اوجاع الخَدم
على اندثار قبر أمهم
.
.
.
هاضمنه... وقاهرنه
كل مجلس... تحضرنه... آه
بذكراها... نتمنه
للمرقد... نتعنه... آه

**

زهرة عزانه... ومصدر بكانه
تحضر كل يوم والمهضوم تبچي وياه

فيّها غمرنه... وبيها انكسرنه
الثكله ابيا حيل تمشي ابليل وي الآه

احزام الخدّام اتشدّه... چا يمته وتگضي الشِده
وعلگ الدمعات انمدّه... وانشده ابنوح

وانجازي احسان الجتنه... وابفي مجلس گعدتنه
وانسيرلها ابونتنه... وانعيش اجروح

چا يمته... وتتحقق
هل رؤيه... وتتصدّق... آه
اتداويها... هل ونّه
وللمرقد... نتعنه... آه

(١)

بليل المشاعر... ليها نسافر
وناخذ دمعات طاحن فوگ باب احسين

ريحة ابنها... تكحّل جفنها
وبلكت واتصير وتفرح من بعد سنين

احساس اليتراوالي... امن انروح الـ ام الغالي
ونلفيها ابيرغ عالي... مطرز دمعات

هلا باولادي الوفايه... نروح ابموكب مشايه
وقبر الزهراء الغايه... سرّ الآهات

مريوده... هل حاله
للحزنه... يبراله... آه
حگ نبچي... يم امنه
وللمرقد... نتعنه... آه

(٢)

علّة خلقنه... وتملك دمعنه
وتملك ارواح هل خدام والها الراي

صافي حليبه... الاصبح نصيبه
لام العطشان والعطشان يبچي اهواي

جربة احزان الزهره... نمليها ادموع الفطره
وادموع الهَم منكسره... واتطخ بالگاع

ما ضلت قيمه لكلشي... أتميّز يمها برمشي
لو متبلل للتمشي... ومكسورة اضلاع

ليليه... نلگاها
تحمينه... بطرواها... آه
مكسوره... وتجبرنه
وللمرقد... نتعنه... آه

(٣)

العصرو ضلعها... يقهر وضعها
تلطم لحسين يلچم حيل ضلع الويل

امنّه نحيله... مشية عليله
اباب العزيات الها امچان تلطم حيل

مثل( الدُملج) ساعِدها... منهو البينه ايساعدها
وايگر عين الوالدها... ويموت بآه

علويه وام علويه... انگطعت منها الترچيه
واعبايتها المچويه... تصرخ ويلآه

بدمعتنه... انواسيها
ألچتفوا... واليها... آه
والصعبه... التوجعنه
للمرقد... نتعنه... آه

(٤)

الثاني الدفعها... هيّج وجعها
ومن هل اصواب گام يفوح عطر احزان

وگمنه بهضمنه... انسوي بگلبنه
گبر ام حسين وبيها ايطوف هل وجدان

نبني المرقد بالدمعه... العاشگ يرتاح بوضعه
من يكسر لجلچ ضلعه... ويترك نيشان

حد ما يضهر مهدينه... بالمجلس لو جيتينه
نبچي الجرحچ خلينه... مو ايً كان

يا سرنه... الما طالع
سر ينحب... ما سامع... اه
بارضاتچ...لو فزنه
للمرقد... نتعنه... آه

(٥)

صدر الدين

آماه كلميني... أنا عَزيزُكِ الحُسين

****
بده يومي وگلبي يرجف
وترِّف عيني وجرحي ينزف...گلت الله اليستر

صبّحت بيچ وصباحي
چان بي ريحة جراحي... والهوه لونه احمر

شعري بچفوفچ امشطه
والحزن ليغاد احطّه... حزني يمچ يزغر

بس هل يوم اشوف... مختلفه الضروف
اچفوف امن البكاء... عل رگبه تطوف

بدلتي ثوبي باطيب ثياب... يمه
وعطرّتي ريتي بعطر المصاب... يمه
منها واحسّ ضليت باصواب... يمه

