يا بني أسد.... هلبت تجيبولي حصيره
يا بني أسد.... رايد الم شيخ العشيره
يا بني أسد.... حار الرمل وحسين عاري
يا بني أسد.... ما ينحمل حر الضهيره

و ماي جيبولي ابرد منحره
وارش گبره بلكي اجبر خاطره
جسمة صاير سالفه بحلگ الشمس
هذا ثالث يوم مرمي اعله الثره

مدري المه مدري اغطيه حسين فوك الترب عاري
ومثل ضيعة خنصر ايده ضاع يا  وادم قراري
هنانه ياشلعان الگلوب الرمل ماخذ لون نحره
ما اكو وادم تنغر اعليه وحاره شمس الضهاري
((آه... ليت امي لم تلدني))
........................................................
يا بني أسد... بجفوفه باقي تسع اصابع
يا بني أسد.... من جفه خنصر جنه ضايع
يا بني أسد..... عينوني بالتربان ادوره
يا بني أسد..... بي محبس أخضر حيل لامع

گلبي ما يقنع  اهل فوگة الترب
موش بس ايدي رجف حتى الگلب
استوحدتني أفكاري من شفته طريح
حسين ما يرهم يضل وسط الغرب

اطول من الرمح خلكه بكثر ما شايل محنه
جسمه مطروح اعله غبره وراسه فوگ يعاين النه
گلبي مثل شفافه مفطور  من كثر حزن النعاوي
وگلبي وما ينطيني يا ناس اشلون ابوي بأيدي ادفنه
...........................................................
يا بني أسد... خلوني احط جفوفي حدره
يا بني أسد.... مرضوض من الخيل صدره
يا بني أسد.... وحشة الجنازه بدون الصياح
يا بني أسد...... غير اليموت اهله تحضره

من تحفرون الگبر وسعوا بعد
بحضن ابوه يندفن هذا أصغر ولد
خاف يستغرب لئن بعده طفل
صدر ابوه المنكسر يصبح مهد

سلبوا مني راحت البال وادم السلبوا عباته
وراسه لسه برمح مرفوع وحسرة الماي بلهاته
شده بال عيوني الحسين من شمر ماخذ مجانه
عكب عينه  عيون الاجناب كامت تباري بناته
..........................................................
يا بني أسد..... هاي المصيبه التاخذ الروح
يا بني أسد..... من الگفه ابن الزهره مذبوح
يا بني أسد..... متروس صدره سهام وحجار
يا بني أسد..... حسين العزيز بهيمة مطروح

يوسدون راسه الميت بحيطة وحذر
اشلون يتوسد الي بطرگ النحر
نريد راس حسين ما ردنه فصل
خاطر ندفنه ونشيل بلا أثر

ارد اندهه وحاير اشلون خاف ينشدني اعله زينب
واني گوه مصبر الروح مره اسكت مره انحب
بيدي خله الحبل اثار وخاف حس بجرح ايدي
گادني التفكير للماي واعلة گلبه الجان يلهب
..........................................................
يا بني أسد......سوه الغراب بگلبي عِلة
يا بني أسد...... ليش الدفن بالترب خَله
يا بني أسد..... تمنيت ابوي بحضني ادفنه
يا بني أسد.....ولا بيدي فوگة الترب أهله

حسين فاتحته عله النوگ الهزل
وشلون تلطم مره مجتوفه بحبل
للسبات الليل والراحه انخلق
واحنه نگضي الليل مدمعنه يهل

اليرد من الدفنه متعوب الناس غير تكوي حيله
وأهله تتلكاه بالثغيب الشيخ فاتحته ثجيله
تراب ابوي بثوبي نيشان اشلون من تشوفه زينب
الليله يمكن زينب تموت هاي بالله اشلون ليله
...........................................................
مرتضى عامر الشمري

#تراث

أدور عليك يبن امي ولا واحد يدليني
عاد أنته بضعيف الصوت يامظلوم حاجيني
ــــــــــــــــــــــــــــــــــــــ
جيتك من كلب مكسور أنه أختك المهضومه
جيت بروح لهفانه أدور عليك بالحومه
جيتك خويه حاجيني عليك أمك المظلومه

