و جاتني بعد سنين طويلة العاصفة، زي العارفة وجهك
فيني مشروع لروائي، او ملامحك جاتني بين اوراق رواية
في شخوص القصة و السرد الخرافي..
🔝

في الأغاني...؟
🔝

ولا في علم البلاد البغتة بظهر، في خيال احساسي جوة
لما تهزمني المنافي..
🔝

في المعاني..؟ و لا في الشعر الكتبتو عليك و قلبك كان مجافي..
يا أمان الله اللقيتو معاكي مالك دار تخافي؟
ما تخافي..
🔝

انا عمري كلو الجاي ملكك..
بالبيوت الحايمة جواي، و القصايد، و اعتيادي
🔝

و بيكي قادر.. اطرد الحزن المخيم و المنافي الساكنة جواي غادي غادي..
كان حضورك دهشة حيرت اي حاجة
و كان دخولك فيني احساس ماهو عادي..
🔝

ااخ لقيتا.. مش سألتك اننا اتلاقينا ولا لا؟
و قلت شفتك..و قلتي جاادي؟ ايوة شفتك و راجعي قلبك ❤️
🔝

فيكي حاجات من بلادي.. و تشبهي السودان.. و أحبك ❤️
🔝
#راني_فرح

في وحدتك
من شدة الكتمة الجواك
يتعرق الليل
وانتَ بتباري النجوم
وتفكك اللحن الحزين الفي الغنا
وتتبع مسار القمرة
في درب الغيوم
تقرى الخيوط الحالكة في ورق الضلام
وانت بتخوض الحرب
في مُدن الهموم
وتقول براك
الليل دا يا حب ما اتخلقلك شان تنوم
وتعيد براك
الليل دا يا حب ما اتخلقلك شان تنوم
الليل بجيك مغري وخفيف
وقالع الهدوم
الليل شريط الذكريات
وإلتقاطات المُصور
في صراعو مع الزمن
لمن يشيل النسمة من وسط السموم
الليل يسلمني المغارب
ويصطفي الليلتو ويقوم
يحتوي الشك والعقارب
يحتوو البال والسموم
والمغارب تحتويني
وتفتح الباب الموارب
تقرأ من صفحة سنيني
قصة من وحي التجارب
عن معاناتي وحنيني
وبيني بين الأرض قارب
يا مغارب
جيبي صاري
وأغربي
سلميني إلى العصاري
وسلمي الذكرى الوحيدة الباقية من كُتب النبي
خلي أعلن انتصاري
مرة واحدة على فتات العمر وآمال الصبي
وضيق المحطات والطرق
والموت وقانون الطواريء
وما يلي :
التيه وأفكار النهاية
الصدق والشوف الجلي
وزيف النهارات
لما تقلع للشموس
قبل المحالك تنجلي
ويا أمنيات إتفضلي
راجياك اغاني حزينة في اوضة الجلوس
ما تخجلي
كنك عروس
الغابة في الحوش الوراك نزحت
قبل ما يجيها سوس
وما تسلميني رهينة لفك الصباح
والنار
عشان انا ما مجوس
انا كنت بستأذن مكان القعدة قبال الجلوس
وبغير الخطوات حسب سير الرياح
انا يا حزن
ما عجنة اختمرت عشان تقعد تعوس
لا فار تجارب قادر يتحمل جراح
انا طفل ضاع منو العمر وهو قاعد إكوس
في عمر راح
من غير هدُى .. ومن غير دليل
يا نفس اوعى تشابي للجوة النفوس
لا تدي للحياة إقتراح
اليوم بدا .. وما فيهو نيل
ما فيهو حاجة مهمة على وجه الخصوص
ما تسلم الصوت للصياح
والياهو دا .. وصورة الرحيل
ما تنكفي وتدي الاحاسيس للنصوص
لا الطير حيهديلك جناح
لا الراح سُدى .. ولا القال وقيل
والصبح ما إتنفس قبل يأذنلو ليل
ورجعنا لليل والنكوص
اللجة قدامك وقدامك ضلام
اها يلا غوص
يمكن تلاقي الضفة جاياك في المنام
وهي شايلة فانوس
يمكن البحر ينتبه إنك كسيح
يضحك ، وتعبر في سلام
يمكن تلاقي البحر نام

يا السكنتي مع المشاعر
وفي حشا الاشواق بحسك ..

في عيوني تعالي خشي
من عيوني عشان ادسك ..

طالما في داخلي انتي
وطالما في صوتي حسك ..

روحي ممكن اسيبا تطلع
وانتي مافي عذاب يمسك

عاجبك قعادك فوق كدا
وطول النوى ..
كان مالو لو هسي الخطاوي
الماشة جاية بلا هدف
كانت سوا ..
ما كنت ناجيت البلح
واتسلى برمي النوا ..
وعثمان حسين
يقعد يقول
مالي والهوى ..
مالي والهوى ..
كان قلبي يشرب وما روى ..
يومين تلاتة وتشردي
ولمن تجي
بتجيبي لروحي الهوا ..
وتلقيني ياني انا الزمان
زول جاري بالايام هوا ..

معرض الشارقة الدولي للكتاب
دار الأجنحة للنشر والطباعة والتوزيع
قاعة 1 جناح U13