(١)
ويّ حَسنّه چنت اتاني
وخلّصت ذيچ الثواني... ورحنه وي الوالد

والضهر خيّم واشوفه
ضهر مَطّلي ابلون خوفه... ودمعه بالهم زايد

بمسجدّه من ضلّ ابونه
احنه اجينه يل حنونه... وكلشي ننضر بايد

وادخلنه الديار... بي طافي النهار
ويا فضه نگول... والحيره قرار

صبّت غدانه وهذا ميصير... وينچ
اتعودنه بايدچ ينمد الخير... وينچ
مو وقت نومچ هل وقت غير... وينچ

(٢)

ادخلنه للحجره ولگينه
الخير رايح من ادينه... والحزن متبدي

جوه رجلين القداسه
گلبي حس بانخلاسه... والفگد ضل يبدي

الورده تنكض من رجلها
اشبگت رجلچ واصفنلها... وبيّه ضلعچ يحدّي

گوميلي اصيح... ياْم گلب الجريح
هذا انه العزيز... شو چني ذبيح

ادري عليچ ادموعي صعبات... گومي
يل ما مخليه ابگلبي لچمات... گومي
ابداعتهن اضلوعي الغريبات... گومي

(٣)

امن انكسر چن كسر فضّه
الضيم بالبيت ايتشضّى... ضلعچ اصل الدمعه

اهنانه يل غرّبتي ردّي
الدمّع غرّگ وادي زندي... وبيتچ انهدّ ضلعه

يا مغيسل يا مگابر
بالچفن ملفوف حاير ... الورد مو من طبعه

يمراية امان... يا كحل الحنان
يا تچوة علي... ردي الهل مكان

ردّي الحزن شگ گلب الحسين... ردّي
متعوّد امشي ابگلبچ اسنين... ردّي
هسه ابجنازه وحالي مو زين... ردّي

(٤)

اثغب ومن المصيبه
شلتي ايدچ يل حبيبه... وبالحضن خذتينه

اموادع الشبّگه علامه
يعني ما ارد بالسلامه... ابحضنچ اتحاچينه

شلون بينه او وين نمشي
والدمع هد حيل رمشي... وحيدر اتشوفينه

شلون ابگلبه كون... يتفطّر شجون
ايكتله الضيم اذا... ينعاف الحنون

عفتي وعفتينه يتاماچ... ضعنه
الوادم حچت( راحت حرامات) ... ضعنه
چا هل عمر يخلص معاناة... هضمه

(٥)

للشاعر
صدر الدين

يا ملجئ الحيارى
يا أم الوجود
.
.
.

من احير... گلبي الحظرتچ ياخذ مهبّ
وليچ ادير... بالي يـ أم صارت لاعظم آب
ما يصير... بس عندچ اصبح هذا اللقب

أم الرسول... بيدچ قبول
كل القلوب وانتي الها بير
بيچ الضياء... چوّه السماء
وچفچ عطاء الله المملي خير

يا ركن الله اليؤي الخدام
ايامچ ننطرها ابكل عام
بيها انميّز الصدگي امن اوهام

ردت الدمعي عون... يـ أم ذِكر الحنون
(١)

يا عطاء... اليغمرني من اندب خاطرچ
والوفاء... لمّن اهيم ابحب منبرچ
الله شاء... ايخط الولايه ابمي كوثرچ

كوثر حياة... وبيه النجاة
واليلفظ اسمچ يلگه الخلود
انتي الاساس... والديني ساس
أو الله يسميچ ام الوجود

اليتلفظ اسمچ لو بالحوت
هم الله اينجي من الموت
يل اسمچ صحّى البل تابوت

وايكحل العيون... يـ أم ذِكر الحنون
(٢)

