ضعن أنبياء طالع بلا كافل
خدر النبوه أعله الهزل شايل
فوك العجاف إبلا غطه
وحده أعله حده أمربطه
..........................
طلعن ربيبات الستر _ يتعثرن خدر بخدر _ طلعن سبايه
ذبح الزلم ذبح الاهل _ بالعاشر وكل الحصل _ جانت بدايه
يتراصفن ضهر أبضهر _ عن شامت إيبوك النضر _ وبروحه غايه
لو هبت أشوية هوه _ يتمايلن مثل اللوه _ أيه أعله أيه

لا رايه لا هيبة كمر هاشم
بس الضرب وشماتة اللايم
كافلهن أعليهن بطه
وحده أعله حده أمربطه
.............................
اعله النوك بدروب السبي _ يمشن مثل كومة عبي _ أبنات الزجيه
ياوسفه بحجاب الشرف _ كلساع ويطبن سلف _ تبدي الرزيه
الحادي يصيح أبلا أدب _ ذن خارجيات النسب _ وبلا هويه
هذا اليراميهن حجر _ هذا اليسب بهل الفخر _ ياللرزيه

شتموهن ومحد يرد عايل
دك الدفوف وصفكه وهلاهل
أبزمرة لئام أمحوطه
وحده أعله حده أمربطه
..............................
لو تعبن أبدرب اليسر _ بالسوط يوليهن زجر _ ويركضوهن
من الخوف إذا يتراكضن _ وجه أبوجه يترادمن _ ويعثروهن
يدورن مثل دور الرحه _ أمدنكات عفه ومستحه _ أشما شتموهن
البيهن نزل مصحف خدر-يوليهن ابسوطه الشمر-أبنيات ابوهن

أعيون الغريب أتعثر الناكه
أخيال العفاف أشجم نضر باكه
التمن مثل سرب الكطه
وحده أعله حده أمربطه
..............................
ماخذهن الحادي أبعجل _ وكلوبهن تنكط خجل _ وجروح كثره
جم سوك جم ديره ونزل _ طبن عله أضور الهزل _ شتمه أويه نضره
يبجن بواجيهن همس _ لا هودج إيكض الشمس _ والكاع عثره
خاطر رقيه ينكسر _ يلجمهه أثر جف الشمر _ أبخدهه سطره

أبراس الرمح راسه اليدللهه
والبابا جلمه وما يكللهه
الجان إلهه تجايه وغطه
وحده أعله وحده أمربطه
................................
مشوهن أدروب أشكثر _ ما ينحمل هم اليسر _ شيحمله جرحه
يخلص درب يبدي درب _ وقصور متروسه غرب _ وعيون وكحه
ضحكاتهم تملي القصر _ بيناتهم زينب تمر _ والناس فرحه
وراس الولي أبطشت الذهب _ أعله أشفافه بالعوده لعب _ إيفاخر بذبحه

شتمني من كتله النذل كافي
عوفه أعله جرحه أمهود وغافي
عوده أعله خده أمسلطه
وحده أعله وحده أمربطه
...............................

حسين باهض الحلفي

برز غيرة هاشم _ رمح بيده وصارم
أتشمر أجفوفه _ بالكوفه _ مسلم زلم
.........................
كله غيره وكله نخوه وعايشه أرسوم الشجاعه أبروحه
عالي راسه وصيته عالي الماتلوحه الناس هو يلوحه
لو دخل ساحة قتال الساحه هاي أبلايه شك مذبوحه
الروحه صلفه أوراد يبرز روحه ميته بلايه شك مذبوحه

من ينازل سيفه _ الموت ملكه وكيفه
أتموت عيونه _ أيعرفونه _ كلما هجم
أتشمر أجفوفه _ بالكوفه _ مسلم زلم
...............................
يلوح أبسيفه أعله كيفه بالمعارك ما يتعب حيله
يطي حك السيف لو طك حيل حيدر جان هو إيشيله
عاشك السيف ولمعته من صباه وعاشكته كحيله
لكوفه لو صول عليهه تموت خوف أتصيح كلهه دخيله

الراسه ينكط غيره _ الكوفه يمه أزغيره
أشمحله جفيته _ وخاجيته _ طبع الشهم
أتشمر أجفوفه _ بالكوفه _ مسلم زلم
............................
مصيت أربات الغضنفر بالشجاعه أبدمه تمشي الغيره
لهامه يتغير بطلها السيف يصرج ويه كل تكبيره
بدل أدروب المعارك ما يتيه لا تصيبه الحيره
حته من نختار زلمه للنزال أعليه ياخذ خيره

مثل حيدر فكره _ يدري شنهو ابصدره
يترك الشارد _ والوارد _ راسه انجسم
أتشمر أجفوفه _ بالكوفه _ مسلم زلم
............................
طوعه صاحت هله مسلم من نزل يم دارها
معزبه وحيدر يحبهه وأبن أخيه اليوم من خطارها
جنهه بالمشايه تخدم ياكرمها كبل شبت نارها
مره تفرشله المصلى ومره ماي تجيب يمه غير مسلم زارها

بسيفه تمسح بيدهه _ اليوم يمكن عيدهه
أتحضر أبدرعه _ وبسرعه _ أتشد اللجم
أتشمر أجفوفه _ بالكوفه _ مسلم زلم
............................
تنضر أعيونه الشفيه ونام ساعه وطوعه جانت حارس
بالعشك موصوفه طوعه أدخيل بختج حيل تشبه عابس
أجو ويريدون مسلم كام ليهم يا هله ابهالفارس
يشمر السيف وتكله السيف راعيه أبعزم وبواهس

السيف تسمع صوته _ من تنز الموته
يخمش المنحر _ من ينحر _ إيكص الخشم
أتشمر أجفوفه _ بالكوفه _ مسلم زلم
............................
الينجرح يبقه ابعذابه مايطيب أولا تهيد ألأمه
شما ذكر خزرة عيونه أيلجمه جرحه الليل لا مينامه
ميت وراسه أعله جسمه ماكو هايه الميت أبلا هامه
صار بوق الجيش يصرخ أنسحاب أودكت الدمامه

الكوفه بيد حيلهه _ الخيل صعدت خيلهه
كسر واهسهم _ خالسهم _ والله والنعم
أتشمر أجفوفه _ بالكوفه _ مسلم زلم
.........................

حسين باهض الحلفي

يا صباح الخير أتانيك _ عطشتني البوسة إيديك
ضايعه أبحبك يمن دربك ضلام"
طالع بجرحي عله أجناح الحمام"
.......................
سافرت مثل الهوه والدنيه أه _ وين ما أتجي الجرح يلجمني"
ضيعة الدمعه أبحر مرات أضيع _ أمواج حزني العاليات أتذلني"
الليل ووسادة منامي والضلام _ من بواجي أفراكم ملني"
الغير عشكك بالكلب ماضل مجان _ ليش كلبك صار ما يندلني"

علموني أنساكم شلون _ أوما تهل أدموع العيون
بالحلم مر بيه سمعني سلام"
هايم بجرحي عله أجناح الحمام"
.......................
كلبي بعده أعله العشك كلش زغير _ ليش تلجم كلبي أبأول عشكه"
بابا ما عندي صبر باجر أموت _ وخاف تبقه بروحي حسرة شبكه"
أنه يوميه الهوه إيحركلي باب _ أهواي جذاب الهوه وما أصدكه"
أشتري أبعافيتي وعيوني هواك _ ومنك أشري أبعمري ساعة ملكه"

ردو داوو أجروحي الزغار _ فات وكت أمداوه الكبار
من هجرك صارن أجروحي أزدحام"
هايه بجرحي عله أجناح الحمام"
......................
أبجيت حدما كامت أتذلني الدموع _ صار كلشي إيذلني ويبجيني"
الباب والحايط أحس يتشمتون _ وصار لدموعي صده إيأذيني"
أشماله شو طال الدرب بعيوني حيل _ أطويل كلش ألك ميوديني"
أنته ميت لو عدل ما أدري ليش _ راح أجيك أنجانك أمتانيني"