وين بيا كتر مطروح
جسمك هم بعد بي روح
يبن أمي صدك مذبوح

وين الي ينظر لحالي ويم جسمك يوديني
ــــــــــــــــــــــــــــــــــــــ
صدك نايم على التربان خويه وعلوجه مكلوب
صدك سحكت عليك الخيل بالميدان من كل صوب
صدك خويه نزف دمك وگلبك بالسهم مصيوب

ولـمـن ياصـبي العين
طلعت السهم يحسين
مـن كلبك طلع ثلثين

وهذا السهم هو الحال ما بينك وما بيني
ــــــــــــــــــــــــــــــــــــــ
حر وعطش وبجسمك ألف وتسعمية صواب
فوك جروحك ودمك گلبك بالسـهم ينصاب
بعد شلون تتمكن تنهضلي وترد جواب

وأدري ياضوه عيناي
لو ما هل المصايب هاي
متقصر يخويه وياي

وحاشاك بمثل هاليوم محتاره تخليني
ــــــــــــــــــــــــــــــــــــــ
حالك هذا وأنته أنوب خويه أسمع بعد حالي
بأيتام وحـرم كلبي تمحن وأنشده بالي
وين أنطي الوجه وانه أخوتي مذبحه أكبالي

وكلسا طفل من عندي
يروح وينفطر جبدي
وأنه بكربله وحدي

صواويني خذتها النار والعيله وصواويني
ــــــــــــــــــــــــــــــــــــــ
هجمت فرد هجمه الخيل خويه وشبت النيران
وهامت عيلتك كلها من النيران للميدان
لجن ياضوه عيوني ضلت بالخيم رضعان

وأنه تمحنت بيها
شلون النار أطب ليها
وأخلصها يواليها

رضعانك بوسط النار وانه العده مسلبيني
ــــــــــــــــــــــــــــــــــــــ
خويه محيره ضليت وأتلفت يمين يسار
أعوف الخيم رضعانك تتحرگ صغار كبار
أطب للنار أخلصها أخاف أنه أحترگ بالنار

والأيتام ملتمه
هاي تصيح ياعمه
وين حسين ابو اليمه

وهاي تصيح يازينب حر العطش ماذيني
ــــــــــــــــــــــــــــــــــــــ
رضعن بوسط نيران وأيتام بحوافر خيل
ماتت بالسحك وعيال مامت والدموع تسيل
وأنه وحيده مظلومه بيه بعد ماضل حيل

وعباس الاجيت وياه
هسه من كمت أنخاه
أضن كلي يزينب أه

عليج شبيدي يعيوني يزينب وين جفيني
ــــــــــــــــــــــــــــــــــــــ
خذاك الدهر من عندي يخويه وأكَطعت بيه
مصايب كربله يحسين مدري أمنين أجت ليه
من الخدر والصيوان تــالــيه لــبـني أميه

هيجي الدهر خلاني
وضيم وهضم راواني
صرت من عكب ولياني

أرد السوط بيساري وأستر وجهي بيميني
ــــــــــــــــــــــــــــــــــــــ
ها شتكول يبن أمي ردلي بصوتك أجوابي
تقبل بعد أشكيلك هضمي وجمرة امصابي
أنته بالسهم مصيوب وانه فراكك أصوابي

أنته بروحك بجسمك
وانه مجرحه بهضمك
يخويه خلي اجي يمك

أداوي جسمك بروحي وانته بشوفتك داويني
ــــــــــــــــــــــــــــــــــــــ
يخويه ان جان ماعندك هـمــه تكوم لعيالك
لاتهتم ياماي الـعين أنه خلافك بدالك
أحمي عـيلتك أنه يخويه واحرس أطفالك

لجن يحسين أخاف أعليك
ضامي ومحد يرويك
خلي أعتني وأگصد ليك

أقدم ألك ماي العين وأشرب يابعد عيني


الشيخ هادي القصاب

نزله...  لسان حال الامام السجاد ع لدفن جسد ابيه الحسين عليه السلام

مو بالگبر بالروح  ادفن حبيبي
.........

