tgoop.com/wajaa_m/43171
Last Update:
أنا مريض الشقيقة أو migraine
اسمها هيك علمياً لأنو بتصيب شق واحد من الجمجمة !
بس فعليّا هي اسمها هيك لأنها بتشق الجمجمه بالنص !
مرض مو متلو متل غيرو لا أبداً .. هو منفرد بذاتو عن كل الأمراض !
يعني وقت تشوفني مارح تعرف اني بعاني منو .. لأنو فعلياً مالو اي آثار تبين !
أنا بكون معك
عم اضحك .. آكل. .. ادرس .. و يمكن كون نايم .. قاعد وماعم اشكي من ولا أي شي ..
هي لحظة وحدة .. رفّة عين !
بقرر فيها جزء من راسي الانفصال بشّدة عن الجزء التاني ، كيف
وليش ماحدا بيعرف ..
هيك بلحظة غضب بقررو ينفصلو
لأ مش بس هيك !
تلقائياً عيني بتقرر تنفصل مع هالجزء
بهاللحظات أنا ماعاد عندي قدرة شوفك بعيني ولا حاكيك وبفضل ماتحاكيني ، وإياك تقعد تراقبني ، كرمالك مو كرمالي ، لأنك رح تشوفني عم اخبط راسي بأي شي بيطلع بوشي ، رح تشوفني عم ابكي وسبّ واتعصور ، واحتمال كبير استفرغ قدامك .. رح تسمعني عم اعرض عليك تساعدني باني اتخلص من راسي بأي طريقة ، بهاللحظات أنا مستعد وقعلك على ورقة الاستغناء عن رأسي كاملاً بما فيه وابصملك عليها بالعشرة !
بدّك تجرب تعرض عليي مُسكّن ، هلأ ليك للأمانة الطب ركّب أدوية ومسكنات كتيرة يمكن أكتر من عدد المصابين بهالمرض ، بس لهلأ ولا مُسكن قدر يخلي هالجزء يتراجع عن قرار الانفصال العظيم !
والحل؟
الحل أنك تتركني .. طفيلي الأضوية وخفيلي حسّك ..
العتمة العتمة العتمة والهدوء بس اللي بيقدروا يعدّلوا الوضع ويهدّوا الأمور بين الطرفين ..
بيخلص الوجع؟
الغريب انو بيخلص الوجع كمان برفّة عين ، برجع بطلع لعندك وعم اضحك وامزح ..
صح بيخلص بس مش قبل ما تتلف أعصاب مخّي وتضعف عيني بنسبة ٣% ونسيان واضطراب
بكل مرة بتحصل فيا هالنوبة !
لأنو أقل نوبة مدتها ساعتين متواصلين ، وأكثرها تلت أيام ..!
الله يحمي ويشفي الجميع منه 💔
BY وجـ ـع.ღt
Share with your friend now:
tgoop.com/wajaa_m/43171