الدار وحشه ودربك أطويل _ شلون أجيك وراكده الحيل
العين تكدر تبجي ما تكدر تنام"
هايم بجرحي عله أجناح الحمام"
......................
ماتت إيدي أمن الدعاء وما تجون _ وينكم مات الحجي بلساني"
نسيت روحي وعلتي وتفكيري بيك _ أهواي أكل الكلبي ما ينساني"
أتسجل أهاتي الملائك بالجتاف _ أكسرت خاطرها وملك حاجاني"
كتله أهاتي أشكثر بيهن ثواب _ أنطيهه للوادم نذر لو جاني"

ونتضرتك والملك مات _ من كثر ما سجل أهات
أتطشرت بغيابكم حفنة غرام"
هايم بجرحي عله أجناح الحمام"
......................
الآه تحرك والنبض كلش ثكيل _ أعله المشي نكلة جدم ما بيه"
الدهر حانيني مثل حنية عجوز _ حدبت وتكودني العوجيه"
الشافني أمن بعيد كال أم البنين _ مستحيل إتكون هاي أبنيه"
تطشرن أيامي ماي أعله التراب _ وحسرتي حسرة مره مسبيه"

أتكاسمت وي نجمت أسهيل _ نايباتي ودمعة الليل
أتلمني نسمات الهوه صفنة هيام"
هايم بجرحي عله أجناح الحمام"
......................
شاكفت هجرك لجن أذاني حيل _ سوط جنه وما رحم بمتوني"
أيست والملكه شو كلش بعيد _ أشصار بيكم يا هلي وتنسوني"
خاف ترجع ودي طارش من بعيد _ وي قميصك وحيي شوف أعيوني"
أنكسرت أضلوعي أبكثر ما بيه شوك _ راح أموت أمبارك أتدفنوني"

أجروح بيه أتساوي طفين _ أهواي يأذي فراك الحسين
رماد ذراني الهوه وريحة خيام"
هايم بجرحي عله أجناح الحمام"
......................

حسين باهض الحلفي

الرجليه تخط الكاع _ كاسر ضهر شياله
ترجعلي دم وهدوم _ أمعذبتك الخياله
علي الأكبر _ بدر أزهر _ جمالك وين
نهر تعبي _ ونبض كلبي _ ودليل حسين
........................
من تكلي يمه أهواي أحب أحجايتك
يصعب عليه أتغيب عني أوداعتك
كضيت عمري مدلله أبفي صايتك
أمك يسباح الدليل أبحاجتك

يايمه يا رجواي _ يا بسمتي ويا راحتي
الخاطر حنين أرباي _ ضل يمي يا تجايتي
ألك بيه _ عطش ريه _ ينور العين
نهر تعبي _ ونبض كلبي _ ودليل حسين
.......................
ساعات مرن ونته ما مريتني
أنجانك تهيس صوتي جا حاجيتني
إيدي أعله كلبي إبلا كمر خليتني
بجيتني الحد الزعل بجيتني

عالخيل لو عالكاع _ ما أدري وينك يبني
حاجيني يمه أرجوك _ كونك عدل وتحبني
ركد حيلي _ صحت ويلي _ الطريج أمنين
نهر تعبي _ ونبض كلبي _ ودليل حسين
.......................
تانيت وجهك كلب مات أبشوكه
وفرحه أعله طاري المايرد مبيوكه
شحجي ييمه وجلمتي مخنوكه
كلبي أنذبح والخيل سحكت فوكه

أشما أبجي تبجي اوياي _ رمله وتحن للقاسم
ونتقاسم الونات _ وبالدمعه هم نتقاسم
يعافيتي _ وكع بيتي _ علي صوبين
نهر تعبي _ ونبض كلبي _ ودليل حسين
.......................
جابك أبوك إيشيلك أعله ضلوعه
مكسور ضهره أمبللك بدموعه
من أبعيد بي شميت عطر اللوعه
مخنوكه روحه وكامته مكطوعه

ما ضالتله أعيون _ جاب الدرب يتعثر
أشكد حاول إيدنيك _ للخيمه بس ما يكدر
نخه عمك _ رفع جسمك _ حناه البين
نهر تعبي _ ونبض كلبي _ ودليل حسين
.......................
جابوك يمي وبيك أهيس جلمه
من الطبر ما بيك كطرة همه
تعبان خاف وناسي جلمة يمه
من عسن عين أمك يالأكبر تعمه

معقوله طولك هذ _ جنك صرت مو أنته
كبل الطعن والخيل _ أمن العطش روحك ميته
الكطع نحرك _ وأخذ عمرك _ أخذ عمرين
نهر تعبي _ ونبض كلبي _ ودليل حسين
.......................
حسين أويه جده يشتبه بوصافك
حته أبتسامه ما بقت بشفافك
لطكك بسيفه ما خجل من شافك
لو جان حس أبلوعتي جا عافك

من الله لا ينطيه _ كسر الدم بعروكي
صابك وعينه أتنام _ وخلاني أموت أبشوكي
أخد مني _ حنان أبني _ وتركلي أونين
نهر تعبي _ ونبض كلبي _ ودليل حسين
........................

حسين باهض الحلفي

أخذو كلبي وراحو هلي
يرجعلج كلولي علي
تركوني أبدمعاتي وحسراتي
مهضومه وأتسله أبأهاتي
.....................
طوح ضعنهم كربله المنوه
ما ضلي واحد للكلب سلوه

أبنضرات الموادع يصدولي
عالناكه صعدي ما يكلولي
تجولي بويه أصعدهه تجولي
بالدار أبقه لا لتحجولي

بوداعهم وعيوني أتهمل
لو راحو شيلم الشمل
ومتانيه إيصيحولي أويه أخواتي
مهضومه وأتسله أبأهاتي
.....................
عيني عليهم والكلب شاجر
طاري الموادع يكسر الخاطر

أحجي أويه أبويه وما يحاجيني
معقوله وي دمعي يخليني
العبره أبدليلي ودمعتي أبعيني
تتطشر أخلاف الأبو أسنيني

وكبال عيني أصطفو ومشو
ما جابو طاريي وحجو
وي عبدالله أبتدت ضحكاتي
مهضومه وأتسله أبأهاتي
.....................
كلولي ضلي كربله أبعيده
أنتي عليله وتكتل البيده

كتلهم أيام الهجر تكطع
أتعبني حيل وللكلب تشلع
طول أنتضاري ونوحي ما ينفع
ولا ينفع أبجاي وحدي المدمع

يالشوفتكم طيبه ودوه
لو عفتوني إيموت الهوه
تتعثر بشفافي أحجاياتي
مهضومه وأتسله أبأهاتي
.....................
خلولي عبدالله الطفل يمي
بكماطه أشم وهدومه عطر أمي

نتكابل إيناغي وأناغيله
وعن الفراك أهواي أحجيله
من يبجي أهز مهده ولوليله
يبجيلي مره ومره أبجيله

وخلافكم ما يسوه العمر
معلوله وما بيه أنتضر
رحمو بحالي الخاطر دمعاتي
مهضومه وأتسله أبأهاتي
.....................
يحسين شايل والدمع يحدي
بالدار شنهو ضلتي وحدي

أطلع أوياكم راح أشد حيلي
ومن أتعب اسكينه تتجيلي
يا بابا تشفه ألأمي أدعيلي
جا يمته بيدك أمشي توميلي

يا بابا ويضحكلي الهوه
من أمشي أويه أخواتي سوه
وترد روحي أبشوفة عماتي
مهضومه وأتسله أبأهاتي
.....................

