صعب تُمر بفترة تحس كل المعايير مختلفة ؛ المعايير اللي ربّوك عليها اهلك و اللي تعلمتها من القراءة والبحث والتجارب، هاي المعايير لمن تجي للواقع و حتى للفضاء الإفتراضي تشوف عكسها تماماً ؛ ما تشوف معايير "أخلاقية" تشوف معايير تعتمد على القوّة والغَلبة .

🔺مثال حي : هو اللي يمتدح طاغية مثل صدام بسسس لأنه چان "قوي" و "هيبة" (يعني معايير مو اخلاقية) و يغض النظر عن جرائمه و يحاول التبرير الها بشتى الطرق ؛ لأن اكو بقايا ضمير بداخله .

لازم نراجع أحكامنا و أحكام الآخرين على شنو مبنية ، من أي معايير منطلقة .

🔺عامل بناء لابس كمامة و يشتغل

🔺فد ثكيل صاعد لگزز مطنش كلشي و ما لابس كمامة


عمر وعي الانسان و ثقافته ما ارتبطت بقيمته الإجتماعية او بفلوسه .

انت تريد منه وعي سياسي وقانوني و هو ماعنده وعي حتى بأنه لازم يحافظ على نفسه و على الآخرين .

بشر طايح حظه، ظلّوا تباوسوا و تصافحوا، و خلي الناس تنفجع بأحبتها .

"انا الشهيد القادم"
جريمةٌ بحق القضية !!


🔴 الانسان والمجد:

الانسان يحب المجد لدرجة انه ينطي روحه ثمن للحصول عليه (رغم انه هو يعيش هالمجد بخياله فقط؛ لأن مراح يحس بيه من يموت) وهالشي طبيعي بالذات لمن يشوف كمية الإعتزاز بالشهيد بالواقع وبالتراث.

🔴 الطريق الأقصر:

بما انّك تحب المجد، فراح تشوف الموت في سبيل القضية هو الطريق الأقصر للوصول اله، بس غلطان يا حبيبي، موتك سهل جداً بعكس لمن تعيش حياتك وانت مصمم ومناضل في سبيل القضية، حتماً متحصل نفس الكم من المجد بس انت راح تخدم قضيتك اكثر بهواي من موتك.

🔴 ماذا قال شريعتي ؟

علي شريعتي يگول: إنّي أجدُ العيش من اجل قضية، أصعب بكثير من الموت لأجل قضية.

🔴 تقتدي بالحسين ؟

الحسين ظروفه غير شكل، وفضلاً عن ظروفه چان اكو اللي يكمّل طريقه ويبقى يسولف بالقضية اللي انقتل من اجلها الامام (ع)، گلي اذا كلنا مشاريع شهادة من اجل القضية مالتنا منو راح يكمّل ورانا ؟ منو راح يبني ؟ منو راح يخطط صح ؟

🔴 فكّر قبل السعي للموت

قبل لا تفكّر تموت من اجل قضيتك، فكّر : هل موتك يخدم قضيتك ؟ لو مجرد رقم يزيد عدد الشهداء او مجرد مجد. اذا چان مجرد مجد الك تعيشه بخيالك فأنت أناني، تفكّر بمجدك على حساب خدمة القضية.
هل اكو غيرك يكمل وراك النضال ويبقى عايش من اجل القضية ؟ وجودك وياه افضل ؟ لو موتك افضل؟

🔴 اخيراً..

اكيد راح ننقهر عليك ونرثيك ونشيل صورك ونطالب بدمك، بس مراح نقدّر موتك بقدر ما نقدّر حياتك وعيشك لأجل قضيتك، واكيد اذا فكرت بالاسئلة السابقة راح تشوف انه عيشك افضل للقضية وموتك يضرها، لهذا ياحبيبي صفاء واحمد وعمر رادونا نكمل نضالنا من اجل قضيتنا المشتركة، شيسوون بينا من نلحگهم ؟

#تميم_علي٩٨

كُلُّ عامٍ و أنتنَّ بخير و لكن ..

١.لمن تردين تقدمين على شغل و تشوفين ابو الشغل مخلي معايير مظهرية فعُرفي انه هذا "تسليع" الچ ، هو يريد شكلچ و لبسچ و جسمچ حتى لو شهادتچ دكتوراه ، انتِ مو سلعة و لوحة اعلانية ، انتِ الچ كيانچ الخاص و شخصيتچ و ثقافتچ .

٢.لمن تشوفين منظمات حچيها حلو و تگلچ تعاي نتساوى و نتحرر و ننتفض ، قبل لا ياخذچ الحچي الحلو بحثي عن النوايا الحقيقية ؛ لأن كلش طبيعي يكونن ذني إستغلال والهدف جنسي بحت بدعاوى مختلفة .

