tgoop.com/ya_katealkafen/56626
Last Update:
الزهراء تخاطب امها خديجه الكبرى عليهما السلام
على طور حجي باسم يابو فاضل طيحت ايدك مو وكتها
ــــــــــــ المستهل 👇ــــــــــــــ
ياخديجه/ النبي محزون وتكدر
ياخديجه/ گلبي من ضيمه تفطر
ياخديجه/ يوم عاشر يوم اگشر ---- ياخديجه
ـــــــ أبيات القصيده👇 ـــــــ
عاشر برمضان متي وشيب الراس
والنبي ينحب عليچ وتلطم الناس
ريتي مخنوگه واجرن گوه الانفاس
انتي مليانه محنه وطيبه واحساس
يالحنينه/ خيمتي انتي وعمادي
يالحنينه/ اعليج بالحسرات انادي
يالحنينه/ وناري وسط الگلب تسعر --- ياخديجه
ـــــــــــــــــــ①ـــــــــــــــــــ
من يهل شهر الفضيله شهر رمضان
بيه اذكرچ وابچي حيل بدمع غدران
ابيوم عاشر عفتي گلبي اهواي حزنان
وجسمي مايحمل اذيه وحيل تعبان
صحت يمه/انهدم حيلي من النوايب
صحت يمه/ وگلبي من الفرگه ذايب
صحت يمه/دمعي عالخدين ينثر---ياخديجه
ـــــــــــــــــــ②ـــــــــــــــــــ
دمعتي عله خدودي كل لحظه تلالي
انحب اعليچ وانوح بصوت عالي
رحتي عني والفرح والهم صفالي
صرت بعدچ يمه حال الضيم حالي
وداعت الله /رايحه وعفتيني وحدي
وداعت الله/دمعتي تجري عله خدي
وداعت الله/گلبي بفراگج تكسر---ياخديجه
ـــــــــــــــــــ③ـــــــــــــــــــ
ابچي أعليج واون ونه خفيه
والنبي حزنان والدمعه جريه
انظر مكانج خلي واصفگ بيديه
غيابچ اثر يالعزيره حيل بيه
رحتي لاوين /انحب ودمعاتي تجري
رحتي لاوين/كون عمرج عگب عمري
رحتي لاوين/گلبي مابي حيل يصبر ---ياخديجه
ـــــــــــــــــــ④ـــــــــــــــــــ
موفقط شعري الي شيب گلبي هم شاب
حين شفتج يالحنينه جوه التراب
صرت من بعدج ييمه مالي أحباب
صحت وبصوت الثكالى ومسمع اجواب
مااريده/عمري بعدچ يالحنينه
مااريده/صرت مهمومه وحزينه
مااريده/ بروحتج وجهي تغيير ---ياخديجه
ـــــــــــــــــــ⑤ـــــــــــــــــــ
✍ الخادمه ام زيد الشمري
نسال •اللّـہ̣̥ القبول
ونسالكم الدعاء بتعجيل فرج مولانا صاحب العصر والزمان عج
https://www.tgoop.com/ya_zahraa1977
BY 📚قناة شاعرات الطف📚
Share with your friend now:
tgoop.com/ya_katealkafen/56626