حسين باهض الحلفي

حسين--بذرت عمري أعله غيرك
حسين--ونته المغطيني خيرك
علمتني الخدمه جنه
ونار لو ما صرت أسيرك
.......................
أتطشرت أيامي وسنيني أعله خالي
أشما ضحك بعيوني واحد كتله غالي
عله الما يسوه أشكثر ضاعت ليالي
أحس بعتابك إلي وبجي أعله حالي

حسين _ وما دريت الدنيه فرصه
حسين _ الما يعشكك عشكه غصه
يا جميل ومن جمالك _ صار أبو فاضل ضهيرك
...........................
جم وفي وجم عنده غيره عاشرتهم
ومن أطيح أبشده أدور ما شفتهم
طمع دنيا صاحبوني وسايرتهم
أوياك صار إلهم مجان وقدرتهم

حسين _ أعله العشك ما عندي غيره
حسين _ العنده مثلك يحب غيره
أكسرت جنحي للميسوه _ أوما صرت بالهم كسيرك
............................
أنطيت لجلي ضلوع صدرك للحوافر
وأنه للكص خنصرك أبرد خناجر
سخرت روحي ألك بس بالمضاهر
لاكن الغيرك صرت كلي مشاعر

حسين _ الغير جرحك يجري دمعي
حسين _ وحني للما يسوه ضلعي
ومن أطيح أبشده أندب _ أرحم المذنب فقيرك
..............................
ويه غيرك ما مقصر حته ذره
أكلوب كثره أمفرح وكلبك أكسره
بارد إحساسي الخيامك وهيه جمره
لاكن الغيرك تصير جروحي خضره

حسين _ تايه وحبك طريقي
حسين _ يا حبيبي ويا صديقي
بالترافه والمحنه _ ما يصح واحد نضيرك
..............................
أنطيت حته العافيه وروحي أبذلتهه
والعزيزه أدموعي يا ما نزلتهه
روحي ويه أجروح غيرك ضيعتهه
سيدي نضرة أمل منك ردتهه

حسين _ أشما ردت تدنيني يمك
حسين _ أندل أجروحك ولجمك
أذنب ويشملني عطفك _ أبقى ما يقبل ضميرك
.............................
تارس الدنيه محنه أبدم وريدك
خالق الحب والترافه أبخنصر إيدك
أنطيت لجلي كلشي غالي بيش أفيدك
إيعوف عشك الدنيه كلهه اللي يريدك

حسين _ أنطيت ترجية رقيه
حسين _ حته أصفي أوياك نيه
لسه تطلبلك مناصر _ جا إليمته أصبح نصيرك
........................

حسين باهض الحلفي

أنسانيتك _ كلهه إحساس ومشاعر
أنسانيتك _ ما تدركهه الضماير
يا حنيتك _ يا جابر الخواطر
أنسانيتك
...............................
يمسوي طيب اعله الهوه _ من يختنك يتنفسك _ أجمل نسم"
أحتاجيته مره ابكربله _ ورفضتة تالي بي شفت _ أرماد الخيم"

دنك عليك وقبلك _ يتعذرك يتوسلك _ أتنفسني مره"
أقسم عليك ابرحمتك _ خليني اطب الريتك _ وشمرني حسره"

على ريتك _ أأدخل ياغرامي
على ريتك _ متى تأذن إمامي
ياحنيتك _ جيت اعتبرني زاير
أنسانيتك
....................................
ياهل أتى والقل هوى _ يمبجي مصحف فاطمه _ دم ودمع"
تسبيحه بشفايف علي _ أسمك حرز شاله الحسن _ حدر الضلع"

أعله رموشك ينام النده _ أبدمعة حنين اتوسده _ لو يغفه حكه"
ياقبله للراد العشك _ واليعشك ابنية صدك _ بابك يدكه"

على بابك _ إنحنت سبع المثاني
على بابك _ الرسل وكفت تتاني
ياحنيتك _ الوصفهه بيهه حاير
أنسانيتك
.......................................
بشفايفك قصة عطش _ فوكاهن إيصلي الرمل _ فرض الضمه"
تتحسر أمواج الدمع _ جفت ينابيع الجفن _ وصبن دمه"

يم جبهتك تغفه القدر _ أمن أخدودك أيغار الفجر _ وتموت نجمه"
تنزف معانيك عطر _ أبطاري رقية تنكسر _ يا أحله نسمه"

نزف جرحك _ قصص حب وحكايه
نزف جرحك_ سور أيه اعله أيه
ياحنيتك _ جريح وما تكابر
أنسانيتك
.........................................
أتشابكن كلبك والسهم _ بس السهم طبعه الغدر _ يسكونه دم"
فز كلبك وصار النزف _ طلعت دماك أمن الضهر _ ويه السهم"

أشكد ألمك بس ما صحت _ هد حيلك ورأسآ طحت _ حسره أويه حسره"
ماضل جرح مابي جرح _ الف وتسعمية ذبح _ طبره أعله طبره"

عله أجروحك _ تأذن جم مناره
عله أجروحك _ تصلي اشكد حجاره
ياحنيتك _ أكسرت عين البواتر
أنسانيتك
...............................
كلك على بعضك طعن _ من السهم حد الحجر _ تنزف ضمه"
سيف الشمر عطشان الك _ صد أعله نحرك وبتسم _ شم الدمه"

بالسيف من نحرك شرك _ جبريل رف كلبه وشهك _ ونه اعله ونه"
نحرك نزف بوسة نبي _ وتبده يم زينب عبي _ يابو المحنه"

على نحرك _ صعد سيف المنيه
على نحرك _ هوت دمعة رقيه
ياحنيتك _ يمبجيه الخناجر
أنسانيتك
.............................
والاعوجيه أبلا رحم _ تسحك ترافة مهجتك _ كسر وجمع"
ركضت عليك أبلا إذن _ يمعزب الحافر صدر _ ضلع أبضلع"

رب السماحه والعفو _ تلتم مثل شبكة دفو _ حدر الحوافر"
يتوسدك حافر مهر _ ويفززك صوت الكسر _ أتبدت مشاعر"

يتجولك _ رمح من ينوي ضهرك
يتجولك _ خناجر تجوي نحرك

ياحنيتك _ تبديهه الحوافر _
أنسانيتك
............................
خادم رقية ع
حسين باهض الحلفي

جربه ورايه وخوذه وسيف _ يمعزب وسكينه الضيف
هز الكون _
بسم أم عون _ يمعزب وسكينه الضيف
........................
يمربي الجربه أزغيره وكبرت وياك
تعطش ونته أتشربها الماي أبيمناك
أمعلمه أتنام أعله أزنودك وتحب يسراك
لا ترتاح أولا تهده إله أبطرواك

لا عطشت لا شافت ضيم _ تتناوش ماي أمن الغيم
(هز الكون)
.......................
والرايه البيهه أجفوفك طبعت عباس
مكتوب أعليهه الكافل صكار الناس
رايه ومن طبعك بيهه أشكد جان أحساس
أويه الرايات المارفن لا ما تنقاس

حيدر جان أيحبهه أهواي _ والكافل دكها أعله الماي
(هز الكون)
......................
يامحله الخوذه أبراسك يا كمر الليل
ريشات أمعلك بيهه يا نجم سهيل
كمريه وطالع للحومه أبضهر الخيل
الميت خلص والماميت صاح أدخيل

خوذه وترمي الناس أبنار _ جي لابسهه أوراسك حار
(هز الكون)
......................
ياطكة سيفك والحنضل مره أشواي
ماسامع سيف أبعمري أيكص نحر الماي
سيف الفقار وسيفك مو حسب الراي
يمكن خوان وتوأم ما تغلط هاي

تنزع بيه أوجوه الكوم _ وحيدر نزع بيه أهدوم
(هز الكون)
......................
يمرورة سم عذبهم ياصل الصيف
أموصيتك زينب تاخذ من عدهم حيف
أبكيفك تتركهم تذبح ما عدهم كيف
يمعزب الخيمه أميه عزبهم سيف

شربهم نار وطكات _ أبجفك شبعهم سطرات
(هز الكون)
......................

