tgoop.com/xvnnmm/5586
Last Update:
ما حسبالي يبطون وشل ماي العيون كطعو بيه الاحباب
راحت ذيج الايام ولا عندي جفن نام دوم امكابله الباب
*****
تدرون المحنه امواصل اتريد
واكتبها الرساله وتثكل الايد
شيفيد العتب ياروحي شيفيد
جانو ولدي يمي وراحو بعيد
وانه والعليله قصتنه طويله وشبت نار المصاب
ما حسبالي يبطون وشل ماي العيون كطعو بيه الاحباب
*****
مشتاكه الهلي وتهل العيون
وامشي للمجان البي يكعدون
ايلجمون الكلب ليش اليروحون
ما ادري شسوي وتخلص اشلون
عشت الوحدي بالدار ومامش منهم اخبار وكلبي امن الحزن ذاب
ما حسبالي يبطون وشل ماي العيون كطعو بيه الاحباب
****
انه ام البنين وابتدي امنين
كل ولدي صحت فدوه للحسين
كضيت الضهر من كلي ماشين
وملت كعدتي حته الحياطين
شو كل ما يجي الليل بكلبي اصورهم تعيل ويلجمني الهوه الهاب
ما حسبالي يبطون وشل ماي العيون كطعو بيه الاحباب
****
الما يمها ولدها تشبع هموم
شو عيني ترف صارلها جم يوم
والفارك هله ايضل يكره النوم
انه بصدري خنكه وكلبي مجلوم
الخيط بصفي ينشاف المثلي صعبه تنعاف راسي من القهر شاب
ما حسبالي يبطون وشل ماي العيون كطعو بيه الاحباب
******
بلا رخصه الحزن يدخل للبيوت
ردت اصرخ تعالو وما طلع صوت
ما عندي وكت تانيني ياموت
خدي للدمع سويته تابوت
حته امن ابلع الريج جرحي صاير ايهيج يمته يشفه الصواب
ما حسبالي يبطون وشل ماي العيون كطعو بيه الاحباب
*****
ما بيه انتظر مليت الفراك
يكضيها بجي اليوميه يشتاك
مر افراكهم واشلون ينضاك
احلم يمي اجو واحلامي تنباك
خلص عمري صفنات وبعيده المسافات وتعب صبري الغياب
ما حسبالي يبطون وشل ماي العيون كطعو بيه الاحباب
*****
تمت
تحسين الخفاجي
BY قناة الشاعر خادم فاطمه العليله ع
Share with your friend now:
tgoop.com/xvnnmm/5586