tgoop.com/ysrhs/1220
Last Update:
آه يا عقيلة بني هاشم
≈≈≈ ≈≈≈ ≈≈≈ ≈≈≈ ≈≈≈ ≈≈≈
آه اعلَه من هامَت بنص الهيمه
وسِمعت فَرس يصهِل بكِتر الخيمه
يصيح (الظليمه) (العطش) والله اهضيمه
شگربه النهر بس صار بُعد الغيمه
حسينچ تركته برمل نايم
آه يا عقيلة بني هاشم
≈≈≈ ≈≈≈ ≈≈≈ ≈≈≈ ≈≈≈ ≈≈≈
آه اعله من صاحت هَلي لِحگوني
حرگو خيامي اعليّه واتولّوني
وصاحت ينار اعله الفواطم هُوني
(يانار برداً وسلاماً كوني)
برداً على ايتام علي وفاطم
آه يا عقيلة بني هاشم
≈≈≈ ≈≈≈ ≈≈≈ ≈≈≈ ≈≈≈ ≈≈≈
آه عالتدوّر مِسَت وسط الحومه
حسين ولِگتّه منغسِل بدمومه
وگالتله اجيتك والطرق ملزومه
اگعد يخويه طولّيت النومه
البجسمه ما صح كِتِر سالم
آه يا عقيلة بني هاشم
≈≈≈ ≈≈≈ ≈≈≈ ≈≈≈ ≈≈≈ ≈≈≈
آه عالصُفت فوگ الهزل مچتوفه
ونِشدت نروح المَن وهِي مخطوفه
جِفلت لَمَن گالولهه للكوفه
اتصدّع گلبهه وانكسر من خوفه
بالكوفه تعرف شني الوادم
آه يا عقيلة بني هاشم
≈≈≈ ≈≈≈ ≈≈≈ ≈≈≈ ≈≈≈ ≈≈≈
من وگفت بمجلس ابن مرجانه
وكِل الشماته انجمعت بديوانه
لحاميهه صاحو زينبك بِحمانه
اهنانه اطّلع الآه كِلهه اهنانه
واشعر سبيهه بدمع ساجم
آه يا عقيلة بني هاشم
≈≈≈ ≈≈≈ ≈≈≈ ≈≈≈ ≈≈≈ ≈≈≈
تكبر الآه وتعتلي صرخاتي
صدري يضيگ وتِتسع عبراتي
ويطول نوحي وتگصر حچاياتي
من دِخلت اعله ابن الدعي مولاتي
دخلت اسيره بقصر ظالم
آه يا عقيلة بني هاشم
≈≈≈ ≈≈≈ ≈≈≈ ≈≈≈ ≈≈≈ ≈≈≈
الآه اعله زينب ما مشت عن بالي
من عاودت لاوطانهه بلا والي
من طبّت الدار ودمعهه يلالي
والدار من العايزتهم خالي
وحشه ومظلمه وحزن دايم
آه يا عقيلة بني هاشم
≈≈≈ ≈≈≈ ≈≈≈ ≈≈≈ ≈≈≈ ≈≈≈
ياسر حسن
رجب الأصب ¹⁴⁴⁶
BY ياسر حسن || Yasser Hassan
Share with your friend now:
tgoop.com/ysrhs/1220