حسين باهض الحلفي

أرحم حالي ياربي _ زغيره وتعبو كلبي
حنينه وكلبي ما يحمل هجرهم"
خي يرجعولي وآنه أقبل عذرهم"
...............................
أنه المجروحه نص الكلب _ أنه الماعدهه ذرة ذنب
أنه الكلشي ترف متربع أبروحي"

بعدني أبعمر ورد الصبح _ ولابيه أعله لجمة جرح
عمري أهواي أزغر من أذه أجروحي"

مشو عني الغوالي لجمه لجمه
أدنك راسل للذل والله زحمه
أبو حسين زلمه شلون زلمه

تركني أشصار ما أدري _ عبرتي أتفلش أبصدري
غريبه إيكوسرون أعلي نضرهم:
خي يرجعولي وأنه أقبل عذرهم"
.................................
أحبهم مثل حب السحر _ للنجمه وليالي السهر
عمري أوياهم أبكد ابتساماتي"

مريضه وكلت يمشي المرض _ اليفارك خله ميت نبض
لو يلفون جا هانت معاناتي"

أكض الباب وبجي ما أهمكم
هلي مخليني وين أهواي أحبكم
ألح بلكي أمن ألح اكسر كلبكم

يطبع الشيمه شيمتكم _ ياهو إيباري طفلتكم
الموت أرحم ولا أضل أنتضرهم"
خي يرجعولي وأنه أقبل عذرهم"
...................................
أحس أعيوني بيه أنطفن _ خواتي أشمالجن سولفن
كلله خطيه أشلون ضلتهه"

عليله وترفه حد الترف _ إذا تبجي تطيح سلف
تذوب الروح بالدلال حسرتهه"

شبكني وترجن بي أشويه
ولحي أعليه أهوايه يارقيه
كليله أخيتنه وخطيه

كسر خاطرها مو هين _ أبرسم وجناتهه أمبين
الأهل لو سافرو يكتل سفرهم"
خي يرجعولي وأنه أقبل عذرهم"
...............................
صفت نيتهم أعله الهجر _ يشيلون أويه طرة الفجر
وشوف حسين أبوي إيزهب أبروحه"

أجي كدامه ألم بالهدم _ حته إيشوفني من ألم
وعثر يمه عمده وألجم أجروحه"

وأكض ضهري وأكوم وأجري دمعه
وسند روحي وأتجه أعله ضلعه
بلكي إيكول أمشي أويانه أسمعه

أدري أهواي أحرجنه _ لجن مو بيدي أحبنه
ونه أدري بحالي كلش ما يسرهم"
خي يرجعولي وأنه أقبل عذرهم"
.....................................
خذاني أمن إيدي أبوي وحجه_ جلمتين وتخوصر بجه
شبكته وكتله بابا أشصار حاجيني"

حط إيده أعله كلبه أووكف _ ما كمل جلمته ورجف
راد إيكول احبج كال عذريني"

خذته العبره وكعدنه وبجينه
أبهدم عبدالله كمت أمسحت عينه
حنين وآنه هم كلش حنينه

فديتك بابا لا تزعل _ منك أرتبك وخجل
اليحب أهله أيتجرع بعد مرهم"
خي يرجعولي وأنه أقبل عذرهم"
..................................
أنكطع كل الإمل بالأمل _ وتوادعنه أبمرارة أجل
ونطيت اللملمتهن وآنه ممنونه"

ورجعت أبلع أبريجي وأغص _ وعرفت أشيعني دمع الرخص
اليصبهن أربعه أربعه امن أعيونه"

ولملمت البكه أمن الحيل كوه
وحط كاروك أخيي الضهري تجوه
توه المرض أثر بيه توه

وداعآ يا أعز ناسي _ الشيب أتزاحم أبراسي
الضعنو للسفر أنطر خبرهم"
خي يرجعولي وأنه أقبل عذرهم"
..................................

حسين باهض الحلفي

يا سيد الشهداء يا أبا عبدالله

أبراس الرمح منبر صغت- أبهيده الكتاب أترتله"
والنابت أبنحره الرمح- مذبوحه يقره البسمله"
شيباتك أتغطي النحر
وترتل الحد السحر
أيات أيات وسور
.......................
يراد أمشي أمدنكه _ المكسور واهسهه أشتشوف أبدنيه ضيكه"
شما شلت راسي وعاينت _ بعيوني أصد راس الرمح راسك يخنكه"
وسمع رقيه أتحشمك _ نزلولي راس حسين من رمحه أرد أشبكه"
ماصح بديهه أولا نزل _ ما تلكه راسه وبالمتن بس سوط تلكه"

يا بابا بابا أتوسلت- يابو ااشفاه الذابله
حته العبايه أتشككت- كد ما ضربها حرمله
حاميهه يا ماي النضر
وترتل الحد السحر
أيات أيات وسور
.......................
بعيونك أشسوه السهر _ نام وتهنه خويه يا نوم العوافي"
تعبان أذاك الهوه _ أيام صار أبمنحرك هالرمح غافي"
أنزل تعل يابو علي _ آنه أنطرح ونته أبهنه أتوسد أجتافي"
البروده البراس الرمح _ فاركها عد أختك يخويه أجتاف دافي"

وبهيده أجر راس الرمح- ومسح تراب اليلجمك
وترتاح كلش لو شفت- أبنيتك رقيه أتكلمك
والليله نكضيهه سهر
وترتل الحد السحر
أيات أيات وسور
.......................
أحاه يشيال الرمح _ إيشوفك تلوج أمن الألم ما لان كلبه"
ما عنده ذمه أولا رحم _ كلمات تعب فوك الترب راسك يذبه"
تصرخ رقيه أنطينياه _ يقهرها وبعود الرمح يرجع يضربه"
أضربني أبداله أتوسلك _ المكطوع من عنده النحر بعد أشتطلبه"

عذبوك يبن أمي أشكثر التوكلو حراسك
كل مده يتبدل رمح جم رمح طب أبراسك
عود الرمح بيه أنكسر
وترتل الحد السحر
أيات أيات وسور
.......................
من تقره بآيات الكهف _ أتفزز دليلي وينكسر خاطر بناتك"
مبحوح صوتك والسبب _ راس الرمح لمن نبت كطع لهاتك"
أختم يمكطوع النحر _ صدق تره أتعذب كلب خواتك"
مو هذا صوتك الاولي _ من جنت تقره السوره ياخويه أبصلاتك"

خنه أحس أبنبرتك- أبدم منحرك خاف أشركت
لو صوتك أمخوشن صبح- من كثر ما ماي أعطشت
أعله أشفافك إيصلي النهر
وترتل الحد السحر
أيات أيات وسور
.......................
وتساير أجروح السبي _ آيات وآيات أشكثر راسك تلاهن"
وخدودك الجنهن ورد _ حر الشمس ذاري الرمل أخدودك كلاهن"
عيونك تخوزر بالشمر _ لو طك رقيه أعيونك إيطكن دماهن"
أكبالك بناتك ينولن _ ما تدري بدل جم جلد كفاهن"

سوط أعله سوط أتخالفن- سوط أنحنه وسوط أنكسر
ورقيه حيل أتعورت- هدل متنهه أعله الضهر
أتألمهه طكات الضهر
وترتل الحد السحر
أيات أيات وسور
.......................
أتأذن إذا طر الفجر _ أتكعد خواتك للصلاه لو للسبي يابو رقيه"
متيمم أبذاري الترب _ ليهسه ما لاحت جبهتك للوضوء كطرة أميه"
وشما أفز ألكه الشمر _ بيده الحبال وجاي كصده إيشد أديه"
يا خويه وتهل دمعتك _ أتعاين عله أبنياتي وتعاين عليه"

أشما أنضرب نحرك نزف- وتتمايل أبراس الرمح
تتحسر وتجري الدمع- وتتلوه يا شمس الصبح
وتحشم أبراس الكمر
وترتل الحد السحر
أيات أيات وسور
.......................

