tgoop.com/rowdataladab/5599
Last Update:
قصیدة : لیل العشگ
یا دمع بالعین وانه ابعبرة المغرم بچیتک
یا سوالف شوگ مرّه و الف مرّه ...
ابلهفة المشتاگ واکثر سولفیتک
یا درب کلک مخاطر وانه من غصبن مشیتک
یا فجر غبشة شبابی الفرد لحظه ...
ما غفیتک
یا حلم جبتک زغیر ابلیل شوگی و کبّریتک
یا أمل ضایع گطعت افیای صبری و دوّریتک
یا نغم بـ اشفاف عمری ...
ابگلب هایم رددیتک
یا عذاب امشربک ابروحی و مدی الأیام ...
واعی و ما نسیتک
یا نحیب و آه من یوم الزغر بـ اچلای ...
للعالم شکیتک
یا غصن ذبلان من جور اللیالی و بالدمع ...
ظامی و سگیتک
یا خیال ابفکر حایر قدّمت گلبی ...
و گلتلک هاذ بیتک
یا شمل ضاع و تشتت ما مچنی و جمّعیتک
لو چنت قصّه ابکتب مطبوع کل لیله ...
ابسکوت اللیل صدّگ چا گریتک
لو چنت یهوای غایب وادری بیک اتعود ...
چان اتنطریتک
لو چنت تنباع چان ابثمن ما همّیت ...
بالروح و شریتک
لو چنت نجمة صُبح غبشه ابحلات النوم ...
گمت و عانقیتک
یالچنت چلمة عتب تندار بـ السان المعانی ...
و رافگیتک
یالصبرت اعلی الگلت والگال لجلک ...
من عذولی و ما جفیتک
إنته ذاک المنشتل بالروح و الهجران مو طبعک ...
حبیبی و لا سجیتک
أدری مو صوچک تجافی و غصب عنک ...
فارگتنی و فارگیتک
یالعشگتک خطوه خطوه امن الطفوله ...
و دلّلیتک
یا جفن نعسان من شوطة حنینی و کحّلیتک
روحی عطشانه اعلی شوفک ...
حیل یشگر ...
من یوصّلنی الثنیتک
#ابوعبـــــــدالعزیزالباجي 🕊
.
#روضة_الأدب_الأهوازي
https://www.tgoop.com/rowdataladab
BY 🌴روضة الأدب الأهوازي🌴
Share with your friend now:
tgoop.com/rowdataladab/5599