مولد الامام علي ع


من عالم الذر  حبينه حيدر
نادينه بسمه   علي علي علي علي
****
وي علي حبنه ابتده گبل الولاده
ابغير عشگه ندري متفيد العباده
ابذاك عالمنه علي شفناه قياده
انطقنه عالفطره تره ثالث شهاده

ابنص هاي الگلوب  والينه منصوب
اشمحلاته رسمه   علي علي علي علي
****
ابعالم الارحام صرنه وعلي بينه
وچان حبل الحب فرض ملتف علينه
نستمع نبضات تهتف يا ولينه
من گلب امنه عشگ صافي يجينه

حبه شربناه   واسمه عرفناه
وصرنه نشمّه  علي علي علي علي
****
سيرة الحب بس علي ما عدنه غيره
افتحنه ناظرنه وبدت هاي المسيره
نذكر اتبارك لاهالينه العشيره
هذا ابنكم حيدري واضح مصيره

واضح دربنه  ربونه اهلنه
واجب نفهمه  علي علي علي علي
****
يكبر الحب بينه ظل كل ما كبرنه
لقبونه رافضيه ولايگ النه
غير حيدر ابد والله ما عشگنه
النار حصتهم لچن حصتنه جنه

الما حبه خسران   تنتظره نيران
والينه رحمه  علي علي علي علي
****
ياللي ما تفهم عشگنه اهواي معذور
چي نحبه حيدره تكرهنه مجبور
كل وكت عندك سؤال ابراسك ايدور
الكعبه ليش الهل وكت حايطها مفطور

ابيت الله نيشان   للوالي عنوان
من الله نعمه  علي علي علي علي
****

الشاعر اياد الديراوي

لدمعج يم عون .. ينراد عيون
يا غريبه .. ياغريبه .. ياغريبه
*
وين تنطين الوجه والدنيه ليل
والسلاسل تهدل بمتن العليل
شلون شفتي اعلى الرمح راس الكفيل
لغربتج يم الخدر ينراد حيل

بالفروكه شلون  .. ينراد عيون
يا غريبه .. ياغريبه .. ياغريبه
*
شيبت راسج يزينب نينوى
وانتي من ذاك الضلام بلا ضوى
وين عنج راح شيال اللوى
تنتخين وضايع اعليج الهوى

عنج يمشون .. ينراد عيون
يا غريبه .. ياغريبه .. ياغريبه
***
يا وكت تمشين وي جتال اخوج
وزينب بحرك الخيم وليه ولوج
جنتي عطشانه وحزن بالطف روّوج
ومن عكب عباس يازينب سبوج

بين اليسبون  .. ينراد عيون
يا غريبه .. ياغريبه .. ياغريبه
*
رحتي اسيره والحزن كاسر كفاج
ياغريبه وسوطهم كاطع هواج
بالحبل تمشين ودموعج وراج
الكطع نحر حسين مسبيه خذاج

بصبرج يدرون  .. ينراد عيون
يا غريبه .. ياغريبه .. ياغريبه
*
عفتي كاع الطف تخضر بالدمع
مشيتج مذبوح راسه بلا كطع
جانوا يحلمون صوتج ينسمع
كَبل وين وهسه صرتي بيا وضع

مهدوله متون  .. ينراد عيون
يا غريبه .. ياغريبه .. ياغريبه
*
ضحكة الشامت مثل رمي السهام
صارت عليج بوكت حرك الخيام
يا نهار الصار بالطف الظلام
شلون زينب جفنج بليله ينام

دمعج يا لون  .. ينراد عيون
يا غريبه .. ياغريبه .. ياغريبه
*
تمت
احمد الخفاجي

من يصلي الوحشه يازينب عليج
من يغمض إعيونج ويسبل اديج
اخر انفاس العمر.   بغربة محفور الگبر
==========
عالگبر تابوت اشوفه منتظر واحد يجي
بهل نعش كُبرى المصايب مايكفيها الحجي
نعش بي غربة ورزيه والم دمعات وبجي
صوت من النعش يطلع ببو فاضل يرتجي