جيت من درب السبي لازمني صبري
رايد ادفن والدي ودموعي تجري
والله بمصابه متت ونكسر ظهري
گبل گبره ينحفر ياريت گبري

ما يشفه جرحي يسيل. ميت طبيبي
مو بالگبر بالروح  ادفن حبيبي
.........

والله كل خطوه اصيحن وا حُسيناه
بيدي لازم ظهري آه تصيح وي آه
ويلي ابوي حسين دامي شلون عفناه
مكسّره ظلوعه يويلي ما دفنّاه

كلما قربت عليـــه   يكثر نحيبي
مو بالگبر بالروح  ادفن حبيبي
.........

ويلي ويلي من وصلت الغاضريه
شفت ابويه حسين طايح عالوطيه
كسرت ضلوعه خيول الاعوجيه
منين ما شيلنّه يوگع منّ اديه

مو عجبه لو عالراس  يغزيني شيبي
مو بالگبر بالروح  ادفن حبيبي
.........

شلون الي روح وگلب گبره حفرته
بالحصيره لملمت جسمه وجمعته
انهدم حيلي احس لمّن حملته
جسم ابويه حسين بچفوفي شبگته

مو بس ابو ياناس    خِلّ وصحيبي
مو بالگبر بالروح.     ادفن حبيبي
.........

نحر ابوي حسين حاچاني سمعته
ادفن وياي الطفل مذبوح عفته
دوّريته بدمعتي ولحسين جبته
ويّه ابويه حسين خلّيته ودفنته

هلت التراب عليـــه   عمري ونصيبي
مو بالگبر بالروح    ادفن حبيبي
.........


اسمعت صبرا ياعلي من السموات
لن هتف صوت الوحي ابنبرة مواسات
روحي ياناس اطلعت لو باقي لحظات
ينحب اليدفن ابوه يرتاح هيهات

ياربي من دنياي   قرّب مغيبي
مو بالگبر بالروح  ادفن حبيبي


#سيد_زيد_الفحام

https://www.tgoop.com/rdeaa

ارد اعاتب.. للدفنه
من وزن الموشح
دكتور كاظم المعقلي
++++++++ ++++++
ارد اعاتب ياشريچ احزاني
يلرحت وحدك دفنت اخواني
******
شلون الك روح ورحت وحدك غريب
بالدفن من ساعدك من يستجيب
عمه لو ماخذني لحسين الحبيب
غسليته ابدمعه من أجفاني
******
عمه ماگتلي اشعجب يبن الحُسين
فرصه اودع بيها اخوتي الگاها وين
تدري مشبوحه الدربهم عندي عين
وصاير الطف قصّتي وعنواني
******
عمه لو بس رايحه ويمهم ادور
مزنة اعيوني ارشها اعلى النحور
صرخة التشييع اطشها اعلى الگبور
وانتحب يم كل گبر تلگاني
*****
عمه لو بس گايل او وياك اروح
آخذ اضماد وأضمدها الجروح
ارد اعاتب كافلي ويم گبره انوح
وأرد اگله الشمر حيل آذاني
*****
عمه چا رحنا سوه ابعظم المصاب
وللرضيع اتگمّطه انودّي الرباب
انودي رمله اتخضب القاسم خضاب
وليلى چا صاحت علي اتلگــّاني
*****
عمه لو ماخذني وبعيني اشوف
نومة اخواني على اتراب الطفوف
چاجبتلك خنصر وجبت الچفوف
وچان شاركتك بفيض اشجاني
******
عمه روحي اهناك ظلت بس تحوم
چني يم اخواني بس اگعد واگوم
انا ارجع بس جسد بس الرسوم
وهالمصايب غيرت الواني
******
عمه ادري اتوسِّد اخواني وتلوع
والله يدري اشگد همل جفنك دموع
گبر جاسم عمه طوقته ابشموع
امقصره احس وعبرتي ابوجداني
*****