فاطِمّه... ابفاتحتچ الله ايعزّب عطف
يا سمه... وغيمچ حنان ايزخّ ولطف
والعِمّه... يفتح عيونه ابحبچ وصف

يا معجزات... بگد الصفات
ألصابِره، الأُم، الراضيّه
نوره الاله... علمٌ وجاه
يلگه اللذي اينادي العاليّه

يغبط باب الجنّه ابابچ
بس باخر ايام اعتابچ
ما اضنه ايغبطه اعله الصابچ

وسرّ دمعچ يكون... يـ أم ذِكر الحنون
(٣)

بيچ اشوف... اسم الله الاعظم يا سر علي
واليطوف... يم گبرچ الله ايسمي ولي
ما يروف... كسرچ لطمنه ولا دمعه اليّ

كسرچ چبير... بگد الأمير
مهضومه ام الدنيه اشعجب
بيدچ يسير... شفنه المصير
واترابچ ايهد حيل الذهب

كل هاي الاوصاف الترهب
شفناها اعله الگاع وتندب
يا فضه اتصيح ابدم يسچب

ويتعالى الشجون... يـ أم ذِكر الحنون

(٤)

ماكو نوح... يكفي المصيبه وماكو جزع
يا جروح... تكفي وعليچ الباب اندفع
تبقه روح؟ ... ومحسن اشوفه ابابچ وگع

تطلعلي روح... گد ما انوح
حته اوفّي حگ الربّه
يا امي ليش... حزنچ يعيش
والدنيّه يم ذكرچ مِتربّه

روحي ازهگها ابذكر اضلوعچ
وافنّي ايامي الذيچ ادموعچ
واحرگ ليلي الحرگ اشموعچ

يرهملي الجنون... يـ أم ذِكر الحنون

(٥)

صدر الدين

جعفر صادق الساعدي
اني مو مگداري خادم
راحه ما طحت اعله تعبك

انه واحد راد حبك 💔






@jafar1995s
https://www.tgoop.com/jafar_1995s

ألى مَن فاضت روحها الطاهره بكل نفس تشهقهُ بعدَ الطف
.
.
.
آنّه الماتت ابگد ما بچت هَم
اجيت اشكيلكم يا حصة الدمّ
طلعت روحي اذكر يا اخوتي
من گالوا اطلعي امن المخيم

ركضت ابهيمه... جيش وهدّ يخوتي واشيوگفه
تركت الخيمه... اجيكم ردت بس ياهوه الاعرفه
طغى لون الدم... وچفافيكم الخضره حمره صارت
ومنو البي شيمه... كلها اجناب يمي وهاي كلفه

هاي الموته الاولى البيها گلبي شفته فرفح
واحرگوا ابيوتهم هدالي حيلي الشفته صيّح
اجيتك ثكله شفتك يل چنت تعجب، امجرح

(١)
خشنه احبالهم بالچف وسافه
يل ربيتوا اختكم عل ترافه
امن الضيم اصعدت عل ناگه ذيچه
وألّا حيلي گاضي يا حسافه

صعدت الهزله... وشفت اجسادكم والشوگ جرني
متت مو عدله... اريد انزل وماكو اليفتهمني
صحت عل ناگه... دنزليني الشمس اكلت جسدهم
مهي مو سهله... اذا انزل منوّه اليصعدني

يعتني الشوگ منانه وحبلهم يعتّ منا
حنين اخواني هاي اني وجروحي ابگاع شفنا
واگل لجروحي هذا الما تركنه اشلون عفناه

(٢)
احاچيك ابدمعتي التوها نزلت
الك اختك يبو اليمه تعنّت
اتلگاها ابشبگتك يا سترها
الما ترضه اعله زعلي شو اختلفت

الزعل هم هيّن... هضموني يخويه او وحدي يمهم
ولا اكو احنين... الاصير ابسدّه وايسكت لسنهم
بقيت الوحدي... والهيمه چبيره وكلهم اجناب
يخويه امبين... من فوگ اللثام انضر ضحكهم