يابوفاضل اني اخيتك وانت تدري
ردت بيدك ياعضيدي تحفره گبري
بعد شيفيد الصبر.   بغربة محفور الگبر
==========
هالنعش يحمل مصيبه بالنعش بان الالم
صاحبة هاي الجنازه بيه جويه من الخيم
من يصلي عليها بله إلا شَيّال العلم
بس صعوبه من يِكَبّر بعينه مطبوع السهم

وين ابو فاضل يجي زينب تريد
عطر خلي يجيب من گبر الشهيد
الله اللي يعظم الاجر.   بغربة محفور الگبر
==========
اختنگت التكبيره الاولى وگابلت هذا النعش
والاحساس البيها ينزف بجرح الاطفوف انخدش
بالنعش لوعة اميرة راكضه بليل اهدعش
بيها نار اخيام لسه وبيها نيران العطش

بيها اثر ليل وسبي جرح واذيه
هالنعش يشبه صفه بالغاضريه
ساحگه حافي بجمر   بغربة محفور الگبر
==========
ثاني تكبيره تواسي ظلت تون للعليل
وحده بزينب يشيع من المرض ذاب الدليل
يسند بعوچيته حزنه وعالكبر كلسا يميل
للسمه صوت المناحه ونه واهات وعويل

لسه بجروحه اثر ذيج الليالي
عمه يازينب تره شيبتي حالي
بصوت صاح ومنكسر.   بغربة محفور الگبر
==========
ياصلاة الل بس مدامع گَطَعتْ حته النياط
وانحنت كد مامتنها بيه مطبوعه السياط
ثالث التكبيره شاطت گلب زينب بيها شاط
رابع التكبيره دمعه حزن اه ويمها حاط

زينب لوحدها بالغربه وبعيده
ماتت بدار الغرب زينب شهيده
ماكو واحد تنتظر.  بغربة محفور الگبر
==========
           ✍  علي النائلي




https://www.tgoop.com/rdeaa

عاشــرت  اونيني
من  زغر  اسنيني
ونه خمس اعــــــــــــــــوام

من   يوم   العصره
حسره اتجر حسره
حد يوم الــــــــــــــــــــشام

ــــــــــــــــــــــــــــــــــــــــ

ابتدي ابيوم الـــــولاده  طه  حط  خده اعله خدي
عمري يوم ومن نظرني  ابحرگه ظل يبچيلي جدي
امي  مدهوشه  وتسأله  والنبي  ايگـــــللـها   بعدي
اگبالها ايذبحون اخوها  وعلــ هزل  مسبيه  تحدي

ابــساعة ميلادي
يبچيلي الـــهادي
ولـحالي اينـــــــــــــــــــــوح

وبــــدمعة   عينه
شفت انه حسينه
بالطف مذبــــــــــــــــــــــوح

ـــــــــــــــــــــــــــــــــــــــــــ

صار خمس اسنين عمري  ودنيتي   اتغير    وضعها
حين شفت امي  الزچيه   الثاني فوگ الخد صُفعها
من  ثگل  چفه  الاصابع    علجفن    والـخد  طبعها 
وباب  الجذوع  التجيله   على  اضلوع  امي دفعها

ضلع  امي  الزهره
چنت اسمع كسره
وبـــ أذني الصّـــــــــــــــــوت

الــــزيد  الآمي
محسن گدامي
شفته  امن  ايمــــــــــــــــوت

ـــــــــــــــــــــــــــــــــــــــــــــ

جفني  ما   جفت  دموعه    وانه    بتلاثين    عمري
فوگ كسر اگليبي بـــ اُمّي    والدي   چَـمَّـلِـي  كسري
شفته يتچّـه اعله  اخوتي   والدما امن الهامه يجري
ابليلة  القدر  الــــــعظيمه    أنفِجع   هيچ  انه  قدري

العيد ايدگ  بابي
وانه سود اثيابي
يلچمني العيـــــــــــــــــــــد

علــ  زهره  وحيدر
حزني ايصير  اكبر
والونّه  اتزيـــــــــــــــــــــــد

ـــــــــــــــــــــــــــــــــــــــــــــــــ

هنّه  عشر  اسنين   عـدّن   والــــــعمر  صار  اربعينه
لن  ابو  محمد   تـــچوتي   آل  آميه  امسممّــــــــينه
بالطشت مِن مِثلي شافت   چبد  اخوها  امگــطعينه
وانـحُرَم   يم   طه   جده   يندفن  بَـــ ٱمُر   اللــعينه

