tgoop.com/shokirjonov/8326
Last Update:
Фарғонадаги АЁҚШда бўлган ҳодиса кўп муҳокамаларга сабаб бўлди. А.Яссавий кўчасида жойлашган “Фарғона Лайли Наҳор” хусусий корхонасига қарашли объектда авариявий ҳолат натижасида ёнғин келиб чиққанди.
Ҳолат бўйича Олий Мажлис Қонунчилик палатаси депутати, Ўзбекистон Экологик партияси фракцияси аъзоси Жавлон Абдуллаев Вазирлар Маҳкамаси ҳузуридаги Саноат, радиация ва ядро хавфсизлиги қўмитасига депутатлик сўрови юборибди. Сўровда АЁҚШни лойиҳалаштириш, қуриш ва реконструкция қилиш ишлари амалдаги қонунчилик талабларига мувофиқ амалга оширилгани ва бундай ҳодисаларнинг олдини олиш чоралари ҳақида гапирилган.
Бу ҳодиса объектларнинг хавфсизлик қоидаларига қанчалик риоя қилиши масаласини кун тартибига олиб чиқди. Ростдан ҳам, АЁҚШ қурилишида танланган жойнинг тўғрилиги, хавфсизлик стандартлари, техник кўрикдан ўз вақтида ўтказилганлиги каби омиллар қайта кўриб чиқилиши керак.
Назорат фақат рухсатномалар бериш билан чекланмасдан, уларнинг техник ҳолати доимий равишда текшириб борилиши шарт. Ҳар қандай техник нуқсон ёки хавфсизлик қоидасининг бузилиши аҳоли ҳаёти ва соғлигига катта хавф туғдиради. Шунинг учун барча тегишли ташкилотлар ва мутахассислар ҳодисани чуқур ўрганиб, бунақа ҳолатларнинг олдини олиш бўйича қатъий чоралар кўриши керак. Одамларнинг ҳаёти ва хавфсизлиги ҳар қандай иқтисодий манфаатлардан устун бўлсин.
