tgoop.com/ysrhs/1170
Last Update:
#محرم_الحرام١٤٤٦
بتراب الطف نزلنه .. ها يبو تراب
بغرب نَـوّخ رحلنـه .. ها يبو تراب
تسلينه بغربنه .. تسد وحشة گلبنه
ها يبو تراب
≈≈≈ ≈≈≈ ≈≈≈ ≈≈≈ ≈≈≈
وصلنه ،، وسألنه ،، وعرفنه الگاع گاع الغاضريه
بچينه ،، وحچينه .. گلنه هنا تفرّقنه المنيه
بالعيون ،، الحچي يكون ،، ادقّ وأبلغ بوصف الرزيه
سولفنه بمدامعنه ،، وصِحنه يا علي ضِعنه ،، يكرار ،، الزمن جار
من كرب وبلاء لِذنه ،، بيك وهم تعوذنه ،، يبو الجار ،، الزمن جار
علي احسبنه جوارك .. يا حمه الجار
وتعال النه بفقارك .. يا حمه الجار
بضِمَه وشوفك عذِبنه .. تسد وحشة گلبنه
ها يبو تراب
≈≈≈ ≈≈≈ ≈≈≈ ≈≈≈ ≈≈≈
الرمل صار ،، بالاعبار ،، يحاچي زينب وزينب تحاچيه
استعدّي ،، التفگدي ،، سلف مو بس اخو واحد تفگديه
يموتون ،، والعيون ،، تصدلچ وابو فاضل ما تحصليه
گالت ياتراب ادري ،، بگاعك ينّهب خدري ،، والايتام ،، والخيام
من نتراكض بنارك ،، استرنه بعجّة اغبارك ،، السبي شضام ،، والخيام
رماد تظل خيمنه .. وحيره نحتار
ولا رجوه بزلمنه .. وحيره نحتار
تجي تأمن رعبنه .. تسد وحشة گلبنه
ها يبو تراب
≈≈≈ ≈≈≈ ≈≈≈ ≈≈≈ ≈≈≈
غداً راح ،، النياح ،، ايتعاله وابد ما يهدأ نياحي
والاسباب ،، الاحباب ،، يذبحوهم مثل ذبح الاضاحي
يحيدر ،، والاكبر ،، يطيح وتِبتدي اول جراحي
والقاسم يحَنّونه ،، بالدم ويزفونه ،، بالاشفار ،، يكرار
سهم يمزگ الجربه ،، وتتبده اعله هالتربه .. وتشب نار ،، يكرار
گبل ذبحة زلمنه .. اويانه ردناك
وگبل طيحة علمنه .. اويانه ردناك
گبل شِدّة حربنه .. تسد وحشة گلبنه
ها يبو تراب
≈≈≈ ≈≈≈ ≈≈≈ ≈≈≈ ≈≈≈
اسمعت هاي ،، ومشه الراي ،، وحرت مدري شگولن والحچي ضاع
يبو حسين ،، الحسين ،، برمح راسه وتظل جثته اعله هالگاع
اشوفه ،، اطوفه ،، ومن ظَهر الهزيله يصير الوداع
تبقه بالگلب حسره ،، قُبلة منحره وصدره ،، ونخليه ،، جرح بِيه
لا مو بس جرح هيّه ،، جروحه الف وتسعميّه ،، شنداويه ،، جرح بِيه
تعال اجمعنه شملنه .. با چر نضيع
بغرب ما غيرك النه .. باچر نضيع
وگبل دمعة عتبنه .. تسد وحشة گلبنه
ها يبو تراب
≈≈≈ ≈≈≈ ≈≈≈ ≈≈≈ ≈≈≈
بنحيبي ،، بلهيبي ،، أنه اركض حافيه واعثر بهمي
الى التل ،، من اوصل ،، يبويه اوصي التراب يراعي جدمي
ويضمني ،، ويطمني ،، اذا يسمع عدونه يشتم أمّي
ولا يچوي جِدَم ثَكله ،، ولا يعمي نَظَر طِفله ،، ايعَضِد كون ،، اليضيعون
يدلّيهم على مهرب ،، لو يرجِعهم لزينب ،، يمِد عَون ،، اليضيعون
وتجن اوحش مسيه .. وصوتي ينخاك
العدو حارس عليه .. وصوتي ينخاك
ويظل كل سا يسبنه .. تسد وحشة گلبنه
ها يبو تراب
≈≈≈ ≈≈≈ ≈≈≈ ≈≈≈ ≈≈≈
ياسر حسن
ذو الحجة¹⁴⁴⁵
BY ياسر حسن || Yasser Hassan
Share with your friend now:
tgoop.com/ysrhs/1170