▪️▪️▪️▪️▪️
جسمك عله التربان متگطّعه اوصاله
او محّد يبو السجاد من الگاع شاله
▪️▪️▪️▪️▪️
عالرمضه متوزّع وصل جسمك يمظلوم
يا حسرِتي عگب السحگ سلبوك لهدوم
يومك محال او لا حصل مثله ابد يوم
والصارلك ما مر عله انسان او جراله
▪️▪️▪️▪️▪️
من الحوافر سيّدي ما سِلمت اضلوع
يحسين وابگلبك اثر رفستها مطبوع
وايلومني اللايم لون اجريها الدموع
والف او تسعميّة جرح كلشي بچاله
▪️▪️▪️▪️▪️
اثلاثه بُگيت ابكربله طايح رميّه
متوزّع ابحر الشمس والله رزيّه
منهو منيته الشابهت هاي المنيّه
وابنه ابحصيره ايجمّعه وايشوف حاله
▪️▪️▪️▪️▪️
زين العباد امن السبي اتعنّه الدفِنتك
مقهور گلبه او بالدمع يجمعها جثتك
جمّعك وابحسرة گلُب ناح الكسرتك
جسمك يبو اليمّه چفن لا ما لِگاله
▪️▪️▪️▪️▪️
كل مندفن راسه يوسدونه اعله خدّه
واشحال المگطّع وصل وابنه يصدّه
طفله الذي مذبوح باحضانه يوسده
متهنّي طفله بالذبح موش ابدلاله
▪️▪️▪️▪️▪️
حتّه العرش يا سيّدي لمصابك اهتز
واحمرّت آفاق السمه من نحرك انحز
ضحّيت للباري النفِس وابكلشي ينعز
وانطاك ارضه والسمه الباري تعاله
▪️▪️▪️▪️▪️
ابو الحسن الوائلي

https://www.tgoop.com/rdeaa

💠قصيدة دفن الاجساد💠

بدفنه شــلون زينب تنشد الناس
وبس جثه اخوها مــسلب الراس

ثلث تيام ضل حســــين مطروح
مطبر بلــــــــــحوافر مات مذبوح
تكله شلون بعدك تشفه الجروح

ويمك طاح صاحــت خويه عباس

شلون اباريه وماصــح جفن دوم
وظل حــسين بلبر مامش هدوم
مسلب خنــصره وفايض بلدموم

وهل ظلت بناته ادك عله الراس

بدفنه شلــــــون كالت من دفنتو
حــــــــسين موذر شلون وعرفتو
هم صــــــــح ماي لو ماكو تركتو

وكبره جم شــــــبر كلولي ينقاس

بدفنه بعيد وانشــــد عن عضيده
ورديتو اله ياخنــــــــــــــــصر ايده
وعبدالله ســــــــــــوه وياه يريده

حسافه شلون حدر الخيل ينداس

جسمه من الشمس متغير الرسوم
وانه هنا خلافه محــمــــله هموم
من يوم الجــــــفاني مفاركه النوم

راح الجان للــــــــــعدوان  خلاس

ابو سلام الجابري

٢٦- دفن الاجساد الطاهرة

بين آهات وحـزن
عمّه جيت من الدفن
چم گبر بيدي حفرته وظهري مكسور
وسدت أحباب گلبي وسط الگبــــــور
عمه عمه

عمه يا زينب رحت للغـــــــــــاضريه
ادفن جســــــــوم الوفه الظلت رميه
شموس مدري شلون ضمتها الوطيه
ما بگت يا عمه ذرة حيــــــــــــل بيه

غسلتهم بالدمـــــــع
والهم أحنيت الضلع
جمـرتي بين الجوانـح ظلت تـــفور
وسدت أحباب گلبي وسط الگبــور
عمه عمه

