tgoop.com/ysrhs/1231
Last Update:
الدنيا شبيهه .. لو ما حبّك
ولو ما اسمك .. ودوم اندبك
ميتين احنه .. نحيه بقربك
يــا حيــــــــــــــدر " يــا حيــــــــــــــدر
••• ••• ••• ••• ••• ••• ••• ••• ••• •••
يا ضياء بدنيا عتمه ماكو غيرك بيهه لامع
واعترف لو ما وجودك اول الناس آنه ضايع
چا ضعت ضيعت الگلك موش الاول انت رابع
ومدري المن انطي گلبي والمن بدمّي ابايع
ياهو اليسوه .. انطي روحي
ومن يستاهل .. نزف جروحي
بس انت اهوه .. موتي بدربك
يــا حيــــــــــــــدر " يــا حيــــــــــــــدر
••• ••• ••• ••• ••• ••• ••• ••• ••• •••
مَحلَه لمتنه بضريحك نطوف گبرك چن نوارس
الشايب بواهس يجيلك بخدمتك ماله منافس
يزور يخدم يمشي يلطم يبچي يركض عالمجالس
وهَو ابّيته يضيج خلگه بعمره دونك ماله واهس
تخدمه عياله .. لاچن يمك
يرجع حيله .. وهو يخدمك
يگلك قوتي .. بشمة تربك
يــا حيــــــــــــــدر " يــا حيــــــــــــــدر
••• ••• ••• ••• ••• ••• ••• ••• ••• •••
وين اكو مخلوق غيرك الكعبه مهده بالولاده
وثبّت الاسلام سيفه وساجد ونال الشهاده
ومنهو مات وقسم "فزتُ" وحصّل بموته مُراده
و وين اكو انسان اذكره وينحسب ذكره عباده
مولاي ارحم .. امي الغذت
حبك ليّه .. ويا ما تعبت
واسقي الوالد .. بچف من عذبك
يــا حيــــــــــــــدر " يــا حيــــــــــــــدر
••• ••• ••• ••• ••• ••• ••• ••• ••• •••
تسوه بالخندق ضربتك اعبادة الثَقلين كلهه
چا شتسوه انت يحيدر !؟ الضربه بس ها گد ثِقلهه ؟!
تتعب اقلام التِنِعتك وتعجز وتِخفُق جُملهه
يعرفك الباري ورسوله المعرفه المحّد وصلهه
وانه بقَدرَك .. جاهل قاصر
بس بعشگك .. كلش شاطر
يامن گلبي .. فدوه الگلبك
يــا حيــــــــــــــدر " يــا حيــــــــــــــدر
••• ••• ••• ••• ••• ••• ••• ••• ••• •••
عدل ميّت آنه يمّك عله كل حال اعتنيلك
اخسر آخرتي ودنيتي وماكو اليعوض بديلك
حچايه عندي شما ازورك عله اجدامي حين اجيلك
من اجي مشيول بجنازه إحضرني هالساعه دخيلك
بسكرة موتي .. إحضر و إحضر
بوحشة لحدي .. ويوم المحشر
تشفع لَيّه .. هناك محسبك
يــا حيــــــــــــــدر " يــا حيــــــــــــــدر
••• ••• ••• ••• ••• ••• ••• ••• ••• •••
عميه عينه وگلبه اعمه الما بصر نورك يحيدر
عجب ما هزّه جمالك وشال سيفه وبي تجسّر
وانطبر راسك بحقده وگلب ايتامك تفطّر
العيد اجه والفقره صاحو لا هلا بهالعيد الاگشر
ودمعة زينب .. تجري بحسره
ترسم باب و ضلع وطبره
يا غربتهه .. شگد اتعذبك
يــا حيــــــــــــــدر " يــا حيــــــــــــــدر
••• ••• ••• ••• ••• ••• ••• ••• ••• •••
ياسر حسن
شهر رمضان ¹⁴⁴⁵
BY ياسر حسن || Yasser Hassan
Share with your friend now:
tgoop.com/ysrhs/1231