عظمة عِلم السيدة زينب (عليها السلام).
@kadhmi

#أمير_الكلام

ومن كلام لمولانا وامامنا أمير المؤمنين عليه السلام: (لرجل سأله أن يعظه):

لا تكن ممن يرجوا الآخرة بغير العمل، ويرجي التوبة بطول الأمل. يقول في الدنيا بقول الزاهدين، ويعمل فيها بعمل الراغبين. إن أعطي منها لم يشبع، وإن منع منها لم يقنع. يعجز عن شكر ما أوتي، ويبتغي الزيادة فيما بقي ينهى ولا ينتهي ويأمر بما لا يأتي. يحب الصالحين ولا يعمل عملهم، ويبغض المذنبين وهو أحدهم.

بَدّيني اعله كسرك روحي الك فدوه
العراق وانته بيكم حيلنه يگوه
صافي ومايخبطك عنك اشيحچون
هيل وما ضعت بمرورة الگهوه
عطشنه اهواي امس يمنه النهر مذلول
ما ضگنه العذب بسوالفك نروى

يمر طاري الوفه وبي نذكر العباس
چبير اگباله صار الطف خرم ابره

من يثمر غصن وعثوگه كلهن طيب
ارجع للاساس الطيب للشجره

تلگه ام البنين اتگمطه وتوصيه
عيش احسين مبدأ مو بچي وفكره

ماگالت دللول وغفه العباس
مجلس للگمر عن الوفه تقره

گالتله الزلم من تغلى مو بفلوس
الواحد بالمواقف ينعرف سعره

أزرعلك سوالف كون صدرك گاع
وريدن ينسگن من گصتك گطره

اذا عثره ابدرب يوليدي مامعذور
أريدنك جسر لبنيت الزهره

اشمعزه الماي باچر رخصه وانطي اچفوف
صيرن بير لو صار الوكت صحره

واصعد للسمه غيمه وتفيي اخيام
الفي اعله الارض بس اشكبر قدره

وعلى رگبة اخوك احسين كون ألگاك
نده اتسير گبل سيف اليحز نحره

طعم للخوه خلي مو مثل قابيل
تره بيناتكم زينب ملح عشره

وغَمّجْ بالمواقف كل بحر ينهاب
مو بالطول من ينهاب من قعره


سيد حامد النعيمي

(موضوع القصيدة من خيال الشاعر)

طير كل ما يجوع يگصد بيت الزهراء (ع) فيگلهه

يباب الله اعتنيتچ منچ اشيطلع
الصدگ جوعان بس ابشوفتچ اشبع
بيدچ بس دعا ماشلتي چف نداف
ولا أذيتي حنطه ابطشت اليزرع
بيتچ گاع خضره ولو أكلت ابصيف
چفچ فَيّه يوگف فوگي من يركع
خير الله اشكثر بس انتي كل الخير
يمچ راسي ادنگه وبكرامه أطلع
اليچهبچ بالفجر ورده ندى اتلاگيه
يتبلل فرح مو مستحه ينگع
يِفَيْضِ اجيوب چفچ وانتي من تطين
غيمه وتمطر الحد ما فلح تقنع
لو فريتي رحه منهه تعتذرين
بير الطيبه عندچ كل وكت تنبع
آنه امعاشرچ واهواي ربعي اطيور
مابيهم إلي مثلج جنح يفزع
مثل طبع الگمر ماينسمع كل صوت
وچهچ چن حَسَنْ مو سيف من يلمع
يزهره احسان فعلچ مو جزاته احسان
رايد اوفي إذنچ مني خل تسمع
مولاتي أشوف ابابكم بسمار
چهالچ من تصدله اعيونهم تدمع
عليه خل ابني عشي باچر ايدفعوه
بسمارچ اريده ابصدري من يطبع
حضره الخاطرچ بسمارچ أتلگاه
من صدري يطب من ظهري خل يطلع
بمچانچ أنا وافراخي خلنه انطيح
ولا طولچ يطيح وحزن يتگبع

خادم الزهراء (ع)
سيد حامد النعيمي

السلام عليكم
تاج راسي خدمة اهل البيت ع
ان شاءالله اليوم الاثنين تنزل قصيدة جديدة لمولاتي زينب ع

واكرر اعتذاري من أولياء نعمتي اهل البيت ع ومنكم جميعاً لعدم الكتابة لفترة طويلة بسبب المرض المزمن المتعب ( ولازال مستمر ) وألتمس منكم الدعاء لي ولجميع المرضى

أبوذيات لسيدة زينب،،ع،،
-------------------------------------------------------
بس الدمع للفاگد يراعون
ودمعهه ماوگف مره يراعون
زينب تسمع أخوتهه يراعون
راس أيوصي راس أختك سبيه
=_=_=_=_=_=_=_=_=_=_=_==_=_

برماح الروس وبونهه يشركون
ونعه العباس لوحاضر يشركون
الأگي الگبل والهسه يشركون
أبديني ولا أشوف أختي سبيه
=_=_=_=_=_=_=_=_=_=_=_=_=_=
حنينه ونوحچ أبونه وفيلاچ
وراح الچانلچ خيمه وفيلاچ
يدنيه أتولمي أبنارچ وفيلاچ
سبو كعبة علي والغاضريه
=_=_=_=_=_=_=_=_=_=_=_=_=_=_

خادم أهل البيت،،ع،،
أبوحسين السرگودي...🕊️🕊️🕊️