ابكل هيبه ذكرك موجود
وابكل ضيج انته المريود... علي العالي

لا سبعه اتلمّك لا گاع
يـ امرجف بالحومه اسباع... علي العالي

رنّة سيفك اتدندل رگب صعبه
تهطر هوه وناس ابساعة الضربه
سيفك والبرق يتوالمن خوّان
واسمك بالمراجل محدّ ايعگبه

خلّاقك راد... زلمه بي يتجله
وشافك رداد... الكل صنم يتعلّه
للدين اسناد... وانته ابوه واهله

(١)

ابكُنهك ما يحچي اله اثنين
طه وربك يا ابو حسين... صعب وصفك

اسمك خلّه الليل انهار
مُشتق من نور الجبار... صعب وصفك

ابكل احوالنه بس انته شاغلنه
ونكتب اسمك ابكلشي يگابلنه
فطرة ربك اعليها فطر خَلقه
اعله نيتنه ونقلّد بالفِعل ربنه

بعرشه وباسماه... خط حروفك ربك
يعني اسمك جاه... ينطي للي ايحبك
والعاف مولاه... اشحاله من ايچهبك

(٢)

القادر والبيده التكوين
وابزود سيفك ضل الدين... دخيل اسمك

من آدم حدّ اخر طين
كلهم بيدك مخلوقين... دخيل اسمك

علي وصُنع الخلائق كلها بچفوفك
علي بس الله يحچي بفضل معروفك
بمعراج الرساله سولفوا باسمك
وابصوتك حچه الله وكعبته اتطوفك

انته القيّوم... الما غِفل عن خلقه
واسمك جيدوم... عل معارك تبقه
والطير والحوم... بيدك امره ورزقه

(٣)

يم چفك تسجد شجعان
سيفك هز ارگاب الجان... شكبر صيتك

وانته امخيف الميخافون
وبيك الله اتباها اعله الكون... شكبر صيتك

عبدوك اللذي شافوا تدابيرك
يطلسم ربك وتصعب تفاسيرك
اتراب اللي تدوسه ايشيخ عل گيعان
بيك اتجلى ربك انته مو غيرك

ملاّچ اگلوب... وگلبي بيك اتغنه
وبيتك مچهوب... وبي اتفوت الجنه
عشگي المهيوب... وماكو اهيّب منّه

(٤)

صدر الدين

طاح ابو الوگفات... وبينه حزنه ايبات
حيدر المهيوب... بالغدر مصيوب

***

ابيت حيدر هل مسه اتزيد النوايح
موش سگف البيت كل البيت رايح
اليوگف ابكل شِدّه ذاك الخيره واضح
ابد مو من عادته اعله الگاع طايح

اچفوفه حب واحزان... وللسمه عمدان
الذكِره يمحي ذنوب... بالغدر مصيوب

(١)

الچان تچوه لدين آلهه وقائم الليل
هسه متوچي اعله ولده او وشل الحيل
المالت الشجعان يمه ابمشيته ايميل
او دمه من اعمامته اعله لحيته ايسيل

ابهامته مطبور... ودمه غيره ايفور
العدّل المعيوب... بالغدر مصيوب
(٢)

اگبال زينب ضل يكابر ما يبيّن
ايگلها ما بيه آلم، هاگد احنين
كلشي هيّن بس بكائچ موش هيّن
صلب بس ادموعچ اتخليني ليّن

اتكسره زينب حيل... ودمعه يبقه ايسيل
وگلبه يبقه ايلوب... بالغدر مصيوب

(٣)

عيونه بيهن هاكثر چلمات صعبه
من يعاين للحسين ايفيض غربه
ساعه لچفوف الكفيل الهم يصبه
ولو نضر زينب يحط ايده اعله گلبه

عيونه تحچي امصاب... كربله واتراب
وممشه چم ادروب... بالغدر مصيوب

(٤)

امودّع الليله الأبو وروحه تسافر
وعايف اعياله يتامه الضيم عاشر
الدنيه كلها اتيتمت كونه يهاجر
وتكسر اضلوع السمه كومة حوافر