حسين باهض الحلفي

ماخذهم أربعتهم _ الثلاثه وي كمرهم
خاف ما يكفون أخذني خامستهم
خدام _ يحسين _ آنه وبنيني
..........................
واحد يصب كهوه أبمضيفك_أواحد يلمع أكراب سيفك

أواحد غيور _ إيوج البخور _ ويعطر أمضيف الكرامه"

والرابع الكله أملوحه _ كلما تهم ينطيك روحه

كلش عضيم _ جدآ وسيم _ إينكط أمروه وشهامه"

جا غير عم رقيه _ وراضع لبن وفيه
حيدر ابوه والوالده أبدويه
غذيت _ عباس _ دري وحنيني
خدام _ يحسين _ أنه وبنيني
.............................
نتوزع أدوار الخدمتك_ جا وين أكو أحسن من نعمتك

أنته الكريم _ أنته الرحيم _ وحنه العبيد الجوه إيدك"

من جعفر أبدي وأنته وضفه _ بالصعبه والشدات كلفه

شايل وقار_ينكط خضار_إيحب خاطرك حيل ويريدك"

لو بسمك أنتخيته _ أتنكط ملح لحيته
مثل الكمر هم ياكبر حميته
ويكول _ ممنون _ أفديه أبعيني
خدام _ يحسين _ أنه وبنيني
.............................
وعبدالله هيل وحلو الملكه _ يصلح عطر للكهوه دكه

لمن تصيح _ يمك يطيح _ ماي وعله أعتابك تبده"

ولو ردته للميدان فارس _ أمعدل ييمه إيسوي واهس

وكت النزال_ إيبجي الرجال_بالشده بي ضهرك تشده"

يتشرف أبخدمتك _ وما يكسر أبجلمتك
لو صار المكابل كلف خله حدر يمنتك
لو صال _ فراس _ زودي ويميني
خدام _ يحسين _ أنه وبنيني
..............................
وعون الينكط عشك خده _ أباب المخيم زرعه ورده

أرويحة حلال _ ونبرة دلال _ إيسر ناضرك لمن تصدله"

كلبه ترف ويمينه صلبه _ مثل الكمر لمن تحسبه

الحيدر أبوه_وعباس أخوه_لو شد عله الخيل أشيحمله"

لو شدت الحرايب _ إيعادل خمس كتايب
ذبه عله الصعبه أولدي متربي عالصعايب
أدريه _ هالحيد _ إيبيض جبيني
خدام _ يحسين _ أنه وبنيني
.............................
وعن دولة العباس شحجي _ تتكسر العبرات وبجي

وصفي يحير_ألساني كصير_بوليدي مجروحه الشهاده"

علمني أصير الكم وفيه _ من جنت عند أهلي إبدويه

عالم خيال_أبهيئة جمال_ إيسيرلي طيف عله الوساده"

كل أحنه فدوه لسمه _ أنخلقنه إله ونخدمه
تقصير ذره لو حصل لا سامح الله زحمه
العين _ والراس _ إيساري ويميني
خدام _ يحسين _ أنه وبنيني
...............................
جاوبهه الحسين وتحسر _ مشكوره يم عباس الازهر

نعم العطاء _ يم الوفاء _ مرفوع راسي أبهالعطيه"

بت الفحول الماكو منج_ أشيحجي الوفه ويكول عنج

أم الحنين _ أم البنين _ أم الحسن وحسين أخيه"

مشكوره يالعضيمه _ يالنيتج سليمه
بالدنيه ماكو مثلج حد الكرم كريمه
تنطين _ توفين _ البينج وبيني
خدام _ الحسين _ أنه وبنيني
............................

حسين باهض الحلفي

بعيوني مات الضوه _ رحميني يانينوى
الهوه _ وين الهوه مخنوكه
.......................
آنه الجنت وردة صبح _ ومسبحه أبشاطي الحنين"
يوميه وي لون الشمس_ إيشم خدي محبوبي الحسين"
عطر الجنان أبوجنتي _ أوشفتي تنكط ياسمين"
الفراشه تندهني الصبح _ أتصلي عله جفوف الادين"

عاشكني أجمل أبو _ وخلفلي عبدالله أخو
أبوي _ يمحنته ويا شوكه
الهوه _ وين الهوه مخنوكه
.............................
وي والدي أمن أمشي سوه _ أتغار الترافه البالوجود"
وتدنك أكبالي الشمس _ وللمغرب أبسرعه تعود"
أيشوفني ركعات الفجر _ ينحنن ويصيحآ سجود"
لو ما أسولف للكمر _ جا ما عرف معنه الخلود"

ياخذ تحيه الكمر _ كل ما أفز بالسحر
الكمر _ مني الجمال إيبوكه
الهوه _ وين الهوه مخنوكه
.............................
أيام مرت عالدلال _ أوصدر أمر رب السماء"
يحسين تطلع بالضعن _ وتقيم ثوره أبكربلاء"
وتتحول أيام الترف _ أيام مصبوغه ابدماء"
وذيج أبتسامات العشك _ تتحول أدموع وبكاء"

والسيف ياخذ زلم _ والنار تحرك خيم
صدور _ بالطف تضل مسحوكه
الهوه _ وين الهوه مخنوكه
...........................
قصه أويه قصه أتعايشت _ وي والدي كلهن دلال"
إيسولفلي جان اعله العشك _ وكلمة أحبج يامه كال"
تتركني أكله إيكلي لا _ لا بابا هالقصه محال"
أغفه أعله جف أيده الترف _ الله يا ذاك الجمال"

إيكعدني أصلي الفجر _ ونقره الضحى والقدر
وياه _ روح وجسد مطبوكه
الهوه _ وين الهوه مخنوكه
..........................
أتنززني صيحة والدي _ وتفزز أبروحي الانين"
إيكطع دليلي لو نده _ يهل الارض هل من معين"
أسمع جواب أمن الشمر _ خوفني يصرخ ياحسين"
خنجر حجر حضرته الك _ إله أكص بيه الوتين"

ماصدكت بالأمر _ أشكلك يبابا الشمر
يصيح _ الخنجر دماك أيضوكه
الهوه _ وين الهوه مخنوكه
........................
شغلتني صفنة والدي _ حسيت جن يمه الهوه قليل"
إيكض صدره من ياخذ نفس _ وبالممشه شو جدمه ثكيل"
يمه رحت خطوه ودمع _ ردت أمسح أدموعه التسيل"
ونتوادع أبنيه وأبو _ وشويه من أهمومه أشيل"

ونطاني وردة عشك _ وكلي أحبج صدك
وداع _ بس مهجتي محروكه
الهوه _ وين الهوه مخنوكه
.......................