٣.لمن تسمعين مفردات تحرش ، لا تتوقعين الخلل دائماً بيچ، انتِ فعلاً نقية و نظيفة ممكن بس الشارع وصخ ، لا تتقوقعين على نفسچ .

٤.حقوقچ كمرأة بعضها مسلوب فعلاً بس هن حالهن حال هواي قضايا مهمة يتم استغلالهن اولاً ، و يتم الدفاع عنهن بشكل سيء ثانياً؛ لهذا انتِ ما مجبورة تكونين تحت اي مسمى بس حتى تصرخين بحقوقچ.

٥.لازم تفهمين انه انتِ مشروع أم و أخت چبيرة؛ لذا شگد ما بيدچ ركزي على رفع مستواچ الفكري والثقافي لأن انتِ اللي تربين و انتِ اللي مخلين عليچ مسؤولية جيل كامل ، زحمة تنجرين ورا تفاهات و سخافات بس لأن صاحبها حليو .

٦.الفشار مراح يخليچ قوية ، لا تلوثين نفسچ بهيچ اشياء ، انتِ انقى من هيچ .

@tamimali98

Hi ..

القناة لمن تنزل هم ترجع تصعد ؟

بالمناسبة، اللي يريد او يحتاج شي من ذني كشغل فيتدلل 💙

المالكي سرّب من موضعٍ آخر

🔹يگولون فد يوم اجة واحد لمصعب ابن الزبير گله جيش عبد الملك هيچ و هيچ بيه اماكن ضعف، گله عاشت ايدك، يلا كتلوه، گله ليش يا أمير؟ گله هالمرة انت وشيت الي، باچر توشي عليّ.

🔹ماعندي شك -قيد شعرة- بأنه اكو جهات تقف وراء نشر هذهِ التسريبات بهذا الوقت تحديداً، و كلش كافي تعرف العنوان اللي طلع بيه "علي فاضل" بالمقابلة الأخيرة،و اذا ما اكتفيت فشوف شنو الشي اللي يجمع كل الشخصيات اللي اعتقدوا أن "قصف زاخو" مقصود حتى يغطّي على التسريبات؛ شوف شنو توجهاتهم و ويامن يشتغلون.

🔹المالكي ما حچة شي جديد، بس كطبيعة البشر يميلون للفضائح و يحاولون يكبرون من حجمها؛ لأن كل اللي حچاه هو يحچيه بالظاهر بس اللي فرّق أنه الأوصاف واللهجة كانت شديدة، و واضح أنه چان "يسلّك" الهم و يتماشى وياهم ويوعدهم بوعود فارغة ادركوها هم (بنهاية التسريب).

🔹وين اكو ناس تريد تسوّي صواريخ عابرة للقارات و جايين ياخذون نثرية ؟ و كل شوية يقاطعوه بحيث راد يكفر من وراهم

🔹موقف مقتدى جداً حكيم و رزن و أتمنى ما يثبت العكس؛ لأن بيده جمهور هائج منتظر "گصگوصة" ترجّع المالكي "للگزر خان" .

🔹التسجيل يبدو عفوي أو غير متعمّد لأن استمر لحد ما طلعوا، بس نفس الوقت أعتقد أنه متعمد و الشخص ما گدر يقطع التسجيل خوفاً من اللي وياه و أكو تسجيلات لغير المالكي (سالفة مصعب)

🔹بالأخير المالكي قائد شجاع (والدليل اللي حچاه)، بس غبي (و الدليل اللي حچاه) و إلا ماكو قائد ذكي يحچي اللي حچاه لناس واضح أنهم مو ثقة و ما يفتهمون؛ فالمالكي سرّب من موضع غباء مو شجاعة، وكل مَن يعتقد أن التسريبات أثّرت على حظوظ المالكي برئاسة الوزراء فهو واهم؛ لأن المالكي يعتقد أن هالمنصب يحجّم دوره.
@tamimali98

انت ماتگدر تربي اطفالك على دينك
وتشرحه الهم وتخلي عندهم اساس معرفي قوي
لأن جماعة ذاك الصوب..
راح يعتبرون هالشي ادلجة وغسل للأدمغة وانتهاك للطفولة
بس هو عادي يروج أفكاره للأطفال ويصدرلهم الانحلال
وتقبل الرذيلة والمثلية والابتعاد عن الاديان والخ..
بحجة انه "يكبر ويختار" متناسين قاعدة التعلم في الصغر..
يريده يختار بعدما ترس عقل الطفل وأدلجه على عدم الاختيار
المهم رباط سالفتنا
انت حرام عليك تربي وتعلم
بس هو حلال لان هي هاي الانسانية المادية الي غصبًا عليك تتقبلها