تجرح هيبي خفة المشيه وهاي متلوگ
ما بيه اركض وركضني ليك ابلهفتي الشوگ
من اعيالك الوادم يخويه سلبت احگوگ


(٣)
على ريحة الخوه جيت ادورك
اندليتك منو الگال اني اعبرك
اچودر يمك وما ودّي اعوفك
امعود گلبي من يغفه اعله كترك

الوفه جاباني... وغطيت الجسد خويه بعباتي
الفجع صاباني... شصاير بيك يا روحي وحياتي
جرح شو صاير... امغطيك الدمه وفوگ الدمه اتراب
الصدگ اذاني... بيك احتار، احتار بخواتي

عليك اسهامهم صارت ضلال امن الشمس ويل
الجرح يتضمد ابوصله، اشعجب متضمد ابخيل
واملفلفه اجروحك بالشمس واتگطع الحيل

(٤)


صدر الدين

متى تتحقق الأمنيه
.
.
.
گالوا شتريد... شو تبچي
واني اعله الآه... متوچي
هوه المشتاگ... ما يحچي... السكته مصيبه

بگلبي شكم ويل... چم دمعه
وگلبي اعله النوح... ذل ضلعه
لا ما تنشاف... هل الوجعه... وروحي غريبه

بدفتر طموحاتي اكتبت عباره
كل عمري خلص منتظر زياره
عايش على الله وشوفة المناره

يا مرقد الدلال
گالوا تطبله وگلبك اتچتفه الحبال
وجروحك اتصعدهن اعله الجِمال
يم مرقد الدلال

(١)

اتمرّ الأيام... واتناسه
وگلبي ايعت بي... احساسه
ويستاحش دوم... يم ناسه... وشافچ سبيله

و(رجب) ايمر آخ... لو مرني
ايعتّ الدلّال... وايهزني
رايد چم حيل... هالكني... شهر العقيله

واليوم يبقه چن سنه اذا مرّ
وطاري الزياره يم جفوني يفتر
والخدم عقدت نيه واتحظّر

وانترست الرحال
واني انضر ودمعي على الرمال
ابگلبي تحزّ ما گلتي الي تعال
چا يمته اشد رحال

(٢)

هزاني الشوگ... والوانه
ها يل تدرين... باحزانه
اشگد رايد حيل... لمتانه... ايشلّع النواضر

وشفتچ بالشام... حيرانه
وروحچ لاخوان... لهفانه
(علگ) امن حسين... جبت انه... ايهز المشاعر

بس سهلي امري وخل اجي لضريحچ
مو( يل غريبه) (يا اميره) اصيحچ
وجايب عطر من منحره لذبيحچ

چن مسبي اطب واحير
وبالمسبي انتي اعلم شنو اليصير
رايد اواسي جرحچ الچبير
چن مسبي اطب واحير

(٣)

يل بيچ ادموع... ما تنشف
من باب الشام... حد الچف
تبچين اعيون... تتوصف...عين اشعضمها

شوداچ اهناك... للغربه
مو ناسچ ذيچ... هم صعبه
هنانه الخدام... للگبه... تزهگ نضرها

درب السبي ما ينحمل عذابه
وشلون بالفرشت ترب خرابه
هذا الحچي الما ينحمل مصابه

شجابچ على الهزل
بچفچ تلوگ ايد الگمر لا مو حبل
ودربچ ورد يُنثر وجب وانتي الاصل
شجابچ على الهزل

(٤)

صدر الدين

عليه گرب الموت... بعد... ولا... الي طاگه
واجتي ساعه البين... هلي...تراني مشتاكه
اكولن بلكت احلام... يرد ...الي... تعب حيلي
لجمني فراگ الحسين... ضلام... الي... صفه فراگه