شــيسد  امچانه
فارغ      ديوانه
والد جســـــــــــــــــــــــــــام

صب دمعي وساجم
ولـــــــــعمري القادم
يا دهري اشضــــــــــــــــــام

ــــــــــــــــــــــــــــــــــــــــــــــ

ومن  جزه الخمسين عمري  عشت الـ احداث  الرهيبه
هوّنت كل المصـــــــــــايب   جثة  احسين  الــــسليبه
علـــرمح    مرفوع    راسه   وشيبته   بالدم   خضيبه
تسحگ  الخيل اعله صدره    هلّه  هلّه  اشهلــ مصيبه

شمر ٱنه الشفته
يرفس خاصِرته
يرفس بي حيـــــــــــــــل

مـتغـيـّر   رسمه
ويتگلب  جسمه
ما بين الخيــــــــــــــــــل

ــــــــــــــــــــــــــــــــــــــــ

ڪافلي ابـطيحت چفوفه  بيهن  الدگ  صدره  اليه
اويه الشمر صارت طلعتي  من  بعد  خدري    سبيه
انشتم    وانطگ    واكابر    اشما  سمعت الخارجيه
والأشد   من   كل   هذني    فرجت   الوادم    عليه

من عين العسكر
بـچفوفي  اتستر
وانه اعله النــــــــــــــــــــــوگ

الاكثر هضمتني
مو طگت متني
طبتي اعله الســــــــــــــــــوگ

ــــــــــــــــــــــــــــــــــــــــــــــــ

حتى  لحظاتي  الأخــيره   دهري  ما  كف  نـــايباته
بالغرب  صارت  وفـاتي    وموتتي  ابــديرة  شماته
الشام  عيّد  من سبوني   ناصبي  وحــــاقد  صفاته
اشلون اموت ابگاعه حيره وهوَّ وحشه ابكل جهاته

ابـــشيلت تابوتي   
ما حضرو اخوتي
لا گلبي ارتـــــــــــــــــــاح

ميته  ويوميه
ارجع   مسبيه
واگبالي ارمـــــــــــــــــاح

ــــــــــــــــــــــــــــــــــــــــ
سيد علي عبدالزهره الناجي

#للعقيلة_زينب

يم البديهم ضــــاع خدري
يا وسفة ليش يصير گبري
سابيني گلبي ابذكريـــاته  ابذكريـاته
شو عدلة ميتة يم شماتة  يم شماتة
يا وسفة ليش يصير گبري
ـــــــــــــــــــــــــــــــــــــــــــــــــــــــ
كثـــــر ما عشت ابحيــــــاتي امعلعلة
صرت أشك هم يوم چنــــــت امدللة
عُمري سنتين و جـــــــروحي امتلتلة
و عُمري خمسين و مشيت امسلسلة

من البـــــــداية للنـــــهاية
خيل المُصيبة تعج وراية
فاجعني دهري ابنايبــاته  ابنايبــــاته
شو عدلة ميتة يم شماتة  يم شماتة
ــــــــــــــــــــــــــــــــــــــــــــــــــــــــ
ابصدري گعـــــــدت نــــــارهم متربعة
و چم هضيمة ابروحي تسري امگبّعة
الفاجــعة اطشّــني و تلــمّني الفاجعة
يمتى چا لاحضــــان اخـــوتي راجعة

ادعي لحد ما يخفه صوتي
يا ربّي اخذني يم اخـــوتي
هيچ و يضمني عز خواته عز خواته
شو عدلة ميتة يم شمـاتة يم شماته
يا وسفة ليش يصير گبري
ـــــــــــــــــــــــــــــــــــــــــــــــــــــــ
سايَرْت ضعـــــن المنــــاحة و الدمِع
من نهد مـــا كســـــــروا لامي الضلِع
شما يجي رمضـــــــان ظليت انفجع
جمـرة افـــــراگ الابـــــــو تلسع لَسِع