حسين باهض الحلفي

تعبانه ياستر العبي _ امن الفركه لو سوط السبي
مشغولة البال _ وجروحج أثكال
ياغريبه _ ياغريبه
...........................
هجران _ وحزان _ والليل أعله حاله يكسر الخاطر
أتحنين _ تبجين _ شيجيبه التهشم صدره بالحافر

ونيتي يزينب والجرح يكبر
تمشين أعله نيتج والجدم يعثر
بالمصايب"
تونين أعله كيفج روحج أمخلصه
الدمع تارك عله اخدود الخدر نصه
أشكد نوايب"

ذبلانه كد طاري العطش _ محتاجه عباس ونعش
بس ماكو أمال _ وجروحج أثكال
ياغريبه _ ياغريبه
.................................
جم عين _ تربين _ للميت خبرهم والدرب عثره
جم أه _ أو ويلاه _ ودمعة فاكده أتطيح أويه كل نضره

ميت واهسج مابين الف حسبه
ساعات الهجر ما تنحمل صعبه
ياغريبه"
كل اليوجعن بكليبج ألتمن
أعيونج راح من كثر الهجر يعمن
يالحبيبه"

يالفاكده أخوان وأهل _ برض الغرب موتي أبعجل
ثكل الحمل مال _ وجروحج أثكال
ياغريبه ياغريبه
.............................
أهات _ حسبات _ مات النبض بيج أولا خبر منهم
بدموع _ وضلوع _ حانيهه المعاتب والنشد عنهم

وين الكال آنه ودك الج صدره
معقوله نسه يا زينب العشره
والله صعبه"
هذا الموت أجاج وأنتي بالغربه
حسين أبعيد دربه مو سهل دربه
أيكلبه"

شيجيبه محزوز النحر _ عشتي أبقهر موتي أبقهر
يا هضمة الحال _ وجروحج أثكال
ياغريبه ياغريبه
............................
لحسين _ أتحنين _ أنحنيتي وبينت الحدبه أبعباتج
نضرات _ حسبات _ وعثرت جلمة الخويه أبلهاتج

تحجين أويه روحج إي يجي هسه
وتدنكين أبحسرتج جنج أمأيسه
ما يجونج"
الداسته الخيول ابعشر خياله
الدفنوه بحصيره أشيجمع أوصاله
يا ضنونج"

الشابع سحك شابع ذبح _ وماشاج راس أعله الرمح
وتكطع أوصال _ وجروحج أثكال
ياغريبه ياغريبه
...........................
أثار _ للنار _ أجدامج والجفوف اهواي محتركه
وهموم _ ودموم _ وركبتج من أثر حبل السبي زركه

أجروحج لسه خضره زينب ورطبه
بس كدم السياط أمخزنه وصلبه
يا هضيمه"
أمشيب رمش عينج شيبه يم شيبه
موتج حان ماكو العلتج طيبه
يا حريمه"

أرتاحي يعمه أمن الإلم _ أوصيتج أجفنج بالعلم
وذكره أمن الحبال _ وجروحج أثكال
ياغريبه ياغريبه
..........................
من كال _ ينشال _ نعشج زينب أعله أمتون شماتج
أتموتين _ تبجين _ قهر وتبلل التابوت دمعاتج

يشيلون الجنازه أجرت وادم
أعتذر عباس أخوج أعله النهر نايم
ما يجيلج"
أشما أهيل الترايب ونتج تعله
أفراك حسين أبوي ابكلبج أشخله
هده حيلج"

يالفاكده أخوان أشكثر _ والمثلج إيقبله العذر
مو جلمه تنكال _ وجروحج أثكال
ياغريبه ياغريبه
.......................

حسين باهض الحلفي

أموت اعله المجالس _ المشي والدمعه واهس
حسين حسين _ دمعه ولوعه وحسره
حسين حسين _ شهكه وعبره وعبره
...............................
مشه بينه الزمن دمعه _ أحن للكسرو ضلعه _ شسولف والنبض أه"
نويت أزيارة المولى _ العله أجروحه الملك صلى _ وعله أجروحه صلى الله

حبيبي _ يمالكني الك كلي وقف عمري أنه"
حبيبي _ أجيتك روحي تسبكني بعد داير سنه"

أفك ريجي أبدمعتي _ وكاسرها أبحسرتي
حسين حسين _ الخطوه عن حجه وعمره
حسين حسين _ شهكه وعبره وعبره
.................................
أجيتك عاكد النيه _ أواسي أسكينه ورقيه _ الهزيله أتعب الحيل"
على زينب أون ونحب _ أون ونحب على زينب _ على السوط وبجي الليل"

أجيتك _ تقبلني أبخدر زينب يبو كلب الترف
أجيتك _ على أجفوفي شلت ذنبي مقصر أعترف

يسلطان الخليقه _ يبو الروح الرقيقه
حسين حسين _ يابو أجروح الخضره
حسين حسين _ شهكه وعبره وعبره
.............................
أكابر عالجرح ومشي _ دموعي أتغازل أبرمشي _ العيون إتسولف أدموع"
شفت شايب حنه ضهره _ أويه كل نكلة جدم عثره _ أبطريقك حاني الضلوع"

طريقك _ عطر جنه ورضا الله ومشي فوك السمه
طريقك _ عشك عابس خجل جون ورضا من فاطمه

الصراط الحطه ربك _ مشي خطوه أعله دربك
حسين حسين _ سلطان وأحنه الفقره
حسين حسين _ شهكه وعبره وعبره
...............................
يالمسافر على رمحك _ يالحنين أشكبر جرحك _ شواسي وأنته مذبوح"
أسولف مره وي روحي _ الحسين أبكبره مذبوحي _ ذبيح وينزف أجروح"

شوفي _ إذا انته أنذبح طفلك على صدرك عطش
شوفي _ وحس أمن السهم كلبك رجف نز ونخمش

أذا أمشي أبعمر نوح _ شوفي أهواي الجروح
حسين حسين _ ذبحو طفله أبصدره
حسين حسين _ شهكه وعبره وعبره
................................
حرارة ذبح المكمط _ أبيا خانة حزن تنحط _ إذا جان السهم ماي"
الخلق لو يمشي الك كله _ قدر سلايه مو نبله _ ما يوفي قدر هاي"

رقيه _ تراجيهه وسطر خدهه الوحدهن كربله
رقيه _ العوالم لو بجت من دم محال اولا حزنهه أتعادله

مشينه وكل كصدنه _ نكفر عن ذنبنه
حسين حسين _ خالد ثابت ذكره
حسين حسين _ شهكه وعبره وعبره
...............................
يالمتصدق أبمحبس _ حته الدنيا تتنفس _ كريم أهواي يحسين"
إذا أكرمت أن تشبع _ نطيته هوه والإصبع _ الخنجر فاهمك زين"

أجالك _ أخذ كلشي عزم يمشي ورجع كص أصبعك
أجالك _ تكله اإبعد عن الغاره الفرس لا يسحكك

الحنين الكله رحمه _ تطشر لجمه لجمه
حسين حسين _ أتفرهد عمره وخدره
حسين حسين شهكه وعبره وعبره
...................................

حسين باهض الحلفي

غالي غالي _ تتركني لحالي _ ياكمر الليالي _ علي _ علي"
غالي غالي _ ياوردة خيامي _ يا أحله الاسامي _ علي _ علي"
حبيب _ كلبي ونبضته" _ حبيب -ياحرز أخوته"
علي _ علي
...............................
شايل بزلوفك عطر الجنه
تتمايل كدامي وركة حنه

أه _ بيه أبكد جمالك _ ونعومة دلالك _ من فدوه الخيالك _ يا أحله الناس"
أه _ يا لب الحشاشه _ يمروي العطاشه _ معشوك الفراشه _ وعمه والعباس"

تاني تاني _ لا تبعد عليه _ يا هيبة رقيه _ علي _ علي"
تاني تاني _ أشبكني أبذراعك _ خي يطول وداعك _ علي _ علي"
حبيب- أمه أو نخته _ حبيب- يا حرز أخوته
علي _ علي
............................
وردة خيمتنه وعشك أجروحي
أبني وفص عيني وراحة روحي

لا _ لا تهجر دليلي _ شيبرد غليلي _ يمسندلي حيلي _ يكتل فركاك"
لا _ أمك ياهو إلهه _ من يثكل حملهه _ هجرانك يذلهه _ يصعب تنساك"