الدمع دوم اعله الخدود... طايح
وحيلي الليله عالكاع... طايح
اذا شيعت حيود... هاشم
نعشي يبقى عالگاع... طايح

آه... من گلب متعوبه
آه...من غربه مرعوبه
آه... يشام ودروبه

(١)
كلاني سَمّ الافراگ... وجرّه...آلم... تره بدمي
واصيح وگلبي مشتاگ... تعال... تعال... يبعد امي
اتّلّفت يمنه وايسار... اريد... اشوف... رسم طولك
گضه مشوار الاسواگ... وخلص... العمر... ومنو اليمي

منو الينشد على ام عون... ماتت
گضاها شوف الاعيون... ماتت
يبو چفوف التنثّ ماي... وينك
الجنازه بعازة امتون... ماتت

آه... يا اخوتي شيعوني
آه... وبگبري احضروني
آه... يل وحدي عفتوني

(٢)

الجنازه ابعازة امتون... ردت... چَتّف... كفو منكم
الغرب مو حلوه يمشون... بنعش... اخت... ربت عدكم
صحت حيهم ولا گام... الي... اخو... وأنّه بغربه
وتره السجاد محزون... مريض... اسير... وأنّه اندبكم

ردت تعله الندائات... راحت
وثغيب ايبچي الاموات... راحت
حنينة بيت ابو حسين... راحت
ابغرب والناس شمات... راحت

آه... بلا بيرغ وصايح
آه... هذا النعش رايح
آه... وبُعد الاهل جارح

(٣)


سنه ونص من الاهات... كضت... هضم... بجي وغربه
اعله ابو الباقر ثگيلات... السبي... الحجي... زرف گلبه
صعب من هاشمي يشوف... ضعن... علي... حداه شامت
وعلى اسماع العفيافات... صعب... يمر... شتم صعبه

كل هضمه صحت اه... خويه
ضعنك بلغرب تاه... خويه
اليفارگ عين الحسين... گلي
يصير شلون ممشاه... خويه


آه... هذا السبي الثاني
آه... ياگلبي اليتاني
آه... لحگوني يخواني

(٤)

واثق نزار
صدر الدين

ضعن الكلّه غيره... ناوي اعله المسيره
امحمّل جمال وشوگ... والساده اتحدي بالنوگ
بضعنك يا حسين

*

التمت الساده التترس الشوف
والكافل اعله انياگها ايطوف... ذابح الخوف

وتسمع الحيهم ها يلولاد
بلسان ذاك الچلمته اضماد... حسين معروف

ما شايف يا عالم... گمر اليثني اركبته
وتصعد شمس اعليها... ابعرش العزّ حط اخته
وصعدت ذاك الهودج... يا ستره ويا بخته

هايه ام اخوها... البل عزّ دللوها
الكافل عل هوادج طوگ... والساده اتحدي بالنوگ
ضعنك يا حسين

(١)

صَفّن بيارغ كلهن ابخات
بيهن الغيم ايلوذ وايبات... بدفو الساده

انرفعن صوارم لو امرايات
وفوگ الاخدور اتگول خيمات... اسيوف قاده

يا هيبة طلعتهم... اثگال شلون احچيهم
من غيرتهم مالت... حته الگاع البيهم
هاشم يل ما سامع... بيهم وبساقيهم

التمّت هل هواشم... يم ركب الفواطم
ليهم كل جمال ايلوگ... والساده اتحدي بالنوگ
بضعنك يا حسين

(٢)

المتريّس اعله الضعن مولاي
ملك الحجاز وصاحب الراي... هذا الحسين

والحامي ابو ريشات الاطوال
يحركن هوه الله ايمين واشمال... للضعن عين

وبسم الباري اتحرّك... ضعن اليعجب شوفه
ما ضل شي ما دنگ... الكافل شال اچفوفه
متوجّه ضعن الله... من بيته اعله الكوفه

