tgoop.com/sadr_aldin/612
Last Update:
شنهي الشام
من سألوني شنهي الشام
گتلهم...
الما ضايگ سبي لا يحچي بارض الشام
من اتشوف بوابتها ينسد باب آمالك
من توگف ابعتبتها، هنا تتغير احوالك
بآول خطوه من تدخل
الهيبه ودمعتّك تنزل
من اتفوت من گد الحقد والغِل
تاخذ شمرة الهزله وتضل ابمشيّتك تگزل
الايفوتلها شابع حيل، يطلع گاضي واموشل
ما يصلح يطب ليها اللي متعلعل
اتريد الثابتين اجدام
شنهي الشام
اتصبّح دمعتك سلعه، ويشروها بحچي ميلوگ
وانته اليم اسم اهلك تتوضه وتگوله احلوگ
امخاتل من تصب دمعات
(الطفله التبچي تتراضه بطشت موّات)
من اتسولف اويه اهلك، تخّرب السالفه النشغات
امناشغ تنگضي ايامك
واهنا تنمحي احلامك
اهنا من تلتفت للباب وانته ابين ضلّامك
اليندار ابغربته يكسر الخاطر
الايغص من يگول حسين، تكتله اسوالف العاشر
اتعاين وادم ابسبيك
فرحانه وتحط اعله السطوح اعلام
بيض اعلامهم بالشام
شنهي الشام
وتتذكر
سگفك باشطات الساده من اطلعت من بيتك
وبيارغ ضلها يحرس ضلّك امن الشوف، يا صيتّك
چنت كعبة هواشم كلها بيك اتطوف، طوفة شوگ
والساده اعله محمل ناگتك چن طوگ
وگمر يثني ركبته ابصعدتك عل نوگ
تتذكر هذن كلهن ابطبت السوگ
الشام اتفرهد افكارك
بيها اتموت يله اتنام
شنهي الشام
وتبقه اتريد تتذكر
تذكر نضرة العباس، وتعرض خزرة العدوان
تذكر مسحة ايد حسين فوگ اچتافك اتدفيك
وايفزز اوجاعك سوط حاقد چان
تذكر نبرة الاكبر اتريّح سمعك التعبان
وتغافل سمعك الحالم
زمخة شامت وتبچي
هنانه الشام بي بس دمعتك تحچي
يبو جرح المشه بطولك، يل حيران
مامش حايط ايسندك
خرابتهم ابحسرة خوّه تتهدم
يل مجروح تبقه اعله الخناجر دوم متوچي
وتضطر تكتم الوجعه
اتعاين على اطفالك آخ تشبگ آخ
امترب ينكت امترب
فاگد يحس عين الفاگد ابدمعه
ماكو ابراحتك كلشي غصب عنك
وفوگ الضيم حته افكارك اتخليك ما ترتاح بالاحلام
شنهي الشام
.
.
.
صدر الدين
BY صدر الدين
Share with your friend now:
tgoop.com/sadr_aldin/612