راح ابو الأيتام... وزادت الآلام
واشيعوضّه انوب... بالغدر مصيوب

(٥)

صدر الدين

ابليلة البيها نويت اعله الرحيل
ليلة ضلمه وبيها خنگة مگبره
انملخ گلبي وأذكر ازداد العويل
وعينك امحمله حچي وشيفسرّه

اتشوف عيني... اتشم اديني... وروحك اتشوغ وتطيح
گمت اگلك... شماله شكلك... اتغيّر وچنك ذبيح

امناشغ اتسولف يغالي والحچي ما ينفهم
واسمعت جلمة غريبه وگتلك اهنانه الزلم
ذوله اخوتي وما دريت ابكربله راح انصدم

(١)
واذكرت من امنتني عد اخوي
كفو من كافل خواته وغيرتّه
ما تغافل عن خدمتي ابن ابوي
وطوّگ الهودج ابعطره وشيمتّه

حرس گلبي... گبل دربي... وحاشه ما قصّر ابد
لچن بويه... راح اخويه... وضهري ما ضلّه سند

الگال اجيب الماي وارجع، شو خبر موته اجه
وهسه ضعني ضال تايه وللگمر ما احوجه
تعب گلبي امن الامتانه وتعب صوتي امن الرجه

(٢)

شحچي عن ضيم الفلا وحرّ الشموس
والاحسين ايشوف تعبه اعله الأرض
امكشف وعشرة حوافر بي تدوس
اطلابة احسينك چبيره وما تفضّ

الضيم ضيمه... والهضيمه... فوگ شلعان الگلب
حسين وحده... ومنهو عنده... وعينه مغتاضه وتصب

ومات شيخ الضعن وحده والچفن شمس الضهر
ايدير طرفه اعله الخيام وشاف نسوانه تفرّ
آه يا كسرة اخونه ابگلبه وابضلعه الكسر

(٣)
بويه لمن سولفتلي الشام ضيم
واليطبله بلا اخو يشبع قهر
ومن دخلنه الشام انه وجم يتيم
استقبلونه ابفرح يا بويه البشر

وانه وحدي .... وكلهه ضدي ..... والحبل بيدي شصير
والهضيمه .... ماكو شيمه.....مابقت حرمه لجبير

واسمع ايشتمون بينه وبيه شطين البچي
صارو اهل الديره غربه ونگلب بويه الحچي
الماله اخو وحط ابخرابه على ياهي ينتچي


(٤)
وهذا حالي ابلا اهل وابلا كفيل
يا چبير الساده وانعاد الزمن
هسه يلّه اعرفت من دمعك يسيل
وافهمت حچي الامناشغ عل ضعن

بويه بنتك... ابلا يمنتك... يلزم ابچفها الحبل
الضيم كاسر.... بالخواطر... وطشروا ذاك الشمل

ضيم زينب يا ابو زينب عابر احدود الدمع
الغربه من تلفي العزيزه اتموّت الحدر الضلع
الهوّه بالغربه يبويه من اشمّه انوجع

(٥)

صدر الدين

كل عام وانتم تحت خيمة صاحب الزمان صلوات الله عليه . كل عام وانتم موالين لمولاي امير المؤمنين ثبتنا الله وايامكم على ولايته ونُصرة اولاده ،والبرائة من اعدائه ، متمنين لكم صيام واعمالاً مقبوله ان شاء الله وكُثرة الدموع والآلام على مصائب آل بيت النبوه صلوات الله عليهم اجمعين .

