tgoop.com/unionsforHK/1590
Last Update:
【羊村工會主席黎雯齡還押第十二日獄中書】
好感激每日都有人嚟探我，每日下晝都好期待姑娘電話響同嗌我number，真係好開心，好多謝大家冇忘記我❤️ 另一個最期待嘅時刻就係收信❤️ 現代人有智能手機可以做好多即時嘅通訊同交流，溝通變得冇晒隔閡，入咗嚟先明白溝通嘅可貴。每一次嘅書信，都係接通世界嘅橋樑，信入面嘅一字一句都好有重量❤️ Sor有啲矯情～
間唔時探訪/書信入面都有人問我呢樣嗰樣想點處理，然後我發現冇人可以同我傾，冇人可以畀意見我，喺有限嘅資訊入面做決定真係好難 (我係好鍾意承認自己嘅軟弱)。我係好需要大家。 係今日嘅信件入面，睇到鄒幸彤關於做高院擔保嘅文章，令我重新審視入嚟嘅意義以至成個案件同埋我點樣看待我依家嘅處境。
其實，你問我有冇被捕心理準備，係有嘅。就好似押我上庭個警察，佢都有問我有冇諗過變成呢個後果，然後佢再補一句：「不過你呢啲人係為信念㗎嘛，係咪？」
不過，有心理準備等唔等於我做嘅事就係錯呢？或者我入嚟真係入得太匆忙，以致呢十幾日，個心態都係:「早坐早着，拋*得越耐，泊*得越少，橫掂都係法治已死，坐硬㗎啦😌」
太多現實嘅考量，令到我忽視咗整個被捕、上庭、還押嘅過程，本身係咪符合公義，即係「我有冇做錯事呢？」而如果我係冇，佢憑咩拉我，憑咩還押我呢？
我記得之前有篇訪問個標題係「不為殘酷現實所擊退xxxxx」。望返而家嘅我，係咪已經徹底被殘酷現實打敗而屈服呢？當初嘅信念同初心呢？係咪咁快就磨蝕晒？無可否認呢幾日我係坐得好安逸，每日都係「食、瞓、痾、睇書信、睇報紙」。雖然我都分唔到係真係好安逸，定係自己都呃埋自己，但似乎安逸、認命真係會令人放棄喺危難入面思考。
即使身陷囹圄，都唔能夠放棄思考。一旦習慣，就會放棄掙扎，令本身屬於自己嘅權利都放棄埋，絕對係非常危險。放眼而家嘅社會，現實固然越嚟越殘酷，但心態能夠影響我哋點樣看待呢個社會同現實。肉身能夠被囚禁，但思想唔可以，但願我哋都能夠守住心入面嘅一片淨土。
——黎雯齡Lorie
4.8.2021 (還押於大欖女懲教所第12日)
#一人受困我們無一自由
#羊村案 #言語治療 #被捕人士 #囚權 #寫信師
———————————————
‼️寄信注意事項
信件請寄：油麻地彌敦道557號永旺行19樓
信封面註明：🐑羊村收信部🐑（請標明寄予黎雯齡或楊逸
BY 職工盟資訊頻道
Share with your friend now:
tgoop.com/unionsforHK/1590