tgoop.com/Fadfadah98/3978
Last Update:
سلسلة
#مودة_ورحمة❤️
الفصل (11)
#التربية💛🌸
والله الكِلمة دي كبِيرة شديد ياااخوانا لدرجَة إنو البوست دَا ضيِّق جداً من إنو يشيلهَا ، كِلمة حقيقي مفروض تكون عاملة كدا زي الفرامِل لأي واحد مُندفِع للزواج بدُون تفكِير وتأنِّي..
حرفِياً الواحِد لو عايز حاجة تخليهو يحِسّ بالمسؤولية الحقيقية الفي الزواج يقرَأ عن التربية.
طفِل جَديد لنج ، عقل فاضي وروحو فاضية ، إنتِ ومرتَك الحتملوا البني آدم دا والمُجتمع بتِم الباقِي ، ويادي المُصيبة لو كان البيت قيمُو مهزوزة والبيئَة الحواليهو زفت.
(التربِية = المسؤُولية = حياة إنسان.)
مَرحلة الطفُولة مُهمة جداً لغرس أي مفهُوم سواءً كان عقِيدة ولاّ عِلم ولاّ صحة ولا غيرو ؛ وممكن العكس💔
ما عايزة أمعطكم بإنو الأطفال ديل ياهم مُستقبل بكرة ، وإنهم آباء وأمهات المستقبل وإنو..... وإلخ
كلنا عارفين كدا
● نحنَ كمجتمع -الأغلبية ما الكُل- عندنا خَلل كبِير في موضوع التربية دا ، وتقريباً لو ما كان في حاجة اسمها مَدرسة إمكن كان الوضع حيكُون أسوأ بكتييير ، أنا بعرف أطفَال والله ربتم المدرسَة بس ، ناس البيت غير الأكِل والشَراب والضرِب ما كانوا بيعملوا ليهم أي شئ تاني ، شايفين إنو كدا خلاص!!!
عندنا الواحد وفَّر لطفلو الأكَل والشراب وهدُوم العيد وحاجَات المدرسة معناها خلاص دا أب تمام ، بيرفكِت عديل كدا ، بس دي ماااا تربية!
دي اسمها رِعاية!
التربية تقويم للسِلوك والتصرُّفات والأخلاقيات بطريقَة متوازنَة ، وغالباً الأطفال بيقلّدوا البشوفوه ، فبالتالِي عشان تربِي طفلك صاح .. محتاج تربِي نفسَك قبلهَا ، مهما أمرتو يعمَل حاجة معينة لو ما شافَك بتعملها مستحِيل يقتنِع بيها كلياً..
يعنِي بإختصار
الرِعاية للجَسد ، والتربِية للرُوح
أي خَلل في تربِية الروح دي يعني خَلل في النّفس ، يعني طفِل مُشوّه نفسِياً
الجانب النفسي دا مُسقط كُلياً عندنا ، ما مُهم ، مع إنو الأهَم ، مع إنو هو الجانب الحيتحكَّم في شخصِية الطفل دا لغاية ما يمُوت💔
● الحاجَة المُلاحظَة مُؤخراً إنو الناس بس شغالَة تعرِّس وتلد ، وتلد ، وتلد ، وتلد ، وتلد ، وتلد ، وتلد ، وتلد...إلخ!! يااخي في واحدات تنظيم ما بينظمُوا!
من حقوق الطفِل في الإسلام إنو يآخُد رِعاية كاملة لمُدة (عامين) عالأقَل بدون ما يزاحمُوا مَولود جدِيد!
كترَة كترة .. بس في الفَاضِي!
تلقى الواحد بانِي ليهو أوضة واحدة وعندو 5 شُفّع! وغالباه الحِيلة
آيي عارفَة رِزقهم على الله دي ما فيها نِقاش ، ولا فِي زول قاليك ما تلِد أطفال كُتار ، ولا فِي زول قاليك جيب قرُوش من مافِي عشان تبنِي ليهم بيت يشيلهم ويرتاحُوا فيهو ؛ أعمل الإنتَ عايزوا بس المُهم تكون قادِر عليهُم ، تكون قادِر تربيهُم ، تكون مَسؤول عن النتيجَة دي
بعرف أُسَر غنية وبيوتهم واسعة وأخلاق عيالهُم في الحضِيض
وبعرِف أسَر تانية مستواهُم تحت المتوسّط زاتو بس عيالهُم مربييِن تربية صَاح ، والله لمن يعجبُوك
الرزِق من الله
والتربيَة علِيك إنتَ ، وعليها هِي❤
● مرات بتساءَل .. هل نحن يا تُرى الناس القال فيهم النبي ﷺ : {فإني مُفاخرٌ بكُم الأُمم يوم القِيامة}
ولاَّ نحنَ النَّاس اللمَن يكون منتظِرنَا عندَ الحوض يقولُوا ليهو :
{إنكَ لا تَدرِي ماذا أحدثُوا مِن بعدِك..}
هل كترتنَا في فايدَة ، ولا بلوَى!!
الواحد بجد مُفترض يسأل نفسو السُؤال دا :
- هل أطفالي ديل حَيكونوا إضَافة كويسة للمُجتمع ، للدين ، للعالَم ولا حيكونُوا عِبء عليه؟!
حيصلحُوه ولا حيفسِدُوه
حيبنوه ولا حيهدِموه!
الإجابة كلها بتعتمِد على نوع التَربية الحيتلقُوها مِنَّك إنت وزوجتك وبس!💛
● ناس كتير مننا بيقولوا إنهم ما حيربُوا أولادهم بنفس الطريقة الإتربوا بيها ، وفِي نفس الوقت هم قاعدِين في مكانهُم ، ما خطُوا ولا ربع خطوَة عشان يحقّقوا الحاجة دي
الفِي البَر ما زي الفي المُوية
لمن تدخل الحياة الزوجية برأس فاضي ما فيهو إلا التعلِيمات الأخدتها من أهلك تتوقّع النتيجة حتكون مختلفة يعنِي!
عايز تغير إسلوبك فعلاً ، أقرأ كتير حولين الموضُوع دا .. وسّع إطلاعَك ، العندَك هسي ما كان عند أهلك زمان..
أكتب تربية الطِفل في أي موقع بَحث وحتتفاجأ بكمية نتائج البحث الحتظهَر ليك... (دورات ، مقالات ، محاضرات ، بوستات ، كتُب ، مراجِع ، فيديوهات..إلخ)📚💕
● الحاجة الأهم العايزة أنبِّه عليها هي إنو الطفِل دا عالأقل مفترَض يكون مُلِم بأساسيات الدين صلاة ، أخلاقيات ،..إلخ ، نحن مُجتمع هشّ دينياً ، الناس أبسط حاجة تلقاهم ما ناقشنها!!
دينا الإسلامي دا شامل بطريقة تحيرك زاتو ، إسلوب لحياة كامِل مُتكامِل..
BY It's Tanzeel ♡.
Share with your friend now:
tgoop.com/Fadfadah98/3978