أعكيلي
حظور الزهراء عند قبر أبيها عليه وعلى آل بيته أفضل الصلاة وأتم التسليم
..................
أشكيلك جيتك شوغاتي
.....................
ماي أعيون الزهره الغالي
أبقلب الزهره أمجانك خالي
ترضى أعله أبنيتك يالوالي
بالحسرات أتظل أتحاتي
....................
قبرك أخضر بعده أترابه
وطلابه أتحل بعد أطلابه
مسمار ألي أبصدري أصوابه
شاهد يوم الحشر الأتي
......................
أشبك قبرك بويه أو انحب
أبيت أحزاني الوحدي أتعذب
والله اليدري الحد ما أتعب
عالخد يتجارن دمعاتي
.....................
أبيوم أعيونك راحت عني
يا بو القاسم ما جل وني
من قبرك فز وتلاحكني
جانك تسمعها أحجاياتي
..................
أشكي أو أنحب ولطم صدري
وتمنه أبصف قبرك قبري
يا هو الشاف الشفته أبعمري
أسئل مختكنه أبجلماتي
....................
صار القلته أبحين أغيابي
راح أتخون العشره أصحابي
كسرو ضلعي أو كسرو بابي
أصحابك صارو شماتي
......................
أسمع شنهو الصاير بيه
هذا أو ذاك ألتم أعليه
أبني المحسن صار الديه
أو ديه أمنالسطره أخديداتي
.....................
قنفذ نفذ رغبة واحد
نفذ رغبة واحد خالد
مشعل نار اليلهب صاعد
مشعل يلهبني أبوجناتي
......................
شفت أبعيني أحبال الجتفت
جف حيدر وكتاري أرتجفت
أيد الشالت أيد الشدت
مشلوله أتعالت دعواتي
.......................
خادم أهل البيت
الشاعر : أسماعيل الجوراني
الجمعه : 16/10/2020

مولد
لذكرى ولادة الرسول الأعظم أبا الزهراء محمد عليه وعلى آل بيته أفضل الصلاة وأتم التسليم 
......................
أبمولد المبعوث رحمه أمنالسمه
حبنه هذا اليوم خلو أنترجمه
....................
خلو نرسم للفرح صورة فرح
واليصلي أبقلبه والصوته صدح
رابح أبدنياه وبحشره ربح
ألف هنياله الكسب هالغانمه
....................
17 شهر الربيع العربي
صار بالدنيه نبي بس يا نبي
هاشمي الأخلاق فطحل طالبي
والثلث تنعام من هالمكرمه
....................
أمنه جابت ولد بس يا ولد
قبله ما صاير ولا بعده أنولد
الأمين الصادق أبخلق أو جسد
أحمد المختار والد فاطمه
....................
الله صلى أعليه وملاك العرش
أو عزة الله الراد هاليله نقش
خاليصلي أوصوته بالمحفل يطش
بالصلاة الليله حسن الخاتمه
...................
نور من نور الجلاله هيئته
خلو هاي الليله نشعل شمعته
أمبارك أو عالخير لمه الجابته
هذا أقل شي النبينه أنقدمه
....................
يلا هلهوله فرح تشرح صدر
الليله هاي أضاهي خلوها القدر
إنا أنزلناه وي طرة الفجر
نعمه والنعمه شكرها أنحتمه
.......................
أبهالحفل كلمن حضر ما رد خلي
أو وداعت الزهراء وبداعت علي
ترجمان الليله كل هم ينجلي
أو تنغلق بيبان سبعه الحاطمه
.....................
تهنئه الكلمن حضر هذا الحفل
أن شا الله أتعاود عليها بالمثل
أبجنة الفردوس يلتم الشمل
كولو آمين أبشفايف باسمه
......................
خادم أهل البيت
الشاعر : أسماعيل الجوراني
الأثنين : 2/11/2020

هوسات جنوبيه
لذكرى ولادة الرسول الأكرم
أبا الزهراء محمد عليه وعلى آل بيته أفضل الصلاة وأتم التسليم
.....................
 يا حبيب الله محمد يا أبو الزهره البتول
أبيوم ميلادك أجينه نبصم أبعشره اونكول
لبو صالح هاي بيعه أونرجه من الله القبول

ها ها

عالحب كلنه أتجمعنه
أو باب أفراحك شرعنه
أو يوم المولد وقعنه
أو يوم المولد وقعنه

ها ها ( أنضحيها )
للمهدي الروح أنضحيها
......................
للفرح شيدنه محفل دوم ما مثله أبد
والجهل غاية فرحنه آمنه جابت ولد
أنكله ونعلي الهلاهل وزود أشويه بعد

ها ها

بسم الله أنسمي النيه
أنهوس هوسه أجنوبيه
أوشمع أو ياس أبصينيه
أوشمع أو ياس أبصينيه

ها ها ( أو بالمحفل )
صفكه أو هلهوله بالمحفل
.....................
خادم أهل البيت
الشاعر : أسماعيل الجوراني
الأحد 1/11/2020

