tgoop.com/udgjvdsgv/3370
Last Update:
الموية الزرقاء في العين، أو زي ما سموها الإغريق (الجلوكوما) 👁💙!
عشان نعرِّف الجلوكوما، لازم نعرف إنه العين جواها في سائل اسمو Aqueous humor
السائل دا هو البدِّي العين شكلها البنشوفو..
لمن يزيد إفراز السائل أو يقل تصريفه، حينتج لينا زيادة ف الضغط ..طيب المشكله وين لمن يزيد الضغط؟
إنه الضغط دا حيكون في العصب البصري😬، العصب البصري اللي هو أساس الرؤيا ذااااتها، هو المسؤول من إستقبال الضوء وتحويله لإشارات بتصل المخ وتترجم عشان تتضح لينا الرؤية.
فلمن نرجع للسائل الإسمه aqueous humor كل ما يزيد ضغطه، كل ما يحصل تلف في الخلايا البصرية وهنا دا بإختصار الجلوكوما 👍🏼
الموضوع شكله بسيط بس خطير، خطير لأنه لمن تحصل كل الحاجات دي المريض ما بحس!!
يعني عادي زي أي زول سوداني يصحى الصباح يقول ليك عيوني مطششة ويطنش الموضوع! 🫠
مع الوقت بعاني المريض من نقاط عمياء بيضاء بسموها (scotoma)، ودي بتعني وجود أجزاء سليمة لسه، واجزاء متضررة أو انسداد كامل يُسبب العمي، وده بكون في أعراض زي:
- إحمرار في العين
-رؤية ضبابية
-صداع
والنوع دا إسمه Closed-Angle Glaucoma
العامل الوارثي بلعب دور كبير في المرض، يعني عادي طفل يكون مولود مُصاب بعيب خُلقي يتسبب في إصابته بالجلوكوما وخاصة إذا عندو قريب مصاب نعمل ألف لحسابنا🙅🏻♀
في نوع من الجلوكوما open angle glaucoma ودا من أخطر الإصابات الممكن تجي في العين، لأنه ما بيكون فيهُ أيِّ أعراض لدرجة في الطب إسمه (القاتل الصامت) 🥷
في الopen angle glaucoma بتبدا الرؤية تختفي من الأطراف، وبتختفي تدريجي و الزول بيكون ما جايب خبر، لحدِّ ما يروح البصر من كل الأطراف ويبقى مجال الرؤية كأنه بعاين بفتحة إبرة دائرية صغيرة! بيقولوا ليها في الطب central Visio !!
متخيلين الخطورة؟
ولو الزول بقى متعمِّد وإتجاهل الأعراض، ما حيعرف نفسه مصاب إلا إذا بقى محظوظ وعمل فحص نظر، أو كان مريض/مسافر وعمل فحص شامل وبالصدفة عرف إنه الموضوع خطير
عشان كدا بنرجع ونأكد على الفحص الدوري، وننبَّه إنه إحتمالية الإصابة بتزيد مع:
أ- مرضى قصر النظر
ب- مرضى الضغط والسكري
ج- التقدُّم في السن خاصة بعد 40 سنة
د- وجود إصابات سابقة في العائلة
وفي الختام بنقول ليكم إنه الجلوكوما مرض، علاجه ما ساهل خاصةً في المراحل المتأخرة، أكشف بدري وهنا ممكن نرجع نتحكم في الضغط حقَّ العين، عشان ما نوصل مراحل مستعصية وندخل في جراحة وليزر 😰
عشان ضيِّ عيوننا، وعشان نحافظ على نعمة ربنا ونساهم في إنشاء مجتمع واعي!
أعمل كومنت وشير للبوست
وفعِّل معانا هاشتاج (#تعال_أوعيك)، حنكتب فيه نحن طلاب كليات قوم أمشي أقرا بوستات توعوية للمجتمع
ما عندك عذر تعليمك لحدِّ عندك 💙
#قوم_أمشي_أقرا
BY معلومات طبية ع الماشي
Share with your friend now:
tgoop.com/udgjvdsgv/3370