tgoop.com/ysrhs/1229
Last Update:
سلامي سلامي .. لحبيبي وامامي
وتحيه لمَقامه
=== === === ===
يهل العشگ شوفوني ،، بَسمه وفرح بعيوني
واتوردت وجناتي
ثوب الحزن ذبيته ،، والمحفل اتعنيته
وشوگ وأمل خطواتي
صوتي يِشدي ،، مهدي مهدي ،، ويصدَح بطاريّه
هَلا بتاجي ،، وبعلاجي ،، والنفَس والريّه
هلا بصبحي ،، وشفه جرحي ،، وگمر عمري وضَيّه
الجماله الجماله .. العِشگ والجلاله
فُرَض احترامه
=== === === ===
الما عنده خِل ينتظره ،، شينفع وجوده وعُمره
واليا بشاره يناطر؟!
بيمن يفَرح گليبه ،، الماعاش عصر الغَيبه
ما عنده امل عن باچر
يضيج خلگه ،، يعيش خنگه ،، الما سَهر بسنينه
وما يتاني ،، ولا يعاني ،، وما تشوبح عينه
ما هو مثلي ،، بهجه كلّي ،، ومنتظر مهدينه
اعله ناره اعله ناره .. الگلب بانتظاره
اشتعل من هيامه
=== === === ===
اليوم انولد اليشافي ،، الجرح الغميج الغافي
بصدر الذي يحبّونه
اليرفع لواء اجداده ،، وايعلّي روس الساده
ويفني الذي يبغضونه
اليوم يومي ،، يا همومي ،، ولّن امشن غادي
ارد اهوّس ،، واشعر بحِس ،، مُرهَف بإنشادي
ارد اغرّد ،، عندي مولِد ،، ضوه عيون الهادي
تهاني تهاني .. ورجاء وأماني
وفرج وابتسامه
=== === === ===
حبي وغرامي قائم ،، حتى ظهور القائم
يكثرن اذا صح شوفه
تگول الرواة اوصافه ،، اتجنّن يعشگه الشافه
عيوني علي ملهوفه
ارد انظره ،، بكل مسرّه ،، واستمع لاقواله
ربي عجّل ،، خلني اقبّل ،، يمنته وشماله
بشوگ يغلي ،، ابقه اصلّي ،، عالرسول وآله
شحلاته شحلاته .. بخصاله وصفاته
امير الوَسامه
=== === === ===
من يظهر احنه نريده ،، اعله گلوبنه يحط ايده
يطهّرهه ويقويهه
يظهر ونسمع وصوته ،، يفرحون حتى الموته
قسط وعدل يمليهه
يلّه يلّه ،، هلّه هلّه ،، بالفرح يا شيعه
غردو غردو ،، ودّو ودّو ،، لابو صالح بيعه
اسمه اسمه ،، رسمه رسمه ،، بهالوجود انذيعه
ونِعَلمه نِعَلمه ،، اليجهله نفهمه
معاني الإمامه
=== === === ===
ياسر حسن
شعبان ¹⁴⁴⁶
BY ياسر حسن || Yasser Hassan
Share with your friend now:
tgoop.com/ysrhs/1229