نزله ( ندبه للأمام علي عليه السلام )
لذكرى أستشهاد الصديقه الطاهره فاطمة الزهراء عليها السلام
..................
يا أبا الغوث أمير المؤمنين
فاطمه الزهراء ذابحها الونين
...................
دار محروكه أو ضلوع أمكسره
أو عين مطفيه أو جنين أعله الثره
أو للصدر مسمار من باب أنبره
تنحب أعله أحوالها مدري الجنين
...................
 أجفوف مجويه أبجمر خد منسطر
أمتون زركه السوط هاطرها هطر
أجدام متكرده أو جسد من العصر
خامل أعله الكاع من كد ما وهين
...................
بابك المصنوع من جندل خشب
كام يعصر طولها والدم شخب
جوجت أعله الكاع مجروحه أبأدب
والأدب للزهره من صارت قرين
..................
18 ما كملت أم الحسن
أو دار بيها اليوم دولاب الزمن
الله يلعنها السقيفه أم الفتن
الأذت الزهراء بت طه الأمين
.....................
هذا كظ مشعل أو نيرانه رمه
أو هذا بس بالدار كالو فاطمه
أن يكن جاوب زنيم القائمه
أحرقو الدار بمن فيها رقين
......................
أبصوت خافت ندبتك حيدر مدد
طفلك المحسن سكط هامد جسد
اليوم أبن صهاك كل جهده جهد
ركنك الثاني يهد بيده اللعين
.....................
بين باب أو حايط أتعمد يحط
زهرتك يا با الحسن وبهل السخط
أبكصته عرج الغدر أصبح ينط
والزجيه أتصيح يا ليث العرين
.....................
فاجعه أبدارك يبو الغيره علي
حلت أبهاليوم والموقف جلي
غايب أنته أبسوط قنفذ تنصلي
بت رسول الله وم الحسنين
.....................
فضه عينيني بقه ألها صده
شوف مجلس فاطمه بالون غده
بين باكي أو بين شمر ساعده
حيل يلطم صدره بيسار أويمين
.......................
أو داعت الله فاطمه الصوت أعتله
أمصابج أنقيمه أو مصايب كربله
أو ثوبنه الأسود محال أنبدله
هذا عهد الشيعه مد عمر السنين
......................
خادم أهل البيت
الشاعر : أسماعيل الجوراني
السبت : 16/1/2021

أعكيلي
لذكرى أستشهاد الصديقه الطاهره سيدة نساء العالمين فاطمة الزهراء عليها السلام
...................
يالهادي أبنيتك أذوها
...................
عاده الميت والد عدها
أهل الحي كلها أتواددها
بس أبنيتك يا والدها
ملجومه أو زايد لجموها
...................
قبرك أخضر بعده أترابه
أو جرح أمصابك يدي أصوابه
الوقف الشيطاني أو أقطابه
ضلعين أبنيتك كسروها
...................
شيطان الظل جند زمره
ضدها أو هالضد عزم أمره
أبدارك محد غير الزهره
يدري أو كللهم حركوها
..................
ألحك فاطم يا بو القاسم
ظالم طكها أو ظالم شاتم
بالسوط أجلد يزبر خادم
ظالم وبحايط عصروها
....................
ذاك ال عنك صرح يهجر
يدفع باب أبحايط يعصر
جسم أبنيتك بالجف يسطر
خدها أو أتباعه أستولوها
...................
طاحت ونت ناحت ندبت
يابو القاسم تحضر هلبت
حتى أتشوف الناس أشسوت
أو يا نيه البعدك عكدوها
.......................
جف محتركه أو جف مجروحه
أو شافت محسن فاضت روحه
جلمة يمه أشبيها أملوحه
ما فادت لمن سمعوها
........................
يدرون أبحيدر عن داره
غايب وصلتهم أخباره
لو حاضر حيدر فقاره
فنهم فعلتهم فعلوها
.......................
خادم أهل البيت
الشاعر : أسماعيل الجوراني
الأحد : 17/1/2021

موشح
لذكرى وفاة السيده الجليله الطاهره أم البنين عليها السلام
...................
أتجالع أمك يا كمر عدنانها
أو ماتت أو أسمك أبطرف ألسانها
..................
1
ألسانها الحد موتها بسمك لهج
يمه يا عباس يالب المهج
لا مسافر ونتظر لحظة فرج
كربله أطم جسمك أبتربانها
.................
2
أبكربله ام البله جسمك سكن
كاع غربه أبعيده صارتلك وطن
يا ذخر شيب أمك أبجور الزمن
الموت سكراته بده نيشانها
..................
3
سكره بعد السكره وشتد الونين
على هذا الحال  مشعوبه الوتين
أيعينها الله الفاركت أربع بنين
أسنين عده أوشيبتها أحزانها
..................
4
أسنين بالأحزان من حزن الحزن
بالله يا أم المثل أمك تون
ما أتهنت حتى من حل الدفن
أشلون تهنه الأجنبي دفانها
..................
5
أشلون تهنه التندفن بيد الغريب
سالفه منها الطفل شعره يشيب
الجابت أحيود أربعه خدها خصيب
بالبواجي أتشوف كل أحيانها
..................
6
حين تبجي أوحين تلطم عالصدر
يمه يا عباس يم قبرك قبر
كون طمني أو لا بقيت الهالعمر
أبدار بس النايحه أبجدرانها
..................
7
نايحه أبجدران دار أعله المدار
أشما يجلجل ليل ويبان النهار
حضره لملاك السمه أبكل أفتخار
حولها أطوف أو ترف جنحانها
...................
8
حولها أطوف أو تصد لرض البقيع
فاطمه أم عباس مولاة الجميع
باجر أيعاديها أبو الخلق الوضيع
أو يهدم الحضره ال حوت جثمانها
...................
9
أشلون حضره لمك الطهر الطهور
أتلوذ بيها الناس وتلوذ الطيور
أتصير كود أتراب متسوره أبصخور
يا بو فاضل يا عميد أعيانها
....................
10
يا عميد أعيان أهل بيت الرسول
يا كمر هاشم يبن فحل الفحول
عالوعد عاودنه كالعاده نكول
أمصيبة أمك ما نهد صيوانها
.....................
11
أمصيبة أمك يابو فاضل فاتحه
بيها أبد ما يهده صوت النايحه
أو للمدينه أنظارنه أظل شابحه
أو نطلب أبدنيا أو حشر رضوانها
....................
خادم أهل البيت
الشاعر : أسماعيل الجوراني
الأربعاء : 20/1/2021

