tgoop.com/Fadfadah98/4037
Last Update:
إدمان مواقع التواصل 💙!
واحدة من الاثار السلبية للسوشيال ميديا هي انها بتوصل لينا احساس #العجز... احساس اننا مجرد مستقبلين للاحداث السلبية..
بنقدر نشاهد ونقرا بس ما بنقدر نحقق تغيير في اللي بنشاهده او اللي بنقراه واذا قدرنا نحقق تغيير فحايكون محدود شديد!
هي ما بتحقق العجز فقط لا بتتعداهو وبتشمل جوانب تانية واهمها ( المشاعر السلبية) اللي اخذناها من الاحداث السلبية اللي اطلعنا عليها ، كلنا بنفتكر ان المشاعر دي بتختفي بمجرد ما نطلع من التطبيق او بمجرد تصفحنا لمقال تاني ، بس للاسف المشاعر دي ما بتختفي بالعكس بتظل موجودة معانا لحدي مانحقق تغيير في الحدث اللي اطلعنا عليهو ده..
غير ان لو م قدرنا نحقق تغيير في الحدث اللي مرينا عليه، المشاعر دي حاتتضاعف وحاتتراكم وتتكبت جوانا!
ربنا لمن خلق الانسان، خلقه بقدرات متفاوته سواء في التحمل او العطاء، وده كان الجزء اللي بميزنا كاشخاص علي بعضنا، احساس ان انا بقدر اتحمل و اقدم اكتر منك، او احساس انو انا م قادر اقدم او اتحمل اكتر منك، بس للاسف مع السوشيال ميديا ميزتنا دي بقت (عيب)!!
لانو بقينا نطلع علي احداث فوق طاقتنا، وبقينا بنستقبل مشاعر سلبية اكبر من قدرتنا علي التعامل معاها ..
- في الحياة اليومية كلنا بنمر بمشاكل، بس كلنا متفقين ان مشاكلنا دي بقت مكررة لدرجة بقينا قادرين نتعامل معاها، ده غير انها محدودة..
بس مع السوشيال ميديا كل شي مختلف، ممكن تمر باحداث سلبية اكتر من الاحداث السلبية اللي موجودة في حياتك، لان في السوشيال ميديا انت ما لوحدك..
👈🏻 ممكن تقول لي عادي، انا بقدر اتعامل مع كل المشاكل و اعدي منها
= بس صدقني لمن اقول ليك لا مش حاتقدر لان ببساطة انت انسان واي انسان عنده حدود لمن يصلها ما حايقدر يتعداها ابدا، ده غير ان كل المشاعر اللي انت بتحس انها اختفت مع نسييانك للموقف هي ما بتختفي بالعكس بتظل موجودة ومكبوتة جواك ، ولمن تصل لمدي تحملك حاتطلع علي شكل اضطرابات نفسية او امراض عضوية او سلوكيات خاطئة زي العدوان وغيره .. الخ
- لمن تستقبل حدث سلبي حاتستقبل مشاعرهو السلبية، ولمن ما تقدر تغير الحدث ده او تطلع المشاعر الاستقبلتها، حاتتوجه المشاعر دي للداخل وحاتبدا تاكلك من جوة لحدي ماتنهيك!! 🤐
فعلشان كده لو لاحظتوا، حاتلقوا ان الراحة الكبري ما بنلقاها الا لمن التلفون يكون مقفول مع ان نحن م رجال اعمال ولا عندنا مشاغل قدر الدنيا، بس بسبب مواقع التواصل مرات بنحس ان حياتنا اصعب من حياة رجال الاعمال .. !!
فاغلب الناس المبسوطة والمرتاحة..
اما مقيدة المحتوي اللي مفروض تشوفه في السوشيال ميديا✅
او مامهتمة بالسوشيال ميديا بتاتا ✅!!
اما الاشخاص اللي مدمنين علي السوشيال وعندهم اصدقاء في السوشيال اكبر من عدد الاصدقاء في الواقع بيكونوا دايما بيعانوا معاناة مضاعفة، لانهم حايكونوا مجبورين يتفاعلوا مع كل الاحداث السلبية اللي بتحصل للناس المصادقنهم او اللي متابعنهم، والحاجة دي للاسف بتاخد كمية كبيرة من الطاقة اللي عندهم.. 💔
وده ممكن يكون اجابة لسؤال..
= هو انا ليه م بعمل حاجة بس بحس برضو اني مرهق وماعندي اي مقدرة علي التركيز في هدفي بالرغم من ان وقتي فاضي ؟!
او اجابة لسؤال..
انا حياتي حلوة داخل البيت وغيره بس بكون علي طول منفسن من غير سبب فشنو السبب؟
او اجابة لسؤال، هو انا طاقتي بتختفي وين؟
👈🏻 انا ما حاقول ليك احذف تطبيقات التواصل الاجتماعي، بس عاوزك تطبق الخطوات دي قدر الامكان :
١_ افتح تطبيقاتك اللي بتستخدمها وابدا بعمل الغاء متابعة لاي صفحة انت مش مهتم بالمحتوي بتاعها، او قوم بحذف اي قناة انت مش مهتم بيها وخلي الصفحات او القنوات اللي انت مهتم بيها وحابب تتابع المحتوي بتاعها.
٢_ بعديها ادخل صفحتك علي الفيس او افتح الواتس بتاعك وابدا الغي صداقتك، او امسح رقم اي شخص انت م قاعد تتواصل معاهو ، او وجوده بياثر عليك بالسلب!
لان صدقني كل الحاجات دي اتعملت علشان راحتك فلمن ما تساعدك علي الراحة يبقي اللي مفروض تلغيها ...
٣_ بعديها اطلع من كل قروبات الفيس، وما تخلي الا القروبات اللي انت فعليا مهتم بالمحتوي بتاعها، لان كل م قللت من عدد القروبات والصفحات والاشخاص كل ما قللتت من عدد الاحداث السلبية اللي ممكن تطلّع عليها..
٤_ اذا شايف روحك ما بتستحمل الاحداث السلبية وبتحسس شديد..
ما تتابع المواضيع السياسية ولا اي محتوي بيشمل الاحداث السلبية، بالعكس خلي الموجود في صفحاتك المحتوي اللي برضيك بس .. 💙
٥_ اذا صفحتك في الفيس مليانة لدرجة انك م قادر تحذف اي حاجة، حاول اعمل صفحة جديدة وضيف الناس اللي انت مهتم بتواجدهم فيها .
٦_ ماتخلي عدد صحابك يزيد عن "500" الا لو الهدف من قناتك او صحفتك في الفيس عدد المتابعييين نسبةً لشغلك او المحتوي اللي انت بتقدمو..
BY It's Tanzeel ♡.
Share with your friend now:
tgoop.com/Fadfadah98/4037