إهنــــــــاك گبر إچبير ياعمه حفرته
هالگبر لأنصــــــــار ابو اليمه جعلته
جـاسم العريس ويــــــــــاهم دفنته
لا تنشديني يعمه شلـــــــــون شلته

بس حبيب الوحده
دفنته متفـــــــــرده
هذا شيخ أنصارنه وبالهمه مذخور
وسدت أحباب گلبي وسط الگبــور
عمه عمه

علي الأكبر هدم حـلي يالعقيله
ما شفت بجسوم أهل بيتي مثيله
جسمه متوذر وحرت شلون أشيله
والتراب شلون عالغــــــــالي أهيله

صحت عالدنيا العفه
والــمدامع ذارفــــــه
شلون بتراب الگبــــــــر يتوسد النور
وسدت أحباب گلبي وسط الگبـــــور
عمه عمه

من دفنت حسين ابويه والله حيره
مهشمه إضلوعه وجراحــاته چثيره
إتحيرت من ردت أنــــزله بالحفيره
والــــــدي يمّ الخدر شلته بحصيره

بالـمواجع والقهر
قبلت منه النحـر
راس ماعنده يوليلي وصبعه مبتـور
وسدت أحباب گلبي وسط الگبــــور

والدي وسّدته وبعينــــــــــــــاي جمــره
لنّــــــي اسمع صوت وإيحاچيني نحره
إيريد أخلي الطفل عبدالله إعلى صدره
وإدفنت عبد الله بيـــــدي بنفـس گبـره

بعد لسّـــــاه النبل
نابت بنحر الطفل
بالگبر منحور راد إيــواسي منحور
وسدت أحباب گلبي وسط الگبــور
عمه عمه

عالنهر مازال يرجف غيــــــــره عباس
رغم لا چفـين والجثه بـــــــــــلا راس
بالتراب شلون عمه إدفنت الإحساس
وهو يدري عگـب عينه الخدر  ينداس

إمصيبه وتفت الچبد
گمــــــر هاشم باللحد
گتله يابو الفضل ياعبــــاس معذور
وسدت أحباب گلبي وسط الگبـــور
عمه عمه

فراس المحمداوي

١٣٣- حال الامام السجاد (ع)
عند دفن الاجســاد 👇

للغــاضريّه إتعنيّت ٠٠ أدفن حسين وگومه
ــــــــــــــــــــــــــــــــــــــــــ
هذا آنه زيـــــــن العــابدين السجّاد
آنه العليــــل وحـزني هاليـوم إزداد
جيت لمفــــاوز كربلا وحيــلي إنباد
ياشيعه عينوني إعلى دفن الأجساد

بگاع المصايب طبّيت ٠٠ بدمعة حزن مسجومه
ــــــــــــــــــــــــــــــــــــــــــ
مجروح گلبي وهالگلب شيصبره
وأنظر هلـــي المتــوّسدين الغبره
أجســـــادهم مابين طعنه وطبره
صرت أغســل الدم بمسيل العبره

حاير صرت من صدّيت ٠٠ كل الجثث مخذومه
ــــــــــــــــــــــــــــــــــــــــــ
والخلّه بركــان المشـــاعر ينهار
لمّن دفنت بإيدي هـــاي الأنصار
وشلون بيهم هالفــكر مايحتـــار
كومة وذر شمخليه بيهم الأشفار

ظلّيت أعـالج ظلّيت ٠٠ وگلبي شيفّك همومه
ــــــــــــــــــــــــــــــــــــــــــ
ظلّيت أعـــالج بالحــزن وأتحسّر
متحيّر وحـــالي يفســـــر المرمر
وحين إدفنت بالهم إخوي الأكبر
بركــان ـحزني بهالمصيبه إتفجّر

الأكبر شبيه المختـار ٠٠ وارث أسرار إعلومه
ــــــــــــــــــــــــــــــــــــــــــ
آلآم گلبــــــــــــــي المامثـــــلهن آلآم
حين الشفت مطفيّه شمـــــعة جسّام
ولمّن شفت مصيوب من عنده الهام
تذّكرت طبره راس جــــدّي الضرغام