عالزهرة توّها جروحي خضرة
و من علي جتني شلون طبرة
محرابه خالي مـــــــن صلاته مــن صلاته
شو عدلة ميتة يـــــــم شماتة يــم شماته
يا وسفة ليش يصير گبري وا
ـــــــــــــــــــــــــــــــــــــــــــــــــــــــ
بين مــا بين المصـــــايب و المحَن
حضن ابـو محـمد إلي چان الوطَن
تالي مــا تالي بعــــــد ســاعة زمَن
لا اشوفه عنّي ضَم طشته الحسَن

عينه عليّ و ايـــــــده اباديه
لعباس اسمـــعه ايوصي بيّه
غير انه اخته و كل حياته و كل حياته
شو عدلة ميتة يـــم شماتة يم شــماته
يا وسفة ليش يصير گبري
ــــــــــــــــــــــــــــــــــــــــــــــــــــــــ
جرحي ما مثله بعــد يُوجد جرح
ابكربلة شخــــلّه عليّ ذاك الصبح
الكلشي بيّه ابعيــني شفته ينذبح
و راسه حيل اتلوّع ابراس الرمح

بـــــــاخر نَفَس سَلَّـــــــم عليه
و داست عليه عشرة اعوجية
طلعن يركضــن  كــل بناته كل بناته
شو عدلة ميتة يم شماتة يم شماته
يا وسفة ليش يصير گبري
ــــــــــــــــــــــــــــــــــــــــــــــــــــــــ
روحي تطلع من عله الخدر انسئل
سلّبـــــــوني و شتّمـــــوني بالفعل
الشفته ما شافه نبي فــوگ الهزل
زينــب أنه او ويني و ويـن الحبل

ليش ابدفنتي هــم اعاني
من اهلي ما واحد اجاني
ما جاني سبّعي من فراته من فراته
شو عدلة ميتة يم شماتة يم شماته
يا وسفة ليش يصير گبري
ــــــــــــــــــــــــــــــــــــــــــــــــــــــــ
الحمدلله
#علي_حسين_الكناني

مولاتي زينب عليها السلام

صاحت بدمع المصيبه
لا تخلّوني غريبه
٠٠٠٠٠٠٠٠٠٠٠٠
هذه ايام الزيارة الزينبية
لا تخلوني احس چني سبية
وحشه يا زواري غيبتكم علية
آنه بنت المرتضى وامي الزجية
گلبي ما يخمد لهيبه
لا تخلّوني غريبه
٠٠٠٠٠٠٠٠٠٠٠٠٠٠٠٠٠٠٠
كل سنه تملون صحني يالغيارى
يمي تحيون المجالس والزياره
گلبي نار وبس دمعكم يطفي ناره
ياحلاة المجلس بصوت المناره
تحضر الزهره الحبيبه
لا تخلّوني غريبه
٠٠٠٠٠٠٠٠٠٠٠٠٠٠٠٠٠٠٠
آنه زينب لا تعوفوني وحيده
انتم اهلي وآنه عن اهلي بعيده
مجلس امي بمرقدي الليله اريده
بليلة مصابي تسمعوني قصيده
ما يذل راس النجيبه
لا تخلّوني غريبه
٠٠٠٠٠٠٠٠٠٠٠٠٠٠٠٠٠٠٠٠٠
گلبي يبرد من تجوني وروحي تروه
اشم ريحة كربله وعطر الأخوّه
لعطر ابواليمه الحبيب جروحي تهوه
وعطر ابوفاضل كفيلي الكلّه نخوه
منين ابوفاضل اجيبه
لا تخلّوني غريبه
٠٠٠٠٠٠٠٠٠٠٠٠٠٠٠٠٠٠٠٠٠
بكربله تمنيت موتي آخر انفاس
بين اخوي حسين گبري وبين عباس
آنه ما احمل بُعدهم والله يا ناس
قدري عالي بروس اخوتي ارفع الراس
جرحي ما ألگه طبيبه
لا تخلّوني غريبه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
حگي دم ابچي واضل ثَكلَه وحزينه
لا بقيت ابكربله ولا بالمدينه
شحال الايون ماكو من يسمع ونينه
واليموت بغربه ينسل من حنينه
اندفن وحدي عجيبه
لا تخلّوني غريبه
٠٠٠٠٠٠٠٠٠٠٠٠٠٠٠٠٠٠٠٠٠
زينب اني الماكو من طيبة حناني
حيل عذبني وجرح گلبي زماني
لديرة الشام بقهر رجعني ثاني
من مدينة جدي وخواني خذاني
والاخو يكتل مغيبه
لا تخلّوني غريبه

