tgoop.com/Fadfadah98/3127
Last Update:
- عشان تثقي ف نفسك و تقويها اوعك تقارني نفسك بزول أبداً .
ما تختي مجال أصلا للمقارنة بينك و بين زول تاني نهاي، و برجع و اقول ليك حتي لو قارنوك بزول الناس الحوليك ، انتي ما تسمحي لنفسك انك تتاثري لالمقارنة دي.
بس معليش احنا كبنات عندنا حتة الغيره دي و موضوع المقارنات، بنقارن روحنا ب فلانه السمينة وهي ضعيفة، بتشوف فلانة استايلها كيف و عاوزه تبقي زيها، السمرا بتشوف فلانه حلبية و عاوزه تكون زيها 🤦🏻♀.
انتي لمن تدخلي نفسك ف مقارنات بينك و بين الناس عمرك ما ح تصلي ل ثقتك ف نفسك ، عشان وقت تقارني روحك ب فلانه و تصلي مرحلتها بكرة برضو ح تشوفي تانيه واحده احلي و عاوزه تكوني زيها ف ح تفضلي في حلقة ماليها نهاية و هوس ..🤷🏼♀️
العلاج انك تقارني نفسك بنفسك. ❤️
= كيف يعني نفسي بنفسي؟؟؟
يعني تقارني نفسك بالسنة الفاتت، كنتي وين و اسي وين ؟؟
مثلا لو سمينه عاوزه تخسي شوفي نفسك زمان وزنك كان كم و اسي بقيتي كم؟
دا الدافع البخليك تخسي مثلا بس لكن كونك تحي تقارني وزنك بوزن فلانه ف دا غلط ❌ بولد جواك شعور بعدم حبك لذاتك فهمتيني صح؟
نهاي ما تقارني نفسك بزول ابدا ابداااا اجتهدي تطلعي من نفسك افضل نسخه منك موش افضل من فلانه ولا علانة.
- اتعلمي تفصلي بين راي الناس فيك و رايك انتي في نفسك ❤️
= كيف يعني؟؟
يعني الناس شايفاك شينه مثلا او قصيره او او ....الخ ايا كان نظرتهم نوعها شنو ، هل راي الناس دا بمثل رايك انتي علي نفسك ؟؟
هل انتي فعلا شايفه نفسك شينه زي ما بقولو ؟؟!
اذا بديتي تشوفي نفسك كدا، أو فعلاً شايفة نفسك كده ف دا انتي عندك عدم ثقه ف نفسك بنسبة كبيره جداً.
حاولي الحقي نفسك سريع 😭
- من هنا بنصحك انك تبعدي من الناس السلبيه الكلامها سلبي، قربي من الناس البقولو ليك كلام حلو و جميل و بطيبو الخاطر عشان تصدقي انك قويه و جميله ( وانتي أصلا جميلة وقوية صدقيني). 💛
- قولي ل نفسك عبارات ايجابيه عشان تحبي نفسك .
❤️مثلاً ما تجي تقولي " انا سمينة، بس واثقه في نفسي و بحبها. "
كدا غلط!!
دي جمله سلبية بدليها ب انك تقولي : " حلوه و جميله واثقة ف نفسي ."
ما تدخلي الصفات السلبيه عشان ما تصدقيها سريع.
- صدقي انك جميله و قويه و متقبلة جسمك و شكلك و طبعك و اي صفه فيك بكل حب و رضا. ❤️
يعني صدقي انك جميله و تبدي العمل الفعلي علي نفسك و تشتغلي علي نفسك بدون مقارنات و بدون جلد ف ذاتك و تحطيم لنفسك.
تبدي تعملي رجيم و تخسي..
تهتني ب شكلك (في ناس بتكوس السمنة دي والله 😂)
تطوري نفسك..
تثقفي نفسك ...الخ 💛.
- اياك تختي معايير مثاليه عشان تصلي للثقة. ❤️
الثقه ف النفس يعني مثلاً ما تقولي : " انا لمن اضعف ح ابقي واثقه ف نفسي ."
أو " انا لمن انجح و اتخرج و اتوظف ح ابقي واثقه ف نفسي."
❌دا كلو غلط!!
الثقه ما تربطيها بمعايير، لانو المعايير غير ثابته و بتتغير كل مره ف انتي ح تلقي نفسك ف دوامه مع نفسك كل مره و ح تلقي انك واقفه محلك ما عملتي شي و ح تزداد حالتك سوء.
- العلاج الاخير ...
ركزي علي نقاط القوة عندك ❤️.
ما تركزي علي نقاط الضعف عندك، اي زول عندو نقاط قوة و نقاط ضعف ، اصلا نقاط الضعف دي هي البتكون مسببه ليك مشكله عدم ثقتك ف نفسك، يلا انتي تعملي خدعه ظريفه ل عقلك البخليك دايما تفكري في نقاط ضعفك ..
قومي شوفي نقاط قوتك شنو!؟ و مميزاتك شنو ف شخصيتك و ف حياتك؟!
و ما تقولي لي ما عندي نقاط قوه دي حاجه مستحيلة 😒 اي زول عندو نقاط قوه بس انتي ما قدرتي تكتشفيها.
حاولي انك تعرفيها و ابدي اشتغلي عليها اكتر ب انك تطوريها و تنميها لانو الحاجه دي بترفع من ثقتك ف نفسك جداً....❤️
اتذكري :-
الحل بيدك انتي و انتي البتحطمي نفسك براك و انتي القادره تعالجيها و تنفضي الغبار منها و ترجعي ثقتك ف نفسك. ❤️
انتي البتختاري انك تبقي ضعيفه و تسمحي ل كلام الناس ياثر فيك و مشاكل الحياه توقفك ف محلك او انك تبقي قويه و تهزمي صراعاتك النفسيةو تهزمي معارك الحياة .
#مشكلة_وحل
#سلسة_كيف(3)
#الثقة_بالنفس.
#Hoola_Moh.
@Fadfadah98.
BY It's Tanzeel ♡.
Share with your friend now:
tgoop.com/Fadfadah98/3127