نزله
لذكرى وفاة السيده الجليله الصابره أم البنين عليها السلام
.....................
أمك الليله يسبع الكنطره
أبخشبة التابوت جثه أمسمره
....................
1
يا كمر هاشم يبن فارس مضر
تنتظر منك خبر ما من خبر
ونت أو وناتها أتبجي الصخر
النوحها أتنوح الطيور الطايره
.....................
2
يا أهديب الغيره من عنها غبت
أسمك أعله ألسانها طول الوكت
زادها الحسبات من سبت السبت
يا تره تحضرها ما تحضر تره
.....................
3
أم بنين الأربعه الناس الغرب
نزلو جثمانها أبالحد الترب
( يمه ) محد صاح ودموعه تصب
لا ثغيب الكام وسط المكبره
......................
4
صوتها الخافت نده يبني الفحل
العجل ثم العجل ثم العجل
حتى ليكولون ما عدها أهل
بالمدينه اليوم متوفيه مره
.....................
5
الجايبه أحيود أربعه منها أو نعم
أبعين تربي الكربله تبجي أوتهم
ودها مره أحيودها لو بالحلم
حالها أيشوفون شنهو الدهوره
.....................
6
ماتت أو لا من ولد واحد حضر
أو طولها الزاكي حرامات أنطمر
يا كمر هاشم وصل لذنك خبر
طولها الزاكي يبجي منظره
......................
7
الجابت العباس أبن عقد الوله
من أهد ما راح عنها الكربله
أبمعضله أطيح أو تكوم أبمعضله
أو خلصت باقي السنين أمرمره
......................
8
أجودي أو بالجود ما مثلك يجد
أثنين أديك ابكربله الحد الزند
أنطيتهن لحسين هذا اليوم أعد
جودك أو طول أمك أدفن بالثره
.......................
9
أبخشبة التابوت أخف من الهوه
أيشيلها الجناز والداعي أنجوه
أبغيرة الله البيك شيال اللوه
الجليله أمك دفنها تحضره
......................
10
العوز يكتل حيل والمعتازه أبن
حكها ليل أنهار بالحسره تون
الفاكده أولاد أربعه أبرمشة جفن
صعبه واحد حالها يتصوره
.......................
خادم أهل البيت
الشاعر : أسماعيل الجوراني
الخميس : 21/1/2021

نزله
ندبه لباب الحوائج
السيده الجليله أم البنين عليها السلام
.......................
أذا عندك حوايج سولف أبديها
الليله أم البنين الحاجه تكظيها
.....................
1
الليله الصابره وم الكمر عباس
تتعنه المجالس معدن النوماس
لصحاب الحوايج حضرت كراس
واحد بعد واحد تملي أساميها
....................
2
أنخه أم البنين الطاهره الحره
حلفها أبعلي وبفاطمه الزهره
والمسموم جبده المنذبح نحره
خلصت حاجتك بالحال تلكيها
.....................
3
تحضر بالمجالس تسمع أقرايه
ودموع الحزن عالوجنه همايه
تلطم عالصدر وتصيح مولايه
أبكلبي النايبه أشتدت بلاويها
......................
4
كلمن عنده حاجه الطايح أبشده
والله أم الكمر عباس مترده
ما دام أبعبرته المجلس أيكصده
الطيبه أم البنين أهمومه تنهيها
......................
5
والمطبور راسه أبمسجد الكوفه
أعظم باكيه أعله حسين معروفه
اليقره الفاتحه ألها والله متعوفه
أله أو تنهي إله الشده اليعانيها
......................
6
جرب ويه نفسك كلها مولاتي
هاي أجفوفي أمدها يمنه يسراتي
أبحق ساقي العطاشى أنطيني حاجاتي
حاجاتك ترى بيدك تخليها
.....................
7
صد لرض البقيع أو سولف أوياها
والله أهموم قلبك كلها تنساها
هنياله الي هسه أيطوف مثواها
ولشيعة علي أزيارته يهديها
.....................
8
الليلة أم النوايب ذكرى نيبتها
بفراش المرض كل ونه ونتها
واحد من ولدها أبحين موتتها
حاضرها أو يسبل ترجه أياديها
....................
9
تنعه أو عالخدود أدموع هماله
هنياله الدفن بيده أمه هنياله
أو محنية ظهر  وبحسره جتاله
ماتت والجنازه أتريد أهاليها
....................
 خادم أهل البيت
الشاعر : أسماعيل الجوراني
الجمعه : 22/1/2021