خادمكم الاقل صدر الدين

عبد الحسن سيف البهادلي
(كل الفضل لسيدي ابا الفضل ❤️)
خدمة لخدام مولاي الحسين الحساب الشخصي لطلب اللحن او اي استفسار @S1_4F
077 15292219
https://www.tgoop.com/saif_hifad

ابدي بيك النيّه لنّك... منبع الكل نيّه
وابحر ابحبك واونّك... مدري اوّن اعليّه
انته مو ذاكه اللي اسمك... مرسه گلب التايه
يعني ضيعاتي امن احزنك... هذا درب الجيّه

انته يا اعجوبة الحنيّه انته
الحب لوّن يتطعم ابنوح اشملذته
حزنك ابگلب العبيد اشلون راهم
ضيم بس ايفرح المضيوم شفته

يلّي مثلك ما لگيت... موت بس بيك احتييت
وانته بس حبك كفيل... يخلي من الصاحي ميت
تفهم ابدمعي دريت... وابلغة دمعي حچيت

(١)

حچاية الحب بيها چم سر... واحچي بس تفسيري
اعتذر مدري ابقه اشكر... مدري ابث تقصيري
بلوني احبك وابطباعي... وما اغير اسلوبي
ما احب بگلب غيري... هذا كل تبريري

ليش اتاني اليبچي بيك بكل جروحه
ليش ما مثله احب حزنك وانوحه
كافي صار سنين اتاني اتعلم ابچي
خوب اعلم گلبي يبچي اعله طموحه

اليطمح اشفاده الطموح... لازم اتكتله الجروح
يتعب العشگه ويشوف... بجسمه ما ضلتله روح
ويسهر بگلبه الجريح... وعطر دمعه يضل يفوح

(٢)

اسمك ايبچي الزچيه... ليش ميبچيني
وليش اتاني الاعوجيه... حته ازيد اونيني
بيك كومه اجروح اشوفن... ليش اركز بواحد
انتظر چلمة (سبيه)... حته تهمل عيني

لازم يبچيني اسمك حته اخدمك
ولازم اتبلل ادب واگدر ارسمك
تدري بالبيك اختك وما صاحت افزع
وهيه اخيتك ما امحشمه ليش احشمك

احچي بلسان الخدر... بكيفي اوزع بالجمر
بسترك امشي بهل حياة... ما اعرف معنى الستر
امن احچي بيهن والله كون... الساني ينگص وانكسر

(٣)

ابحزني بس يمك اچودر... ما اريدن غَيره
ما اريد انضر خيامك... وبيك اشوف الحيره
الـ الله غطاها بضلاله... المن ضوّه مخلوقه
شلون ضل الها يبيّن... هنا تبّان الغيره

ترهم اشلون اللي سلمان بمقامه
ما گدر ينضر خيال الها، بكلامه
اني اسولف عن خدرها وعن سترها
وهيه صارت ام كفيل واخت امامه

الزلمه يبچي اعله الزلم... وگلبه بالطف ينهجم
وهوّه بس سهمك اشوف... ردم گاع الله ردم
ابچي للحدّ الـ ألي... عندي مرضاك المهم

(٤)
صدر الدين

يا مولانا الجواد

حچيتك وفاح العطر... يمعبد اجروح الخدر
اشوفه بوابة جمر... ذكرك اذا مرني

جمالك ابگلبي ركد... والخدمه انته الها سند
يواحد وماكو بعد... اسمه مدد حزني

گلبي حچه
واتفهمه وتعرف بالجواب
چيف انته لمحرمنه باب
وحگ شاب ايصير اعله الشباب

با جرحي البل عشگ يتچوّه
لليعثر شفته ذكرك تچوه
انطيني غيره يا ابو الغيره
وخليني بالوجع اتلوّه

شبابي فده الشبابك يبن الرضا
(١)

عمري بمحبتك لو گضه... ولو بالحزن گلبي حظه
هذا فضل ابن الرضا... اصيحن واشكر

شكري لجميلك من اون... واجيلك ابطرگ الحزن
حنية الله ومن تحن... تنطي حزن يثمر

بيك الدمع
لمصاب الزهره والجنين
وتنور الغيره للحسين
يعني انته كل اصل الونين

هوه انته بابي حته ارضي الله
ولعيونك گلبي بالحب صله
ارزقني الدمعه الاتهز اگلوب
هل گرّب حزن ابو عبدالله