جاسم تخّضب ياحيف ٠٠ ثوب العرس بدمومه
ــــــــــــــــــــــــــــــــــــــــــ
بزلزال همّي إنهــار حيلي وصبري
وإسمعت من نحر الحسين اليجري
وسّد رضيــــعي ياعلي عد صدري
هذا العزيـــــز وهــوّه شمعة گبري

وسّدته يم جسم حسين ٠٠ وبحسـرتي المكتومه
ــــــــــــــــــــــــــــــــــــــــــ
ومن كمّلت دفن الجسـوم بهمّي
تعنيّت يم النهـــــر أدفــن عمّي
شفته صريع وعالتـرايب مرمي
وبلحده وسّدته وتهّـــدم عزمي

مگطوعه منّه الچفيّن ٠٠ ومتغيّرات إرسومه
ــــــــــــــــــــــــــــــــــــــــــ
فراس المحمداوي

متعوب شكثر يبن امي متعوب
جسمه موذر وعل وجه مكلوب
شمسويت بيك الخيل يحـسين
سابح بـالدمه ومسـلب الـثـوب

   ويلاه يخويه حسين ويلاه
ـــــــــ

اجيتك راكضهه ومحتركه الجدام
كل ساعه انهطر ياخـويـه بالـشـام
اجـيــت اشـكيـلـك السـوه بــيـنـه
ولكـيته منترس جسمك بالاسـهام
        
    ويلاه يخويه حسين ويلاه 
ـــــــ

شفافك يابسه وماشـارب الـمـاي 
واول ماوصلتك طـحــت جـواي
ماكو عضم صاحي بيك يحسين
مـن كد العـطـش ذابـل يعـيـنـاي 
  
     ويلاه يخويه حسين ويلاه
ــــــــــ

متوذر لكـيــتك خــويه يـاهــيل
متـكطــع وذر بحـوافــر الــخـيل
دمك نهر فايض خويه عل الكاع
ومـن الـدمـه احـمـر صـاير الـيل
  
    ويلاه يخويه حسين ويلاه
ـــــــــــ

يبن امي شصاير بيك يحسين
من القفه كبالي يذبحك الشين
راسك عل رمح وشـكثـر وفاي
عل عيالـه يصد وتـنـظر العيـن

