tgoop.com/xcrhyhvfewfhjkbqhj/16115
Last Update:
••❥ًً❀(•«﷽»•)❀❥ ••
اللهم صل على محمد وآل محمد 🥀
قصيدة لأربعينية الأمام الحسين عليه السلام ووصول مولاتي زينب عليها السلام لأرض كربلاء
➖〰➖〰➖〰➖〰
وصلت كربله زينب ومهمومه
تقيم الاربعين العافته ابحومه
تشكي حال الدروب تحچي بصوت متعوب
الاخو ضي النواظر والله غالي
➖〰➖〰➖〰➖
ضي عيني فگدته ورحت عنه
واجيت اليوم اشم ريحة محنه
اگله اگعد يعمري الكم وصلنه
وعله گبور الغوالي احنه نشدنه
اخيي وين مدفون ارشه بماي العيون
يعمه ياعلي جاوب سؤالي
➖〰➖〰➖〰➖
يعمه يا علي دليني بيهم
عطاشه ومن دمع عيني ارويهم
اعزاز الگلب يالحلوه محاچيهم
اسولف عن مرار الشام ابچيهم
وكلهم خل يشوفون زينب حالهه شلون
من راحت اسيره بغير والي
➖〰➖〰➖〰➖
اسيره وصاعده يااخوتي عالنوگ
ويمروني عليكم ذبحني الشوگ
لمصارعكم اعاين گلبي محروگ
وصدر ابن الرساله ابخيل مسحوگ
موقف ما نسيته الشمر يلزم لحيته
وراس الگمر شفته برمح عالي
➖〰➖ 〰➖〰➖
جبت الروس يهلي وجايتكم
وچانت باليسر سلوه الإختكم
بس اگبور يولياني شفتكم
لتغسيل وچفن دفنوا جثثكم
هدت حيلي الگبور تحت تربان البدور
ينار افراگم تحرك ابدلالي
➖〰➖〰➖〰➖
بدلالي تشب نار الهظيمه
وصلت واربعينك راح اقيمه
واسولف عالسبي وايامه الآليمه
وبالشام ادفنت خويه يتيمه
اشكي حالي عندك يروحي يل فگدتك
وودعنك وارد للوطن تالي
➖〰➖〰➖〰➖
اودعكم وَرِد لديار اهلنه
ومنازلكم خليه اهل المَحَنه
يخويه هالأمر هشم عَظُمنَه
وعليكم مستمر ما بُطَل وَنَه
راح أمشي واخليكم تبچي عيني عليكم
يوحشة داركم هدمت حالي
➖〰➖〰➖〰➖
تمت والحمد لله
✍ ✍ خادمات أهل البيت عليهم السلام
( أزهار جبار الجياشي )
و
( أم علي الحلفي )
نهدي ثواب عملنا المتواضع هذا إلى سيدتي ومولاتي فخر المخدرات وكعبة الاحزان زينب عليها السلام
نسألكم الدعاء بتعجيل الفرج لمولانا صاحب العصر والزمان عجل الله فرجه وسهل مخرجه
غير مبري الذمه من يحذف أو يغير أسماء الشاعرات وينسب الكلام له
https://www.tgoop.com/xcrhyhvfewfhjkbqhj
BY خادمة أهل البيت عليهم السلام الشاعره أزهار جبار الجياشي لنشر القصائد المشتركه
Share with your friend now:
tgoop.com/xcrhyhvfewfhjkbqhj/16115