مولد
لذكرى ولادة سيدة نساء العالمين الصديقه الطاهره فاطمة الزهراء عليها السلام
......................
أبمولد الزهراء أم الساده
تهنئه الطاها أو علي وولاده
.....................
1
نور رباني عظيم المنزله
سوره بالقرءان ربك رتله
وحنه هذا اليوم نحيي محفله
والله لا يحرمنا من ميعاده
......................
2
كل مزايا العفه بيها أتجمعت
الطيبه والأخلاق والحظ والبخت
أبنورها يوم العله الدنيا أشرقت
أنطت الدنيا حلاة أزياده
.......................
3
الكوثر أعطيناك صار ألها صده
أو شانئك أبتر لما أبظلمك بده
صلي ونحر كوم يابو المسعده
أو دلع الزهره الزجيه أكلاده
......................
4
أبيوم 20 أبجمادي الأخره
مولد الزهره الزجيه الطاهره
تهنئه الطاها أو خديجه الناصره
نرفع أو نطمع نعود  العاده
......................
5
يا أبا الزهراء يا خير البشر
كل محب اليوم للمحفل حضر
غايته أيهنيك وي فارس مضر
والوعد هاليوم حل ميعاده
......................
6
يا حبيب الله الخلق أرض أو سمه
ميت ألف مبروك مولد فاطمه
أكفوفنه نرفعها نرجى الغانمه
ونته جفك بالعطى جواده
......................
7
ياس وبخور أو شموع أوزينه
أبمولد الزهره أم حسن خلينه
غاليه الزهره أو بنت غالينه
أو هالعشك جدآ بعيده أبعاده
.......................
8
ميت ألف مبروك وبكد هالعدد
للحسن وحسين نوماس الشدد
للوصي حيدر علي نندب مدد
طالب الحاجه ينال أمراده
.......................
خادم أهل البيت
الشاعر : أسماعيل الجوراني
الأربعاء : 3/2/2021

هوسات جنوبيه
لذكرى ولادة سيدة نساء العالمين
فاطمة الزهراء عليها السلام
.....................
اليوم ميلاد الزجيه والمحافل عامره
الشيعه غمرتها السعاده تحيي هاي الظاهره
هذا شايل ورده بيده أو هذا بيده كامره
والحناجر كلها تهتف هلا أبذكرى الطاهره

ها ها

لجل الزهره المرضيه
أبكل جامع وحسينيه
شمع أيضوي أبصينيه

ها ها  ( أو فرحانه)
والشيعه أمعيده أو فرحانه
....................
يا أبو الزهره محمد يا علي حامي الحمه
مية ألف مبروك ألكم ذكرى مولد فاطمه
أحنه أصحاب الحوائج ونتو أهل الغانمه
أبداعت الزهره عليكم بسطو جف المكرمه

ها ها

يهل الكف الجواده
أبجاه الله أو أم الساده
كل طالب حاجه أمراده

ها ها ( من عدكم )
ياخذ بجفوفه من عدكم
.....................
خادم أهل البيت
الشاعر : أسماعيل الجوراني
الثلاثاء : 2/2/2021

حماسيه
لذكرى ولادة
أمير المؤمنين ومولى الموحدين
الأمام علي أبن أبي طالب عليه السلام
..................
علي شايل جمال .. جمع كل الخصال
الكمال العد علي .. ظرب من الخيال
...................
1
علي ليث العرين .. وصي الهادي الأمين
حبل الله المتين .. عماد أهل اليقين

فلا قبله أبد .. ولا بعده أحد
أله الكعبه مهد .. على مر السنين

لكل قيلآ وقال .. جواب الكل سؤال
الكمال العد علي .. ظرب من الخيال
...................
2
فلا جنه أمير .. ينام أعله الحصير
لئن صاحب ظمير .. يموت أعله الفقير

الفقير أويه اليتيم .. علي بيهم يهيم
رغم شانه العظيم .. فلا يلبس حرير

يمد جف الدلال .. يجوع أو خيره ضال
الكمال العد علي  .. ظرب من الخيال
....................
3
علي زوج البتول .. أبن عم الرسول
الى يوم المثول .. غرامه ما يزول

أبنجف وادي السلام .. مثل بيت الحرام
علي كعبة غرام .. رغم كيد العذول

الشمس وقت الزوال .. أنظرب بيها المثال
الكمال العد علي  .. ظرب من الخيال
......................
4
علي أسلامه حنيف .. علي قلبه نظيف
علي طاهر شريف .. علي أيمانه عفيف

