tgoop.com/tayseerelsadigo/3419
Last Update:
قبل الفجر اتصلت بي صحبتي
تبكي بحُرقة ، والكلام ملخبط ما فهمت أي شي !
اتخلَعت ..
يا بت قولي بسم الله ، في شنو كدي روقي وفهّميني
مالك ؟!
و هي زايدة في البكاء ..
لمّن أبت تسكُت قلت أشغّل آيات من القرآن ،
تشغّلي شنو
يا تيسير القرآن كله جميل ، قلت سورة يوسُف ♡
سِمعَت التلاوة سكتَت بقت تسمع و تتنهّد
بعد شوية صوتها اختفى تماماً !
بعد التلاوة تمّت ، قالت لي :
نحنا نزحنا من الخرطوم
فقدنا كل شي وجينا مدني عشان نستقِر ونرتاح شوية ، لسه
ما صدّقنا روّقنا الدعامة يجو بي جاي ؟!
وخلاص العبرة خنقتها دايرة تبكي تاني ،
قلت ليها :
يا حبيبتي ، كله حيعدّي بإذن الله
أنا متفائلة شديد والله ، ضاقت كده عشان يجي الفرج
إن شاء الله تعالى ♡
سألتها انتو وين هسي ، قالت لي في قرية جنب سنار
طيب ناس بيتكم بخير
قالت لي
اي الحمدلله بخير كلهم ، لكن عشان نصل هنا
بعد تعب شديد .. الحمدلله
اتذكّرت قصة سيدنا موسى عليه السلام
وقعدت أحكيها ليها
"هي عارفاها لكن الواحد فينا لحظات الضِيق
بكون ما مركّز ولا بتذكّر الحاجات اللي بتدّيهُ أمل"
سيدنا موسى عليه السلام تِعِب من المشي
و الحر و الجفاف ..
كان ماشي و مهموم
من إنه يجي زول يقتله أو يأذيه !
وما كان عنده بيت يسكن فيهُ
ولا زوجة ولا أسرة يتقوّى بيها ، ولا عنده شغل بالإضافة
لإحساس عدم الأمان و عدم الإستقرار والخوف !
وهو في الحالة دي دعا ربنا وقال :
" رَبّ إِنِّي لِمَا أَنْزَلْت إِلَيَّ مِنْ خَيْر فَقِير " ♡
و بسبب الدعاء ده
ربنا رزقه
بيت وزوجة وشغل ، و اتطمّن و حسّ بالأمان ❤️
دعا ربنا وهو في أصعَب موقف ،، لكن قلبه كان مليان
باليقين وعنده حُسن الظن بالله تعالى
حصل شنو ؟!
حياته اتغيّرت تماماً = من حال لحال (١٨٠ درجة زي ما بنقول)
عشان كده يخوانّا
ما نيأس مهما يحصل لينا ، وما ندّي القلق فُرصة فينا
ونقعد نفكّر حالنا حيتصلّح كيف !
ربنا قادر يصلّح كل شي في لحظة ♡
و الإبتلاء ده حصل خلاص ، لكن السؤال هو :
نحنا تقبُّلنا ليهُ وتعامُلنا معاهُ كيف !
نرضى و نحمِد ربنا
(أيوة الحمد في السراء والضراء ) ، و نستبشر خير
ونسأل الله الجَبر والعوض الجميل في أيامنا
اللي جايّة ♡
حتتيسّر ؟!
أيوة بإذن الله ..
متين ؟!
ما عارفة لكن قريب إن شاء الله ♡
بتقولي كده ليه ؟!
لأنه يقيني بالله عظيم ماليهُ حَدّ !
"اللهم بارِك"
فاللهم ثبّت قلوبنا وانثُر فيها السكينة والأمان ، برحمتِك ولُطفِك أكرِمنا وآتِنا سُؤلنا ، عليك توكّلنا فانصُرنا بإجابة الدعاء .
ممكن نصلّ على الحبيب !❤️
#تيسير_الصادق
BY د.تَيسِير الصّادِق🔻|مُمكن نصلّ على الحبيب!
Share with your friend now:
tgoop.com/tayseerelsadigo/3419