سيد زيد الفحام


https://www.tgoop.com/rdeaa

مولاتي زينب عليها السلام

مهضومه وغريبه
اشرح جم مصيبه.   عذّبني زماني
٠٠٠٠٠٠٠٠٠٠٠٠٠٠٠
آنه زينب والزمن كدّر حياتي
من زغر سني عشت وي نايباتي
جروح وحزان ومصايب ذكرياتي
تالي وبديرة غرب صارت وفاتي
من جرح الزجيه
لجرح الغاضريه.     مفجوعه واعاني
٠٠٠٠٠٠٠٠٠٠٠٠٠٠٠٠٠٠٠
زينب المحّد كدر ينظر خيالي
مدلله ومهيوبه بعيون الغوالي
انسبي عله الناكه ما مر عله بالي
ودخل لديوان اميه بهذا حالي
مجتوفه وسبية
يتفرج علية.    بعيونه السباني
٠٠٠٠٠٠٠٠٠٠٠٠٠٠٠٠
آنه زينب والمصايب شيّبتني
جارت علية الليالي وعذّبتني
الدنيا لرض الشام مسبيه خذتني
ونظرت الشمّات تكتل موتتني
النظرات الطويله
عالناگه الهزيله       موقف ماله ثاني
٠٠٠٠٠٠٠٠٠٠٠٠٠٠٠٠٠٠٠  
عشت مهضومة ومتت بالغربه وحدي
لا أهل لا اخوه لا جيران عندي
الدنيا وهل الدنيا صارت كلها ضدي
بلا ذنب بعدوني عن محراب جدي
برض الغربه موتي
وتمنيت اخوتي     ما واحد اجاني
٠٠٠٠٠٠٠٠٠٠٠٠٠٠٠
انعادت الغربه عليه بهاي الايام
چني مسبيه وغريبه بديرة الشام
مرقدي بلا شيعه خالي بلايه خدام
لا مجالس لا نواعي وحشه هالعام
وين اهل المواكب
اسكت لو اعاتب.      لو اصبر وتاني
٠٠٠٠٠٠٠٠٠٠٠٠٠
آنه زينب ابقى زينب ما اطخ راس
يبقى كافل كبري كافل خدري عباس
لكن الحسره تظل تجرح بالإحساس
ليش زواري نسوني خيرة الناس
أتأمّل تجوني
تحرسكم عيوني      والجنة بضماني

سيد زيد الفحام



https://www.tgoop.com/rdeaa

(#قصيدة_منبرية_شوط_كربلائي)
العذر منچ يبت حيدر    وفاتچ ماحضرناها
لگبرچ ماوصلنه ضروف   يم اهلچ حييناها
-----------------
بدموع الهظم ننعاچ   وخوچ حسين ناعيها
والكافل حضر عباس   عليچ سهام يجريها
علتله انصب صيوان    وخيام جروح نبنيها

كل شيعي هتف يم عون
شباب لأسمچ يضحون
ولعدهم نفس يسبون

گبرچ تاج ديرتهم  وبيچ اعزاز تتباها
-----------
المواكب كل شعائرها   حظرت والگلب جمره
ماتنزل دموع العين      تنزف بالگلب عبره
غريبه الگال مانسمح    الحره بكل وطن حره

ليچ بكل محب منزل
خدرچ بالگلب ينزل
بلانوگ وسبي وهزل

كلنه نموت مانهتم   ارواح الكم فديناها
-----------
يرجز بسمچ الكافل   اختي ومابعد تنظام
ارد اچفوفي لزنودي   وسيفي للحرب محتام
اعيد الگنطره وخيبر   وهدم كل قصور الشام