علي راعي الشيم .. فلا عابد صنم
علي دوله أوعلم .. هويه الكل ضعيف

أبعذب ماي الزلال .. أبطعم خبز الحلال
الكمال العد علي .. ظرب من الخيال
....................
5
علي فارس مضر .. أبرجب نص الشهر
أله البيت أنشطر .. عله شوف البصر

أبعلو شمس النهار .. العلي أنشق الجدار
أبثواني البيها صار .. علي حج وعتمر

أبضحى أوستر الليال .. علي كله عدال
الكمال العد علي  .. ظرب من الخيال
.....................
6
وليد الكعبه أذن .. ذخر كل المحن
أذا جار الزمن .. نجاتي أمن المحن

علي أمراية علي .. ولي أونعم الولي
فرج كل مبتلي .. أبو حسين أو حسن

سلاحي أبكل سجال .. جوازي أمن الظلال
الكمال العد علي  .. ظرب من الخيال
..................
خادم أهل البيت
الشاعر : أسماعيل الجوراني
الخميس : 25/2/2021

هوسات جنوبيه
لذكرى ولادة أمير المؤمنين ومولى الموحدين الأمام علي عليه السلام
...................
قال رسول الله أبا القاسم محمد عليه وعلى آل بيته أفضل الصلاة وأتم التسليم
( النظر الى وجه علي عباده )
صدق رسول الله
..................
شهاده أمن النبي أو أعظم شهاده
الوجهك يا علي النظره عباده
أو هاي الليله وبذكرى الولاده

ها ها

عيني الصورة مولاها
صدت نظره أو معناها
تعبد خالق دنياها

ها ها  ( شرعيه )
من طاها أكتسبت شرعيه
.................
حكها تتباها أو تعيد شيعته
أنشك جدار الكعبه لمه أو دختله
أو داخل الكعبه الشريفه ولدته

ها ها

ربك عزز مقداره
يوم الحل وكت أصياره
هنياله الهسه الزاره

ها ها ( أبجفينه )
ويكظ شباجه أبجفينه
..................
خادم أهل البيت
الشاعر : أسماعيل الجوراني
الخميس : 25/2/2021

نزله
لذكرى وفاة عقيلة بني هاشم
أم المصائب زينب عليها السلام
.....................
زينب الحوراء عكب أخوانها
ناس غربه الشيعت جثمانها
....................
1
بت أمير الكون نوماس الستر
من بعد درب السبي أو سيل الزجر
ناس غربه الشيعتها للقبر
أو شمتت الشام أو شمت سلطانها
....................
2
زينب أخت حسين محموله أبنعش
و 11 خادم يشيعوها 12
داعي السجاد بظلوعه أرتعش
عمته الحره الغرب دفانها
....................
3
كون أموت أمعززه أبلمت هلي
أحساب غير أحساب حسبة بت علي
ما تت أبديرة غرب ماكو ولي
أو لا أبن بيده يفصل أجفانها
....................
4
سكره بعد السكره ما كطعت أمل
هسه أخوها حسين عباس الكفل
فوكها أيجلون وتجل الأهل
أبنايحه أتسد الشمس تربانها
.....................
5
أمخدرة حيدر علي عقد الوله
من زغرها الحد فجيعة كربله
أبعله بعد العله داعيها أبتله
تشهدلها الكاع وي ظهرانها
.....................
6
أمنالمدينه الكربله الشام الشمت
عام فوكه أشهور بالغربه بقت
لو عدل بعده أبو فاضل والبخت
الشام ما دخلت أبد ديوانها
.......................
7
ها أندفنت بت علي قبل الدفن
هالكثر ما جانت الهاشم حضن
لال هاشم صارت الدنيه سجن
أو رجعت الخربه أورجع سجانها
....................
8
أيتام أخوها حسين ما ألهم وطن
شامت الشامت همس بذنه أو رطن
اليوم علويات وجبت ينسبن
أعلوج أميه أتحومي أبغربانها
....................
9
راهبة آل النبي الطهر الطهور
يدي يبقه أصوابها اليوم النشور
شيعه ألها أتنوح تلطم عالصدور
أو حب عقيلة كربله أبوجدانها
....................
خادم أهل البيت
الشاعر : أسماعيل الجوراني
السبت : 27/2/2021