شبابي فده الشبابك يبن الرضا

(٢)
مغلوب اجيتك بالعشگ... مخدوع ما اميز الصدگ
ولگيتك اتدلي اليدگ... وتعلمه عل جرح

سمعتك وكلي يقين... تحچي ابربح كل السنين
فروا الى جدي الحسين... بس السبط ربح

كل البشر
ما بيهم حنية الذبيح
اقدس حب الحب الجريح
حب حسينك هوه الصحيح

گض ايدي وللصدگ وديني
ديني انته وحاشه اترك ديني
مرضاتك هاي كل غاياتي
وحب جرحك هذا ربح اسنيني

شبابي فده الشبابك يبن الرضا

(٣)
بديت اشوفك وانكسر... الشبابك اسنيني نذر
بمصابك ابچي وانعصر... واونّك بآلم

ذكرتك وصوتي عِلّه... واحشّم بكل الملا
هُنا محرم كربله... ومصايب الخيم

انته الاصل
للدمعه التنزل يالجواد
ابچيكم واعلن عن حداد
دمعي الكم متحدّه بلاد

يا دمعه تكفي قدر امصابك
وانته التبچي الزچيه ابابك
خليني بحزني يمك گاعد
مملوكك واسجد اعله اعتابك

شبابي فده الشبابك يبن الرضا
(٤)

واتعمقت بيك وشفت... من عاشر الحد الطشت
وامصايب أطفال وأخت... صاحت يخويه انهض

شفتك تنوح اعله الوگع... واخته على التل وسمع
صاحتله وابحيله ارتفع... بس طاح واترضرض

كل الجره
بالعاشر واسموم السبي
هز گلبك حچيي الأجنبي
يا هضمة ذرية النبي

بالتاسع كلها چانت يمّه
أخوانه والربع ملتمه
وضهرية عاشر احسين اوحيد
ومن نزفه يصيح فاطم يمه

شبابي فده الشبابك يبن الرضا

(٥)

صدر الدين

قصائد شهر الاحزان محرم الحرام ⬇️

شفتك ابطفنه يغالي... گمر غابش عل ليالي
اطبگه براحه جفنّك... فراغك سَدّه ابنك

**
اسمك ابطف الحزن... شفته كاشخ عل لسن
يالحسن ابنك القاسم شال حملك

أنّه أمّه وتيهيت... انته لو ابني شفت
كفو من الموش طبعك شال كلّك

هَندميتّه وگتله روح ولا تردلي
وصعبه من احچيها بس چنك تگلّي
هذا انّه وحته ضلّه چنه ضلّي

حَسنين امودّعه كلفه... يا چبير الساده وسفه
بعد ليزيد حزنك... فراغك سَدّه ابنك

(١)

طلّع من الخيمه ضيّ... وگمت احسّن ماكو فيّ
چنها شمس الله عليّه صبت اسموم

استأذن اربات الأدب... من عمامه وغيضه شبّ
وابوجه لحسين بيّن رسم الاهموم

انكسر گلب الاحسين ابهل مواقف
وگلب عينه بقه بدمع الحيره نازف
گمت احسّه صورتك باوليدي شايف

مدري منّه اشلون طلعت... كلمة( اذهب) گلبه شلعت
او ونّه مثل ونّك... فراغك سَدّه ابنك

(٢)

برزّ بس لمّن برز... گلبي من الخوفه فزّ
بس شفت ابنك رفع راسي وخيامي

والنعِم منه السبع... بالحرب ما ينجرع
وانه اباوع لن صدف موقف امامي

وهوّه جاي ايقاتل وكلها تشاهد
انگطع شسعه وشفت ذيچ المشاهد
دنگ ابنّك، لنّ اجاه السيف حاقد

وردة الخيمات ذبلت... يالحسن والروح زهگت
وصحت اسم الله چنك... فراغك سَدّه ابنك

(٣)

اتوذّر وشنهي الجرّه... بچّه گلب اعظم مره
امك ام الحسن شفت اتوّن على ابني

وراحت احيود الزلم... الهواشم والنعِم
جابت ابني وللخيم طببو حزني

شفت چبده مثل چبدك هم توذّر
ومن شفت خدّه صحت الله اكبر
الترف ليش ابترب نايم وبالحر

