tgoop.com/Advokat_Abdullayev/1636
Last Update:
Муносабат билдирилганлигига "респект", бироқ ...
Самарқанд вилояти судлари | Расмий каналида биз ёзган танқидий фикрларга муносабат билдирилганлигини очиқлик сифатида эътироф этамиз.
Иштихон туман Электр тармоқлари корхонаси раҳбари У.Жўраев, маърузачи судья Зафар Ибрагимовнинг тоғаси эканлиги тан олинди, бироқ уни жиноят ишида иштироки бўлмаганлиги сабабли ишнинг холисона кўриб чиқилишига таъсир қилмаслиги, бу судьянинг холислигига ва беғаразлигига шубҳа туғдирадиган ҳолат эмаслиги урғуланган.
Аввало, судлов ҳайъати ишни кўришда раддияни рад этишни асослантира олмасдан, шунчаки рад этилди деган хабар билангина чекланиб, ишни кўришни давом эттирган эди. Факт эса, тасдиқланди. Сабаби айблов эпизодларидан бири - Иштихон туман Электр тармоқлари корхонаси фаолияти билан боғлиқ эди. Ана шунинг учун ҳам судьянинг холислиги ва беғаразлигига шуҳба асосли равишда юзага келди. Ҳар ҳолда, ҳар қандай инсон ўз тоғаси ва унинг қўл остидагиларга табиий равишда, истар-истамас ён босиб қўйиши турган гап.
Муносабатда шунингдек, гўёки жиян яқин қариндош ҳисобланмаслиги маърузачи судьянинг холислигига шубҳаларни асоссиз дейиш учун етарли бўлишига ишора қилинибди.
Кечирасиз-ку, аввало процессуал қонунчилик фақат яқин қариндошлик риштасигина бундай шубҳага асос бўла олишини назарда тутмайди. Нафақат қариндошлик риштаси, балки бошқача ришталар, масалан, курсдошлик, синфдошлик, ўртоқлик, гап-гаштакларда бир давраларда мунтазам бўлиб келганлик фактлари ҳам, шунингдек, ўртада мулкий ёки номулкий алоқалар, олди-берди муносабатлари борлиги факти ҳам, ноодатий яқинликни ифодаловчи бошқа фактлар ҳам бундай шубҳани асосли эканини тасдиқлаши мумкин.
Қолаверса, муносабатда биз билдирган эътирозларимизнинг ҳар бирига алоҳида тўхталиб ўтилмаган.
Масалан, охири 8 нафар шахснинг исми-шарифини келтириб, сўроқ қилинишини сўраб, тақдим этган илтимосномамиз улар судда сўроқ қилинганлиги важи билан рад этилди. Ваҳоланки, илтимосномамизда уларга иш учун аҳамиятга эга янги саволлар туғилганлигини келтириб берган эдик. (ЖПК 108-м 6-банди)
Устига устак улардан 4 нафари эса, судда умуман сўроқ қилинмаган ҳам эди.
Шу каби раддияларни тезкор рад қилишлар, алоҳида процессуал ҳужжат сифатида расмийлаштиришга улгурилмаганлик, 4 ойлик муддат самарасиз ўтиб кетганлиги каби эътирозларимиз ҳам шунчаки эътибордан четда қолдирилибди.
Тафтиш ўтказишда маъно бўлсин!
@Advokat_Abdullayev
BY Advokat Abdullayev | Rasmiy
Share with your friend now:
tgoop.com/Advokat_Abdullayev/1636