🚩وداعيه🚩
لذكرى وفاة عقيلة بني هاشم
وفخر المخدرات أم المصائب
زينب عليها السلام
....................
الوداع الوداع يا عقيلة كربله
....................
1
يا فخر كل الهواشم يا وديعة حيدره
يخت الحسين الشهيد أو أخت سبع الكنطره
الليله خدامج بديها أتهيل عالراس الثره
أو تثغب أبصوت النوايح يا بنت عقد الوله
....................
2
والله يالمنه مصابج زينب الحره يمن
لا كفيل أو لا بنين الشال نعشج عالمتن
يا نواة الشيعه حكها الشيعه تنصبلج حزن
او تلطم أبحركه صدرها والمدامع سايله
....................
3
أبدار غربه الغربه صعبه والتموت أبلا أهل
أمصابها أيخلي الخواطر من تون تهدم جبل
وحنه هاليله أجتمعنه با بنت خير العمل
فاتحه أنقيم أو نعزي المهدي فدوه أنروح أله
.....................
4
يا وديعه أو يا شفيعه أو يا رفعيت مستوه
يا عقيلة آل هاشم يا أخت راعي اللوه
ضاكت الليله أبصدرنه والله نسمات الهوه
والمصيبه من ثكلها حسين جنها أو مقتله
.....................
5
هاشميه أمن الولاده أو لاخر أنفاس المات
هاشميه أو ما ثنتج كل مصيبات الحياة
الخدر والعفه صبرك علمنه أعله الثبات
عالولايه الحيدريه مهما داعينه أبتله
.....................
6
يا حبيبة كل موالي أو يا أميرة كل زمن
شوفي خدام المنابر تدفع الحبج ثمن
جم شهيد الطاح منه أغتالته أجفوف الفتن
ونتي خط أحمر يزينب عدنه خصم المسأله
.....................
7
كعبة الشام العزيزه الشام بيج أمعززه
والحلم يهدم ضريحج عن يقين أنفززه
أبقافلة أول جهنم للمنايا أنجهزه
البادي أظلم والدواير باجر أدور أبهله
........................
خادم أهل البيت
الشاعر : أسماعيل الجوراني
الأحد : 28/2/2021

ندبه
لذكرى أستشهاد طبيب بغداد
الأمام موسى أبن جعفر عليه السلام
....................
 يا الله يا محمد يا علي
الكاظم المظلوم بالسم مبتلي
....................
1
مات هذا اليوم للشيعه أمام
موسى أبن جعفر عليه ألف السلام
سمته أبسجنه جلاوزة النظام
أو من عظيم النايبه الموقف جلي
..................
2
صاحب السجده الطويله البالسجن
جبده هذا اليوم بالسم ممتحن
ون علي طير الفضا كد ما يون
فدوته شخصي أو أله فدوه هلي
..................
3
من سجن يتبع سجن كظى العمر
رجله طوك الكيد ناخرها نخر
عفيه صبره أو هالكثر واسع صدر
موقفه أبكل المظالم فيصلي
..................
4
صاحب الذات الأبيه المسلمه
أبنص طوامير السجون المظلمه
أجفوف أديه الطاهره تكطر دمه
أو عزمه بالأيمان بعده الأولي
..................
5
الطاغيه العباسي بالسان أو فعل
من أميه الظالمه وارث نسل
ظيك أعله الكاظم أدروب السبل
أو مقتل الكاظم يبرهن ما يلي
....................
6
نشتكي الظلم العلى الكاظم جره
أبسمه يتلوه على وجه الثره
جبده وذره أو يمها وذره أموذره
أو من لهيب آللام صدره يصطلي
.....................
7
أربع أحماميل من قصر الخلد
أبالون ستر الليل واحدهم عبد
هذا أمام الرافضه أمسمم جبد
للمنادي الصوت لنه يعتلي
....................
8
أربع أحماميل شيالة نعش
صاحبه أبن سويد دلاله أرتعش
أتراب فوك الراس والكاع أفترش
ظل ينادي يا علي أنته الولي
.....................
9
ظل ثلث تيام مرمي عالجسر
والجسر ملغوم حارس كل شبر
الطير ينصاب أبنبل لمن يمر
أو شيعته عن الجسر ما تنجلي
.....................
10
آه وا ويلاه عالصار أو سده
موسى أبن جعفر الشيعه أتشاهده
ما يحرك ساكنه أو جسمه غده
مخملي أبالون الرداء المخملي
....................
خادم أهل البيت
الشاعر : أسماعيل الجوراني
الثلاثاء : 2/3/2021
17/ رجب / 1442

نزله
لذكرى أستشهاد
الأمام المظلوم المسموم
موسى أبن جعفر عليه السلام
......................
على جسر الرصافه أجنازه مطروحه
و ا ثار السموم البيها مفضوحه
.....................
1
أجنازه أعله الجسر والناس ملتمه
زركه أمنالسموم أطرافها أمورمه
جف محصور دمه أو جف نفق دمه

أو رجليها أبسواد أكيود مقروحه
....................
2
أجنازه أبلا عشيره أو لا أهل ليها
تنصب فاتحتها أو تنهضم بيها
من أهل المدينه أنساب راعيها

أو من سادات هاشم شايله أملوحه
....................
3
ألمن هالجنازه أجنازة الكاظم
أو ساعة ما درتها أنهضمت الوادم
شكت ثوبها بين البجى أو لاطم

أو بين الغاب وعيه أو مادره أبروحه
.....................
4
كل شبر أو شبر حراس محروسه
والحاكم زنيم أو مات ناموسه
ما يرضى أبدفنها أجنازته الموسى

و ب حر الشمس خلاها ملفوحه
.....................
5
صاحب هالجنازه موسى بن جعفر
مسموم أبرطب منه الجبد وذر
سلمان أعله راسه يلطم أو يشغر

من كال الطبيب أبنبره مبحوحه
...................
6
يا أهل المدينه أو مكه والكوفه
بغداد أبفجر جمعتها ملهوفه
مولاها المغيب راحت أتشوفه

ما تدري أبمنيه روحه مذبوحه
....................
7
جادر يمه جادر خيمت ناسه
أيام أباليالي أتلاثه محتاسه
منزوعه العكل كلمن حسر راسه