چم مرسال اجاله... أَقبل للعداله
بس انته الترد لحگوگ... والساده اتحدي بالنوگ
بضعنك يا حسين

(٣)

توّهم مشوا واطلعت ورده
تنادي هلي يهل المودّه... وين تمشون

ملخت دليلي الـ (ضلي بالبيت)
يعزاز گلبي اشگد تمنيت... اشبگ ام عون

الحرّ راح اتشيلونه... چا بتكم موش اوله
راح اتشيّب حيره... الچانت يمكم طفله
عِدّوني اعله الموته...ابروحتكم مو عدله

غالي غالي رحتوا... وروحي مني اخذتوا
گلب البتّ يضل مخنوگ... والساده اتحدي بالنوگ
بضعنك يا حسين

(٤)

ماشين صوب الموت ماشين
وبالگلب خليتوا النياشين... صوب ذباح

كل صدر حافر ناطره اهناك
وزينب يهدها احسين فرگاك... موش الاجراح

النحره اتبوسه الزهره... راح السيف ايحضنه
والچفه ايوازي الماي... يغفه الموت ابجفنه
والصوته ايخوف الناس... راح ايموت ابونّه

تگضي الساده كلها... واليثگل حملها
اتحدّب تگول اعثوگ... والساده اتحدي بالنوگ
بضعنك يا حسين

(٥)

صدر الدين

ابمعانيي حچيت الحب... 🖤

النعشها ابعازة اچتاف... واسمها صار مسبيه
ياهو السوّه بالشام... لام عون اربعينيه
انجمعت غربة الدنيه ابگبرها

***

اشعدها الغربه وي بنت السلاطين
ما كفتّها لمّن عافت احسين
لحگتها بسبيها وبچّت العين
وما عافتها حته ابجيّة البين

الجنازه ابلا اخو ينادي... ويعاين عل نعش حادي
بس ها عل اقل شفنه علي السجاد حاضر

چا شيوصف الحاله... گبر وادموعه هماله
تنادي باربعينيتي گبري يكسر الخاطر

غريبه حته بالموت... وبعد الموت هم غربه
عليها تبچي الالحود... يقصة زينب الصعبه
هاي اليحچي عرش الله بسترها
انجمعت غربة الدنيه ابگبرها
(١)

ابگبرها وما ارتاحت ضلت اتنوح
رادت ذاك اخوها وعطره الايفوح
تِذّكر من على الناگه وبلا روح
سوّت اربعين الاخو المذبوح

اجته ورادت ايمرها... تطلبه ابديَن يحضرها
هلكتّ زينب الـ وينك يا راحة اخيتك

يل امنسيني كل ولدي... غير اعيونك اشعندي
تنسيني البچي والضيم حسين هنانه جَيتّك

تِنسّي امتوني الاسياط... ايدك من تحس متني
وتطيّب اعيوني لو اشوف... اعيونك وانسه كل حزني
تگلّه ودمعة الغربه بنضرها
انجمعت غربة الدنيه ابگبرها

(٢)

الصاحت يا هلي ابضيم البراري
هلي يل منكم اتخاف الضواري
ويل اتگطعون بالليل الصحاري
گطعتوا ابّتكم وتايه قراري

بتكم طاحت ابوادم... ما تعرف بني هاشم
الشام التفرح ابدمعي شعندي اندفن بيها

دسلّوها صوارمكم... وبتكم خل تجي يمكم
اخذوني الغرب هزني وزينب زاهديها

ما تنجرع هل شام... وگاع الغربه تخنگنها
هاي الحرّه چم يوم... بگبرها منو الچاهبها
اتصيح ابنيّه عدكم فكّو اسرها
انجمعت غربة الدنيه ابگبرها

(٣)

الهوه يخنگ گبرها وياخذ الحيل
وتستاحش اذا ليها يجي الليل
ليل الشام بجروح الوفه ايعيل
وچلمات الشماته اعله الصدر خيل

