tgoop.com/Fadfadah98/3515
Last Update:
📌 ٥ حاجات تقولها لنفسك وتعملها لما الإكتئاب يضغط عليك:-
معظم الناس اللي بيجيلها إكتئاب مبتبقاش عارفه انهم عليهم مسؤوليه انهم يخرجوا نفسهم من الحاله دي وعندهم إمكانيات مش بيفعلوها وممكن تساعدهم.
(ده لحالات الإكتئاب الخفيف بس، لو الإكتئاب عالي أو جسيم في الحاله دي لازم الشخص يستعين بمساعده متخصص).
1_ أنا مش لوحدي💚 :
كرر الكلمه دي في دماغك كتير وصدقها لأنها حقيقه.
وده لسببين:-
١/ أولهم إن ناس كتير بيعانوا في وقت من الأوقات في حياتهم من حاله الإكتئاب ومعروف إنه مرض شائع.
٢/ تاني حاجه "أنا مش لوحدي" ممكن يكون معناها إن حواليك ناس عندهم استعداد يسمعوا ويفهموا بس إنت اديهم الفرصه يساعدوك، بس انت محتاج تختارهم صح.
وحط ١٠٠ خط تحت كلمه " صح" 👆.
2 _قول : "انا عندي اكتئاب" ولا تقل "انا مكتئب" 💚
هتفرق؟؟
اه هتفرق كتير..
الإكتئاب حاله أو مرض بيجيلك بس ومينفعش تتوحد معاه ويبقى صفه بتلصقها بنفسك.
فكر معايا لما بيجيلك دور برد بتقول ايه؟
"انا عندي انفلوانزا" مبتقولش " انا انفلوانزا" صح؟
طيب ليه مهم انك تقول كده؟
لأن توحدك مع حاله الإكتئاب بيخلي من الصعب جدًا انك تشتغل عليها، لأنك شايفها جزء أصيل من كيانك، لكن لما بتحطه في إطاره الطبيعي بتعرف تتعامل معاه، وده بنسميه التباعد بينك وبين المرض distancing.
3_ الإمتنان💚 :
الإمتنان في حالتك مش اختيار ولا تعبير جميل عن الرضا بالحال بس .. لأ .. في حالتك هو tool تعرف تطلع بيها من دوامه الإكتئاب..
الإكتئاب بيخليك مبتشوفش حواليك غير الأشياء السلبيه أو الحاجات اللي ناقصاك، وبتعمل فلتره سلبيه negative filtering .. وهنا ييجي دور الإمتنان إنه بيحول الfocus بتاعك ويخليك وانت قاصد بتدور على الحاجات ولو حتى القليله الإيجابيه في حياتك وتمتن لوجودها.
4_ حدد مسؤوليتك عن الأحداث والمشاكل اللي بتحصلك في حياتك💚:
في خطأ من أخطاء التفكير الإكتئاب بيوقعك فيه علشان يكبر أكتر جواك وهو "العزو الداخلي" أو "لوم الذات"..
بتبقى شايف إن أي موقف سلبي بيحصل بتبقى أنت السبب فيه..
أي غلطه ولو بسيطه تبقى غلطتك ومسؤوليتك وده بيولد احساس بالذنب عميق.
وده محرك كبير أوي للإكتئاب..
مارس الموضوعيه قدر الإمكان وخليك رحيم بنفسك وحتى يا سيدي لو غلطت وماله؟ متعلقش لنفسك المشانق.
5_سامح نفسك💚:
لا بجد سامح نفسك..
خد قرار واعي بس من قلبك مش من عقلك إنك تسامح نفسك..
بلاش تشغل اسطوانه المتنمر اللي جواك علشان هو ما بيصدق وبيمارس هوايته المفضله في جلدك بدم بارد..
سكته أو اخرسه..
رد عليه وقوله كفايه انا سمعتك كتير ومستفدتش حاجه غير احساس بالذنب والخذي..
احمي طفلك الداخلي من بلطجته وطبطب عليه ورجعله ثقته في نفسه.
وکمان في الآخر أحب اقولك أن مفيش مشاعر صح ومشاعر غلط، كل شعور في الدنيا اتوجد علشان بيوصل رساله..🌸
اتعلم من التجربة وشوف محتاج تشتغل على ايه جواك علشان متغرقش في الحاله دي تاني.
#مشكلة_وحل.
#اكتئاب.
- رانيا شكري Rania Shoukry
@Fadfadah98.
BY It's Tanzeel ♡.
Share with your friend now:
tgoop.com/Fadfadah98/3515