تتمنه النعش بجفوفها أتلوحه
....................
8
وين أبنه الرضا وبنيته معصومه
يا هو ألهم  يوصل نيبة أعلومه
أبوكم روحه فاضت جبده مسمومه

وجفوفه أبسلاسل سجنه مجروحه
...................
9
باب الحاجه وينه الطالب الحاجه
والرايد علاج العلته أعلاجه
وديع الكاظميه اليحضر الناجى

سجل أسمي عندك فدوه بلوحه
..................
10
الراد الغانمه لا يبخل أبحيله
خل يحيي مصاب الكاظم الليله
والخالق محمد والحمه أدخيله

بيبان السماء الليله مفتوحه
..................
خادم أهل البيت
الشاعر : أسماعيل الجوراني
السبت :6/3/2021
21/ رجب / 1442

نزله ( فزاعيه )
لذكرى أستشهاد
الأمام موسى أبن جعفر عليه السلام
......................
موسى أبن الهواشم خيرة الساده
أمشونه أنزور كبره أو نطلب أمراده
.....................
1
سلطان الكرم والعفه والغيره
مثل أبياض وجهه أبسمعه وبسيره
من سادات هاشم كل تعابيره

وارث والمذاهب تحجي بمجاده
......................
2
قديس الهواشم صاحب السجده
كاظم غيظ قلبه أبساعة الشده
جده المصطفى أو حيدر علي جده

والله والنعم من عنده وجداده
.......................
3
كاظم فاطمه الزهراء والزهره
والد لليتامه أو جاسي للفقره
أبديوان المكارم من يمد سفره

ديوان الحسن تتوارد أبعاده
........................
4
أبشخصيته حسيني الذات تربيته
شيخ أشيوخ عام الغانمه أبصيته
من يكعد فريضه أخيوط مزويته

الميزان العداله أتصير شداده
.......................
5
أنعم بالأمام السابع الهيبه
جد يوسف الزهره صاحب الغيبه
كل شيبه أبالحيته حكمه هالشيبه

أحسب حكمته الساعة أستشهاده
.......................
6
أبسجن اللا رشيد أنحجبت أسنينه
أبتسبيحت الزهره أو مذهبه أو دينه
كل لحظه درس للطاعه ينطينه

أبفرض أو مستحب فارشله سجاده
.......................
7
بالصادق يحلفه أبضامن الجنه
كلمن عنده عله الصحنه يتعنه
دكتور العلل من عندك أتمنه

ترجعلي العوافي أو يشفى وزياده
.......................
8
الليله الكاظميه أتصير خيمتهن
بالحضره الفواطم هاي ليلتهن
عالكاظم تون و تنوح و حدتهن

وحنه أويه الفواطم نحيي هالعاده
......................
خادم أهل البيت
الشاعر : أسماعيل الجوراني
الأحد : 7/3/2021
22/ رجب /1442

مولد
لذكرى ولادة قائم آل بيت محمد
الأمام الحجة أبن الحسن
عجل الله فرجه الشريف
...................
الفرح توه حلا
يواهس كربله
ييفياف العفاف
يشيخ المرجله
...................
حليم أمنالمهد
زكي أبخلق أوجسد
أبعلم أهله أنفرد
على غيره أجتهد

ورث من فاطمه
أوعلي حامي الحمه
علم أرض أو سمه
أله القاصي شهد

أبصدر كل معضله
تناظر مسأله
ييفياف العفاف
يشيخ المرجله
. ...................
يسلطان الشجن
يمن وكت المحن
جواز الممتحن
أذا دار الزمن

فرحنه أبمولدك
أجينه أنواعدك
عهد و نجددك
يحجه أبن الحسن

أبصلاة أنهلهله
ابدعاء أنكمله
ييفياف العفاف
يشيخ المرجله
..................
يخل الماله خل
نداوم نبتهل
أبوجودك نحتفل
لجل دولة عدل

العجل ثم العجل
دعاء أوما خمل
يبن خير العمل
أشوكت نورك يهل

الظهور أستعجله
نظرنه كحله
ييفياف العفاف
يشيخ المرجله
..................
محال أمنالبشر
كمر شنهو الكمر
ترس أرض أوبحر
جمال المنتظر

أبيقينه اليثربي
الهمام الطالبي
ورث جده النبي
علم غيب الدهر
 
سليل العايله
أشحلات أشمايله
ييفياف العفاف
يشيخ المرجله
...................
أباليالي أولادته
نراقب رايته
ترف أبيسرته
أوحسامه أبيمنته

ألف حمد أوشكر
أبن فارس بدر
أجه أبراية نصر
وجينه النصرته

جبينه أنقبله
هلا أومية هلا
ييفياف العفاف
يشيخ المرجله
....................
الحبيب الأزلي
الولي وبن الولي
فخر شيعة علي
أمل كل مبتلي

أذا باجر هتف
منادي أمنالنجف
عن المهدي أنكشف
غيابه المعتلي

طلب ثارات أله
دهر مستفحله
ييفياف العفاف
يشيخ المرجله
.....................
خادم أهل البيت
الشاعر : أسماعيل الجوراني
الأحد : 28/3/2021
14/شعبان/1442ه

