tgoop.com/umaliridashrify/3471
Last Update:
قصيده
#لاهل زينب
لمولاتي زينب
عنيتوا علينه....... لاچنه اشبدينه
وياكم يا الاحباب..... انتهينه انتهينه
وياكم يا الاحباب..... انتهينه انتهينه
.......................
گولوا شنسوي وترد گعداتنا
اخلافكم غصينه بحچاياتنا
ردوا شيلوا اهمومنا وآهاتنا
بروسنا ما تنحسب شيباتنا
انحلفكم يغياب.... مروا بعتبة الباب
وياكم يا الاحباب انتهينه انتهينه
وياكم يا الاحباب انتهينه انتهينه
.......................
كل مچان ابيتكم بچاني
اهنا گعدت وسامريت اخواني
اهنا بچيت وطبگت قرآني
اهنا ابو فاضل جابني ووداني
نومتكم بالتراب..... من عدها الگلب شاب
وياكم يا الاحباب انتهينه انتهينه
وياكم يا الاحباب انتهينه انتهينه
.....................
مو جريبين ويصل جدمي وامر
بيني بين گبوركم گَطعه اشكثر
والله ما يلزمني لو دربك جمر
لچن ابزرك لَهيت آه يالبزر
وحسين للابد غاب..... ما يوصل للاعتاب
وياكم يا الاحباب انتهينه انتهينه
وياكم يا الاحباب انتهينه انتهينه
...................
مروا بينا وردوا ذيچ الذكريات
يوم چانت حلوه يم اهلي الحياة
نگعد اويه امنا وابونا للصلاة
ردوا عندي من القهر ترس العباة
ضلعي من الهضم عاب.... وعاشرت سود الثياب
وياكم يا الاحباب انتهينه انتهينه
وياكم يا الاحباب انتهينه انتهينه
................
كون رجعتكم بعد بالمستحيل
اخذونا يمكم والله مجروح الدليل
اشما نريد انوح صحنه اشگد قليل
يالفگدكم راد حيل وماكو حيل
مزروف گلبي ما طاب.. مصيوب مية صواب
وياكم يا الاحباب انتهينه انتهينه
وياكم يا الاحباب انتهينه انتهينه
.........................
*ام علي رضا الشريفي الحسيني*
القصيده مهداة الى مولاتي زينب الحوراءعليهاالسلام رحم الله ان يقرا سورة الفاتحه الى والدي خادم الامام الحسين عليه السلام
خضير بن زوينه
https://www.tgoop.com/umaliridashrify
BY الخادمة ام علي رضا الشريفي الحسيني
Share with your friend now:
tgoop.com/umaliridashrify/3471