روحي روحي _ ماتحمل غيابك _ تفجعها أبمصابك _ علي _ علي"
روحي روحي _ ميته أولا أودعك _ بالمذبح أضيعك _ علي _ علي"
حبيب- فدوه الضحكته _ حبيب- يا حرز أخوته
علي _ علي
..............................
فدوه الصفناتك من أتصدلي
أعشك جلماتك يمه أتكلي

ليش _ أتفاركني أبدمعتي _ ياتجوة كبرتي _ مذبوحه أبحسرتي _ يانور العين"
ليش _ دلالي كسرته _ يحسين ونضرته _ وحزامه وكشخته _ يازود حسين"

عيني عيني _ تعمه أولا أشوفك _ توميلي أبجفوفك _ علي _ علي"
عيني عيني _ ماخافن عليهه _ لو ما أنته بيهه _ علي _ علي"
حبيب- وعشك طلعته _ حبيب- يا حرز أخوته
علي _ علي
.............................
حسين إيصد صوبك وتهل عينه
أرقيه أمتانيتك ويه أسكينه

صوت _ من الخيمه يضهر _ بالعبره تكسر _ أتكلك عمه الاكبر _ ودعني وروح"
صوت _ وكف نبضي بيه _ من خيمة رقيه _ نادتك خطيه _ يابعد الروح"

أزغيره أزغيره _ أعزيزة كلب ابوها _ وتحن الأخوها _ علي _ علي"
أزغيره أزغيره _ شينسيهه رسمك _ أتحب وتعشك أسمك _ علي _ علي"
حبيب- تكتل فركته _ حبيب- يا حرز أخوته
علي _ علي
.................................
رحت وعين أمك ضلت تربيلك
ياهيبة هاشم السيف إيناغيلك

سيف _ بالعسكر يريدك _ مشتاك الوريدك _ يالحيل الله بيدك _ ياصل الصيف"
سيف _ بيدك ونته الاكبر _ ياموت المعسكر _ عزريل وتكتر _ موتك بالكيف"

يبني يبني _ الحومه التدخللهه _ أتأدبهه وتذلهه _ علي _ علي"
يبني يبني _ حيدر يبني جنك _ منه وهو منك _ علي _ علي"
حبيب- عزمه وهيبته _ حبيب- يا حرز أخوته
علي _ علي
..............................
الخيمه أمتانيتك يعمود الخيمه
صحراء أجروحي ووجودك غيمه

وين _ صوتك ماسمعته _ يا كلبي ونبضته _ عمري وروحي أنته _ أتأخرت أهواي"
وين _ يالماخذ حياتي _ وذابح أمنياتي _ ماتت ذكرياتي _ يالب أحشاي"

أحسينك أحسينك _ أتغير لونه شفته _ وتتعثر جلمته _ علي _ علي"
أحسينك أحسينك _ مال أبسرعه ضهره _ وبانت عنده كسره _ علي _ علي"
حبيب- مالت كامته _ حبيب- يا حرز أخوته
علي _ علي
.................................

حسين باهض الحلفي

كل العندي أهديته دفعة بله
المهدي الليله ابدمعه طب كربله
سلامات _ عله أجروحك حبيبي
سلامات _ الألم روحك حبيبي
.........................
أهلال الدمع بين عله أسطوح الكواكب
وغصت جروح وحسره رايات المواكب

مجروحه _ المجالس ذايبه ومكسور واهسهه
مجروحه _ الحسينيات صاحت ونطبك حسهه
مجروحه _ الشواطي أمكدره مذبوح نورسهه

ماتت نبضة كلبي شوك وألم
أبعيني تجوي الدمعه مثل الخيم
سلامات _ لجل دمعك حبيبي
سلامات _ الألم ضلعك حبيبي
...........................
أسم الله أعله كلبك يابو صالح من محنته
أشحاله التعيش أبخاطره ومسبيه عمته

أهاتك _ عله أنياك الهزل تتصور الحاله
أهاتك _ أبكبر طف كربله وجروحه وهواله
أهاتك _ تطلع من صدر ساحكته خياله

الله ايساعد كلبك هالكد يحن
عايش عمرك كله حزن حزن أبحزن
سلامات _ عله أنفاسك حبيبي
سلامات _ عله أحساسك حبيبي
...........................
تنكل أبجدمك كون يالذبحو حياتك
للطف أجيت أتكودك أصعب ذكرياتك

ياحالك _ ضهرك منكسر والدمعه بعيونك
ياحالك _ أثر سوط السبايا أمجرح أمتونك
ياحالك _ شهر عاشور غير شكلك ولونك

الدمعه الصفنه الحسره كلهن قهر
حكك تمشي أبعثره وكسرة ضهر
سلامات _ لحسراتك حبيبي
سلامات _ أعله صفناتك حبيبي
...............................
أشجايب أوياك الكربله ابهاي الليالي
شايل بقايه أجروح من جم جسد غالي

أعله أمتونك _ شايل أكوار وبي قصص وسوالف
أعله أمتونك _ وصلة حصيره وبيهه دم ما ناشف
أعله أمتونك _ خنجر ذبح أبراس الرمح متخالف

الخنجر الخنصر الحافر وسهم الكلب
بيهن جاي أبهمك للطف تطب
سلامات _ من الخنجر حبيبي
سلامات _ عله الخنصر حبيبي
.............................
يم راس الحسين أكعدت وتحاجي نحره
أنطيني عبدالله أرد أرش ماي أعله ثغره

عبدالله _ نحر بايس نحر ومشابك حسينه
عبدالله _ ابكسرات الضلوع أموسد إيدينه
عبدالله _ مبيوكه ضحكته ودمعته أبعينه

غافي وجرحه أمهود من الألم
لسه أبنحره أتلجمه وصلة سهم
سلامات _ على نحرك حبيبي
سلامات _ على صدرك حبيبي
..............................
أبراس الرمح ناشر قميص أمشككينه
الخنصر شلع كلبك يبو أجروح الحنينه

مبيوكه _ أهدوم حسين والمحبس والعمامه
مبيوكه _ راية عمك الصابو عله الهامه
مبيوكه _ التراجي الفززن كلبك أبألأمه

الله أيعينك لسه أتشم الهوه
تمشي وتعثر أبعينك مات الضوه
سلامات _ عله أعيونك حبيبي
سلامات _ الرسم لونك حبيبي
.............................

حسين باهض الحلفي

ياتجوة ضهري ويحزامي ونوماسي
يعمود الخيمه وبيك أرفع راسي
أه _ أه _ أه عباس
........................
قصة خوتنه _ تبدي أبنيتنه _ ماتدري الناس _ عباس أغله امن الهوه"
يارب الغيره _ وياعطر الديره _ ياشوف العين _ لحسين _ تنطيه الضوه"

ياجلمة خويه الما يحجيهه السانك ليش
بس الحنيه ودمعة عينك بيك أتعيش
أه _ أه _ أه

يمحجب زينب بالرايه وبالنخوه
يالشايل همي أعله أزنودك بالخوه
أه _ أه _ أه _ عباس
..........................
أقسم بجفوفك _ يوم الما أشوفك _ أتنفس مخنوك _ ماضوك _ طعم العافيه"
تارس نضراتي _ وشاغل حسباتي _ يابو حجايات _ وجلمات _ كلش دافيه"

ياطب أجروحي الما ينفعهن غيرك لا
الحسره البفراكك بس تتسمه أبحسرة اه
أه _ أه _ أه

عايشت أجروحي وكل حسره أبأنفاسي
تربية زينب يا أجمل عباسي
أه _ أه _ أه _ عباس
..........................
أتطيح أعله أعتابي _ وتتبده أبابي _ جن طيحت ماي _ وفاي _ مثلك ما يصح"
تتعايش بيه _ نسمات وريه _ بالبيت أبخور _ وتدور _ جن وردة صبح"