اختي بروحي كافلها
مايوصل تذل الها
وصية العود حاملها

وتضل حشود شيعتنه  لهل ساعه ضخرناها
------------
كيد وأسعه ماتمحي   ذكرنه بكل زمن ينعاد
كلتيها بوجه طاغوت   خطبتچ كل حرف يزداد
وعلي السجاد لخصها  نيشن بالطرد صياد

لاينفع سعي ولاكيد
نشيل من العليل الگيد
نسحگ كل ثنايه يزيد

بعيون الزلم ثارات  وين الگال يدناها
----------------
نشكي للنبي فراگچ    ومن جور اليمر بينه
بعيده ولكن تسكنين  بنفسنه وكل معانينه
يلآهي بالفرج ننخاك   عجل يوم مهدينه

يحاسب كل منعنه نزور
ويطلب ثار للمنحور
يقضي على الظلم والجور

وزحف تطلع مواكبنه  بدرب الشام مسراها
---------------
🖊الشاعرالحسيني/زهير قاسم الغليمي

يا موت باريني
لحسين وديني
وينك تعال.... مات الدلال
..............................................................
مو عوايدهم اصيح وما يجون
امنيتي جف حسين اليغمض العيون
العدها اولاد بدفنها منكبين
واني ابني بكربلا دافنته عون

بحصيرة انلمة المطشر...... وضعني بيا بخت ينلم
النار السوط لو الحبال...... ..من ياهنه ارد اسلم

الروح... يمتى تروح..... وانسى جروح... غربتي
كون... هلي يشيعون.... وعلي يبجون.. بدفنتي

ال بطيف ما عفته
بالشام عاف اخته
بضيم الحبال...... مات الدلال
...............................................................
من يذبحون الكصب يردونه في
حجاية التنكال ما مروا علي
من السبي وجهي رسومة تغيرت
شوفوا جا الحبال شمسويه بأدي

اللحكوا يا بني هاشم....... موش ولام الي الديوان
الضلت تاكل بكلبي.... بسوگ يمر خدر عدنان

الفات.... ابد ما مات... شبعت شوغات.. بحياتي
وداع.. الماي انباع... وصنته الكاع.. بمماتي

يخواني لحكولي
شوي ماي جيبولي
كل حملي مال..... مات دلال
..................................................................
انكسر خاطر عيني من ذاك الصباح
اتصابح بوجه الشمر والكة الرماح
اخ يا عازة هلي ما تنحمل
لمن راحو حتى نوم عيوني راح

وصيت لعلي السجاد..... بهونك من تسد جفني
وهنتالله بمتن زينب....... بهيدة من تنزلني

الشام... يبوك احلام... ويضيع ايتام... سبيه
شوك... وكلب محروك.... وتعتنه النوك.. اذيه

يا راي ضل عندي
بالموت هم وحدي
حيرة وسؤال..... مات الدلال
..............................................................
الغربه رحلة وتاخذ دموعي متاع
زينب اسمي وعكب اخوتي اسمي ضاع
الوحشه نار وكلبي يابس بالربيع
بغربه موتي بلا اخوتي بلا وداع

بعين اخواني جنت اكعد..... هسه اكعد ع الترابه
ورمهن متوني السوط...... ما تنفظ هالطلابه

ليل... نار وخيل.. وماضل حيل.. مصيبه
رماح...وضعني راح... وكلبي طاح... غريبه

التهضمني يا موتي
من يشيل تابوتي
عشت بخيال..... مات الدلال
.........................................................
الموت راحة الشام يلجم جنه نار
جبيرة اني وتضحك اكبالي الزغار
فوك ضيم حبال اديه والسياط
مو هلا اتلكوني بالشام بحجار

هلي كافي وعلي كافي...... هجركم ميل اجتافي
هلي شلعان البكلبي...... لحكني حتى بأطيافي

وين... اخوي حسين... وضواها العين... كفيلي
موت.. والتابوت...... بلا زاتوت...... يجيلي

والروح ملجومة
من الشام وهمومة
يا حالي حال.... مات الدلال
................................................................
مرتضى عامر الشمري