يا دمع ما مثلّه يجري... ابنك الذبّلّي عمري
مات البقه منك... فراغك سَدّه ابنك

(٤)

استفردّت بالجثه وحدّي... والدمع ما عاف خدّي
وگتله يا روح امك اشسويت بامك

يالمبيّض چم وجه... هسه ألمن أتجّه
چنت من اتنام يم گلبي اضمّك

هسه ما نايم اوليدي شفته گاضي
وگتله يالطيّب عليك اگليبي راضي
ارفعت راسي بس نزل دمعي بأراضي

انعم الله اعله الجرالي... الغالي رايد دمع غالي
وخلّص هل حچي عنّك... فراغك سَدّه ابنك

(٥)

صدر الدين

بدرب الحزن
تحچي شيوخ اربات البخت... عن طفله ما اجت
والمدمع بالحچي مجره ويصب... تحچي شيوخ اربات البخت

والكافل سولف دمع
والصعب... حسين اشگد انكسر
والصعب... شاف ادموع الگمر
والصعب... ابعبره اختنگ وقهر... والصعب

دمعة وفه... ابكل عاطفه... صبها ابو فاضل
وبده الحچي... بعبره وبچي... والحزن واصل
اشرس زلم... تبچي وتهمّ... ويفهم العاقل

عليلتنه... عليلتنه
(١)

حچه الحنين
عن العزيزه الضلت تصيح... گلبي بقه جريح
والكافل ضل يحس دمعه بأديه... عن العزيزه الضلت تصيح

والمقتل چَنّه انقره
يا حسين... موحش شفت الضعن
يا حسين... ما چن نسوان اجن
يا حسين... احنينتنه ابلا وطن... ياحسين

اذكر بقت... تبچي ونخّت... بلكت يجوني
گلبي انشلع... ودمعي وگع... وخلصت اعيوني
لمن بچت... واعليه اجت... گالت اخذوني

عليلتنه... عليلتنه

(٢)

گضّه الحسين
من شاف ابو الفضل يبچي حنان... عل ما ضل الها أمان
گلّاله اتذكرت لمّن بقت... من شاف ابو الفضل يبچي حنان

گلاله ودمعه يهلّ
ردت اموت... من شبگتني وبچت
ردت اموت... من سكتت ما حچت
ردت اموت... واصرخ يهل البخت... ردت اموت

اذهب أبي... لدرب السبي... وشفت المدامع
ابقه تگول... بيت الرسول... هم يغدي ضايع
وحرت وبچيت... مدري شحچيت... ضليت اطالع

عليلتنه... عليلتنه

(٣)

گله الكفيل
يا شيخ العايله ضل الحزن... يمها ايبلل ردن
والعدها مثلك أب ما اضن... يا شيخ العايله اتعوف الحزن

يحسين افراگك صعب
ماكو حيل... باللي ايتركك صعب
ماكو حيل... يعيش ابيته الغرب
ماكو حيل... اليترك مثلك گلب... ماكو حيل

اضن تموت... وبلايه صوت... ونّها يهدها
مو انته فيّ... واعليها ميّ... يل نشّفتها
هيه الآلم... بيها حلم... وخلّص وكتها

عليلتنه... عليلتنه

(٤)

ضل الحسين
يتذكر بالبقت تبچي وتنوح... وعطّر الدمعه تفوح
ياكل بيها المرض والوداع... يتذكر بالبقت تبچي وتنوح

ضّلت بس دمعه وجسد
والفراغ... ياهو ايسدّه بقت
والفراغ... ومنها كلها مشت
والفراغ... مِنّه ابنيتي گضت... والفراغ

امر الحميد... هيچي يريد... شنهو بأديّه
ما ردت اعوف... ببنيتي خوف... اتعزّ عليّه
بس هيچي صار... وصار القرار... تمشي رقيه

عليلتنه... عليلتنه

(٥)

صدر الدين