يافتشة عين أمعزب ومفاركهه الظيف
يافارس روحي الما يحله الغير أيده السيف
أه _ أه _ أه

فدوه النضراتك ياسوري وصيواني
يا رفعة راسي ويا هيبة خواني
أه _ أه _ أه _ عباس
.........................
بيك أرفع هامي _ ياحرز أخيامي _ وقبضة يمناي _ وحماي _ الزينب والحرم"
ياعم أسكينه _ الما يبخل عينه _ والينطي الشوف _ وجفوف _ من أجل الخيم"

ياتجوة ضهري وكوة حيلي أبجف يمناك
ماتسوه الدنيه الما تجمعني أبضي عيناك
أه _ أه _ أه

أمأمن بوجودك من دهري ونكباته
ياعم أولادي ويا كافل لخواته
أه _ أه _ أه _ عباس
......................
باجر عدواني _ توصل صيواني _ ونته أبلا عين _ ويدين _ أثنين أمكطعه"
إيسلبون أيتامي _ إيحركون اخيامي _ وتهج أطفال _ بالحال _ يم المشرعه"

يا كافل زينب تطلع زينب خويه اتصيح
تتعثر بين الخدر كلما تمشي أتطيح
أه _ أه _ أه

خدر الله الغالي أبلا والي ومحتاره
وصيوان العفه أعله العيله أتشب ناره
أه _ أه _ أه _ عباس
.......................
جم طفلع أتنادي _ أذاني الحادي _ أبطيحة عباس _ الناس _ ماترحم تره"
أخلاف الحاميهه _ السوط يماشيهه _ ومن فوك النوك _ بالسوك _ توكع جم مره"

باجر ياخويه الدنيه أتشتت شملي أوياك
باجر ما تسمع صيحة زينب من تنخاك
أه _ أه _ أه

أمن أتطيح الرايه أبصف جودك يسبوها
أعله الناكه العرجه المهزوله إيودوها
أه _ أه _ أه _ عباس
......................

حسين باهض الحلفي

يالأكبر ياكرة عيني
ياروحي وياعشك أسنين
الكوم وصلت يم أخيامي
وآنه أبلا ناصر تدريني
ياعل _ ياعلي _ ياعلي
.....................
علي مدد يالأكبر فزعه
شيل العلم ختضيك الوسعه
اليدنه الخيم طك ضهره وضلعه
وارث علي ياسبع السبعه

يشايل فقار بعيونك
تشبه حيدر ما ينسونك
ياقالع باب الطف كله
أمعكب خيبر خلف امتونك
ياعلي _ ياعلي _ ياعلي
........................
سم العطش والحر والهيمه
ثكل الحرب والدرع وضيمه
كلهن نساهن صاحب الشيمه
عالجيش ضلل مثل الغيمه

حاصرهم والسيف يتجادح
والخيل راس أبراس تتناطف
رادو صلح والخوف ماخذهم
كاللهم بالسيف نتصالح
ياعلي _ ياعلي _ ياعلي
.........................
أسد هجم ونسد المشرد
روس الزلم طشار ما تنعد
جثه اعله جثه أتلول تتكود
حي الله حيله الحار ما يبرد

فرسانهم بيد رجليهه
قادتهم سيفه أمبجيهه
أرواحهم ماي وجفاها
ويخوطهه ويشرب صافيهه
ياعلي _ ياعلي _ ياعلي
......................
لمن برز فارسهم الاول
هز الرمح وتكنه وصول
جم جلمه سولف بعده ماكمل
نصين شكه أبسيفه المعدل

تسلم يمينك ياعلي سالم
تنعد بفنون الحرب عالم
الهاشميه أبراسك تدوي
أشحده أيتدنه بكر أبن غانم
ياعلي _ ياعلي _ ياعلي
.......................
واحد أحد والجيش مو كدهه
زودك كوي والخيل بريدهه
أتشد الكتيبه وسيفك إيردهه
بالرمح تخمش كلب قائدهه

شردت تاهت ضاعت كلهه
الخيل الأخيره أتدوس أولهه
عبالهم واحد يكدروله
حفتة شلب كطع سنابلهه
ياعلي _ ياعلي _ ياعلي
........................
الحشر حصل شنهو المعلومه
تركض عراة الناس بالحومه
أبخيت اليلحك ينزع أهدومه
أبن العاص هساعه رجع يومه

ياوارث حيدر صولاته
ياجابر خاطر عماته
يالهادي بخلقه وأخلاقه
أحجاياتك جنهه أحجاياته
ياعلي _ ياعلي _ ياعلي
........................

حسين باهض الحلفي

دورتك حلم ملكه
بين الفركه والشبكه
لكيت الحافر إيبديك
عله أضلوعي أويه كل سحكه
حسين _ حسين _ أه _ أه
............................
إله الحب إله الأه _ عاشك نبرة إحساسك
مخلوق وخلقت النور _ من وجنات عباسك
الورد صار ونبت بالكاع _ من أوطاته بمداسك
يالشايل جمال الله _ وعطفه ولطفه بنفاسك

يمفاركني بجروحي
أرجع يابعد روحي
إليفارك حبيبه إيموت
كون أمن الهجر حكه
حسين _ حسين _ أه _ أه
................................
قصة شوكي تبدي أوياك _ أمن أخر شبكه بالخيمه
منهه وباليتم حسيت _ وبلوعاته وبضيمه
عدل وعيوني تنضر ليك _ ميت شابك إيتيمه
كتلك يا حبيبي أرجوك _ لا ترحل يبو الشيمه

عفتني ومنهه ماشفتك
لو أدري فلا عفتك
رحت عني وبقيت أتناك
أبروح أوريه مختنكه
حسين _ حسين _ أه _ أه
...............................
أعاين والزلم والخيل _ ملتمه الكطع نحرك
ونته متعب وعطشان _ يابس كلبك وثغرك
وحيد وميت العباس _ جا ياهو الذي إينصرك
تصد سيف وتشاكف سيف _ تجيك الطعنه من ضهرك

ضامي وماشفت دربك
السهم نابت وصط كلبك
تنوي أمن الفرس وتميل
بيك أبكل كتر طكه
حسين _ حسين _ أه _ أه
............................
طحت مثل النده اعله الكاع _ أسيوف أهوايه فزعولك
مصوب كلبك وتعبان _ بلكي أميه جابولك
أجروح البيك كلهه أكبار _ ملح وتراب ذرولك
أبكل صفحه عليهه أتميل _ رمح واكف يتجولك

شويه وتوكف أنفاسك
جملوها أبحجر راسك
فوك اجروحك الرطبات
جبينه هالحجر شكه
حسين _ حسين _ أه _ أه
..............................
الشمر يفتر عليك إيطوف _ ونته أتجي ماتكدر
تكوم إيرفسك الذباح _ ترد تشبك تراب البر
عتك من قميصك حيل _ رادك عالوجه تفتر
طبره أبطبره يتخير _ حد ما هشم المنحر

طكاك أثنعش ضربه
لارف لا أنكسر كلبه
أبكل ضربه تحن أبأه
وتطلع بالنحر شهكه
حسين _ حسين _ أه _ أه
.............................
هس توه الذبح خلصان _ بعدهه أجروحك أتندي
أجت كلهه تسلب بيك _ جندي إيدافع أبجندي
هذا اليبدي كص أيديك _ وذاك أبخنصرك يبدي
سلبو هدمك المشكوك _ ما صارت ولا تسدي

خيل أملثمه تنتضرك
راسك طايح أبكترك
وشمر أتعنه المخيم
أعله أبنياتك إيحركه
حسين _ حسين _ أه _ أه
.............................

حسين باهض الحلفي