tgoop.com/Fadfadah98/2985
Last Update:
📌الخوف والتردد؟
اول حاجة كدا عايزاك تتيقني تماماً بأنو الخوف والتردد مشاعر طبيعية جداً موجودة فينا كلنا كبشر ، أو ك تعميم أوسع..
كل المخلوقات ال خلقها ربنا دي بتخاف وبتردد.
التردد والخوف بيجينا لمن نكون مُقبلين لموقف، تجربة أو قرار جديد كلياً علينا ، أو لما بنبقى خلاص مُستقلين بأنفسنا بعدما كُنا في فترة لسه أطفال عندنا في حياتنا ال بيتخذ عننا القرارات والخيارات..
انتي في فترة اكيد كنتي مرتاحة لانو في زول كان بيتخذ القرارات دي عنك ، سواء ام، أب ، اخوانك الكبار او من كان "ولي الأمر "عنك..
والطبيعي انو بعد فترة لازم تبدي تتخذي قراراتك عن نفسك، حتى لو الحوليك م كانوا راضين بالحاجة دي، أو حتى لو اتختيتي في ظروف جبرتك تتخذي قرارك بنفسك.
كل العليك انو تكوني متأكدة جداً بانو اي قرار تتخذيهو في حياتك مهما كانت النتيجة ف انتي ماف زول ليهو حق يلومك أو يعنفك بأي اسلوب ولا حتى تخلي زول يأثر عليك.
الغلط دا واقع مننا كلنا ماف زول في الدنيا دي م بغلط، احنا مخلوقات، خُلقنا ب ضعف ونقص والكمال لله سبحانه وتعالى وحده.
كل تجربة أو قرار تتخذيهو هو بمثابة دفعة ليك ، ودرس حتستفيدوا منو المرة الجاية لم تتختي في موقف مُشابه، أو تجربة مشابه، أو حتى لم تقابلي حد في حياتك ويستشيرك في اتخاذ قرار لنفس التجربة ال انتي كنتي مريتي بيها.
الدنيا دي مدرسة، وكلنا بنتعلم منها ولينا حق نغلط ونتعلم.
امك وابوك اكتر خبرة منك لأنهم أكبر منك عمراً، ومش بس العمر كافي...
لأ،
اكتر خبرة منك لانهم عاشو تجارب اكتر من تجاربك، واتختو في مواقف وقرارات كتيرة في مختلف مراحل حياتهم ، ف بالتالي هم اتعلموا واكتسبوا خبرة.
(الدنيا=مدرسة)
وجا الدور عليك انتي كمان تبني خبرتك الخاصة، وعموما حيجي يوم ياعزيزتي تبقى أم بإذن الله، وتتخذي قراراتك بنفسك انتي وزوجك عن أطفالك لحد ما هم كمان يصلو للسِن المناسبة ويقدروا يتخذوا قراراتهم بنفسهم. ♥️
وح اديك سر عجيب ومميز حيفيدك كتير..
ألا وهو" الإستخارة. "🌸
بدل من أنو تتعودي تاخدي الأراء من الحوليك وتخلي غيرك يتخذ ليك قراراتك، ليه ما تلجئي للأعلم وصاحب الحكمة؟!
استخيري كلما تكوني عايزا تاخدي قرار في أي حاجة، مهما انتي كنتي شايفاها صغيرة وتافهة ، تخيلي معاي زمان الصحابة (رضوان الله عليهم) كان الواحد فيهم بيستخير لم يكون ماشي يشتري مِلح!
أنا بعرف وحدة بتستخير حتى لم تكون طالعة و عايزا تركب المواصلات تخيلي؟! وتعلمت منها انا كمان اني استخير حتى لم اكون طالعة انا ومحتارة البس شنو، وياتو طرحة ح تناسب لبسي😂، ولم كنت ممتحنة وم عارفة ابدا ب ياتو مادة أو شيت..
الإستخارة دي م لازم تصلي فيها الركعتين بعدين تقولي دعاء الاستخارة، لا في مواقف م بتقدري فيها تصلي أو اوقات بتبقى صعبة الصلاة فيها، ف انتي بس بكل يقينك واعتمادك وتوكلك على ربنا استخيري، وأنا متأكدة انو اي قرار بعداك حيكون هو الصح، مهما كانت النتيجة.
ح انزل ليك بعد البوست دا مقال بقدم ليك 13 نصيحة تساعدك تتخلصي من الخوف والتردد.
🔹ودعاء الإستخارة، وكيفية صلاة الإستخارة دا الرابط حقو.👇🏻
https://www.islamweb.net/ar/fatwa/132298/
https://www.tgoop.com/Sudaniislam/11546
محبات مني لك جدا جدا ♥️.
#تنزيل_صابر.
@Fadfadah98.
BY It's Tanzeel ♡.
Share with your friend now:
tgoop.com/Fadfadah98/2985