tgoop.com/sMailAljorae/2939
Last Update:
نوحيه : أساسيه
لذكرى أستشهاد الأمام عبد الله الرضيع عليه السلام
وعن لسان حال أمه الرباب عليها السلام
....................
خل أبوسه أبمنحره البوسه الأخيره
حرمله أمجند سهم ميت ظميره
ويه نحر الغالي
أوداع أخير أبالي
حرمله أمجند سهم ميت ظميره
---------------
يا سهم من تِنحَره أوتذبح وريده
أشلون شوف أتفرفر أعله أحسين أيده
أحساسه دافي أوليدي وحساسك حديده
الله يلعن حرمله الهاي المكيده
راح أجي أمنالتالي
أوداع أخير أبالي
أبني عبدالله ألي أهل أوعشيره
--------------
يا سهم يلـما عرف كلبك خطايه
من شحب وجهه أوصفه أبالون العبايه
راجعت دورك كلت صعبه النهايه
لو عشكت الدور ياسهم الرزايه
سال دمه أكبالي
أوداع أخير أبالي
نكبتي أبعبد الله ياعالم جبيره
-------------
يا سهم يالحتمت وجهت مصيره
كلي من يمته العطش تهمه خطيره
أمغمس أبسم حرمله الماعنده غيره
جيت متحامي أعالنحره أبهالظهيره
الحسره منك فالي
أوداع أخير أبالي
لاخر أنفاسي الحزن باقي شعيره
--------------
يا عرف حلل فعل هاي الرزيه
أبسابق أصرار أو ترصد غير أميه
راح أحكمك ياسهم هاي المسيه
أبمحكمة عدل الولايه الحيدريه
أول أبلا تالي
أوداع أخير أبالي
المثلي مفجوعه أبولد حيرتها حيره
--------------
يا ألم شاخص يظل حد القيامه
الليل حلفه أبخته لو جلجل أنامه
يا سهم عبد الله ياأكبر ظلامه
سولت ألساني أبمعاناة اليتامه
الليل يدري أبحالي
أوداع أخير أبالي
ذكره حلوه أتهيج أئالامي المثيره
--------------
يا حزن روحي الصفه أبعالم خياله
أيزف ونين أم الولد حالتها حاله
ضيعت درب الرجه أو خيط الدلاله
بين موقف محنته أو هالت جماله
أوبين مهده الخالي
أوداع أخير أبالي
كبل ماحكم السهم ينفذ مصيره
----------------
خادم أهل البيت
الشاعر : أسماعيل الجوراني
الأحد : 2/10/2016
BY قناة الشاعراسماعيل الجوراني
Share with your friend now:
tgoop.com/sMailAljorae/2939