المن هاي ضلتها... الاخت راحتها باخوتها
وحيده اللّمت اخوتها بگلبها ودللتهم

الماتت من مشه الغالي... اتصيح الرمح چتّالي
ماتت شوگ لاخوتها ويوم الفارگتهم

گبرها ايريدله اعيون... اتزّخ ادموع واتوشلّ
هاي ام گلب الاحسين... گلبها هسه متعلعل
ما مكسور واحد من كسرها
انجمعت غربة الدنيه ابگبرها

(٤)

ما رادت ثغيب اعله الگبر كون
ولا ثكله عليها اتهد الامتون
رادت حالها حال اليموتون
تشوف اخوانها اعله الگبر يبچون

ويشم اترابها الكافل... واعليها الدمع سايل
هايه الرادته الحرّه ومحدّ حققه الها

ماتت تنعى وحدّها... على الخوّه ومصيبتها
شوضعچ يأم گلب گاضي ما واحد سألها

گضت وادموعها اتريد... چف عباس يمسحها
وماتت بين الاجناب... هذا الحال يوجعها
الغربه ابزينب اتحقق اثرها
انجمعت غربة الدنيه ابگبرها

(٥)

صدر الدين

باعوني البشر سلعه... وگلبي اتعلعل ابوضعه
كسرو خاطري المتعوب... ولمعت بالجفن دمعه

وامحدب امشيّ... چن بيدي نعشي
گد مسح الادموع... طيحته رمشي

أنّي المُكابر... اليكتم مشاعر
الما ابين الضيم... شو هسه حاير

بأنفاق الدنيه اشگد هندس
محد بالمكسورين ايحسّ
مديت ايدك ليّه وشفته
لچفي الضايع چفك مؤنس

(١)

بديت استكشف الزينه... وليش اتكفلّت بينه
ومشيت اوياك ممشه الدمّ... من يمشي ابشرايينه

يا ابو المحنّه... بيدك قدرنه
ومن نوگع ابضيج... شفتك سندنه

گلبي بنحيبه... شافك مُجيبه
وشدهتني حاله... اعيالك غريبه

حضنك هذا الشال الاكبر
ما ترهم بي حافر يعثر
وبي شايلني وشايل سهمك
هاي الحاله الما تتصوّر

(٢)

ومشيت ابخدمتك عاثر... واخذني امس من باچر
يل حافر كسر گلبك... اريد اكسرلك الخاطر

لهاي الخيانه... كل ضني انه
تطرد دليلي... واتوطّي شانّه

بس الكسرني... شفتك تحبني
وتغفر ذنوبي... واتگلي يبني

ما ترهم لازم كل مذنب
يتربه ويتأدب وايحب
عايفني ومتعاقب گلبي
وچفي بچفك باقي امچلب

(٣)

واتعمّقت بالخدمه... وعرفت الذَكر والزلمه
اليخدمك ينحسب رجال... وتترس عينه هل نعمه

وگمت ابچي لمّن... احروفك يمرّن
ونوگ الهزيله... گلبي يعصرن

واجفوني تعبت... ومن دمعي ذبلت
وكل ضني روحي... بالخدمه ثبتت

يمته اتحس روحي ويمته اصحه
هذا حسيني ادموعي اتفرحه
نيتي ابدمعي اجروحه ايطيبن
مو سهم اذنوبي يطب جرحه
(٤)

يل حنيتّه تكسرني... على ياهي تحاسبني
أنّه التفكيره بالوادم... واصيح احسين شاغلني

وابنص غفلتي... او وحشة غربتي
كلمة يضامي... جرحت صفنتي

لبيك اصيحن... واوگف واطيحن
متغير اسمك... يل بيك اشيخن

چا هوه الله السماك احسين
مذبوح اصبح ليش ابيا دين
وي تغيير اسمك هل عالم
كلّه اتغيّر يا نور العين

(٥)

صدر الدين