   ويلاه يخويه حسين ويلاه
ــــــــ
علي الحاتمي

واويلي على المظلوم_

واويلي على المظلوم ** واويلي على المظلوم

ــــــــــــــــــــــــــــــــــــــــــــــــــ ـــ

زينب نـــادة اللـــيله .. واويلي على المظلوم

ودمع الفاجعه اتسيله.. واويلي على المظلوم

ماظل والـــي تشـكيه.. واويلي على المظلوم

من الفعلته هالگـــوم.. واويلي على المظلوم

ــــــــــــــــــــــــــــــــــــــــــــــــــ ــ

صاحت مـن مصيبـتهه .. واويلي على المظلوم

اشحال الفاگده اخوتهـه .. واويلي على المظلوم

المن تبــدي شـــكوتهه .. واويلي على المظلوم

وذبحو كل زلمها اليوم .. واويلي على المظلوم

ــــــــــــــــــــــــــــــــــــــــــــــــــ ـــــ

حسيـن اتــصيح يالوالي .. واويلي على المظلوم

خويه عـــايــن الحـــالي .. واويلي على المظلوم

والله انصـــاب دلالــــي .. واويلي على المظلوم

وگلب اختك صفه مالوم .. واويلي على المظلوم

ــــــــــــــــــــــــــــــــــــــــــــــــــ ــ

اشحال اختك يواليهه .. واويلي على المظلوم

من الشـــمر يسبــيهه .. واويلي على المظلوم

وبسيـــاطه يــأذيـــهه .. واويلي على المظلوم

وين البالـــخدر ملزوم .. واويلي على المظلوم

ــــــــــــــــــــــــــــــــــــــــــــــــــ ـــــــ

من شــــافت ابــو اليمــه .. واويلي على المظلوم

جســــمه سابــح ابـــدمه .. واويلي على المظلوم

اجت يم نحــره تشـــتمه .. واويلي على المظلوم

اوياي اتگله ريت اتكوم .. واويلي على المظلوم

ــــــــــــــــــــــــــــــــــــــــــــــــــ ـــــــــ

تحـــن ومــا ســـمع حنـــها .. واويلي على المظلوم

نوايـــب فگـــده صـــابنـــها .. واويلي على المظلوم

انگــطع مـن الاخـــو ضنها .. واويلي على المظلوم

وحزنها اعله الوجه مرسوم .. واويلي على المظلوم

ــــــــــــــــــــــــــــــــــــــــــــــــــ ـ

تجري ادموع عيــناها .. واويلي على المظلوم

فـــگــد الاهـــل اذاهـا .. واويلي على المظلوم

عـــالتــربان ولــــياها .. واويلي على المظلوم

وظلت بالخياتم اتحوم .. واويلي على المظلوم

ــــــــــــــــــــــــــــــــــــــــــــــــــ ــــــــ

خادم الحسين حيدر تركي الكربلائي

انت نحرك ذابحة سهم المنية
واني ذبحتني  ذبح چلمة سبية
مشتاگة لمناغاك     اتمنيت اموت اوياك
                    مو بالخرابة
@@@@@@@@@@@

يعبد الله البعد يذبح شحال اليفگد احبابة
شفت نحرك غصن مكسور عطر يتناثر اخضابة
مثل طير ويرفر حيل يحس بحرگة اصوابة
وتسالنة الرباب اعليك سوال ايحير اجوابة

بالمهد عبد الله ماكو ياهو شافاه
چان عطشان ويناغي ياهو رواه
يذبح ذبح فرگاك    تمنيت اموت اوياك
مو بالخرابة

@@@@@@@@@@@@

ابوك حسين من جابك وحزنك راكز بگلبة
اسمعة ايگول الك قربان يحچي بدمعة وي ربة
رضيع بلا ذنب مذبوح ابن حسين كل ذنبة
شاغت روحي الك وتصيح اخوي وفرگتك صعبة

خوية اصيحن ليش متناغي آلية
خوية عبدالله صحت اني رقية
اه يا جرح اذاك     تمنيت اموت اوياك
مو بالخرابة

@@@@@@@@@@@@

ذبح نحرك سمهم مسلول وعفت گلبي حزن مسلول
يم مهدك اجي بحسرة واصيحن خوية يالمدلول
متت بس ما شفتها الخيل اعلة صدر الوالي كلها تجول
ولا شفت النحر دامي وراسة اعلة الرمح محمول

ما شفت عمك وگع يم الشريعة
وبالعمد مصيوب واچفوفة گطيعة
والشمر ما رعباك  اتمنيت اموت اوياك
مو بالخرابة

@@@@@@@@@@@@

بگبر وي والدك خلوك  ونمت هادي على صدرة
واحنة عگب ابوك حسين مشينة ادروبنة بحسرة
مشينة أعلى الهزل للشام واهل الشام منتضرة
سباية حسين من توصل وسهم نحسبها كل نضرة

دخلت الديوان وي عمتي كلافة
لو تشوف الشامت بذلنة ايتشافة
روحي تلوب اهناك   اتمنيت اموت اوياك
مو بالخرابة

@@@@@@@@@@@@

بنومي وشفت ابوي حسين  صحت يابوية تانيني
وفرگاكم تهد الحيل  الوحدي لا تخليني
وجابو راس ابوي العود وشفتة وچذبت عيني
اثاري الموت اجة وياه وفوگة خلصت سنيني

فوگ خد حسين صاير خوية خدي
گتلة اخذني اوياك ما اريد ابقة وحدي
ماعيش انة ابلياك     اتمنيت اموت اوياك
مو بالخرابة


موسى الجيداوي