 
لامتـكـفي الگـبور ..  تدفن حزن عاشور
يزينب يزينب

***

يالمــن حزنچ اونــچ خـجل يعـقوب
يم حيل الرچيچ ويـم صــبر متعوب
لون گلبچ حديد امن الطفوف يذوب
يخت الذي راسـه عالــرمح مـصلوب
 
شلون ام گلب مكسور .. تــدفن حزن عاشور
يزينب يزينب

***

يالشلتــي المصــيبه الابــد ماتنشال
ثگيله ولوهــت تهــدل امتون اجبال
حزنــچ يعــجز ايــشــيله الـف رجال
خصوصا من ندهتي وما اجه الكفال
 
صعبه الخيها منحور .. تــدفن حزن عاشور
يزينب يزينب

***

الباب ابمــوتچ انسد بس فتح بيبان
يالمـوتچ قضــيه مـــو كـــلام السان
غفت عيناچ بــس حزنچ بقه سهران
على الضل عالتراب مســلب وعريان
 
هيه الشافت انحور .. تدفن حزن عاشور
يزينب يزينب

***

كــل الشيعــو جــثـــمانچ ايصـــيحون
دفنــچ مو ســهل يحــظر كــفيلچ كون
يالشفتي المـــصاب الماتــشوفه اعيون
ابراس احسين شفتي الوادم ايهوسون
 
والدمعاتها اتفور؟ .. تدفن حزن عاشور
يزينب يزينب

***

المثلـچ بيه حزن اهله يدفنوه وين
يمخجله يـزينب دمــعتچ كل عين
اهل الشام بيـــچ اشــسوو وتبچين
هلگد مابچيتي بچــه راس احسين
 
گلب الگاع مفطور .. تدفن حزن عاشور
يزينب يزينب
***
حيدر تركي الكربلائي
 

يادهر أرحـــــــــــم أبحالي
        وحــدي ماضل عندي غالي

زينب اني الهاشميه  ــــ يادهر لتضن سبيه
                     @@@@@@
انه بت الكرامــــــــــــه والاكابر
انه بنت الصكَركم علي صاكَـــر
انه اخت المنتصر بدم المناحر
وسبع الدنيا أخوي ومو كَناطر
والدي بأســـمه السلامه
وأخوتي اسيوف الكرامه
وأمي الزهره الزجيه ــــ   يادهر لتضن سبيه
                     @@@@@@
سبيتوني  وأديـــــــه بالسلاسل
اذا ادعي اخـــلي العالي سافل
لجل دين الله أخوتي بالمقاتل
ماتو وأنتصر دم عالبـــــــواسل
الله لو رايد نصرهـــم
جا ضعفكم ماكَدرهم
ضحو بدم للقضيه  ــــ  يادهر لتضن سبيه
                     @@@@@@

أسمعهم لمن  بأسمي يصيحون
حكَهم اني زينــــــــب مايصدكَون
وصارو زلم يمي بــــــس يخافون
بأسم عباس لــو صيحن يموتون
ميت وضل اسمه يرعب
وخافو اتناديله زينـــــــب
أصبر او علتي خفيه ــــ   يادهر لتضن سبيه
                     @@@@@@
انه طول الدرب ضل راسي عالي
او عيني الماغفت    عن الغوالي
تصد الروس أخوتي    عالعوالي
أبسبيكم حره    ابقه  وما ابالي
عندي جيش ومو سبايه   
والعليل اويانـــــــه رايـه
قائده ونفسي أبيه ــــ يادهر لتضن سبيه
                     @@@@@@
مشينه احرار ابد لتضن سبايه
أول   بالضعن  والكل    ورايه
ومن عباس ضلت عندي  رايه
السوط امتون طيح  مو عبايه
طاحت امتون بضربنه
لا ولا طايـــــح سترنه
بينه ستر الله ونبيه ــــ   يادهر لتضن سبيه
                     @@@@@@

رساله عندي اوصلها     بقصركم
وأذلكم    بالصبر  وينه   نصركم
عله صوتي وشفت واضح كسركم
ذكرنه   الباقي  او رايح    ذكركم
باجر انصار العقيده  
بكربله الصاير تعيده
وينمحي ذكر آل اميه ــــ  يادهر لتضن سبيه
                     @@@@@@
             الشاعر عايدعنادالعياشي