعتي وهاي المجالس قبلتي وصرخاتي آذان
احيه واموت بشوفتك يبن الزجيه بخدمتك صرت انه ولهان
دمي حسيني للابد. للموت ماخون العهد. وكت العشگ حان
غالي وصدك غالي وبس انته تحلالي
ضل بيك ينبض كل وكت يحسين دلالي
*****
وياك ما دور اجر حبيتك انه امن الزغر عالفطره يحسين
ممنون الك يابو علي صخرت هاي الناس الي وصيتي وصل وين
رايد يبن حامي الحمه اتسجلني امك فاطمه بسجل المعزين
واتمنه تختم دفتري. وبالزهره اكحل ناضري. يا مهجة العين
يالتسري بنفاسي عشكي انه عباسي
ومولاي من دونك الخلك بيك ارتفع راسي
*****
امن العام متحضر انه وعاشورك امتاني سنه يابو الكرامات
كل موسم ارفع رايتي ويحسين تدري بخدمتي ماخذ شهادات
لو مرني مجلس انهظم صدري تعود عاللطم واعله العزائات
ارفعلك بجفي العلم. يكتلني يحسين الندم. لو مجلسك فات
يا زهرت ايامي ما فلن احزامي
بدمي كتبت اعله الورق عاشك نحر ضامي
*****
يحسين من دون البشر راسي رفعته بكل فخر يالغالي مشكور
الطم عليك بحركتي والمهدي يمسح دمعتي ويكلي ماجور
يحسين دوم اتنفسك ما اكدر اترك مجلسك وايامي عاشور
عاشك هواك امن الزغر. تستاهل انطيك العمر. يا منبع النور
من ادخل اقرايه دوم ارفع الرايه
العباس كلي يا هله ويركض اجه بمايه
*******
انته اميري وقائدي وجندي انه عندك سيدي وغيرك فلا ريد
ما ينحجب وجه الصبح لو والله كل ساع انذبح ما بايع ايزيد
بصوتك رعبت اجم شمر يحسين انته بكل عصر عندك مواعيد
انته امير المرجله. ويحسين حته كربله. بتضحيتك اتشيد
جم طاغي زلزلته والدين ما عفته
وبس انته ذاكه سيدي الما ينسه سالفته
*******
تعجبني هيبة صورتك تعجبني بالطف صرختك ما هزتك ريح
كل عام اسمك ينولد بدمك صغت اكبر مجد والضدك ايطيح
تتباها بيك اهل السمه ولبيك يابن فاطمه كل ثائر ايصيح
بعين الله يحسين اكبر. اتعلمنه نهتف كل وكت. والمدمع ايسيح
من واحد الواحد تحت امرك انجاهد
والقائد انته وماكو ابد غيرك بعد قائد
******
تمت
تحسين الخفاجي
BY قصائد حسينيه وألحانها
Share with your friend now:
tgoop.com/qassad19/8849