tgoop.com/yaseralzeade/2910
Last Update:
لساان حال مولاتنا المعصومه بفراگ ابوها... ص
ثگيل... موسى ابن جعفر الكاظم ص
شگد نطرتچ يالمنيه...والدي وراح امن اديه
شـدتي ياربي شده
أخذ عمري وليه رده
يا غربتـــــــي............... ياغربتــــــــي
ــــــــــــــــــــــــــــــــــــــــــــــــــــ
فراگه ابد لا موسهل ...... حكم أعدام ابحبل
غيابه سابيلي العقل... جن ابغيابه
والدي عني ابتعد ....... وادري مايرجع بعد
طير مسجون اوشرد...گلبي ابعذابه
بفراگه... دموعي ابد ما بطلن
بفراگه... لا نامن ولا هــــودن
بفراگه... گد البواچي انعـــمن... بفــــــــراگه
فرگته كلش چبيره .......والدي چا نالي ديــــــره
ماي من ايــدي وتبده
أخذ عمري وليه رده
يا حسرتـــــــــــــــي...... ياحسرتـــــــــــــــــــــي
ـــــــــــــــــــــــــــــــــــــــــــــــــــــــــــــــ
شّلي بعده بال عمر ...... حالتي لا ما تسر
العنــــده غايب ينتضر.....وانه أكابر
طولي بفراگه انكسر... كسرت الشمس العصر
ما لحگ حته الصبر... يجبرلي خاطر
مشتاگه... لحضان ابوي وشبگته
مشتاگه... لسوالفه والضــــحكته
مشتاگه... ذبحتني والله فـــرگته... مشتاگـــــــه
غيبته گّطعت انفاسي .....من زغر شيبتلي راسي
راح والراح اشيـــــرده
أخذ عمــــري وليه رده
يا محنتـــــــي................. يا محنتــــــــــي
ــــــــــــــــــــــــــــــــــــــــــــــــــــــــــ
ليل ومزاعل گمــر ...... جرف ما مــــــــره نهر
هيچ خلاني الـدهر.... ابلا گرايب
غربتي غربة وطـــن ...... توالت اعليه المـحن
الفرح وياي اندفـــن..... طلعت مصايب
بعيوني..... غير الفراگ انه اشفت
بعيوني... مذبوحه احلامي صفت
بعيوني...كل صوره حلوه مابقت... بعيوني
بغربتي عافاني وحدي ... دمعتي حرگتلي خدي
چفي للــــباري أمــــده
أخذ عمــــري وليه رده
ياهضمتـــــــــي............... ياهضمتـــــــــي
ـــــــــــــــــــــــــــــــــــــــــــــــــــــــــ
علّه صارت بالگلب ........ والـــــدي انساه صعب
العيشه بديار الغرب..... چنهــــــا المگابر
خله احس ابروحته ...... من يسدها وحشته
صعبه صارت شوفته..... چندوب اصابر
عافاني... ألچان ألي مثل الهوه
عافاني... معلوله وبعــــازة دوه
عافاني... صرت انه والميت سوه... عافاني
أضلم ابعيني نهاري ..... أنهضم لونيني جاري
ضهري چا بيمن اسنده
أخذ عمــــري وليه رده
يا كسرتـــــــــــي........... يا كسرتـــــــــــي
ــــــــــــــــــــــــــــــــــــــــــــــــــــــــــــــ
وياي صوره اتشابهت ..... طفله مثلي تعلعلت
بدار وحــــــدها صفت.... بربع حياطين
وي حزنها تعاشرت ..... الدنيا بيها ادبرت
وبــــــــأهلها ما درت.... ياوسفه ميتين
تشبهني...... شصار بأبوها مادرت
تشبهني..... بس هيه حيل اتعذبت
تشبهني.... راحو زلم نسوه ارجعت.... تشبهني
بكربله خسرت اهلها ..... بس عليل الرجع الها
حكم الله وهذه وعـده
أخذ عمــــري وليه رده
يا وحشتــــــــــــي.... يا وحشتـــــــــــــــــــي
ـــــــــــــــــــــــــــــــــــــــــــــــــ
تمت بفضلهم صلوات ربي عليهم
✍️ياسر الزيادي
BY قناة الشاعر والملا ياسر الزيادي الثانيه
Share with your friend now:
tgoop.com/yaseralzeade/2910