tgoop.com/um1966ahmed/2913
Last Update:
بسم الله الرحمن الرحيم
قصيده لام البنين عليها السلام عندها ودعت اولادها
《《الوداع الاخير》》
~~~
ودعوني ؛كلهم بنيني اليوم ودعوني
ودعوني؛ بين الدمــع والجمره خلوني
ظليت ادير اعيون
يمته الي ايعودون
ودعوني؛ بين الظنون وحيره عافوني
ودعوني ؛كلهم بنيني اليوم ودعوني
☆☆☆☆☆☆☆☆☆
من شالو أبنيني أحملو روحي
ظليت أون من كثرت جروحي
أسكي أبدربهم دمعي وابنوحي
مثل الحمامه أمكسره أجنوحي
وج الكلـب نيـــران
وجهي انخطف بالوان
ودعوني؛ بجمرة حنين الشوك وجوني
ودعوني؛ كلهم بنيني اليوم ودعوني
☆☆☆☆☆☆☆☆
ظليت اتاني اوحاظنه اصورهم
ويــن اليگلهم كلبي ظل يمهم
ريت ابجنــاح أنسام اوصلهم
روحي ترد لو لحظه اشتمهم
كاتلني جمر الشوك
وينك يحادي النوگ
ودعوني؛ بسهام وسط الكلب صابوني
ودعوني ؛كلهم بنيني اليوم ودعوني
☆☆☆☆☆☆☆☆☆
اشلون الوكت لو طول اغيابه
روحي تظل مثل الشمع ذابه
ياسهم ذابــح نازف اصوابـه
فوك الجروح اجموره عطابه
يرمي ملح بجروح
كاسر عبرته النوح
ودعوني؛ ذايب حنيني أبشوك شافوني
ودعوني ؛ كلهم بنيني اليوم ودعوني
☆☆☆☆☆☆☆☆
صيت واسم نادونــي ام ابنيـــن
غربه وي روحي من لفاني البين
مهظومه تنزف بس دموع العين
وين اليجوني أبدمعه ملهوفيـــن
وين السهر وارباي
ذاب الصخر مبجاي
ودعوني؛ حلمي الجنازه من يشيعوني
ودعوني؛ كلهم بنيني اليوم ودعوني
☆☆☆☆☆☆☆☆☆☆
اشلون الزمان ابغدره خلانــي
افكد بنيــني وهلي وخــلانــي
حتى الحنين حسين ماجانــي
مايدري ذبحـه للمتن حانــي
كلهم فده البنين
خبرني عن حسين
ودعوني ؛ ريت ابضعنهم من يدفنوني
ودعوني؛ كلهم بنيني اليوم ودعوني
☆☆☆☆☆☆☆☆☆☆☆
تمت بعون الله تعالى ✍خادمة الزهراء عليها السلام
أم اسعد الشمريhttps://www.tgoop.com/um1966ahmed
BY آهات الطفوف للشاعره ام اسعد
Share with your friend now:
tgoop.com/um1966ahmed/2913