من وحي التراث
مولد
لذكرى ولادة قائم آل بيت محمد
الأمام
الحجة أبن الحسن
عجل الله فرجه الشريف
.....................
فرحنه واليحبنه يفرح أويانه
فرحنه واليحبنه يفرح أويانه

ميلاد البقيه الحجه وافانه
فرحنه واليحبنه يفرح أويانه

ريانه الوجوه الليلهل  ريانه
فرحنه واليحبنه يفرح أويانه

هنياله اليصلي أبقلبه ولسانه
فرحنه واليحبنه يفرح أويانه

ويعلي التهاني العلي مولانه
فرحنه واليحبنه يفرح أويانه
......................
نوماس الموالي وارث الساده
أبيوم 15 شعبان ميلاده
كالعاده نعود أنتمم العاده
والمهدي أبو صالح  نذكر أمجاده


وتصير المحافل كلها ديوانه
فرحنه واليحبنه يفرح أويانه

وبنعمة سفرته الشيعه شبعانه
فرحنه واليحبنه يفرح أويانه
......................
يا صيت العوافي أبهلت أنواره
جن عمه الحسن لو لاكه خطاره
يتناسه مقامه الساميه أخباره
أو يضحك للفقير أبضحكت أبشاره

من عمه الحسن متعلم أحسانه
فرحنه واليحبنه يفرح أويانه

باسط لليتامه أجفوف ذرعانه
فرحنه واليحبنه يفرح أويانه
.....................
يوسف فاطمه التزهي معانيه
هاليله الحوايج بسمه مكظيه
أبكل جامع أو مسجد كل حسينيه
فتحت فاطمه أوراق شخصيه

ورباب المحافل كلها طمعانه
فرحنه واليحبنه يفرح أويانه

سجلينه يزهره أبزمرة أعوانه
فرحنه واليحبنه يفرح أويانه
....................
هاليله الموالي أمورده أخدوده
عند أم الحسن وحسين مقصوده
يرفع جفه لله أبعوده محموده
أو يارب كل الموالي المحفل أيعوده

يارب الخليقه يدعي لخوانه
فرحنه واليحبنه يفرح أويانه

عيد أعلينه عيده أبدنيه مزدانه
فرحنه واليحبنه يفرح أويانه
.....................
يا أخر محمد يعدل الميله
جند كل موالي الليله ألك حيله
أم شيله تلولي أبطارف الشيله
أو حلال المشاكل طشت أكحيله

أبتعجيل الفرج ظل يلهج ألسانه
فرحنه واليحبنه يفرح أويانه

وحديثة عمر بالدمعه غركانه
فرحنه واليحبنه يفرح أويانه
...................
خادم أهل البيت
الشاعر : أسماعيل الجوراني
الأثنين : 29/3/2021
15/شعبان/1442ه

شوط كربلائي
لذكرى أستشهاد أمير المؤمنين الأمام علي أبن أبي طالب عليه السلام
......................
ياحيدر يبو الحسنين ..جينه أبمأتمك جينه
نلطم عالصدر والراس .. كلمن دمعته أبعينه
.....................
ذبلانه المعاني اليوم .. والمدمع عله الخدين
أبغصه أتشيب الدلال .. ننعى أونعصر الجفين
ونعزي الحسن بالصار .. ونعزي الأمير حسين
ونعزي الكمر عباس
يابو الغيره والنوماس
مأجور أوألف لاباس
وبزينب نشيم الذات .. نشكي أمنالجره أعلينه
........................
أيتامك يبو الشدات .. كلها طايحه أبشده
ونته أمعود الأيتام .. محد منهم أترده
حيدر ياعلي الكرار .. فاكد عاشكك رشده
صايم مافطر عالماي
بخدوده الدمع هماي
يندب ياعلي مولاي
ضربة هامتك بالسيف .. عدمت لذة أسنينه
.......................
ياحامي الدخيل أدخيل .. يدعي لك كلب ولسان
سالم ياعلي أمنالسوء .. حصنك ياعلي القرئان
رمضانك بعد بي روح  .. لتغادر شهر رمضان
أيتام أمجودره أبابك
فقره أمكابله أعتابك
صعبه ياعلي أغيابك
سلانه القهر والنوح .. صد أبنظرتك لينه
........................
حيدر ياأمير الكون .. ناسك حشمت ناسك
ليش أعمامتك عالكاع .. سالم ياعلي راسك
معقوله المرادي أبسيف .. يكتم نبرة أنفاسك
ناسك ياعلي ياحيد
مهضومه أوتعظ الأيد
تسئل والجواب أتريد
لاوين السفر لاوين .. جاوب عن محاجينه
.....................
أذن للفجر مولاي .. صلي أبجامع الكوفه
ناسك تنتظر عالباب .. طولك رايده أتشوفه
محرابك صبح مخنوك .. صوته أوغارك أبخوفه
بيش أيصبر الخدام
الشدت للنعاوي أحزام
أوتلطم عالصدر والهام
وتنادي أبرهيف الصوت .. كوم أحضر تعازينه
.....................
خادم أهل البيت
الشاعر  : أسماعيل الجوراني
الجمعه : 23/5/2019