⚪🔴⚪З Днём Волі, беларусы!

25 сакавіка мы адзначаем 107-ю гадавіну абвяшчэння незалежнасці Беларускай Народнай Рэспублікі. У гэты дзень у 1918 годзе наш народ заявіў усяму свету пра сваё права на свабоду, незалежнасць і ўласную дзяржаву.

Сёння гэтае свята набірае яшчэ большае значэнне. Мы працягваем змагацца за тыя ідэалы, што былі закладзены ў Акт 25 Сакавіка — за дэмакратыю, правы чалавека і незалежную Беларусь. І хоць наш шлях да свабоды няпросты, мы ведаем, што беларуская нацыя вартая будучыні, у якой няма месца дыктатуры, рэпрэсіям і страху.

Лукашэнка баіцца гэтага свята, бо яно нагадвае яму, што ягоны рэжым — гэта толькі часовая перашкода на шляху да сапраўды вольнай Беларусі. Ён не раз спрабаваў зняважыць гэтую дату — а ў гэты раз прызначыў на 25 сакавіка сваю нелегітымную "інагурацыю", спрабуючы сцерці з памяці беларусаў сапраўднае значэнне гэтага дня. І вось ізноў: напярэдадні Дня Волі ўлада панікуе — запавольвае інтэрнэт, узмацняе рэпрэсіі, спрабуе запалохаць людзей.

Але страх — гэта зброя слабых. Мы ведаем, што настане дзень, калі беларусы зноў будуць свабоднымі, і Дзень Волі стане афіцыйным святам новай, дэмакратычнай Беларусі.

Жыве Беларусь! 🤍

✌️Дэлегацыя КР працягвае ўдзел у Кангрэсе ў Страсбуры

Сустрэча з Прэзыдэнтам Маркам Кулсам і Генэральным сакратаром Кангрэсу Мацьё Моры

На пачатку сустрэчы Прэзыдэнт Кангрэсу мясцовых і рэгіянальных уладаў Рады Эўропы Марк Кулс і Генэральны сакратар Мацьё Моры выказалі падтрымку дэмакратычным памкненьням беларускага народу і пацьвердзілі намер працягваць супрацу.

Дэлегацыя КР:

🔹 Выказала падзяку за гістарычнае рашэньне Кангрэсу прызнаць Каардынацыйную раду як партнэра для супрацы, а таксама за запрашэньне дэлегацыі дэмакратычных сілаў, усе чальцы якой зьяўляюцца сябрамі КР, да ўдзелу ў працы сэсіяў Кангрэсу і ягоных камітэтаў.

🔹 Падкрэсьліла важнасьць супрацы дэмакратычных сілаў з Кангрэсам, асабліва ва ўмовах сучаснай сытуацыі з самакіраваньнем у Беларусі. У новай, дэмакратычнай Беларусі аднаўленьне і ўмацаваньне самакіраваньня мусіць стаць адным з прыярытэтаў.

🔹 Зьвярнула ўвагу на неабходнасьць падрыхтоўкі да рэформаў у сфэры мясцовага самакіраваньня ўжо цяпер, бо распрацоўка сучаснай сыстэмы кіраваньня на мясцовым узроўні – гэта складаная і працяглая праца. У гэтым кантэксьце супраца з Кангрэсам асабліва важная паводле двух галоўных кірункаў:

Распрацоўка рэформаў і прававой базы – стварэньне дарожнай мапы да падпісаньня Эўрапейскай хартыі мясцовага самакіраваньня, бо Беларусь застаецца адзінай краінай у Эўропе, якая ня толькі не падпісала гэтую Хартыю, але і ня ёсьць сябрам Рады Эўропы.

Узмацненьне чалавечага патэнцыялу – стварэньне адукацыйных магчымасьцяў, арганізацыя курсаў і стажыровак для беларусаў у краінах-чальцах Рады Эўропы.

🔹 Адзначыла важнасьць прызначэньня спэцдакладчыка Кангрэсу па дэмакратычнай Беларусі – Сэсіліі Дальман Ээк, што сьведчыць пра дадатковую ўвагу да сытуацыі ў краіне з боку міжнароднай супольнасьці.

🔹 Прадставіла актуальную інфармацыю пра сытуацыю ў Беларусі, падкрэсьліўшы неабходнасьць міжнароднай падтрымкі на шляху да дэмакратычных пераменаў.

‼️Каардынацыйная рада: Павел Латушка паведаміў у праваахоўныя органы аб знікненні Анжалікі Мельнікавай

25 сакавіка знікла спікерка Каардынацыйнай рады Анжаліка Мельнікава. З таго часу сувязі з ёй няма. Паводле наяўных звестак, яна не знаходзіцца на тэрыторыі Польшчы.

Павел Латушка афіцыйна паведаміў у праваахоўныя органы Польшчы аб знікненні Анжалікі Мельнікавай. Па просьбе праваахоўных органаў гэтая інфармацыя раней не публікавалася.

Мы спадзяемся на лепшае, але разумеем, што прадстаўнікі дэмакратычных сіл Беларусі застаюцца прыярытэтнымі мэтамі спецслужбаў рэжымаў у Беларусі і Расіі.

Каардынацыйная рада будзе інфармаваць пра далейшае развіццё сітуацыі.

‼️Паважаныя беларусы і беларускі!

У СМІ з‘яўляецца шмат неправеранай інфармацыі адносна лёсу Анжалікі Мельнікавай. Мы просім вас давяраць толькі тым звесткам, якія сыходзяць з афіцыйных крыніц. На сённяшні момант вядзецца следства па факце знікнення Анжалікі. Мы чакаем вынікаў расследавання.